Balaan ng mga Kasulatan
3 Nefi 2


Kapitulo 2

Ang kalainan kag mga kangil-aran nagdugang sa katawhan—Ang mga Nefinhon kag mga Lamanhon nag-isa agud pangapinan ang ila mga kaugalingon batok sa mga tulisan ni Gadianton—Ang nahaylo nga mga Lamanhon nangin maputi kag gintawag nga mga Nefinhon. Mga A.D. 5–16.

1 Kag natabo ini nga nagligad ang ika-nobenta’y singko man nga tuig, kag ang katawhan nagsugod nga malipat sadtong mga tanda kag mga katilingalahan nga ila nahibal-an, kag nagsugod nga amat-amat nga wala na nagakatingala sa tanda ukon katilingalahan halin sa langit, sa bagay nga nagsugod sila nga mangin matig-a sa ila mga tagipusuon, kag bulag sa ila mga kaisipan, kag nagsugod nga indi na magpati sa tanan nga ila mabatian kag makit-an—

2 Kay nagahunahuna sing pila ka wala’y pulos nga butang sa ila mga tagipusuon, nga ginhimo ini sang mga tawo kag sang gahum sang yawa, agud madala kag mapatalang ang mga tagipusuon sang katawhan; kag sa sini naangkon liwat ni Satanas ang mga tagipusuon sang katawhan, sa bagay nga ginbulag niya ang ila mga mata kag gindala sila sa pagpati nga ang doktrina ni Cristo binuang kag wala’y pulos nga butang.

3 Kag natabo ini nga ang katawhan nagsugod sa pagbakod sa kalainan kag mga kangil-aran; kag wala sila nagpati nga mangin may dugang pa nga mga tanda ukon mga katilingalahan nga ipakita; kag si Satanas naglibot, nga ginapatalang ang mga tagipusuon sang katawhan, nga ginasulay sila kag ginasugyot sila nga maghimo sila sang dako nga kalainan sa kadutaan.

4 Kag gani nagligad ang ika-nobenta’y sais nga tuig; kag ang ika-nobenta’y siyete man nga tuig; kag ang ika-nobenta’y otso man nga tuig; kag ang ika-nobenta’y nuebe man nga tuig;

5 Kag isa ka gatos ka tuig man ang nagligad halin sang mga adlaw ni Mosias, nga nangin hari sang katawhan sang mga Nefinhon.

6 Kag anum ka gatos kag siyam ka tuig ang nagligad halin sang pagbiya ni Lehi sa Jerusalem.

7 Kag siyam ka tuig ang nagligad halin sa tion sang ginpakita ang tanda, nga ginhambal sang mga propeta, nga si Cristo matawo sa kalibutan.

8 Karon ang mga Nefinhon nagsugod sa pag-isip sang ila tion halin sa sini nga panahon sang ginpakita ang tanda, ukon halin sa pagkari ni Cristo; gani, siyam ka tuig na ang nakaligad.

9 Kag si Nefi, nga amay ni Nefi, nga amo ang nagaamlig sang mga kasulatan, wala na nagbalik sa duta sang Zarahemla, kag indi na makit-an bisan diin sa bug-os nga kadutaan.

10 Kag natabo ini nga ang katawhan nagpabilin gihapon sa kalainan, sa pihak sang madamo nga pagpangwali kag pagpropesiya nga ginpahayag sa ila; kag gani nagligad man ang ika-napulo nga tuig; kag ang ika-onse nga tuig nagligad man sa kalainan.

11 Kag natabo ini, sa ika-trese nga tuig may nagsugod nga mga giyera kag mga pagbinaisay sa bug-os nga kadutaan; kay ang mga tulisan ni Gadianton nangin tuman kadamo, kag nagpamatay sang sa pagkadamo nga katawhan, kag nagpanghapay sang sa pagkadamo nga siyudad, kag nagsabwag sang tuman nga kamatayon kag pagpaagay sang dugo sa bug-os nga kadutaan, sa bagay nga nangin kinahanglanon nga ang tanan nga katawhan, pareho nga mga Nefinhon kag mga Lamanhon, magkapot sang mga armas batok sa ila.

12 Gani, ang tanan nga Lamanhon nga nahaylo sa Ginuo nakig-isa sa ila mga kauturan, nga mga Nefinhon, kag napilitan, para sa kaluwasan sang ila mga kabuhi kag sang ila mga babayi kag sang ila mga anak, sa pagkapot sang mga armas batok sinang mga tulisan ni Gadianton, huo, kag sa pagtipig man sang ila mga kinamatarong, kag mga pribilihiyo para sa ila simbahan kag para sa ila pagsimba, kag ila kahilwayan kag ila soberanya.

13 Kag natabo ini nga antes magligad ining ika-trese nga tuig ang mga Nefinhon nabutang sa peligro sang lubos nga kalaglagan tungod sining giyera nga nangin tuman kagrabe.

14 Kag natabo ini nga yadtong mga Lamanhon nga nakig-isa sa mga Nefinhon gin-isip upod sa mga Nefinhon;

15 Kag ang ila sumpa ginkuha sa ila, kag ang ila panit nangin maputi pareho sa mga Nefinhon;

16 Kag ang ila mga pamatan-on kag ang ila mga anak nga babayi nangin tuman kaanyag, kag gin-isip sila upod sa mga Nefinhon, kag gintawag nga mga Nefinhon. Kag gani natapos ang ika-trese nga tuig.

17 Kag natabo ini, sa pagsugod sang ika-katorse nga tuig, ang giyera sa tunga sang mga tulisan kag sang katawhan ni Nefi nagpadayon kag nangin tuman kagrabe; apang, ang katawhan ni Nefi nakaangkon sing pila ka bentaha batok sa mga tulisan, sa bagay nga napanabog nila sila pagwa sa ila mga kadutaan padulong sa mga kabukiran kag padulong sa ila sekreto nga mga lugar.

18 Kag gani natapos ang ika-katorse nga tuig. Kag sa ika-kinse nga tuig nagsalakay sila batok sa katawhan ni Nefi; kag tungod sang kalainan sang katawhan ni Nefi, kag sang ila madamo nga mga pagbinaisay kag mga pag-ilinaway, ang mga tulisan ni Gadianton nakaangkon sing madamo nga bentaha batok sa ila.

19 Kag gani natapos ang ika-kinse nga tuig, kag gani ang katawhan yara sa kahimtangan sang madamo nga pag-antos; kag ang espada sang kalaglagan nagabitay sa ibabaw nila, sa bagay nga malapit na sila nga laglagon sini, kag ini tungod sang ila kalainan.