1 Ket napasamak nga imbilinna kadagiti ummong ti panagsardengda nga agkararag, ken kasta met dagiti disipulona. Ket imbilinna kadakuada a saanda nga isardeng ti ^aagkararag iti puspusoda.

2 Ket binilinna ida a bumangon ken agtakderda kadagiti sakada. Ket bimmangonda ket nagtakderda kadagiti sakada.

3 Ket napasamak a nangpirsay manen iti tinapay ket binendisionanna, ket intedna kadagiti disipulona tapno kanenda.

4 Ket idi nalpasda a nangan imbilinna kadakuada a pirsapirsayenda ti tinapay, ket itedda iti ummong.

5 Ket idi naikkandan ti ummong inikkanda pay ida iti arak nga inumenda, ket binilinna ida nga ikkanda ti ummong.

6 Ita, awanen ti ^atinapay, wenno arak, a maited dagiti disipulo, wenno ti ummong;

7 Ngem pudno nga ^ainikkanna ida iti tinapay a kanenda, ken arak nga inumenda met.

8 Ket kinunana kadakuada: Asino man a mangan iti daytoy a ^atinapay kanenna ti bagik iti kararuana; ket ti uminum iti daytoy nga arak inumenna ti darak iti kararuana; ket saanto a mabisinan wenno mawaw ti kararuana, ngem mabsogto.

9 Ita, idi nakapangan ken nakainum ti ummong, adtoy, napnoda iti Espiritu; ket sangsangkamaysada a nangidir-i, ket indaydayawda ni Jesus, a nakita ken nangngeganda.

10 Ket napasamak nga idi nalpasda aminen a nagdayaw ken ni Jesus, kinunana kadakuada: Adtoy, ita nalpaskon ti imbilin ti Ama kaniak maipapan kadagitoy a tao, a natda iti balay ti Israel.

11 Malagipyo nga imbagak kadakayo, ket kinunak nga inton matungpal dagiti ^abalikas ni ^bIsaias—adtoy naisuratda, addada iti sangoyo, ngarud amirisenyo ida—

12 Ket pudno, pudno, kunak kadakayo, nga inton matungpalda isunton ti pannakatungpal ti ^akatulagan nga inaramid ti Ama kadagiti taona, O balay ti Israel.

13 Ket dagiti ^anatda, a ^bmaiwarasto iti nadumaduma a paset iti rabaw ti daga, ^cmaummongda manipud iti daya ken laud, ken manipud iti abagatan ken manipud iti amianan; ket ^dmaam-ammodanto ti Apo a Diosda, a nangsubbot kadakuada.

14 Ket imbilin kaniak ti Ama nga itedko kadakayo daytoy a ^adaga, a tawidenyo.

15 Ket kunak kadakayo, a no saanto nga ^aagbabawi dagiti Gentil kalpasan a maawatda ti parabur, kalpasan ti panangiwarasda kadagiti taok—

16 Iti dayta, dakayonto a natda iti balay ni Jacob, mapankayo kadakuada; ket makilaokkayonto iti ragup ti kaaduan; ket maysakayonto kadakuada a kasla ^aleon iti ragup dagiti ayup iti kabakiran, ken kas urbon ti leon iti ragup ti arban a karnero, a no mapan latta ^bilupeklupek ken girsagirsayenda iti sagbabassit, ket awan ti makaisalakan.

17 Mailayatto dagiti imayo kadagiti kabalubalyo, ket mapukawto amin dagiti kabusoryo.

18 Ket ^aummongekto dagiti taok nga agkaykaysa a kas iti tao a mangummong kadagiti binettekna iti datar.

19 Ta aramidek dagiti taok a kinatulag ti Ama, wen, aramidek ti ^asarayo a landok, ken aramidek ti dapanyo a gambang. Ket adunto ti girsagirsayenyo a tao; ket idatonko iti Apo ti naulloda, ken ti taraonda iti Apo iti sangalubongan. Ket adtoy, siak ti mangaramid.

20 Ket mapasamakto, kinuna ti Ama, a maibitinto ti ^aespada ti lintegko iti ngatuenda iti dayta nga aldaw; ket agrusodto kadakuada malaksid no agbabawida, kinuna ti Ama, wen, uray kadagiti amin a pagilian dagiti Gentil.

21 Ket mapasamakto nga urnosek dagiti ^ataok, O balay ti Israel.

22 Ket adtoy, dagitoy a tao ti urnosek ditoy daga, iti pannakaipatungpal ti ^akatulagan nga inaramidko iti amayo a ni Jacob; ket isunto ti ^bBaro a Jerusalem. Ket addanto ti pannakabalin ti langit kadagitoy a tao; wen, ^caddaakto met iti nagbabaetanyo.

23 Adtoy, siak ti nasao ni Moises, nga agkuna: Mangtudingto ti Apo a Diosyo ^aiti propeta kadagiti kakabsatyo, a mayarig kaniak; denggenyonto ti amin a banag nga ibagana kadakayo. Ket mapasamakto a maisina kadagiti tao ti tunggal kararua a saan a dumngeg iti dayta a propeta.

24 Pudno kunak kadakayo, wen, ken ^aamin a propeta manipud ken ni Samuel ken dagiti simmarsaruno, kas iti kaadu dagiti nagsaon, ti nagsaksi maipapan kaniak.

25 Ket adtoy, dakayo ti annak dagiti propeta; ket addakayo iti balay ti Israel; ket addakayo iti ^akatulagan nga inaramid ti Ama kadagiti ammayo, a kinunana ken ni Abraham: ^bDagitinto bukelmo ti pakaparaburan dagiti amin nga agkakabagian iti daga.

26 Immun-unaak a tinudingan ti Ama ngem kadakayo, ken imbaonnak a mangbendision kadakayo tapno ^amayaonkayo kadagiti basolyo; ket daytoy gapu ta annaknakayo iti katulagan.

27 Ket kalpasan a mabendisionankayo, tungpalenen ti Ama ti katulagan nga inaramidna ken ni Abraham, a kinunana: ^aDagitinto bukelmo ti pakaparaburan ti amin nga agkakabagian iti daga—iti panagburayok ti Espiritu Santo kadagiti Gentil babaen kaniak, a parabur kadagiti ^bGentil a mangaramidto kadakuada a kabilgan iti amin, iti pannakaiwaras dagiti taok, O balay ti Israel.

28 Ket isudanto ti ^adagensen dagiti tao iti daytoy a daga. Nupay kasta, inton maawatda ti pakabuklan ti ebangheliok, ket patangkenendanto ti pusoda a maibusor kaniak isublik ti kinadakes kadagiti uloda, kinuna ti Ama.

29 Ket ^amalagipkonto ti katulagan nga inaramidko kadagiti taok; ket intulagko kadakuada nga ^bummongekto ida iti umno a kanito, tapno itedko manen kadakuada ti ^cdaga dagiti ammada a tawidenda, nga isu ti daga ti ^dJerusalem, isu ti daga a naikari kadakuada iti agnanayon, kinuna ti Ama.

30 Ket mapasamakto a dumteng ti kanito, a maikasaba ti pakabuklan ti ebangheliok kadakuada;

31 Ket ^amamatidanto kaniak, a siak ni Jesucristo, ti Anak ti Dios, ket agkararagdanto iti Ama babaen ti naganko.

32 Ket ingatonto dagiti ^apagbambantayenda ti timekda, ket iti dayta a timek sangsangkamaysadanto nga agkanta; agsipud ta agkikinnitadanto.

33 Kalpasanna ummongento manen ida ti Ama, ket itedna kadakuada ti Jerusalem a daga a tawidenda.

34 Sa maragsakandanto unay—Agtutunoskayo nga ^aagkanta, dakayo nabaybay-an a lugar ti Jerusalem; gapu ta liniwliwa ti Ama dagiti taona, nasubbotnan ti Jerusalem.

35 Impakita ti Ama ti nasantuan a takiagna kadagiti amin a pagilian; ket makita ti amin a suli ti daga ti panangisalakan ti Ama; ket ti Ama ken Siak maymaysa.

36 Ket iti kasta mapasamakto ti naisurat: ^aAgriingka, agriingka manen, ket urnongem ti pigsam, O Zion; isuotmo ti napintas a pagan-anaymo, O Jerusalem, nasantuan a siudad, gapu ta manipud ita saanen nga umay kenka ti saan a nakugit ken ti narugit.

37 Iwagsakmo ti tapok ti bagim; tumakderka, agtugawka, O Jerusalem; rumuk-atka iti silo iti tengngedmo, O balud nga anak a babai ti Zion.

38 Ta kastoy ti kinuna ti Apo: Inlakoyo ti bagbagiyo iti awan kaes-eskanna, ket masubbotkayonto nga awan ti kuarta.

39 Pudno, pudno, kunak kadakayo, nga ammonto dagiti taok ti naganko; wen, iti dayta nga aldaw ammodanto a siak ti nagsao.

40 Ket kunadanto: ^aAnian a nagpintas dagiti saka iti bantay a mangyeg iti naimbag a damag kadakuada, a ^bmangirakurak iti talna; a mangyeg iti naimbag a damag kadakuada a nasayaat, ken mangirakurak iti pannakaisalakan; nga agkuna iti Zion: Agturay ti Diosmo!

41 Ket kalpasanna umawengto ti pukkaw: ^aUmadayokayo, umadayokayo, rummuarkayo manipud ita, diyo sagiden ti ^bsaan a nadalus; umadayokayo iti ikubna; ^cnadaluskayo koma nga agig-iggem iti pagikkan ti Apo.

42 Ta ^asaankayo a rummuar a sipapardas, wenno mapan a tumayab; agsipud ta umun-unanto ti Apo ngem dakayo, ket ti Dios ti Israel addanto iti likudanyo.

43 Adtoy, makikaduanto ti adipenko a siaannad; maitan-okto ken maidaydayaw ken nangatonto unay.

44 Kas ti adu a nasdaaw kenka—nadadael ti rupana, a nakarkaro ngem iti uray asino a tao, ken nabisbisked ngem kadagiti annak ti tao.

45 Isu a ^abisibisannanto ti adu a pagilian; agulimekto dagiti ari, ta makitadanto dagiti saan a naisarita kadakuada; ket utobendanto dagiti saanda a nangngeg.

46 Pudno, pudno, kunak kadakayo, awan duadua a dumtengto amin dagitoy a banag, a kas iti imbilin ti Ama kaniak. Kalpasanna, matungpalto daytoy katulagan nga intulag ti Ama kadagiti taona; ket agtaengto manen dagiti taok iti ^aJerusalem, ket isunto ti daga a tawidenda.