Mataupu 1

O Lo Tatou Tama o i le Lagi

“O lou naunautaiga e faamanatu atu ia te outou le natura ma le soifuaga o le Atua, ina ia mafai ona outou tapuai ia te ia i le agaga ma le faamaoni ma ia maua ai faamanuiaga uma o lana talalelei.”

Mai le Soifuaga o Iosefa Filitia Samita

Na maofa Peresitene Samita i le faalauteleina o tekinolosi o ona aso. “E tele le agai i luma ua fai i galuega faaenisinia, kemisi, fisiki, taotoga o gasegase, ma isi mea,” na ia saunoa ai. “Ua fausia e tagata masini vaai mamao ua iloa lelei ai le vanimonimo natia. Ua latou faaaoga masini e faalapopoa ai mea e iloa ai le tele o ituaiga meaola ninii. … Ua latou maua auala e faaitiitia ai gasegase. … Ua latou fausia masini e sili ona leatapa’ia gofie nai lo le tago i ai o le tagata, sili atu le mamao o le vaai nai lo le mata. Ua latou faatonu elemene ma fai masini e fulia mauga, ma le tele o isi mea ua latou faia e tele naua ua le mafai ona faamatala. Ioe, o se vaitaimi matautia lenei.” Ae ui i lea, ua ia popole i se tasi taumafaiga ua ia silasila i ai i le lalolagi. Na ia fautua mai: “O nei mea fou ua maua ma fausia ua le faalatalata atu ai le tagata i le Atua! Po ua fausia foi i o latou loto le lotomaualalo ma le agaga o le salamo, ae ua faafeagai, o lo latou tausalaga. … E lei faateleina le faatuatua i le lalolagi, e lei faateleina foi le amiotonu, po o le usiusitai i le Atua.”¹

E ese mai le faateleina o le le amanaia e le lalolagi o le Atua, sa faaali mai e Peresitene Samita se faataitaiga o le vavalalata ma lona Tama oi le Lagi. Sa tau mai e se tasi o atalii o lona atalii e faapea: “O lou tina o se kuka silisili, ma o le tama o lou tama na masani ona sau soo ma ai i lo matou fale. O le tele o taimi e valaaulia e lou tama e faamanuia taumafa. O ana tatalo e patino mo ia lava—e peiseai o talanoa i se uo.”²

Aoaoga a Peresitene Iosefa Filitia Samita

Na amata mai i le Uluai Faaaliga a Iosefa Samita, na toefuatai mai ai le malamalama o le upumoni a le Atua i o tatou aso.

Ou te faafetai tele i le uluai faaaliga, na faaali mai ai le Tama ma le Alo i le alii perofeta talavou ma toefuataiina mai ai i le tagata le malamalama o le upumoni a le Atua.³

E ala i le Uluai Faaaliga a Iosefa Samita, sa toefuatai mai ai “le malamalama moni o le Atua”.

E ao ona manatua o le lalolagi Kerisiano aoao i le 1820 na leiloa aoaoga faavae moni e uiga i le Atua. O le upumoni faigofie sa manino ona malamalama i ai aposetolo ma le au paia o anamua ua leiloa i mealilo a se lalolagi liliuese. O perofeta anamua uma, ma aposetolo a Iesu Keriso sa malamalama manino o le Tama ma le Alo e eseese o laua tino, e pei ona manino ona aoao mai e a tatou tusitusiga paia. Ona o le liliuese sa leiloa ai lenei malamalama. … Ua avea le Atua o se mealilo, ma o le Tama ma le Alo sa manatu e tasi le faatasiga o agaga le iloa, e aunoa ma ni tino, aano ma ivi, po o lagona. O le afifio mai o le Tama ma le Alo ua aumai ai i luga o le fogaeleele ni molimau paia o e e ala i le malamalama ua mafai ai ona toefuatai mai i le lalolagi le natura moni o le Atua.⁴

O le [uluai] faaaliga ia Iosefa Samita na manino ai o le Tama ma le Alo e eseese, ua i ai tino o aano ma ivi e mafai ona pai i ai e pei o le tino o le tagata. Na faaalia foi ia te ia o le Agaga Paia o le peresona Agaga, e patino ma ese mai i uiga o le Tama ma le Alo [tagai MF&F 130:22]. O lenei upumoni taua sili ua maofa ai le lalolagi; o lea, a tatou manatu i le manino o le tusitusiga ua paia, o se mea ese le matautia ma le matagofie le o ese mamao o tagata. Na fetalai le Faaola, “E sili lou Tama ia te au;” [Ioane 14:28] ma ua ia valaauina ona soo, ina ua tuanai lona toetu, e tago mai ia te ia ma vaavaai pe o ia lava lea, aua, na ia faapea mai, “O le Agaga e leai sona tino aano ma ni ivi, e pei o au nei ua outou vaavaai mai i ai.” [Luka 24:39.] Sa malamalama lelei aposetolo i tulaga patino o le Tama, Alo, ma le Agaga Paia, sa latou taua pea lava pea i a latou tusitusiga; ma na faailoa atu e Paulo ia Korinito e faapea afai o mea uma ua tuuina i lalo o le Tama, “ona tuuina ifo foi lea o le Alo lava e le na tuuina i lalo ia te ia o mea uma ina ia pule aoao le Atua i le aoao o mea uma.” [1 Korinito 15:28.]

Sa vaai Iosefa Samita i le Tama ma le Alo; o lea e mafai ona ia molimau ai i lona lava malamalama e moni tusitusiga paia tatou te faitau i ai: “Ona faia lea e le Atua le tagata i lona lava faatusa, o le faatusa o le Atua na ia faia ai o ia; o le tane ma le fafine na ia faia.” [Kenese 1:27.] O lenei e ao ona malamalama ai i lona moni, ae le o se uiga faafoliga pe faatusatusa.⁵

Ina ia faailoa le faatuatua i le Atua ma tapuai ia te Ia, e tatau ona i ai so tatou malamalamaaga i Ona uiga.

Na tau mai e se tasi o a tatou faaaliga afai e faaeaina i tatou ia Keriso, e faapei o ia i le Tama, e tatau ona tatou malamalama ma iloa le ala e tapuai ai ma le mea tatou te tapuai i ai. (Tagai MF&F 93:19–20.)

O lou naunautaiga e faamanatu ia te outou le natura ma le soifuaga o le Atua, ina ia mafai ona outou tapuai ia te ia i le agaga ma i le faamaoni ma ia maua ai faamanuiaga uma o lana talalelei.

Ua tatou iloa e iloa le Atua e ala i faaaliga, ma e na te faaali ma tumau e faavavau ona le iloa. E tatau ona tatou o i tusitusiga paia—ae le o saienitisi po o le faifilosofia—pe afai tatou te aoao le upumoni e uiga i le Silisiliese. Ioe, o le valoaga sili a Ioane e uiga i le toefuataiga o le talalelei e se agelu na lele mai le taulotoaiga o le lagi ma faapea mai e ao ona tupu ina ia maua e le tagata le malamalama o le Atua moni ma aoao mai: “Ia outou matatau i le Atua, ma avatu ia te ia le viiga … ma outou ifo i le na faia le lagi, ma le lalolagi, ma le sami, ma puna o vai.” (Faaaliga. 14:7.) I se isi faamatalaga, e amata mai le toefuataiga o le talalelei i lenei tisipenisione, o le a toe valaau atu i tagata e tapuai ma auauna atu i lo latou Foafoa ae le o le manatu pepelo e uiga i le Silisiliese o lo o taatele i le lalolagi.

I soo se tausaga ua valaauina perofeta a le Alii e taofia tapuaiga sese ma folafola atu le upmoni e uiga i le Atua. I Isaraelu anamua e i ai i latou sa tapuai i tupua ma atua pepelo, ma na fesili Isaia: “Tou te faatusa le Atua ia te ai po o ai foi se faatusa tou te faatusaina i ai o ia?

“Tou te le iloa ea? Tou te le i faalogo ea, o le Atua o le faavavau, o le Alii, o le na Foafoa i tuluiga o le lalolagi, e le vaivai o ia, e le tigaina foi o ia? e leai se suesueina o lona malamalama.” (Isaia. 40:18, 28.)

O le toatele o le lalolagi o aso nei e le o i ai lenei malamalama i le Atua, e oo lava i [le Ekalesia] e i ai i latou e le i faaatoatoaina lo latou malamalama i Lona mamalu o lo tatou Tama e Faavavau. Mo i latou e le o i ai lenei malamalama e mafai ona tatou faapea ifo: “Aisea e faatuaoia ai le mamalu o le Atua? Pe aisea tou te manatu ai e itiiti o ia nai lo o ia? Sa le i faalogo ea outou, o le Atua o le faavavau, o le Alii, o le Foafoa i tuluiga o le lalolagi, e le i’u ma e faavavau; e ia te ia le mana uma lava, le malosi uma, ma le pule uma; e silafia e ia mea uma, ma o mea uma ua i luma o ona fofoga?”

I le vaega 20 o le Mataupu Faavae ma Feagaiga, ua faatonuina ai le Perofeta o Iosefa Samita e toe faatulaga le Ekalesia i lenei tisipenisione, ua ia i tatou le aotelega faaalia o nisi o aoaoga faavae o le faaolataga. I le Silisiliese na faapea mai le faaaliga: “… o lo o i ai se Atua i le lagi, o le ua le i’u ma e faavavau, mai le faavavau tumau i le faavavau tumau o le Atua lava lea e tasi e le mafeliuai, o le na fuafuaina le lagi ma le lalolagi, ma mea uma o i ai.” (MF&F 20:17.) …

O le Atua o lo tatou Tama; o lona faatusa sa fausia ai le tagata. E i ai lona tino o aano ma ivi e mafai ona pai i ai e faapei o le tino o le tagata. MF&F 130:22), ma o ia o le tama moni patino o agaga o tagata uma. O ia e mamana ma tamaoaiga; e ia te ia le mana uma ma le atamai atoa; ma o lona atoatoa o lo o i ai i lona poto uma, le faatuatua uma po o le mana, le amiotonu uma, le faamasinoga uma, o le alofa mutimutivale uma, o le upumoni uma, ma le atoatoaga o uiga faaleatua uma. … Afai ua ia i tatou lena faatuatua atoatoa tatou te uumau ai i le ola e faavavau, e tatau ona tatou talitonu i le Atua o ia o le ona le atoatoaga o nei amioga ma uiga uma. Ou te faapea atu foi o ia e le i’u ma e faavavau, ma e le mafeliuai, ua ia te ia nei mana ma uiga atoatoa mai le faavavau tumau i le faavavau tumau, o lona uiga e mai i le faavavau i le faavavau.⁶

Tatou te iloa o lo tatou Tama Faalelagi o se peresona mamalu faaeaina o i ai le mana uma lava, le malosi uma, ma le pule uma, ma e silafia e ia o mea uma. Matou te molimau o ia, e ala i lona Alo Pele e Toatasi na Fanaua, o le Foafoa o lenei lalolagi ma lalolagi e le mafaitaulia.⁷

O le Atua o se tagata ma o le Tama o o tatou agaga.

O i tatou o fanau agaga a le Atua lo tatou Tama Faalelagi. … O i tatou o tagata o lona aiga. … Sa tatou ola faatasi ma ia i le tele o tausaga i lo tatou muai olaga. … Sa ia faatuina le fuafuaga o le alualu i luma ma le faaolataga e mafai ai ona tatou, pe a faatuatua ma faamaoni i mea uma, ona faalautele ma alualu i luma seia oo ina tatou faapei o ia.⁸

Ua aoaoina i tatou i tusitusiga paia o le Atua o lo tatou Tama moni, ae le o se faatusa, lo tatou lava Tama e faavavau. O fetalaiga a lo tatou Togiola ia Maria i tafatafa o le tuugamau na toetu mai ai o ia ma manumalo ai le oti, ua sili ona matagofie ma faatumulia i uiga paia: “Aua le tago mai ia te au; aua ou te le i alu ae lava i lou Tama: a ia e alu i ou uso, ma fai atu ia i latou, ou te alu ae i lou Tama, ma lo outou Tama; o lou Atua, ma lo outou Atua.” [Ioane 20:17.] I nei upu o le moni o le tulaga Faa-Tamā o le Atua ua faailoa manino mai e lona Alo e toatasi na Fanaua, o le na tautino mai o ia o lo tatou Uso ma e tasi lo tatou Tama e faavavau.⁹

Ou te faafetai i le malamalama o le Atua ma ana tulafono ua toefuatai mai i o tatou taimi ma o i tatou o ni uso o le Ekalesia ua iloa o ia o se tasi patino ae le pei ona faamatala mai e nisi o le lalolagi faalelotu e faapea, “o se faatasiga o tulafono le faavaea opeopea e faapei o ni ao pogisa i le lalolagi.” Ou te faafetai tatou te iloa o ia o lo tatou Tama oi le lagi, o le Tama o o tatou agaga, ma ua ia faavaeina tulafono e mafai ai ona tatou faalautele ma alualu i luma seia tatou faapei o ia. Ma ou te faafetai tatou te iloa o ia e le i’u ma e faavavau; e silafia e ia mea uma ma e i ai le mana uma ma o lona alualu i luma e le o le maua o le poto sili ma le mana, e le o le faaatoatoa atili o ona uiga faaleatua, ae o le faateleina o ona malo.¹⁰

E alofa le Tama Faalelagi ia i tatou ma e fiafia ia i tatou taitoatasi.

Ua oo mai i lou mafaufau se faaupuga i le Penina Tau Tele, i le faaaliga ia Mose, na fetalai i ai i le taimi na aveina ae ai Mose i se mauga maualuga tele lava ma sa faafesagai lava o ia ma le Atua, ma talanoa ma ia. Na faaali e le Alii ia Mose le “galuega a ona aao,” ma ua vaai atu Mose i le lalolagi, ma le fanauga uma a tagata o i ai. [Tagai Mose 1:1–8, 27–29.]

Ona fetalai lea o le Alii ia Mose:

“Aua faauta e i ai lalolagi e tele ua mavae atu e ala i le upu a lou mana. Ma e i ai le tele o loo tutu nei, ma ua le mafaitaulia i latou i le tagata; ae ua faitaulia mea uma ia te au, aua e a au i latou ma ua Ou iloa i latou.

“Ma sa oo ina fai atu Mose i le Alii, ua faapea atu: Ia e alofa mutimutivale mai i lau auauna, E, le Atua e, ma taʼu mai ia te aʼu e uiga i le lalolagi lenei, ma e o nonofo ai, ma le lagi foi, ona malie ai lea o lau auauna.

“Ma sa fetalai mai le Alii le Atua ia Mose, ua fai mai: O lagi, e tele, ma e le mafai ona faitaulia i latou i le tagata; ae ua faitaulia i latou ia te aʼu, ona e a aʼu i latou.” [Mose 1:35–37.]

… Na oo mai se manatu i lou mafaufau e ui lava i le le mafaitaulia o lalolagi ma le sili o tulaga o le toatele o i latou, ua na o ni auala e oo atu ai i le iuga, ae le o le iuga lava ia. O lo o fausia e le Tama lalolagi mo le faamoemoe e faaainaina—e tuu i ai ona atalii ma ona afafine. Ua aoaoina i tatou i le Vaega 76 o le Mataupu Faavae ma Feagaiga, e faapea e mai ia te ia, ma ala mai ia te ia, ma o ia, ua i ai lalolagi ma na foafoaina, ma o e ua nonofo ai o atalii ma afafine fanauina mo le Atua.” [MF&F 76:24.]

Ua tatou aoao mai i nei mau sa ou faitauina ma isi faaaliga mai le Alii, o le tagata e sili ona taua o foafoaga uma a le Tama. I le faaaliga lava lea na tuuina atu ia Mose, na fetalai le Tama: “Ma e pei ona o le a mavae atu le tasi lalolagi, ma ona lagi o le a faapea foi ona tu mai se isi; ma e leai se gataaga i au galuega, pei foi i au upu. Aua faauta, o lau galuega ma lou mamalu lenei—ia aumaia le tino ola pea ma le ola faavavau o le tagata.” [Mose 1:38–39.]

Mai lenei, ma isi mau, ou te fai atu, ua tatou aoao o le galuega tele a lo tatou Tama o le aumaia lea o le faaolataga o lana fanau ma tuuina atu ia i latou taitasi lena taui e agavaa ai i latou taitoatasi e faatatau i lana galuega. Ou te lagona ma le mautinoa o lo tatou Tama oi le lagi e sili atu lona fiafia i le agaga—o se tasi o ana fanau—nai lo le mafai e se tama faalelalolagi ona fiafia i se tasi o ana fanau. O lona alofa mo i tatou ua sili atu nai le alofa o se matua faaletino mo lana fanau.¹¹

O le ata o Mose, o lo o vaai atu i le nuu o le folafolaga, na maua se faaaliga na ia aoao ai i le galuega ma le mamalu o le Atua.

Ua tutulu le Tama Faalelagi ona o Lana fanau le usiusitai.

Ua tau mai ia i tatou e faapea ina ua fetalai le Alii ia Enoka ma faaali atu ia te ia nuu o le lalolagi ma faamatala atu ia te ia le natura o le faasalaga e ono oo mai ia i latou ona o a latou solitulafono i ana poloaiga, na tutulu le Alii ma faaali lona faanoanoa i loimata maligi ona o lo latou le usiusitai. Ona o lenei, na maofa Enoka ma manatu o se mea uiga ese ona ua tutulu le Alii.

O le faitauga lenei:

“Ma sa oo ina silasila ifo le Atua o le lagi i luga o e na totoe o le nuu, ma sa tutulu o ia; ma sa molimauina e Enoka lea mea, ua fai mai: Pe ua faapefea ea ona tutulu o le lagi, ma faamaligi ifo o latou loifofoga e pei o uaga i luga o mauga?

“Ma sa fai atu Enoka i le Alii: Pe ua mafai faapefea ona e tutulu, ona ua vaai ua e paia, ma ua mai le faavavau atoa i le faavavau atoa?

“Ma a na mafai e le tagata ona faitau fasimea o le lalolagi, ioe, le miliona o lalolagi e pei o lenei, e le mafai ona avea o se amataga i le aofai o au foafoaga; ae ua toso atu pea ou ie pupuni; ma peitai o loo i ai oe iina, ma ua i ai iina lou loto; ma ua e fai mea tonu foi; ua e alofa mutimutivale ma agalelei e faavavau.” [Tagai Mose 7:28–30.]

Ona fetalai mai lea o le Alii: “… Faauta ia i latou nei o ou uso; o i latou o galuega a o’u lava lima, ma sa Ou tuu atu ia te i latou lo latou malamalama, i le aso na Ou foafoa ai i latou; ma sa Ou tuu atu i le tagata i le Faatoaga o Etena, lona faitalia;

“Ma sa Ou fai atu i ou uso, ma tuu atu foi le poloaiga, ma e tatau ona latou filifili aʼu, lo latou Tama; ae faauta, ua aunoa i latou ma le alofa, ma ua latou inoino i o latou lava toto.” [Mose 7:32–33.]

O mafuaaga nei na tutulu ai le Alii ma tutulu ai le lagi.

Na fesiligia au e se uso i se tasi o taimi pe mafai ona fiafia atoatoa se tagata i le malo selesitila pe afai ua le faatagaina se tasi o ana fanau e ulufale atu i ai. Sa ou fai atu ia te ia ou te manatu so o se tagata lava ua taofia se tasi o lana fanau mai le malo selesitila o le a maua lagona faanoanoa ona o lena tulaga; ma o le tulaga lena o lo o i ai lo tatou Tama oi le lagi. E le o ana fanau uma o le a agavaa mo le mamalu selesitila, ma o le toatele o le a faamalosia e pologa i lona toasa ona o a latou soligatulafono, ma o lena le mea ua avea ma mafuaaga o le faanoanoa ma le tutulu o le Tama ma le lagi atoa. E galue le Alii e tusa ai ma tulafono faalenatura. E ao ona togiolaina le tagata e tusa ai ma le tulafono ma o lona taui e fuafua i le tulafono o le amiotonu. Ona o lenei o le a le tuuina atu e le Alii i tagata o mea latou te le agavaa ai, ae o le a tauia tagata uma e tusa ai ma a latou galuega.

… Ua faamalieina au o lo tatou Tama oi le lagi o le a, pe a talafeagai ai, faasaoina tagata uma ma maua e i latou le mamalu selesitila, i le atoatoaga o le faaeaga. Ae, ua ia tuuina atu i le tagata lona faitalia ma o lo o i le tagata le avanoa e usiusitai ai i le upumoni e tusa ai ma mea ua faaalia ina ia maua le faaeaga o e amiotonu.¹²

Ua saunia e le Tama Faalelagi le auala o le togiola ina ia tatou toe foi atu ai i Lona afioaga.

A o i ai Atamu i le Faatoaga o Etena sa i ai o ia i le afioaga o le Atua, lo tatou Tama. … Ma ina ua tuliese mai le Faatoaga o Etena na suia ai le vaaiga. Sa tuliesea Atamu ona o lana solitulafono mai le afioaga o le Tama. Ua taua mai e tusitusiga paia ua oti o ia faaleagaga—o lea, ua tapunia o ia mai le afioaga o le Atua.¹³

Ou te iloa o Iesu Keriso o le Alo o le Atua ma e sa ia maua mai lona Tama le mana e sui ai tagata mai le oti faaleagaga ma le faaletino ua oo mai i le lalolagi ona o le pau o Atamu.¹⁴

Ua na o le tasi lava le auala o le togiola, tasi le auala e mafai ai ona toefuatai ai le tino i le agaga; na ala lena i le Togiola le i’u, ma e tatau ona faataunuuina e se tagata e le mafai ona aloese mai le oti ae o se tasi e i ai le mana e oti ai ma i ai foi le mana i luga o le oti. O lea, na auina mai ai e lo tatou Tama oi le lagi ia i tatou lona Alo, o Iesu Keriso, i le lalolagi ma le ola ia te ia lava. Ona o ia [Iesu Keriso] o lona tina e i ai le toto i ona alatoto, ua ia te ia le mana e oti ai. E tuuina atu e ia lona tino ina ia oti ina ia ia toe aumai ai. Sei ou faitau ana lava upu: “O le mea lea e alofa mai ai lou Tama ia te au, aua ou te tuuina atu lou ola, ina ia ou toe aumai ai.

E leai se tasi na te aveeseina ia te a’u, ae peitai a’u, ou te tuuina atu e a’u lava. O ia te a’u le pule e tuuina atu ai, o ia te au foi le pule e toe aumai ai” (Ioane 10:17–18).¹⁵

Sa le o se faamoemoega lava o lo tatou Tama oi le lagi le tuua o le tagata e tau saili lo latou ala i le pogisa e aunoa ma se malamalama e taitaiina ai i latou, ma faamoemoe i lalo o nei tuutuuga o le a mafai ona toe maua mai ai lo latou auala e toe fai mai ai i le malo ma lona afioaga paia. E le o le ala lea a le Alii. I le faasologa o tausaga uma mai le amataga ua faaalia mai e le Alii lona agalelei mo lana fanau ma ia naunau e tuuina atu ia i latou le taitaiga. Mai le amataga o taimi sa tatala le lagi, na auina mai e le Alii avefeau mai lona afioaga i ana auauna na tofia mai luga, o alii o umia le pule o le perisitua ua valaauina e aoao atu mataupu faavae o le Talalelei, e lapatai i tagata ma aoao i latou i le amiotonu; ma o nei alii ua latou maua lenei malamalama, o nei musumusuga ma le taitaiga mai nei avefeau mai le afioaga o le Atua. E moni lenei mea i lo tatou tisipenisione. E le manaomia e alii ona tapuni o latou fofoga ma lagona e leai se malamalama ae faalagolago i lo latou poto, aua o le Alii o lo o naunau pea e taitai ma faatonu ma faaali mai le auala. Sa ia auina mai, e pei ona ou fai atu, avefeau mai lona afioaga. Sa ia auina mai faaaliga. Sa ia poloai mai ina ia tusia lenei upu, ina ia lolomiina, in ia iloa e tagata uma.¹⁶

Ou te faapea atu ia te outou, ma le Ekalesia atoa, ma, ona o lenei, mo le lalolagi atoa, o se Tama agalelei ma alofa ua toe fetalai mai i nei aso mulimuli mai le lagi i ana auauna perofeta.

O lona siufofoga o le leo e valaau atu i tagata uma e o mai i lona Alo Pele, e aoao ia te ia, e tofo i lona matagofie, ma ave lana amo i o latou luga, ma galulue mo lo latou faaolataga e ala i le usiusitai i tulafono o lana talalelei. O lona siufofoga o le leo o le viiga ma le mamalu, o le filemu i lenei olaga, ma le ola e faavavau i le olaga a sau.¹⁷

Fautuaga mo Suesuega ma le Aoaoina Atu

Fesili

O le a se mea e taitaia se tagata ina ia mafai ona tatalo i le Atua “e peiseai o talanoa i se uo”? (“Mai le Soifuaga o Iosefa Filitia Samita”). Mafaufau i ni auala e mafai ona e faamalosia ai lau sootaga ma lou Tama Faalelagi.
Sa faaalia e Peresitene Samita lana faafetai mo le Uluai Faaaliga a Iosefa Samita ua toefuatai ai “le malamalama moni o le Atua” (vaega 1). O a nisi o mea moni ua e iloa e uiga i le Atua le Tama ma Iesu Keriso ona o le Uluai Faaaliga?
E tusa ai ma uiga o le Atua na tau mai e Peresitene Samita i le vaega 2, o le fea e sili ona taua ia te oe? Aisea? A o e faaaoga le faatuatua i lou Tama Faalelagi, e faapefea ona fesoasoani lea ia te oe e iloa ai Ona uiga?
Na molimau Peresitene Samita: “O i tatou o fanau agaga a le Atua lo tatou Tama Faalelagi… .O i tatou o nisi o lona aiga” (vaega 3). E faapefea e lenei upumoni ona uunaia ai oe?
I le vaega 4 ma le 5, o a ni faamatalaga ua fesoasoani e te lagona ai le alofa o le Tama Faalelagi ia te oe? Aisea e taua ai le malamalama e alofa le Atua ia i tatou ma e fiafia ia i tatou taitoatasi? E faapefea ona tatou fesoasoani i tagata o le aiga ma uo ia lagona Lona alofa?
Mafaufau i mea sa faia e le Tama Faalelagi e fesoasoani ia te oe e toe foi atu ai i Lona afioaga (tagai vaega 6). O a ni ou lagona a o e mafaufau e uiga i le Tama Faalelagi ua ia auina mai Lona Alo Pele e Toatasi na Fanaua? O a ni auala ua auina mai ai e le Tama Faalelagi le “malamalama e taitai [oe]”?

Mau Fesootai

Ioane 3:16; 17:3; 1 Nifae 11:17; Alema 30:44

Fesoasoani mo le Aoaoina Atu

“O le tele o aoaoga o lo o faia i le Ekalesia e tasi le auala, o le lauga sao atu i le vasega. Tatou te le tali lelei tele i aoaoga mai le faiaoga i le potu aoga. Tatou te fai faapea i sauniga faamanatuga ma konafesi, ae o le aoao atu e mafai ona fetufaai ina ia mafai ai ona e fai o ni fesili. E faigofie ona e fai ni fesili i se vasega” (Boyd K. Packer, “Mataupu Faavae o le Aoao Atu ma le Aoaoina Mai,” Ensign, Iuni 2007, 87).