1 Ha ojehu rombyaty opa mbaʼe raʼỹi opaichaguáva, haʼéva opáichagua gráno raʼỹi, ha avei opáichagua yva raʼỹi.

2 Ha ojehu che ru oĩ jave taveʼỹme oñeʼẽ oréve, heʼívo: Péina ápe, ahecha che képe peteĩ kerarecha; térã ambue ñeʼẽme, ahecha peteĩ techauka.

3 Ha péina ápe, umi mbaʼe ahechavaʼekue rupi, aguereko mbaʼérepa avyʼávo Ñandejárape Nefi ha Sam-re; aguerekógui mbaʼérepa aimoʼã hag̃ua haʼekuéra, ha avei heta iñemoñarekuéra, ojesalvataha.

4 Ha péina ápe, Lamán ha Lemuel, akyhyjeterei penderehe; péina ápe, haʼetévaicha chéve ahecha che képe, peteĩ taveʼỹ iñypytũva ha ojevyʼaʼỹhápe.

5 Ha ojehu ahecha peteĩ yvypóra, oñemondéva peteĩ ahoja morotĩme; ha haʼe ou ha oñemboʼy che renondépe.

6 Ha ojehu oñeʼẽ, ha heʼi chéve aha hag̃ua hapykuéri.

7 Ha ojehu aha aja hapykuéri ahecha aimeha peteĩ yvy ojeikoʼỹhápe iñypytũva ha ojevyʼaʼỹhápe.

8 Ha aguata rire heta aravo pytũmbýre, añepyrũ añemboʼeʼasy Ñandejárape cheporiahuvereko hag̃ua, umi iporiahuvereko kyrỹi hetaite rupive.

9 Ha ojehu añemboʼe rire Ñandejárape ahecha peteĩ ñu tuicha ha ipyrusúva.

10 Ha ojehu ahecha peteĩ yvyramáta, pe hiʼa ojeipotáva ñanembovyʼa hag̃ua.

11 Ha ojehu aha ha haʼu pe hiʼa; ha añandu heʼẽtereiha, heʼẽve opa mbaʼe che haʼumavaʼekuégui. Heẽ, ha ahecha pe hiʼa morotĩha, ha ohasa opaite morotĩ che ahechavaʼekuépe arakaʼeve.

12 Ha haʼúvo pe hiʼa che ánga henyhẽ peteĩ vyʼa tuichaitereívagui, ha upévare, aipota che rogaguakuéra hoʼu avei; aikuaágui pe hiʼa ojeipotaveha opaitévagui.

13 Ha amaʼẽvo pe jerére, peichahágui ahecháramo g̃uarã che rogaguakuérape avei, ahecha peteĩ ysyry; ha osyry ipukukue jave, ha ohasa pe yvyramáta hiʼa che haʼuvaʼekue ypýpe.

14 Ha amaña ahecha hag̃ua moõguipa ou; ha ahecha ijyvu namombyryetéi, ha pe ijyvúpe ahecha pende sy Saríah-pe, ha Sam, ha Nefi-pe; ha oñemboʼy hikuái ndoikuaairamoguáicha moõ gotyopa ohóta.

15 Ha ojehu ajepoity chupekuéra; ha avei haʼe chupekuéra ñeʼẽ sapukáipe ou hag̃ua che aĩháme ha hoʼu hag̃ua pe yva, ojeipotavéva opaite apytégui.

16 Ha ojehu ou hikuái che aĩháme ha avei hoʼu pe yva.

17 Ha ojehu che aipota Lamán ha Lemuel ou ha hoʼu avei upéva pe yva; ha upévare, agueraha che resa ysyry ykuayvu gotyo, peichahágui ahecháramo g̃uarã chupekuéra.

18 Ha ojehu ahecha chupekuéra, ha ndouséi hikuái che rendápe hoʼu hag̃ua pe yva.

19 Ha ahecha peteĩ barra de hierro, ojepysóva pe ysyry rembeʼýre, ha oho pe yvyramáta che aĩha meve.

20 Ha ahecha avei peteĩ tape ipoʼietereíva, ohóva pe barra de hierro pukukue jave, pe yvyramáta che aĩha ykére peve; ha avei ohasa oĩháme pe ykuayvu, peteĩ ñu tuicha ha ipyrusúva peve, ojoguáva peteĩ yvórape.

21 Ha ahecha hetaiterei jaipapakuaaʼỹva yvypóra, ha heta oñemotenonde, og̃uahẽ hag̃ua pe tape ogueraháva pe yvyramáta che aĩha meve.

22 Ha ojehu oñemotenonde hikuái, ha oñepyrũ oguata pe tape ohóva yvyramáta peve.

23 Ha ojehu opuʼã peteĩ tatatĩ iñypytũva, heẽ, peteĩ tuichaiterei tatatĩ iñypytũva, upéichagui umi oikevaʼekue upe tapépe osẽ tapégui, ha okañy ha oñehundi hikuái.

24 Ha ojehu ahecha ambuekuéra oñemotenondéva, ha og̃uahẽ ha ojejagarra pe barra de hierro apýrare; ha ohasa pe tatatĩ iñypytũva rupive, ojejagarrahápe pe barra de hierro rehe, og̃uahẽ meve ha hoʼu pe yvyramataʼa.

25 Ha hoʼu rire hikuái pe yvyramataʼa omaña ijerére ku otĩramoguáicha.

26 Ha che avei amaʼẽ upe jerére, ha ahecha pe ysyry mboypýri, peteĩ óga tuichapajepéva ha ipyrusúva; haʼetévaicha opuʼãva pe arapytúpe, yvateterei yvy ári.

27 Ha henyhẽ yvypóragui, ikaʼaru ha imitãrusúva, kuimbaʼe ha kuña; ha pe ao omondéva hikuái iporãiterei; ha haʼetévaicha oñembohorýva ha ohechaukáva ikuãme umi og̃uahẽvaʼekuépe ha hoʼúva hína pe yva.

28 Ha hoʼu rire hikuái pe yva, otĩ umi oñembohorýva hesekuéragui; ha hoʼa tape oñembotovévape ha okañy hikuái.

29 Ha koʼág̃a, che, Nefi, namombeʼupái opaite che ru ñeʼẽ.

30 Ha katu, ahai mbyky hag̃ua, péina ápe, haʼe ohecha ambue yvyporaita oñemotenondéva; ha og̃uahẽ ha ojejagarra pe barra de hierro apýrare; ha oho tenondevévo, ojejagarra memévo pe barra de hierro-re, og̃uahẽ meve ha ojaivy ha hoʼu pe yvyramataʼágui.

31 Ha ohecha avei ambue atyguasu oho pyaʼéva hína pe óga tuicha ha ipyrusúva gotyo.

32 Ha ojehu heta ojahoga pe yvu ipypukuvehápe; ha heta okañy hesa renondégui, ohóvo tape ndojeikuaáiva rehe.

33 Ha tuicha pe atyguasu oikéva upe óga techapyrãme. Ha oike rire hyepýpe ohechauka ikuãme ñembohorýpe cherehe ha avei umi hoʼúvare hína pe yva; ha katu noropenái hesekuéra.

34 Koʼãva haʼe che ru ñeʼẽ: Ha mayma ohendúva chupekuéra, okañy.

35 Ha ni Lamán ni Lemuel ndoʼúi pe yvágui, heʼi che ru.

36 Ha ojehu che ru omombeʼu rire opaite ñeʼẽ ikepegua térã techaukapegua, hetaitereíva, heʼi oréve, koʼã mbaʼe rupi ohechavaʼekue techaukápe, okyhyjetereiha Lamán ha Lemuel rehe, heẽ, okyhyje oñemosẽramo g̃uarã hikuái Ñandejára renondégui.

37 Ha upémarõ heʼi porã chupekuéra opaite oñandúva peteĩ túva mborayhu rupive, ohendu hag̃ua hikuái iñeʼẽ, ikatu hag̃ua péicha Ñandejára oiporiahuvereko, ha nomosẽi chupekuéra; heẽ, che ru oñemoñeʼẽ chupekuéra.

38 Ha oñemoñeʼẽ rire chupekuéra, ha avei oprofetisa rire heta mbaʼégui, ojerure chupekuéra iñeʼẽrendu hag̃ua Ñandejára rembiapoukapykuérare; ha noñeʼẽvéi chupekuéra.