Mga Pagtulon-an sa mga Presidente
Pasiuna


Pasiuna

Si Harold B. Lee, ika-onse nga Presidente sa Simbahan ug usa ka Apostol sulod sa kapin sa tulo ka mga dekada, mipamatuod og mapainubsanon nga pagsaksi gikan sa tibuok kasingkasing “nga ang Dios buhi, nga si Jesus mao ang Manunubos sa kalibutan.” 1 Uban sa kasiguroan pinasikad sa iyang mga katuigan nga pagserbisyo siya miingon, “Ang akong mapainubsanong pagampo nga unta ang tanang mga tawo bisan asa makasabut sa hingpit sa kamahinungdanon sa pag-ula sa Manluluwas sa tanang mga katawhan, kinsa mihatag kanato sa plano sa kaluwasan nga mogiya kanato ngadto sa kinabuhing dayon, diin nagpuyo ang Dios ug si Kristo.”2

Ang panaw pauli ngadto sa atong Amahan sa Langit mao ang labing importante nga gitagad sa mga pagtulun-an ni Presidente Lee ngadto sa mga miyembro sa Simbahan. Iyang giawhag ang tanang mga anak sa Langitnong Amahan sa “pag-angkon nianang dili matarug nga pagpamatuod nga maoy makapalig-on sa iyang mga tiil diha sa dalan nga may kasigurohan nga mogiya ngadto sa mahimayaong tumong sa pagka-imortal ug kinabuhing dayon.”3

“Ang labing importante nga mensahe nga akong ikahatag kaninyo ug sa tibuok kalibutan mao ang pagsunod sa mga kasugoan sa Dios,” miingon si Presidente Lee, “aron nianang paagiha kamo makadawat sa balaan nga giya samtang nagpuyo kamo dinhi sa yuta, ug sa sunod nga kalibutan nga andam sa paghimamat sa inyong Manunubos, ug sa pag-angkon sa inyong kahimayaan diha sa presensya sa Amahan ug sa Anak.”4

Ang Unang Kapangulohan ug ang Korum sa Napulog Duha ka mga Apostoles mihan-ay sa sunod-sunod nga Mga Pagtulun-an sa mga Presidente sa Simbahan aron sa pagtabang sa mga miyembro sa Simbahan nga mapalawman ang ilang panabut sa mga doktrina sa ebanghelyo ug makapaduol ngadto ni Kristo pinaagi sa mga pagtulun-an sa mga propeta niini nga dispensasyon. Kini nga libro naghatag sa mga pagtulun-an ni Presidente Harold B. Lee, kinsa miingon:

“Ang mga balaod sa Dios nga gihatag ngadto sa mga tawo anaa sa plano sa ebanghelyo, ug ang Simbahan ni Jesukristo mao ang responsable sa pagtudlo niini nga mga balaod ngadto sa kalibutan.”5

“Matanom unta sa inyong mga kalag kadtong mga leksyon nga mopabilin kaninyo kanunay sa mahangturong mga tumong, aron kamo dili mapakyas sa misyon sa kinabuhi, aron nga, bisan ang inyong kinabuhi mubo o taas, kamo maandam kon moabut ang adlaw nga moadto sa presensya Niya kansang pangalan inyong gidala isip usa ka miyembro sa Simbahan ni Jesukristo sa mga Santos sa Ulahing mga Adlaw.”6

Ang matag kapitulo niini nga libro naglakip og upat ka mga seksyon: (1) usa ka pangutana nga daklit nagpaila sa tumong sa kapitulo; (2) ang “Pasiuna,” nga naghulagway sa mensahe sa kapitulo uban sa usa ka istorya o tambag nga gikan ni Presidente Lee; (3) ang “Mga Pagtulun-an ni Harold B. Lee,” nga nagpaila og importante nga mga doktrina gikan sa iyang daghang mga mensahe ug mga sermon; ug (4) ang “Mga Sugyot alang sa Pagtuon ug Panaghisgutan,” nga nag-awhag og personal nga pagribyu ug pangutana, dugang nga panaghisgutan, ug kagamitan sa atong mga kinabuhi karon pinaagi sa mga pangutana.

Unsaon Paggamit Niini nga Libro

Alang sa personal ug pamilya nga pagtuon. Kini nga libro gituyo sa pagdugang sa panabut sa mga miyembro sa mga baruganan sa ebanghelyo nga kusganong gitudlo ni Presidente Harold B. Lee. Pinaagi sa mainampoong pagbasa ug mahunahunaong pagtuon, ang matag miyembro makadawat og personal nga saksi niini nga mga kamatuoran. Kini nga libro makadugang usab sa librarya sa ebanghelyo sa matag miyembro ug mahimong magpulos isip importante nga kapanguhaan alang sa panudlo sa pamilya ug alang sa pagtuon diha sa panimalay.

Alang sa panaghisgutan sa mga miting sa Dominggo. Kini nga libro mao ang teksto alang sa mga miting sa korum sa Melchizedek Priesthood ug sa Relief Society. Si Elder Dallin H. Oaks mitudlo nga ang nagsunod-sunod nga mga libro sa Mga Pagtulun-an sa mga Presidente sa Simbahan “adunay mga doktrina ug mga baruganan. Kini buhong ug angay sa mga panginahanglan sa atong panahon, ug kini maayo kaayo alang sa pagtudlo ug panaghisgutan.” Ang mga magtutudlo kinahanglang magpokus sa hilisgutan sa teksto ug sa may kalabutan nga mga kasulatan. Sama sa gipasabut ni Elder Oaks, “Ang magtutudlo sa ebanghelyo wala tawaga sa pagpili sa hilisgutan sa leksyon apan sa pagtudlo ug paghisgot unsa ang gisulti nga itudlo.”7

Ang mga magtutudlo kinahanglang mogamit sa mga pangutana diha sa katapusan sa kapitulo sa pagdasig, panaghisgutan sa klase. Ang pagribyu sa mga pangutana sa dili pa magtuon sa mga pulong ni Presidente Lee mahimong makahatag og dugang panabut sa iyang mga pagtulun-an.

Ang mga miting sa Dominggo kinahanglang magtumong sa mga baruganan sa ebanghelyo, personal nga mga ehemplo nga nagtudlo niini nga mga baruganan, ug mga pagpamatuod sa kamatuoran. Kon ang mga magtutudlo mapainubsanong magtinguha sa Espiritu sa pag-andam ug sa paggiya sa leksyon, ang tanan nga moapil malig-on sa ilang kahibalo sa kamatuoran. Ang mga lider ug mga magtutudlo kinahanglang moawhag sa mga miyembro sa klase sa pagbasa sa mga kapitulo sa dili pa kini hisgutan sa mga miting sa Dominggo. Kinahanglang pahinumduman nila ang mga miyembro sa klase sa pagdala sa ilang mga libro ngadto sa ilang mga miting ug kinahanglang mopasidungog sa pagpangandam sa mga miyembro sa klase pinaagi sa pagtudlo sa mga pulong ni Presidente Harold B. Lee. Kon ang mga miyembro sa klase nakabasa og una sa kapitulo, andam silang motudlo ug mobayaw sa usag usa.

Wala kinahanglana o i-rekomendar nga ang mga miyembro mopalit og dugang mga komentaryo o pakisayran nga mga teksto aron sa pagsuporta sa hilisgutan diha sa teksto. Ang mga miyembro giawhag sa pagbasa sa mga kasulatan nga gisugyot alang sa dugang pagtuon sa doktrina.

Tungod kay kini nga teksto gitumong alang sa personal nga pagtuon ug pakisayran sa ebanghelyo, daghang mga kapitulo adunay mas daghang hilisgutan kay sa hingpit nga matudlo diha sa mga miting sa Dominggo. Busa, ang pagtuon diha sa balay nahimong importante sa pagdawat sa kahingpitan sa mga pagtulunan ni Presidente Lee.

Kini nga propeta sa Dios nasayud sa dalan balik sa panimalay ngadto sa atong Amahan sa Langit, ug siya mihatag og direksyon ngadto sa tanan kinsa maminaw: “Kon kamo maminaw ug mobuhat unsay inyong nadungog, kamo pagagiyahan ngadto nianang mahimayaon nga dapit nga gitawag dili lamang kalipay apan hingpit nga kalipay. Ang hingpit nga kalipay nagpasabut nga kamo nakapuyo sa mao nga kinabuhi nga kamo andam sa pagsulod ngadto sa presensya sa Ginoo.”8

Mubo nga mga sulat

  1. Pakigpulong sa pagpahinungod sa Westwood Ward meetinghouse, Los Angeles, California, 12 Abr. 1953, Historical Department Archives, Ang Simbahan ni Jesukristo sa mga Santos sa Ulahing mga Adlaw.

  2. “To Ease the Aching Heart,” Ensign, Abr. 1973, 5.

  3. Stand Ye in Holy Places (1974), 319.

  4. Sa Conference Report, Mexico ug Central America Area Conference 1972, 120.

  5. The Teachings of Harold B. Lee, ed. Clyde J. Williams (1996), 19.

  6. The Teachings of Harold B. Lee, 627.

  7. Sa Conference Report, Okt. 1999, 102; o Ensign, Nob. 1999, 80.

  8. Pakigpulong sa komperensya sa kabatan-onan sa Billings, Montana, 10 Hunyo 1973, Historical Department Archives, Ang Simbahan ni Jesukristo sa mga Santos sa Ulahing mga Adlaw.