1 Ket napasamak nga iti arinunos ti maika-sangapulo-ket-walo a tawen nagsagana dagidiay buyot dagiti mannanakaw a makidangadang, ket nangrugida a bimmaba a rumaut manipud iti turturod, ken kadagiti bambantay, ken iti langalang, ken dagiti salakanda, ken dagiti nalimed a lugarda, ket rinugianda a sakupen dagiti daga, agpadpada iti daga iti abagatan ken iti daga iti amianan, ket rinugianda a sakupen amin dagiti daga a ^apinanawan dagiti Nephite, ken dagiti siudad a napanawan a naliday.

2 Ngem adtoy, awan ti atap nga ayup wenno ayup kadagidiay a daga a pinanawan dagiti Nephite, ket awan ti ayup kadagiti mannanakaw malaksid iti langalang.

3 Ket saan a makapagbiag dagiti mannanakaw malaksid iti langalang, gapu iti kasapulanda a taraon; ta pinanawan dagiti Nephite ti dagada a naliday, ken inkuyogda amin nga arbanda ken dagiti pastorda ken amin dagiti taraonda, ket sangsangkamaysada.

4 Ngarud, awan ti gundaway dagiti mannanakaw nga agsamsam ken makaala iti taraon, malaksid ti yaayda a manggubat kadagiti Nephite; ket iti panagsangsangkamaysa dagiti Nephite, ken iti kaaduda, ken insaganaanda ti bagbagida iti abasto, ken kabkabalio ken ayup, ken pangen a nadumaduma a kita, tapno makapagbiagda iti pito a tawen, nga iti dayta a panawen namnamaenda a madadaelda dagiti mannanakaw iti rabaw ti daga; ket kasta ti ilalabas ti maikasangapulo-ket-walo a tawen.

5 Ket napasamak nga iti maika-sangapulo-ket-siam a tawen nakita ni Giddianhi a nasken a mapan makidangadang kadagiti Nephite, ta awan ti sabali a pamuspusan tapno agbiagda malaksid iti panagsamsam ken panagtakaw ken nadawel a panagpapatayda.

6 Ket saanda nga inwaras ti bagbagida iti rabaw ti daga tapno makapatanorda iti apit, amangan ta umay dagiti Nephite ket papatayenda ida; ngarud binilin ni Giddianhi dagiti buyotna nga itoy a tawen nasken a mapanda makidangadang kadagiti Nephite.

7 Ket napasamak a napanda nakidangadang; ket iti maikanem a bulan; ket adtoy, naindaklan ken nakaam-amak dayta nga aldaw a papanda pannakidangadang; ket nakawesanda iti kawes dagiti mannanakaw; ket adda imbarikesda iti lomoda a lalat ti karnero, ket natinada iti dara, ket nakuskosan dagiti uloda, ken adda bistukolda; ket nakaro ken nakaam-amak ti langa dagiti buyot ni Giddianhi, gapu iti salakanda, ken gapu iti pannakatinada iti dara.

8 Ket napasamak a dagiti buyot dagiti Nephite, idi nakitada ti langa ti buyot ni Giddianhi, natuangda amin iti daga, ket indanonda ti ararawda iti Apo a Diosda, tapno isalakanna ida ken iliklikna ida kadagiti ima dagiti kabusorda.

9 Ket napasamak nga idi nakita dagiti buyot ni Giddianhi nagpukkawda, gapu iti ragsakda, ta impagarupda a natuang dagiti Nephite iti butengda gapu iti nakaam-amak a langa dagiti buyotda.

10 Ngem napaayda itoy a banag, ta saan ida a kinabuteng dagiti Nephite; ngem ^anagbutengda iti Diosda ket inararawanda iti pannakasalaknibda; ngarud, idi darupen ida dagiti buyot ni Giddianhi nakasaganadan a mangsango kadakuada; wen, iti pigsa ti Apo inawatda ida.

11 Ket nangrugi ti dangadang itoy maikanem a bulan; ket dakkel ken nakaam-amak daydi a dangadang, wen, dakkel ken nakaam-amak daydi a panagrangkay isu nga awanen ti naammuan pay a nakarkaro a panagrangkay kadagiti amin a tao ni Lehi manipud idi pimmanaw iti Jerusalem.

12 Ket iti laksid dagiti ^apammutbuteng ken sapata nga inaramid ni Giddianhi, adtoy, inabak ida dagiti Nephite, isu a nagsanudda.

13 Ket napasamak a binilin ni ^aGidgiddoni dagiti buyotna a kamatenda ida agingga iti nagbedngan ti langalang, ken saanda a pakawanen ti asino man a matnag kadagiti imada iti dalan; ket kasta a kinamatda ida ken pinapatayda ida, iti nagbedngan ti langalang, agingga a natungpalda ti bilin ni Gidgiddoni.

14 Ket napasamak a ni Giddianhi, a nagtalinaed ken nakiranget a sipipinget, kinamatda bayat ti panaglibasna; ket iti bannogna gapu iti napinget a pannakirangetna nakamatanda ken pinapatayda. Ket kasta ti naggibusan ni Giddianhi a mannanakaw.

15 Ket napasamak a nagsubli manen dagiti buyot dagiti Nephite iti lugar ti talgedda. Ket napasamak a napalabas daytoy maika-sangapulo-ket-siam a tawen, ket saanen a nagsubli dagiti buyot dagiti mannanakaw a nakidangadang; kasta met iti maika-duapulo a tawen.

16 Ket iti maika-duapulo-ket-maysa a tawen saandan nga immay nakidangadang, ngem immayda iti amin a sikigan a nangalikubkob kadagiti tao ni Nephi; ta impagarupda a no maisinada dagiti tao ni Nephi kadagiti dagada, a no maipasulida ida iti tunggal igid, ken no maisinada ida kadagiti amin a kalinteganda iti ruar, tapno maibilinda kadakuada nga isukoda ti bagbagida a maibatay iti pagayatanda.

17 Ita nangtudingda iti maysa a naggapu kadakuada iti sabali a dadaulo, a Zemnarihah ti naganna; ngarud ni Zemnarihah ti nangibilin iti panangalikubkob.

18 Ngem adtoy, nakapasayaat daytoy kadagiti Nephite; ta saan a mabalin kadagiti mannanakaw a mangalikubkob iti umdas a kaatiddog tapno adda kaipasanganna kadagiti Nephite, gapu iti adu nga abasto nga indulinda.

19 Ket gapu iti kakisang dagiti abasto kadagiti mannanakaw; ta adtoy, awananda malaksid iti karne a pagbiagda, karne a naalada iti langalang;

20 Ket napasamak a kimmisang dagiti ^aatap nga ayup iti langalang isu a dandanin mapukaw dagiti mannanakaw iti bisin.

21 Ket nagtultuloy a nagna dagiti Nephite iti aldaw ken iti rabii, ket rinautda dagiti buyotda, ket rinibribu kadakuada ti napapatay.

22 Ket kasta a nagbalin a tarigagay dagiti tao ni Zemnarihah a saanen a mangituloy iti panggepda, gapu iti nakaro a pannakadadael a napasamakda iti aldaw ken rabii.

23 Ket napasamak a binilin ni Zemnarihah dagiti taona a saandan nga ituloy ti panagalikubkobda, ket magnada iti ad-adayo pay a paset ti daga iti amianan.

24 Ket ita, gapu iti pannakaammo ni Gidgiddoni iti panggepda, ken iti pannakaammona iti pagkapsutanda gapu iti pannakasapulda iti taraon, ken ti nakaro a panagrangkay nga inaramidda, ngarud imbaonna dagiti buyotna iti rabii, ket pinutedda ti dalan a pagsanudanda, ket nangikabil kadagiti buyotna iti dalan a pagsanudanda.

25 Ket inaramidda daytoy iti rabii, ket nagnada iti likud dagiti mannanakaw, tapno iti kabigatanna, idi rugian dagiti mannanakaw ti pannagnada, sinabat ida dagiti buyot dagiti Nephite nga agpadpada iti sango ken iti likudda.

26 Ken naputed met ti lugar a pagsanudan dagiti mannanakaw nga adda iti abagatan. Ket naaramid amin dagitoy a banag babaen ti bilin ni Gidgiddoni.

27 Ket rinibribu ti nangisuko iti bagbagina a baluden dagiti Nephite, ket napapatay dagiti nabati kadakuada.

28 Ket ti dadauloda, ni Zemnarihah, natiliw a naibitin iti kayo, wen, iti tuktokna agingga a natay. Ket idi naibitinda agingga a natay pinukanda ti kayo, ket imkisda iti napigsa a timek, a kinunada:

29 Taginayonen koma ti Apo dagiti taona iti kinalinteg ken iti kinasanto ti puso, tapno ibilinda ti pannakatuangda iti daga dagiti amin nga agpanggep a mangpapatay kadakuada gapu iti bileg ken nalimed a kinnunsabo, a kas iti pannakatuang daytoy a tao iti daga.

30 Ket nagrag-oda ket imkisda manen iti maymaysa a timek, a kinunada: Salakniban koma ti ^aDios ni Abraham, ken ti Dios ni Isaac, ken ti Dios ni Jacob dagitoy a tao iti kinalinteg, no la ketdi ^bawaganda ti nagan ti Diosda a salaknib.

31 Ket napasamak a sangsangkamaysada, a kas maymaysa, a nagkanta, ken ^anangidaydayaw iti Diosda iti naindaklan a banag nga inaramidna kadakuada, iti panangtaginayonna kadakuada manipud iti pannakatnag kadagiti ima dagiti kabusorda.

32 Wen, insangitda: ^aHosanna iti Kangatuan a Dios. Ket insangitda: Madaydayaw ti nagan ti Apo a Dios a ^bMannakabalin, ti Kangatuan a Dios.

33 Ket dimmakkel ti puspusoda iti rag-o, iti panagayus ti adu a lua, gapu iti naindaklan a kinaimbag ti Dios iti panangilisina kadakuada kadagiti ima dagiti kabusorda; ket ammoda a gapu iti panagbabawida ken iti kinapakumbabada ti nakailiklikanda iti agnanayon a pannakadadael.