1 Ket ita napasamak nga iti maika-sangapulo-ket-innem a tawen manipud iti yaay ni Cristo, nakaawat ni Lachoneus, ti gobernardor ti daga, iti surat manipud iti dadaulo ken ti gobernador daytoy bunggoy dagiti mannanakaw; ket dagitoy ti balikas a naisurat, nga agkuna:

2 Lachoneus, a kataknengan ken pangulo a gobernador ti daga, adtoy, isuratko daytoy a surat nga agpaay kenka, ket itdek kenka ti nalaus a panagdayawko gapu iti kinatibkermo, ken kasta met ti kinatibker dagiti taom, iti pannakaasikaso dayta rumbeng koma a kalintegam ken pannakaruk-atmo, ken ti sanikuam, ken ti pagiliam, wenno dayta kayatmo nga inaganan.

3 Ket kasla nakakaasi kaniak, kataknengan a Lachoneus, nga agbalinka a nakaro a maag ken awan kaes-eskanna iti panangipapanmo a madaeram dagiti nakaad-adu a lallaki nga agur-uray iti bilinko, a nakasagana itan itoy a kanito, a sumsumga unayen iti balikas—Bumabakayo kadagiti Nephite ket dadaelenyo ida.

4 Ket siak, a makaammo iti di maparmek nga espirituda, iti pannakapadasdan iti tay-ak ti pagbabakalan, ken iti pannakaammok iti awan inggana a gurada kenka gapu iti adu a biddut a naaramidmo kadakuada, ngarud no umayda a mangrubbuot kenka idanonda ti awan duadua a pannakadadaelmo.

5 Ngarud naisuratkon daytoy a surat, a siak a mismo ti mangrikep, a mangrikrikna iti pagimbagam, gapu iti kinatibkermo iti dayta patiem a nainkalintegan, ken dayta natakneng nga espiritum iti tay-ak ti pagbabakalan.

6 Ngarud suratanka, a tarigagayak nga isukom kadagitoy taok, dagiti siudadmo, dagiti dagam, ken dagiti sanikuam, ngem iti isuda ti umay a mangisarungkar iti espada ket mayeg kenka ti pannakadadael.

7 Wenno iti sabali a pannao, sumukoka kadakami, ket makikaysaka kadakami ket mairuamka kadagiti ^analimed nga aramidmi, ket agbalinka a kabsatmi tapno agbalinka a kas kadakami—saan a tagabomi, ngem kabsatmi ken kaduami iti amin a taraonmi.

8 Ket adtoy, ^aikarik kenka, no aramidem daytoy, nga addaan iti sapata, saanka a madadael; ngem no dimo aramiden daytoy, ikarik kenka ti sapatak, nga iti sumuno a bulan bilinek dagiti buyotko nga umay kenka, ket dida pagtalnaen ti imada ken awan ti ibatida, ngem papatayendaka, ket bay-anda nga agdisso ti espada kenka agingga a mapukawka.

9 Ket adtoy, siak ni Giddianhi; ket siak ti gobernador daytoy ^analimed a gimong ni Gadianton; nga ammok a ^bnasayaat a gimong ken dagiti aramid; ket nagtaudda iti ^cnagkauna nga aldaw ken naipaimada kadakami.

10 Ket isuratko daytoy a surat kenka, Lachoneus, ket mangnamnamaak a yawatmo dagiti dagam ken dagiti sanikuam, nga awan ti maibuyat a dara, tapno maisubli dagitoy taok dagiti kalintegan ken gobiernoda, a simmina kenka gapu iti kinadangkesmo iti panangilaksidmo kadakuada iti kalintegan ken gobiernoda, ket malaksid no aramidem daytoy, ibalesko ti naaramid a dakes kadakuada. Siak ni Giddianhi.

11 Ket ita napasamak a napalalo ti siddaaw ni Lachoneous a nakaawat iti surat, gapu iti kinadursok ni Giddianhi iti panangdawatna iti panangtagikuada iti daga dagiti Nephite, ken kasta met ti panangbutbutengna kadagiti tao ken panangibalesna iti dakes nga aramid dagiti saan nga immawat iti dakes, malaksid kadagiti ^apanagaramidda iti dakes iti bagbagida babaen ti ikakayakayda a timmipon kadagiti nadangkes ken makarimon a mannanakaw.

12 Ita adtoy, daytoy Lachoneus, a gobernador, nalinteg a tao, ken saan a mabutbuteng kadagiti dawat ken pammutbuteng ti ^amannanakaw; ngarud dina dinengngeg ti surat ni Giddianhi, ti gobernador dagiti mannanakaw, ngem imbilinna ketdi nga umararaw dagiti taona iti Apo iti pigsa nga agpaay iti panawen a yaay dagiti mannanakaw a mangraut kadakuada.

13 Wen, nangipatulod iti pakaammo kadagiti amin a tao, a pagkaykaysaenda dagiti babbaida, ken dagiti annakda, dagiti arban ken pastorda, ken amin dagiti taraonda, malaksid ti dagada, iti maysa a lugar.

14 Ket imbilinna a mabangon ti trinsera iti aglawlawda, ket aramidenda a makapnek ti tibkerna. Ken imbilinna a dagiti buyot, dagiti Nephite ken dagiti Lamanite nga agpadpada, wenno isuda amin a naibilang kadagiti Nephite, nasken a maibatangda nga agbantay iti aglawlaw a mangsiput kadakuada, ken mangbantay kadakuada kadagiti mannanakaw iti aldaw ken rabii.

15 Wen, imbagana kadakuada: Iti kaadda ti Apo, malaksid no agbabawikayo iti amin a basbasolyo, ket umararawkayo iti Apo, dikayonto a pulos maisalakan kadagiti ima dagiti tulisan ni Gadianton.

16 Ket nakain-indaklan ken nakaskasdaaw dagiti balikas ken padto ni Lachoneus a namagbuteng kadagiti amin a tao; ket inkagumaanda ti bagbagida a mangtungpal kadagiti balikas ni Lachoneus.

17 Ket napasamak a nangtuding ni Lachoneus iti pangpangulo a kapitan kadagiti amin a buyot dagiti Nephite, a mangbilin kadakuada iti kanito a dumteng dagiti mannanakaw manipud iti langalang.

18 Ita natudingan ti kangatuan kadagiti amin a pangulo a kapitan ken ti naindaklan a mangituray kadagiti amin a buyot dagiti Nephite, ket ^aGidgiddoni ti naganna.

19 Ita ugali dagiti amin a Nephite ti mangtuding kadagiti pangulo a kapitanda, (malaksid iti panawen ti kinadangkesda) ti maysa nga addaan iti espiritu ti pammaltiing ken kasta met ti ^apammadto; ngarud, naindaklan a propeta daytoy a Gidgiddoni kadakuada, a kas met iti pangulo nga ukom.

20 Ita kinuna dagiti tao ken ni Gidgiddoni: Agkararagka iti Apo, ket umulitayo kadagiti bantay ken mapantayo kadagiti langalang, tapno makadanontayo kadagiti mannanakaw ket dadaelentayo ida ken dagiti dagada.

21 Ngem kinuna ni Gidgiddoni kadakuada: ^aIpawil ti Apo; ta no mapantayo kadakuada ^byawatnatayo ti Apo kadagiti imada; ngarud isaganatayo ti bagbagitayo iti tengnga ti dagdagatayo, ket pagkaykaysaentayo dagiti buyottayo, ket saantayo a rauten ida, ngem aguraytayo agingga nga isuda ti mangraut kadatayo; ngarud iti kaadda ti Apo, no aramidentayo daytoy yawatna ida kadatayo.

22 Ket napasamak iti maika-sangapulo-ket-pito a tawen, iti arinunos ti tawen, nagwaras ti pakaammo ni Lachoneus iti intero a rabaw ti daga, ket innalada dagiti kabalioda, ken dagiti karuaheda, ken dagiti ayupda, ken amin dagiti arbanda, ken dagiti pastorda, ken dagiti apitda, ken amin dagiti taraonda ket nagnada a rinibu ken pinullo a ribu, agingga a nakadanonda iti lugar a naikeddeng a pangummonganda iti bagbagida, a pangsalaknibanda iti bagbagida kadagiti kabusorda.

23 Ket ti daga a Zarahemla ti naikeddeng a daga, ken ti daga a nagbaetan ti daga a Zarahemla ken ti daga a Bountiful, wen, iti uged a nagbaetan ti daga a Bountiful ken ti daga a Desolation.

24 Ket adda rinibu a tattao a maawagan iti Nephite, a nangummong iti bagbagida iti daytoy a daga. Ita imbilin ni Lachoneus a nasken nga urnongenda ti bagbagida iti daga iti abagatan, gapu iti nakaro a lunod iti ^adaga iti amianan.

25 Ket trinenseraanda ti bagbagida a maibusor kadagiti kabusorda; ket nagnaedda iti maysa a daga, ken sangsangkamaysada ket kinabutengda dagiti balikas nga imbaga ni Lachoneus, isu nga imbabawida amin a basbasolda; ket inturongda dagiti kararagda iti Apo a Diosda, tapno ^aisalakanna ida iti kanito a dumteng dagiti kabusorda a makibakal kadakuada.

26 Ket nalaus ti sakit ti nakemda gapu kadagiti kabusorda. Ket imbilin ni Gidgiddoni nga agaramidda iti ^aarmasda a pakigubat iti amin a kita, ket nasken a nabileg ti salakanda, ken addaan iti saripda, ken addaan iti barikes, a mainugot iti panangiwanwanna.