Kapitulo 22
Kalinaw Maanaa sa Inyong Kalag
Ngano nga gikinahanglan ang kalisdanan aron pagtuman sa mahangturong katuyoan sa Ginoo?
Pasiuna
“Ang tanan kinsa nagpuyo niining kalibutan pagasulayan pinaagi sa mga hangin sa kalisdanan,” miingon si Harold B. Lee.1 Walay langyaw sa kalisdanan, si Harold B. Lee nawad-an sa iyang asawa, nga si Fern Tanner Lee, ug sa iyang anak nga babaye nga si Maurine Lee Wilkins diha sa kamatayon panahon sa mga 1960. Miantus usab siya sa grabe nga mga problema sa panglawas hangtud sa iyang mga katuigan isip General Authority. Giangkon niya diha sa kinatibuk-ang komperensya niadtong 1967: “Akong gidawat ang pipila ka mga pagsulay, pipila ka grabe nga mga pagsulay, diha sa atubangan sa Ginoo, ako nagtuo aron sa pagsulay kanako kon andam ba ako sa pagdawat sa tanang mga butang bisan unsa nga gitan-aw sa Ginoo nga angay ipasakit ngari kanako, gani sama sa gamay’ng bata nga monunot sa amahan niini.” [Tan-awa sa Mosiah 3:19.]2
Apan si Presidente Lee mitanyag og kahupayan sa panahon sa kalisdanan: “Ang usa ka tawo kinsa masaligon sa pagpaabut sa usa ka mahangturon nga ganti alang sa iyang mga paningkamot sa pagkamortal kanunay nga gitabangan diha sa iyang grabe nga mga pagsulay. Kon siya mawad-an og paglaum sa gugma, dili siya maghikog. Kon mga minahal mamatay, dili siya maguol; kon mapildi sa gitinguha nga bangga, dili siya magduda, kon gubat ug kalaglagan mowagtang sa iyang kaugmaon, dili siya maunlod ngadto sa kasubo. Nagpuyo siya ibabaw sa iyang kalibutan ug dili gayud mawad-an sa panan-aw sa tumong sa iyang kaluwasan.”3
“Ang dalan paingon sa [kahimayaan] sagalsalon ug tungason. Daghan ang nadagma ug nahulog, ug pinaagi sa pagkawalay paglaum dili gayud mobangon sa ilang mga kaugalingon aron magsugod pag-usab. Ang mga gahum sa dautan motabon sa agianan uban sa daghang makababag nga gabon, kasagaran nagsulay kanato sa pagpatipas sa sayop nga mga agianan. Apan taliwala niining tanan nga panaw,” mipasalig si Presidente Lee, “adunay malinawon nga kasiguroan nga kon atong pilion ang matarung, kalampusan atong maangkon, ug ang katumanan niini mahimong mohulma ug moumol ug mohimo kanato ngadto sa matang sa pagkatawo nga sarang dawaton diha sa atubangan sa Dios. Unsay mas dako nga kalampusan kay sa pag-angkon sa tanan nga anaa sa Dios?”4
Mga Pagtulun-an ni Harold B. Lee
Sa unsa nga paagi nga ang kalisdanan makatabang kanato nga mahimong labaw pa ka sama sa Dios?
Adunay usa ka mahashason nga proseso nga moabut pinaagi sa pag-antus, ako naghunahuna, nga dili kita makasinati sa laing paagi kay sa pag-antus. … Mas magpaduol kita ngadto Kaniya kinsa mihatag sa Iyang kinabuhi aron ang tawo mahimo. Mobati kita og kasuod sa kabanay nga wala pa sukad nato gibati kaniadto. … Miantus Siya labaw pa kay sa atong mahunahuna. Apan sa gidak-on sa atong pag-antus, bisan pa niana, ingon og adunay epekto sa pagbitad kanato nga mas maduol ngadto sa balaan, nagtabang sa pagputli sa atong mga kalag, ug nagtabang sa pagpapha sa mga butang nga dili makapahimuot sa pana-aw sa Ginoo.5
Si Isaias miingon: “Apan karon o Jehova, ikaw mao ang among amahan; kami yuta nga kolonon, ug ikaw mao ang among magkokolon; ug kaming tanan binuhat man sa imong kamot.” (Isaias 64:8.)
Nabasa ko na kana nga bersikulo sa daghang mga higayon apan wala makadawat sa hingpit nga kahulugan hangtud didto ako sa Mexico pipila ka tuig na ang milabay didto sa Telacapaca, diin ang mga tawo naghulma og yuta nga kolonon ngadto sa nagkalainlaing mga matang sa kolon. Didto ako nakakita kanila nga mikuha og yuta nga gisagol pinaagi sa bati, kinaraan nga mga paagi, ang tighulma nag-ubog sa lapok aron sa pagsagol niini sa husto. Dayon gibutang kini sa hulmahang motuyok sa magkokolon ug ang magkokolon mosugod sa pagporma sa makuti nga gagmay’ng bahin sa kolon, nga iyang ibutang didto sa merkado. Ug samtang kami nagtan-aw, usahay among makita, tungod sa pipila ka mga depekto sa pagsagol, sa panginahanglan sa pagbungkag sa tibuok tibugol sa yuta nga kolonon ug iitsa kini og balik aron sagolon pag-usab, ug usahay ang proseso kinahanglan nga balikon sa makadaghang higayon sa dili pa ang lapok masagol og husto.
Uban niana sa hunahuna, nagsugod ako sa pagkasabut sa kahulugan niini nga kasulatan. Oo, kita usab kinahanglan nga pagasulayan ug pasagubangon sa kakabus, sa sakit, sa kamatayon sa usa ka minahal, sa pagtintal, usahay sa pagluib sa gipakaingon og higala, sa kabuhong ug sa katigayunan, sa kahamugaway ug kaluho, sa bakak nga mga ideya sa edukasyon ug sa pag-ulog-ulog sa kalibutan. Ang usa ka amahan nga mipasabut niining mga butanga ngadto sa iyang anak nga lalaki, miingon:
“Ug sa pagpahigayon sa iyang walay katapusan nga mga katuyoan sa sangputanan sa tawo, human siya makalalang sa atong unang mga ginikanan ug sa kahayopan sa umahan ug sa mga langgam sa kahanginan, ug diha sa katapusan, tanan nga butang nga nalalang, gikinahanglan gayud nga adunay usa ka katugbang; gani ang gidili nga bunga kaatbang sa kahoy sa kinabuhi; ang usa tam-is ug ang lain pait.” [2 Nephi 2:15.]
Si Propeta Joseph Smith mao ang miingon, sa pagsulti kabahin niining paghashas nga proseso, nga siya sama sa usa ka dako kaayo, sagalsalon nga bato nga nagligid sa ubos daplin sa bukid, ug ang mao lamang paghashas nga iyang nakuha mao nga kon adunay pipila ka sagalsalon nga kanto nga mabag-id sa laing butang, motipak og usa ka kanto dinhi ug usa ka kanto didto. Apan, siya miingon, “Sa ingon ako mahimo nga usa ka … hinashasan nga pana sulod sa udyongan sa Labing Makagagahum.” [History of the Church, 5:401.]
Busa, kinahanglan gayud nga mahashasan kita; kinahanglan gayud nga pagasulayan kita aron mapamatud-an ang kalig-on ug gahum nga anaa kanato.6
Gigiyahan sa hugot nga pagtuo nga gitudlo sa pulong sa Dios, atong gitan-aw ang kinabuhi isip usa ka dako nga proseso sa pagbansay sa espiritu. Ubos sa makanunayon nga pagbantay sa usa ka mapinanggaon nga Amahan, kita nakakat-on pinaagi sa “mga butang nga atong giantus,” nakabaton kita sa kalig-on pinaagi sa pagbuntog sa mga babag, ug nakabuntog kita sa kahadlok pinaagi sa malampuson nga kadaugan sa mga dapit diin ang kuyaw nagpahipi [tan-awa sa Mga Hebreohanon 5:8]. Pinaagi sa hugot nga pagtuo, sama sa gitudlo sa pulong sa Dios, atong nasabtan nga bisan unsa ang nahatag diha sa kinabuhi ngadto sa taas nga sumbanan ni Jesus––“Busa, kamo kinahanglan magmahingpit ingon nga hingpit ang inyong Amahan nga langitnon” (Mateo 5:48)––mao ang alang sa atong kaayohan ug alang sa atong mahangturon nga kaayohan bisan tuod sa ngadto niana nga paghulma mag-uban ang grabe nga pagpanton sa usa ka maalamon sa tanan nga Dios. “Kay ang Ginoo nagpanton kaniya nga iyang gihigugma, ug nagalatus sa matag usa ka anak nga iyang gisagop.” (Mga Hebreohanon 12:6.)
Busa gitudloan ug gibansay alang sa pakigbatok sa mga gahum sa kangitngit ug sa espirituhanon nga kadautan, mahimo nga kita “ginasakit sa tanang paagi, apan wala manghiubos; nangalibog, apan wala mawad-i sa paglaum; Ginalutos, apan wala ikapanugyan, gipamunalan hangtud sa pagkapukan, apan wala mangalaglag.” (2 Mga Taga-Corinto 4:8–9.)7
Ang usa ka tawo kinsa adunay pagpamatuod sa katuyoan sa kinabuhi nagtan-aw sa mga babag ug mga pagsulay sa kinabuhi isip mga kahigayunan alang sa pag-angkon sa kasinatian nga gikinahanglan alang sa trabaho sa kahangturan. …
Kon mag-atubang sa kamatayon, ang ingon nga tawo dili mahadlok kon ang iyang mga tiil “gisapinan sa pagpangandam sa maayong balita sa kadaitan,” [Mga Taga Efeso 6:15] ug kadtong kinsa nawad-an sa ilang mga minahal makabaton sa hugot nga pagtuo ni Moroni, ang kapitan sa kasundaluhan, kinsa mipahayag, “Kay ang Ginoo mitugot sa mga matarung nga mopatay nga ang iyang kaangayan ug paghukom modangat sa mga dautan; busa kamo dili magtuo nga ang mga matarung gisalikway tungod kay sila gipatay; apan tan-awa, sila mosulod ngadto sa kapahulayan sa Ginoo nga ilang Dios.” (Alma 60:13.)8
Paminaw sa leksyon sa Magtutudlo sa pagpalambo sa mga tawo––“Ang tanang sanga nga mamunga, kini iyang [pagahinloan] aron mamungag labi pang daghan” (tan-awa sa Juan 15:2). …
Panagsa, kon ugaling, adunay usa ka tinuod nga dungganan nga kalag kinsa wala pa pagasulayi ug pasagubanga pinaagi sa mga luha, ug kalisdanan––nga daw gipul-ungan sa mga kamot sa labing maayo nga hardenero. Pinaagi sa paggamit sa kutsilyo ug karit nga pangpul-ong ang sanga gitabas ug gihulma sa gamhanan nga desinyo sa Dios, aron ang hingpit niini nga bunga mahimo nga matuman.
Ang matag usa kaninyo kinahanglan gayud nga molahutay sa mga pagsulay, ug mga kalisdanan, mga kaguol ug mga kahigawad. Kon anaa sa kasub-anan ug sa pagkawalay paglaum kon inyong mahinumduman, mahupay kamo kon inyong makat-unan kini nga leksyon: “Kay ang Ginoo nagapanton kaniya nga iyang ginahigugma, ug nagalatus sa matag usa ka anak nga iyang ginasagop” (Mga Hebreohanon 12:6)––ug usab: “Anak ko, ayaw pagtamaya ang pagkastigo sa Ginoo; ni magsubo ka sa iyang pagbadlong: kay kinsa kadto nga gihigugma sa Ginoo iyang ginabadlong, maingon sa usa ka amahan sa anak nga iyang gikahimut-an” (Mga Proverbio 3:11–12).9
Si Propeta Joseph [Smith] … naguol tungod sa mga buhat sa kabangis batok sa mga Santos ug taliwala sa iyang mga kalisud inyong nahinumduman nga siya mituaw, “O Dios, hangtud kanusa makakita ang imong mga mata ug ang imong mga dunggan makadungog sa makalolooy nga mga hilak sa mga Santos ug ipanimalos ang ilang mga kasaypanan diha sa mga ulo sa mga kaaway?” [Tan-awa sa D&P 121:1–6.] Ug kini ingon og ang Magtutudlo mikugos sa usa ka nahadlok nga bata ngadto sa iyang mga bukton ug miingon:
“Akong anak kalinaw nganha sa imong kalag; ug ang imong mga kasakitan sulod lamang sa mubo nga higayon;
“Ug unya kon ikaw molahutay pag-ayo, ang Dios mobayaw kanimo sa kahitas-an; ikaw magmadaugon ibabaw sa imong tanan nga mga kaaway.” (D&P 121:7, 8)
Dayon misulti siya og usa ka makapatingala nga butang:
“… ikaw masayud, akong anak, nga kining tanan nga mga butang makahatag kanimo sa kasinatian, ug alang sa imong kaayohan.” (D&P 122:7)
… Dayon misulti ang Magtutudlo:
“Ang Anak sa Tawo mikunsad ubos kanilang tanan. Labaw pa ba ikaw kay kaniya?
“Busa, padayon sa imong pamaagi. … Ayaw kahadlok unsa ang mahimo sa tawo kay ang Dios mouban kanimo hangtud sa kahangturan.” (D&P 122:8, 9)
Miabut ako sa usa ka higayon sa akong kinabuhi sa diha nga ako kinahanglan nga mogamit niana sa akong kaugalingon. Ang Anak sa Tawo miagi niining tanan.10
Ang katuyoan sa atong pagkaania dinhi tataw nga gilitok diha sa pagpadayag sa Ginoo ngadto ni Moises. Siya miingon, “Mao kini ang akong buhat ug ang akong himaya––ang pagpahinabo sa pagka-imortal ug sa kinabuhi nga dayon sa tawo.” [Moises 1:39.] “Ang kinabuhing dayon sa tawo” nagpasabut sa pagbalik ngadto sa atubangan sa Dios nga Amahan ug sa Iyang Anak aron mopuyo sa kahangturan uban Kanila. Karon, wala Siya mag-ingon nga Iya kining katuyoan nga ang tanan Niya nga mga anak kinahanglan nga mopuyo dinhi sa yuta sa sabakan sa kaluho, uban sa katigayunan ug kahamugaway ug kinahanglan nga sila walay kasakit ug kagul-anan. Wala siya magsulti niana. Tungod kay usahay, ingon sa gisulti ni Isaias, sa dapit sa sampinit motubo ang arayan [tan-awa sa Isaias 55:13]. … Unsa ang ingon sa karon nga higayon usa ka trahedya mahimo, nga samtang nagtan-aw kita sa tibuok hulagway gikan sa sinugdanan ngadto sa katapusan, diha sa kaalam sa atong Amahan, mahimong usa ka dakong panalangin kay sa makalilisang nga katapusan sama sa atong gituohan.11
Sa unsa nga paagi kita makakaplag sa kalig-on ug kalinaw sulod sa atong kaugalingon sa mga panahon sa kasamok?
Ang matag kalag nga naglakaw sa yuta, kamo ug ako, kitang tanan bisan kon adunahan o kabus, bisan kon maayo o dautan, batan-on o tigulang––matag usa kanato pagasulayan ug pasagubangon pinaagi sa mga unos sa kalisdanan, mga hangin nga kinahanglan gayud kita mopanalipod sa atong mga kaugalingon batok niini. Ug kadto lamang nga mga tawo kinsa dili mapakyas mao kadtong kansang mga balay gitukod diha sa bato. Ug unsa nga bato? Kini mao ang bato sa pagkamasulundon sa mga baruganan ug mga pagtulun-an sa ebanghelyo ni Jesukristo sama sa gitudlo sa Magtutudlo.12
Dili ako mangayo og mga pasaylo … sa paghangyo kaninyo niining buntaga, sa pagtuo uban kanako sa sukaranan nga mga hunahuna sa tinuod nga relihiyon––sa hugot nga pagtuo sa Dios ug sa Iyang Anak nga si Jesukristo isip Manluluwas sa kalibutan ug nga diha sa Iyang ngalan ang mga milagro nahimo ug gihimo karon ug nga pinaagi lamang sa usa ka hingpit nga pagdawat niini nga mga kamatuoran kamo ug ako maangkla sa dili mapakyas nga punduhanan kon ang mga unos sa kinabuhi maghaguros sa atong palibut.
Busa, gidapit ko kamo sa pagpaubos sa inyong mga kaugalingon … ug uban sa mainampuon nga mga kasingkasing mangahas sa pagtuo sa tanan nga gitudlo kanato sa balaan nga mga propeta kabahin sa ebanghelyo gikan sa Balaan nga mga Kasulatan sukad sa sinugdanan.13
Mao nga ang tanan nga mahinungdanon nga butang sa kinabuhi dili mao ang nahitabo kaninyo, apan ang importante nga butang mao ang giunsa ninyo pagdawat niini. Mao kana ang importante nga butang. Diha sa pagtapos sa Wali sa Bukid, inyong mahinumduman nga ang Magtutudlo mihatag og usa ka sambingay. Siya miingon:
“Busa, bisan kinsa nga magapatalinghug niining akong mga pulong ug magatuman niini mahisama siya sa usa ka tawong butan nga nagtukod sa iyang balay ibabaw sa bato:
“Ug unya mibundak ang ulan, ug mibul-og ang mga baha, ug mihuros ang mga hangin, ug mihapak niadtong balaya, apan kadto wala mapukan: kay natukod man ibabaw sa bato. … ” [Mateo 7:24–25.]
Unsa ang gipaninguha niya nga ipasabut? Naninguha siya sa pagsulti nga ang hangin sa kalisdanan, ang mga baha sa katalagman, ang mga kasakit, mohapak diha sa tawhanon nga panimalay dinhi sa yuta; ug ang mao lamang nga dili mapukan––kon ang bangko maalkansi, kon kamo mawad-an sa usa ka minahal, sa bisan unsa nga laing katalagman––ang bugtong butang nga makapalungtad kanato niining tanan nga mga unos ug kaugtas sa kinabuhi mao nga kon kita nakatukod diha sa mga bato pinaagi sa paghupot sa mga sugo sa Dios. …
Paghulat nga mapailubon sa Ginoo diha sa panahon sa pagpanggukod ug hilabihan nga kasakit. Ang Ginoo miingon,
“Sa pagkatinuod ako moingon nganha kaninyo akong mga higala, ayaw kahadlok, himoa nga mahupay ang inyong mga kasingkasing oo, maglipay hangtud sa hangtud, ug sa matag butang maghatag sa mga pagpasalamat;
“Maghulat nga mapailubon sa Ginoo, kay ang inyong mga pagampo misulod ngadto sa mga dunggan sa Ginoo sa mga Panon, ug natala uban niini nga silyo ug tugon––ang Ginoo nanumpa ug nagtakda nga sila pagahatagan.” (D&P 98:1–2)14
Unsa ang atong ikasulti niadtong kinsa nangandoy sa kalinaw sulod sa kaugalingon aron sa paglinaw sa ilang mga kahadlok, aron sa paghupay sa nagsakit nga kasingkasing, aron sa pagdala sa pagsinabtanay, aron sa pagtan-aw lapas sa mahugaw nga mga pagsulay karon ug makakita sa katumanan sa mga paglaum ug mga damgo diha sa kalibutan nga lapas sa pagkamortal? …
Ang Magtutudlo mipakita sa tinubdan diin ang hilabihan nga kalinaw moabut sa diha nga siya miingon ngadto sa iyang mga tinun-an, “Kaninyo ibilin ko ang kalinaw; kaninyo ihatag ko ang akong kalinaw: hatagan ko kamo niini dili sama sa hinatagan sa kalibutan. Kinahanglan dili magkaguol ang inyong kasingkasing, ni magtalaw.” (Juan 14:27.)15
“Paghupot sa mga sugo sa Dios,” kay anaa diha ang usa ka dalan nga magdala sa kalinaw sulod sa kaugalingon nga gisulti sa Magtutudlo sa diha nga nanamilit Siya sa Iyang mga tinun-an: “Gisulti ko kini kaninyo aron nga dinhi kanako makabaton kamog kalinaw. Dinhi sa kalibutan aduna kamoy kagul-anan: apan sumalig kamo, gidaug ko na ang kalibutan.” (Juan 16:33) Busa hinaut nga matag usa kaninyo, taliwala sa tumang kagubot nga naglibut kaninyo, mangita nianang langitnong kasiguroan gikan sa Magtutudlo kinsa nahigugma kaninyong tanan, nga mipalayas sa tanan nga mga kahadlok sa diha nga, sama sa Magtutudlo, kamo usab nakabuntog sa mga butang sa kalibutan.16
Hain ang walay kuyaw sa kalibutan karon? Ang walay kuyaw dili madaog pinaagi sa mga tangke ug mga pusil ug sa mga ayroplano ug sa atomic nga mga bomba. May usa lamang ka dapit nga walay kuyaw ug kana anaa sulod sa gingharian sa gahum sa Labing Makagagahum nga Dios nga iyang gihatag ngadto niadtong kinsa naghupot sa iyang mga sugo ug naminaw sa iyang tingog, samtang nagsulti siya pinaagi sa mga tinugyanan nga iyang gi-orden alang niana nga katuyoan. …
Ang kalinaw maanaa kaninyo, dili ang kalinaw nga nagagikan sa pamalaod diha sa hawanan sa kongreso, apan ang kalinaw nga miabut sa pamaagi nga giingon sa Magtutudlo, pinaagi sa pagbuntog sa tanang mga butang sa kalibutan. Nga ang Dios motabang unta kanato sa pagsabut ug unta masayud kamo nga ako nasayud uban sa katinuod nga nagpugong sa tanang pagduda nga kini mao ang iyang trabaho, nga siya naggiya kanato ug nagdumala kanato karon, sama sa iyang gihimo sa matag dispensasyon sa ebanghelyo.17
Karon, sama sa gipanagna, ang tibuok kalibutan maingon og nagkaguliyang ug ang mga kasingkasing sa mga tawo mopakyas kanila. Kita sa tinuod kinahanglan gayud nga magpaabut sa pagpuyo uban nianang kalinaw sulod sa atong kaugalingon nga natawo gumikan sa paggamit sa ebanghelyo ni Jesukristo diha sa kalibutan sa kasamok ug katalagman. Ang kapakyasan sa kasingkasing mahimo nga moabut diha sa mga tawo sa usa ka bahin tungod sa pagkawalay paglaum ug ang sangputanan niini moabut sa panahon kon ang gugma sa tawo mag-anam kabugnaw. Ang gahum sa priesthood nga anaa kanato karon kinahanglan gayud nga gamiton ug gani kinahanglan gayud higugmaon kadtong kinsa sa kasilag migamit kanato, ug huptan ang maayo nga panghunahuna sama sa gitambag ni Apostol Pablo ngadto ni Timoteo. [Tan-awa sa 2 Timoteo 1:7.] Kon dili kita mohimo, kita mahimo nga dili epektibo. Makadawat kita og kulang nga mga kasiguroan. Niana ang kaaway dili na magkinahanglan nga mosugyot kanato sa paglapas sa mga sugo o sa pagbiya sa kamatuoran. Niana mausikan na nato ang atong kalig-on.18
Usa ka negosyante sa Atlanta, Georgia, kinsa akong gikauban … naningkamot sa paghupay kanako gumikan sa usa ka makahugno nga pagkamatay; iya akong gidala sa daplin ug miingon kanako, “Karon, buot ako nga mosulti kanimo og usa ka butang. Mas tigulang kaayo ako kay kanimo. Traynta y kwatro ka tuig na ang milabay ang telepono mibagting didto sa bangko diin ako ang presidente. Ang mensahe mao nga ang akong asawa grabe ang kadaut tungod sa aksidente sa sakyanan. Diha-diha ako miingon, ‘O, ang Dios dili motugot nga adunay bisan unsa nga butang mahitabo niining akong minahal––maayo kaayo siya, maanyag kaayo, ug matahum kaayo.’ Apan sulod sa usa ka oras ang pahibalo miabut na usab nga siya namatay. Ug dayon misinggit ang akong kasingkasing, ‘buot ako nga mamatay; dili ako buot nga mabuhi; buot ako nga makadungog sa iyang tingog.’ Apan wala ako mamatay, ug wala ako makadungog sa iyang tingog. Ug unya milingkod ako aron mosulay sa pagpangagpas. Unsa kaha ang kahulugan sa ingon nga kamingaw ug sa ingon nga trahedya nga nag-pahipi sa agianan natong tanan? Ug ang hunahuna miabut kanako nga kini mao ang labing grabe nga pagsulay nga ikaw gikinahanglan gayud nga moatubang sa kinabuhi. Ug kon ikaw makapasar niini, walay ubang pagsulay nga ikaw dili makahimo sa pagpasar.”
Bisan pa niana, sa akong pagpauli, sakay sa ayroplano nianang gabhiona, dihay kalinaw, ug sa unang higayon misugod ako sa paglakaw gawas sa mga kahadlok. Ug dihay miabut kanako unsa ang gisulti ni Apostol Pablo ngadto sa Matutudlo, “Ug bisan tuod siya Anak”––nagkahulugan nga Anak sa Dios––“siya nakakat-on sa pagka masinugtanon pinaagi sa mga butang nga iyang giantus; ug sa nahimo siyang hingpit siya nahimong tuburan sa dayong kaluwasan alang sa tanang magasugot kaniya.” (Mga Hebreohanon 5:8–9). Karon, kon kamo maghunahuna mahitungod niana, nga pinaagi sa paghashas nga proseso sa pagkabulag, sa kamingaw, sa pagkahugno, ako nagtuo nga adunay moabut nga usa ka butang nga mahitabo sa dili pa kita andam sa pag-atubang sa pipila sa ubang mga pagsulay sa kinabuhi.19
Gitawag kita sa malisud nga mga buluhaton diha sa malisud nga panahon, apan kini mahimo nga alang sa matag usa kanato usa ka panahon sa dako nga panimpalad, sa mahinungdanon nga pagkat-on, sa dakong katagbawan sulod sa atong kaugalingon. Alang sa nagtipun-og nga mga hagit nga giatubang tungod sa gubat, urbanisasyon, pagtuis sa doktrina, ug pagkunhod sa panimalay sa pagkatinuod naghatag kanato og moderno nga katugbang sa paglabang sa mga kapatagan; paglahutay sa walay pagsinabtanay, pagtukod sa usa ka gingharian sa tibuok kalibutan taliwala sa kalisdanan. Nag-ampo ako nga unta buhaton nato ang atong bahin atol sa panaw, ug mauban, ug mangulo, sa panon sa Simbahan sa pagsulod niini sa katapusang pinili nga dapit––sa Iyang atubangan.20
Mga Sugyot alang sa Pagtuon ug Panaghisgutan
-
Unsa ang atong mga kapanguhaan sa walay kuyaw ug kalinaw sa mga panahon sa kalisdanan? Unsa ang nakapalig-on kaninyo ug nakahatag kaninyo sa kalinaw sa panahon sa mga pagsulay sa inyong kinabuhi?
-
Ngano nga ang matag usa––ang matarung ug ang dili matarung––ubos sa mga pagsulay ug mga kalisdanan?
-
Sa unsa nga mga paagi ang kalisdanan usa ka panalangin sa atong mga kinabuhi? Sa unsa nga mga paagi ang mga pagsulay makatabang kanato nga mahimong mas lig-on ug mas labaw pa ka maayo sa pagserbisyo sa Ginoo?
-
Ngano nga kinahanglan gayud ibutang nato ang atong pagsalig diha sa “gamhanan nga desinyo” sa atong Amahan sa Langit? Unsa ang gipasabut niini nga mahimong sama sa kolonon diha sa mga kamot sa Ginoo?
-
Unsa ang gipasabut sa paghulat sa mapailubon nga paagi sa Ginoo sa panahon sa pagsulay? Unsa ang nakat-unan ninyo sa inyong pagbuhat niini?
-
Sa unsa nga mga paagi nga ang Dios mihatag kanato sa kalinaw aron sa pagtabang kanato sa panahon sa kalisdanan?