Balaan ng mga Kasulatan
3 Nefi 19


Kapitulo 19

Ang dose ka disipulo nag-alagad sa katawhan kag nagpangamuyo nga makabaton sang Balaan nga Espiritu—Ang mga disipulo ginbunyagan kag nagbaton sang Balaan nga Espiritu kag sang pag-alagad sang mga anghel—Si Jesus nagpangamuyo nga nagagamit sang mga pulong nga indi masulat—Nagsaksi sia sa tuman kadako nga pagtuo sining mga Nefinhon. Mga A.D. 34.

1 Kag karon natabo ini nga sang nagkayab na si Jesus sa langit, nagbululag ang kadam-an, kag gindala sang tagsa ka lalaki ang iya asawa kag ang iya mga anak kag nagbalik sa iya kaugalingon nga puluy-an.

2 Kag ginbalita gilayon sa mga tawo sa bug-os nga kadutaan, sa wala pa magsirom, nga ang kadam-an nakakita kay Jesus, kag nag-alagad sia sa ila, kag magapakita man sia sang iya kaugalingon sa pagkabuwas sa kadam-an.

3 Huo, kag matuod gid nga sa bilog nga gab-i ginbalita sa bug-os nga kadutaan ang parte kay Jesus; kag sa bagay nga nagpamalita sila sa katawhan amo nga madamo, huo, tuman kadamo, ang naghimakas sing tuman sa bilog sina nga gab-i, agud pagkabuwas mangin yara sila sa lugar nga sa diin si Jesus magapakita sang iya kaugalingon sa kadam-an.

4 Kag natabo ini nga pagkabuwas, sang nagatililipon ang kadam-an, tan-awa, si Nefi kag ang iya utod nga iya ginpabangon halin sa mga minatay, nga ang ngalan amo si Timoteo, kag amo man ang iya anak, nga ang ngalan amo si Jonas, kag amo man si Matoni, kag si Matonias nga iya utod, kag si Kumen, kag si Kumenonhi, kag si Jeremias, kag si Semnon, kag si Jonas, kag si Sedequias, kag si Isaias—karon amo ini ang mga ngalan sang mga disipulo nga ginpili ni Jesus—kag natabo ini nga nagpalapit sila kag nagtindog sa tunga sang kadam-an.

5 Kag tan-awa, ang kadam-an tuman kadamo nga ginpabahin-bahin nila sila sa dose ka grupo.

6 Kag ang dose nagpanudlo sa kadam-an; kag tan-awa, nagsugo sila nga ang kadam-an magluhod sa duta, kag magpangamuyo sa Amay sa ngalan ni Jesus.

7 Kag ang mga disipulo nagpangamuyo man sa Amay sa ngalan ni Jesus. Kag natabo ini nga nagtindog sila kag nag-alagad sa katawhan.

8 Kag sang napahayag nila yadtong amo man nga mga pulong nga ginhambal ni Jesus—nga wala sing kinalain sa mga pulong nga ginhambal ni Jesus—tan-awa, nagluhod sila liwat kag nagpangamuyo sa Amay sa ngalan ni Jesus.

9 Kag nagpangamuyo sila para sa sinang ila labi nga ginahandum; kag naghandum sila nga ang Balaan nga Espiritu ihatag sa ila.

10 Kag sang nakapangamuyo na sila sa amo nga paagi naglusong sila sa bibi sang tubig, kag ang kadam-an nagsunod sa ila.

11 Kag natabo ini nga si Nefi naglusong sa tubig kag nabunyagan.

12 Kag nagbutwa sia halin sa tubig kag nagsugod sa pagpangbunyag. Kag ginbunyagan niya ang tanan sinang ginpili ni Jesus.

13 Kag natabo ini nga sang nabunyagan sila tanan kag nakatakas na halin sa tubig, ang Balaan nga Espiritu nagpanaog sa ila, kag napuno sila sang Balaan nga Espiritu kag sang kalayo.

14 Kag tan-awa, ginpalibutan sila sang daw kalayo; kag naghalin ini sa langit, kag ang kadam-an nagsaksi sini, kag nagpamatuod; kag ang mga anghel nagpanaog halin sa langit kag nag-alagad sa ila.

15 Kag natabo ini nga samtang ang mga anghel nagaalagad sa mga disipulo, tan-awa, si Jesus nag-abot kag nagtindog sa tunga kag nag-alagad sa ila.

16 Kag natabo ini nga naghambal sia sa kadam-an, kag ginsugo sila nga magluhod sila liwat sa duta, kag amo man nga ang iya mga disipulo magluhod sa duta.

17 Kag natabo ini nga sang nakaluhod na sila tanan sa duta, ginsugo niya ang iya mga disipulo nga magpangamuyo sila.

18 Kag tan-awa, nagsugod sila sa pagpangamuyo; kag nagpangamuyo sila kay Jesus nga ginatawag sia nga ila Ginuo kag ila Dios.

19 Kag natabo ini nga si Jesus naghalin sa tunga nila, kag nagpalayo diutay sa ila kag nagduko sia kag nagluhod sa duta, kag nagsiling sia:

20 Amay, nagapasalamat ako sa imo nga ginhatag mo ang Balaan nga Espiritu sa sining akon mga ginpili; kag tungod ini sang ila pagpati sa akon nga ginpili ko sila halin sa kalibutan.

21 Amay, nagapangamuyo ako sa imo nga ihatag mo ang Balaan nga Espiritu sa tanan sa ila nga magapati sa ila mga pulong.

22 Amay, ginhatagan mo sila sang Balaan nga Espiritu tungod nagapati sila sa akon; kag makita mo nga nagapati sila sa akon tungod mabatian mo sila, kag nagapangamuyo sila sa akon; kag nagapangamuyo sila sa akon tungod kaupod nila ako.

23 Kag karon Amay, nagapangamuyo ako sa imo para sa ila, kag amo man para sa tanan sinang mga magpati sa ila mga pulong, agud magpati sila sa akon, agud mangin yara ako sa ila pareho nga ikaw, Amay, yari sa akon, agud nga kami mangin isa.

24 Kag natabo ini nga sang nakapangamuyo si Jesus sa Amay, nagpalapit sia sa iya mga disipulo, kag tan-awa, nagpadayon sila gihapon, nga wala’y untat, sa pagpangamuyo sa iya; kag wala sila nagsulit-sulit sang madamo nga pulong, kay ginhatag sa ila kon ano ang dapat nila ipangamuyo, kag napuno sila sing handum.

25 Kag natabo ini nga ginpakamaayo sila ni Jesus samtang nagapangamuyo sila sa iya; kag ang iya nawong nagyuhum sa ila, kag ang kasanag sang iya nawong nagsilak sa ila, kag tan-awa nangin pareho sila kaputi sang nawong kag sang mga biste man ni Jesus; kag tan-awa ang kaputi sini naglabaw sa tanan nga kaputian, huo, bisan wala sing butang sa duta nga pareho kaputi sa kaputian sini.

26 Kag si Jesus nagsiling sa ila: Padayona ang pagpangamuyo; kag wala sila nag-untat sa pagpangamuyo.

27 Kag nagtalikod sia liwat sa ila, kag nagpalayo diutay sa ila kag nagduko sia kag nagluhod sa duta; kag nagpangamuyo sia liwat sa Amay nga nagasiling:

28 Amay, nagapasalamat ako nga gintinloan mo inang akon mga ginpili, tungod sang ila pagtuo, kag nagapangamuyo ako para sa ila, kag para man sa sinang mga magapati sa ila mga pulong, nga matinloan sila sa akon, paagi sa pagtuo sa ila mga pulong, bisan pareho nga natinloan sila sa akon.

29 Amay, wala ako nagapangamuyo para sa kalibutan, kundi para sinang imo mga ginhatag sa akon halin sa kalibutan, tungod sang ila pagtuo, nga matinloan sila sa akon, agud mangin yara ako sa ila pareho nga ikaw, Amay, yari sa akon, agud nga kami mangin isa, agud nga mahimaya ako sa ila.

30 Kag sang nahambal ni Jesus ining mga pulong nagpalapit sia liwat sa iya mga disipulo; kag tan-awa nagpangamuyo sila sing dalayon, nga wala’y untat, sa iya; kag nagyuhum sia liwat sa ila; kag tan-awa maputi sila, bisan pareho kay Jesus.

31 Kag natabo ini nga nagpalayo sia liwat diutay sa ila kag nagpangamuyo sa Amay;

32 Kag indi mahambal sang dila ang mga pulong nga iya ginpangamuyo, kag indi man masulat sang tawo ang mga pulong nga iya ginpangamuyo.

33 Kag ang kadam-an nakabati kag nagpamatuod; kag ang ila mga tagipusuon nabuksan kag nahangpan nila sa ila mga tagipusuon ang mga pulong nga iya ginpangamuyo.

34 Apang, talalupangdon kag dalayawon ang mga pulong nga iya ginpangamuyo nga indi masulat ang mga ini, kag indi man mamitlang ang mga ini sang tawo.

35 Kag natabo ini nga sang nakatapos si Jesus sa pagpangamuyo nagpalapit sia liwat sa mga disipulo, kag nagsiling sa ila: Ang amo kadako nga pagtuo wala ko pa gid nakita sa tanan nga Judio; gani indi ako makapakita sa ila sang amo kadako nga mga milagro, tungod sang ila pagkawala’y pagtuo.

36 Sa pagkamatuod ginasiling ko sa inyo, wala sing isa sa ila nga nakakita sang amo kadalagko nga mga butang pareho sang inyo nakita; kag wala man sila nakabati sang amo kadalagko nga mga butang nga inyo nabatian.