Mataupu 24

O Le Galuega a Tamaitai o le Au Paia o Aso e Gata Ai: “Tuuto ma le Le Manatu Faapito i Lenei Galuega Matagofie”

“E leai se tuaoi o le lelei e mafai ona fai e o tatou tuafafine.”

Mai le Soifuaga o Iosefa Filitia Samita

I se fonotaga aoao a le Aualofa ia Oketopa 2, 1963, na saunoa ai Peresitene Iosefa F. Samita, “O i matou, le Usoga a le Ekalesia, e faamamalu ma faaaloalo i o tatou tamaitai lelei mo lo latou tuuto ma le le manatu faapito i lenei galuega matagofie.”¹

Ina ua faia lenei tautinoga, na saunoa mai Peresitene Samita mai le tele o tausaga o lona poto masani. Na ia auauna atu i lona soifuaga atoa faatasi ma tamaitai faatuatua o le Au Paia o Aso E Gata Ai. O lenei galuega auauna atu na amataina i le faaiuga o le 1880, ina ua sefulu ona tausaga. I le taimi lea, sa fautuaina ai tamaitai o le Au Paia o Aso e Gata Ai ina ia aooga faafomai ma le tausia o le soifua maloloina. O lona tina, o Julina L. Samita, sa mulimuli i lenei timaiga ma sa aotauina e avea o se faatosaga. E masani ona fafagu o ia i luga i le vaeluapo ina ia ona aveina atu le taavale solofanua i se nofoaga o le a fanau ai se pepe. I le galulue faatasi ai ma lona tina i lenei tulaga, na vaaia ai e le alii laitiiti o Iosefa Filitia Samita ni faataitaiga o le malosi ma le alofa o tamaitai o le Ekalesia.² Mulimuli ane na galue Tuafafine Samita o se fesoasoani i le au peresitene aoao o le Aualofa.

E tele naua le faaaloalo o Peresitene Samita mo le Aualofa, na ia saunoa ai “o se vaega taua o le malo o le Atua i le lalolagi.”³ O lona faletua lona lua, o Ethel, sa galue o se tasi o le pulega aoao a le Aualofa mo le 21 tausaga. O le tuafafine o Sister Amy Brown Lyman, o le sa auauna atu ma Ethel i le pulega aoao ma mulimuli ane ua avea o se peresitene aoao o le Aualofa, na fai mai: “O Tuafafine Samita o se tasi o tamaitai sili ona atamai sa ou iloa. Ou te manatu o ia o se tamaitai tusitala ma lauga lelei o le pulega aoao.”⁴ I lea tofiga, na auai Ethel i konafesi a siteki e aoao tamaitai ma tuafafine o le Aualofa. O ia ma Peresitene Samita e masani ona malaga faatasi mo ni tofiga o le Ekalesia, ma o i laua e toalua e masani ona aoao faatasi mai i le pulelaa.⁵

Ina ua tuanai le maliu o Ethel, sa faaipoipo atu Peresitene Samita ia Jessie Evans. Na malaga Jessie ma ia toeitiiti lava o taimi uma pe a malaga e aoao i le Au Paia. E matagofie tele lona siufofoga, ma e masani ona finagalo Peresitene Samita ina ia usu sana pese i sauniga la te auai. O Elder Faranisisi M. Gibbons, o le sa galue o se failautusi i le Au Peresitene Sili na faamatalaina: “Soo se taimi e pulefaamalumalu ai Peresitene Samita, e manao lava o ia ina ia usu sana pese [lona faletua] ona e le o se isi lava mafuaaga ae e le vaivai o ia e faalogologo o pese o ia. Peitai, e le gata i lea ae o lona leo faasala maulalo aoaoina lelei, o le usuina o pese paia, na faaopoopo ai le pa’i mai faapitoa o le agaga i fonotaga, e faaosofia ai le au faalogologo ma faagaeetia ai lona lava tomai i le faia o lana lauga. Mulimuli ane, e ala i le faatauanau ma le uunaiga faafiafia a lona toalua, i ni nai taimi sa faatasi atu ai Iosefa ia Jesse i se pese taitoalua, faafetaui lana malū i lona leo. I nei tulaga, e masani ona nonofo faatasi i laua i le nofoa o le piano a o taina e Jessie le musika, faafetaui lona leo masani, leo tele ne’i le lagona ai le pese a lona toalua.”⁶

A o avea ai o se Peresitene o le Ekalesia, sa galulue e le aunoa ia Iosefa Filitia Samita ma Sister Belle S. Spafford, le peresitene aoao o le Aualofa. Mulimuli ane na saunoa mai Sister Spafford i lona silafia a o galulue ma ia: “O Peresitene Iosefa Filitia Samita, o se alii agamalu ma le alofa tele i tagata, e faamaonia i taimi uma le loloto o le malamalama i le galuega a tamaitai o le Ekalesia, ma e sa ia faasoa atu lena i le au peresitene o le Aualofa i le tele o taimi ma le tele o auala, ua tatala ai la matou vaaiga mamao ma faatonu ai o tatou ala.”⁷

Aoaoga a Iosefa Filitia Samita

Ua faamatala e tusitusiga paia tamaitai faatuatua o e sa i ai tiutetauave i le Ekalesia a le Alii.

Atonu tatou te faitau i le Penina Tau Tele e faapea ina ua tuanai ia taunuuga na oo mai ia Atamu ma Eva e ala i le pau, sa tautalagia e Eva le mataupu. E puupuu ae matagofie le tumu i uiga anoa ma e faapea:

“… Ana le seanoa la ta solitulafono po ua le maua e i taua ni fanau, ma po ua le mafai ona ta iloa le lelei ma le leaga, ma le olioli o le togiolaina o i taua, ma le ola e faavavau ua tuu mai e le Atua ia i latou uma o e usiusitai.” [Mose 5:11.]

“Ma sa viia e Atamu ma Eva le suafa o le Atua, ma sa la faailoa atu mea uma i o laua atalii ma afafine.” [Mose 5:12; ua faaopoopo le faatusilima.]

Ua tatou aoao mai lenei mea o Eva faapea ma Atamu sa maua faaaliga ma poloaiga e aoao ia la fanau i le ala o le ola e faavavau.⁸

Ua tatou faitau i [muai] aso o Isaraelu sa toaaga fafine ma i ai tiute e faataunuu [tagai Esoto 15:20; Faamasino 4–5].⁹

I le Feagaiga Fou ua tatou faitau i le toatele o tamaitai faatuatua o e na saili ma tuuina atu fautuaga. O le toatele o i latou sa mulimuli i le Alii ma auauna atu ia te ia [tagai Luka 8:1–3; 10:38–42].¹⁰

I le talafaasolopito o le Ekalesia, sa faataunuuina e tamaitai ni tiute taua i le galuega a le Alii o aso e gata ai.

I aso e gata ai, sa faatino e tuafafine o le Aualofa ni matafaioi taua i le Ekalesia toefuataiina a Iesu Keriso.

I le aso 17 o Mati, 1842, na feiloai ai Perofeta Iosefa Samita ma nisi o tuafafine o le Ekalesia i Navu ma faatulaga i latou i se sosaiete na faaigoaina “O Le Aualofa a Tamaitai o Navu.” … O lenei faalapotopotoga e ala mai faaaliga, e leai ma se masalosalo. O lenei upumoni sa matuai faapupula mai i le gasologa o tausaga ma o le taimi nei, ua matua faamautuina lava lona taua ma le moomia.¹¹

O le mea moni semanu e le atoatoa le faatulagaga o le Ekalesia a Iesu Keriso pe ana le faavaeina lenei faalapotopotoga matagofie. … Semanu e le mafai ona atoatoa lenei toefuataiga e aunoa ma le Aualofa lea ua mafai ai e tuafafine ona faataunuuina se auaunaga e to mai lagī e matua taua mo le soifua manuia o le Ekalesia.¹²

O le “Aualofa a Tamaitai o Navu” sa faatuina e le Perofeta o Iosefa Samita ma sa fesoasoani i ai Elder John Taylor. Na faaalia mai e le Alii, o tamaitai o le Ekalesia e tatau ona faatulaga i se sosaiete, aua sa i ai se galuega taua mo i latou e fai e fesoasoani ai e “aumaia ma faatuina tuutuuga fuafuaina o Siona.” [MF&F 6:6.] O le galuega lenei a tuafafine sa faapitoa mo le manuia, uunaiga, ma le alualu i luma o tamaitai o le Ekalesia ina ia saunia i latou i mea uma mo se avanoa i le malo o selesitila. O le valaauga sa tuuina atu foi ia i latou e fesoasoani ai i le galuega o le alofa ma le toomaga mai puapuaga ma mafatiaga o e matitiva, o e mamai, ma e tigaina i le Ekalesia uma. I tausaga uma lava talu ona faavae lena faalapotopotoga, sa faamaoni tuafafine o le sosaiete i o latou valaauga ma sa faalautele ia i latou lava i lo latou faatuatua i lena galuega. E leai se galuega na tuuina atu sa faigata tele; e leai se matafaioi na tuulafoaiina, ma e ala i la latou auaunaga ua fia afe i latou ua faamanuiaina ai.¹³

O le Aualofa … ua ola ma ua avea o se malosiaga i le Ekalesia. Ua matua talafeagai lava—tatou te taua o se ausilali, o lona uiga o le fesoasoani, ae o le Aualofa ua sili atu nai lo lena. E manaomia lava.¹⁴

Ou te fia faamalo atu i tuafafine o lenei faalapotopotoga sili mo lo latou amiotonu ma le faatuatua o loo faaalia pea lava pea talu mai i ona po i Navu. ¹⁵

Ua fiafia le Alii ia outou galuega. O outou, e ala ia outou auaunaga, ua fesoasoani e atiina ae ma faamalosia le malo o le Atua. E tutusa lona talafeagai i le galuega a le Aualofa i le Ekalesia e pei ona i ai —pe ou te fai atu ai?—ma korama o le Perisitua. Atonu o le a faapea ni lagona o nisi ua fai sina malosi laitiiti o lo’u faaali atu o lenei mea, ae o la’u lava faamasinoga e faapea o le galuega ua outou fai tuafafine lelei, e matua talafeagai lava ma e tutusa lona taua i le atinaeina o lenei malo, faamalosia ai, ma faalautele ai, ma faataoto ai le faavae tatou te fausia ai, e pei lava foi o uso o umia le Perisitua a le Atua. Matou te le agai i luma e aunoa ma outou.¹⁶

[O tuafafine o le Aualofa] o nisi o le faalapotopotoga a tamaitai silisili i le lalolagi, o se faalapotopotoga o se vaega taua o le malo o le Atua i le lalolagi ma ua faatulagaina ma faagaioia ina ia fesoasoani i ona sui faatuatua ina ia maua le ola e faavavau i le malo o lo tatou Tama. …

“Sa faavaeina le Aualofa e ala i le agaga o musumusuga, ma sa taialaina e lena agaga [talu mai lena taimi], ma sa ia totoina i loto o o tatou tuafafine lelei e le mafaitaulia na manaoga mo le amiotonu ia e fiafia i ai le Alii.”¹⁷

O le Aualofa o “le faalapotopotoga sili a tamaitai i le lalolagi, o se faalapotopotoga o se vaega taua o le malo o le Atua i le lalolagi.”

E fesoasoani tuafafine o le Aualofa e tausi le soifua manuia faaletino ma le faaleagaga o fanau a le Atua.

O le Alii i lona poto na valaau ai o tatou tuafafine e fai ma fesoasoani i le Perisitua. Ona o lo latou agaalofa, malūlū o le loto, ma le agalelei, e silasila ifo ai le Alii i [tamaitai] ma tuuina atu ia i latou tiute ma matafaioi e avea ai o ni auauna i e matitiva ma e mamai. Ua ia faasino le ala e ao ona latou mulimuli ai, ma ua ia tuuina atu ia i latou lenei faalapotopotoga sili e maua ai e i latou le mana e auauna ai i lalo o le taitaiga a epikopo o uarota ma ia galulue faatasi ma epikopo o uarota, i le tausia o le soifua manuia o o tatou tagata i le faaleagaga ma le faaletino.

Ma e mafai e le Alii ona valaau atu i o tatou tuafafine e o atu i aiga e faamafanafana i e matitiva, e fesoasoani i e mamai, ia tootutuli ma i latou ma tatalo ma i latou, ma o le a tali atu le Alii i tatalo a tuafafine pe a latou ole atu ma le faamaoni e fai ai ma sui o e mama’i, e faapei ona ia faalogo ai i tatalo a toeaina o le Ekalesia.¹⁸

E tele faamoemoega ma tiute o le Aualofa. … O lo’u tama, o Peresitene Iosefa F. Samita [na saunoa:] “O le faalapotopotoga lenei na faatuina e le Perofeta o Iosefa Samita. O le mea lea, o le faalapotopotoga ausilali ua sili ona leva o le Ekalesia, ma e sili lona taua. E le gata ina nafa ma manaoga o e matitiva, o e mamai ma e le tagolima, ae o se vaega o lona tiute—ma o le vaega tele, foi—o le tausia o le soifua manuia faaleagaga ma le faaolataga o tina ma afafine o Siona; ia vaai ua leai se tasi ua tuulafoaiina, ae ua puipuia i latou uma mai faaletonu, mala, le malosi o le pogisa, ma mea leaga o loo taufaamatau i latou i le lalolagi. O le tiute o le Aualofa le tausia o le soifua manuia faaleagaga o i latou lava ma tamaitai uma e auai i le Ekalesia.”¹⁹

O le tiute o le Aualofa, ua le na o le tausia o i latou o tuafafine o le Aualofa, ae o la latou galuega e faalautele i tala atu o na tuaoi. Pe afai ua atuatuvale se tasi, ua manaomia se fesoasoani, o se faafitauli, ma’i po o puapuaga, tatou te valaau atu i le Aualofa. … Latou te faia se galuega tele ma le ofoofogia e ala lea i le faamalosia o e ua sese ese, fesoasoani ia i latou, e toe aumaia i latou i mafutaga, fesoasoani ia latou faatoilaloina o latou vaivaiga po o agasala ma o latou lē atoatoa, ae aumai i latou i le malamalama o le upumoni. Ou te fai atu e leai se tapulaa o mea lelei e mafai e o tatou tuafafine ona fai.

… Ou te le iloa se mea e mafai ona fai e peresitene o siteki ma epikopo o uarota pe a na le ia te i latou nei tuafafine lelei o le Aualofa e faamoemoe i ai; o e latou te valaau atu i ai mo la latou auaunaga, i le tele o taimi, e taulima mataupu atonu e maaleale, mo o tatou uso, ae mafai e o tatou tuafafine ona faataunuuina i le sili latou te iloa ai. O se mea matagofie pe ana faapea e atoatoa tagata uma o le Ekalesia. A faapea o le tulaga lea o le a faaitiitia o tatou tiute uma, i alii ma tamaitai, ae le i oo mai lena taimi. E i ai tuafafine e manaomia le faamalosiau, o sina fesoasoani faaleagaga laitiiti e faapea foi i le faaletino, ma e leai se tasi e sili ae ona faataunuuina lenei nai lo o tatou tuafafine o e auai i lenei faalapotopotoga sili ma le matagofie.

I lenei galuega e mafai e tuafafine ona tuuina atu la latou fesoasoani e faamalosiau ai ma fesoasoani ia i latou e faalogogata, e faalolololo, e faatamala, e faapei foi ona valaau atu i uso o le Perisitua e galulue mo i latou e faalogogata, e faatamala, ma faalolololo o le au uso. E ao ona tatou galulue uma e aumaia le amiotonu ma taumafai e toe aumaia i le mafutaga i latou ua o ese ma ua faatuatuanai i tiute o le Ekalesia.²⁰

E mai lenei amataga maulalo i lalo o ni tulaga sili ona faigata, ma ina o toaitiiti tagata auai o le Ekalesia, sa matou vaaia le ola o lenei Sosaiete. … O mea lelei sa faataunuuina i le tausia o e matitiva, tausia o e mamai ma e mafatia, o i latou o i ai manaoga faaletino, faalemafaufau, po o le faaleagaga, o le a le mafai ona iloa atoatoa. … O nei mea uma ua faataunuuina e ala i le agaga o le alofa e tusa ai ma le agaga moni o le talalelei a Iesu Keriso.²¹

E finagalo le Alii i tamaitai e saili mo le malamalama ma le upumoni ina ia faatagaina ai i latou i le malo selesitila.

E tutusa le uiga o le talalelei i tuafafine e faapei foi i uso. E alolofa latou i ai e faapei foi o uso. Ma ina ua fetalai le Alii i le Perofeta o Iosefa Samita, “Suesue i nei poloaiga, ona ua moni ma faamaoni i latou, ma o le a faataunuuina lava valoaga ma folafolaga uma ua i totonu o i latou,” [MF&F 1:37] sa ia le faatapulaa lena poloaiga i na o alii o le Ekalesia. … E tusa pau lava le taua i o tatou tuafafine le malamalama i le Ata o le Faaolataga e faapei foi i alii. E tutusa foi le taua o lo latou tausia o poloaiga. E le faasaoina se tamaitai i le malo o le Atua e aunoa ma le papatisoga mo le faamagaloina o agasala ma le faaeeina o lima mo le meaalofa a le Agaga Paia. …

… Ina ua fetalai le Alii e le mafai lava ona faaolaina se tagata i le le iloa [tagai MF&F 131:6], ou te manatu ua faatatau lea i tamaitai faapea foi ma alii, ma ou te manatu o tamaitai o le ekalesia ua ia i latou le matafaioi e suesue ai i tusitusiga paia.²²

E finagalo le Alii mo tamaitai, faapea foi i alii i le Ekalesia, ia latou iloa le mana o lona finagalo ma maua se molimau ola i o latou loto o le upumoni faaalia e faatatau i le faaolataga i le malo o le Atua. Sa le i faaalia mai e le Alii le Tusi a Mamona mo se manuia o na o i latou o umia le Perisitua, ae mo agaga uma o e saili le upumoni, o alii ma tamaitai foi.²³

“E finagalo le Alii i tamaitai… o le Ekalesia, ina ia latou iloa lona finagalo paia ma ia maua se molimau malosi i o latou loto.”

Ua finagalo le Alii ia agavaa tamaitai i se molimau o le upumoni ia malamalama i mataupu faavae o le Ekalesia e pei foi ona ia faia ia i latou o umia le Perisitua. Afai tatou te maua le faaeaga, lea tatou te faamoemoe e maua, e alagatatau ona saunia i tatou lava i le poto, i le faatuatua, i le tatalo. Ma ina ua fetalai mai le Alii, “A ia outou muai saili le malo o le Atua ma lana amiotonu,” [Mataio 6:33; 3 Nifae 13:33] sa ia le fetalai i na o alii, ae o le faalapotopotoga fefiloi.²⁴

O tamaitai taitasi uma ua papatiso i le Ekalesia ua faaee i ai lima o toeaina i luga o lona ao mo le meaalofa a le Agaga Paia ina ia maua e ia le taitaiga a lena Agaga i mea moni uma. O le finagalo o le Alii ia leai se tasi e le maua le mana o le taitaiga o le a faaali atu ai ia i latou le upumoni ma mafai ai ona latou iloa le eseesega o le malamalama mai le pouliuli ma, o lea, e puipuia ma tuuina atu i ai le mana e tetee atu ai i mataupu sese uma, teori, ma manatu, ua avea o ni mea taua i le lalolagi i nei ona po.²⁵

E mafai e o tatou tuafafine ona maua musumusuga mo lo latou manaomia o le Agaga Paia e faapei foi o alii, i ona tulaga uma. E mafai ona latou maua le meaalofa o valoaga e faatatau i mataupu e taua mo lo latou iloa. … Afai latou te tatalo e ao ona latou tatalo faatauanau, ma iloa o le a oo mai le tali o a latou talosaga. O le a faafofoga mai le Alii ia i latou, pe afai latou te faatauanau, faamaoni, e faapei foi ona ia faia i alii.²⁶

Ua folafola mai le Alii i tagata uma, alii ma tamaitai foi, le meaalofa o le Agaga Paia e faalagolago i le faatuatua, lotomaulalo, ma le salamo faamaoni. E manaomia lo latou suesue ma iloa le upumoni o le talalelei ma saunia i latou e ala i le suesue, faatuatua, ma le usiusitai i poloaiga uma e saili i le malamalama ma le upumoni ina ia latou maua le mamalu selesitila.²⁷

E ala mai le perisitua, ua ofoina mai e le Atua i Ona afafine meaalofa faaleagaga taitasi ma faamanuiaga e mafai ona maua e Ona atalii.

Ou te manatu ua tatou iloa uma o faamanuiaga o le perisitua ua le faapitoa lea na o alii. O nei faamanuiaga ua liligi ifo foi … i luga o tamaitai faatuatua uma o le Ekalesia. O nei tuafafine lelei e mafai ona saunia i latou lava, e ala lea i le tausia o poloaiga ma auauna atu i le Ekalesia, mo faamanuiaga o le maota o le Alii. Ua ofoina atu e le Alii i ona afafine meaalofa faaleagaga taitasi ma faamanuiaga e mafai ona maua e ona atalii, aua e leai se tane pe a le o i ai se fafine, e leai foi se fafine pe a le o i ai se tane i le Alii [tagai 1 Korinito 11:11].²⁸

Ua tatou iloa uma na fetalai le Alii ia Aperaamo o le a fai o ia ma tama o atunuu e tele ma o ana fanau o le a faapei o fetu o le lagi ma e faatoateleina e pei o le oneone o le matafaga, ae o le mea e le tatau ona galo ia i tatou o folafolaga foi ia sa fai ia Sarai.

“Ua fetalai mai le Atua ia Aperaamo, O Sarai lau ava, aua e te toe valaaua i lona igoa o Sarai, a o Sara o lona igoa lea. Ou te faamanuia foi ia te ia, ma ou foaiina atu foi se atalii mo oe mai ia te ia: ioe, ou te faamanuia ia te ia, e fai foi o ia ma tupuga o nuu; e tupuga mai foi ia te ia o tupu o nuu.” [Kenese 17:15–16.]²⁹

O le Alii, na fetalai e uiga i le perisitua ma le pule o le perisitua, ma sauniga o le Ekalesia tatou te maua e ala mai le perisitua, sa ia faapea mai: “O lenei perisitua sili e taitaiina le talalelei ma umia ki o mealilo o le malo, o le ki lava lea o le malamalama e uiga i le Atua.”

… Sei ou toe faitau atua le mea lena: “O lenei perisitua sili e taitaiina le talalelei ma umia ki o mealilo o le malo, o le ki lava lea o le malamalama e uiga i le Atua.” O lea, o nei sauniga, ua faailoa mai ai le mana o le Faale-Atua. Ma a aunoa ma nei sauniga ma le mana o le perisitua, o le a le faaalia mai le mana o le Faale-Atua i tagata i le tino; a aunoa ma lenei, o le a le vaai se tagata i fofoga o le Atua, le Tama lava, ma ola ai.” [MF&F 84:19–22.]

A tatou faitau i mea faapenei, e ao ina oo mai ia i tatou alii taitasi o umia le perisitua le olioli e manatu ua ia i tatou mana sili e mafai ai ona tatou iloa le Atua. E le gata ina ua iloa e alii o umia le perisitua lena upumoni sili, ae ona o lena perisitua ma sauniga foi, e mafai ai e tagata taitasi uma o le Ekalesia, alii ma tamaitai, ona iloa le Atua.³⁰

Fautuaga mo Suesuega ma le Aoaoina Atu

Fesili

O le a se mea ua mafai ona tatou aoao mai tala ua faamatalaina i le “Mai le Soifuaga o Iosefa Filitia Samita”? O a ni aafiaga faapena sa e maua?
Na saunoa Peresitene Samita i tamaitai o vaitaimi eseese o e na faataunuu tofiga taua i le malo o le Atua (tagai vaega 1). O a ni auala ua e vaai ai i tamaitai ua fai ni o latou sao i le malosiaga o o latou aiga ma le Ekalesia?
E faapefea ona e iloa o le auaunaga a le Aualofa e “taua i le manuia o le Ekalesia”? (tagai vaega 2.) O a ni auala e galulue faatasi ai tuafafine o le Aualofa ma e ua umia le perisitua e atiina ae le malo o le Atua?
O a ni auala e tausia ai e le Aualofa le soifua manuia faaleagaga o tamaitai o le Au Paia o Aso e Gata Ai? O a ni auala e faalauteleina ai e le Aualofa lo latou aafiaga i fafo atu o la latou faalapotopotoga? (Mo nisi o faataitaiga, tagai i le vaega 3.)
Na faamamafa mai e Peresitene Samita e faapea o tamaitai ma alii uma e ao ona malamalama i mataupu faavae o le talalelei, faamalolosia a latou molimau, ma maua faaaliga (tagai vaega 4). Aisea e te manatu ai e taua mo i tatou uma ona saili i nei meaalofa?
Na aoao mai Peresitene Samita o faamanuiaga o le perisitua e “liligi ifo … i luga o tamaitai faatuatua uma o le Ekalesia” (vaega 5). Aisea e manaomia ai e tamaitai faamanuiaga o le perisitua e tauave ai o latou tiute i le aiga ma i le Ekalesia? O a ni faataitaiga ua e vaai i ai i tamaitai ua maua meaalofa faaleagaga?

Mau Fesootai

Galuega 5:12–14; Alema 32:22–23; MF&F 46:8–9

Fesoasoani mo le Aoaoina Atu

“E fesoasoani pea pe a amata ona mafaufau i le lesona o lo o muamua pe a maea ona e aoaoina le lesona ua tea. Atonu o le a e iloa lelei i latou ua e aoaoina ma o latou manaoga ma mea e fiafia i ai i le taimi lava e uma ai ona e faatasi ma i latou” (O Le Aoao Atu, E Leai Se Isi Valaauga E Sili Ai [1999], 97).