Kapitulo 4

Ang Unang mga Baruganan ug mga Ordinansa sa Ebanghelyo

Sa unsa nga paagi nga kita mas matinud-anong magpuyo sa pagkamasulundon sa unang mga baruganan ug mga ordinansa sa ebanghelyo ug molahutay hangtud sa katapusan?

Pasiuna

Aron mahimong putli ug balaan sa kinabuhi ug sa kinaiya mao ang tinguha sa tanang matinud-anong mga Santos sa Ulahing mga Adlaw. Si Presidente Harold B. Lee mitudlo nga ang paagi nga mahimong putli ug balaan mao ang pagdawat sa unang upat ka mga baruganan ug mga ordinansa sa ebanghelyo—hugot nga pagtuo diha ni Ginoong Jesukristo, paghinulsol, bunyag, ug pagdawat sa gasa sa Espiritu Santo—ug dayon paglahutay hangtud sa katapusan sa pagtuman sa tanang mga sugo sa Dios. Miingon siya:

“Ang mga balaod sa Dios nga gihatag ngadto sa mga tawo anaa sa plano sa ebanghelyo, ug ang Simbahan ni Jesukristo gihimo nga responsable sa pagtudlo niini nga mga balaod ngadto sa kalibutan. Kini gihatag sa atong Langitnong Amahan alang sa usa lamang ka katuyoan, nga kamo nga gidumala pinaagi sa balaod mahimo unta usab nga mapanalipdan pinaagi sa balaod ug mahingpit ug mabalaan pinaagi sa mao gihapon (tan-awa sa D&P 88:34). Ang labing mahinungdanon sa tanang mga gasa sa Dios kanato mao ang gasa sa kaluwasan ngadto sa Iyang gingharian.”¹

Mitudlo usab Siya, “Ang kahibalo sa Dios ug ni Jesus, ang Iyang Anak, importante sa kinabuhing dayon, apan ang pagsunod sa mga sugo sa Dios kinahanglang mag-una sa pag-angkon niana nga kahibalo o kaalam.”²

Kini nga kapitulo maghisgot kon sa unsa nga paagi nga ang unang upat ka mga baruganan ug mga ordinansa sa ebanghelyo ug sa paglahutay hangtud sa katapusan sa pagkamatarung mogiya kanato ngadto sa kinabuhing dayon.

Mga Pagtulun-an ni Harold B. Lee

Unsa ang hugot nga pagtuo, ug sa unsa nga paagi kini mogiya kanato sa atong mga paningkamot sa pagdawat sa kinabuhing dayon?

Ang hugot nga pagtuo nga gamiton ngadto sa relihiyon mao ang iyang sukaranan nga mga baruganan ug sa pagkatinuod mao ang tinubdan sa tanang pagkamatarung nga mogiya sa tawo sa iyang mga paningkamot aron makaangkon og kinabuhing dayon sa umaabut nga kalibutan. Nagsentro kini sa Dios kinsa pinaagi sa hugot nga pagtuo giila isip tinubdan sa tanang gahum ug sa tanang kaalam sa kalibutan ug kinsa naggiya sa Salabutan sa “tanang mga butang nga makita o dili makita nga nagpakita sa iyang kaalam.” Busa, pinaagi sa hugot nga pagtuo niana, kamo usab … mahiangay ngadto sa Walay Kinutuban ug pinaagi sa gahum ug kaalam nga maangkon gikan sa inyong Langitnong Amahan mosangon sa gahum sa kalibutan ug himoa kini nga moserbsiyo kaninyo sa inyong takna sa panginahanglan sa pagsulbad sa mga problema nga hilabihan kadako alang sa inyong tawhanong kusog o salabutan.

Sa unsa nga paagi nga [kita] makapalambo niining hugot nga pagtuo? Ang tubag mao ang pinaagi sa pagtuon, pinaagi sa pagtrabaho ug pinaagi sa pag-ampo. Si Pablo ang Apostol nangutana, “Apan unsaon man sa mga tawo sa pagpangaliya kaniya nga wala nila tuohi? ug unsaon man nila sa pagtuo kaniya nga wala gayud nila hindunggi?” (Mga Taga-Roma 10:14.) Kinahanglan gayud motubag kita, sila dili. Mao nga ang hugot nga pagtuo moabut lamang pinaagi sa pagpaminaw sa pulong sa Dios gikan sa mga tigsangyaw sa kamatuoran. Ang pagsangyaw sa kamatuoran mahitungod sa Dios ug sa iyang mga katuyoan gitandi ngadto sa pagtanom sa usa ka liso, nga kon ang usa ka maayo nga liso mosugod sa paggitib ug pagtubo diha sa inyong mga kasingkasing niini nga mga kahimtang: Una, nga kini gitanom sa tambok, tabunok nga yuta sa pagkasinsero ug tinuod nga tinguha; ikaduha, nga kini giugmad pinaagi sa makugihong pagtuon ug pagsiksik, ug ikatulo, nga kini gibisibisan pinaagi sa maaghup nga espirituhanong “mga yamog” ug gipainit sa bidlisiw sa inspirasyon nga moabut gikan sa mapainubsanong pag-ampo. Ang ani gikan sa maong pagpananom moabut lamang ngadto niana nga indibidwal kinsa molihok diha sa mga kamatuoran nga iyang nakat-unan ug mousab sa iyang kinabuhi gikan sa sala ug mopuno sa iyang mga adlaw uban sa kinaiya nga matinguhaon sa pagsunod sa mga sugo sa Dios diin siya adunay hugot nga pagtuo, ug sa pagserbisyo sa iyang mga isig ka tawo.³

Pinaagi sa hugot nga pagtuo ang napulo ka mga sugo gikan sa Bukid sa Sinai giusab gikan sa puol nga mga pinulungan sa usa ka batid sa pangatarungan ngadto sa lanog nga tingog sa awtoridad gikan sa kahitas-an, ug ang mga pagtulun-an sa mga propeta nahimong pinadayag nga pulong sa Dios sa paggiya kanato ngadto sa atong Celestial nga panimalay. … Pinaagi sa hugot nga pagtuo atong masabtan nga bisan unsa ang naghatag sa kinabuhi ngadto sa sumbanan ni Jesus “Busa, kamo kinahanglan magmahingpit ingon nga hingpit ang inyong Amahan nga Langitnon” [Mateo 5:48] maoy alang sa atong kaayohan ug sa atong mahangturong kapuslanan bisan ngadto niana nga paghulma nga maglakip sa masakit nga pagpanton sa usa ka maalamon sa tanan nga Dios, “Kay ang Ginoo nagapanton kaniya nga iyang ginahigugma, ug nagalutos sa matag usa ka anak nga iyang ginasagop.” [Mga Hebreohanon 12:6.]⁴

Ang matag anak kinahanglan gayud nga makakat-on nga ang hugot nga pagtuo nga igo ngadto sa kahingpitan mapalambo lamang pinaagi sa sakripisyo ug gawas kon siya makakat-on sa pagsakripisyo sa iyang mga kahinam ug [pisikal] nga mga tinguha sa pagsunod sa mga balaod sa Ebanghelyo dili siya mabalaan ug mahimong santos diha sa atubangan sa Ginoo.⁵

Ngano nga ang inadlaw nga paghinulsol gikinahanglan?

Aron molambo ang maayo kinahanglan kining ugmaron ug gamiton pinaagi sa kanunay nga pagbansay, ug aron mahimong tinuod nga matarung adunay kinahanglan nga pagputol kada adlaw sa dautan nga mitubo sa atong mga kinaiya pinaagi sa inadlaw nga paghinulsol gikan sa sala. …

Karon unsa ang mga lakang nga himoon sa pagtungas sa dalan sa paghinulsol aron mahimong takus sa kapasayloan sa Dios, pinaagi sa katubsanan sa maulaong sakripisyo sa Magtutudlo, ug sa mga pribilihiyo sa kinabuhing dayon sa umaabut nga kalibutan? Ang maalamon sa tanan nga Amahan, nakapanglantaw nga ang uban mahulog sa kasal-anan ug ang tanan kinahanglan nga maghinulsol, mihatag diha sa pagtulun-an sa iyang ebanghelyo ug pinaagi sa iyang Simbahan sa plano sa kaluwasan nga nagpasabut sa tataw nga paagi sa paghinulsol.

Una, kadtong nakasala kinahanglang mokumpisal niini. “Pinaagi niini kamo masayud kon ang usa ka tawo naghinulsol sa iyang mga sala—tan-awa, siya mokumpisal kanila ug mobiya kanila.” (Doktrina ug Pakigsaad 58:43) Kana nga pagkumpisal kinahanglang himoon una ngadto kaniya nga maoy nabuhatan sa dakong sayop tungod sa inyong mga binuhatan. Ang usa ka sinsero nga pagkumpisal dili lamang ang pag-angkon sa sayop human makita ang ebidensya. Kon ikaw “nakapasakit og daghang mga tawo sa dayag,” ang inyong pag-angkon kinahanglang himoon sa dayag ug sa atubangan niadtong inyong napasakitan aron kamo makapakita sa inyong kaulaw ug pagpaubos ug pagkaandam sa pagdawat sa angay nga pagbadlong. Kon ang inyong buhat nahimo sa tago ug walay laing tawo nga nadaot gawas sa imong kaugalingon, ang inyong pagkumpisal kinahanglan himoon sa tago, aron ang inyong Langitnong Amahan nga nakadungog sa tago moganti kaninyo sa dayag. Mga buhat nga makaapekto sa inyong pagkamiyembro sa Simbahan, o sa inyong katungod sa mga pribelihiyo o pag-uswag diha sa Simbahan, kinahanglang ikumpisal dayon ngadto sa bishop kinsa gitudlo sa Ginoo isip magbalantay sa matag panon ug gisugo nga mahimong gikauyonang maghuhukom sa tanan diha sa Israel. Siya mahimong maminaw sa mao nga pagkumpisal sa tago ug moatiman niini sa makiangayon ug maloloy-ong paagi, ingon nga ang matag kahimtang motugot. … Pagkahuman sa pagkumpisal, ang tawo nga nakasala kinahanglang mopakita sa mga bunga sa iyang paghinulsol pinaagi sa maayong mga binuhatan nga gisukod batok sa dautang mga buhat. Kinahanglan gayud nga mohimo siya og tukma nga pagpahiuli kutob sa iyang gahum sa pagpahiuli nianang iyang gikuha o sa pag-ayo sa kadaot nga iyang nahimo. Siya nga mohinulsol sa iyang sala ug mopahilayo niini, nga dili na mousab niini, adunay katungod sa saad sa kapasayloan sa iyang mga sala, kon wala siya makabuhat sa sala nga dili mapasaylo, sama sa gipahayag ni Propeta Isaias, “Bisan pa ang inyong sala mapula, sila pagapution ingon sa nieve; bisan pa sila lubos mapula, sila mahimong sama sa maputing balhibo sa karnero.” (Isaias 1:18.)⁶

Atubangon nato kini. Kitang tanan nakabuhat sa butang nga dili unta angay natong buhaton, o wala nato buhata ang mga butang nga angay unta natong buhaton. Busa kitang tanan nakahimo og mga sayop, ug kitang tanan kinahanglan nga maghinulsol. Ang kaniadto pa nga yawa buot nga mopatuo kaninyo nga kon kamo nakahimo og usa ka sayop, nganong dili na man lamang mopadayon sa paghimo og mga sayop? Kana si Satanas naningkamot sa pagsulti kaninyo nga wala nay kahigayunan sa pagbalik. Apan kinahanglan nga inyong iatubang ang inyong nawong ngadto sa unsay matarung, ug pinaagi sa paghinulsol mobiya gikan sa butang nga inyong nahimo nga sayop ug dili na gayud mousab pa niini. Ang Ginoo miingon, “Padayon sa [inyong mga kinabuhi] ug ayaw na pagpakasala; apan ngadto niana nga kalag kinsa nagpakasala ang kanhi nga mga sala mobalik, nag-ingon ang Ginoo nga inyong Dios” (D&P 82:7).⁷

Karon, kon kamo nakahimo og mga sayop, himoa ang karon nga sinugdanan sa kausaban sa inyong mga kinabuhi. Biya sa mga butang nga inyong kanunay gibuhat nga sayop. Ang labing importante sa tanang mga sugo sa Dios mao kana ang pinakalisud ninyong sundon karon. Kon kini bahin sa pagkadili matinuoron, kon kini bahin sa pagkadili putli, kon kini bahin sa pagpamakak, dili mosulti sa kamatuoran, karon mao ang adlaw alang kaninyo sa pagpaningkamot niana hangtud kamo makabuntog niana nga kahuyang. Buntuga kana ug dayon sugdi ninyo ang sunod nga pinakalisud ninyong sundon. Mao kana ang paagi sa pagkabalaan sa inyong kaugalingon pinaagi sa pagsunod sa mga sugo sa Dios.⁸

Ngano nga ang bunyag usa ka gikinahanglan nga pagpangandam sa paghimamat sa Dios?

Sa dihang kita nagpabunyag misulod kita ngadto sa pakigsaad uban sa Ginoo nga kita mobuhat sa tanan nga atong mahimo sa pagsunod sa mga sugo sa Dios, uban sa pagsabut nga ang mga saad sa Ginoo ihatag kanato ug ang Iyang himaya idugang hangtud sa kahangturan, ug nga atong ipahimutang ang atong mga kinabuhi nga kita mahimong mga saksi sa Dios sa tanang mga dapit bisan hangtud sa kamatayon. [Tan-awa sa Mosiah 18:8–10.] Mao kana ang pakigsaad nga atong gihimo sa dihang gibunyagan kita nga mahimong mga miyembro niini nga Simbahan.⁹

Ang bunyag pinaagi sa pagpaunlod alang sa kapasayloan sa mga sala … alang niadtong kinsa miabut na sa edad nga may tulubagon, usa ka gikinahanglan nga pagpangandam sa paghimamat sa Dios. Kini mao ang paagi nga kamo nahimong “mga anak sa Dios pinaagi sa hugot nga pagtuo ni Kristo Jesus. Kay ang tanan kaninyo nga gibunyagan ngadto kang Kristo gikasul-uban og Kristo,” (Mga Taga-Galatia 3:26–27) o sa laing pagkasulti pinaagi sa bunyag nga nadawat “ang gahum nga mahimong mga anak sa Dios.” [Tan-awa sa Mosiah 5:7] Pinaagi niini nga pamaagi nga inyong magamit diha sa inyong mga kaugalingon ang maulaon nga dugo ni Kristo, aron kamo makadawat sa kapasayloan sa inyong mga sala, ug ang inyong mga kasingkasing mahimong putli. [Tan-awa sa Mosiah 4:2] Aron mahimong takus sa maong kapasayloan human mabunyagi, kamo kinahanglan gayud nga magpaubos sa inyong mga kaugalingon ug magtawag sa Ginoo kada adlaw ug maglakaw nga makanunayon diha sa kahayag sa mga pagtulun-an sa ebanghelyo. …

… Kadto lamang kinsa maghinulsol ug magpabunyag alang sa kapasayloan sa ilang mga sala ang hingpit nga makaangkon sa matubsanong dugo sa iyang pag-ula.¹⁰

Ang Manluluwas Mismo gibunyagan ni Juan Bautista, sama sa Iyang gisulti, “aron sa pagtuman sa tibuok pagkamatarung.” (Mateo 3:15.) Kon kini mao man alang Kaniya, unsa pa kaha sa atong mga kaugalingon? Si Nicodemo gisultihan: “Gawas kon ang tawo igaanak sa tubig ug sa Espiritu, dili siya makasulod sa gingharian sa Dios.” (Juan 3:5.) Walay gibiling pagduha-duha ang Magtutudlo mahitungod sa nganong gikinahanglan ang bunyag nga Iyang gitudlo.

“Walay mahugaw nga butang nga makasulod didto sa iyang gingharian; busa walay makasulod sa iyang kapahulayan gawas niadtong kinsa nakahugas sa ilang mga saput sa akong dugo, tungod sa ilang hugot nga pagtuo, ug paghinulsol sa tanan nila nga mga sala, ug sa ilang pagkamatinud-anon hangtud sa katapusan.” (3 Nephi 27:19.)

Mao kana ngano nga gipasidan-an ni Pedro ang iyang mga tigpaminaw, “Paghinulsol kamo ug pagpabunyag kamo ang matag usa kaninyo diha sa ngalan ni Jeuskristo alang sa kapasayloan sa inyong mga sala; ug madawat ninyo ang gasa sa Espiritu.” (Mga Buhat 2:38.) Kay pinaagi sa bunyag pinaagi sa tawo nga adunay awtoridad, ang gibunyagan sa pagkatinuod mahulagwayon nga mihugas sa iyang mga sapot sa dugo sa Anak sa Dios, kinsa miula sa mga sala sa tanan kinsa midawat kaniya ug miduol sa pultahan sa toril, pinaagi sa bunyag. “Apan kon sila dili maghinulsol,” ang Manluluwas tataw nga mipahayag, “sila kinahanglan nga magantus sama kanako.” (D&P 19:17.)¹¹

Sa unsa nga paagi nga ang Espiritu Santo mogiya kanato ngadto sa presensya sa Ginoo?

Ang matag nabunyagan nga miyembro gipandungan sa mga kamot diha sa iyang ulo ug ang mga elder, human mokumpirma kaniya nga usa ka miyembro sa Simbahan, miingon, “Dawata ang Espiritu Santo.” Dayon gisubli tingali nila ang mga pulong nga gisulti sa Magtutudlo ngadto sa Iyang mga tinun-an sa dihang Iyang giingnan sila mahitungod sa Maghuhupay o sa Espiritu Santo, nga moabut: Kini magapahinumdom kaninyo sa tanan nga akong gisulti. Motudlo kaninyo sa tanang mga butang ug mopahinumdom kaninyo sa tanang mga butang ug mopakita sa tanang mga butang nga moabut. [Tan-awa sa Juan 14:26; 16:13.] Ug mao nga kon ako nagkumpirma kaninyo nga usa ka miyembro sa Simbahan, akong itugyan kaninyo ang gasa sa Espiritu Santo, nga mahimong lampara diha sa inyong tiil ug giya diha sa inyong dalan, nga motudlo kaninyo sa tanang mga butang sa inyong paghinumdom ug mopakita sa mga butang nga moabut.¹²

Ang Ginoo miingon: “Ug mao kini ang akong ebanghelyo— paghinulsol ug pagpabunyag pinaagi sa tubig, ug unya moabut ang bunyag sa kalayo ug sa Espiritu Santo, gani ang Maghuhupay, nga nagpakita sa tanan nga mga butang, ug nagtudlo sa malinawon nga mga butang sa gingharian.” (D&P 39:6.)

Kon ang tawo adunay gasa sa Espiritu Santo, siya aduna nianang gikinahanglan nga mopadayag ngadto kaniya sa matag baruganan ug ordinansa sa kaluwasan nga may kalabutan sa tawo dinhi sa yuta.¹³

Usa ka sulundon nga butang ang pagsulti nga kon ang usa ka tawo mabunyagan sa tubig ug makadawat sa mga panalangin sa Espiritu pinaagi sa pagpandong sa mga kamot, nga kani mao ang bag-ong pagkatawo. Usa kini ka bag-ong pagkatawo tungod kay siya gidala gikan sa espirituhanong kamatayon ngadto sa presensya sa usa sa Dios nga Kapangulohan, nga mao ang Espiritu Santo. Mao nga kami moingon nganha kaninyo “Dawata ang Espiritu Santo” sa dihang kamo gikumpirmahan. Kana nga gasa gihatag ngadto sa mga tumutuo kinsa matinud-anon ug nagpakabuhi sa pag-angkon niana nga panalangin, ang katungod sa paghimamat uban sa usa sa Dios nga Kapangulohan sa pagbuntog sa espirituhanong kamatayon.¹⁴

Ang bunyag pinaagi sa pagpaunlod nagsimbolo sa kamatayon ug sa paglubong sa tawo sa sala; ug ang paghaw-as gikan sa tubig, ang pagkabanhaw ngadto sa pagkabag-o sa espirituhanong kinabuhi. Human sa bunyag, ang mga kamot ipandong diha sa ulo sa gibunyagan nga tumutuo, ug siya gipanalanginan aron sa pagdawat sa Espiritu Santo. Sa ingon ang gibunyagan nakadawat sa saad o gasa sa Espiritu Santo, o sa pribilihiyo sa pagbalik ngadto sa presensya sa usa sa Dios nga Kapangulohan; pinaagi sa pagkamasulundon ug pinaagi sa pagkamatinud-anon, ang tawo nga gipanalanginan makadawat sa giya ug direksyon sa Espiritu Santo sa iyang inadlaw nga mga pakig-uban ug pagpakigsulti, sama ni Adan nga nakig-uban ug nakigsulti diha sa Tanaman sa Eden uban sa Dios, nga iyang Langitnong Amahan. Aron makadawat sa mao nga giya ug sa mao nga direksyon gikan sa Espiritu Santo mao ang pagpakatawo pag-usab sa espirituhanong paagi.¹⁵

Sa sukaranang mga baruganan sa ebanghelyo—hugot nga pagtuo, paghinulsol, bunyag, ug ang pagdawat sa Espiritu Santo, nga pinaagi sa maong gahum ang tanang mga butang mapadayag—magsugod kita sa pagsabut unsay gipasabut ni Propeta Joseph Smith sa dihang siya miingon sa usa ka higayon sa dihang gipangutana ngano nga kini nga simbahan lahi kay sa laing tanang mga simbahan—tungod kay kita adunay Espiritu Santo. [Tan-awa sa History of the Church, 4:42.] Ang pagbaton niana nga gahum diin ang tanang mga butang mahimong ipadayag, diha niini ang kahingpitan sa ebanghelyo ni Jesukristo matukod.¹⁶

Unsaon nato sa paglahutay hangtud sa katapusan?

Unsa ang mga balaod ug ang paagi diin atong madawat [ang panalangin sa celestial nga himaya]? Bahin niana, kita aduna sa unang mga baruganan ug mga ordinansa sa Ebanghelyo—hugot nga pagtuo, paghinulsol, bunyag, ug ang Espiritu Santo; ug sa gingharian sa Dios adunay mga balaod nga nagtudlo kanato sa paagi sa kahingpitan. Si bisan kinsa nga miyembro sa Simbahan kinsa nagkat-on sa pagpuyo sa hingpit sa matag balaod nga anaa sa gingharian nagkat-on sa paagi aron mahimong hingpit. Walay miyembro niini nga Simbahan kinsa dili makasunod sa balaod, sa matag balaod sa ebanghelyo sa hingpit. Kitang tanan makakat-on sa pagpakigsulti sa Dios pinaagi sa pag-ampo. Kitang tanan makakat-on sa pagpuyo sa Pulong sa Kaalam sa hingpit. Kitang tanan makakat-on sa pagbalaan sa adlaw nga Igpapahulay, sa hingpit. Kamong tanan makakat-on sa pagsunod sa balaod sa puasa sa hingpit. Nakahibalo kita unsaon sa pagsunod sa balaod sa kaputli sa hingpit. Karon samtang kita magkat-on sa pagsunod sa usa niini nga mga balaod sa hingpit kita sa atong kaugalingon anaa sa dalan ngadto sa kahingpitan.¹⁷

Mangutana kamo nako, unsaon sa usa sa pagbalaan sa iyang kaugalingon, ug sa pagbalaan sa iyang kaugalingon aron makaandam siya sa paglakaw sa atubangan sa Ginoo? … Ang Ginoo miingon niini, “Ug usab, sa pagkatinuod ako moingon nganha kaninyo, kana nga gidumala pinaagi sa balaod mao usab ang gitipigan pinaagi sa balaod ug gihingpit ug gibalaan pinaagi sa mao gihapon” (D&P 88:34). Unsa nga balaod? Ang mga balaod sa Ginoo nga anaa sa ebanghelyo ni Jesukristo, ang pagsunod sa mga balaod ug mga ordinansa mao ang paagi nga kita malimpyo ug mahimong balaan. Ang pagsunod sa matag balaod nga gihatag sa Ginoo kanato usa ka lakang nga mas maduol sa pagdawat sa katungod sa pagsulod pipila ka adlaw ngadto sa presensya sa Ginoo.

Mihatag siya kanato og laing pagpadayag ang paagi diin kita makaandam sa atong mga kaugalingon sa pagpanglabay sa mga katuigan. “Sa pagkatinuod, sa ingon miingon ang Ginoo: Kini mahinabo nga ang matag kalag kinsa mobiya sa iyang mga sala ug moduol ngari kanako, ug motawag sa akong ngalan, ug mosunod sa akong tingog, ug mohupot sa akong mga sugo, makakita sa akong panagway ug masayud nga Ako mao” (D&P 93:1). Yano, dili ba? Apan paminaw pag-usab. Ang inyo lamang buhaton mao ang pagbiya sa inyong mga sala, duol ngadto Kaniya, tawag sa Iyang pangalan, sunod sa Iyang tingog, ug sunod sa Iyang mga sugo, ug niana inyong makita ang Iyang nawong ug masayud nga Siya mao.¹⁸

Kini ang buhat sa Ginoo ug kon mohatag siya og kasugoan ngadto sa mga katawhan, mohatag siya og paagi nga kana nga kasugoan matuman. Kon ang iyang mga anak mobuhat sa tanan sa pagtabang sa ilang mga kaugalingon, niana ang Ginoo mopanalangin sa ilang mga paningkamot.

… Ang Ginoo nagpaabut kanato nga mobuhat sa tanan nga atong mahimo sa pagluwas sa atong mga kaugalingon, ug … human sa tanan nga atong mahimo sa pagluwas sa atong mga kaugalingon, niana kita makasalig sa mga kalooy sa grasya sa atong Langitnong Amahan. Gihatag Niya ang iyang Anak nga pinaagi sa pagkamasulundon sa mga balaod ug mga ordinansa sa ebanghelyo kita makaangkon og kaluwasan, apan dili mahitabo hangtud kita makabuhat sa tanan nga atong mabuhat sa atong mga kaugalingon.¹⁹

Ang Ginoo mihatag kanato, matag usa, og usa ka lampara nga dad-on, apan kon adunay lana o wala ang atong mga lampara kana nag-agad sa matag usa kanato. Mosunod o dili kita sa mga kasugoan ug mohatag sa gikinahanglan nga lana sa pagdan-ag sa atong dalan ug sa paggiya kanato sa atong agianan nag-agad sa matag usa kanato. Kita dili makahulam sa atong pagkamiyembro sa Simbahan. Dili kita makahulam gikan sa atong dungganan nga katigulangan. Adunay lana o wala ang atong mga lampara, usbon ko, nag-agad gayud sa matag usa kanato; matino kini pinaagi sa atong pagkamatinud-anon sa pagsunod sa mga sugo sa Buhi nga Dios.²⁰

Ang tanang mga baruganan sa ebanghelyo ug ang tanang mga ordinansa sa ebanghelyo mga imbitasyon lamang sa pagkat-on sa ebanghelyo pinaagi sa pagsunod sa mga pagtulun-an niini. Mao kana ang tanan—mga pagdapit sa pagduol ug pagbansay aron kamo makahibalo. … Ingon og tataw kaayo nga kita mahimong moingon, kita wala gayud makahibalo sa bisan asa niini nga mga pagtulun-an sa ebanghelyo hangtud nga kita makasinati niini tagsa-tagsa pinaagi sa pagsunod niini. Kita nakakat-on sa ebanghelyo, sa laing pagkasulti, pinaagi sa pagsunod niini.²¹

Ang labing importante nga mensahe nga ikahatag sa usa ka tawo nga anaa sa katungdanan ngadto sa mga miyembro sa Simbahan mao ang pagsunod sa mga kasugoan sa Dios, kay anaa diha ang kasiguroan sa Simbahan ug ang kasiguroan sa indibidwal. Sunda ang mga sugo. Walay lain nga akong masulti nga mas gamhanan o importante nga mensahe karon.²²

Mga Sugyot alang sa Pagtuon ug Panaghisgutan

Unsaon nato sa pagpalambo og mas dako nga hugot nga pagtuo diha kang Ginoong Jesukristo? Sa unsa nga paagi nga ang hugot nga pagtuo makatabang kanato sa pagsunod sa mga sugo kay sa pagbaliwala niini? Kanus-a ang inyong hugot nga pagtuo sa Dios nakahimo kaninyo sa pag-atubang sa “mga problema nga hilabihan ka dako alang sa inyong tawhanong kusog o salabutan”?
Ngano nga ang pagkumpisal importante sa proseso sa paghinulsol? Ngano nga kita kinahanglan magsugod karon sa paghinulsol sa atong mga sala ug mag-usab sa atong mga kinabuhi, kaysa maghulat og laing adlaw?
Sa unsa nga paagi nga kita mahulagwayon nga “mihugas sa [atong] mga saput pinaagi sa dugo sa Anak sa Dios”?
Sumala ni Presidente Lee, sa unsa nga paagi nga ang pagdawat sa gasa sa Espiritu Santo makatabang kanato sa pagbuntog sa espirituhanong kamatayon? Unsay atong mabuhat aron mas hingpit nga makadawat sa giya sa Espiritu Santo sa atong “inadlaw nga pakig-uban ug pakigsulti”?
Unsa ang gitudlo sa Doktrina ug mga Pakigsaad 93:1 mahitungod sa ka-importante sa paglahutay hangtud sa katapusan diha sa pagsunod sa mga sugo?
Sa unsa nga paagi nga ang usa ka pagtulun-an sa ebanghelyo nakatabang kaninyo nga masayud nga kini tinuod?