1 Эдүгээ Нифай би өөрийн бичсэн, Исаиагийн амаар яригдсан үгсийн талаар зарим зүйлийг ярья. Учир нь болгоогтун, миний ард түмний олонд нь ойлгоход бэрх олон зүйлийг Исаиа ярьсан билээ; учир нь тэд иудейчүүдийн дундах бошиглолын аргын талаар мэдэх нь үгүй.

2 Учир нь Нифай би, тэдэнд иудейчүүдийн заншлын талаар олон зүйлийг заасан минь үгүй; учир нь тэдний ажлууд харанхуйн ажлууд байв, мөн тэдний үйлүүд жигшүүрт үйлүүд байсан бөлгөө.

3 Иймийн тул, би өөрийн ард түмэнд, миний бичих эдгээр зүйлийг хойшид хүлээн авах тэд бүгдэд бичье, Бурханы ярьсан үгийн дагуу, бүх үндэстний дээр түүний шүүлтүүд ирдгийг тэд мэдэж болохын тулд болой.

4 Иймийн тул, анхаарцгаа, ай Израилын угсааных болох ард түмэн минь, мөн миний үгсийг чих тавин сонсоцгоо; өөрөөр хэлбэл Исаиагийн үгс та нарт тодорхой бус байлаа ч, хэдий тийм боловч тэдгээр нь бошиглолын суу билгээр дүүргэгдсэн тэд бүгдэд тодорхой юм. Харин би та нарт өөрт буй сүнсний дагуу бошиглолыг өгье; иймийн тул би Иерусалимаас эцэгтэйгээ гарч ирсэн тэр цагаас надад байгаа тодорхой байдлын дагуу бошиглох болно; учир нь болгоогтун, тэд сурч болохын тулд, өөрийн хүмүүст тодорхойгоор ярихдаа бодгаль минь баяснам.

5 Тийм ээ, мөн бодгаль минь Исаиагийн үгсэд баяснам, учир нь би Иерусалимаас гарч ирсэн, мөн нүд минь иудейчүүдийн зүйлсийг харсан, бас иудейчүүд бошиглогчдын зүйлсийг ойлгодгийг би мэднэ, мөн иудейчүүдийн зүйлсийн заншлын дагуу заалгасан бус аваас иудейчүүдэд яригдсан тэдгээр зүйлийг тэдний адил ойлгох ард түмэн өөр үгүй билээ.

6 Гэвч болгоогтун, Нифай би, иудейчүүдийн заншлын дагуу хүүхдүүддээ заасан минь үгүй; гэвч болгоогтун, би өөрийн биеэр Иерусалимд оршин байсан бөлгөө, иймийн тул би эргэн тойрны нутгийнх нь талаар мэднэ; мөн Исаиагийн ярьсан тэдгээр бүгдийн дагуу, хүүхдүүддээ иудейчүүдийн дунд улиран тохиосон Бурханы шүүлтүүдийн талаар би хүүхдүүддээ дурдсан, мөн би тэдгээрийг үл бичих болой.

7 Гэвч болгоогтун, би өөрийн энгийн тодорхой байдлын дагуу өөрийнхөө бошиглолыг үргэлжлүүлье; ямар ч хүн буруу ойлгохгүйг би мэдэх тийм тодорхой байдлын дагуу буюу; гэсэн хэдий ч, Исаиагийн бошиглолууд биелэгдэх тэрхүү өдрүүдэд хүмүүс гарцаагүй мэдэх болно, тэдгээр нь улиран тохиох тэрхүү цагуудад болой.

8 Иймийн тул, тэдгээр нь хүмүүсийн үрсэд үнэ цэнэтэй билээ, мөн тэдгээрийг тийм бус хэмээн бодох тэдэнд, ялангуяа тэдэнд би ярина, мөн үгсээ өөрийнхөө ард түмнээр хязгаарлая; учир нь тэдгээр нь эцсийн өдрүүдэд тэдэнд агуу үнэ цэнэтэй байх болно гэдгийг би мэднэ; өөрөөр хэлбэл тэр өдөр тэд тэдгээрийг ойлгох болно; иймийн тул, тэдний тусын тулд би тэдгээрийг бичиглэсэн бөлгөө.

9 Мөн алдсын учир иудейчүүдийн дунд нэгэн үеийнхэн устгагдсаны адил, тэрчлэн тэд үеэс үед алдсуудынхаа хэрээр устгагдсаар байгаа буюу; мөн тэдэнд Их Эзэний бошиглогчдоор угтан хэлэгдсэн бус аваас тэднээс нэгээхэн нь ч устгагдсан нь хэзээ ч үгүй билээ.

10 Иймийн тул, миний эцэг Иерусалимыг орхисон тэр даруй, тэдний дээр ирэх ёстой устгалын талаар тэдэнд хэлэгдсэн билээ; гэсэн хэдий ч, тэд зүрх сэтгэлээ хатууруулсан; мөн миний бошиглолын дагуу олзлогдон Вавилонд аваачигдсан тэднээс бусад нь устгагдсан болой.

11 Мөн эдүгээ надад буй сүнсний учир би үүнийг ярьж байна. Мөн тэд аваачигдсан гэлээ ч тэд дахин эргэж ирнэ, мөн Иерусалим нутгийг эзэмших болно; иймийн тул, тэд өвийн нутагтаа дахин сэргээгдэх болно.

12 Гэвч, болгоогтун, тэд дайнууд мөн дайны цуурхлуудтай байх болно; мөн, тийм ээ, бүр тэнгэр болон дэлхийн Эцэг болох Эцэгийн Төрсөн Ганц өөрийгөө тэдэнд маханбодод үзүүлэх тэр өдөр ирэхэд, болгоогтун, тэд өөрсдийн алдсуудын, мөн өөрсдийн зүрх сэтгэлийн хатуугийн, мөн өөрсдийн гөжүүдийн улмаас түүнийг эсэргүүцэх болно.

13 Болгоогтун, тэд түүнийг цовдлох болно; мөн тэрээр хадан булшинд гурав хоногийн турш байрлуулагдсаны дараа тэр жигүүртээ анагаах чадлыг эзэмдэн үхлээс босох болно; мөн түүний нэрэнд итгэх хэн боловч бүгд Бурханы хаант улсад аврагдах болно. Иймийн тул, түүний талаар бошиглохдоо бодгаль минь баясна, учир нь би түүний өдрийг харсан, мөн зүрх сэтгэл минь түүний ариун нэрийг алдаршуулна.

14 Мөн болгоогтун улиран тохиох дор Мессиа үхлээс босож, мөн өөрийгөө өөрийн хүмүүст, түүний нэрэнд итгэх тэр болгонд үзүүлсний дараа, болгоогтун Иерусалим дахин устгагдах болно; өөрөөр хэлбэл Бурханы эсрэг мөн түүний сүмийн хүмүүсийн эсрэг тулалдах тэдэнд халаг.

15 Иймийн тул, иудейчүүд бүх үндэстний дунд тараагдах болно; тийм ээ, мөн түүнчлэн Вавилон устгагдах болно; иймийн тул, иудейчүүд бусад үндэстнээр тараагдах болно.

16 Мөн Бурханы Хүү, Христэд мөн бүх хүн төрөлхтний төлөөх хязгааргүй тэрхүү цагаатгалд итгэхэд ятгуултлаа тэд тараагдаж, мөн Их Эзэн Бурхан тэднийг бусад үндэстнээр олон үеийн турш, тийм ээ, бүр үеэс үед цээрлүүлсний дараа—мөн тэд сэвгүй зүрх сэтгэл мөн цэвэр гартайгаар Христэд итгэн мөн түүний нэрээр Эцэгийг бишрэн шүтэж, мөн өөр ямар ч Мессиаг харуулдан хүлээхгүй тэрхүү өдөр ирэхэд, тийн тэр цагт, тэд эдгээр зүйлд итгэх нь зайлшгүй тэрхүү өдөр ирэх бөлгөө.

17 Мөн Их Эзэн алдагдсан мөн унасан байдлаас нь өөрийн хүмүүсийг сэргээхээр хоёр дахь удаагаа мутраа дахин хөдөлгөх болно. Иймийн тул, тэрээр хүмүүсийн үрсийн дунд ер бусын ажил мөн гайхамшгийг үйлдэхээ үргэлжлүүлэх болно.

18 Иймийн тул, тэрээр өөрийн үгсийг тэдэнд авчрах болно, тэднийг эцсийн өдөр шүүх тэрхүү үгсийг буюу, учир нь тэднээр эсэргүүцэгдсэн үнэн Мессиад тэднийг итгүүлэх зорилгын учир тэдэнд тэдгээр нь өгөгдөх болно; мөн хүмүүсийг залилах тэр хуурамч Мессиагаас өөр ямар нь ч ирэхгүй учир, өөр Мессиа ирэхийг тэд харуулдах хэрэггүй хэмээн тэдэнд итгүүлэхийн тулд бөлгөө; учир нь бошиглогчдоор яригдсан ганцхан Мессиа буй, мөн уг Мессиа нь иудейчүүдээр эсэргүүцэгдэх тэр бөлгөө.

19 Өөрөөр хэлбэл бошиглогчдын үгсийн дагуу, миний эцэг Иерусалимыг орхисон цагаас зургаан зуун жилийн тэртээ Мессиа ирнэ; мөн бошиглогчдын үгсийн мөн түүнчлэн Бурханы тэнгэр элчийн үгийн дагуу, түүний нэрийг Бурханы Хүү, Есүс Христ хэмээх болно.

20 Мөн эдүгээ, ах дүү нар минь, та нар алдаа гаргахын аргагүй тодорхойгоор би ярилаа. Мөн Израилыг Египетийн газар нутгаас гаргаж авчирсан, мөн үндэстнүүдийг тэд хорт могойнуудад хазуулсных нь дараа, хэрэв тэдний өмнө өргөсөн тэр могойг тэд харах аваас анагаах хүчийг Мосед өгсөн, мөн түүнчлэн хадыг хагалан ус гаргах хүчийг түүнд өгсөн Их Эзэн Бурхан амьдын адил; тийм ээ, болгоогтун, би та нарт хэлнэ, Их Эзэн Бурхан амьдын адил, эдгээр зүйл үнэний адил, түүгээр хүмүүн аврагдаж чадах миний ярьсан тэр Есүс Христээс өөр нэр тэнгэрийн доор өгөгдөөгүй болой.

21 Иймийн тул, энэ шалтгааны улмаас миний бичсэн эдгээр зүйл хадгалагдан бас хамгаалагдана, мөн миний үр удамд, үеэс үед гардуулагдах болно хэмээн Их Эзэн Бурхан надад амласан юм, энэ дэлхий тогтнож байгаа цагт түүний үр удам хэзээ ч үл эрсдэнэ гэсэн уг амлалт Иосефт биелэгдэж болохын тулд буюу.

22 Иймийн тул, энэ дэлхий тогтнож байгаа цагт эдгээр зүйл үеэс үед дамжих болно; мөн тэдгээр нь Бурханы хүсэл мөн тааллын дагуу явах болно; мөн тэдгээрийг эзэмших үндэстнүүд, бичигдсэн тэдгээр үгийн дагуу шүүгдэх болно.

23 Учир нь Христэд итгэхийг, мөн Бурхантай эвлэрсэн байхыг хүүхдүүддээ мөн түүнчлэн ах дүүстээ ятгахын тулд бид бичихээр хичээнгүйлэн хөдөлмөрлөдөг; учир нь бид чадах бүхнээ хийсний дараа, ач ивээлээр аврагдана гэдгийг бид мэднэ.

24 Мөн, бид Христэд итгэдэг хэдий ч, бид Мосегийн хуулийг дагадаг, мөн уг хууль гүйцэлдэх хүртэл тууштайгаар Христийг харуулддаг бөлгөө.

25 Өөрөөр хэлбэл, ийм зорилгоор уг хууль өгөгдсөн юм; иймийн тул уг хууль бидэнд үхмэл болсон, мөн итгэлийнхээ учир бид Христээр амьд болгогддог; гэсэн ч зарлигуудын учир бид уг хуулийг дагадаг бөлгөө.

26 Мөн бидний хүүхдүүд нүглээсээ ангижрахын тулд ямар эх сурвалжид хандаж болохыг мэдэж болохын тулд бид Христийн тухай ярьж, бид Христэд баясаж, бид Христийн талаар номлож, бид Христийн тухай бошиглож, мөн бид бошиглолуудынхаа дагуу бичдэг болой.

27 Иймийн тул, бидний хүүхдүүд уг хуулийн үхмэлийг мэдэж болохын тулд бид уг хуулийн талаар ярьдаг; мөн тэд, уг хуулийн үхмэлийг мэдсэнээрээ, Христэд байх тэрхүү амьдралыг харуулдаж болох ажгуу, мөн уг хууль ямар зорилгын тулд өгөгдсөнийг мэдэх бөлгөө. Мөн Христээр уг хууль биелэгдсэний дараа, хууль цуцлагдах ёстой болоход тэд зүрх сэтгэлээ түүний эсрэг хатууруулах хэрэггүйг мэдэх болно.

28 Мөн эдүгээ болгоогтун, ард түмэн минь, та нар гөжүүд хүмүүс; иймийн тул, та нар буруугаар ойлгох аргагүйгээр тодорхойгоор би та нарт ярьсан. Мөн миний ярьсан үгс та нарын эсрэг гэрчлэл болон зогсох болно; учир нь тэдгээр нь ямар ч хүнд зөв замыг заахад хангалттай; учир нь зөв зам нь Христэд итгэх мөн түүнийг үл үгүйсгэх юм; учир нь түүнийг үгүйсгэснээр та нар түүнчлэн бошиглогчдыг мөн хуулийг үгүйсгэх ажгуу.

29 Мөн эдүгээ болгоогтун, зөв зам нь Христэд итгэх, мөн түүнийг үл үгүйсгэх гэдгийг; мөн Христ бол Израилын Ариун Нэгэн гэдгийг би та нарт хэлнэ; иймийн тул та нар түүний өмнө доош бөхийж, мөн түүнийг өөрсдийн бүхий л чадавх, оюун ухаан, мөн хүч чадлаараа, мөн өөрийн бүхэл бодгалиар бишрэн шүтэх ёстой; мөн хэрэв та нар үүнийг хийх аваас та нар яавч зайлуулагдахгүй болой.

30 Мөн, энэ нь зайлшгүй байхын хэрээр, та нар Мосед өгөгдсөн тэрхүү хууль биелэгдэх хүртэл Бурханы ёслолууд болон үйлүүдийг сахих ёстой.