1 Ket napasamak nga idi naisawang ni Jesus dagitoy a balikas sinangona manen ti ummong, ket linukatanna manen ti ngiwatna kadakuada, a kinunana: Pudno, pudno, kunak kadakayo, Dikayo ^amangeddeng, tapno saankayo a makedngan.

2 ^aTa iti panangeddengyo, makedngankayonto met; ket ti rukod a pangrukodyo, mairukodto manen kadakayo.

3 Ket apay a kitaenyo ti puling ti kabsatyo, ngem diyo kitaen ti sigkat ti matayo?

4 Wenno kasano ti panagkunayonto iti kabsatyo: Agurayka ta ikkatek ti pulingmo—ket adtoy, adda sigkat ti matayo?

5 Sika nga aginsisingpet, umuna pay nga ikkatem ti ^asigkat ti matam; ket iti kasta nalawagto ti panagkitam a mangikkat iti sigkat ti mata ti kabsatmo.

6 Diyo ited ti ^anasantuan kadagiti aso, ket diyo met idisso dagiti perlasyo iti sango dagiti baboy, amangan ta payatpayatenda, sadakayonto sublian a girsayen.

7 ^aAgdawatkayo, ket maikkankayto; agsapulkayo, ket makasarakkayto; agtuktokkayo, ket malukatankayto.

8 Ta siasino man nga agdawat, umawat; ket ti agsapul, makasarak; ket isu nga agtuktok, malukatanto.

9 Wenno asino kadakayo a tao, a, no dumawat ti anak iti tinapay, mangted iti bato?

10 Wenno dumawat iti ikan, mangted kadi iti uleg?

11 No ngarud, dakayo a dakes, ammoyo ti mangted iti nasayaat a sagut kadagiti annakyo, di ket ngatan nangnangruna pay a mangted ti Amayo nga adda sadi langit iti nasayaat a banag no dumawatkayo kenkuana?

12 Ngarud, amin dagiti banag a kayatyonto nga aramiden dagiti tao kadakayo, kasta met ti ^aaramidenyo kadakuada, ta daytoy ti linteg ken sinurat dagiti propeta.

13 Sumrekkayo iti ruangan a ^anailet; ta akaba ti ruangan, ken ^bnalawa a dalan ti mangiturong iti pakadadaelan, ket adu dagiti sumrek idiay;

14 Ta nailet ti ^aruangan ket ^bakikid ti dalan nga agturong iti biag, ket ^cbassit dagiti makasarak itoy.

15 Agannadkayo kadagiti ^asinsinan a propeta, nga umay kadakayo a nakakawes a kasla karnero, ngem iti uneg loboda a narawet.

16 Mailasinyonto ida kadagiti bungada. Adda kadi, ubas a maburas ti tao iti kalunay, wenno siitan a kayo nga agbunga iti igos?

17 Kasta met a tunggal kayo a nasayaat, agbunga iti nasayaat; ngem ti kayo a rinuker agbunga iti dakes.

18 Ti nasayaat a kayo saan a mabalin nga agbunga iti dakes, wenno ti rinuker a kayo agbunga iti nasayaat.

19 Tunggal kayo a ^asaan nga agbunga iti nasayaat mapukan, ket maisungrod iti apuy.

20 Gapuna, mailasinyonto ida babaen iti ^abungada.

21 Saan a tunggal maysa nga agkuna kaniak, Apo, Apo, sumrekto iti pagarian ti langit; ngem tinto mangaramid iti pagayatan ti Amak nga adda sadi langit.

22 Adunto ti ^aagkuna kaniak iti dayta nga aldaw: Apo, Apo, saankami kadi a nangipadto babaen ti naganmo, ket iti naganmo pinagtalawmi dagiti sairo, ket iti naganmo nagaramidkami iti adu a naisangsangayan?

23 Ket kalpasanna ibagakto kadakuada: Iti kaano man dikayo ^anaam-ammo; ^badaywandak, dakayo nga agar-aramid iti dakes.

24 Ngarud, siasino man a dumngeg kadagitoy a sao ket aramidenna ida, ipariskonto iti maysa a tao a masirib, a nangbangon iti balayna iti ^abato—

25 Ket nagtinnag ti ^atudo, ket ti layus immay, ket nagangin, ket nagdissuoranda dayta a balay; ket saan a ^bnarba, ta nabangon iti bato.

26 Ket amin a makangngeg kadagitoy a saok ket saanda ida nga aramiden, maiparisto iti maysa a tao a maag, a binangonna ti balayna iti ^akadaratan—

27 Ket nagtinnag ti tudo, ket immay ti layus, ket nagangin, ket nagdissuoranda dayta a balay; ket napuri, ket nalawa ti nakarebbaanna.