1 Ha ojehúta, umi gentil-kuéra ohendúramo pe Tupã Cordero-pe upe ára haʼete voi ojehechaukatahápe chupekuéra ñeʼẽ rupi, ha avei puʼakápe, añetehápe, oipeʼa hag̃ua iñepysangahakuéra—

2 Ha nomohatãiramo ikorasõkuéra pe Tupã Cordero rehe, ojeipapáta chupekuéra nde ru ñemoñare apytépe; heẽ, ojeipapáta chupekuéra Israel rogagua apytépe; ha oikóta chuguikuéra peteĩ tavayguakuéra ojehovasáva tapiaite pe yvy ñeʼẽmeʼẽngue ári; ha ndojeguerahamoʼãvéima chupekuéra ñeñapytĩmbýpe; ha Israel róga noñemoapañuãmoʼãvéima.

3 Ha pe yvykua pypuku, ojoʼovaʼekue chupekuéra g̃uarã pe tupao tuicha ha ijejaʼeʼỹvéva, omopuʼãvaʼekue pe aña ha itaʼyrakuéra, ogueraha hag̃ua umi yvyporakuéra ánga añaretãme—heẽ, pe ipypukuetéva yvykua ojejoʼovaʼekue oñehundi hag̃ua yvyporakuérape oñemyenyhẽta umi ojoʼovaʼekue reheve, oñehundi paite peve, heʼi pe Tupã Cordero; ndahaʼéi pe ánga ñehundi, noñemombói mbaʼéramo chupekuéra pe añaretã opaveʼỹvape.

4 Ha péina ápe, kóva oho pe aña ñeñapytĩmby ndive, ha avei pe Tupã hustísia ndive, maymáva henondépe hekoñañáva ha hembiapokyʼáva ári.

5 Ha ojehu pe ángel oñeʼẽ chéve, Nefi, heʼívo: Nde rehechákuri umi gentil-kuéra oñearrepentíramo oho porãtaha chupekuéra; ha avei reikuaa umi Ñandejára konvénio Israel rogagua ndive; ha avei rehendu umi noñearrepentíriva omanovaʼerãha.

6 Upévare, ái umi gentil-kuéragui omohatãramo ikorasõkuéra pe Tupã Cordero rehe.

7 Oúgui pe ára, heʼi pe Tupã Cordero, ajapotahápe peteĩ tembiapo tuicha ha hechapyrãva yvyporakuéra raʼy apytépe; peteĩ tembiapo ndopamoʼãiva, peteĩ térã ambuépe g̃uarã—tahaʼe jepe oñekonvense hag̃ua chupekuéra pyʼaguapy ha tekove ijapyraʼỹva gotyo, térã oñemeʼẽ hag̃ua chupekuéra ikorasõ atãme ha iñakã ypytũme ojegueraha peve ñeñapytĩmbýpe, ha avei ñehundípe, yvy arigua ha espíritu reheguávape, pe aña ñeñapytĩmbýicha, añeʼẽvaʼekuére.

8 Ha ojehu pe ángel heʼi rire koʼã ñeʼẽ, heʼi chéve: Nemanduʼápa nde umi Túva konvénio Israel róga ndiveguáre? Ha che haʼe chupe, Heẽ.

9 Ha ojehu haʼe heʼi chéve: Emaʼẽ, ha ehecha kóva ko tuicha ha ijejaʼeʼỹvéva tupao, haʼéva ijejaʼeʼỹvevakuéra sy, ha imopuʼãhare haʼéva pe aña.

10 Ha heʼi chéve: Péina ápe oĩ mokõi tupao añónte; peteĩva haʼe pe Tupã Cordero tupao, ha pe ambuéva haʼe pe aña tupao; upévare, ndahaʼéiva pe Tupã Cordero tupaopegua haʼe pe tupao tuichávapegua, haʼéva pe ijejaʼeʼỹvevakuéra sy; ha haʼe pe hekovaivéva opa yvy ári.

11 Ha ojehu che amaʼẽ ha ahecha pe hekovaivéva maymáva yvy ariguápe, ha haʼe oguapy y heta ári; ha haʼe ipuʼakapa opa yvy ári, maymáva tetãnguéra, avaretãnguéra, ñeʼẽnguéra, ha tavayguakuéra apytépe.

12 Ha ojehu che ahecha pe Tupã Cordero tupao, ha imbovy hikuái, pe hekovaivéva oĩva y heta ári tekoñaña ha tembiapokyʼakuéra rupi; upevére, che ahecha pe Cordero tupao, haʼéva umi Tupã ndivegua imarangatúva, oĩha avei opa yvy ape ári; ha pe ipuʼakakuéra yvy ape ári michĩ, pe tekoñaña oguerekóva rupi pe hekovaivéva che ahechavaʼekue.

13 Ha ojehu ahecha umi ijejaʼeʼỹvéva sy guasu oñembyatýramo heta atyguasúpe opa yvy ape ári, maymáva gentil-kuéra retã apytépe, oñorairõ hag̃ua pe Tupã Cordero ndive.

14 Ha ojehu che, Nefi, ahecha pe Tupã Cordero puʼaka, oguejýramo umi imarangatúva Cordero tupaogua ári, ha umi Ñandejára konvénio tavayguakuéra ári, isarambíva opa yvy ape ári; ha oguereko hikuái hiʼármaramo tekojoja ha pe Tupã puʼaka tuicha verapýpe.

15 Ha ojehu ahecha pe Tupã ñekoʼõi oñehẽ pe tupao tuicha ha ijejaʼeʼỹvéva ári, upéicha oĩ ñorairõguasu ha ñorairõguasu terakuã maymáva tetãnguéra ha avaretãnguéra yvy arigua apytépe.

16 Ha oñepyrũvo oiko ñorairõguasu ha ñorairõguasu terakuã maymáva umi tetã apytépe haʼéva pe ijejaʼeʼỹvéva sy ndivegua, oñeʼẽ chéve pe ángel, heʼívo: Péina ápe, pe Tupã ñekoʼõi oĩ pe hekovaivevakuéra sy ári; ha péina ápe, nde rehecha opa koʼã mbaʼe—

17 Ha og̃uahẽ vove ára pe Tupã ñekoʼõi oñeñohẽ umi hekovaivéva sy ári, haʼéva pe tupao tuicha ha ijejaʼeʼỹvéva opa yvypegua, ha imopuʼãhare haʼéva pe aña, upéicha, upe árape, oñepyrũta pe Túva rembiapo, ombosakoʼi hag̃ua pe tape oñekumpli hag̃ua ikonveniokuéra, haʼe ojapovaʼekue itavayguakuéra ndive haʼéva Israel rogagua.

18 Ha ojehu pe ángel oñeʼẽ chéve, heʼívo: Emaʼẽ!

19 Ha amaʼẽ ha ahecha peteĩ kuimbaʼe, ha oñemonde peteĩ aojegua morotĩme.

20 Ha pe ángel heʼi chéve: Péina ápe peteĩva umi doce Cordero apóstol.

21 Péina ápe, haʼe ohecha ha ohaíta koʼã mbaʼe rembyre; heẽ, ha avei heta mbaʼe oikovaʼekue.

22 Ha avei ohaíta pe yvóra paha rehegua.

23 Upévare, umi mbaʼe haʼe ohaíva ijoja ha añetegua; ha péina ápe koʼãva ojehai pe kuatiañeʼẽme nde rehechavaʼekue osẽ pe judío jurúgui; ha pe ára osẽramoguare judío jurúgui, térã, pe kuatiañeʼẽ osẽramo guare judío jurúgui, umi mbaʼe ojehaíva ipype hesakã ha ipotĩkuri, ha iporãve ha ndahasyivékuri maymáva yvyporakuéra kuaapýpe g̃uarã.

24 Ha péina ápe, heta mbaʼe ko Cordero apóstol ohaítava haʼe umi nde rehechamavaʼekue; ha péina ápe, hembyréva rehecháta.

25 Ha umi rehechátava upe rire nderehaimoʼãi; Tupã Ñandejára heʼígui ohaitaha Tupã Cordero apóstol.

26 Ha avei oĩkuri ambuekuéra, Ñandejára ohechaukavaʼekuépe opa mbaʼe, ha ohaíkuri hikuái umíva; ha koʼãva ojesella ojehechauka hag̃ua ipotĩmbyre, pe añetegua oĩháicha Cordero-pe, ára Ñandejára heʼi vove, Israel rógape.

27 Ha che, Nefi, ahendu ha atestifika, pe Cordero apóstol réra haʼeha Juan, pe ángel ñeʼẽ heʼiháicha.

28 Ha péina ápe, chéve, Nefi-pe, ojeʼe ani hag̃ua ahai umi mbaʼe ahecha ha ahenduvevaʼekue; upévare oĩ porãntema chéve koʼã ahaivaʼekue; ha ahaíkuri mbovymínte umi mbaʼe ahechavaʼekuégui.

29 Ha ameʼẽ testimónio che ahechahague umi mbaʼe che ru ohechavaʼekue, ha Ñandejára ángel oikuaauka chéve.

30 Ha koʼág̃a ambopaha che ñeʼẽ umi mbaʼe ahechavaʼekuégui ajegueraha aja espíritu-pe; ha ndojehaíriramo jepe opa mbaʼe ahechavaʼekue, umi mbaʼe ahaivaʼekue añetegua. Ha upéicha. Amén.