Mga Pagtulon-an sa mga Presidente
Kapitulo 8: Joseph Smith, Propeta sa Buhing Dios


Kapitulo 8

Joseph Smith, Propeta sa Buhing Dios

Ngano nga ang usa ka pagpamatuod sa mapanagnaon nga misyon ni Joseph Smith labing mahinungdanon sa atong pagpamatuod sa ebanghelyo ni Jesukristo?

Pasiuna

Si Presidente Harold B. Lee adunay usa ka lig-on nga pagpamatuod kabahin ni Propeta Joseph Smith ug kasagaran mogamit sa mga pulong sa Propeta samtang siya nagtudlo sa mga baruganan sa ebanghelyo. Siya nakahibalo nga ang pagpamatuod kabahin sa misyon ni Propeta Joseph Smith mahinungdanon ngadto sa usa ka pagpamatuod kabahin sa ebanghelyo ni Jesukristo. Siya nakasugat og daghang mga tawo kinsa wala mopakigbahin niini nga pagpadayag kabahin sa Propeta. Ang usa niya ka higala nakabasa sa Basahon ni Mormon ug nakapamulong sa iyang “ligdong nga pagtahud sa mga pagtulun-an niini.” Si Presidente Lee nangutana kaniya, “Ngano nga dili ka mohimo og usa ka butang kabahin niini? … Ngano nga dili ka mopasakop sa Simbahan?” Ang tawo mitubag nga mahunahunaon: “Ako nagtuo nga ang kinatibuk-ang katarungan mao nga si Joseph Smith kadungan-dungan ra nako. Kon siya nagpuyo duha ka libo ka mga tuig ang milabay, ako nagtuo nga ako motuo. Apan tungod kay siya hilabihan ka bag-ohay, siguro, mao ang katarungan nga ako dili makadawat.” Miingon si Presidente Lee sa tubag sa iyang higala,”Ania ang usa ka tawo nga nag-ingon, ‘ako nagtuo sa patay nga mga propeta nga nagpuyo kapin sa libo ka mga tuig ang milabay, apan ako adunay dako nga kalisud sa pagtuo sa usa ka buhi nga propeta.’”1

Sa lain nga higayon, usa ka babaye miingon, “Abi nimo, ako makadawat kanunay sa tanan dinhi sa Simbahan gawas sa usa ka butang … Dili gayud ako makadawat sa kamatuoran nga si Joseph Smith usa ka Propeta sa Dios.” Napanid-an ni Presidente Lee, “Unsaon sa usa pagdawat sa Ebanghelyo nga dili modawat kaniya kinsa mao ang instrumento sa pagpahiuli niini, dili gayud ako makasabut.”2

Si Presidente Lee mipahayag: “Kinahanglan kita makahibalo sa pagkatinuod diha sa atong mga kasingkasing ug mga hunahuna nga si Jesus mao ang Kristo, ang Manluluwas sa kalibutan. Kinahanglan kita makahibalo nga kini sa pagkatinuod mao ang Simbahan ni Jesukristo, ang gingharian sa Dios dinhi sa yuta niining ulahi nga mga adlaw; ug sa katapusan kinahanglan kita adunay pagpamatuod nga si Joseph Smith usa ka propeta sa Dios.”3

Mga Pagtulun-an ni Harold B. Lee.

Nganong kinahanglan gayud nga kita adunay pagpamatuod ni Joseph Smith isip usa ka propeta sa Dios?

Unsa ang mohulagway sa usa ka tinuod nga Propeta sa Dios? Una, siya mao ang tigpama-ba sa Dios niana nga panahon ug ngadto sa iyang pundok sa mga katawhan. Ikaduha, siya nag-asoy pag-usab sa karaan nga mga kamatuoran ug naningkamot sa pagpasunod sa mga tawo sa walay kausaban nga mga balaod sa ebanghelyo. Ikatulo, nagdawat siya og dugang nga mga pagpadayag gikan sa Ginoo aron sa pagsagubang sa mga problema sa nagpadayong gipadayag nga plano. Ang ingon nga bag-o nga mga kamatuoran gikan sa Dios moabut lamang pinaagi sa Propeta karon. Ang ingon nga tawo mao si Joseph Smith, nga sa tanang paagi usa ka Propeta sa Dios. Oo, sa tinuod ingon nga [si] Propeta Amos nag-ingon, “Sa pagkatinuod ang Ginoong Dios dili magbuhat sa bisan unsa, gawas kon ang iyang tinago ipadayag niya sa iyang mga alagad ang mga manalagna.” [Amos 3:7]4

Gikan sa mga kinahiladman sa akong kalag, ako … nasayud nga si Joseph Smith usa ka propeta sa buhing Dios. Ako nasayud nga siya buhi ug namatay aron sa pagdala ngadto niini nga henerasyon sa paagi diin ang kaluwasan mahimong maangkon. Ako nasayud nga siya naglingkod sa usa ka halangdon nga dapit ug naghupot sa mga yawe niining katapusan nga dispensasyon. Ako nasayud nga kadtong mosunod kaniya ug mopatalinghug sa iyang mga pagtulun-an ug modawat kaniya isip usa ka tinuod nga propeta sa Dios ug sa iyang mga pagpadayag ug mga pagtulun-an isip ang pulong sa Dios, ang mga ganghaan sa impiyerno dili makabuntog batok kanila. [Tan-awa sa D&P 21:4–6.]5

Kinahanglan gayud nga kita modawat sa balaan nga misyon ni Propeta Joseph Smith isip ang paagi diin ang pagpahiuli sa ebanghelyo ug ang organisasyon sa Simbahan ni Jesukristo natuman. Ang matag miyembro sa Simbahan, aron maandam alang sa milenyal nga paghari, kinahanglan gayud nga makadawat og usa ka pagpamatuod alang sa iyang kaugalingon, sa pagkabalaan sa buhat nga gitukod ni Joseph Smith. Mao kini kadtong gitudlo sa kayano pinaagi sa mga Santos human sa pag-abut sa Manluluwas dinhi sa yuta, ug usa sa mga pangulo sa atong panahon nagsulti niini pagusab, sa diha nga siya mipadayag, ako nagtuo kalabut ngadto sa sambingay sa lima ka boangboang ug sa lima ka but-an nga mga birhen diha sa sambingay sa Magtutudlo [tan-awa sa Mateo 25:1–13], “Ang panahon moabut nga walay lalaki ni babaye makahimo sa paglahutay sa hinulaman nga kahayag. Ang matag usa gikinahanglan nga magiyahan pinaagi sa kahayag sulod sa iyang kaugalingon.” [Orson F Whitney, Life of Heber C. Kimball (1945), 450.]6

Kamo kinsa nakasiksik sa tinuoray ngadto sa mga kasulatan, kamo naningkamot sa pagbaton og usa ka pagpamatuod sa balaang saksi sa Espiritu nga matag usa kaninyo adunay katungod sa pagdawat pinaagi sa saksi sa Espiritu Santo, nga maanaa sulod kaninyo … ang usa sa labing kulbahinam sa tanang mga kasinatian nga sukad moabut kaninyo kon kamo makaingon diha sa inyong kasingkasing, “Ako nasayud sa tibuok kong kalag karon ingon nga ako wala gayud makahibalo sa tuman sama sa akong nahibaloan niini karon nga si Jesus mao ang Ginoo, ang Manluluwas sa kalibutan, ug nga si Joseph Smith, ang martir, mao ang propeta kang kinsa ang Ginoo migamit sa pagdala sa Iyang Simbahan ngadto sa pagkatukod niini nga panahon,”7

Giunsa si Joseph Smith pag-andam alang sa iyang calling isip Propeta sa Pagpahiuli?

Si Joseph Smith mao ang usa kinsa ang Ginoo mipasanay gikan sa pagkabata nga lalaki ug gitugahan sa balaang awtoridad ug gitudloan sa mga butang nga gikinahanglan alang kaniya nga makahibalo ug makabaton sa priesthood ug sa pagpahimutang sa sukaranan alang sa gingharian sa Dios niining ulahi nga mga adlaw.8

Sa paagi sa kasaysayan, ang mga pangulo nga propeta gipili gikan sa kabus nga kahimtang sa kinabuhi, wala bansaya sa kahibalo sa Dios diha sa mga seminaryo nga nagtudlo kabahin sa Dios. Hunahunaa ang daghang mga propeta. Akong gamiton ang higayon sa pagbalik sa kasaysayan: Si Elias usa ka mauswagon nga mag-uuma; si Amos usa ka magbalantay sa karnero sa Judea; si propeta Isaias usa ka tagilungsod sa Jerusalem; si Miqueas usa ka taga-baryo sa Judea; si Jeremias usa ka batan-on gikan sa karaan nga pamilya sa pari; si Ezequiel usa ka pari sa templo; si Pedro, Andres, Santiago ug Juan mga mangingisda; si Jesus ug ang iyang amahan nga si Jose mga panday. Tingali kini nagpasabut ngano ang Ginoo mipili [ni Propeta Joseph Smith isip] ang pangulo nga propeta niini nga dispensasyon. … Mipili siya og usa ka tawo kinsa mahimong usa ka maalamon ngadto sa mga butang sa Dios—mga butang nga sa tanan nga kalagmitan mahimo nga binuang ngadto niadto kinsa namatuto lamang sa mga butang sa kalibutan.9

Sa kinabuhi sa batang lalaki nga si Joseph Smith, sa wala pa siya hatagi sa mahimayaong pagtugyan sa duha sa labing mahinungdanon nga mga pagpadayag nga sukad nahatag ngadto sa tawo, duha niadto nga mga pagpadayag gisundan og usa ka pagpakita sa gahum sa panulay—diha sa Sagradong Kakahoyan, ug diha sa Bungtod sa Cumorah. Kini ingon og gikinahanglan nga ang Propeta makasabut sa kinaiyahan ug gahum niana nga kusog aron siya makaandam sa pagpakigbisog sa malampuson nga paagi batok niini.10

Ang usa ka propeta dili mahimong usa ka espirituhanong pangulo pinaagi sa pagtuon sa mga basahon kalabut sa relihiyon, ni siya mahimong usa pinaagi sa pagtambong sa seminaryo nga nagtudlo kabahin sa Dios. … Angusamahimong propeta o usa ka relihiyuso nga pangulo pinaagi sa tinuod nga espirituhanong mga pagtandog. Ang tinuod nga espirituhanong eksperto makakuha sa iyang diploma nga direkta gikan sa Dios.11

Unsa nga dagkong mga butang ang natukod sa Ginoo pinaagi ni Propeta Joseph Smith?

Ang misyon ni Propeta Joseph Smith nahibaloan … sa dili mokubos sa 2,400 ka mga tuig sa wala pa siya matawo. Ang mga panagna … kalabut ni Moises ug Joseph girekord diha sa mga palid nga tumbaga ug nakuha gikan kang Laban pinaagi sa anak nga mga lalaki ni Lehi sumala sa inyong mahinumduman. Didto nakaplagan kini nga panagna nga diin naghimo og pakisayran ngadto sa walay lain nga tawo gawas ni Propeta Joseph Smith:

“Oo, si Jose [sa walay pagduha-duha nagpasabut nga kana nga Jose kinsa gibaligya ngadto sa Ehipto] sa pagkatinuod miingon: Sa ingon namulong ang Ginoo ngari kanako: Usa ka pinili nga manalagna ako mopasanay gikan sa mga bunga sa imong mga kaliwat… ug ngadto kaniya Ako mohatag og gahum sa pagdala sa akong pulong ngadto sa binhi sa imong mga kaliwat—ug dili lamang sa pagdala sa akong pulong, miingon ang Ginoo, apan ngadto sa pagdani kanila sa akong pulong diin maanaa kanila. … Tan-awa kana nga manalagna panalanginan sa Ginoo; ug sila nga nagtinguha sa pagpakaulaw kaniya pagalaglagon. … Ug ang iyang ngalan pagatawgon sama kanako; ug kini sama sa ngalan sa iyang amahan. Ug mahisama siya kanako; kay ang butang, nga ipagawas sa Ginoo diha sa iyang kamot, pinaagi sa gahum sa Ginoo modala sa akong katawhan ngadto sa kaluwasan.” [Tan-awa sa 2 Nephi 3:7, 11, 14–15.)12

Niini nga dispensasyon, ingon sa nahitabo sa tanang miagi nga mga dispensasyon sa ebanghelyo dinhi sa yuta, dihay gihatag pinaagi sa propeta sa karon nga panahon, nga si Joseph Smith, ang tinuod nga kahibalo kabahin sa Dios ug sa iyang Anak, ang atong Manluluwas, sa dihang, isip nahimaya nga mga tawo kinsa ikasulti ug makita sa mga tawo, sila nakigsulti kaniya, ingon og aron ipakita ang ilang pagkatinuod nga tawo, samtang ang dispensasyon sa kahingpitan sa panahon nagsingabut, agi og pagpangandam alang sa ikaduhang pag-anhi sa Ginoo aron sa paghari isip Ginoo sa mga ginoo ug Hari sa mga hari diha sa pagsugod sa milenyum.13

Sa bisan unsa nga higayon kita mokunhod diha sa hugot nga pagtuo ug sa kahibalo sa Ginoo, sa Iyang kalooy, gipadala og balik ang labaw ka hingpit nga kahibalo sa Dios ug sa Iyang Anak, ug sa bisan unsa nga higayon kita adunay buhagay sa balaang kahibalo mahitungod sa Amahan ug sa Anak kita moingon nga kita adunay bag-o nga dispensasyon. Mao kini kaniadto sa panahon ni Adan; mao kini sa panahon ni Abraham; sa panahon ni Moises; sa dihang Siya miadto sa mga Nephite, sa mga tawo ni Enoch; ug mao kini nga ang Manluluwas mianhi taliwala sa mga katawhan aron itudlo kanila ang pakigdait sa Dios ug sa Anak sa Dios. …

Makahuluganon, nga, aron sa pagsugod sa dispensasyon sa kahingpitan sa panahon, kini gipahigayon pinaagi sa unsa? Usa ka pagpadayag sa pagkatawo sa Dios Amahan ug sa Anak ngadto sa batang lalaki nga si propeta Joseph Smith.14

“Si Joseph Smith ang Propeta ug Manalagna sa Ginoo, nakahimo og mas daghan, gawas lamang kang Jesus, alang sa kaluwasan sa mga tawo niini nga kalibutan, kay ni bisan kinsa nga tawo nga nakapuyo dinhi.” (D&P 135:3). Karon, ang uban mahimong maghunahuna niana nga usa ka pasulabi nga pahayag, apan [kini dili] kon kita maghunahuna sa unsay Iyang gihatag kanato pinaagi niining katingalahang batan-on nga lalaki kinsa, sa mubo nga panahon sa duha ka tuig, mipatungha sa mahinungdanon nga volume sa kasulatan diin mao ang ikaduha nga saksi ngadto sa misyon sa Ginoo, Ang Basahon ni Mormon. … Kining batan-on nga lalaki wala sa gasa sa edukasyon sa tawo, apan natandog pinaagi sa gahum sa Makagagahum nga Dios, mihubad niana nga rekord gikan sa wala masayri nga pinulongan ngadto sa pinulongan nga kita aduna karong adlawa, diha diin makaplagan ang kahingpitan sa walay katapusan nga ebanghelyo.15

Si Joseph Smith, ang batan-ong lalaki wala ma-edukar sa mga pagtulun-an mahitungod sa Dios niana nga panahon, wala maedukar sa bantugang tulunghaan sa pagkat-on sa iyang panahon … [kaniadto] usa kinsa mahimong manunuton ngadto sa mga pagtulun-an ug mga pag-aghat sa Espiritu. Si Joseph Smith dili unta makatukod niini nga simbahan. Dili unta siya makapatungha sa buhat sa Ginoo, ang Basahon ni Mormon. Mahimo silang magbiaybiay ni Propeta Joseph Smith isip usa ka tawo. Mahimo silang magduha-duha giunsa pagsugod ang simbahan, apan dinhi ang butang nagbarug isip usa ka monumento—ang Basahon ni Mormon mismo. Si Joseph, ang tawo, dili unta makahimo niini, apan si Joseph, gipalihok pinaagi sa gahum sa Makagagahum nga Dios, nakahimo ug gibuhat ang milagrusong serbisyo sa pagpatungha sa gingharian gikan sa kangitngit diha sa gipahiuli nga ebanghelyo ni Jesukristo.16

Si [Moroni] mipahibalo ngadto sa Propeta … nga ang panahon miabut na alang sa ebanghelyo diha sa tanan niini nga kahingpitan nga ipasangyaw uban ang gahum ngadto sa tanang mga kanasuran. Kini agi og katumanan niana diin gisaad ngadto ni Juan kon ang anghel molupad taliwala sa kalangitan, “nagdala sa [kahingpitan sa] walay katapusang Maayong Balita aron imantala ngadto sa mga nagpuyo sa yuta”.(Pinadayag 14:6). Ang pagpahiuli niana nga kahingpitan sa ebanghelyo natuman sa diha nga ang Basahon ni Mormon, gipadayag nga usa ka rekord diin ang kahingpitan sa ebanghelyo gilangkob, gipahiuli ngadto sa kalibutan pinaagi ni Propeta Joseph Smith.17

Sa ika-21 sa Septiyembre 1823 [si Moroni mipakita ngadto ni Joseph Smith ug mipadayag, sa gamay nga bahin,] “nga ang pagpangandam nga buhat alang sa ikaduhang pag-anhi sa Mesiyas sa dali pagasugdan; nga ang panahon duol na alang sa Ebanghelyo sa tanan niini nga kahingpitan ipasangyaw uban ang gahum, ngadto sa tanan nga mga kanasuran … nga ang usa ka katawhan mahimo nga maandam alang sa paghari sa Milenyum,” diin nagpasabut alang sa pag-anhi sa Ginoo. (History of the Church, 4:537). Sa lain nga mga pagkasulti, ang labing importante nga katuyoan alang sa pagpahiuli sa ebanghelyo mao ang pag-andam sa katawhan kinsa maandam sa pagbarug diha sa atubangan sa Ginoo kon Siya moabut; kon dili… kita dili makalahutay sa Iyang presensya.18

Karon nga panahon ang trabaho sa gingharian sa Dios dinhi sa yuta usa ka monumento ngadto sa pangalan ni Propeta Joseph Smith. Minilyon ang nahinangup sa himaya sa iyang misyon, sumala sa iyang pagsangyaw niini ug pagdumala niini sa tibuok yuta. Kita ang mga manununod nianang mahal kaayo nga perlas nga labing bililhon, ang ebanghelyo ni Jesukristo, diin gipahiuli pinaagi kaniya isip instrumento, aron sa pagtabang kanato sa pagpuyo, ug pagpakamatay kon gikinahanglan, nga unta kita sa hustong panahon maandam alang niana nga paghari sa Milenyum. Dili gayud nato kini hikalimtan. Kini ang panahon alang kanato, samtang aduna pay panahon, nga maandam sa pagsugat sa atong Dios.19

Mga Sugyot alang sa Pagtuon

  • Unsaon nato sa pagpalig-on sa atong pagpamatuod kabahin sa misyon ni Propeta Joseph Smith? Unsa ang nakapalig-on sa inyong pagpamatuod sa Propeta?

  • Unsaon nato sa pagsunod sa ehemplo ni Propeta Joseph Smith aron sa pagdugang sa atong kaalam ug pagka-espirituhanon? Unsang Kristohanon nga mga kinaiya ang tataw diha sa kinabuhi ni Propeta Joseph Smith?

  • Unsa ang pipila ka mahinungdanong mga kamatuoran sa ebanghelyo ang gipadayag pinaagi ni Propeta Joseph Smith?

  • Unsa ang nabuhat ni Propeta Joseph Smith alang sa kaluwasan sa tanang mga anak sa Dios? Sa unsa nga mga paagi nga ang inyong mga kinabuhi lahi tungod sa mga pagpadayag nga nadawat pinaagi ni Joseph Smith?

  • Unsaon ninyo sa pagpakigbahin sa inyong pagpamatuod kabahin ni Joseph Smith?

Mubo nga mga sulat

  1. “The Place of the Living Prophet, Seer, and Revelator,” pakigpulong didto sa mga magtutudlo sa seminary ug institute sa Brigham Young University, 8 Hulyo 1964, Historical Department Archives, Ang Simbahan ni Jesukristo sa mga Santos sa Ulahing mga Adlaw, 2–3.

  2. “He Lived Great, Died Great in Eyes of God and His People,” Church News, 10 Dis. 1955, 4.

  3. The Teachings of Harold B. Lee, ed. Clyde J. Williams (1996), 152–53.

  4. “He Lived Great,” 13.

  5. The Teachings of Harold B. Lee, 371.

  6. Sa Conference Report, Okt. 1956, 62.

  7. “Two Great Commemorations,” Mensahe sa pasko ngadto sa mga empleyado sa Church Office Building, 14 Dis. 1972, Historical Dept., Ang Simbahan ni Jesukristo sa mga Santos sa Ulahing mga Adlaw, 6.

  8. Sa Conference Report, Okt. 1972, 18; o Ensign, Ene. 1973, 23.

  9. “A Man among Men—A Man of Inspiration,” pakigpulong nga gihatag didto sa Fourth Annual David O. McKay Honor Day, 29 Sept. 1968, Historical Dept., Ang Simbahan ni Jesukristo sa mga Santos sa Ulahing mga Adlaw, 12.

  10. The Teachings of Harold B. Lee, 372.

  11. “He Lived Great,” 5.

  12. “He Lived Great,” 5.

  13. Sa Conference Report, Abr. 1969; 132–33; o Improvement Era, Hunyo 1969, 105.

  14. The Teachings of Harold B. Lee, 373–74.

  15. The Teachings of Harold B. Lee, 372.

  16. The Teachings of Harold B. Lee, 372.

  17. The Teachings of Harold B. Lee, 374.

  18. The Teachings of Harold B. Lee, 375.

  19. Sa Conference Report, sa Munich Germany Area Conference 1973, 7.

Si Presidente Harold B. mipamatuod: “Ako … nasayud nga si Joseph Smith usa ka propeta sa buhing Dios. Ako nasayud nga siya buhi ug namatay aron sa pagdala niini nga henerasyon diin ang kaluwasan mahimong maangkon.”

Uban sa Unang Panan-awon, ang dispensasyon sa kahingpitan sa mga panahon gidala pinaagi sa “usa ka pagpadayag sa pagkatawo sa Dios Amahan ug sa Anak” ngadto sa pinili nga propeta sa Ginoo.