Kapitulo 13

Pagtudlo sa Ebanghelyo diha sa Panimalay

Sa unsa nga paagi nga ang mga ginikanan makahimo sa ilang panimalay nga usa ka dangpanan ug usa ka dapit sa pagpangandam alang sa mahangturong kinabuhi?

Pasiuna

Si Presidente Harold B. Lee nagsulti kabahin sa ka-importante sa pagtudlo sa ebanghelyo diha sa panimalay:

“Samtang magbasa kita gikan sa mga sinulat sa unang mga propeta, atong madiskobrehan unsa ang nagpailawom nga dautan nga midala sa pagkadautan diin nakahimo sa Dios, kinsa milalang sa katawhan, sa paghilak. Sa pagpadayag ngadto sa iyang maunungon nga propetang si Enoch, ang Dios mipahayag nga ang nahabilin sa iyang mga anak mga walay balatian, gani nasilag sa ilang kaugalingong dugo, nga sa dakong posibilidad nagpasabut nga ilang mga anak.

“Sa iyang tubag sa pangutana ni Enoch kon nganong mihilak siya, ang Dios mitubag nga ‘… taliwala sa tanan nga mga binuhat sa akong mga kamot walay sama ka hilabihan nga pagkadautan ingon sa imong mga kaigsoonan.’

“Dayon midugang siya: ‘… tan-awa, ang ilang mga sala maanaa sa mga ulo sa ilang mga amahan. …’ (Moises 7:36–37.) Sa tataw ang mga ginikanan niana nga henerasyon nakahimo og dakong sala sa pagkapakyas sa pagsunod sa sugo nga gihatag ngadto sa tanang mga ginikanan gikan sa panahon ni Adan nganhi sa atong kaugalingon nga panahon. Napakyas sila sa pagtudlo sa doktrina sa kaluwasan ngadto sa ilang mga anak.

“Ang Ginoo mipahimangno kanato nga, sama sa mga panahon ni Noe, mao usab kini sa pag-abut sa Anak sa Tawo. Ang Dios nagtugot nga kining mga tawhana mopatalinghug sa tawag sa atong mga pangulo nga propeta ug motudlo sa ilang mga anak ingon sa gisugo sa Ginoo ug malingkawas sa mapantunon nga kamot sa Makagagahum nga Dios.”¹

Kini nga kapitulo mohisgot sa dakong responisbilidad nga gihatag ngadto sa mga ginikanan sa pagtudlo sa ebanghelyo ngadto sa ilang mga anak ug moandam kanila sa pagpuyo og matarung nga mga kinabuhi.

Mga Pagtulun-an ni Harold B. Lee

Ngano nga ang panimalay mao ang labing importante nga dapit sa pagtudlo sa ebanghelyo?

Ang atong mga panimalay kinahanglan gayud nga dili lamang mahimo nga mga dangpanan apan mga dapit usab sa pag-andam diin ang atong mga batan-on makapadayon sa masaligon nga paagi sa pagpangulo ug sa pag-atubang sa gubot nga kalibutan. Nasayud kitang tanan nga unsay nakat-unan sa panimalay adunay kahibulongan nga paglungtad; unsay nakita ug nasinati diha sa panimalay mahimong magtabang o magsamok sa hunahuna sa atong mga kabatan-onan sulod sa mga tuig nga moabut. Ang atong mga panimalay mahimo nga mga modelo sa tanang mga katawhan, apan kinahanglan nga sundon nato sa matinuoron nga paagi ang tambag sa mga lider sa Simbahan kabahin niini nga hilisgutan kay sa atong gihimo kaniadto. Kanunay gayud kini nga nahimong talagsaon nga hagit, apan nahimong labaw pa karon tungod sa kadako nga kadaut sa mga panimalay sa atong panahon. Ang mga bata “makabati ug makakita” sa ebanghelyo nga naglihok diha sa panimalay. Sila makakita sa pagkamatarung ug gahum gikan sa sinugdan; sila makakita sa unsa nga paagi kini makasangkap sa indibidwal nga mga panginahanglan.²

Subli nga gibalik-balik ang pahayag nga ang panimalay mao ang sukaranan sa usa ka matarung nga kinabuhi. … Ang mga pagpadayag sa Dios ug ang pagkakat-on sa mga tawo nagsulti kanato kon unsa ka mahinungdanon ang panimalay sa paghulma sa hingpit nga kasinatian sa kinabuhi sa indibidwal.³

Nag-anam kini og ka tataw nga ang panimalay ug pamilya mao ang yawe sa kaugmaon sa Simbahan. Ang usa ka bata nga wala higugmaa, ang usa ka bata nga wala makaila og disiplina, trabaho, o responsibilidad, sa kasagaran motugyan ngadto sa yawan-on nga mga puli alang sa kalipay––mga druga, pagsulay sa pakighilawas, ug pagbatok, kini may salabutan o may pamatasan ba. …

Walay laing mas maayo nga dapit kay sa panimalay sa pagtudlo ug pagkat-on mahitungod sa kaminyoon, gugma, ug pakighilawas nga kini sa tukma nga paagi matingub sa usa ka gibalaan nga kaminyoon sa templo. Walay laing mas maayo nga dapit sa pagatubang sa mga pagduha-duha sa atong mga batan-on kay sa diin adunay gugma––sa panimalay. Ang gugma makatugot sa atong mga kabatan-onan sa pagpaminaw niadtong kinsa ilang nasayran nga ilang kasaligan. …

Makahimo ba ang usa ka bata sa paghigugma sa iyang silingan gawas kon siya nakaila og gugma sa iyang kaugalingon? Makahimo ba ang usa ka batan-on kinsa wala gayud sukad saligi pagkat-on og pagsalig? Makahimo ba ang usa ka batang lalaki kinsa wala gayud makaila og trabaho o responsibilidad sa pag-ila kon unsa ka kinahanglanon kadtong mga mahinungdanon nga kinaiya aron sa paghupot sa atong tibuok katilingban nga magkahiusa? Makahimo ba ang usa ka babaye kinsa wala sukad mahimong kabahin sa matinuoron, madayganon nga mga panaghisgutan kabahin sa mga baruganan sa ebanghelyo diha sa iyang panimalay pagsugakod sa mga panaway sa kalibutan ug sa mga intelektwal nga mga pag-ataki sa iyang relihiyon? … Sa walay pagsinati sa baruganan sa ebanghelyo nga gigamit, kini labaw pa ka lisud sa pagtuo niana nga baruganan. …

Sa panahon nga gisultihan kita nga mahimong sama ka daghang higayon sa panahon ni Noe, kinahanglan gayud nga tabangan nato ang atong mga batan-on sa pagkat-on unsaon sa paghimo og husto nga mga pagpili, sa pagtubo diha sa makatarunganong pagtamud sa kaugalingon, ilabi na kon sila mahimo nga ubos sa tinuod nga impluwensya sa panimalay, diin ang gugma sa pamilya makahimo sa paghinulsol nga posible ug mahinungdanon. Ang palibut sa atong mga batan-on gawas sa panimalay ug sa Simbahan sa kasagaran walay kahulugan, kon hisgutan nato ang mahitungod sa hiyas, o maglakip kini og mga ideya nga sukwahi sa mga baruganan sa ebanghelyo.⁴

Diha sa mga ginikanan sa panimalay ug diha sa Simbahan gibutang ang usa ka dakong responsibilidad sa pagtudlo og maayo sa mga kamatuoran sa ebanghelyo nga usa ka angkla nga mahatag alang sa matag kalag. Kon wala kana nga angkla, ang tawo mahisama sa “balud sa dagat nga ginakusokuso sa hangin ug gituyatuya,” giliyokliyok sa tanang hangin sa doktrina nga walay kasiguroan ang gigikanan nga makahimo sa paglibug sa iyang panghunahuna kabahin niana nga sayop diha sa panan-aw sa Dios [tan-awa sa Mga Taga-Efeso 4:14; Santiago 1:6]. Kita gayud ang mamahimo nga labing edukado nga mga tawo sa nawong sa yuta kon atong pamation ang mga sugo sa Ginoo.

Kon ang atong mga kabatan-onan sa ingon malig-on, dili sila malibug sa ilang relihiyuso nga pagtuo kon makasugat sila og bakak nga mga ideya sa edukasyon nga sukwahi sa mga kamatuoran sa ebanghelyo. Gisangkapan sila batok sa makahilo nga mga pana sa pagpakaulaw ug sa pagpakaaron-ingnon.

Ang batan-ong mga lalaki…, kon giyahan sa ilang mga panghunahuna pinaagi sa “labing mahinungdanon” nga kamatuoran, dili motugyan ngadto sa wala mabantayi nga higayon sa kahuyang sa pagtintal nga mahimong usa ka moral nga kalaglagan sa tibuok nila nga mga kinabuhi. …

Ang batan-ong mga naghinigugmaay nga hapit na magminyo, kon giyahan pinaagi sa mga hunahuna nga gidala sa kamatuoran sa ebanghelyo, mobalaan sa ilang mga kaugalingon pinaagi sa paghupot sa balaod sa celestial nga kaminyoon aron makaangkon og mahangturong kalipay.⁵

Ang Ginoo miingon nga ang gahum wala ihatag ngadto kang Satanas sa pagtintal sa gagmay nga mga bata, “hangtud nga sila magsugod nga mahimong adunay tulubagon sa akong atubangan” (D&P 29:47). Kining hilabihan ka mahinungdanon nga pamahayag nagsunod: “Kanang hilabihan ka mahinungdanon nga mga butang mahimo nga gikinahanglan diha sa mga kamot sa ilang mga amahan” (D&P 29:48). Karon, kana nagpasabut sa mga ginikanan. Ngano nga ang Ginoo wala motugot ni Satanas sa pagtintal sa gamay nga bata hangtud nga moabut siya sa edad sa pagkamay tulubagon? Aron sa paghatag sa mga ginikanan og bulawanon nga kahigayunan sa pagtanom diha sa mga kasingkasing sa gagmay nga mga bata niadtong mahinungdanon nga mga butang kay kon dili, kon ang panahon sa pagkamay tulubagon moabut, sila naghulat sa hilabihan na ka dugay.⁶

Kita, nga mga amahan, mga magtutudlo, mga inahan, kita adunay [usa] ka mahinungdanon nga [tahas] sa pag-ugmad sa tawhanon nga mga kalag. Tinuod, si Satanas dili makatintal sa gagmay nga mga bata sa dili pa sila moabut sa edad sa pagkamay tulubagon; apan si Satanas makahimo sa gusto niya pinaagi sa pagsulay sa paghimo kanato kinsa gisaligan sa ilang pag-amuma ug sa ilang pagbansay nga mahimong magpasagad ug dili magbantay ug motugot kanila sa pagpalambo niadtong gagmay nga mga kalagmitan nga modala kanila sa pagpalayo, ug [mohimo kanila] nga dili angay sa mahinungdanong mga responsibilidad sa pagsagubang sa pakigsangka ni Satanas, ug mapakyas sa pagbutang nianang panalipod sa ilang kaugalingon sa panahon nga moabut sila sa edad sa pagkamay tulubagon.⁷

Kinahanglan atong isilsil diha sa matag amahan nga siya mahimong manubag alang sa mahangturong kaayohan sa iyang pamilya: kana nagpasabut sa pag-adto sa Simbahan uban sa iyang pamilya; kana nagpasabut nga motambong sa miting sa sakrament uban sa iyang pamilya; kana nagpasabut nga maghimo og mga family home evening aron mabug-os ang iyang pamilya; kini nagpasabut sa pag-andam sa iyang kaugalingon sa pagdala kanila ngadto sa templo, aron adunay maandam pinaagi niana nga mga lakang nga makahimo alang sa usa ka mahangturong pamilya nga panimalay.⁸

O, kamo nga mga inahan, kamo nga mga amahan, nangamuyo ako alang sa pagbalik sa pagbati sa hingpit nga responsibilidad alang niadtong gimahal nga mga kalag. Gawas ninyo nga moandam kanila alang niining adlaw nga moabut, kinsa ang mohimo? Niana nga adlaw sa diha nga [ang Ginoo] moabut sama sa usa ka kawatan sa kagabhion, giandam ba ninyo sila nga mobarug diha sa Iyang atubangan? Kon sila atua sa panggubatan, kon sila nagatubang og kuyaw, ug nag-atubang og pagtintal, ang inyo ba nga inahanong gugma molugway ngadto sangko sa kaliboan ka mga kilometro ug mogunit niana nga anak nga lalaki o babaye nga lig-on?⁹

Unsa nga mga baruganan sa ebanghelyo kinahanglan nga atong itudlo sa mga bata?

Si propeta Enos misulat mahitungod sa mga pagtulun-an sa iyang amahan. Siya miingon, “Ako, si Enos, nasayud sa akong amahan nga siya usa ka makiangayon nga tawo––kay siya mitudlo kanako … usab diha sa pagmatuto ug mga pagpahimatngon sa Ginoo––ug bulahan ang ngalan sa akong Dios tungod niini” (Enos 1:1). Akong gipamalandong kana nga pamahayag, “Ang akong amahan mitudlo kanako diha sa pagmatuto.” Unsay gipasabut niana? Ang pagmatuto nagpasabut og proseso sa moral nga pagbansay ug pagdisiplina. “Ang akong amahan mitudlo kanako ug midisiplina kanako sa moral nga pagbansay.” Unsay gipasabut sa pagpahimatngon? Nagpasabut kini sa malumo o mahigalaon nga pagbadlong, mga pahimangno o mga pahinumdom. Bulahan ang ngalan sa Dios alang sa amahan ug inahan nga nagtudlo diha sa pag-amuma ug pahimatngon sa Ginoo!¹⁰

Ang Ginoo sa iyang kaugalingon yano nga misulti mahitungod niini nga pagpangandam alang sa pagbantay sa mga kabatanonan gikan sa makuyaw nga mga laang nga mahimong molaglag kanila. Mibutang siya og seryuso nga katungdanan diha sa mga panimalay niini nga yuta. Ania ang iyang mga pulong:

“Ug usab tungod kay ang mga ginikanan adunay mga anak sa Zion, o diha sa bisan diin sa iyang mga stake nga natukod, nga wala magtudlo kanila sa pagsabut sa doktrina sa paghinulsol, hugot nga pagtuo diha ni Kristo ang anak sa buhi nga Dios, ug sa bunyag ug sa gasa sa Espiritu Santo pinaagi sa pagpandong sa mga kamot, kon walo ka tuig ang panuigon, ang sala anaa diha sa mga ulo sa mga ginikanan. …

“Ug sila usab motudlo sa ilang mga anak sa pag-ampo, ug sa paglakaw nga matarung sa atubangan sa Dios.” [D&P 68:25, 28.]¹¹

Ang labing gamhanan nga hinagiban nga kita aduna batok sa mga dautan dinhi sa kalibutan karon, sa walay pagsapayan unsa kini, mao ang dili matarug nga pagpamatuod mahitungod sa Ginoo ug sa Manluluwas, si Jesukristo. Tudloi ang inyong mga anak samtang sila gagmay pa ug sila motubo nga mahimong lig-on. Mahimo nga mahisalaag sila, apan ang inyong gugma ug inyong hugot nga pagtuo mopabalik kanila.¹²

Ang mga ginikanan kinahanglan nga mahinumdom sa ilang mga paghago sa tanang pagkamatinud-anon, sa pagtan-aw nga walay mga tapulan, nga ang mga bata dili magtubo diha sa pagkadautan, apan pagatudloan sa pagsiksik nga makugihon sa mga bahandi sa kahangturan, nga ang ilang mga mata dili puno sa kahakog (tan-awa sa D&P 68:30–31). Karon mao kana ang responsibilidad sa usa ka amahan ug sa usa ka inahan. Ang Ginoo mihatag sa unang responsibilidad sa pagtudlo sa mga pamilya ngadto sa mga ginikanan.¹³

Ang matag bata kinahanglan gayud tudloan nga siya usa ka kaliwat sa balaanon nga pagkaginikanan ug nga katungdanan kini sa matag bata sa pagkat-on sa paglihok nga sama sa usa anak nga lalaki o anak nga babaye sa Dios aron nga sa panahon sa panginahanglan mahimo siya nga mag-ampo ug mahimo nga may katungod sa pagdawat og mga kalooy nga alang sa usa ka matinud-anon nga bata.

Ang matag bata kinahanglan gayud nga pagatudloan nga ang iyang lawas usa ka templo sa Dios, ug kinsa ang molaglag sa templo sa Dios, siya pagalaglagon sa Dios [tan-awa sa 1 Mga Taga- Corinto 3:16–17].

Ang matag bata kinahanglan gayud nga makakat-on nga ang hugot nga pagtuo nga igo sa kahingpitan mapalambo lamang pinaagi sa sakripisyo ug gawas nga makakat-on siya sa pagsakripisyo sa iyang kahinam ug lawasnon nga mga tinguha agig pagsunod sa mga balaod sa ebanghelyo dili siya mahimo nga mabalaan diha sa atubangan sa Ginoo.

Ang matag bata kinahanglan gayud nga tudloan sa pagmatinahuron sa mga simbolo sa sagrado nga mga butang ug pagmatinahuron sa awtoridad diha sa panimalay, sa Simbahan ug sa komunidad.

Ang matag bata kinahanglan gayud nga tun-an sa tukma nga paagi sa paggamit sa iyang mga kamot ug ulo ug pasabton nga ang tanang mga kahilig hinatag sa Dios ug nagsilbi nga usa ka diosnon nga katuyoan kon giampingan ubos sa pagpugong.

Ang matag bata kinahanglan gayud nga tudloan sa paggamit sa mapuslanon nga paagi sa iyang panahon sa paglingaw-lingaw ug nga ang katuyoan sa dula dili lamang ang pagdula kon dili adunay tumong. Usa lamang kini ka pagbansay alang sa bahin nga iyang pagadulaon diha sa hingkod niya nga kinabuhi.

Ang matag bata kinahanglan gayud nga hatagan sa igong kasinatian sa pagkat-on nga ang dili hinakog nga serbisyo magdala sa hingpit nga kalipay ug nga ang trabaho nga gibuhat sa usa ka tawo nga wala siya pagasuholi mao kana ang maghatag sa labing dako nga kalipay.¹⁴

Ang atong mga anak kinahanglan nga makadungog, diha sa sulod sa panimalay, sa mga pagpamatuod sa ilang mga ginikanan. Unsa ka maalamon ang amahan o apohan nga lalaki kinsa mangita og higayon sa paghatag sa iyang personal nga pagpamatuod ngadto sa kada usa sa iyang mga anak, sa tinagsa nga paagi!¹⁵

Sa unsa nga paagi ang mga family home evening makatabang sa mga ginikanan sa pagtuman sa ilang mga responsibilidad sa pagtudlo sa ebanghelyo?

Ang mas dako nga gibug-aton sa pagtudlo sa mga bata diha sa panimalay pinaagi sa mga ginikanan gihisgutan diha sa gitawag nato og programa sa family home evening. Dili kini bag-o. … Sa katapusang epistola nga gisulat ngadto sa Simbahan ni Presidente Brigham Young ug sa iyang mga Magtatambag, nagsugyot kini nga pundukon sa mga ginikanan ang ilang mga anak ug tudloan sila sa ebanghelyo diha sa panimalay kanunay. Mao nga ang family home evening gisugyot sukad matukod ang Simbahan niini nga dispensasyon.¹⁶

Kon kita dili magtagad sa atong mga pamilya sa paghimo og family home night ug kita mapakyas sa atong responsibilidad dinhi, unsa ang hitsura sa langit kon mawala kanato kadtong pipila pinaagi sa atong kaugalingong pagpasagad? Ang Langit dili mahimo nga langit hangtud nga mabuhat nato ang tanang butang nga atong mahimo sa pagluwas niadtong kinsa gipadala sa Ginoo pinaagi sa atong kaliwatan. Busa, ang mga kasingkasing kaninyo mga amahan ug mga inahan kinahanglan gayud nga ibalik ngadto sa inyong mga anak karon dayon, kon kamo adunay tinuod nga Espiritu ni Elijah, ug dili maghunahuna nga kini magamit lamang niadtong kinsa nangamatay. Himoa nga ang inyong mga kasingkasing mobalik ngadto sa inyong mga anak ug tudloi ang inyong mga anak; apan kinahanglan gayud nga inyo kining buhaton kon may igo na silang kabuot aron matudloan. Ug kon kamo wala magtagad sa inyong family home evening, kamo wala magtagad sa sinugdanan sa misyon ni Elijah sama ka tinuod nga ingon og kamo wala magtagad sa inyong trabaho sa pagsiksik sa kaliwatan.¹⁷

Makanunayon ba kita nga nagtrabaho sulod sa atong kaugalingong panimalay nga gilibutan uban sa mga bata ug mga apo? Nangita ba kita sa atong kaugalingong karnero kinsa anaa sa kuyaw nga mahisalaag gikan sa magbalantay o sa panon sa mga karnero? Nagtudlo ba kita sa atong mga pamilya [diha] sa family home evening? Nag-home evening ba kita sa ato mismong kaugalingon, o nag-ingon kita nga, “Hinoon, kini nga mga leksyon dili alang kanato, ug si Mama ug ako mao na lamang ang nahabilin, ug alang ra kini niadtong may gagmay nga mga bata”?¹⁸

Karon tuguti ako sa pagpangutana. Kon nasayud kamo nga nag-antus kamo gikan sa usa ka walay kaayohan nga sakit ug nga may utlanan na ang inyong panahon dinhi sa yuta ug kamo adunay pamilya sa gagmay nga mga bata nga nagsalig diha kaninyo alang sa tambag, sa direksyon, sa pagpangulo, unsay kinahanglan ninyo nga buhaton aron sa pag-andam kanila alang sa inyong pagbiya? Mihunong ba kamo sukad sa pagpangutana sa inyong kaugalingon nianang matang sa usa ka mabuot nga pangutana?

Tugoti ako nga mobasa kaninyo … sa sulat nga gikan sa [usa ka inahan]: “Sa bag-o pa akong nagpasakop sa Simbahan, naandan ko na ang paghunahuna sa matang sa usa ka panimalay nga gipangandoy ko nga maangkon pipila ka adlaw. Akong gipunting ang akong hunahuna sa paghanduraw unsa ngari kanako ang labing maanindot, makatagbaw nga sitwasyon nga akong mahulagway. Ang akong bana ug ako mihimong tinuod nianang among gihulagway sa hunahuna sa diha nga among gipundok ang among mga anak ug gitudloan sila sa ebanghelyo. … Usa ka butang nga nakapahibulong ug nakapalipay kanamo mao ang kamatuoran nga ang among mga anak, sa tanan, nakakat-on sa paghigugma sa among mga family home evening. … Ako nagsugod sa pag-amgo og anam-anam unsa ka dali mitubo ang among mga anak ug unsa ka mubo ang panahon sa among pagtudlo kanila isip mga ginikanan. …

“Ako dihay usa ka grabe nga sakit sa miaging tinglarag. Naglaum ako nga dili unta kini makawang, apan sa unang higayon ako nakaamgo kon unsa ako ka importante ngadto sa kaugalingon kong mga anak. … Samtang naglubog ako nga walay nahimo sa pag-atiman sa bisan unsa sa ilang mga panginahanglan, nasayud nga gawas sa panabang sa akong Langitnong Amahan ang akong impluwensya diha kanila naghinapos niini nga kinabuhi, unsa ka madanihon ug bililhon ang mga oras diha sa mga semana ug mga bulan ug sa umaabut nga mga tuig.

“Busa akong gipiho ang daghang mga butang nga may kalabutan unsaon sa paggamit nianang higayona, kon gitugot pa kini kanako. Ang usa mao ang paghimo og gamay nga tipik sa langit dinhi sa yuta, sa paggahin og panahon sa matag gabii sa pagbasa ug pakigsulti ngadto sa mga bata. … Gawas sa ubang mga butang nga ilang gikaikagan, ako nang nabasa ngadto kanila ang hapit tanan diha sa Basahon ni Mormon gikan sa volume alang sa mga bata. … Wala akoy pagduha-duha nga makahuluganon kini ngadto kanila sa diha nga nadungog ko ang akong walo ka tuig nga mihatag og mga pasalamat diha sa iyang mga pag-ampo alang sa mga propeta kinsa mitipig sa mga talaan, o sa dihang ang akong lima ka tuig nga anak nga lalaki mapasalamaton nga si Nephi luwas nga nakaikyas ngadto sa kamingawan uban sa matinud- anon sa diha nga si Laman ug Lemuel nagtinguha sa pagpatay kaniya. Ang among kasinatian mao nga sa bisan unsang higayon nga kami makahigayon sa pagtabang sa among mga anak sa pagpadako sa ilang gugma ug pagsabut sa ebanghelyo ug sa Amahan kinsa milalang kanila, ang among gugma alang sa usag usa nagkadugang usab ug ang kalig-on sa among pamilya naimpluwensya sa labing mahinungdanon nga paagi. Tungod niini nga katarungan, ang sinemana nga family home evening mao ang labing importante ngari kanamo.”¹⁹

Sa inyong mga panimalay, mag-ampo ako nga kamo, moingon sama sa gihimo ni Josue sa karaan: “Alang kanako ug sa akong balay, kami magaalagad sa Ginoo” (Josue 24:15). Tudloi ang inyong mga pamilya diha sa inyong family home evening, tudloi sila sa paghupot sa mga sugo sa Dios, kay diha niana mao lamang ang atong kaluwasan niining mga panahona. Kon ila kanang buhaton, ang mga gahum sa Makagagahum mokunsad diha kanila sama sa mga yamog gikan sa langit, ug ang Espiritu Santo maanaa kanila.²⁰

Mga Sugyot alang sa Pagtuon ug Panaghisgutan

Ngano nga ang panimalay mahinungdanon sa paghulma sa “hingpit nga kasinatian sa kinabuhi sa atong mga anak”? Ngano nga kinahanglan gayud nga ang mga ginikanan mohimo sa pagtudlo sa ebanghelyo ngadto sa ilang mga anak nga usa ka dako nga prayoridad sukad sa panahon nga gagmay pa ang ilang mga anak?
Sa unsa nga paagi kita makahimo sa atong mga panimalay nga mga dangpanan gikan sa pagkadili matarung ug sa kasamok sa kalibutan?
Sa unsa nga paagi nga ang mga ginikanan makatudlo sa mga baruganan diha sa Doktrina ug mga Pakigsaad 68:25–28 ngadto sa ilang mga anak? Sa unsa nga paagi ang mga ginikanan makatabang sa ilang mga anak sa “pagkat-on nga ang pagkadili hakog nga serbisyo magdala sa hingpit nga kalipay”?
Ngano nga importante alang sa mga anak ang pagpaminaw sa ilang mga ginikanan sa mga pagpamatuod sa mga baruganan sa ebanghelyo?
Sa unsa nga paagi nga ang misyon ni Elias magamit sa mga ginikanan sa pagpadako sa ilang mga anak?
Ngano nga importante ang paghimo kanunay og mga family home evening? Sa unsa nga paagi kamo nakahimo nga malampuson sa inyong family home evening?

Si Presidente Harold B. Lee mipahimangno, “Tudloi ang inyong mga pamilya sa inyong family home evening, tudloi sila sa paghupot sa mga sugo sa Dios, kay diha niana mao lamang ang atong kaluwasan niining mga panahona.”