Kapitulo 12

Ang Balaan nga Katuyoan sa Kaminyoon

Unsa ang atong buhaton aron sa paglig-on sa mahangturon nga mga kaminyoon ug moandam sa mga batan-on nga maminyo sa templo?

Pasiuna

Si Presidente Harold B. Lee nagtudlo sa dako nga kamahinungdanon sa pagminyo sa templo ug sa mga bana ug mga asawa nga magtambayayong sa tibuok nilang mga kinabuhi aron sa pagligon sa ilang kaminyoon:

“Ang kaminyoon mao ang usa ka panag-uban. Ang usa ka tawo nakamatngon nga diha sa asoy sa Biblia kabahin sa paglalang ang babaye wala giumol gikan sa usa ka bahin sa ulo sa lalaki, nagsugyot nga basin og siya magmando ibabaw kaniya, ni sa bahin sa mga tiil sa lalaki nga siya pagayatakan sa iyang mga tiil. Ang babaye gikuha gikan sa kilid sa lalaki aron ingon og hatagan og gibug-aton ang kamatuoran nga sa kanunay siya maanaa sa iyang kiliran isip usa ka kaabay ug kauban. Diha sa altar sa kaminyoon kamo nagsinaaray ngadto sa usag-usa sugod nianang adlawa nga maghiusa sa pagsulbad sa mga problema sa kinabuhi. Si Apostol Pablo uban sa pagtudlo kabahin sa kaminyoon mitambag: ‘Ayaw kamo pagpahiangay sa inyong kaugalingon kauban sa mga dili magtotoo diha sa mao rang usa ka yugo.’ (II Cor. 6:14.) Samtang ang iyang tambag adunay labaw nga kahimoan ilabi na sa mga butang nga may kalabutan sa panagsama og relihiyuso nga mga interes ug espirituhanong mga tinguha, apan ang hulagway nga gisugyot sa iyang pamahayag dili gayud ibaliwala. Sama sa giyugohan nga mga baka nga nagbira og mga bug-at nga karga diha sa karsada, kon adunay usa nga mag-ukon-ukon, motapol ug taspukan o manungag ug masinupakon, madaut ang karga ug mosunod ang pagkaguba. Sa sama nga mga katarungan, daghang mga kaminyoon napakyas kon ang usa o ang duha kinsa kabahin niana nga kaminyoon mapakyas sa pagtuman sa ilang mga reponsibilidad ngadto sa usag usa. …

“Apan labaw pa ka importante kay sa kamo ‘managsama nga giyugohan’ sa pisikal nga mga butang, mao nga kamo magpayugo nga managsama sa espirituhanon nga mga butang. … Siguro kini nga bisan hain nga panimalay ug pamilya nga gitukod uban sa katuyoan sa paglig-on niini gani ngadto sa kahangturan ug diin ang mga bata giabi-abi isip ‘usa ka kabilin gikan sa Ginoo’ [tanawa sa Salmo 127:3] adunay mas dako nga kahigayunan nga molungtad tungod sa ka sagrado nga nagbugkos sa panimalay ug sa pamilya.”¹

Mga Pagtulun-an ni Harold B. Lee.

Ngano nga ang mahangturon nga kaminyoon mahinungdanon alang sa atong kahimayaan?

Hunahunaon nato ang unang kaminyoon nga gipahigayon human mahan-ay ang yuta. Si Adan, ang una nga tawo, gilalang ingon man usab ang mga mananap ug mga langgam ug matag buhi nga mga butang diha sa yuta. Dayon atong makita kini nga gi-rekord: “Ug miingon ang Ginoo nga Dios, dili maayo nga ang tawo mag-inusara; pagabuhatan ko siya ug katabang nga angay kaniya.” Human ang Ginoo miumol kang Eva, iyang “gidala siya ngadto sa lalaki. Ug miingon si Adan, Kini mao karon ang bukog sa akong mga bukog, ug unod sa akong unod: siya pagatawgon nga Babaye, kay gikuha siya gikan sa Lalaki. Tungod niini ang lalaki magabiya sa iyang amahan ug sa inahan, ug moipon sa iyang asawa: ug sila mahimong usa ka unod.” (Genesis 2:18, 22–24.) … Uban sa pagkahuman niana nga kaminyoon ang Ginoo misugo kanila nga “sumanay ug dumaghan kamo, ug punon ninyo ang yuta, ug magagahum kamo niini.” (Genesis 1:28.)

Ania ang usa ka kaminyoon nga gipahigayon sa Ginoo tali sa duha ka imortal nga mga nilalang, kay hangtud nga ang sala mosulod sa kalibutan ang ilang mga lawas dili ulipon sa kamatayon. Siya mihimo kanila nga usa, dili lamang alang sa karon, ni alang sa piho nga tagal; sila pagahiusahon sa tanang mahangturon nga mga panahon. … Kanila ang kamatayon dili usa ka panagbulag; usa lamang kini ka temporaryo nga pagkabulag. Ang pagkabanhaw ngadto sa pagka-imortal nagkahulugan alang kanila nga usa ka paghiusa og balik ug usa ka mahangturon nga pagbugkos nga dili na gayud mabulag. “Kay maingon nga diha kang Adan ang tanan nangamatay, maingon man usab diha kang Kristo ang tanan mangabuhi.” (1 Mga Taga-Corinto 15:22.)

Kon mabinantayon kamo nga nagsunod sa pagpasabut niining unang kaminyoon, kamo andam sa pagsabut sa pagpadayag nga gihatag sa Simbahan sa atong henerasyon kabahin niini nga mga pulong:

“Kon ang tawo mangasawa pinaagi sa akong pulong, nga mao ang akong balaod, ug pinaagi sa bag-o ug walay katapusan nga pakigsaad, ug gibugkos ngadto kanila pinaagi sa Balaan nga Espiritu sa saad, pinaagi kaniya kinsa nadihogan, ngadto kang kinsa Ako mitudlo niini nga gahum ug mga yawe niini nga pagkapari…, kini pagahimoon ngadto kanila sa tanan nga mga butang bisan unsa ang ibutang sa akong sulugoon diha kanila, karon ug hangtud sa tibuok nga kahangturan; ug maanaa sa tumang kalig-on sa panahon nga sila wala na sa kalibutan; ug sila moagi sa mga anghel, ug sa mga dios, diin gipahimutang didto, diha sa ilang pagkahimaya ug himaya sa tanan nga mga butang, ingon nga nabugkos diha sa ilang mga ulo.” (Doktrina ug mga Pakigsaad 132:19.) …

Ang kaminyoon alang sa karon ug alang sa kahangturan mao ang higpit nga pultahan ug ang pig-ot nga agianan (gipamulong diha sa mga kasulatan) “nga padulong ngadto sa kahimayaan ug sa pagpadayon sa kinabuhi, ug pipila diha ang nakakita niini,” apan “dako ang pultahan, ug lapad ang dalan nga padulong ngadto sa mga kamatayon; ug daghan ang misulod niini.” (Doktrina ug mga Pakigsaad 132:22, 25.) Kon si Satanas ug ang iyang mga panon makadani kaninyo sa pag-agi sa lapad nga dalan sa kalibutanon nga kaminyoon nga modangat ngadto sa kamatayon, siya makabuntog kaninyo sa inyong kahigayunan alang sa labing taas nga ang-ang sa mahangturon nga kalipay pinaagi sa kaminyoon ug paglambo sa tibuok nga kahangturan. Kinahanglan nga kini karon mahimong tataw nganha sa inyong pangatarungan kon ngano nga ang Ginoo mipahayag nga aron makabaton sa labing taas nga ang-ang sa Celestial nga himaya, ang tawo kinahanglan nga mosulod ngadto sa bag-o ug walay katapusan nga pakigsaad sa kaminyoon. Kon siya dili, siya dili makabaton niini. (Doktrina ug mga Pakigsaad 131:1–3.)²

Kadtong kinsa mohimo sa ilang mga kaugalingon nga takus ug mosulod ngadto sa bag-o ug walay katapusan nga pakigsaad sa kaminyoon didto sa templo alang sa karon ug sa tanang kahangturan mopahimutang sa unang tukurang bato alang sa mahangturong panimalay sa pamilya didto sa celestial nga gingharian nga molungtad sa kahangturan. Ang ilang ganti mao ang pagbaton sa “himaya nga idugang diha sa ilang mga ulo hangtud sa kahangturan” (tan-awa sa Abraham 3:26).³

Unsa ang mahimo sa mga bana ug mga asawa aron sa paglig-on sa ilang kaminyoon sa templo sa tibuok nilang mga kinabuhi?

Kon [ang mga batan-on] mohukom sugod sa panahon sa ilang kaminyoon, nga sukad niana hangtud sa katapusan sila mohukom sa pagbuhat sa tanan diha sa ilang gahum sa pagpahimuot sa usag usa sa mga butang nga matarung, bisan ngadto sa pagsakripisyo sa ilang kaugalingong mga kalipay, ilang kaugalingong mga kahinam, ilang kaugalingong mga tinguha, ang problema sa pagpahiangay sa kinabuhi nga minyo moatiman sa iyang kaugalingon mismo, ug ang ilang panimalay sa pagkatinuod mahimong malipayon nga panimalay. Ang dakong gugma gitukod diha sa dakong sakripisyo, ug kana nga panimalay diin ang baruganan sa sakripisyo alang sa kaayohan sa matag usa gipahayag kada adlaw mao kana ang panimalay diin nagpuyo diha ang dako nga gugma.⁴

Aduna pay naghulat sa umaabut nga mas dakong mga kalipay ug, oo, mas dako nga kabalaka kay sa inyong nahibaloan sukad, kay hinumdumi nga ang dakong gugma gitukod diha sa dakong sakripisyo ug nga ang kada adlaw nga determinasyon sa usag usa sa pagpahimuot sa mga butang nga matarung motukod og lig-on nga pundasyon alang sa malipayon nga panimalay. Kana nga determinasyon alang sa kaayohan sa usag usa kinahanglan gayud nga magbinaslanay ug dili mamintaha o maghinakog. Ang bana ug asawa kinahanglan gayud nga mobati og sama nga mga responsibilidad ug mga obligasyon sa pagtudlo sa usag usa. Duha sa mga butang nga karon naghampak sa kasiguroan sa moderno nga mga panimalay mao nga ang batan-on nga mga bana wala gayud mobati sa ilang hingpit nga obligasyon sa pagsuporta sa pamilya, ug ang batan-on nga mga asawa naglikay sa responsibilidad nga mopahiluna sa seryoso nga buluhaton sa pag-amuma og usa ka pamilya ug sa paghimo og usa ka panimalay.⁵

Ang kaminyoon puno sa labing taas nga panalangin apan gisangunan sa labing bug-at nga mga responsibilidad nga ikatugyan diha sa lalaki ug babaye dinhi sa mortalidad. Ang balaanong kalit nga kadasig sulod sa matag lalaki ug babaye nga nag-awhag sa panag-uban sa kaatbang nga sekso gituyo sa atong Tiglalang isip usa ka sagradong kalit nga kadasig alang sa usa ka sagrado nga katuyoan––dili magtagbaw isip usa lamang ka tawhanon nga kahinam o isip usa ka kahigal sa unod pinaagi sa walay pagpili nga mga panag-uban, apan kinahanglan nga itagana isip usa ka pagpahayag sa tinuod nga gugma sulod sa sagrado nga kaminyoon.⁶

Gisulti ko na kini sa daghang mga higayon ngadto sa batan-ong mga managtiayon diha sa altar sa kaminyoon: Ayaw gayud tuguti ang linghod nga mga pagkasuod diha sa inyong minyo nga kinabuhi dili mapugngan. Himoa ang inyong mga hunahuna nga ingon ka sanag sa sidlak sa adlaw. Himoa ang inyong mga pulong nga maayo ug ang inyong panag-uban makadasig ug makabayaw, kon kamo buot nga buhi kanunay ang espiritu sa gugma sa tibuok ninyong panag-uban sa kaminyoon.⁷

Usahay, samtang magbiyahe kami sa tibuok Simbahan, usa ka bana ug asawa moduol kanamo ug mangutana kon, tungod kay dili sila magkasinabut sa ilang kaminyoon—sila nga naminyo sa templo–– dili ba mas maayo nga sila magbulag sa usag usa ug dayon mangita og mas angay nga mga ikauban. Ngadto sa tanan nga nga ingon niini kami mosulti, bisan kanus-a nga ang usa ka managtiayon kinsa naminyo sa templo moingon nga gikapuyan na sila sa usag usa, kini usa ka ebedinsya nga bisan kinsa sa duha dili matinuoron sa ilang mga pakigsaad sa templo. Bisan kinsa nga managtiayon nga naminyo sa templo kinsa matinuoron sa ilang mga pakigsaad motubo nga mas nagminahalay sa usag usa, ug ang gugma makakaplag og usa ka mas lawom nga kahulugan sa ilang singkwenta anyos nga anibersaryo kay sa adlaw nga sila naminyo didto sa balay sa Ginoo. Ayaw gayud ninyo pagsaypa kana.⁸

Kadtong kinsa moadto sa altar sa kaminyoon uban sa gugma diha sa ilang mga kasingkasing, makasulti kami ngadto kanila sa tinuod, kon sila magmatinuuron sa ilang mga pakigsaad nga ilang gihimo didto sa templo, singkwenta ka tuig human sa ilang kaminyoon makaingon sila ngadto sa usag usa: “Wala gayud tingali kita makahibalo kon unsa ang tinuod nga gugma sa diha nga kita naminyo, tungod kay kita mas naghunahuna og maayo sa usag usa karon!” Ug busa kini matuman kon sila mosunod sa tambag sa ilang mga lider ug motuman sa balaan, sagrado nga mga panudlo nga gihatag sa tulumanon sa templo; motubo sila nga labaw pa ka hingpit nga maghinigugmaay gani ngadto sa kahingpitan sa gugma diha sa atubangan sa Ginoo sa Iyang Kaugalingon.⁹

Mga kasaypanan ug mga kapakyasan ug ang kataphaw sa usa lamang ka pisikal nga mga pagkadani ingon ka walay hinungdan kon itandi sa ka dalisay sa maayo nga kinaiya nga molungtad ug motubo nga labaw pa kanindot uban sa katuigan. Kamo, usab, mahimo nga magpuyo diha sa lumay sa inyong malipayon nga mga panimalay human ang kabatan-on nahanaw kon kamo lamang maningkamot sa pagpangita sa lunsay nga kalidad sa diyamante diha sa usag usa nga nagkinahanglan lamang nga hashasan sa kalampusan ug kapakyasan, kalisud ug kalipay aron sa pagdala og kasinaw ug kasidlak nga mosanag nga siga bisan sa labing mangitngit nga kagabhion.¹⁰

Unsa nga tambag ang ihatag ngadto niadtong kinsa wala karon makabaton og mahangturon nga kaminyoon?

Pipila kaninyo karon walay kauban sa inyong panimalay. Pipila kaninyo nawad-an sa inyong asawa o bana o kamo tingali wala pa makakita og usa ka kauban. Sa inyong grupo mao ang pipila sa labing halangdon nga mga miyembro sa Simbahan—matinudanon, maisugon, naningkamot sa pagsunod sa mga kasugoan sa Ginoo, sa pagtabang sa pagtukod sa gingharian dinhi sa yuta, ug sa pagserbisyo sa inyong isig katawo.

Daghan kaayo ang gitagana sa kinabuhi alang kaninyo. Pagmalig-on sa pagsagubang sa inyong mga hagit. Adunay daghang mga paagi sa pagkakaplag og katumanan, sa pag-alagad niadtong inyong gimahal, sa pagbuhat og maayo sa mga buluhaton nga inyong giatubang sa inyong pagpanarbaho o sa inyong panimalay. Ang Simbahan nagtanyag og daghan kaayo nga kahigayunan alang kaninyo aron sa pagtabang sa mga kalag, sugod sa inyong kaugalingon, aron makakaplag sa hingpit nga kalipay sa kinabuhing dayon.

Ayaw tuguti ang kalooy sa kaugalingon o kawalay paglaum nga mokamay kaninyo gikan sa dalan nga nasayud kamo nga husto. Balhina ang inyong mga hunahuna ngadto sa pagtabang sa uban. Nganha kaninyo ang mga pulong sa Magtutudlo adunay linain nga kahulugan: “Ang makakaplag sa iyang kinabuhi kawagtangan hinoon niini: apan ang magawagtang sa iyang kinabuhi tungod kanako, makakaplag ra niini.” (Mateo 10:39.)¹¹

Ang Ginoo mohukom kanato dili lamang pinaagi sa atong mga binuhatan apan pinaagi sa tinguha sa atong mga kasingkasing. … Sa ingon, ang [mga babaye] kinsa gihikawan sa mga panalangin sa pagka-asawa o pagka-inahan niini nga kinabuhi––kinsa nagsulti diha sa ilang kasingkasing, kon nakahimo pa unta ako, ako unta nga himoon, o ako mohatag kon ako aduna, apan dili ako makahimo tungod kay wala ako––ang Ginoo mopanalangin kaninyo nga daw inyong nahimo, ug ang kalibutan nga moabut moganti alang niadtong kinsa nagtinguha diha sa ilang mga kasingkasing og matarung nga mga panalangin nga wala nila mahimo sa pagangkon tungod sa sayop nga dili ilang kaugalingon.¹²

Kamong mga asawa kinsa naghandum nga mahimong aktibo sa Simbahan ang inyong mga bana, nangandoy nga ania sila karon kay sa kaligutgot nga anaa sa ilang mga kasingkasing, naghunahuna kon unsay buhaton nga usa ka adlaw … inyong ikauban sila uban kaninyo diha sa templo sa atong Dios. Ug kamo mga bana kinsa nangandoy nga ikauban ninyo ang inyong mga asawa. Nagsulti kami kaninyo nga kon kamo magmatinud-anon sa inyong pagsalig, mahigugma kamo sa inyong mga bana ug mahigugma sa inyong mga asawa, ug motanyag kamo og makanunayon nga pagampo magabii ug mabuntag, adlaw ug gabii, adunay moabut nga usa ka gahum nganha kaninyo mga miyembro sa Simbahan pinaagi sa gahum sa Espiritu Santo, nga kamo kinsa nabunyagan ug mga matinud-anon adunay katungod sa pagpahimulos. Kana nga gahum nga migamot og maayo mahimo nga modala nganha kaninyo og abilidad nga mosanta sa pagbatok sa inyong mga kauban ug mogiya kanila labaw pa ka duol ngadto sa hugot nga pagtuo.¹³

Ang pipila kaninyo mohukom sa pagminyo gawas sa Simbahan uban sa gitago nga paglaum sa pagkabig sa inyong kauban nganha sa inyong relihiyuso nga mga panghunahuna. Ang inyong mga kahigayunan alang sa kalipay diha sa inyong minyo nga kinabuhi mas labaw pa kadako kon inyong himoon kana nga pagkabig sa dili pa magminyo.¹⁴

Unsay atong mabuhat aron sa pagtabang sa mga batan-on nga makasabut sa mga panalangin sa pagminyo sa templo ug mangandam alang niini?

Ang pagka-epektibo sa mga panimalay sa Santos sa Ulahing mga Adlaw anaa, sa tinuod, diha sa paagi sa kaminyoon nga gikontrata alang niana nga panimalay. Ang usa ka kaminyoon nga alang lamang sa dinhi ug sa karon mahimong, sa dayag, magpakabana una sa tanan niini nga kalibutan. Ang kaminyoon alang sa kahangturan sa kinatibuk-an adunay lahi nga panan-aw ug sukaranan …

… Sa tinuod, kita makaamgo nga ang pag-adto lamang sa templo nga walay tukma nga pagpangandam sa bisan unsa nga paagi dili magdala sa mga panalangin nga atong gitinguha. Ang mahangturon nga kaminyoon nag-agad diha sa kahingkod ug pasalig nga––uban sa endowment ug mga ordinansa––makaabli sa mga ganghaan sa langit alang sa daghang mga panalangin nga modagayday ngari kanato.

… Ang kaminyoon sa templo mas labaw pa kay sa usa lamang ka dapit diin ang tulumanon mahitabo; kini usa ka tibuok nga pagpasinati ngadto sa kinabuhi ug sa kaminyoon ug sa panimalay. Usa kini ka sangkoanan sa pagtukod og mga kinaiya ngadto sa Simbahan, sa kaputli, ug sa atong personal nga pakigdait sa Dios––ug ubang daghan nga mga butang. Busa, ang pagsangyaw lamang mahitungod sa kaminyoon sa templo dili pa igo. Ang atong mga family home evening, mga seminary, mga institute ug mga auxiliary kinahanglan gayud nga tukuron niini nga tumong––dili lamang pinaagi sa pag-awhag––apan pinaagi sa pagpakita nga ang mga pagtuo ug mga kinaiya nga nalakip sa kaminyoon sa templo mao kadtong makahimo sa pagdala sa matang sa kinabuhi dinhi ug didto sa kahangturan nga kadaghanan sa mga katawhan gusto gayud alang sa ilang mga kaugalingon. Sa husto nga pagkabuhat, atong mapakita ang kalainan tali sa “balaan ug sa nahugawan” [tanawa sa Ezequiel 44:23] nga aron ang gamhanang kinaiyahan nga mga sugyot sa pagkainahan mahimo nga lig-on diha sa batan-ong babaye kinsa nagduha-duha tali niadtong sagradong mga sugyot ug sa dalan sa pagtinguha og katagbawan. Uban sa tinuod nga paghukom ug sa gihiusa nga pamaagi sa pagtudlo, atong mapakita sa batan-on nga lalaki nga ang paagi sa kalibutan––bisan pa giunsa kini paghimo nga madanihon ug sa walay pagsapayan unsa ka abtik magpakita ang mga Palikero niini––mao ang dalan sa kasubanan; mao kini ang paagi nga sa katapusan mopakyas niadtong lawom sulod sa kaugalingon nga mga pangandoy nga iyang gibatunan alang sa abohan ug panimalay ug sa hingpit nga mga kalipay sa pagka-amahan.¹⁵

Samtang ang tanang mga problema sa kinabuhi dili masulbad pinaagi sa kaminyoon sa templo, apan, sa tinuod, alang sa tanan kinsa mosulod sa takus nga paagi, mahimo kini nga dangpanan sa kaluwasan ug angkla niana nga kalag kon ang mga unos sa kinabuhi mohasmag sa hilabihan ka pintas.

Akoa ang kabuhong sa kasinatian, sulod sa hapit baynte ka tuig, nga giabi-abi sa matag katapusan sa semana sa pipila sa labing malampuson nga mga panimalay sa Simbahan, ug, sa kalahi, hapit kada semana gitugutan usab ako sa pagdaklit og tan-aw ngadto sa pipila ka dili malipayon nga mga panimalay. Gikan niini nga mga kasinatian miabut sa akong kaugalingon nga hunahuna ang pipila ka piho nga mga paghukom: Una, ang atong labing malipayon nga mga panimalay mao ang panimalay diin ang mga ginikanan naminyo sa templo. Ikaduha, ang usa ka kaminyoon sa templo labing malampuson kon ang bana ug asawa misulod ngadto sa sagrado nga mga ordinansa sa templo nga limpyo ug putli sa lawas, hunahuna, ug sa kasingkasing. Ikatulo, ang kaminyoon sa templo labing sagrado kon ang matag usa diha sa pakig-uban maalamon nga nakakat-on diha sa katuyoan sa balaan nga pagtuga ug sa mga obligasyon human niana sa bana ug asawa agi og pagtuman sa mga panudlo nga nadawat diha sa templo. Ikaupat, ang mga ginikanan kinsa sa ilang mga kaugalingon wala kaayo magtagad sa ilang mga pakigsaad sa templo, makapaabut og mas gamay nga kaayo gikan sa ilang mga anak tungod sa ilang dautan nga ehemplo.

Niining panahona, ang mga urog, ang panglimbong, mga pagpakaaron ingnon, ug ang pagkamadanihon sa kalibutan hilabihan nga nakatuis sa balaanon nga mga hunahuna kalabut sa panimalay ug kaminyoon, ug gani ang seremonyas sa kaminyoon mismo. Bulahan ang maalamon nga inahan kinsa nagpintal og usa ka buhi nga litrato ngadto sa iyang anak nga babaye og usa ka sagrado nga talan-awon sa usa ka matahum, langitnon nga lawak sa pagbugkos diin, gitak-upan gikan sa tanan nga kalibutanon, ug diha sa atubangan sa mga ginikanan ug suod nga mga higala sa pamilya, usa ka matahum nga batan-on nga pangasaw-unon ug pamanhunon naggunitanay sa mga kamot atubang sa balaan nga altar. Salamat sa Dios alang niana nga inahan kinsa nagpakita sa iyang anak nga babaye nga dinhi, ang labing duol sa langit dinhi sa yuta, ang kasingkasing nakigsulti ngadto sa laing kasingkasing, diha sa pagbinayloay og gugma nga gisugdan og pagkahiusa nga misalikway sa kabangis sa kalisud, sa mga kagul-anan, o sa mga kahigawad aron sa pagguba, ug mosangkap sa labing mahinungdanon nga pag-awhag alang sa labing taas nga mga kalampusan sa kinabuhi!¹⁶

Ang Dios mitugot nga ang mga panimalay sa mga Santos sa Ulahing mga Adlaw mapanalanginan ug adunay moabut ngadto kanila nga kalipay dinhi ug sukaranan alang sa kahimayaan diha sa celestial nga gingharian sa kalibutan nga umaabut.¹⁷

Mga Sugyot alang sa Pagtuon ug Panaghisgutan

Unsa ang buhaton sa minyo nga mga managtiayon aron sa paghupot sa ilang mga pakigsaad sa mahangturon nga kaminyoon nga usa ka nag-una nga buluhaton diha sa ilang matag adlaw nga mga kinabuhi? Sa unsa nga paagi ang pagkaminyo alang sa kahangturan maka-apekto sa paagi sa pagtagad sa mga kapikas sa usag usa ug sa ilang mga anak?
Sa unsa nga paagi kita motudlo sa ka-importante sa mahangturon nga kaminyoon ngadto sa atong mga anak?
Ngano nga ang “dako nga paghigugma … gitukod diha sa dako nga pagsakripisyo”? Sa unsa nga paagi ang pagkadili hakog molig-on sa usa ka kaminyoon?
Unsa ang mabuhat niadto kansang mga kauban dili aktibo sa Simbahan aron malig-on ang ilang mga kaminyoon? Sa unsa nga paagi kadtong kinsa wala pa karon maminyo mopuno sa ilang mga kinabuhi uban sa mga pagpakita og diosnon nga gugma ug sakripisyo?
Unsay ipasabut niini diha kaninyo sa paghimo nga “sama nga giyugohan” diha sa kaminyoon?
Sa unsa nga paagi ang manag-uban sa kaminyoon “motubo nga mas labaw kahingpit nga nahigugma gani ngadto sa kahingpitan sa gugma diha sa atubangan sa Ginoo”?

Si President Harold B. Lee nagtudlo nga “ang dakong gugma gitukod diha sa dakong sakripisyo, ug kana nga panimalay diin ang baruganan sa sakripisyo alang sa kaayohan gipahayag sa matag adlaw mao kana ang panimalay diin diha nagpuyo ang usa ka dakong gugma.”