Mataupu 22

Tatalo—o se Poloaiga ma se Faamanuiaga

“E i ai ni nai mea i le olaga e taua e faapei o le fesootai atu i le Atua i le tatalo.”

Mai le Soifuaga o Iosefa Filitia Samita

Na aoao mai Peresetene Iosefa Filitia Samita e ao ona tatou avea le agaga o le tatalo o se “vaega o o tatou tagata.”¹ Sa ia faia se faataitaiga o lenei mataupu faavae i le ala sa ia soifua ai ma le ala sa ia tatalo ai—na o ia, faatasi ma lona aiga, ma i nofoaga faitele.

Ina ua tuanai le maliu o lona faletua muamua o Louie, na ia tusia lenei aioiga faamomoiloto i lana api talaaga, e iloa ai se ata o ana tatalo patino: “Lo’u Tama e i le lagi, ou te tatalo i Lau Afio, fesoasoani mai ia te au ia ou ola ina ia ou agavaa e feiloai ma ia i le mamalu e faavavau, ina ia ma toe faatasi ma ia, ma ia le toe faaeseeseina, i le gasologa o tausaga le mafaitaulia o le faavavau. Fesoasoani mai ia te au ina ia ou lotomaulalo, ina ia talitonu i Lau afio. Aumai ia te au le malamalama i mea faalelagi ina ia maua lo’u malosi e tetee atu ai tiapolo uma ma ia tumau ai ma le faamaoni i Lau upumoni. Le Alii e, fesoasoani mai ia te au, foai mai ia te au le ola e faavavau i lou Malo. Faatonu mai la’u savali i le amiotonu, tuu mai ia te au Lou Agaga Atoa. Fesoasoani mai ia te au e tausi i au fanau taua ina ia tumau i le mama ma le le pona i o latou olaga atoa, ma a uma lenei olaga, auina atu i matou i lou Malo Selesitila, matou te tatalo atu ai. I le suafa o lo matou Faaola, ia tumau pea, Amene.”²

O le atalii o Peresitene Samita o Iosefa Jr. sa ia faamatala se tatalo e manatua pea na faia e Peresitene Samita ao malaga atu i laua i lo la aiga i le Aai o Sate Leki ina ua foi mai se malaga i le itu i sasae o Iuta. Sa fetaiai i laua ma timuga ma matagi malolosi ma ua sese le mea ua afe i ai le la taavale,” ma iu ane ai i se nofoaga e ta’ua o le Indian Canyon. “Na faasolo ina atili mamafa timuga ma matagi ma ua palapala tele ma maseesee le auala, ua oo ai lava ina le gata ona matautia ae ua le mafai lava ona toe alu i se isi mea. O le puaoa mafiafia na punitia ai omoomo o le auala palapala e tasi le laina, ma o Iosefa Jr. ma le alii Fomai o Tavita E. Samita o ni pasese na taumafai e tulei ma faapaleni le taavale ona o le fefefe ina nei see atu i le vanu loloto i lalo. Sa amata ona vivili uili i le palapala ma mulimuli ane ua le mafai lava ona toe gaioi le taavale. … Na manatua e Iosefa lona tama o faapea mai, ‘Ua tatou faia mea uma e ao ona fai. O le a tatou valaau atu i le Alii.’ Sa punou lona ulu i le tatalo, ma valaau atu i le Alii e saunia le ala ina ia ona faasa’o lona sese ma aluese mai le vanu matautia ma faaauau ai le malaga i le aiga. Na ia ta’u atu i le Alii e i ai ni ona tuatuagia taua e manaomia ai o ia i le aso na sosoo ai, ma e matua taua lava lona toe foi atu i le Aai i Sate Leki. O se mea ofoofogia, na tea timuga ma matagi, ma sa agi mai le savili i luga, ua faamago ai le auala ma ua mafai ai ona latou malaga ese atu … ma mulimuli ane ai oo i luga o le alatanu televave. E lei pine ona latou oo atu i vaega maulalo ae toe oso mai le afa, ua poloka ai taavale i lea lava nofoaga mo ni itula. A o latou faasolo agai atu i le Vanu o Provo ma agai atu ai i le Aai o Sate Leki, ina ua mavae le tele o itula faaopoopo o le malaga, sa taofia i latou e le leoleo auala ma fesili mai po o fea na o mai ai. Ina ua logo atu na latou ui mai i le Indian Canyon na fai mai le leoleo auala, ‘E le mafai lena mea! Ua lipotia mai ua tafiesea uma auala laupapa o lena nofoaga.’ Na tetei i latou i ulutala o nusipepa o le aso na sosoo ai aua na lipotia mai ai le 200 o taavale ua pa’ulia i le nofoaga na latou sosola ese mai ai.”³

I le 62 tausaga o le galuega faa-aposetolo a Peresitene Samita, o le tele o ana lauga e aofia ai tatalo faalauaitele sa ia talosagaina ai faamanuiaga o le lagi mo tagata o le Ekalesia ma le lalolagi aoao. Mo se faataitaiga, i lana muai konafesi aoao o se Peresitene o le Ekalesia, sa ia aioi atu, “Sa ou tatalo i le Atua le Tama i le Lagi ina ia mafai ona tatala pupuni o le lagi ma liligi mai i luga o ana fanau i le lalolagi aoao faamanuiaga sili e faavavau ina ia faaleleia ai lo latou tulaga faaletino ma le faaleagaga.”⁴

O tatalo a Peresitene Samita na faaalia ai le loloto o lana molimau ma lona alofa mo lona Tama i le Lagi ma lona Faaola. Na saunoa Peresitene Boyd K. Packer, o le na valaauina e galue i le Korama a Aposetolo e Toasefululua ao avea Iosefa F. Samita ma Peresitene o le Ekalesia e faapea: “O se aafiaga manaia lava le faalogo pe a tatalo Peresitene Iosefa Filitia Samita. E oo lava ina ua tea le iva sefulu o ona tausaga sa ia tatalo ina ia mafai ona ia ‘tausia ana feagaiga ma tiute ma tumau ai seia oo i le iuga.”⁵

Aoaoga a Iosefa Filitia Samita

Ua poloaiina i tatou e faalatalata atu i le Tama Faalelagi i le tatalo.

O se poloaiga mai le Alii lo tatou saili pea lava pea ia te ia i le tatalo ma le lotomaulalo. Ao i ai faatasi le Faaola ma ona soo na ia aoao i latou e tatalo ma sa ia faia se faataitaiga mo i latou i tatalo faifaipea i lona Tama. Tatou te talitonu, ona o le poloaiga mai le Alii, e i ai uiga taua i le tatalo, ma pe afai tatou te saili i le Alii e ao ona faia i le agaga o le lotomaulalo ma le migao. …

… O le tiute o matua le aoao o a latou fanau e tatalo pe a oo ina amata ona malamalama i latou. Ia aoao i latou e faamasani e fesootai i lo latou Tama i le lagi, atoa ai ma le malamalama i le mafuaaga o le tatalo. Afai e i ai lenei amio masani ao laiti, e mafai ona tumau ai i tausaga o lo latou matutua, ma o le alii po o le tamaitai ua saili faatauanau i le Alii ma faafetai atu ia te ia mo faamanuiaga, e iloa o le a le tuulafoaiina i latou e le Alii i le taimi e manaomia ai.⁶

“O le tiute o matua le aoao o a latou fanau e tatalo pe a amata ona latou malamalama.”

Ou te le iloa pe tatou te nonofo ea ma mafaufau pe aisea ua finagalo ai le Alii ia tatou tatalo. Po ua ia naunau tatou te tatalo ona ua ia finagalo ia tatou ifo ma tapuai atu ia te ia? Pe o le mafuaaga tonu ea lea? Ou te talitonu e le o lea. O Ia o lo tatou Tama Faalelagi, ma ua poloaiina i tatou e tapuai ma tatalo atu ia te ia i le suafa o lona Alo Pele o Iesu Keriso. Ae o le Alii e i ai pea o ia e aunoa ma a tatou tatalo. O Lana galuega o le a faaauau pea e pei ona masani ai, pe tatou te tatalo pe leai. … O le tatalo o se mea tatou te manaomia, e le faapea e manaomia e le Alii. Ua silafia lava e Ia fai lana galuega ma faataunuuina e aunoa ma se fesoasoani mai ia i tatou. O a tatou tatalo ua le faamoemoe e ta’u atu ai ia te ia le auala e fai ai lana galuega. Afai ua ia i tatou le manatu faapea, o le mea moni ua sese lea manatu. O a tatou tatalo ua faia mo lo tatou lelei, e atiina ae ai i tatou ma maua ai lo tatou malosi ma le lototoa, ma faateleina ai lo tatou faatuatua ia te ia.

O le tatalo o se mea e faamaulaloina ai le agaga. E faalauteleina lo tatou malamalama; na te faamalamalamaina le mafaufau. E faalatalata atili ai i tatou i le Tama i le lagi. Tatou te manaomia lana fesoasoani; e le fesiligia lena mea. Tatou te moomia le taitaiga a lona Agaga Paia. Tatou te manaomia le iloa ua tuuina mai mataupu faavae ia i tatou ina ia mafai ai ona tatou toe foi atu i lona afioaga. E manaomia ona faamalamalama o tatou mafaufau e ala i musumusuga mai ia te ia; ma o mafuaaga ia ua tatou tatalo ai ia te ia, ina ia fesoasoani mai ia i tatou e ola ai ina ia tatou iloa lana upumoni ma ia mafai ai ona savavali i lona malamalama, ina ia tatou toe foi atu ai i lona afioaga, e ala i lo tatou faatuatua ma lo tatou usiusitai.⁷

E i ai ni nai mea i le olaga e taua e faapei o le fesootai atu i le Atua i le tatalo. Ua toso e le Alii le pupuni i o tatou mafaufau ina ia galo ai ia i tatou la tatou mafutaga ma ia, o nisi o lona aiga i le muai olaga. O le tatalo o le ala lea o fesootaiga ua ia saunia mo i tatou e toe fesootai ai ma ia. O lea, o se tasi o mafuaaga taua o lo tatou olaga faataitai ina ia iloa ai pe mafai ona tatou aoao pea lava pea ma le agaga o le tatalo i o tatou loto pe a oo i le taimi ua finagalo ai le Alii e fetalai mai, o le a tatou lagonaina lona siufofoga i o tatou loto.⁸

O taimi tatau e tatalo ai o taimi uma

“Ma Ou te tuu atu ia te i latou se poloaiga (o lona uiga, mo matua i Siona), o ia o lē e le faia ana tatalo i luma o le Alii i lona vaitau, ia tuu atu o ia ia manatua i luma o le faamasino o lo’u nuu.” [MF&F 68:33.]

Ou te le iloa pe ua tatou faitau pea i lena fuaiupu o lenei mataupu ma ou te manatu i nisi o taimi pe ua tatou iloa le taua tele o lenei poloaiga. E le mafai e se tasi ona maua le Agaga o le Alii, sei vagana ua ia tatalo. E le mafai e se tasi ona maua musumusuga a le Agaga Paia, seia maua i lona loto le agaga tatalo. …

O lenei ou te manao ina ia manatunatu i lenei mataupu mo sina taimi… . O le a le taimi tatau e tatalo ai?

O nisi o i tatou ua manatu o le taimi tatau e tatalo ai pe a tatou alafai mai i le taeao, ma pe a oo i le taimi e malolo ai i le po ua maea a tatou galuega, ma e leai se isi lava taimi tatau e tatalo ai. Ae ou te faiatu ia te outou, ma e i ai la’u mau lelei e faalagolago i ai, e faapea o le taimi tatau e tatalo ai o taimi uma lava. Sei ou faitau atua ia te outou. Ua outou iloa ou te manao ina ia faamaonia le mea ou te fai atu ai; ou te manao e aumai ni molimau e molimau i mea ua ou faaali atu, ma ou te le fesiligia tagata e talia mea ua ou fai atu ai sei vagana ua o tutusa, lelei ma le mea ua fetalai ai le Alii pe fetalai sao mai pe ala mai i ana perofeta. Ua tatou faitau i le Tusi a Mamona upu a [Amoleka] i tagata matitiva o Sorama ua o ese mai le upumoni ma ua lafoaiina mai o latou sunako, ona o lo latou matitiva, ma lagona ua na o lo latou tatalo faatasi a o latou o ae i le rameutoma, e pei ona sa faaigoa ai [tagai Alema 31:12–23], sa latou le iloa le mea a fai. Sa aoao i latou e [Amoleka] e faapea:

“Ioe, tagi atu ia te ia mo le alofa mutimutivale; ona ua malosi o ia e faaola; ioe, ia outou faalotomaualalalo outou lava, ma tatalo atu pea ia te ia; tagi atu ia te ia pe a outou i ai i o outou fanua, ioe, mo a outou lafu uma; tagi atu ia te ia i o outou fale, ioe, ma lo outou auaiga uma, i le taeao, aoauli, ma le afiafi; ioe, tagi atu ia te ia e faasaga i le mana o o outou fili; ioe, tagi atu ia te ia e faasaga i le tiapolo, o le o se fili i le amiotonu uma. Tagi atu ia te ia mo laau toto o o outou fanua, ina ia outou manuia ai; tagi atu mo lafu o o outou fanua, ina ia faateleina. Ae ua le ona pau lea; e ao ina outou sasaa atu o outou agaga i totonu o o outou afeafe, ma o outou nofoaga lilo, ma i o outou vao; ioe, ma a outou le tagi atu i le Alii, ia tuu o outou loto ia faatumuina, ia alu atu pea ia te ia i le tatalo e le aunoa, mo lo outou manuia, ma le manuia foi o i latou o e ua siomia ai outou. Ma o lenei faauta, ou uso pele e, ou te fai atu ia te outou, aua tou te manatu ona pau lea; aua a uma ona outou faia o nei mea uma, afai tou te liliu ese e ua le tagolima, ma e ua le lavalava, ma le asiasi atu i e ua mamai ma puapuagatia, ma le faasoa atu a outou mea, pe afai ua i ai ia te outou ni mea e faasoa atu ia i latou o e ua tutu le tagolima; ou te fai atu ia te outou, afai tou te le faia se tasi o ia mea, faauta, ua le aoga lau tatalo, ma ua leai se mea e te maua mai ai, ma ua tusa outou o ni tagata pepelo o e ua faafitia le faatuatuaga.” [Alema 34:18–28.]

Ou te manatu o se mataupu faavae sili lena, ma sa ou faitauina ina ia faatupulaia ai o outou manatu i taimi tatau e tatalo ai. O le taimi tatau e tatalo ai o le taeao a o le i taape le aiga. O se taimi lelei mo le tatalo pe a faatasi i le laulau a o le i faia le meaai o le taeao, ma tuu atu le avanoa i tagata o le aiga e auauai ai e tatalo. O le taimi tatau lena e tatalo ai. O le taimi tatau e tatalo ai le faioloa o le taeao pe a alu atu i le fale o lana pisinisi a o le i amataina lana galuega o le aso i ana oloa. O le taimi tatau e tatalo ai le leoleo mamoe, o le taimi lea e i ai faatasi ma lana lafu a o leoleo ia i latou. O le taimi e tatalo ai le faifaatoaga o le taimi lea e alu ai ma lana palau i le fanua, pe a alu e selesele lana saito, ma pe afai e alu e ao mai fua o lana faatoaga. Afai e tatalo le tagata e faapei ona poloaiina ai o ia i lenei faitauga o tusitusiga paia sa ou faitauina, o le a le taumate o le a faia e ia mea uma i le amiotonu ma tausia poloaiga a le Alii.⁹

O Amoleka ma Alema, o loo fautuaina tagata e “tagi atu i [le Alii] mo le alofa mutimutivale, ona ua malosi o ia e faaola” (Alema 34:18).

O mea uma tatou te fai e ao ona ogatasi ma mea o loo faamatala ia tatou tatalo.

E le tatau ona tatou tatalo ua na o o tatou laugutu; ae i gaioiga uma, ia tatou talanoaga, i mea uma ua tatou fuafua e fai, e tatau ona tatou taumafai e fai mea o lo o tautau atu ia tatou talosaga, ma ia ogatasi ma manatu ua tatou faailoa atu i le Alii ia tatou aioiga i aso uma.¹⁰

Pe ua ia i tatou le agaga o le tatalo? Po ua tatou fai e avea o se vaega o lo tatou soifuaga? Pe o tatou fesootai ma lo tatou Tama Faalelagi e ala i le Agaga Paia, pe tatou te le o faia?¹¹

Ia tatou tatalo e ao ona liligi atu o tatou agaga i le faafetai.

E ao ona tatou faaeteete e faafailele, e ala i le fesootai i se olaga tatalo, se agaga faafetai. Ou te talitonu o se tasi o agasala matuia ua amio ai tagata o le lalolagi i nei ona po o le leai o se agaga faafetai, o le manao [po o le leai] o se faailoaga, i la latou pitolaau, o le Alii ma lana aia e pulea ai ma faafoe.¹²

I a tatou tatalo e ao ona tuuina atu o tatou loto i le faafetai mo le ola ma le malosi, mo le taulaga togiola a le Alo o le Atua, mo le talalelei o le faaolataga, mo Iosefa Samita ma le galuega silisiliese o le toefuataiga ua ala mai ia te ia. E ao ona tatou manatua le aao o le Alii i mea uma ma faafetai ia te ia mo mea uma faaletino ma le faaleagaga.¹³

E ao ona tatou aioi atu i le Tama Faalelagi mo o tatou manaoga amiotonu uma.

E ao ona tatou aioi atu i le [Tama Faalelagi] mo le faatuatua ma le amiosao ma uiga uma faaleatua, mo le manumalo ma le manuia o lana galuega, mo le taitaiga a lona Agaga Paia, ma le faaolataga o lona malo. E ao ona tatou tatalo mo o tatou aiga, mo a tatou ava ma fanau, mo meaai ma fale ma lavalava, mo atugaluga o a tatou pisinisi, ma o tatou manaoga amiotonu uma.¹⁴

Ou te tatalo ia tatou maua faamanuiaga o le lagi ma ia tumau ma i tatou ma tagata uma.

Ina ia liligi mai e le lagi meatonu ma le upumoni i luga o le lalolagi uma!

Ina ia mafai e tagata uma i soo se mea ona i ai taliga e faalogo ai, ma ia o latou usitaia upumoni ma le malamalama e tuuina mai e auauna a le Alii!

Ina ia mafai ona faataunuuina faavavevave faamoemoega o le Alii mo tagata uma i atunuu uma!

Ou te tatalo mo tagata o le Ekalesia, o le au paia a le Silisili Ese, ina ia faamalolosia i latou i lo latou faatuatua, ma ia faatupulaia i o latou loto le manaoga amiotonu, ma ia galueaiina lo latou faaolataga i le matau ma le gatete i luma o le Alii [tagai Filipi 2:12; Mamona 9:27].

Ou te tatalo mo le lelei ma le amiotonu o tagata uma, ina ia mafai ona taitaiina i latou e saili i le upumoni, ina ia talia mataupu faavae tonu uma, ma ia faalauteleina le ala o le saolotoga ma le faamasinoga tonu.

I nei vaitaimi o faalavelave ma faigata, ou te tatalo ina ia taitaiina tagata uma e le malamalama e faamalamalamaina tagata uma ua o mai i le lalolagi [tagai Ioane 1:9; MF&F 93:2], ina ia latou maua le poto e foia ai faafitauli ua maileia ai i latou.

Ou te aioi i le Tama alofa e liligi mai ana faamanuiaga i luga o tagata uma, i luga o e talavou ma e matutua, i luga o i latou ua maua i le faanoanoa, i luga o e fiaaai ma matitiva, i luga o i latou ua saisaitia i tulaga faigata ma siosiomaga le atoatoa, ma luga o i latou uma o manaomia le fesoasoani, ma le faamalosiau, ma le poto, ma mea lelei ma le tauleleia uma ua na o ia e mafai ona foai mai.

Faatasi ai ma outou uma, e i ai lo’u alofa ma le popole ma le alofa mutimutivale mo le fanau a lo tatou Tama i le lalolagi uma, ma tatalo ina ia faaleleia o latou tulaga faaletino ma le faaleagaga; ou te tatalo ina ia latou o mai ia Keriso, ma aoao ia te ia, ma ave lana amo i o latou luga, ina ia maua e i latou le malologa i o latou agaga, aua o lana amo e faigofie ma lana avega e mama [tagai Mataio 11:29–30].

Ou te tatalo o le Au Paia o Aso e Gata Ai ma i latou uma o le a faatasi ma i latou i le tausia o poloaiga a le Tama o i tatou uma, ia ola ina ia maua le filemu i lenei olaga ma le ola e faavavau i le lalolagi a sau [tagai MFF 59:23]—o nei mea uma ou te ole atu ai i le lotomaulalo ma le agaga faafetai, ma i le suafa o Iesu Keriso, Amene.¹⁵

Fautuaga mo Suesuega ma le Aoaoina Atu

Fesili

“Mai le Soifuaga o Iosefa Filitia Samita” o loo i ai faataitaiga e fa o tatalo na tuuina mai e Peresitene Samita. O le a se mea tatou te aoao mai nei faataitaiga taitasi?
Manatunatu i le auala na faia ai au tatalo. O le a se mea tatou te fai ina ia mafai ai e a tatou tatalo ona fesoasoani tatou te “faalatalata atu i lo tatou Tama i le lagi”? (Tagai vaega 1.)
Na aoao mai Peresitene Samita, “O le taimi talafeagai e tatalo ai o taimi uma lava” (vaega 2). O a ni auala tatou te mulimuli ai i le fautuaga e tatalo pea lava pea?
O le a le uiga ia te oe o le “faia o mea o loo tautau atu ia tatou talosaga? (Tagai vaega 3.) Mafaufau i mea e mafai ona e fai e faaleleia ai le itu lea.
E faapefea ona suia a tatou amio pe a tatou “tuuina atu o tatou agaga i le faafetai” i lo tatou Tama Faalelagi? (Tagai i le vaega 4.)
Ao e suesue i le tatalo a Peresitene Samita o loo i le vaega 5, manatunatu ia au lava tatalo. Mafaufau lemu i le fesili lea: O a tagata ma mataupu e tatau ona aofia soo i au tatalo?

Mau Fesootai

Mataio 7:7–8; Filipo 4:6; 1 Tesalonia 5:17–18; Iakopo 1:5–6; 2 Nifae 32:8–9; Alema 34:38–39; 3 Nifae 18:18–21; MF&F 10:5

Fesoasoani mo le Aoaoina Atu

“Ina ia uunaia talatalanoaga, faaaoga fesili o loo i le faaiuga o mataupu taitasi. E mafai foi ona fai au lava fesili aemaise mo i latou o loo e aoaoina” (mai itulau ix o le tusi lenei).