Mataupu 3

O Le Ata o le Faaolataga

“Na saunia e lo tatou Tama i le lagi se ata o le faaolataga mo lana fanau faaleagaga … ina ia mafai ai ona latou faalauteleina ma alualu i luma seia o latou maua le ola e faavavau.”

Mai le Soifuaga o Iosefa Filitia Samita

Ia Aperila 29, 1901, na maliu ai le tuafafine o Iosefa Filitia Samita o Alice e 18 ona tausaga mai se mai faaumiumi. Faatoa maea mai le misiona a Iosefa i Egelani. O lana tali i le tala i le maliu o Alice na faaalia ai lona alofa mo lona aiga ma lana molimau i le ata o le faaolataga. “O se mea faigata lenei mo i matou uma,” sa ia faamauina i lana api talaaga. “Sa ou le iloa le tigaina o lona mai e ui ina ou iloa sa ma’i o ia. Sa ou faamoemoe lava e toe feiloai ma ia ma le aiga atoa i ni nai vaiaso, ae faia pea le finagalo o le Atua. O taimi faapenei o le faamoemoe e aumai e le talalelei ia i tatou ua matua manaomia lava. O le a tatou toe feiloai uma lava i le isi itu e olioli i le matagofie o faamanuiaga o le i ai o i tatou taitoatasi, o le a le toe motusia fesootaiga o aiga, ae o le a tatou ola uma e talia faamanuiaga, ma iloa le alofa mutimutivale o lo tatou Tama i le lagi. Sei ou savali pea i le ala o le upumoni, ma viia le suafa o lo o ou tauaveina, o feiloaiga ma ou aiga o le a sili ona suamalie ma faavavau, o lau tatalo lea ma le lotomaulalo.”¹

I le auauna ai o se Aposetolo ma mulimuli ane avea ma Peresitene o le Ekalesia, sa molimau pea lava pea Peresitene Iosefa Filitia Samita i le faamoemoe e oo mai e ala i le malamalamaaga o le talalelei. Na ia aoao mai, “E i ai la tatou ata o le faaolataga; tatou te taitai le talalelei; ma o le talalelei o le faamoemoega sili lea o le lalolagi, o le auala e tasi e maua ai le filemu i le lalolagi ma faatonu ai mea sese o lo o tulai mai i nuu uma.”²

Aoaoga a Iosefa Filitia Samita

I le muai lalolagi o agaga, sa tatou fiafia e aoao i le ata o le faaolataga a le Tama Faalelagi.

O i tatou uma o tagata o le aiga o lo tatou Tama i le Lagi. Sa tatou ola ma nonofo ma Ia a o le i faataatiaina faavae o lenei lalolagi. Sa tatou vaai i Ona fofoga, lagona Lona alofa, ma faalogo i Ana aoaoga, ma sa Ia faauuina tulafono ua mafai ai ona tatou faalautele ma alualu i luma ma maua ai iunite o aiga e faavavau mo i tatou lava.³

“Sa tatou ola ma nonofo faatasi ma lo [tatou Tama o i le Lagi] a o le i faavaeina lenei lalolagi.”

Na saunia e lo tatou Tama i le lagi se ata o le faaolataga mo lana fanau agaga. Na mamanuina lenei fuafuaga ia mafai ai ona latou faalauteleina ma alualu i luma seia o latou maua le ola e faavavau, o le igoa lea o le ituaiga o soifuaga o lo o soifua ai lo tatou Tama i le Lagi. O lenei fuafuaga e mafai ai e le fanau a le Atua ona avea faapei o ia ma maua le mana ma le poto ma le malamalama ua ia te ia.⁴

Ua tatou aoao mai le Penina Tau Tele, sa i ai se fono sa faia i le lagi, na valaauina ai e le Alii i ona luma agaga o ana fanau ma tuuina atu ia i latou se fuafuaga e o mai ai i lenei lalolagi, ia maua le ola faaletino ma tino faaletino, e ola nofo vaavaaia ai ma oo atu ai i le tulaga faaeaina e ala i le toetu e oo mai i le togiola a lona Alo e Toatasi na Fanaua, o Iesu Keriso [tagai Mose 4:1–2; Aperaamo 3:22–28]. O le manatu o le ui mai i le olaga faaletino ma tofo ai i fesuiaiga uma o le olaga faalelalolagi ina ia maua ai le aafiaga e oo i ai mai puapuaga, tiga, faanoanoaga, tofotofoga ma mafatiaga, e faapea foi ma le fiafiaga o le olaga i lenei soifuaga masani, ma afai e faatuatua, e ala mai le toetu i le ola e faavavau i le malo o le Atua, ma avea faapei o ia [tagai 1 Ioane 3:2], e faatumuina i latou i le agaga o le olioli, a o latou “alalaga fiafia.” [Tagai Iopu 38:4–7.] O le aafiaga ma le malamalama ua maua i lenei olaga faaletino, latou te le maua mai i se isi lava auala, ma o le mauaina o le tino faaletino sa manaomia mo lo latou faaeaga.⁵

O Le Pau o Atamu ma Eva o se vaega o le fuafuaga a le Tama Faalelagi.

O le ata o le faaolataga, po o le faatulagaga faaletulafono, lea ua ta’ua o le talalelei a Iesu Keriso, sa fausia i le lagi, a o le i faavaeina le lalolagi. Sa tofia ai iina o Atamu lo tatou tama o le a sau i le lalolagi ma tulai i le ulu o le aiga o le lalolagi atoa. O se vaega o lenei fuafuaga tele, ina ia ‘ai e ia le fua o le laau faasaina ma pau, ina ia oo mai ai le tiga ma le oti i le lalolagi, mo le lelei atoatoa o ana fanau.⁶

O le Pau o se vaega taua o le olaga faaletino vaavaia o le tagata. … Ana le aai e Atamu ma Eva le fua, po ua le maua e i laua le meaalofa sili o le ola faaletino. I le ma lea, o le a le maua e i laua ni fanau, ma o le a le faataunuuina le poloaiga na tuuina atu ia i laua e le Alii.⁷

O le Pau o Atamu ma Eva “ua aumai ai le tiga, ua aumai ai le faanoanoa, ua aumai ai le oti; ae … ua aumai ai foi faamanuiaga.”

O le pau o Atamu ua faataunuuina ai fesuiaiga eseese uma o le olaga faaletino. Ua aumaia ai le tiga, ua aumaia le faanoanoa, ua aumaia ai le oti; ae le tatau foi ona tatou faagalo na aumaia ai foi ma faamanuiaga. … Na aumaia ai le faamanuiaga o le poto ma le malamalama ma le olaga faaletino.⁸

Na ofo mai e Iesu Keriso Ia lava o se taulaga e faaola ai i tatou mai le Pau ma a tatou agasala.

O le solitulafono a Atamu na oo mai ai nei oti e lua, faaleagaga ma le faaletino—o le aveesea o le tagata mai le afioaga o le Atua, ma le ola faaletino ma oo mai ai ma’i uma o le tino. Ina ia mafai ona toe foi mai o ia, e tatau ona i ai se totogi o le solitulafono. Ua manaomia le faamasinoga tonu.⁹

O le tulaga masani lava ma le amiotonu e faapea o ai lava ua solitulafono e tatau ona totogia le sala—togiolaina lana solitulafono. O lea, ina ua solitulafono Atamu, ua manaomia e le faamasinoga tonu o ia, ae le o se isi lava, e mafatia mo le agasala ma totogi le sala i lona ola. Ae o Atamu, i lona solia o le tulafono, ua tatau ai ia te ia le fetuu, ma ona ua feetuuina o ia ua le mafai ai ona ia togiolaina, pe toe faafoi le mea ua ia fai. Pe o lana fanau foi, aua ua aafia ai foi latou i le fetuu, ma e manaomia se tasi sa le afaina i le aafiaga o le fetuu ina ia togiola mo lena uluai solitulafono. I le ma lea, ona sa aafia ai i tatou uma i le fetuu, ua leai foi se malosi ia i tatou e togiola ai mo a tatou agasala taitoatasi. O lea ua alagatatau ai i le Tama ona auina mai lona Alo Pele e Toatasi na Fanaua, o le na saoloto mai le agasala, e togiola mo a tatou agasala e faapea ma le solitulafono a Atamu, lea ua manaomia e le faamasinoga tonu ona fai. Sa ia ofoina atu ia lava o se taulaga mo agasala, ma i lona maliu i luga o le satauro ua ia tauaveina e ia lava le solitulafono a Atamu faapea ma a tatou agasala taitoatasi, ma faaolaina ai i tatou mai le pau, ma a tatou agasala, ae faalagolago i le salamo.¹⁰

O lo tatou tiute le aoao atu o le misiona a Iesu Keriso. Aisea na afio mai ai o ia? O le a se mea na ia faia mo i tatou? E faapefea ona faamanuiaina ai i tatou? O le a le tau na ia faataunuuina ai? Aisea ua totogiina ai i lona soifua, ioe, e sili ae nai lona soifua! O a ana mea sa fai e ese ai mai le tuituiina o ia i fao i le satauro? Aisea ua tuituiina ai o ia i fao iina? Ua tuituiina ina ia maligi lona toto e togiolaina ai i tatou mai lenei faasalaga sili ona matautia e oo mai, o le tulia ese mai le afioaga o le Atua. Na maliu o ia i luga o le satauro ina ia toe aumaia i tatou, ia toe tuufaatasia ai o tatou tino ma agaga. Ua ia aumai ia i tatou lena aia. Afai ua na ona tatou talitonu ia te ia ma tausi ana poloaiga, na maliu o ia mo i tatou ina ia tatou maua le faamagaloga o a tatou agasala ma ia tatou le totogia lena sala. Sa ia totogi le tau. …

… E leai se tagata na te mafai le mea na ia faia mo i tatou. Sa le i tatau ona maliu o ia, sa mafai ona ia teena. Sa ia faia e ia lava. Sa ia faia ona o le poloaiga mai lona Tama. Na ia silafia le tiga o le a oo i ai; ae ui i lea, ona o lona alofa mo i tatou, sa naunau ai o ia e fai. …

O le tuituiina o fao i ona lima ma vae o le Faaola ua na o se vaega itiiti o ona tiga. Ua fai ma a tatou amio, i lo’u manatu, le lagona, po o le mafaufau faapea o ona tiga aupito sili o le tuituiina i le satauro ma tuu ai e tautau iina. Ia, o le vaega lena o le talafaasolopito o le lalolagi o le afe o tagata sa tiga ai i lena auala. O lea o ona tiga, e tusa ai ma lenei tulaga, ua le sili ae i tiga o isi o e sa faasatauro ai foi. O le a la lona mafatiaga aupito sili? Ou te faamoemoe tatou te faamalamalama lenei mea i mafaufau o tagata taitasi uma o lenei Ekalesia: O lona mafatiaga aupito sili na oo mai a o le i i ai o ia i le satauro. Ua faamatala mai i tusitusiga paia o lea sa tupu i le Faatoaga o Ketesemane, na tafe mai ai le toto i pu ninii uma o lona tino; ma i le tiga tele o lona agaga, sa ia aioi atu ai i lona Tama. E le o fao na tuituiina ai ona lima ma ona vae. O lenei aua nei fesili mai ia te au pe faapefea ona fai lena mea aua ou te le iloa. E leai se tasi e iloa. Pau le mea tatou te iloa e faapea sa ia ave i ona lava luga lena sala faigata. Sa ia tauave i ona luga a tatou soligatulafono, ma totogi le tau, o le tau o le tiga matuitui.

Mafaufau i le Faaola ua ia tauave le avega tuufaatasi a tagata taitasi—puapuaga—i nisi o auala ou te faapea atu ai, ou te le malamalama; na ona ou talia—na mafua ai ona tiga ma puapuagatia, e faatusa i le itiiti o tiga mai le tuituiina o fao i ona aao. Sa ia aioi atu ma le atuatuvale i Lona Tama, “A e finagalo i ai, ia e aveese lenei ipu!” ae aua le faia lou loto [tagai Mataio 26:42; Mareko 14:36; Luka 22:42]. Sei ou faitau atu se upu se tasi pe lua i le mea na fetalai mai ai le Alii e tusa ai ma lena:

“Aua faauta, o au le Atua na puapuagatia i nei mea mo tagata uma, ina ia latou le puapuagatia pe afai latou te salamo;

“A e peitai, afai latou te le salamo e ao ina latou tiga e pei o au;

“O le tiga lea na faagateteina ai au lava, o le Atua, le silisili ese i mea uma, ona o le tiga ma na maligi ai le toto mai pu laiti uma lava o le tino, ma na tiga le tino atoa ma le agaga—ma sa ou loto ou te le inu i le upu oona, ae teena—

“A e ui i lea, ia i ai i le Tama le viiga, ma na ou inu ma faaumaina ai a’u sauniuniga i le fanau a tagata” (MF&F 19:16–19).

A ou faitau i lena mea e faalotomaualaloina au. O Lona alofa mo tagata, mo le lalolagi, sa faasilisili sa ia naunau ai e ave le avega e le mafai e se tagata ona ave, ma totogi se tau e le mafai e se tasi ona totogi, ina ia tatou sosola ese ai.¹¹

“O lo tatou Faaola o Iesu Keriso e totonugalemu i ai lenei fuafuaga sili o le alualu i luma ma le faaolataga.”

O le Alo o le Atua na [fetalai]: “O le a ou alu i lalo ma totogi le tau. O le a fai au ma Togiola ma togiolaina ai tagata mai le solitulafono a Atamu. O le a ou ave i ou luga le agasala a le lalolagi ma togiola agaga taitasi mai a latou agasala pe a salamo.”¹²

Sei tatou faia se faataitaiga: O se tagata o lo o savali i luga o le auala ua pau i se lua loloto ma le pogisa ua le mafai ai ona toe alu ae i luga ma toe maua ai lona saolotoga. E faapefea ona faasaoina e ia o ia lava mai lona tulaga faigata? E le mafai e ia lava, aua e leai se auala e sola ese mai ai le lua. Ua ia valaau i se fesoasoani, ma o se agaga agalelei, ua lagona lana tagi mo se fesoasoani, ua faataalise atu e fesoasoani ia te ia ma tuuifo se apefai, ua tuuina atu ia te ia le auala e mafai ai ona ae i luga o le eleele. O le tulaga tonu lava lea sa oo i ai Atamu ma ana fanau, ina ua ia ‘ai i le fua faasaina. Ona ua i ai faatasi i le lua, e leai se tasi e oo ae i luga ma faasaoina isi. O le lua o le vavaeeseina lea mai le afioaga o le Alii ma le oti faaletino, o le gataaga o le tino. Ma o le a oo uma ai i le oti, e leai se tasi e mafai ona maua se auala e sola ese mai ai.¹³

Ua afio mai le Faaola, e le aafia ai i lena lua, ma tuuifo le apefai. Ua ia afio ifo i lalo o le lua ma ua mafai ai e i tatou ona faaaoga le apefai e sosola ese ai.¹⁴

I lona alofa tunoa le faatuaoia, na faafofoga le Tama i le tagi a lana fanau ma auina mai lona Alo e Toatasi na Fanaua, o le sa le i saisaitia i le oti po o le agasala, e aumai le ala e sosola ese ai. Na ia faia lenei mea e ala i le togiola ma le talalelei e faavavau.¹⁵

O le faafetai o o tatou loto e tatau ona faatumuina ma masuasua i le alofa ma le usiusitai mo le alofa mutimutivale tele o [le Faaola]. Ona o le mea sa ia faia, o lea e le tatau ai lava ona tatou faatamala mo ia. Sa ia faatau i tatou i le tau, o le tau o lona mafatiaga sili ma le faamaligiina o lona toto i le taulaga i luga o le satauro.¹⁶

Ina ia atiae ai i luga o le faavae o le Togiola a Iesu Keriso, tatou te galueaiina ai lo tatou faaolataga i le olaga faaletino nei.

O lo tatou Faaola o Iesu Keriso o lo o ogatotonu i lenei fuafuaga sili o le alualu i luma ma le faaolataga.¹⁷

Ina ia atiae ai i luga o le faavae o le togiola, o le ata o le faaolataga e aofia ai mea nei:

Muamua, e tatau ona i ai lo tatou faatuatua i le Alii o Iesu Keriso; e tatau ona tatou talia o ia o le Alo o le Atua; e tatau ona tuu atu lo tatou talitonuga ia te ia, faalagolago i lana upu, ma le naunautai e maua faamanuiaga e oo mai ona o le usiusitai i ana tulafono.

Lua, e tatau ona tatou salamo mai a tatou agasala; e tatau ona tatou lafoai le lalolagi; e tatau ona tatou filifili i o tatou loto, e aunoa ma se masalosalo, o le a tatou ola i ni olaga faaleatua ma le sa’o.

Tolu, e tatau ona papatisoina i tatou i le vai, i lalo o aao o taitai tofia, o e o lo o i ai le mana e fusifusia ai mea i le lalolagi ma faamauina i le lagi; e tatau ona tatou, e ala i lenei sauniga paia, ona osia se feagaiga e auauna i le Alii ma tausi i ana poloaiga.

Fa, e tatau ona tatou maua le meaalofa o le Agaga Paia; e tatau ona fanau fouina i tatou; e tatau ona susunuina agasala ma amioleaga mai o tatou agaga e faapei ua susunuina i se afi; e tatau ona tatou maua se foafoaga fou e ala i le mana o le Agaga Paia.

Lima, e tatau ona tatou tutumau seia oo i le iuga; e tatau ona tatou tausi i poloaiga pe a mavae le papatisoga; e tatau ona tatou galulue mo lo tatou faaolataga i le matau ma le gatete i luma o le Alii; e tatau ona tatou ola ina ia maua uiga faaleatua ma avea o ni tagata e mafai ona fiafia i le paia ma le ofoofogia o le malo selesitila.¹⁸

O lea ou te molimau atu o nei tulafono e tatau i tagata ona usiusitai i ai ina ia maua le faaolataga, ma o le talalelei a Iesu Keriso, ua faaalia mai i nei aso i perofeta ma aposetolo, ma ua taitaiina nei e lana ekalesia, lea ua ia toe faatuina i luga o le fogaeleele.¹⁹

O i tatou, o tatou uma lava o lo o iinei i lenei lalolagi faaletino, e faataitai ai. Na muai auina mai i tatou ina ia maua ni tapeneko [tino] mo o tatou agaga e faavavau; lona lua, ina ia faamaonia i faataitaiga, ia i ai tofotofoga e faapea foi le tele o le olioli ma le fiafia e mafai ona maua e ala i se feagaiga paia o le usiusitai i mataupu faavae e faavavau o le talalelei. O le ola i la le tino, e pei ona aoaoina e Liae lana fanau, o se “olaga faataitai.” (2 Nifae 2:21.) O iinei e faataitai ma suesueina ai i tatou ma vaai pe tatou te mafai, pe a faateaese i tatou mai le afioaga o lo tatou Tama e Faavavau ae aoaoina pea i ala o le ola e faavavau, alofa ma faamamalu ia te ia ma ia faamaoni i lona Alo Pele e Toatasi na Fanaua, o Iesu Keriso.²⁰

Na tatou o mai iinei e suesueina ma faamaonia e ala i le fesootai atu i le leaga faapea foi ma le lelei. … Ua faatagaina e le Tama ia Satani ma ana au e faaosooso i tatou, ae i le taitaiga a le Agaga o le Alii ma poloaiga e auala mai faaaliga, ua saunia i tatou e fai a tatou filifiliga. Afai tatou te fai le leaga, ua folafola mai o le a faasalaina i tatou; afai tatou te fai le lelei, o le a tatou maua le taui e faavavau o le amiotonu.²¹

O le olaga faataitai [o] se vaitaimi puupuu, ua na o se taimi puupuu e fesootai ai le faavavau o le tuanai i le faavavau o le lumanai. Ae o [se] vaitaimi e silisili lona taua. … O lenei olaga o se vaitaimi silisili ona taua i lo tatou ola ai i le faavavau.²²

O le a maua e tagata uma faamanuiaga o le toetu e ala i le Togiola a Iesu Keriso.

Na tatou o mai i lenei lalolagi ina ia oti. Sa malamalama lena mea a e tatou te le i o mai iinei. O se vaega o le fuafuaga, na talanoaina ma fuafuaina uma ae le i taitai ona tuuina mai le tagata i le lalolagi. … Sa tatou saunia ma naunau e fai lena malaga mai le afioaga o le Atua i le lalolagi o agaga i le lalolagi faaletino, iinei e mafatia ai i mea uma e faatatau i lenei olaga, o ana fiafiaga ma ona faanoanoaga, ma ia oti; ma o le oti e taua e faapei foi o le fanau mai.²³

O le oti faaletino, po o le oti o le tagata, e le o se tuueseesega tumau o le agaga ma le tapeneko o le tino, e ui lava o le a toe foi le tino i le elemene, ae o le tuueseeseina ua na o se vaitaimi e faamuta pe a oo mai le aso o le toetu e toetu mai ai le tino mai le palapala ma toe ola faatasi ma le agaga. O lenei faamanuiaga e oo mai i tagata uma e ala i le togiola a Keriso, e tusa po o lo latou amiolelei po o le amioleaga a o ola ai i la le tino. Na fai mai Paulo o le a i ai le toetutu o e amiotonu ma e amioletonu (Galuega 24:15), ma na fetalai le Faaola o i latou uma sa i le tuugamau o le a faalogo i lona siufofoga ma o le a latou o mai ai “o e na amiolelei, e toe tutu i le ola; ae o e na amioleaga, e toe tutu i le faasala” (Ioane 5:29).²⁴

O vaega taitasi taua o tino taitasi o le a toefuatai i o latou tulaga e tatau ai i le toetutu, e le afaina le tulaga o le tino i le oti. Pe ua mu i le afi, ai e se malie, e tusa lava po o le a. O itutino taua taitasi o le a toefuatai i lona lava tulaga e tatau ai.²⁵

E le mafai ona atoatoa agaga e aunoa ma le tino o aano ma ivi. O lenei tino ma lona agaga ua aumai ai le tino ola pea ma faamanuiaga o le faaolataga e ala mai le toetutu. A mavae le toetutu e le toe i ai se tuueseesega, o le tino ma le agaga ua tuufaatasia ina ia maua ai e le tagata le atoatoaga o le fiafia. E leai se auala, e ese nai lo le fanau mai i lenei olaga ma le toetutu, e mafai ai e agaga ona faapei o lo tatou Tama e faavavau.²⁶

O e amiotonu o le a maua le ola e faavavau ma o latou aiga i le afioaga o le Tama Faalelagi.

O nisi o tagata ua mautofi i oa e ala i galuega a o latou tama. O nisi ua mautofi e ala i le siitia i nofoalii faalelalolagi, i le malosi, i tofiga, i o latou tagata. O nisi ua saili e mautofi i le poto faalelalolagi ma lauiloa e ala i le faia o a latou lava galuega ma tutumau ai; ae tasi le tofi e sili, o le mautofi lea i le ola e faavavau.

Ua ta’u mai i tusitusiga paia o le ola e faavavau—o le ola ua i lo tatou Tama e Faavavau ma lona Alo, o Iesu Keriso,—o le meaalofa sili a le Atua [tagai MF&F 14:7]. Ua na o e ua mama mai agasala uma latou te maua. Ua folafola atu mo i latou “ua manumalo e ala i le faatuatua, ma ua faamauina e le Agaga Paia o le folafolaga, e liligi mai e le Tama i luga o i latou uma o e amiotonu ma faamaoni. O i latou ia o i latou o le ekalesia a le Ulumatua. O i latou ia o i latou ua tuu atu i ai e le Tama mea uma i o latou lima.” [MF&F 76:53–55; tagai foi fuaiupu 52.]²⁷

O lenei ata o le faaolataga e totonugalemu i le aiga. … [Ua] fuafuaina ina ia mafai ona tatou foafoa aiga e faavavau mo i tatou lava.²⁸

O i latou ua maua le faaeaga i le malo selesitila o le a i ai le “faaauauina o fanau e faavavau.” O le a ola i latou i le mafutaga faaleaiga.²⁹

Ua aoaoina i tatou i le talalelei a Iesu Keriso o le faalapotopotoga o le aiga o le a avea, e tusa ai ma le faaeaina faaselesitila, o le ua atoatoa, o se faalapotopotoga e fesootai ai le tama ma le tina ma le fanau o le tasi augatupulaga i le tama ma le tina ma le fanau o le isi augatupulaga, ma ua faalauteleina ai ma faasalalauina ai e oo atu i le iuga o taimi.³⁰

O nei faamanuiaga paia o le mautofi e faavavau … e le oo mai seia vagana ua auala mai le naunau e tausia poloaiga ma tiga foi faatasi ma Keriso pe a manaomia. I se isi faaupuga, o e o lo o saili i le ola e faavavau—o le meaalofa sili a le Atua—e manaomia le tuuina atu o a latou mea uma i luga o le fata faitaulaga, pe a manaomia, ma o lea foi, pe a manaomia le tuuina atu o o latou ola mo lenei ala, latou te le mafai lava ona totogi atu ia te ia mo faamanuiaga e tele ua maua ma ua folafolaina mai e faalagolago i lo latou usiusitai i ana tulafono ma poloaiga.³¹

Afai ua tatou o ese mai le lalolagi ma ua maua le atoatoaga o le talalelei, ua avea i tatou ma e saili atu i le mamalu selesitila; leai, ua le na ona tatou saili, afai tatou te faatuatua, aua ua tuuina mai e le Alii ia i tatou le faamaoniga e ala i lo tatou faatuatua, o le a tatou ulufale atu i le malo selesitila. …

… Tatou ola ina ia mautinoa ai so tatou nofoaga, ma ia tatou iloa ai, e ala i le olaga ua tatou ola ai, o le a tatou ulufale atu ai i Lona afioaga ma ola ai ma Ia, ma maua le atoatoaga o faamanuiaga sa folafola mai. O ai o le Au Paia o le a talia se tulaga e itiiti ifo i le atoatoaga o le faaolataga ua folafola mai mo i tatou? … E mafai mo i tatou, i lo tatou lotomaulalo, ma le agaga o le salamo, ona uunai pea lava pea; tausia poloaiga seia oo i le iuga, aua o lo tatou faamoemoe ma lo tatou sini o le ola e faavavau, ma o le ola lea i le afioaga o le Tama ma lona Alo; “O le ola e faavavau foi lenei,” sa fetalai mai ai le Alii,”ia latou iloa oe le Atua moni e toatasi, atoa ma Iesu Keriso ua e auina mai.” [Ioane 17:3.]³²

Ou te tulai nei, ou te mafai ona ta’ua o le iuga o le olaga, ma le malamalama i se aso e le o toe mamao o le a valaauina au e tuuina atu se lipoti o la’u galuega i le olaga faaletino. …

Ou te talitonu tatou te alolofa uma i le Alii. Ou te iloa o lo o soifua o ia, ma ou te tepa taulai i lena aso o le a ou vaai ai i ona fofoga, ma ou te faamoemoe e faalogo i lona siufofoga o faapea mai ia te au: “O mai ia, outou ua faamanuiaina e lou Tama, ia fai mo outou tofi le malo ua saunia mo outou mai le faavaeina o le lalolagi.” (Mataio 25:34.)

Ma ou te tatalo o lenei aso o le a fiafia ai i tatou uma, i lo tatou lava taimi faatulagaina.³³

Fautuaga mo Suesuega ma le Aoaoina Atu

Fesili

A o e faitau i le faatomuaga o le tala faamaumau o le “Mai le soifuaga o Iosefa Filitia Samita,” mafaufau i se taimi na e maua ai le filemu i lau molimau i le ata o le faaolataga. E faapefea ona e fesoasoani i se tasi o le aiga po o se uo ina ia maua lenei filemu?
E mafai faapefea e aoaoga a Peresitene Samita e uiga i le aufono i le lagi ona fesoasoani ia i tatou pe a tatou feagai ma tofotofoga? (tagai vaega 1.)
Na aoao mai e Peresitene Samita “e le tatau ona galo ia i tatou le moni o [le Pau o Atamu ma Eva] ua aumai ai faamanuiaga” (vaega 2). Aisea e te manatu ai e taua ona manatua lenei mea moni? O a nisi o faamanuiaga ua e maua ona o le Pau?
I le vaega 3, e faapefea e le faataitaiga a Peresitene Samita o le tagata na pau i le lua ona faatatau i o tatou olaga? Toe manatunatu pe faapefea e le Faaola ona faasaoina outou e ala i Lana Togiola.
O le a se mea o lo o fautua mai e saunoaga a Peresitene Samita i le vaega 4 e uiga i le faamoemoega o lo tatou olaga i le lalolagi? O le a le mea ua tuuina mai e le Alii e fesoasoani ia tatou ola saogalemu ai i lenei taimi o tofotofoga?
E faapefea ona e fesoasoani i se tasi ia malamalama i le folafolaga a Peresitene Samita i le vaega 5 e faapea “e taua le oti e faapei foi o le fanau mai”? E faapefea e le mataupu faavae o le toetu ona uunaia ai lou olaga?
O a ni auala e eseese ai le oa faalelalolagi mai le “tofi e faavavau” e mafai ona tatou maua e ala i le ata o le faaolataga? (Tagai vaega 6.) E faapefea e se malamalamaaga i nei eseesega ona fesoasoani tatou te saunia ai mo le ola e faavavau?

Mau Fesootai

Iopu 38:4–7; 2 Nifae 2:15–29; 9:5–27; Alema 12:20–35; MF&F 19:16–19; Mose 5:10–12

Fesoasoani mo le Aoaoina Atu

“Ina ia fesoasoani ia i tatou e aoao mai tusitusiga paia ma saunoaga a perofeta o aso e gata ai, ua saunia e le Ekalesia tusi lesona ma isi punaoa. E itiiti le manaomia mo faamatalaga po o nisi punaoa talafeagai” (O Le Aoao Atu, E Leai Se isi Valaauga e Sili Atu: O Se Punaoa Taiala mo le Aoaoina Atu o le Talalelei [1999], 52).