1 Ita napasamak a napalabas ti maika-siam-a-pulo-ket-maysa a tawen ken ^ainnem-a-gasut a tawen manipud idi pinanawan ni Lehi ti Jerusalem; ket panawen idi a ni Lachoneus ti pangulo nga ukom ken gobernador iti pagilian.

2 Ket pimmanaw ni Nephi, nga anak ni Helaman, iti ili ti Zarahemla, ket impakumitna ken ni ^aNephi, nga inauna nga anakna, ti maipapan iti ^bpinanid a gambang, ken amin a kasuratan a naidulin, ken amin a nasantuan a banag a maidulin manipud iti ipapanaw ni Lehi iti Jerusalem.

3 Ket pimmanaw iti pagilian, ket awan ti makaammo no ^asadino man ti napananna; ket ni Nephi nga anakna ti nangidulin iti kasuratan, wen ti kasuratan dagiti kailianna.

4 Ket napasamak nga idi mangrugi ti siam-a-pulo-ket-dua a tawen, adtoy, nangrugi a naan-anay ti pannakaipatungpal ti padto dagidi propeta; agsipud ta adda nangrugi a dakdakkel a pagilasinan ken ad-adu a milagro a naipamatmat kadagiti umili.

5 Ngem adda nangrugi nga agkuna a nalpasen ti kanito a matungpal dagiti balikas, nga ^aimbaga ni Samuel, a Lamanite.

6 Ket nangrugida nga agragragsak, a kunkunada: Adtoy napalabasen ti kanito, ket saan a natungpal dagiti balikas ni Samuel, ngarud, awan ti mamaay ti ragsakyo ken ti pammatiyo maipapan iti daytoy a banag.

7 Ket napasamak nga inyikkisda iti amin a pagilian; ket nangrugi nga agladingit dagiti umili a namati, amangan ta saan a mapasamak dagiti banag a naibagan.

8 Ngem adtoy, inurayda a napnuan pammati dayta nga aldaw ken dayta a rabii ken dayta aldaw a kasla maysa nga aldaw nga awan ti rabii, tapno maammuanda a saan a barengbareng ti pammatida.

9 Ita napasamak nga adda aldaw nga inlatang dagiti saan a mamati, a masapul a ^amapapatay amin dagiti namati kadagita a kannawidan malaksid no mapasamak ti tanda, nga imbaga ni Samuel a propeta.

10 Ita napasamak nga idi naimatangan ni Nephi, ti anak ni Nephi, daytoy a kinadangkes dagiti taona, napalalo ti panagladingit ti pusona.

11 Ket napasamak a rimmuar ket nagrukob iti daga ken immawag a sipapasnek iti Dios nga agpaay kadagiti taona, wen, dagiti dandanin madadael gapu iti pammatida iti ugali dagiti ammada.

12 Ket napasamak a sipapasnek nga immawag iti Apo iti ^anagmalem; ket adtoy, nangngegna ti timek ti Apo, a kinunana:

13 Yangadmo ti ulom ket agragsakka; ta adtoy, adtoyen ti kanito, ket maipakita ti pagilasinan iti daytoy a rabii, ket umayak iti ^akabigatanna tapno iparangarangko iti lubong a tungpalek amin dagiti ^bsaok babaen iti ngiwat dagiti nasantuan a propetak.

14 Adtoy, siak ti ^aumay, a ^bmangipatungpal iti amin a banag nga impakaammok kadagiti annak ti tao manipud idi ^cpunganay ken tapno aramidek ti ^dagpadpada a pagayatan ti Ama ken ti Anak—ti Ama gapu kaniak, ken ti Anak gapu iti lasagko. Ket adtoy, adtoyen ti kanito, ta maipakita ti tanda iti daytoy a rabii.

15 Ket napasamak a natungpal dagiti sao a naited ken ni Nephi, a kas iti pannakaisaoda; ta adtoy, ^aawan ti sipnget iti ilelennek ti init ket nangrugi a masdaaw dagiti umili agsipud ta awan ti sipnget idi dumteng ti rabii.

16 Ket adu kadagiti saan a namati iti sao dagiti propeta, ti ^anadalupo iti daga ket nagbalinda a kasla natay, agsipud ta ammoda a saan a maaramid ti ^bgandatda a mangdadael kadagiti namati iti sao dagiti propeta; gapu ta addan ti tanda a naited.

17 Ket nangrugi a naammuanda nga asidegen ti panagparang ti Anak ti Dios; wen, iti kamaudiananna, kasta unay ti siddaawda ket napakleb iti daga dagiti amin nga umili iti rabaw ti daga manipud iti laud agingga iti daya, iti amin a daga iti amianan ken iti daga iti abagatan.

18 Agsipud ta ammoda a pinaneknekan dagiti propeta dagitoy a banag iti adu a tawen, ken dimtengen ti pagilasinan a naited; ket nangrugida a nagbuteng gapu iti basolda ken saanda a panamati.

19 Ket napasamak nga awan ti sipnget iti dayta a nagpatnag, ngem adda lawag a kas iti tengnga ti aldaw. Ket napasamak a limgak manen ti init iti agsapa, a kas iti gagangay; ken ammoda nga isu ti aldaw a ^amayanak ti Apo, gapu iti pagilasinan a naited.

20 Ket napasamak, wen, amin a banag, uray ti kabassitan, kas kinuna dagiti propeta.

21 Ket napasamak met a maysa a baro a ^abituen ti nagparang kas naipadto.

22 Ket napasamak a nangrugi iti daytoy a kanito ti panagulbod a naited kadagiti tao babaen ni Satanas, a mangpatangken iti pusoda, tapno saanda a mamati kadagiti pagilasinan ken datdatlag a naimatanganda; ngem nupay adda daytoy panagulbod ken panangallilaw ad-adu kadagiti umili ti namati, ket namatida iti Apo.

23 Ket napasamak a napan ni Nephi kadagiti tao, ken adu pay ti sabsabali, a nangbuniag iti nagbabawi, isu ti kaadda ti dakkel a ^apannakaugas ti basol. Ket kastoy ti panangrugi manen dagiti umili a maaddaan iti talna iti pagilian.

24 Ket awan ti panagsisinnuppiat, malaksid ti sumagmamano a nangrugi a mangasaba, a padpadasenda a paneknekan babaen ti nasantuan a kasuratan a saanen a ^anasken a tungpalen ti linteg ni Moises. Nagbiddutda ita iti daytoy a banag, agsipud ta saanda a naawatan ti kasuratan.

25 Ngem napasamak a namatida iti saan a nabayag, ket nakitada ti biddutda, ta naipakaammo kadakuada a saan pay a ^anatungpal ti paglintegan, ket masapul a matungpal agingga iti kabassitan; wen, immay ti sao kadakuada a masapul a matungpal; wen, saan a malabsan ti maysa a paulo wenno tuldek agingga a matungpal amin dagitoy; ngarud naamirisda dagiti biddutda iti daytoy met laeng a tawen ket ^bimpudnoda dagiti basolda.

26 Ket kastoy ti ilalabas ti tawen a siam-a-pulo-ket-dua, a nangted iti naimbag a damag kadagiti tao gapu kadagiti pagilasinan a napasamak, babaen ti pammadto dagiti amin a nasantuan a propeta.

27 Ket napasamak a napalabas met ti siam-a-pulo-ket-tallo a tawen a talna, malaksid kadagiti tulisan ni ^aGadianton, a nagtaeng kadagiti bantay, a mangriribuk kadagiti umili; agsipud ta napigsa unay ti sarikedkedda ken nalimed ti yanda ket saan a madaeran dagiti umili ida; ngarud adu a pammapatay ti inaramidda, ket adu ti pinapatayda kadagiti tao.

28 Ket napasamak a pimmardas ti yaaduda iti maika-siam-a-pulo-ket-uppat a tawen, agsipud ta adu ti simmuppiat kadagiti Nephite a kimmamang kadakuada, a nakaigapuan ti kasta unay a panagladingit dagiti Nephite a nagbati iti pagilian.

29 Ket adda met nakaigapu ti kasta unay a panagladingit dagiti Lamanite; ta adtoy, adu ti annakda a dimmakkel ken natennebda iti panaglabas ti tawen, ket nagsulsuloda, ken impusing ida ti sumagmamano a ^aZoramite, babaen ti kinaulbod ken makapatiray-ok a sasaoda, tapno makikaduada kadagiti tulisan ni Gadianton.

30 Ket iti kastoy naparigat met dagiti Lamanite, ket nangrugi a kimmapsut ti pammati ken kinalintegda, gapu iti kinadangkes ti dumurdur-as a kaputotan.