1 Kag sa pagkamatuod, sa pagkamatuod, ginasiling ko sa inyo nga may iban pa ako nga mga carnero, nga wala sa sini nga kadutaan, kag wala man sa duta sang Jerusalem, kag wala man sa bisan ano nga mga bahin sinang kadutaan sa palibot nga naalagaran ko na.

2 Kay sila nga akon ginatumod amo ini sila nga wala pa nakabati sang akon tingug; kag wala man ako sa bisan san-o nakapakita sang akon kaugalingon sa ila.

3 Apang nakabaton ako sang kasugoan halin sa Amay nga kadtoan ko sila, kag magapamati sila sa akon tingug, kag pagaisipon sila sa akon mga carnero agud mangin may isa ka panong kag isa ka manugpahalab; gani malakat ako agud ipakita ang akon kaugalingon sa ila.

4 Kag ginasugo ko kamo nga isulat ninyo ining mga ginpanudlo ko pagkatapos nga wala na ako, nga kon ang akon katawhan sa Jerusalem, sila nga nakakita sa akon kag nakaupod sa akon sa akon pag-alagad, indi magpangayo sa Amay sa akon ngalan, agud nga makabaton sila sang ihibalo parte sa inyo paagi sa Balaan nga Espiritu, kag parte man sa iban pa nga mga tribo nga wala nila mahibal-i, nga ining mga ginpanudlo ko nga isulat ninyo pagataguon kag ipahayag sa mga Gentil, agud paagi sa kabug-osan sang mga Gentil, ang nagkalabilin sang ila kaliwatan, nga magalinapta sa ibabaw sang duta tungod sang ila pagkawala’y pagtuo, malakip, ukon madala sa ihibalo parte sa akon nga ila Manunubos.

5 Kag dayon pagatiponon ko sila halin sa apat ka pamusod sang duta; kag dayon tumanon ko ang kasugtanan nga ginhimo sang Amay sa tanan nga katawhan sang panimalay ni Israel.

6 Kag bulahan ang mga Gentil, tungod sang ila pagpati sa akon, sa kag sang Balaan nga Espiritu, nga nagasaksi sa ila parte sa akon kag sa Amay.

7 Tan-awa, tungod sang ila pagpati sa akon, siling sang Amay, kag tungod sang inyo pagkawala’y pagtuo, O panimalay ni Israel, sa ulihing adlaw ang kamatuoran ipahayag sa mga Gentil agud ang kabug-osan sining mga butang mapahibalo sa ila.

8 Apang kalisud, siling sang Amay, sa mga wala’y pagtuo sang mga Gentil—kay bisan pa nga nakaabot sila sa ibabaw sining kadutaan, kag napalapta ang akon katawhan nga iya sang panimalay ni Israel; kag ang akon katawhan nga iya sang panimalay ni Israel ginpanabog halin sa ila, kag ginpangtasak sang ila mga tiil;

9 Kag tungod sang mga kaluoy sang Amay sa mga Gentil, kag amo man sang mga paghukom sang Amay sa akon katawhan nga iya sang panimalay ni Israel, sa pagkamatuod, sa pagkamatuod, ginasiling ko sa inyo, nga pagkatapos sini tanan, kag ginpahanabo ko nga ang akon katawhan nga iya sang panimalay ni Israel sakiton, kag paantoson kag pamatyon, kag tabugon halin sa ila, kag dumtan nila, kag pasipalahan kag yagutaon sa tunga nila—

10 Kag amo ini ang ginsugo sang Amay nga akon isiling sa inyo: Sa sina nga adlaw kon ang mga Gentil makasala batok sa akon ebanghelyo, kag sikwayon ang kabug-osan sang akon ebanghelyo, kag maalsa sa bugal sang ila mga tagipusuon labaw sa tanan nga nasyon, kag labaw sa tanan nga katawhan sang bug-os nga duta, kag mapuno sang tanan nga sari sang pagbinutig, kag sang mga pagpatalang, kag sang mga katontohan, kag tanan nga sari sang pagkahipokrito, kag mga pagpamatay, kag mga butig nga pagkapari, kag mga pagkamakihilawason, kag sang sekreto nga mga kangil-aran; kag kon himuon nila ang tanan sinang mga butang, kag sikwayon ang kabug-osan sang akon ebanghelyo, tan-awa, siling sang Amay, kuhaon ko ang kabug-osan sang akon ebanghelyo halin sa ila.

11 Kag dayon dumdumon ko ang akon kasugtanan nga ginhimo ko sa akon katawhan, O panimalay ni Israel, kag dal-on ko ang akon ebanghelyo sa ila.

12 Kag ipakita ko sa imo, O panimalay ni Israel, nga ang mga Gentil mangin wala sing gahum; kundi nga dumdumon ko ang akon kasugtanan sa inyo, O panimalay ni Israel, kag makadangat kamo sa ihibalo parte sa kabug-osan sang akon ebanghelyo.

13 Apang kon ang mga Gentil maghinulsol kag magbalik sa akon, siling sang Amay, tan-awa pagaisipon sila sa akon katawhan, O panimalay ni Israel.

14 Kag indi ko pagtugotan ang akon katawhan, nga iya sang panimalay ni Israel, nga mag-agi sa tunga nila, kag tasakon sila, siling sang Amay.

15 Apang kon indi sila magdangop sa akon, kag mamati sa akon tingug, tugotan ko sila, huo, tugotan ko ang akon katawhan, O panimalay ni Israel, nga mag-agi sila sa tunga nila, kag tasakon sila, kag mangin pareho sila sang asin nga nadulaan sang iya sabor, nga sumugod sa sina nga tion mangin wala na sing pulos kundi ihaboy, kag tasakon sang mga tiil sang akon katawhan, O panimalay ni Israel.

16 Sa pagkamatuod, sa pagkamatuod, ginasiling ko sa inyo, amo ini ang ginsugo sang akon Amay—nga ihatag ko sa sining katawhan ini nga duta bilang ila palanublion.

17 Kag dayon ang mga pulong sang propeta nga si Isaias matuman nga nagasiling:

18 Ang imo mga manugbantay magabayaw sang tingug; kag sa dulungan nga tingug sila magakanta kay makita nila sa ila kaugalingon nga mata kon ibalik liwat sang Ginuo ang Sion.

19 Maghinugyaw sa kalipay, dungan nga magkinanta, kamo nga nalaglag nga mga lugar sang Jerusalem; kay ginpasulhay sang Ginuo ang iya katawhan, gintubos niya ang Jerusalem.

20 Ginhublasan sang Ginuo ang iya balaan nga butkon sa mga mata sang tanan nga nasyon; kag ang tanan nga yara sa mga punta sang kalibutan makakita sang kaluwasan sang Dios.