1 Mo bakegen: “Lisin gud, O yufala laen blong Isrel, yufala evriwan we i kamaot mo oli ronem aot yufala from ol fasin nogud blong ol pasta blong ol pipol blong mi, yes, yufala we i kamaot, we yufala i seraot olbaot we yufala i ol pipol blong mi, O laen blong Isrel. Lisin long mi, O ol aelan, mo lisin gud yufala ol pipol we yufala i stap longwe; Lod i bin singaotem mi taem we mi stap yet long bel; stat long bel blong mama blong mi hem i bin talemaot nem blong mi.”

2 Mo hem i bin mekem maot blong mi olsem wan sap naef blong faet, long sado blong han hem i haedem mi, mo i bin mekem mi stret olsem wan ara we i saen; long basket blong ol ara blong hem, hem i bin haedem mi;

3 Mo i bin talem long mi: “Yu yu wokman blong mi, O Isrel, yu we bae yu givim glori long mi.”

4 Afta mi bin talem: “Mi bin wok blong nating, mi bin yusum paoa blong mi blong nating wetem no ansa; i tru se jajmen blong mi i stap wetem Lod, mo wok blong mi wetem God blong mi.”

5 Mo nao, Lod—we i bin putum mi long bel—we i wantem se bae mi kam wokman blong hem, blong tekem Jekob i go long hem bakegen, i talem se: “from Isrel i no kam tugeta yet, be bae mi kasem glori long ol ae blong Lod, mo God blong mi bae i paoa blong mi.”

6 Mo hem i bin talem: “Hem i wan smol samting blong kam wokman blong mi blong resemap ol laen blong Jekob, mo blong putumbak olgeta blong Isrel we mi bin sevem olgeta. Bae mi givim yu tu olsem wan laet long Ol Jentael, blong yu save kam olsem fasin blong mi blong sevem man long evri en blong wol.”

7 Olsem ia nao Lod, Ridima blong Isrel, Tabu Wan blong hem, i talem long hem we ol man oli no laekem hem, long hem we ol kantri i no laekem, long wokman blong ol man blong rul, se: “Ol king bae oli luk mo bae oli girap, ol boe blong king tu bae oli wosip, from Lod we i stap fetful.”

8 Olsem ia nao Lod i talem: “Long wan taem we i stret mi bin harem yu, O ol aelan blong solwota, mo long wan dei blong fasin blong sevem man mi bin helpem yu; mo bae mi sevem yu, mo givim yu olsem wokman blong mi from wan kavenan blong ol pipol, blong stanemap wol, blong mekem se oli kasem ol graon we i emti mo i no gat man.

9 Blong yu save talem long ol prisena: ‘Go aot’; long olgeta we oli sidaon long tudak: ‘Soemaot yufala bakegen’. Bae oli kakae long ol rod, mo ol kaekae blong olgeta bae oli stap long evri hae ples.

10 Bae oli no hanggri o tosta, mo tu, bae hot o san i no kilim olgeta, from hem we i gat sore long olgeta bae i lidim olgeta, hem bae i lidim olgeta tru ol spring blong wota.

11 Mo bae mi mekem evri bigfala hil blong mi oli wan rod, mo ol bigfala rod blong mi, bae mi leftemap olgeta.

12 Mo afta, O laen blong Isrel, luk, olgeta ia bae oli kam long ol ples longwe; mo luk, olgeta ia oli kam long Not mo long Wes; mo olgeta ia long graon blong Sinim.

13 Singsing, O ol heven; mo stap glad, O wol; from ol leg blong olgeta we oli stap long Is bae oli stanap strong; mo bae oli stat blong singsing, O ol bigfala hil; from bae oli nomo kilim olgeta; from Lod i bin leftemap tingting blong ol pipol blong hem, mo bae i gat sore long olgeta blong hem we oli gat hadtaem.”

14 Be, luk, Saeon i bin talem: “Lod i bin lego mi, mo Lod blong mi i bin fogetem mi”—be bae hem i soem se hem i no mekem olsem.

15 From ?I posibol blong wan woman i save fogetem pikinini blong hem we hem i stap givim titi long hem? ?I posibol blong hem i no save gat sore long boe we i kamaot long bel blong hem? Yes, oli save fogetem, be stil, bae mi no fogetem yu, O laen blong Isrel.

16 Luk, mi bin raetem yu long skin blong insaedhan blong han blong mi; ol wol blong yu oli stap fored long mi oltaem.

17 Ol pikinini blong yufala bae oli muv kwik agensem ol man blong prapa spolem gud yufala; mo olgeta we oli prapa spolem gud yu bae oli kamkamaot long yufala.

18 Yufala i mas leftemap ol ae blong yufala raonabaot mo luk; olgeta ia olgeta bakegen oli kam tugeta, mo olgeta bae oli kam long yu. Mo olsem we mi stap laef, Lod i talem, i tru we bae yu putum long yuwan evriwan long olgeta, olsem wan samting we i stap saen, mo bae yu fasem olgeta long yu, semmak olsem wan woman we bae i mared.

19 From ol nogud mo ol emti ples blong yu, mo graon blong ded blong yu, bae i nao stap smol from stamba tingting blong olgeta i stap; mo olgeta we oli bin solemdaon yu bae oli stap longwe.

20 Ol pikinini we bae yu kasem, afta yu bin lusum faswan, bae oli talem bakegen long ol sora blong yu se: “Ples ia i smol tumas blong mi; givim wan ples long mi blong mi save stap long hem.”

21 Afta bae yu talem long hat blong yu: “?Huia i bin bonem long mi olgeta pikinini ia from mi bin lusum ol pikinini blong mi, mo mi mi emti, mi wan prisena, mo mi muv i go ia mo i kam ia? ?Nao huia i bin resemap olgeta pikinini ia? Luk, mi bin stap miwan nomo: olgeta ia, ?oli bin stap wea?”

22 Olsem ia nao Lod God i talem: “Luk, bae mi leftemap han blong mi long Ol Jentael, mo stanemap flag blong mi long ol pipol; mo bae oli karem ol boe blong yufala long ol han blong olgeta, mo ol gel blong yufala, bae oli karem olgeta antap long ol solda blong olgeta.”

23 Mo ol king bae oli olsem ol papa we oli givim gudfala kaekae long yu, mo ol kwin blong olgeta bae oli olsem ol mama we oli givim gudfala kaekae long yu; bae oli bodaon long yu wetem fes blong olgeta i fesem graon, mo likim ol das long ol leg blong yu; mo bae yu save se mi mi Lod; from olgeta we oli stap wet long mi bae oli no sem.

24 From ?yu yu ting se oli save tekem ol kaekae blong wan ia we i strong, o oli lego olgeta we oli kam prisena long fasin blong folem loa?

25 Be olsem ia nao Lod i talem: “ol prisena tu blong olgeta we oli strong bae Lod i tekemaot olgeta, mo bae oli lego ol kaekae blong trabol meka; from bae mi faet wetem hem we i faet wetem yu, mo bae mi sevem ol pikinini blong yu.

26 Mo bae mi fidim olgeta we i mekem yu harem nogud wetem mit blong olgeta bakegen; bae oli drong wetem blad blong olgeta bakegen olsem wetem waen ia we i swit; mo evri bodi blong mit mo bun bae i save se mi, Lod, mi mi Sevya blong yufala mo Ridima blong yufala, Strong Wan blong Jekob.”