Kapitulo 17

Pagpakigbahin sa Ebanghelyo

Sa unsa nga paagi kita makatuman sa atong hinatag sa Dios nga responsibilidad sa pagpakigbahin sa ebanghelyo ngadto sa uban?

Pasiuna

Usahay si Elder Gordon B. Hinckley, sa Korum sa Napulog Duha, ug ang iyang asawa nga si Marjorie, mobiyahe uban ni Presidente ug Sister Harold B. Lee. “Nanglakaw kami sa duha ka managlain nga mga okasyon uban ni Presidente ug Sister Lee ngadto sa Inglatera, Alemanya, Austria, Italya, Greece, ug sa Balaan nga Yuta, diin among gikahimamat ang mga misyonaryo, mga miyembro, mga kabatan-onan, ug mga sundalo,” miingon si Sister Hinckley. “Wala pa gayud sukad bisan kinsa nga adunay mas maabi-abihon, mas matinahuron, mas mabination nga kauban sa pagbiyahe.”

“Didto kami sa Inglatera usa ka Dominggo niana. Walay pahulay kadtong adlawa: Duha ka mga sesyon sa komperensya ug usa ka fireside sa pagka-gabii. Sa diha nga mibalik kami sa hotel sa mga 9:30, hilabihan namo kakapoy ug kagutom. Miadto kami sa kan-anan sa hotel aron mokuha sa gamay nga makaon. Nahuman na ang buluhaton sa adlaw––makapahulay na kami. Maingon nato, mao kana ang akong gihunahuna. Ang sunod nga butang nga akong nahibaw-an, ang serbidora nag-andam sa iyang lapis aron isulat ang among order. Si Presidente Lee mihangad kaniya ug miingon, ‘Unsa nga simbahan ikaw nasakop?’ Ang adlaw wala pa mahuman alang kaniya. Misugod siya sa buhat sa pagpangita og katudloan. Sa wala pa mahuman ang panihapon nahibaw-an na niya ang tanan mahitungod niini nga batan-ong babaye. Siya wala nay bana ug nag-inusara ug nahadlok. Misaad siya sa pagpakigkita sa mga misyonaryo ug pagkat-on pa og dugang. Maanindot nga butang tan-awon nga ang presidente sa Simbahan nagbansay unsay iyang gisangyaw nianang tibuok adlaw. Sa diha nga ang serbidora (usa ka babaye nga tingali nag-edad ug traynta y singko) nasayud nga ang tawo nga iyang gikasulti mao ang presidente, ang propeta, manalagna, ug tigpadayag sa Simbahan ni Jesukristo, dili siya makatuo nga ang ingon nga tawo mopaubos sa iyang kaugalingon aron makigsulti sa usa ka tawo nga sama kaniya. Natandog siya sa hilabihan.”¹

Sa paghisgot og pakigbahin sa ebanghelyo, si Presidente Lee miingon, “Unta [kita] makaamgo nga kini usa ka responsibilidad nga gihatag sa Ginoo ngadto sa iyang Simbahan sa matag despensasyon, … sa pagtudlo sa ebanghelyo sa tanang nilalang aron ang matag usa walay ikabalibad sa adlaw sa paghukom, ug nga ang tanan unta matubos gikan sa Pagkapukan ug madala pagbalik sa atubangan sa Ginoo.”²

Mga Pagtulun-an ni Harold B. Lee

Ngano nga importante alang kanato ang pagpakigbahin sa ebanghelyo ngadto sa uban?

Atong gihuptan ang atong mga pagpamatuod pinaagi sa pagsunod, pag-ampo ug sa pag-aktibo diha sa Simbahan ug sa paghupot sa mga sugo sa Dios. Diha niining tungora nga ang naggiya nga Espiritu mag-uban kanato, kini usa sa labing bililhon nga mga kabtangan nga maangkon sa usa ka miyembro sa Simbahan.

Uban niini nga pagpamatuod, kini responsibilidad natong tanan nga magpakabana sa atong obligasyon sa pagsaksi sa balaang misyon sa Ginoo bisan asa man kita adunay kahigayunan. Kon gamiton nato ang atong mga kaugalingon adunay daghang mga kahigayunan sa pagtudlo sa ebanghelyo, sa kada adlaw ug sa kada oras, bisag asa pa kita mahimutang. Kon nagsunod kita niini, kon nakaandam kita niini ug kon nagtinguha kita niini, ang naggiya nga Espiritu mohatag kanato sa abilidad sa pagtudlo. Hinumdumi, ang mga pulong mga pulong lamang, sa pagtudlo sa ebanghelyo, gawas kon giubanan kini sa Espiritu sa Ginoo. …

Ang atong responsibilidad mao ang pagdala ngadto sa kalibutan sa mensahe sa kamatuoran, sa pagpakita sa kalibutan nga diha sa mga pagtulun-an sa ebanghelyo ni Jesukristo makit-an ang mga solusyon sa matag problema nga naghasol sa katawhan.³

Kinahanglan nga dawaton nato ang matag kahigayunan sa pagdala sa kasayuran sa ebanghelyo ngadto sa uban––ngadto sa atong dili aktibo nga mga kauban nga miyembro sa Simbahan, ngadto sa dili miyembro nga mga higala sa kolehiyo, sa nagserbisyo sa militar, ug sa nagnegosyo, sa atong mga silingan ug mga higala.

Ang Ginoo mihatag niini nga pagpadayag ngadto sa Propeta: “Kay aduna pay daghan sa ibabaw sa yuta diha sa tanan nga mga tinuohan, mga pundok, ug mga pundok sa relihiyon, kinsa nabutaan pinaagi sa maliputon nga paglingla sa mga tawo, diin sila naghulat aron sa pagpangilad, ug kinsa natago gikan sa kamatuoran tungod kay sila wala masayud asa kini pangitaa.” (D&P 123:12.)⁴

Wala nay laing labaw nga gipaabut nga tingog ngadto sa matinuoron nga kasingkasing kay sa tingog sa tinuod nga mensahero nga nagsangyaw sa ebanghelyo ni Jesukristo.⁵

Inyong mahinumduman si [Elder Charles A. Callis] nga nagsulti kanato mahitungod sa usa ka higayon nga miadto sa Montana aron sa pagbisita sa usa ka tawo kinsa nagmisyon didto sa Ireland. Human sa pagpangita nianang tawhana, kinsa karon usa na ka tigulang kaayo nga tawo, mipaila siya sa iyang kaugalingon ug miingon, “Ikaw ba ang misyonaryo nga nagmisyon sa Ireland pipila na ka tuig ang milabay?” Ug ang tawo miingon oo. “Kon mao,” siya miingon, “ikaw ba kadtong tawo kinsa sa dihang mihatag sa panamilit nga pakigpulong didto sa natad sa misyon mipahayag nga ikaw naghunahuna nga ikaw napakyas sulod sa tulo ka tuig nimo didto tungod kay nakabunyag lamang ikaw usa ka gamay nga bulingit nga Irish nga bata? Ikaw ba nagsulti niana?” “Oo, nahinumdom ako nga nagsulti ako niana.” Si Brother Callis miingon, “Sa tinuod, ako gusto nga mopaila sa akong kaugalingon. Ako si Charles A. Callis sa Konseho sa Napulog Duha ka mga Apostoles sa Simbahan ni Jesukristo sa mga Santos sa Ulahing mga Adlaw. Ako kadtong bulingit nga gamay’ng Irish nga bata nga imong gibunyagan samtang ikaw usa ka misyonaryo didto sa Ireland.” Usa ka kalag kinsa nahimong apostol sa Simbahan ug Gingharian sa Dios.⁶

Walay tawo sukad nga nakapagawas sa iyang kamot aron sa pagtabang sa uban nga dili makaangkon alang sa iyang kaugalingon nga katungod sa usa ka balos nga kaluwasan tungod sa iyang pagka-mauyunon sa pagtabang sa uban. Karon, itanom sa inyong hunahuna nga kitang tanan mga anak sa Amahan, ma miyembro man karon sa Simbahan o dili. Kini mahitungod sa uban nga mga anak sa atong Amahan kinsa kinahanglan gayud kita mabalaka og maayo. Sama ra usab sila ka mahal ngadto Kaniya sama niadtong kinsa mga miyembro karon sa Simbahan. Kon bisan kinsa kanato ang mopahigayon sa iyang kaugalingon sa buhat sa pagdala sa uban ngadto sa panon, ang Ginoo nagingon nga nagdala siya sa kaluwasan diha sa iyang kaugalingong kalag [tan-awa sa D&P 4:4].⁷

Ngano nga ang pagkamauyunon sa pagsakripisyo usa ka importanting bahin sa pagpakigbahin sa ebanghelyo?

Ang kinauyokan niana nga gitawag nato og Kristyanismo makita diha sa talaan sa nagsulat sa ebanghelyo ni Juan diin gikutlo niya ang pagpamatuod sa Magtutudlo sa iyang kaugalingong balaan nga misyon isip ang Manluluwas sa kalibutan. Kini mao ang iyang mga pulong:

“Kay gihigugma gayud sa Dios ang kalibutan, nga tungod niana gihatag niya ang iyang bugtong Anak, aron ang tanan nga mosalig kaniya dili malaglag kon dili may kinabuhing dayon.” (Juan 3:16.)

Sa ingon napahayag ang labing dako nga serbisyo nga atong mahimo niining mortal nga kinabuhi, ang pagkamauyunon nga mosakripisyo sa atong kaugalingon alang sa kaayohan sa uban. Ang dapit sa sakripisyo ug serbisyo niining makabayaw nga padagan sa kinabuhi gipasabut ni Propeta Joseph Smith:

“Ang usa ka relihiyon nga wala magkinahanglan og sakripisyo sa tanang mga butang wala gayuy gahum igo sa pagdala sa hugot nga pagtuo nga gikinahanglan ngadto sa kinabuhi ug sa kaluwasan. …

“Pinaagi niini nga sakripisyo, ug kini lamang, nga ang Dios miorden nga ang mga tawo kinahanglan nga makapahimulos sa kinabuhing dayon.” [Lectures on Faith (1985), 69.]

Kon magamit nato sa atong mga kaugalingon ug sa atong kaugalingong mga kinabuhi kana nga baruganan diin kita unta makahupot nianang bililhon nga gasa, kita sa pagkatinuod mahimong maalamon. Si Hari Benjamin mao kadtong mitudlo sa iyang katawhan diha sa iyang panapos nga pakigpulong:

“… kon kamo anaa sa pag-alagad sa inyong mga isigkatawo kamo anaa lamang sa pag-alagad sa inyong Dios.” (Mosiah 2:17.) …

Busa, ang paghatag, maoy usa ka pagpakita sa gugma sa usa ka tawo, ug kon ang usa ka tawo tinuod nga mohatag sa iyang kaugalingon, kini usa ka panghimatuod sa usa ka maunungon nga gugma diha niana nga indibidwal kinsa sa ingon andam nga mohatag. …

Si Propeta Joseph Smith nahigugma kaayo sa kamatuoran nga gipadayag ngadto kaniya nga siya uyon nga mosakripisyo sa tanang butang nga iyang naangkon dinhi sa kalibutan, sa walay pagpugong sa iyang kinabuhi, tanan niana nga katuyoan nga unta siya makahatag niana nga pagpamatuod ug nga madungog unta kini sa mga nasud sa yuta. …

Mibisita ako sa usa ka stake pipila ka bulan na ang milabay ug gihangyo sa pag-interbyu og pipila ka batan-ong mga lalaki isip umaabut nga mga misyonaryo. Gisultihan ako sa stake president nga usa sa mga batan-ong lalaki, human sa dugay nga pagpaospital, naulian gikan sa usa ka grabe nga shock sa buto-buto sa pusil nga iyang nadawat samtang nagserbisyo sa militar. Samtang ako nag-atubang niini nga batan-on nga lalaki alang sa interbyu, siya akong gipangutana, “Ngano nga gusto ka nga moadto sa misyon?”

Naglingkod siya nga mahunahunaon sulod sa pipila ka gutlo, ug dayon siya mitubag, “Sa diha nga misulod ako sa military, kadto ang unang higayon nga ako nalayo sukad gikan sa akong panimalay. Akong nakaplagan nga lahi ang mga kahimtang. Akong nakita ang pagtintal sa matag palibut ug ang pagdapit sa pagpakasala. Nagkinahanglan ako sa kalig-on aron makalikay gikan sa sala, ug miduol ako sa atubangan sa akong Langitnong Amahan ug nagampo ngadto kaniya sa hugot nga pagtuo aron hatagan ako nianang kalig-on sa pagbatok sa dautan. Ang Dios midungog sa akong pag-ampo ug mihatag kanako niana nga kalig-on. Human ang tagal sa pagbansay matapos ug nagkaduol kami sa natad sa panggubatan, among nadungog ang buto-buto sa mga pusil nga nagsulti nang daan sa mensahe sa kamatayon nga nagsingabut sa kanunay. Nahadlok ako ug nagkurog ang tibuok kong lawas. Nagampo ako sa Dios alang sa kaisug, ug gihatagan niya ako sa kaisug, ug dihay miabut kanako nga kalinaw nga wala gayud nako mapahimusli kaniadto. … Nabutang ako sa katungdanan isip usa ka mag-una nga tigpaniid diin nagpasabut nga mag-una ako sa mga pundok sa makigubat nga pwersa ug usahay hapit malibuti sa kaaway. Nasayud ako nga may usa lamang ka gahum dinhi sa yuta nga makaluwas kanako, ug nag-ampo ako niana nga gahum sa pagpanalipod kanako, sa pagluwas sa akong kinabuhi, ug ang Dios midungog sa akong pag-ampo ug gibalik ako sa akong mga kauban [company].”

Dayon miingon siya ngari kanako: “Brother Lee, anaa kanako kadtong tanan nga mga butang nga pagapasalamatan. Gamay ra kini nga akong mabuhat sa pag-adto karon isip sinugo ni Jesukristo, aron sa pagtudlo sa katawhan niining sagradong mga butang nga akong nadawat isip usa ka bata sa akong panimalay.”

Samtang akong nadungog ang mao nga pagpahayag sa hugot nga pagtuo gikan sa usa ka batan-on nga tawo, akong gitandi kini uban niadtong ako nang nadungog nga miingon nga naghunahuna sila nga pinaagi sa pag-adto sa natad sa misyon makabaton sila sa pagbansay, makakita sila sa kalibutan, makabaton sila sa bililhon nga kasinatian nga makaayo kanila. …

Ang hinakog nga paghakgom alang sa personal nga pagpahimulos wala maggikan sa mga pagtulun-an sa kamatuoran apan moabut hinoon gikan sa mga pagtulun-an kaniya kinsa usa ka kaaway sa kamatuoran. …

Kana nga tawo kinsa ambisyuso alang sa personal nga kaayohan ug personal nga pagpahimulos dili gayud usa ka malipayon nga tawo, tungod kay kana nga iyang gitinguha sa kinabuhi kanunay nga molikay kaniya ug kanunay nga mobiay-biay sa iyang mga pagsulay sa pag-angkon ug pagdaug. Kana nga tawo kinsa nagserbisyo sa walay paghinakog mao ang tawo nga malipayon.⁸

Kita nakasaksi diha sa atong misyonaryo nga buhat sa labing maanindot nga talan-awon sa mga batan-ong mga lalaki ug batanong mga babaye nga [nanglakaw] … ngadto sa tanang mga katawhan sa yuta, nga pinaagi sa ilang walay paghinakog nga mga serbisyo sila nagbarug isip mga saksi sa tanang mga panahon ug sa tanang mga dapit sa balaan nga responsibilidad diha sa Simbahan sa pagtudlo sa ebanghelyo.⁹

Sa unsa nga paagi kita makatudlo sa ebanghelyo uban sa gahum ug awtoridad?

Si Alma … ug ang anak nga mga lalaki ni Mosiah milakaw aron magmisyon ug mipahigayon sila sa usa ka mahinungdanon nga misyonaryo nga serbisyo. … Nakita ni Alma ang iyang mga kaigsoonan, ang anak nga mga lalaki ni Mosiah, nga nagbiyahe paingon sa yuta sa Zarahemla.

“Karon kini nga anak nga mga lalaki ni Mosiah kauban ni Alma sa panahon nga ang anghel mipakita sa unang higayon ngadto kaniya; busa si Alma nalipay sa hilabihan sa pagkakita sa iyang mga kaigsoonan; ug unsa ang labaw nga nakadugang sa iyang hingpit nga kalipay, sila nagpabilin sa gihapon nga iyang mga kaigsoonan diha sa Ginoo; oo, ug sila nag-anam og kalig-on diha sa kasayuran sa kamatuoran; kay sila mga tawo nga mabuot sa salabutan ug sila misiksik sa mga kasulatan sa kakugi nga sila unta masayud sa pulong sa Dios.

“Apan kini dili ang tanan; sila naghatag sa ilang kaugalingon ngadto sa tuman nga pag-ampo, ug pagpuasa; busa sila adunay espiritu sa pagpanagna, ug espiritu sa pagpadayag, ug kon sila nagtudlo, sila nagtudlo uban sa gahum ug pagtugot sa Dios.” [Alma 17:2–3.]

Karon, kamo ba [nakasabut] sa paagi diin mahimo kamo nga motudlo uban ang gahum ug pagtugot sa Dios? Pagmalig-on diha sa kahibalo sa kamatuoran, pagpakatawo nga may mabuot nga salabutan, pagsiksik sa mga kasulatan sa makugihon nga paagi nga kita unta masayud sa pulong sa Dios. Apan dili kana ang tanan. Kinahanglan nga mag-ampo kita, ug kinahanglan nga magpuasa kita, ug kinahanglan nga makabaton kita sa espiritu sa pagpanagna; ug human mahimo ang tanan nga mga butang, niana magtudlo kita pinaagi sa gahum ug awtoridad sa Dios.¹⁰

Ang Ginoo … miingon: “Ug ako mohatag nganha kaninyo sa usa ka sugo nga kamo motudlo sa usag usa sa doktrina sa gingharian,” ug dayon midugang, “Pagtudlo kamo nga makugihon ug ang akong grasya mouban kaninyo” (D&P 88:77–78). Gisulayan nako ang paghubad niadtong mga pulong nga “makugihon” ug “grasya.” Ang makugihon, nag-ingon ang diksyonaryo, mao ang “mapadayunon nga pagtagad, gituman uban sa mabinantayon nga pagpaminaw,” diin sukwahi sa pagkatapulan, o pagkadanghag, o pagkawalay pagpakabana. …

… Nagtuo ako nga ang hubad sa “grasya” gipasabut diha sa ikaupat nga seksyon sa Doktrina ug mga Pakigsaad diin ang Ginoo misaad niadtong kinsa makugihon nga magtrabaho sa misyonaryo nga buhat: “… ug tan-awa, siya nga mogalab sa iyang sanggot uban sa iyang kusog, sama ra nga nagtigum sa panalangin nga siya dili mahanaw, apan magdala sa kaluwasan ngadto sa iyang kalag.” [D&P 4:4.] Ang makaluwas nga “grasya” sa matubsanon nga gahum sa Ginoo modangat ngadto sa naghatag ingon man usab niadtong kinsa nakadawat sa makaluwas nga mga ordinansa sa ebanghelyo.¹¹

Karon, sa katapusan, kining usa ka butang nga daw alang kanako mahimong sama ka importante o labaw pa ka importante kay sa tanan:

“Ug ang Espiritu ihatag nganha kaninyo pinaagi sa pag-ampo diha sa hugot nga pagtuo; ug kon kamo dili makadawat sa Espiritu kamo dili motudlo.” [D&P 42:14.]

Karon makahatag kami kaninyo sa mga himan niining plano sa misyonaryo alang sa pagpahayag ug pagtuon sa ebanghelyo; anaa diha kining tanan. Apan gawas kon ang misyonaryo dili mogamit diha sa iyang kaugalingon sa makugihon nga pag-ampo, dili gayud siya makabaton sa Espiritu, pinaagi diin makasangyaw siya sa ebanghelyo. Kana mao ang gipasabut ni Nephi [sa diha nga siya] miingon:

“Ug karon ako, si Nephi, dili makasulat sa tanan nga mga butang nga gitudlo taliwala sa akong mga katawhan; ni ako gamhanan sa pagsulat, sama ngadto sa pagpamulong; kay kon ang tawo mamulong pinaagi sa gahum sa Espiritu Santo ang gahum sa Espiritu Santo modala niini ngadto sa mga kasingkasing sa mga katawhan.” (2 Nephi 33:1.)

…Kon anaa kaninyo ang Espiritu ug kamo naminaw ug nagiyahan ug natandog uban sa espiritu sa pag-ila, diin matag usa kaninyo gitawag ngadto sa Iyang serbisyo adunay katungod sa pagpahimulos, dayon mahimo kamo nga masayud ug magiyahan ug ang inyong mga pulong maubanan sa gahum sa Espiritu Santo, nga kon wala kana walay usa nga mahimong epektibo nga magtutudlo sa ebanghelyo ni Jesukristo.¹²

Ngano nga ang pagsunod sa ebanghelyo usa ka mahinungdanon nga bahin sa pagpakig-ambit sa ebanghelyo?

Ang labing maayo nga paagi sa kalibutan sa paghimo sa mga tawo nga magtinguha sa ebanghelyo mao ang pagsunod sa mga mithi ug sa mga sumbanan diin kita nagpaabut gikan niadtong kinsa nagpaila nga miyembro sa Simbahan. Mao kana ang unang butang nga makadani sa usa ka langyaw. Sa unsa nga paagi kita, nga nagpaila nga mga miyembro, magpakita sa atong mga pamatasan isip mga miyembro sa Simbahan? …

…Walay lalaki o babaye ang makatudlo sa ebanghelyo kon wala siya magsunod niini. Ang unang buhaton aron paghimo sa inyong kaugalingon nga mahimong misyonaryo mao ang pagsunod sa mga baruganan nga inyong gitudlo. Nakahunahuna ba kamo sukad nga ang usa ka makasasala mao ang labing maayo nga magtutudlo sa paghinulsol? Naghunahuna ba kamo nga bisan kinsa mahimong epektibo kaayo sa pagtudlo sa uban sa pagbalaan sa Igpapahulay nga adlaw kon wala siya magbalaan sa Igpapahulay nga adlaw sa iyang kaugalingon? Naghunahuna ba kamo nga makatudlo sa bisan unsa sa ubang mga baruganan sa ebanghelyo kon kamo walay igo nga pagtuo niini nga makatandog diha sa inyong kaugalingong mga kinabuhi?¹³

Si Jesus [miingon]: “Busa, ipakita ninyo ang inyong kahayag aron kini moiwag sa kalibutan. Tan-awa ako mao ang kahayag diin kamo mopakita––nga diin kamo nakakita kanako nga ako mihimo. Tan-awa kamo nakakita nga ako nag-ampo ngadto sa Amahan, ug kamong tanan nakasaksi.” (3 Nephi 18:24.) Ang atong tahas mao ang “pagpakita” sa kalibutan nianang nabuhat ni Jesus alang sa tawo: ang pag-ula, ang ehemplo nga Iyang gihanay, ug ang mga pagtulun-an nga personal Niyang gihatag kanato ug pinaagi sa Iyang mga propeta, karaan ug karong panahona. Ang Magtutudlo mitambag usab kanato: “Pasigaa ninyo ang inyong kahayag sa atubangan sa mga tawo aron makita nila ang inyong mga maayong buhat ug dayegon nila ang inyong Amahan nga anaa sa langit.” (Mat. 5:16.) …

Sa tanang pagkapangulo nga mga sitwasyon diin atong gitinguha ang pag-usab sa tawhanon nga pamatasan, malisud ang paghatag og sobra nga bili sa gahum sa ehemplo––naglangkob man kini sa mga ginikanan nga nagpakita ug nagsulti sa ilang mga anak mahitungod sa ka bililhon sa kaminyoon sa templo o sa usa ka nakahuman sa misyon kinsa nagpakita sa kamaayo isip resulta sa mga kausaban ug kahingkod nga nahimo sa ebanghelyo diha kaniya.¹⁴

“Kamo mao ang kahayag alang sa kalibutan; ang siyudad nga nahimutang ibabaw sa bungtud.” [Tan-awa sa Mateo 5:14.] Unsay gipasabut niana? …

… Sa bisan unsa nga Santos sa Ulahing mga Adlaw nga mga kalihokan, sa serbisyo sa militar, katilingbanon nga kinabuhi, o diha sa negosyo nga komunidad gitan-aw dili lamang isip usa ka indibidwal, kondili isip ang makita nga Simbahan karon. Usa ka tawo miingon: “Pagmabinantayon sa imong paglihok, tungod kay ikaw ra tingali ang bugtong Sumbanan nga mga Buhat sa Simbahan nga mabasa sukad sa mga tawo.” Ang Ginoo dinhi nagpahimangno kanato nga ang sumbanan sa pagpuyo dinhi sa Simbahan kinahanglan gayud nga makita nga mas taas kay sa sumbanan sa pagpuyo dinhi sa kalibutan.¹⁵

Bag-o pa lamang ako didto sa Seoul sa Korea [1954], ug ang usa sa labing maayo nga mga tawo nga ania kanato niana nga nasud mao ang usa ka lalaki nga ginganlan Dr. Ho Jik Kim. Siya usa ka … usa ka tigtambag sa panggobyerno sa Korea. Usa siya ka lider sa usa sa mga institusyon sa edukasyon didto, ug sa naglibut kaniya nakaani siya karon og traynta y kwatro ka mga kinabig, kadaghanan kanila maayong pagka-edukar. Nakigsulti kami kaniya sulod sa pipila ka oras, misulay sa pagpahimutang sa pundasyon nga makatukod unta mismo niini ngadto sa pagsugod sa misyonaryo nga mga kalihokan didto sa yuta sa Korea. Misulti siya kanamo kabahin sa iyang pagkakabig. “Ang butang nga nakapadani kanako sa simbahan,” mipasabut siya, “mao kadtong gidapit ako ngadto sa mga panimalay sa duha ka Santos sa Ulahing mga Adlaw nga mga lalaki kinsa mga miyembro sa pundok sa mga magtutudlo sa Cornell University. … Ang butang nga labing nakapadani kanako mao ang matang sa kinabuhi sa panimalay nga diha kanila. Wala pa sukad ako makasulod sa mga panimalay diin adunay ingon ka tam-is nga pakigdait tali sa bana ug asawa, ug amahan ug inahan ug mga anak. Sila akong nakita nga naghimo sa pamilya nga pag-ampo. Hilabihan ang akong pagkadani nga misugod ako sa pagsusi mahitungod niining ilang relihiyon. Ug usa ka gabii niana human sa akong pagtuon sulod sa dugay nga panahon ug nakombinse kalabut sa tinguha nga masakop sa ingon nga panag-uban, nasayud ako nga una kinahanglan gayud nga ako makakuha sa pagpamatuod. Miluhod ako ug nag-ampo hapit sa tibuok gabii ug nakadawat ako sa pagpamatuod sa kabalaan niini nga trabaho.” Apan hinumdumi nga nagsugod kini tungod sa labing maayo nga ehemplo sa usa ka pamilya nga nagsunod sa matang sa kinabuhi sa panimalay nga gipaabut diha sa tinuod nga mga Santos sa Ulahing mga Adlaw.¹⁶

Mga Sugyot alang sa Pagtuon ug Panaghisgutan

Unsa ang pipila ka mga kahigayunan nga anaa kanato aron sa pagtudlo sa ebanghelyo “matag adlaw … bisan asa kita mahimutang”? Unsa ang pipila ka mga hiyas niadtong kinsa malampuson nga mipakigbahin sa ebanghelyo ngadto sa uban?
Unsa nga mga leksyon ang atong makat-unan gikan sa kasinatian ni Presidente Lee sa pagpakigbahin sa ebanghelyo didto sa kan-anan sa hotel?
Unsa nga mga panalangin ang miabut sa inyong kinabuhi tungod kay nagtinguha kamo sa pagpakigbahin sa ebanghelyo ngadto sa uban?
Unsa nga mga sakripisyo ang gipangayo kanato nga himoon aron mopakigbahin sa ebanghelyo? Unsa ang kinahanglan nato nga kinaiya sa paghimo sa sama nga mga sakripisyo? Unsa ang nakapadani kaninyo mahitungod sa kinaiya sa batan-on nga lalaki kinsa gikan sa gubat ug miadto sa misyon?
Unsa ang atong nakat-unan gikan sa Alma 17:2–3 mahitungod sa paagi sa pagpakigbahin sa ebanghelyo uban sa gahum ug awtoridad?
Ngano nga ang pakig-uban sa Espiritu Santo gikinahanglan kon buot kitang mahimo nga epektibo nga mga misyonaryo? Unsa ang atong mabuhat aron mas labaw pa nga mahingpit ang pag-angkon sa paggiya sa Espiritu samtang nakigbahin kita sa ebanghelyo?
Sa unsa nga paagi atong mabuntog ang atong pag-ukon-ukon ug pagkahadlok sa pagpakigbahin sa ebanghelyo?
Ngano nga ang atong ehemplo sa matarung nga pagpuyo ingon ka gamhanan nga himan sa pagtudlo?

Elder Harold B. Lee isip usa ka misyonaryo didto sa Western States Mission. Nagserbisyo siya gikan sa Nobyembre 1920 hangtud sa Disyembre 1922.

Sa tibuok kalibutan, batan-ong mga lalaki ug mga babaye walay paghinakog nga “mibarug isip mga saksi sa tanang mga panahon ug sa tanang mga dapit sa balaanon nga responsibilidad diha sa Simbahan aron sa pagtudlo sa ebanghelyo.”