Balaan ng mga Kasulatan
3 Nefi 12


Kapitulo 12

Si Jesus nagtawag kag nag-awtorisar sang dose ka disipulo—Naghatag Sia sa mga Nefinhon sing isa ka pamulongpulong kaanggid sang Wali sa Bukid—Ginhambal Niya ang mga Kabulahanan—Ang Iya mga pinanudlo mas mataas kag mas importante sa layi ni Moises—Ang mga tawo ginasugo nga mangin perpekto bisan pareho nga Sia kag ang Iya Amay perpekto—Ikomparar ang Mateo 5. Mga A.D. 34.

1 Kag natabo ini nga sang nahambal ni Jesus ining mga pulong kay Nefi, kag sa sinang mga gintawag, (karon ang kadamuon nila nga gintawag, kag nagbaton sing gahum kag awtoridad sa pagbunyag, dose) kag tan-awa, gin-untay niya ang iya kamot sa kadam-an, kag naghambal sa mabaskog nga tingug sa ila nga nagasiling: Bulahan kamo kon mamati kamo sa mga pulong sining dose nga akon ginpili halin sa inyo nga mag-alagad sa inyo, kag mangin inyo mga alagad; kag sa ila ginhatag ko ang gahum agud bunyagan nila kamo sang tubig; kag pagkatapos nga mabunyagan kamo sang tubig, tan-awa, bunyagan ko kamo sang kalayo kag sang Balaan nga Espiritu; gani bulahan kamo kon magpati kamo sa akon kag magpabunyag, pagkatapos nga nakita ninyo ako kag nakahibalo nga buhi ako.

2 Kag sa liwat, labaw nga bulahan sila nga magpati sa inyo mga pulong tungod nga magasaksi kamo nga nakita ninyo ako, kag nakahibalo kamo nga buhi ako. Huo, bulahan sila nga magpati sa inyo mga pulong, kag manaog sa kaidadalman sang pagpaubos kag magpabunyag, kay pagabisitahan sila sang kalayo kag sang Balaan nga Espiritu, kag magabaton sang kapatawaran sang ila mga sala.

3 Huo, bulahan ang mga kubos sa espiritu nga nagapalapit sa akon, kay ila ang ginharian sang langit.

4 Kag sa liwat, bulahan sila tanan nga nagakalisud, kay pagalipayon sila.

5 Kag bulahan ang mga malulo, kay magapanubli sila sang duta.

6 Kag bulahan sila tanan nga nagakagutom kag nagakauhaw sa pagkamatarong, kay mapuno sila sang Balaan nga Espiritu.

7 Kag bulahan ang mga maluluy-on, kay makaangkon sila sang kaluoy.

8 Kag bulahan ang tanan nga putli sing tagipusuon, kay sila makakita sa Dios.

9 Kag bulahan ang tanan nga mga manugpaluntad sing paghidaet, kay pagatawgon sila nga mga anak sang Dios.

10 Kag bulahan sila tanan nga ginahingabot tungod sang akon ngalan, kay ila ang ginharian sang langit.

11 Kag bulahan kamo kon ang mga tawo magpasipala kag maghingabot sa inyo, kag magmitlang sang tanan nga sari sang kalainan batok sa inyo sing indi matuod, tungod sa akon;

12 Kay kamo makaangkon sing dako nga kalipay kag mangin tuman kamasinadyahon kay dako ang inyo mangin padya sa langit; kay sa amo man ginhingabot nila ang mga propeta nga nauna sa inyo.

13 Sa pagkamatuod, sa pagkamatuod, ginasiling ko sa inyo, ginahatag ko sa inyo nga mangin asin kamo sang duta; apang kon ang asin madulaan sang iya sabor anhon ang pagpaasin sang duta? Ang asin kon amo mangin wala na sing pulos, kundi ihaboy sa gwa kag tasakon sang mga tiil sang mga tawo.

14 Sa pagkamatuod, sa pagkamatuod, ginasiling ko sa inyo, ginahatag ko sa inyo nga mangin suga sining katawhan. Ang isa ka siyudad nga nahamtang sa isa ka bungyod indi malipdan.

15 Tan-awa, ang mga tawo bala nagasindi sang kandila kag ibutang man lang ini sa idalom sang sulokban? Wala, kundi sa ibabaw sing isa ka tulongtungan, kag ini nagahatag sing kasanag sa tanan nga yara sa sulod sang balay;

16 Gani pasigaha ang inyo suga sa atubang sining katawhan agud makita nila ang inyo maayo nga mga buhat kag himayaon ang inyo Amay nga yara sa langit.

17 Indi kamo maghunahuna nga nagkari ako agud gub-on ang layi ukon ang mga propeta. Nagkari ako indi sa pagguba kundi sa pagtuman;

18 Kay sa pagkamatuod ginasiling ko sa inyo, wala sing isa ka pintok ukon isa ka kudlit nga nadula halin sa layi, kundi sa akon natuman ini tanan.

19 Kag tan-awa, ginhatag ko sa inyo ang layi kag ang mga kasugoan sang akon Amay, agud nga magpati kamo sa akon, kag agud maghinulsol kamo sang inyo mga sala, kag magpalapit sa akon nga may masinulub-on nga tagipusuon kag mahinulsulon nga espiritu. Tan-awa, yara sa inyo atubang ang mga kasugoan, kag ang layi natuman na.

20 Gani magpalapit kamo sa akon kag maluwas; kay sa pagkamatuod ginasiling ko sa inyo, nga luwas lang kon magtuman kamo sang akon mga kasugoan, nga akon ginasugo sa inyo sa sini nga tion, indi gid kamo makasulod sa ginharian sang langit.

21 Inyo nabatian nga ginasiling nila sadtong dumaan nga panahon, kag ini nasulat man sa inyo atubang, nga indi kamo magpatay, kag kon sin-o man ang magpatay may katalagman sa paghukom sang Dios;

22 Apang ginasiling ko sa inyo, nga kon sin-o man ang akig sa iya utod may katalagman sa iya paghukom. Kag kon sin-o man ang magasiling sa iya utod, Wala ka pulos, may katalagman sa korte; kag kon sin-o man ang magasiling, Buang ka, mangin delikado sang kalayo sang impiyerno.

23 Gani, kon magpalapit kamo sa akon, ukon maghangad sa pagpalapit sa akon, kag makadumdum nga ang imo utod may bisan ano nga kalain sang buot batok sa imo—

24 Magkadto ka sa imo utod, kag makig-uli anay sa imo utod, kag dayon magpalapit sa akon nga may bug-os nga katuyoan sang tagipusuon, kag batonon ko ikaw.

25 Makighusay gilayon sa imo kaaway samtang yara pa ikaw sa dalan upod sa iya kay basi sa ano man nga tion dag-on ka niya, kag ihunong ikaw sa bilanggoan.

26 Sa pagkamatuod, sa pagkamatuod, ginasiling ko sa inyo, indi gid kamo makagwa didto tubtob nga mabayaran ninyo ang bug-os nga senine. Kag samtang yara kamo sa bilanggoan makabayad bala kamo sang bisan isa ka senine? Sa pagkamatuod, sa pagkamatuod, ginasiling ko sa inyo, Indi.

27 Tan-awa, ginsulat nila ini sang dumaan nga panahon nga indi ka magpanglahi;

28 Apang ginasiling ko sa inyo, nga kon sin-o man ang magtulok sa isa ka babayi, sa pagkaibog sa iya, nakapanglahi na sa iya tagipusuon.

29 Tan-awa, ginahatagan ko kamo sing isa ka kasugoan, nga indi ninyo pagtugotan ang ano man sining mga butang nga magsulod sa inyo tagipusuon;

30 Kay mas maayo pa nga dumilian ninyo ang inyo mga kaugalingon sining mga butang, nga sa diin pas-anon ninyo ang inyo mga krus, sangsa nga idap-ong kamo sa impiyerno.

31 Nasulat ini, nga kon sin-o man ang makigbulag sa iya asawa, hatagan niya sia sang kasulatan sang pagbulagay.

32 Sa pagkamatuod, sa pagkamatuod, ginasiling ko sa inyo, nga kon sin-o man ang makigbulag sa iya asawa, luwas sa kabangdanan sang pagpanghilawas, nagahatag sa iya sing kabangdanan sa pagpanglahi; kag kon sin-o man ang mangasawa sa iya nga binulagan nagapanglahi.

33 Kag sa liwat nasulat ini, nga indi ninyo pagpasumpaon ang inyo kaugalingon sing butig, kundi nga tumanon sa Ginuo ang inyo mga sinumpaan;

34 Apang sa pagkamatuod, sa pagkamatuod, ginasiling ko sa inyo, indi gid kamo magsumpa; indi sa langit kay trono ini sang Dios;

35 Ukon sa duta kay iya ini palatungan;

36 Kag indi man kamo magsumpa sa inyo ulo tungod indi ninyo masarangan nga ang isa ka buhok himuon nga itom ukon puti;

37 Kundi nga ang inyo paghinambalanay mangin Huo, huo; Indi, indi; kay kon ano man ang ihambal nga masobra sangsa mga ini malain.

38 Kag tan-awa, nasulat ini, mata sa mata, kag ngipon sa ngipon;

39 Apang ginasiling ko sa inyo, nga indi kamo magbalus sang malain, kundi nga kon sin-o man ang magtampa sa inyo sa inyo tuo nga guya, itaya sa iya pati ang pihak;

40 Kag kon may sin-o man nga tawo nga mag-akusar sa imo sa layi kag magkuha sang imo panapton, ihatag man sa iya ang imo kunop;

41 Kag kon sin-o man ang magpilit sa imo sa paglakat sing isa ka milya, updi sia sa duha.

42 Hatagi sia nga nagapangayo sa imo, kag sia nga buot manghulam sa imo indi pagtalikdi.

43 Kag tan-awa nasulat man ini, nga palanggaon mo ang imo isigkatawo kag dumtan ang imo kaaway;

44 Apang tan-awa ginasiling ko sa inyo, palanggaa ang inyo mga kaaway, pakamaayoha sila nga nagasumpa sa inyo, himoi sing maayo sila nga nagadumot sa inyo, kag magpangamuyo para sa ila nga nagahingalit kag nagahingabot sa inyo;

45 Agud nga mangin mga anak kamo sang inyo Amay nga yara sa langit; kay ginapabutlak niya ang iya adlaw sa malain kag sa maayo.

46 Gani yadtong mga butang sang dumaan nga panahon, nga yara sa idalom sang layi, sa akon natuman na tanan.

47 Ang daan nga mga butang ginadula na, kag ang tanan nga butang nangin bag-o.

48 Gani luyag ko nga mangin perpekto kamo bisan nga ako, ukon ang inyo Amay nga yara sa langit perpekto.