1 Nia, natan agawa a sanen si Jesus so ayari la a nambalikas ed saraya a salita sikato so ninmengneng ed kaliber-liber lamet ed saray karaklan, tan inkuan to ed sikara: Nia, say panaon ko so asinger la.

2 Anengneng ko a sikayo so makapoy, kanian ag yo natalusan so saray salitak a saraya so ingangan na Ama ed siak ya ibagak ed sikayo ed saya a panaon.

3 Dia ed ontan, sikayo so onla la ed saray kaaboñgan yo, tan motektek yo so saray beñgatla a sinalitak ed sikayo, tan kerew yo ed Ama, dia ed ñgaran ko, pian natalusan yo komon, tan iparaan yo so saray kanunotan yo ed kaimbuasan, tan siak lamet so onla dia ed sikayo.

4 Balet natan siak so onla ed Ama, tan ontan met pian ipanengneng ko so inkasiak ed saray abalang a tribo na Israel, tan sikara so ag abalang ed Ama, lapu ed kabat to no iner a pasen so añgiakaran to ed sikara.

5 Tan agawa a sanen si Jesus so nansalita na onia, inwandag to so mata to ed kaliber-liber lamet ed saray karaklan, tan anengneng to a managagos so saray lua ra, tan sikara so ninmengneng ya ag-nagiing ed sikato a siñga labay da a kerewen a sikato so miayam ni ed sikara ed andokdukey a panaon.

6 Tan inkuan to ed sikara: Nia, say kalooban ko so napno na panagabagey ed sikayo.

7 Wala kasi ed limog yo so saray maniinagem? Awit yo ra dia. Wala kasi ed sikayo so saray lopoy, odino bulag, odino mandumpalit, odino apagpag, odino akating, odino saraman so laman da so amagaan, odino saraman so telek, odino manlilikna na antokaman? Awit yo ra dia ed siak pian paabigen ko ra, lapu ed wala so abagey ko ed sikayo; say otel na liknaan ko napno na panañgasi.

8 Tan aliknak a pilalek yo ya ipanengneng ko ed sikayo no anto so ginawak ed saray kaagian yo a wala ed Jerusalem, tan anengneng ko a say pananisia yo so magenap kanian labay ko a paabigen takayo.

9 Tan agawa a sanen onia so imbaga to, say amin a karaklan, nankasakey ira, a dinmago a kaiba da so saray mansasakit da tan saray manlilikna na kairapan, tan saray lopoy, tan saray bulag, tan kaiba ra so saray emel, tan amin a manlilikna na antokaman ya inagem; tan sikara so pinaabig to balang sakey ya indago ra ed sikato.

10 Tan saya so ginawa ra ya amin—mandapag a saraman so tatambalen tan saraman so angapo so liliknaen da, dinmakmumo ra ed sali to, tan sikato so ginalgalang da; tan no kaonoñgan so saray akadago ed saray karaklan inaañgoban da so saray sali to, a dia ed onia inames da so sali to na saray lua ra.

11 Tan agawa ya ingangan to a saray ankekelag ya anak da so awiten da ed sikato.

12 Kanian inawit da so saray anak da ya ankekelag tan ingaton da ra ed dalin ya impaliber ed sikato, tan si Jesus so tinmalindeg ed pegley da; tan saray karaklan añgiter ira na dalan anga ed sikara ya amin so nidago ed sikato.

13 Tan agawa a sanen sikara la ya amin so nidago ra, tan si Jesus so manalalagey ed pegley da, ingangan to ed saray karaklan a sikara so ontalimukor ed dalin.

14 Tan agawa a sanen sikara so akatalimukor ed dalin, si Jesus so inmaglem ed inkasikato, tan inkuan to: Ama, siak so nagogunigon lapu ed karelmeñgan na saray totoo ed kailalakan na Israel.

15 Tan sanen nibalikas to so saraya a salita, sikato met so tinmalimukor ed dalin; tan nia sikato so nampikasi ed Ama, tan saray beñgatla ya impikasi to ag nisulat, tan saray karaklan ya akadñgel ed sikato sikara so nantasi.

16 Tan dia ed onia a pamaakaran so pantasi ra: Say mata kapiganman ag to ni anengneng, ni say nadñgel na layag da wala so onia, nen saman, tan ontan la a kabaleg tan makapakelaw so saray beñgatla ya anengneng mi tan nadñgel mi ed si Jesus ed impisalita to ed Ama;

17 Tan angapo so dila a makapansalita, ni say nisulat na siopaman a too, ni say puso na saray totoo nalikna ra so ontan la a kabaleg tan makapakelaw a beñgatla a mandapag ya anengneng mi tan nadñgel mi ed si Jesus a sinalita to; tan angapo so siopaman a natebek to a nunoten so gayaga ya amano ed kamarerua mi ed saman a panaon nen sikato so nadñgel mi a nampikasi ed Ama onkana ed sikami.

18 Tan agawa a sanen si Jesus so asumpal la a nampikasi ed Ama, sikato so inmalagey; balet ontan la so kinabaleg na gayaga na saray karaklan kanian sikara so ag akaesel.

19 Tan agawa a si Jesus so nansalita ed sikara, tan ingangan to ra ya onalagey.

20 Tan sikara so inmalagey a nanlapu ed dalin, tan inkuan to ed sikara: Mapalar kayo lapu ed pananisia yo. Tan natan nia, say gayagak so nagnap.

21 Tan sanen nibaga to so saraya a salita, sikato so mannañgis, tan say karaklan tinasian da so saya, tan inala to so saray ankekelag ya anak da, a sansansakey, tan benindicionan to ra, tan sikato so nampikasi ed Ama onkana ed sikara.

22 Tan sanen saya so agawa to la sikato so mannañgis lamet;

23 Tan sikato so nansalita ed saray karaklan, tan inkuan to ed sikara: Nengneng yo so saraya ya ankekelag yo.

24 Tan legan a sikara so onnenengneng pian namuria ra intañgay da so mata ra ed tawen, tan anengneng da so tawen a linmukas, tan anengneng da so saray angeles a mampapaleksab a manlalapu ed tawen a siñga wala ra ed pegley na apoy; tan sikara so linmeksab tan niliktob da so saray ankekelag ya ugogaw, tan sikara so aliber-liber na apoy; tan saray angeles so nantalima ed sikara.

25 Tan saray karaklan anengneng da tan nadñgel da tan tinasian da; tan kabat da a say impantasi ra so tua lapu ed sikara ya amin anengneng da tan nadñgel da, balang sakey a too ed inkasikato; tan say bilang da so ñgalñgali a duara a libo tan lima a lasus a kamarerua; tan say dagup da so nanlalaok a lalaki, bibii, tan ugogaw.