Kapitulo 6

Sa Pagpaminaw sa Tingog sa Ginoo

Sa unsa nga paagi kita makadawat sa personal nga pagpadayag gikan sa Ginoo?

Pasiuna

Si Presidente Harold B. Lee sa makausa miingon: “Ako adunay matuohon nga kasingkasing nga nagsugod sa yano nga pagpamatuod nga miabut sa dihang bata pa ako—tingali ako nag-edad og mga napulo o onse ka tuig. Kauban ako sa akong amahan didto sa umahan layo sa among panimalay, nagsulay sa pagpalabay sa adlaw nga daghang gibuhat hangtud nga ang akong amahan andam nang mopauli. Sa gawas sa koral gikan sa among dapit mao ang gubaon nga kasilungan nga makadani sa usa ka kuryuso nga bata nga lalaki, ug ako tigpanimpalad. Misugod ako sa pagkatkat sa koral, ug ako nakadungog og tingog nga klaro sama sa inyong pagkadungog kanako, nagtawag sa akong pangalan ug nag-ingon, ‘Ayaw pag-adto didto!’ Milingi ako aron tanawon ang akong amahan kon siya ba ang nakig-istorya kanako, apan siya didto sa pikas tumoy sa umahan. Walay tawo nga makita. Ako nakaamgo dayon, isip usa ka bata, nga dihay mga tawo nga dili nako makita, kay nakadungog gayud ako og tingog. Sukad niadto, kon ako makadungog o makabasa sa mga istorya ni Propeta Joseph Smith, ako usab nakahibalo unsay buot ipasabut kon makadungog sa tingog, tungod kay ako nakasinati.”¹

Bisan og ang Ginoo dili makigsulti kanato nga madungog, samtang kita magkat-on sa pagpakigsulti Kaniya ug makahibalo sa unsa nga paagi siya makigsulti kanato, magsugod kita sa pagkaila Kaniya. Si Presidente Lee miingon nga “ang pagkaila sa Dios ug ni Jesukristo kinsa iyang gipadala (tan-awa sa Juan 17:3), sama sa gisulti sa Magtutudlo ngadto sa iyang mga tinun-an, mao ang pagsugod diha sa siguro nga dalan nga paingon ngadto sa kinabuhing dayon diha sa atubangan niining mahimayaong mga binuhat.”²

Mga Pagtulun-an ni Harold B. Lee

Sa unsa nga mga paagi ang Langitnong Amahan makigsulti sa Iyang mga anak?

Ako naminaw sa usa ka dinasig nga sermon didto sa Brigham Young University ni Presidente [J. Reuben] Clark Jr. … Iyang gituki ang nagkalain-lain nga mga matang sa pagpadayag nga moabut. Naghisgot siya og una sa pagpakita sa Dios ngadto sa tawo, nga iyang gihulagway nga usa ka kasinatian diin ang Amahan o ang Anak o ang duha personal nga nagpakita, o direktang mosulti ngadto sa tawo. Si Moises nakigsulti sa Ginoo nawong sa nawong [tan-awa sa Moises 1:1–4]; Si Daniel dihay pagpakita sa Dios, o personal nga pagpakita [tan-awa sa Daniel 10]. Sa dihang ang Magtutudlo miduol ngadto ni Juan Bautista alang sa bunyag, nahinumduman ninyo, usa ka tingog migawas gikan sa langit ug miingon, “Kini mao ang akong Anak nga pinalangga; kaniya may kalipay ako.” [Mateo 3:17.] Sa pagkakabig ni Pablo, … dihay personal nga pagpakita usab, ug tataw nga tingog ang nadungog [tanawa sa Mga Buhat 9:1–6]. Sa transpigurasyon, sa dihang si Pedro, Santiago, ug Juan miadto uban sa Magtutudlo ngadto sa taas nga bukid diin si Moises ug si Elias nagpakita diha sa ilang atubangan, nadungog pag-usab ang usa ka tingog nagsulti gikan sa mga langit, nag-ingon, “Kini mao ang akong Anak nga pinalangga; kaniya may kalipay ako. …” (Mateo 17:5.)

Tingali ang labing talagsaon sa tanang mga pagpakita sa Dios sa atong panahon mao ang pagpakita sa Amahan ug sa Anak ngadto ni Propeta Joseph Smith didto sa kakahoyan [tan-awa sa Joseph Smith—Kasaysayan 1:14–17]. Pagkahuman niana dihay daghang mga pagpakita, ang usa girekord diha sa ika-110 nga seksyon sa Doktrina ug mga Pakigsaad, sa dihang ang Manluluwas nagpakita ngadto ni Joseph ug Oliver. …

Laing paagi diin kita makadawat og pagpadayag gipamulong ni propeta Enos. Iyang gisulat kining mahinungdanon kaayo nga pamahayag sa iyang rekord diha sa Basahon ni Mormon: “Ug samtang ako nakigbisog diha sa espiritu, tan-awa, ang tingog sa Ginoo midangat sa akong hunahuna. …” [Enos 1:10.]

Sa laing mga pulong, usahay atong madungog ang tingog sa Ginoo nga misulod sa atong mga hunahuna, ug sa dihang moabut kini, ang mga pagbati sama ra ka kusog ingon og Siya mipatingog og trumpeta sa atong dunggan. …

Sa usa ka istorya diha sa Basahon ni Mormon, si Nephi mibadlong sa iyang mga igsoong lalaki, misugo kanila sa paghinulsol, ug misulti sa samang hunahuna sa dihang siya miingon: “…ug siya nakapamulong nganha kaninyo sa usa ka hinay nga hinagawhaw nga tingog, apan kamo ingon og walay pagbati, nga kamo dili makabati sa iyang mga pulong. …” (1 Nephi 17:45.)

Sa ingon ang Ginoo, pinaagi sa pagpadayag, mopasulod og mga butang diha sa atong mga hunahuna ingon nga adunay usa ka tingog nga namulong. Mahimo ba nga mohatag ako og mapainubsanon nga pagpamatuod niana nga kamatuoran? Makausa diha ako sa usa ka sitwasyon diin ako nagkinahaglan sa panabang. Ang Ginoo nasayud nga ako nagkinahanglan og tabang, ingon nga ako diha sa usa ka importante nga misyon. Nahigmata ako sa sayong mga takna sa kabuntagon ug gitul-id sa usa ka butang nga akong giplano nga buhaton sa sukwahi nga paagi, ug ang paagi tataw nga gitudlo ngari kanako samtang ako naghigda nianang buntag, sama ka siguro nga ingon og adunay naglingkod sa ngilit sa akong higdaan ug misulti kanako kon unsay buhaton. Oo, ang tingog sa Ginoo moabut sa atong mga hunahuna ug kita magiyahan pinaagi niana.

Makadawat usab kita og pagpadayag pinaagi sa gahum sa Espiritu Santo. Ang Ginoo misulti ngadto ni Propeta Joseph Smith sa unang mga adlaw sa Simbahan, “Oo, tan-awa ako mosulti diha sa inyong hunahuna ug sa inyong kasingkasing, pinaagi sa Espiritu Santo, nga … mopuyo diha sa inyong kasingkasing. Karon, tan-awa, kini mao ang espiritu sa pagpadayag. …” (D&P 8:2–3.) Ang Magtutudlo mihupay sa Iyang mga tinun-an, nahinumdumam ninyo, sa hapit na ang Iyang paglansang Siya miingon, “… kay kon dili ako mopahawa, ang Manalalaban dili moanha kaninyo. … Inig-abut sa Espiritu sa kamatuoran [o ang Espiritu Santo], kini siya mao ang magatultol kaninyo ngadto sa tibuok nga kamatuoran:… ug ang mga butang nga umaabut iyang igatug-an kaninyo” (Juan 16:7, 13), “ug magapahinumdom kaninyo sa tanan nga akong gisulti kaninyo. …” (Juan 14:26.) Sa ingon atong makita ang gahum sa Espiritu Santo. Si Propeta Joseph Smith, namulong mahitungod niini, miingon, “Walay tawo nga makadawat sa Espiritu Santo nga dili makadawat og mga pagpadayag. Ang Espiritu Santo usa ka tigpadayag.” (Teachings of the Prophet Joseph Smith, p. 328.)

Mahimo nga akong usbon kana kalabut sa … ug moingon, Si bisan kinsa nga Santos sa Ulahing mga Adlaw kinsa napandungan sa mga kamot gikan niadtong nangalagad, nagsugo kaniya sa pagdawat sa Espiritu Santo, ug kinsa wala makadawat og pagpadayag sa espiritu sa Espiritu Santo, wala makadawat sa gasa sa Espiritu Santo diin siya angay nga modawat. Diha niana napahimutang ang importante kaayo nga butang. Tuguti ako nga mogamit sa unsay gisulti ni Propeta Joseph Smith mahitungod sa pagpadayag:

“Ang usa ka tawo makadawat og kaayohan pinaagi sa pagmatikod sa unang pag-aghat sa espiritu sa pagpadayag; sama pananglit, kon mabati ninyo ang lunsay nga panabut o kahibalo nga mosulod nganha kaninyo, mahimong mohatag kini kaninyo og kalit nga pagpanggawas sa mga ideya, aron nga pinaagi sa pagkamatikod niini, inyong makita nga kini matuman sa samang adlaw o sa dili madugay; (pananglit) kadtong mga butang nga gisulod nganha sa inyong mga hunahuna pinaagi sa Espiritu sa Dios, mahinabo, ug sa ingon pinaagi sa pagkat-on sa Espiritu sa Dios ug sa pagsabut niini, kamo motubo ngadto sa baruganan sa pagpadayag, hangtud kamo mahimong hingpit diha ni Kristo Jesus.” [History of the Church, 3:381.]

Sa unsang mga butang kamo makadawat og pagpadayag? Makapakugang ba kaninyo nga makadungog nga kamo— ang tanang mga miyembro sa Simbahan kinsa nakadawat sa Espiritu Santo—mahimong makadawat og pagpadayag? Dili alang sa presidente sa Simbahan, dili kon unsaon sa pagdumala sa mga kalihokan kalabut sa ward, sa stake, o sa misyon diin kamo nagpuyo, apan ang matag indibidwal diha sa iyang kaugalingong kahimtang adunay katungod sa pagdawat og pagpadayag pinaagi sa Espiritu Santo. …

Ang matag tawo adunay pribilehiyo sa paggamit niini nga mga gasa ug niining mga pribilehiyo sa pagdumala sa iyang kaugalingong mga kalihokan; sa paggiya sa iyang mga anak sa dalan nga kinahanglan ilang pagalaktan, sa pagdumala sa iyang patigayon o bisan unsa nga iyang pagabuhaton. Kini iyang katungod ang pagtagamtam sa espiritu sa pagpadayag ug sa inspirasyon sa pagbuhat sa matarung nga butang, ang magmaalamon ug magmabinantayon, makiangayon ug magbinuotan, sa tanan nga iyang buhaton. Ako nasayud nga kana usa ka tinuod nga baruganan, ug kana mao ang butang nga gusto nakong mahibaloan sa mga Santos sa Ulahing mga Adlaw. Nan karon, kitang tanan kinahanglan nga maninguha sa pagpaningkamot ug pagpatalinghug ngadto sa kalit nga mga ideya nga moabut kanato, ug kon kita mopatalinghug niini ug mag-ugmad og dalunggan nga maminaw niining mga pag-aghat kita usab—matag usa kanato—motubo diha sa espiritu sa pagpadayag.

Karon adunay usa pa ka paagi diin ang pagpadayag moabut, ug kana pinaagi sa mga damgo. O, dili ako mosulti kaninyo nga ang inyong matag damgo usa ka direkta nga pagpadayag gikan sa Ginoo. … Apan ako nahadlok nga niining panahon sa pagka-kalibutanon adunay uban kanato kinsa malagmit dali nga makahukom nga ang damgo walay katuyoan, ug dili importante. Ug gani sa tibuok mga kasulatan dihay na-rekord nga mga hitabo diin ang Ginoo, pinaagi sa mga damgo, migiya sa Iyang mga katawhan. …

Ang butang nga kinahanglang paningkamutan natong tanan mao ang pagpakabuhi, nagsunod sa mga kasugoan sa Ginoo, nga Siya motubag sa atong mga pag-ampo, sa mga pag-ampo sa atong mga minahal, sa mga pag-ampo sa mga General Authority, alang kanato. Kita kanunay nga nag-ampo alang sa mga miyembro sa Simbahan, ug nagpasalamat kita sa Dios kon kita masayud nga sila nag-ampo alang kanato. Kon kita magpuyo nga takus, niana ang Ginoo mogiya kanato—pinaagi sa personal nga pagpakita, o pinaagi sa Iya gayud nga tingog, o pinaagi sa tingog nga moabut sa atong hunahuna, o pinaagi sa pagbati sa atong kasingkasing ug sa atong kalag. Ug o, unsa kita ka mapasalamaton kon ang Ginoo mopadala kanato sa damgo diin ipadayag ngari kanato ang mga kaanindot sa kahangturan o usa ka pasidaan ug direksyon alang sa atong espesyal nga kahupayan. Oo, kon kita magpakabuhi, ang Ginoo mogiya kanato alang sa atong kaluwasan ug alang sa atong kaayohan.

Isip usa sa pinakaubos kaninyo, ug naghupot sa katungdanan nga karon akong gihuptan, ako buot nga mohatag sa akong mapainubsanon nga pagpamatuod nga akong nadawat pinaagi sa tingog ug sa gahum sa pagpadayag sa kahibalo ug pagsabut nga ang Dios mao. …

Ako mohatag sa akong ligdong nga pagpamatuod nga ang Simbahan karon gigiyahan pinaagi sa pagpadayag. Ang matag kalag diha niini kinsa napanalanginan sa pagdawat sa Espiritu Santo adunay gahum sa pagdawat og pagpadayag. Ang Dios motabang kaninyo ug kanako nga kita sa kanunay magpakabuhi aron ang Ginoo makatubag sa mga pag-ampo sa matinud-anon pinaagi kanato.³

Unsaon nato sa pag-ampo ngadto sa atong Amahan sa Langit aron Siya makagiya kanato?

Adunay dakong kalainan tali sa pag-ampo ug sa pagpakigsulti sa Dios. Adunay pipila nga akong nadunggan nga nag-ampo kinsa nakigsulti sa Dios, usa niini mao si kanhi [Elder Charles A. Callis. Wala ako makadungog kaniya nga nag-ampo diha sa balaan nga mga altar sa templo, wala ako makadungog kaniya sa dihang nangluhod kami sa pag-ampo kaniadtong kami diha sa malisud nga misyon apan siya ingon nga, samtang siya nagsulti, nagkabut ngadto gayud sa mga pultahan sa balaang puy-anan nga dapit sa atong Amahan, ug siya nakigsulti sa balaan nga mga binuhat. Ayaw pagsulti og mga pag-ampo, ayaw basaha ang mga pagampo, apan pagkat-on sa pagpakigsulti sa Dios ug nga ang pagpakigsulti sa Dios mao ang matang sa pag-ampo nga sa akong hunahuna mao ang gipasabut ni Moroni sa dihang siya misulat diha sa panapos nga kapitulo sa atong Basahon ni Mormon…:

“Ako moawhag kaninyo nga kamo mangutana sa Dios, ang Amahan sa Kahangturan, sa ngalan ni Kristo, kon kini nga mga butang dili ba tinuod; ug kon kamo mangutana sa kinasingkasing, uban sa tinuod nga katuyoan, nga may hugot nga pagtuo kang Kristo, siya mopakita sa kamatuoran niini nganha kaninyo, pinaagi sa gahum sa Espiritu Santo.” [Moroni 10:4.]

… Mao kini ang unsay akong nasabtan nga usa ka pag-ampo sa hugot nga pagtuo,… hugot nga pagtuo sa Dios ug sa Iyang Anak, nga si Jesukristo, nga kon wala kini walay tawo nga makaistorya sa Dios.⁴

Ako nakasugat og kasinatian nga nabatunan sa among minahal nga si Richard Evans [sa Korum sa Napulog Duha] diha sa usa sa iyang mga biyahe. … Naglingkod siya tupad sa usa ka tawo pipila ka gabii na ang milabay, diha sa kilid sa usa ka inila nga batid sa industriya, kinsa misulti kaniya sa yano sa pipila ka mga pulong kon giunsa niya sa pag-atubang ang bug-at nga mga problema sa iyang kinabuhi ug giunsa niya paghimo sa mga desisyon sa matag adlaw. “Kon ako momata sa buntag,” siya miingon, “Akong bation sa kasagaran nga ako dili makaatubang niini, apan kon ako moluhod ug yanong moingon, ‘Dios, tabangi ako sa pagbuhat unsay kinahanglan nga akong buhaton karong adlawa,’ ang kalig-on moabut, ang akong bation nga ako makatupong niini. Ug ako yanong naghunahuna Kaniya isip akong amahan ug ako makigsulti Kaniya sa yano ug sa direkta ingon sa akong pagpakigsulti sa akong amahan sa dihang dinhi pa siya sa yuta.”…

[Namalandong si Elder Evans:] “Ako nahimong malumo ug napainubsanon sa direkta ug yanong higala nga akong gikatapad nianang gabhiona. Dili siya kauban sa akong tinuohan, apan [kini] ang akong kaugalingong sinsero nga pagtuo nga siya dili makaistorya ngadto sa Dios uban sa dakong katagbawan ug kasiguroan kon siya nagtuo Kaniya nga usa lamang ka kusog, o sa dili malitok nga tinuod nga kahulugan, ang kinaiyahan ug katuyoan diin siya walay nahibaloan, o sa bisan gamay walay makahatag kaniya sa sigurado nga pagbati nga siya sa tinuod nakig-istorya ngadto sa iyang amahan.”…

Sama sa gisulti ni Jacob ngadto sa iyang pamilya…, “O pagkawalay katapusan sa pagkabalaan sa atong Dios! Kay siya nasayud sa tanan nga mga butang, ug walay butang nga siya wala mahibalo.” (2 Nephi 9:20.) Karon, kon inyo lamang unta ibutang kana sa hunahuna kamo adunay sinugdanan, kamo adunay pakigdait uban Kaniya. Kita Iyang anak nga lalaki, Iyang anak nga babaye. Siya nakaila kanato. Siya nasayud sa mao gayud nga mga butang ug sa mga panahon nga gikatakda na, ug sa dapit diin kita mopuyo, ug sa mga panahon kanus-a kita magpakabuhi. Mao nga Kaniya lamang kita mohatag sa hingpit nga pagsalig.⁵

Usa sa labing bililhon sa tanang mga kabtangan nga atong maangkon o ang labing bilihon nga kahibalo nga atong maangkon mao nga ang Ginoo maminaw ug motubag sa mga pag-ampo—o, sa pagbutang niini sa laing paagi, nga kita nakakat-on unsaon sa pagpakigsulti ngadto sa Dios. Ang pag-ampo dili lamang usa ka butang sa pagsulti sa mga pulong, sama sa gitudlo sa ubang mga simbahan, apan sa pag-ila nga ang Dios, ang atong Langitnong Amahan, ug ang Iyang Anak, nga si Jesukristo, buhi, tinuod nga mga tawo ug nga pinaagi sa pangalagad sa laing miyembro sa Dios nga Kapangulohan, sa Espiritu Santo o sa Balaan nga Espiritu, kita mahimong makigsulti Kaniya, ang atong Langitnong Amahan, ug modawat og tubag sa atong pangutana ug kalig-on alang sa atong mga adlaw.⁶

Sa pagpaubos pangandam sa pagsulti uban ni Pablo, “Ginoo, unsay gusto nimo nga akong buhaton?” (Mga Buhat 9:6) Ug sa tumang kaisug sulti uban sa batan-on nga si Samuel, “Sulti, Ginoo, kay ang imong sulugoon namati” (1 Samuel 3:9). Magpaubos ka, ug ang Ginoo nga imong Dios moagak kanimo pinaagi sa kamot, ug mohatag kanimo og tubag sa imong mga pag-ampo [tan-awa sa D&P 112:10].⁷

Si Presidente [David O.] Mckay mitudlo kanato niini didto sa templo usa ka adlaw niana. … “Ako gustong mosulti kaninyo og usa ka butang: Kon ang Ginoo mosulti kaninyo unsay buhaton, kamo kinahanglang adunay kaisug sa pagbuhat niini o kamo dili na angay nga mangutana kaniya pag-usab.” Nakakat-on usab ako niana nga leksyon. Usahay sa tungang gabii ako mahigmata ug dili na makatulog hangtud ako mobangon ug isulat diha sa papel ang butang nga nakapalibug kanako. Apan kini nagkinahanglan og dakong kaisug sa pagbuhat sa higayon nga gisugo isip tubag sa mga pag-ampo.⁸

Pagpuasa og duha ka mga kan-anan sa unang Dominggo sa bulan ug bayad sa tibuok kantidad sa duha ka mga kan-anan nga wala nimo kan-a. … Ang Ginoo misulti ngadto ni Isaias, nga kadtong kinsa magpuasa ug mohatag sa ilang pan ngadto sa gigutom, makatawag ug ang Ginoo motubag, makasingit ug ang Ginoo moingon, “Ania Ako.” [Tan-awa sa Isaias 58:6–9.] Kana mao ang usa ka paagi nga mahimo nimo ang pagpakigsulti sa Ginoo. Sulayi kini niining tuiga. Sunda ang balaod sa pagpuasa sa hingpit nga paagi.⁹

Kon kita magbarug sa kinasang-an sa duha ka kapilian nga mga desisyon, hinumduman nato unsa ang gisulti sa Ginoo nga atong kinahanglan nga buhaton: Tun-i ang tibuok sitwasyon diha sa atong hunahuna hangtud sa katapusan; sa dili pa molihok, pangutan-a ang Ginoo kon kini ba husto, ug ipahiangay ang atong mga kaugalingon ngadto sa espirituhanon nga tubag— makabaton og kainit sa dughan sa sulod kaninyo aron masayud nga ang atong desisyon husto, o makabaton og kasamok sa hunahuna nga maoy makapakalimot kanato kon kini sayop [tan-awa sa D&P 9:7–9]. Dayon, sumala sa gisaad sa Ginoo, “… ang Espiritu ihatag [kanato] pinaagi sa pag-ampo sa hugot nga pagtuo.” (D&P 42:14.)…

Kon kita matinguhaon nga mangita, kita makakab-ot ngadto nianang espirituhanon nga kalibutan alang sa mga tubag nga makahatag kanato dili lamang sa importante nga mga panalangin, apan usab sa halangdong saksi diha sa atong mga kasingkasing, nga ang atong mga lihok, ang atong kinabuhi, ug ang atong mga paghago nga adunay silyo sa pagtugot sa Ginoo ug Tiglalang kanatong tanan.¹⁰

Unsay atong mabuhat aron makadawat og personal nga pagpadayag gikan sa Ginoo?

Ang pinaka-importanting butang nga inyong mabuhat mao ang pagkat-on sa pagpakigsulti sa Dios. Pakigsulti ngadto Kaniya sama sa inyong pagpakigsulti ngadto sa inyong amahan, kay Siya mao ang inyong Amahan, ug Siya buot nga kamo makigsulti ngadto Kaniya. Siya buot nga kamo makaugmad og mga dunggan nga maminaw, kon Siya mohatag kaninyo sa pagbati sa Espiritu sa pagsulti kaninyo unsay buhaton. Kon kamo makakat-on sa pagpaminaw sa kalit nga mga ideya nga moabut sa inyong mga hunahuna, inyong mamatikdan kadtong mga butanga nga moabut sa takna gayud sa inyong panginahanglan. Kon kamo mag-ugmad og dunggan sa pagpaminaw niining mga pag-aghat, kamo makakat-on sa paglakaw pinaagi sa espiritu sa pagpadayag.¹¹

Unsaon nato sa pagpalambo sa espirituhanong kalidad sa atong kinaiyahan aron makaalagad sa atong yutan-ong mga misyon nga mas hingpit ug sa ingon mahiangay sa walay kinutuban nga gahum sa [Dios]… ?

Si Ammon mitubag niana nga pangutana sa usa ka bahin: “Oo, siya nga naghinulsol ug naggamit sa hugot nga pagtuo, ug nagpasiugda og mga maayo nga buhat, ug nag-ampo kanunay sa walay paghunong—ngadto sa ingon kini ihatag aron masayud sa mga misteryo sa Dios. …” (Al. 26:22.)

Si David, ang salmista, nakakat-on bisan usa pa ka batan-ong lalaki sa tinubdan sa espirituhanong gahum. Ang espiritu mihunghong “Humilom kamo, ug ilhon ninyo nga ako mao ang Dios. … Ang atong dalangpan mao ang Dios ni Jacob.” (Salmo 46:10–11.)

Ang mga propeta sa karaan nakakat-on, ingon nga ang tanan kinahanglan gayud nga masayud, unsaon sa pagpakigsulti ngadto sa Ginoo pinaagi sa pag-ampo, sa pagpakigsulti ngadto ug niana makadawat sa mga tubag sa kaugalingong paagi sa Ginoo. …

Ang Ginoo misulti ni Elijah, ang propeta: “Lumakaw ka, ug tumindog ka sa ibabaw sa bukid sa atubangan sa Ginoo. “Usa ka daku ug makusog nga hangin mibuak sa mga bukid, ug mikupog sa mga bato sa atubangan ni Jehova apan si Jehovah wala diha sa hangin: ug tapus sa hangin, ang usa ka linog; apan si Jehova wala diha sa linog:

“Ug sa tapus sa linog, ang usa ka kalayo: apan si Jehova wala diha sa kalayo: ug sa tapus sa kalayo usa ka malinawon diyutay nga tingog.

“Ug mao kadto, sa nadunggan ni Elias kini, nga iyang giputos ang iyang nawong sa iyang kupo, ug migula, ug mitindog sa baba sa langub. …” (1 Mga Hari 19:11–13.)

Sa kasagaran kon ang Dios mamulong sa malinawon, hagawhaw nga tingog, sama sa iyang gibuhat ngadto ni Elijah didto sa langub, dili tingali kini madungog sa atong pisikal nga dunggan, sama sa gubaon nga radyo, kita tingali wala maangay ngadto sa walay katapusan.

… Sa kasagaran karon, ang mga lalaki ug mga babaye nagpuyo nga layo kaayo gikan sa mga butang nga espirituhanon nga kon ang Ginoo magsulti ngadto sa ilang pisikal nga pandungog, ngadto sa ilang mga hunahuna nga walay madungog nga tingog, o ngadto kanila pinaagi sa iyang gitugutan nga mga sulugoon kinsa, kon gigiyahan sa Espiritu, sama nga iyang kaugalingong tingog, sila makadungog lamang og langas sama kanila didto sa Jerusalem. Sa ingon, sila walay madawat nga kaalam, ni kasiguroan sa kaugalingon, nga ang hunahuna sa Ginoo namulong pinaagi sa iyang mga lider nga propeta.

… Si Enos, ang apo nga lalaki ni Lehi, mihatag kanato aron makasabut ngano nga ang uban makadawat og kahibalo sa mga butang sa Dios samtang ang uban dili. Si Enos misaysay sa iyang pakigbisog nga makaangkon sa kapasayloan sa iyang sala aron siya mahimong takus sa iyang balaan nga calling.

Dayon siya mitapos: “Ug samtang ako nakigbisog diha sa espiritu, tan-awa, ang tingog sa Ginoo midangat sa akong hunahuna pag-usab, nag-ingon: Ako moduaw sa imong mga kaigsoonan sumala sa ilang kakugi sa paghupot sa akong mga sugo. …” [Enos 1:10.]

Anaa kaninyo, sa yano nga pinulongan, usa ka importante nga baruganan. Dili ang Ginoo ang mipugong sa iyang kaugalingon gikan kanato. Kita mao kinsa ang nagpugong sa atong mga kaugalingon gikan kaniya tungod sa atong pagkapakyas sa pagsunod sa iyang mga sugo.¹²

Kon kita moduol sa Ginoo alang sa usa ka panalangin kita buot nga mosiguro nga atong gibutang ang atong mga kaugalingon sa kahimtang sa katakus aron sa pagdawat niana nga atong giampo.¹³

Dili ba kamo buot nga magpuyo nga sa higayon nga ang Dios mosulti kamo makadungog niini, o aron mahimong takus nga makaangkon og pagbisita gikan sa ingon og anghel nga bisita, o tingali andam nga moadto sa presensya sa Ginoo? Ang Ginoo misulti kanato unsaon nga kita maandam. Dinhi siya miingon diha sa usa ka mahinungdanong pagpadayag niini nga mga pulong: “Sa pagkatinuod, sa ingon namulong ang Ginoo: Kini mahinabo nga ang matag kalag kinsa mobiya sa iyang mga sala ug moduol ngari kanako, ug motawag sa akong ngalan, ug mosunod sa akong tingog, ug mohupot sa akong mga sugo, makakita sa akong panagway ug masayud nga mao Ako.”

Sa dihang ang tingog miabut gikan sa mga kalangitan ngadto sa mga tawo sa yuta sa Bountiful sila wala makadungog niini. Kini ingon lamang ngadto kanila og mga kaguliyang, ug sa diha nga giduyog nila ang ilang mga kasingkasing nakabati sila sa mga pulong apan dili sila makasabut; apan sa dihang uban sa ilang tibuok nga mga kasingkasing ug mga hunahuna sila mipunting diha niini, niana ang tingog masabtan [Tan-awa sa 3 Nephi 11:3–5.])¹⁴

Ang Dios nagtugot nga matag usa kanato mahimo unta nga magpuyo nga kita makapahimulos niana nga pakig-abin sa Dios pinaagi sa Espiritu Santo, ug masayud sa walay pagduhaduha nga siya buhi, ug maandam usa ka adlaw sa pagsulod ngadto sa iyang presensya.¹⁵

Mga Sugyot alang sa Pagtuon

Sa unsa nga mga butang kita mahimong makadawat og pagpadayag? Unsaon nato sa pagdugang sa atong kahanas sa pagdungog sa tingog sa Ginoo ug sa “pagtubo ngadto sa baruganan sa pagpadayag”?
Unsa ang pipila sa mga paagi nga kita makadawat og pagpadayag pinaagi sa hinay, hinagawhaw nga tingog sa Espiritu?
Unsa ang mga kalainan tali sa pagpamulong og pag-ampo ug sa pagpakigsulti ngadto sa Dios? Unsay buot ipasabut sa pagampo “uban ang tinuod nga tuyo”? (Moroni 10:4).
Sa unsa nga paagi nga ang pagkasayud nga ikaw usa ka anak nga lalaki o anak nga babaye sa Dios maka-apekto sa paagi sa inyong pagduol Kaniya diha sa pag-ampo? Sa unsa nga paagi kana nga kahibalo makahimo kaninyo sa pagsalig Kaniya?
Kon kamo nag-atubang og importanteng mga desisyon, unsa ang inyong buhaton aron makadawat sa paggiya gikan sa Ginoo? Ngano nga nagkinahanglan og kadasig sa paglihok sa mga pagaghat sa Espiritu?
Sa unsa nga paagi nga kita usahay “nagpugong sa atong mga kaugalingon” gikan sa atong Amahan sa Langit? Sa unsa nga paagi kita mas mapaduol kanunay ngadto Kaniya diha sa atong kaugalingong mga kinabuhi ug diha sa atong mga pamilya?

Si Propeta Enos nangayo sa Ginoo diha sa kinasingkasing nga pag-ampo. Kita kinahanglan usab nga mangita nga makugihon sa “pagpakigsulti ngadto … sa atong Langitnong Amahan, ug modawat og tubag sa atong mga pangutana ug kalig-on alang sa atong mga adlaw.”

Sama sa batang lalaki nga si Samuel, kita kinahanglan nga andam sa pag-ingon, “Sulti, Ginoo; kay ang imong sulugoon namati” (1 Samuel 3:9) ug dayon molihok nga madasigon sa tubag sa atong pag-ampo.