Kapitulo 5

Naglakaw diha sa Kahayag sa Pagpamatuod

Sa unsa nga paagi nga ang kahayag sa atong pagpamatuod motubo ngadto sa usa ka “kahayag sa kasiguroan”?

Pasiuna

Sulod sa kapin sa 32 ka tuig, si Harold B. Lee usa ka linain nga saksi sa Manluluwas, nga si Jesukristo. Siya mipamatuod, “Sa tumang kaligdong, ug uban sa akong tibuok kalag, ako mopamatuod nga ako nasayud nga si Jesus buhi, nga siya mao ang Manluluwas sa kalibutan.”¹

Sa pagpamulong kon unsaon sa pag-angkon og pagpamatuod, siya miingon:

“Sa makausa gibisitahan ako og batan-ong pari sa Katoliko kinsa miabut uban sa usa ka stake missionary gikan sa Colorado. Akong gipangutana nganong mianhi siya, ug siya mitubag, ‘Mianhi ko aron makigkita kanimo.’

“‘Ngano?’ Ako nangutana.

“ ‘Bahin niana,’ siya miingon, ‘Nagpangita ako og mga konsepto nga wala pa nako makaplagi. Apan sa akong pagtuo akong nakita kini karon sa Mormon nga komunidad.’

“Kadto misangpot sa tunga sa oras nga panag-istoryahanay. Giingnan nako siya, ‘Padre, kon ang imong kasingkasing mosugod sa pagsulti kanimo sa mga butang nga wala mahibaloi sa imong hunahuna, niana ikaw mibati sa Espiritu sa Ginoo.’

“Siya mipahiyom ug miingon, ‘sa akong pagtuo nahitabo na kana kanako.’

“ ‘Nan ayaw paghulat og dugay kaayo,’ giingnan nako siya.

“Pipila ka semana ang milabay ako nakadawat og tawag sa telepono gikan kaniya. Siya miingon, ‘Sa sunod Sabado ako bunyagan na nga miyembro sa Simbahan, tungod kay ang akong kasingkasing misulti kanako sa mga butang nga wala mahibaloi sa akong hunahuna.’

“Nakabig siya. Iyang nakita unsay kinahanglan nga iyang makita. Iyang nadungog unsay kinahanglan nga iyang madungog. Nakasabut siya unsay kinahanglan nga iyang masabtan, ug siya adunay gibuhat mahitungod niini. Siya adunay pagpamatuod.”²

Mga Pagtulun-an ni Harold B. Lee

Unsa ang pagpamatuod?

Ang pagpamatuod mahimong nagpasabut sa yano nga balaan nga pagpadayag ngadto sa tawo sa hugot nga pagtuo. Ang salmista misulti sa sama nga hunahuna: “… ang pagpamatuod sa Ginoo sigurado. …” (Salmo 19:7.) si Pablo, ang apostol, mipahayag “… walay tawo nga makasulti [o makahibalo] nga si Jesus mao ang Ginoo, gawas pinaagi sa Espiritu Santo.” (1 Mga Taga-Corinto 12:3.) Ang mga propeta dugang mitudlo nga kon kamo mangutana sa “pagpangutana sa kinasingkasing, uban sa tinuod nga katuyoan, nga may hugot nga pagtuo kang Kristo, siya mopakita sa kamatuoran niini nganha kaninyo, pinaagi sa gahum sa Espiritu Santo. Ug pinaagi sa gahum sa Espiritu Santo kamo mahimo nga masayud sa kamatuoran sa tanan nga mga butang” (Moroni 10:4–5.) …

Ang Dios buhi! Si Jesus mao ang Manluluwas niini nga kalibutan! Ang ebanghelyo ni Jesukristo nga anaa sa kahingpitan sa karaan ug sa moderno nga mga kasulatan tinuod! Kining mga butanga ako nasayud pinaagi sa saksi sa Espiritu ngadto sa akong espiritu.³

Ipakigbahin nako kaninyo ang usa ka kasinatian nga akong nasinati sa usa sa atong mga tigdumala sa negosyo. Ang iyang asawa ug mga anak mga miyembro, apan siya dili. … Siya miingon ngari kanako, “Dili ako makapasakop sa Simbahan hangtud ako makaangkon og pagpamatuod.” Ako miingon ngadto kaniya, “Sa sunod higayon nga ikaw moanhi sa Salt Lake, dali diri ug magistorya ta.” Samtang kami nag-istorya human sa among miting sa negosyo pipila ka semana na ang milabay miingon ako ngadto kaniya, “Wala ako makahibalo kon ikaw nakaamgo ba kon ikaw aduna bay pagpamatuod o wala; o kon ikaw nasayud ba unsa ang pagpamatuod.” Ug mao nga siya gusto nga masayud unsa ang pagpamatuod. Gitubag nako siya pinaagi sa pag-ingon, “Kon ang panahon moabut nga ang imong kasingkasing mosulti kanimo sa mga butang nga wala mahibaloi sa imong hunahuna, kana mao ang Espiritu sa Ginoo nga nagmando kanimo.” Ug dayon ako miingon, “Sa akong pagkaila kanimo, adunay mga butang nga imong nahibaloan sa imong kasingkasing nga tinuod. Walay anghel nga mopikpik sa imong abaga ug mosulti kanimo nga kini tinuod.” Ang Espiritu sa Ginoo mao sama sa gisulti sa Magtutudlo: “Ang hangin bitaw mohuros man ngadto sa buot niyang padulngan, ug mabati mo ang iyang tingog; gani dili nimo mahibaloan diin siya gikan o asa siya padulong: maingon usab niana ang tanan nga gianak sa Espiritu” (Juan 3:8). Mao nga akong giingnan ang akong higala, ang tigdumala sa negosyo: “Karon, hinumdumi nga ang imong pagpamatuod dili moabut sa mahinuklugong paagi, apan kon kini moabut, ang mga luha sa kalipay moumog sa imong unlan sa gabii. Ikaw masayud, akong minahal nga higala, kon kana nga pagpamatuod moabut.”⁴

Akong ipamatuod kanimo nga ako nasayud nga ang Manluluwas buhi, nga ang labing gamhanan nga saksi nga imong maangkon nga Siya buhi moabut kon ang gahum sa Balaan nga Espiritu mosaksi nganha sa imong kalag nga Siya buhi gayud. Mas gamhanan pa kay sa pagtan-aw, mas gamhanan pa kay sa pagkigkuyog ug sa pakigsulti Kaniya, mao kana ang saksi sa Espiritu pinaagi diin ikaw pagahukman kon ikaw mosalikway Kaniya. Apan responsibilidad kaninyong tanan, ingon man usab akong responsibilidad, sa paghimo niana nga pagpamatuod nga malig-on. Kanunay kitang gipangutana, kon unsaon ba gayud sa usa ka tawo sa pagdawat og pagpadayag? Ang Ginoo miingon diha sa usa ka pagpadayag ngadto sa unang mga lider, “Ako mosulti kanimo diha sa imong hunahuna ug sa imong kasingkasing pinaagi sa Espiritu Santo. Kini mopuyo diha kanimo. Mao kini nga pagpadayag ang gigamit ni Moises sa paggiya sa mga anak ni Israel ngadto sa Pula nga Dagat ug sa pagtabok niini.” [Tan-awa sa D&P 8:2–3.] Kon kana nga Espiritu misaksi sa atong espiritu, kana usa ka pagpadayag gikan sa Makagagahum nga Dios.⁵

[Sa dihang namatay si Lazaro, ang Manluluwas mipahayag ngadto ni Marta,] “Ako mao ang pagkabanhaw ug ang kinabuhi: ang mosalig kanako, bisan siya mamatay, mabuhi siya: Ug ang tanan nga buhi ug magasalig kanako dili na gayud mamatay.” Dayon Iyang gitan-aw si Marta ug Siya miingon, “Motuo ba ikaw niini?” Ug gikan sa kasingkasing niining mapainubsanon nga babaye, adunay nahitabo ug siya miingon sa samang pagtuo nga gisulti ni Pedro, “Oo, Ginoo: ako nagtuo nga ikaw mao ang Kristo, ang Anak sa Dios, ang moanhi sa kalibutan.” [Juan 11:25–27.]

Diin man kana niya makuha? Kini wala makuha gikan sa pagbasa og mga libro. Kini wala makuha gikan sa pagtuon og teolohiya o siyensya o pilosopiya. Siya adunay pagsaksi diha sa iyang kasingkasing, sama ni Pedro. Kon ang Magtutudlo mitubag, Siya unta miingon, “Dalaygon ikaw, Marta, kay wala kini ipadayag kanimog tawo, kon dili gipadayag kini kanimo sa akong Amahan nga anaa sa langit.”… Ang labing bililhon sa tanang mga butang nga imong maangkon mao ang pagbaton og saksi diha sa imong kasingkasing nga kining mga butanga tinuod.⁶

Dili daghan ang nakakita sa nawong sa Manluluwas dinhi sa pagkamortal, apan matag usa kanato kinsa gipanalanginan sa pagdawat sa gasa sa Espiritu Santo human sa bunyag mahimong makabaton og hingpit nga kasiguroan sa Iyang pagkatawo ingon og atong nakita. Sa pagkatinuod, kon kita adunay hugot nga pagtuo sa katinuod sa Iyang pagkatawo bisan og kita wala makakita, sa gipasabut sa Magtutudlo sa Iyang pamahayag ngadto ni Tomas, gani mas dako pa ang panalangin niadtong kinsa “wala makakita, ug mituo” (Juan 20:29), “kay kita nagakinabuhi man pinaagi sa pagtuo” (2 Mga Taga-Corinto 5:7). Bisan og dili makakita, apan nagtuo, kita naglipay sa dili matukib nga kalipay sa pagdawat sa bunga sa atong hugot nga pagtuo, gani ang kaluwasan sa atong kalag. (tan-awa sa 1 Pedro 1:8–9).⁷

Matingub ba nato kini ug moingon, nga si bisan kinsa nga tawo nga nakadawat og tinuod nga pagpamatuod nakadawat og pagpadayag gikan sa buhing Dios, o siya dili makaangkon og pagpamatuod? Bisan kinsa nga adunay pagpamatuod, niana, nakatagamtam sa gasa sa panagna, siya adunay espiritu sa pagpadayag. Siya adunay gasa diin ang mga propeta nakahimo sa pagpamulong kalabut sa ilang mga responsibilidad. …

Ang Ginoo motabang kanatong tanan sa pagpaningkamot nga makaangkon niana nga pagpamatuod nga labing importante sa atong pagpangandam nga makahibalo. Kon sa katapusan atong makuha kanang balaan nga hunahuna nga si Joseph Smith usa ka propeta ug nga ang ebanghelyo tinuod, ang tanang uban nga daw mga kalisud matunaw sama sa bagtok nga yamog sa dili mosidlak ang adlaw.⁸

Unsaon nato pag-andam ang atong mga kaugalingon sa pagdawat og pagpamatuod?

[Ang Manluluwas] gikutlo nga misulti niana “… ang gingharian sa Dios anaa kaninyo.” (Lucas 17:21.) Ang mas husto nga paghubad tingali mosulti ingon niini, “Ang gingharian sa Dios anaa kaninyo o sa inyong taliwala,” apan samtang ako naghunahuna nianang laing pamahayag, “Ang gingharian sa Dios anaa kaninyo,” nahinumdom ako sa usa ka kasinatian nga among nasinati uban sa grupo sa mga estudyante gikan sa Unibersidad sa Brigham Young … didto sa Lion House, ug dihay napulog unom, nagrepresentar sa napulog unom ka langyaw nga mga nasud, gihangyo sa pagbarug ug sa pagsulti giunsa nila sa pagkahibalo mahitungod sa ebanghelyo ug sa pagdawat niini, … ug sa paghatag sa ilang mga pagpamatuod. Usa kadto ka hilabihan ka talagsaon nga gabii. Nakadungog kami gikan sa mga kabatan-onan gikan sa mga nasud sa Mexico, Argentina, Brazil, Scandinavian, France, ug England. Ang istorya managsama. Sa dihang nagsugod sila sa pag-istorya giunsa nila sa pagkaplag ang ebanghelyo, mao kini: Sila naghandom sa kamatuoran. nagpangita sila sa kahayag. Wala sila matagbaw, ug taliwala sa ilang pagpangita, adunay miduol kanila uban sa mga kamatuoran sa ebanghelyo. Nag-ampo sila mahitungod niini ug mainitong nangayo sa Ginoo, matinguhaon, uban sa ilang tibuok kasingkasing, ug nakadawat og balaan nga pagpamatuod diin sila nasayud nga kini mao ang ebanghelyo ni Jesukristo. … Busa sulod sa mga kasingkasing sa tanan, sa matag matinuoron nga nagpangita sa kamatuoran, kon siya adunay tinguha nga makahibalo, ug magtuon uban sa tinuod nga tinguha ug hugot nga pagtuo diha ni Ginoong Jesukristo, ang gingharian sa Dios tingali anaa kaniya, o sa laing mga pulong, ang gahum sa pagdawat niini iya.⁹

Sa gamot sa indibidwal nga pagpamatuod kinahanglan gayud ang usa ka matarung, putli nga kinabuhi, kon dili ang Espiritu dili makasaksi sa pagkabalaan sa misyon sa Ginoo o niini nga buhat sa atong panahon.¹⁰

Ang unang importante … sa pag-angkon og pagpamatuod mao ang pagsiguro nga ang personal nga espirituhanong “kahimtang” nga anaa sa maayo nga pagkabutang. Ang iyang hunahuna ug lawas kinahanglang limpyo kon siya buot nga makatagamtam sa pagpakig-uban sa gasa sa Espiritu Santo diin siya makahibalo sa kasiguroan sa espirituhanong mga butang.¹¹

Ang pagkakabig nagpasabut og mas labaw pa kay sa “tigdala og kard” nga miyembro sa Simbahan uban sa resibo sa ikapulo, kard sa pagkamiyembro, rekomend sa templo, uban pa. Kini nagpasabut sa pagbuntog sa mga kalagmitan sa pagpanaway ug sa pagpaningkamot sa pagbuntog sa mga kahuyang sa kaugalingon ug dili lamang unsay makita sa gawas.¹²

Karon kon ang atong mga misyonaryo mogawas, kita mosulti ngadto kinsa ilang gisangyawan, “Wala kami mohangyo kaninyo sa pagpasakop sa Simbahan aron lamang sa pagbutang sa ingyong mga pangalan diha sa mga rekord. Dili kana ang among tuyo. Mianhi kami kaninyo sa pagtanyag kaninyo sa labing mahinungdanon nga gasa nga ikahatag sa kalibutan, ang gasa sa gingharian sa Dios. Ania kini alang kaninyo kon kamo modawat ug motuo lamang.” Karon mao kana ang atong hagit ngadto sa kalibutan. “Makatudlo kami sa mga doktrina sa Simbahan ni Jesukristo ug magpamatuod sa pagkabalaan sa buhat, apan ang saksi sa kamatuoran sa unsay among gitudlo kinahanglan nga moabut gikan sa inyong kaugalingong pagpangita.”

Kita mosulti sa atong mga katawhan kinsa atong gitudloan, “Karon, pangutan-a ang Ginoo. Pagtuon, trabaho, ug pag-ampo.” Mao kini ang proseso diin ang mga katawhan nagpasakop ngadto sa Simbahan, ug mao kini ang samang paagi nga gikan sa sinugdanan ang matinuoron sa kasingkasing bisan asa nagpasakop sa Simbahan.¹³

Sa dihang gipunting ni Jesus ang iyang mga mata diha sa pagampo kay “ang iyang takna miabut na,” [tan-awa sa Juan 1:11] mipahayag siya sa usa ka talagsaong kamatuoran nga kinahanglan puno og kahulugan ngadto sa matag kalag: “Ug ang kinabuhing dayon mao kini, ang ilang pagpakaila kanimo nga mao ang bugtong tinuod nga Dios, ug kang Jesukristo, nga imong pinadala.” (Juan 17:3.) Samtang kini nga pamahayag adunay mas lawom pa nga kamahinungdanon kay sa akong mahisgutan dinhi, buot ako nga mohisgot og usa gikan niini. Unsaon ninyo sa pagkaila sa Amahan ug sa Anak? … Kita magsugod sa pag-angkon niana nga kahibalo pinaagi sa pagtuon. Ang Manluluwas mitambag kanato sa “Pagsusi sa mga kasulatan, kay nagahunahuna man kamo nga pinaagi niini makakaplag kamo sa kinabuhing dayon: ngani kini mao ang nagapanghimatuod mahitungod kanako.” (Juan 5:39.) Diha niini makita ang kasaysayan sa pagpakigsandurot sa Dios sa tawo sa matag dispensasyon ug sa mga buhat ug mga pulong sa mga propeta ug sa Manluluwas mismo ingon nga gihatag “pinaagi sa pagdasig sa Dios,” sama sa gisulti ni Apostol Pablo, “ug may kapuslanan alang sa pagpanudlo, alang sa pagpamadlong, alang sa pagpanul-id ug alang sa pagmatoto sa pagkamatarung: aron ang tawo sa Dios mamahingpit, masinangkapan alang sa tanang maayong buluhaton.” (II Timoteo 3:16–17.) Ang kabatan-onan kinahanglang dili motugot nga molabay ang adlaw nga dili makabasa gikan niining sagrado nga mga basahon.

Apan dili pa igo ang pagkat-on lamang sa iyang kinabuhi ug mga buhat pinaagi sa pagtuon. Ang Magtutudlo mao ang mibalos agi og tubag sa pangutana kon unsaon sa usa nga mahimong makahibalo Kaniya ug sa Iyang doktrina: “Kon tuyuon ni bisan kinsa sa pagbuhat sa iyang kabubut-on, iyang mahibaloan” (Juan 7:17). Naghunahuna ba kamo nga ang usa ka batid sa siyensya mahimo nga usa kinsa wala gayud maka-ekspiremento diha sa usa ka laboratoryo? Mohatag ba kamo sa husto nga pagtagad ngadto sa mga komentaryo sa usa ka kritiko sa musika kinsa wala makahibalo sa musika…? Mao usab, ang usa sama sa inyong kaugalingon, kinsa buot “makaila sa Dios” kinahanglan mao ang usa kinsa mobuhat sa Iyang kabubut-on ug mohupot sa Iyang mga sugo ug mogamit sa mga hiyas nga gisunod ni Jesus.¹⁴

Ang pag-angkon sa kahihalo pinaagi sa hugot nga pagtuo dili sayon nga dalan sa pagkat-on. Nagkinahanglan kini og matinguhaong kakugi ug mapadayunong panglimbasog pinaagi sa hugot nga pagtuo. …

Sa laktud, ang pagkat-on pinaagi sa hugot nga pagtuo dili buluhaton sa usa ka tapulan nga tawo. Adunay miingon, kapin kon kulang, nga kanang mao nga proseso nagkinahanglan og pagbawog sa tibuok kalag, ang pagtawag sa labing lawom nga mga pagbati ug mga hunahuna ug sa pagsumpay niini uban ngadto sa Dios—ang husto nga pagkasumpay kinahanglang maporma. Diha lamang moabut ang “kahibalo pinaagi sa hugot nga pagtuo.”¹⁵

Unsay atong mahimo sa pagpalig-on sa atong mga pagpamatuod?

[Ang Magtutudlo miingon ngadto ni Pedro] “Gipangayo kamo ni Satanas, sa pagbaton kaninyo, aron iya kamong alig-igon ingon sa trigo: Apan nangamuyo ako alang kanimo, nga unta dili makabsan ang imong pagsalig: ug sa mahibalik na ikaw kanako, lig-una ang imong mga igsoon” (Lucas 22:31–32). Karon, ako buot nga kamo makamatikod, Siya misulti niana ngadto sa labing labaw sa Napulog Duha. Ako nag-ampo alang kanimo, karon lakaw ug pagpakabig, ug kon ikaw nakabig na, dayon lakaw liguna ang imong igsoon. Kini nagpasabut [kita mahimong] dili makabig ingon man nga kita mahimong makabig. Ang inyong pagpamatuod maoy butang nga anaa kaninyo karon apan dili kamo makabaton niini kanunay.¹⁶

Ang pagpamatuod lisud dakpon sama sa kahayag sa bulan; kini huyang sama sa orchid; kini kinahanglan nga inyong kuhaon og usab matag buntag sa inyong kinabuhi. Kinahanglan kamong molahutay pinaagi sa pagtuon, ug pinaagi sa hugot nga pagtuo, ug pinaagi sa pag-ampo. Kon kamo motugot sa inyong kaugalingon nga masuko, maingon og kamo nagagikan sa kangitngit. Kon kamo motugot sa inyong kaugalingon nga mokuyog sa sayop nga matang sa grupo, kon kamo maminaw sa sayop nga matang sa mga istorya, kon kamo magtuon sa sayop nga matang sa mga hilisgutan, kon kamo magbuhat sa mangil-ad nga mga binuhatan, walay laing mas makuyaw pa kay sa pagpalayo sa Espiritu sa Ginoo gikan kaninyo hangtud nga kini ingon og kamo gikan sa hayag nga kwarto kon kamo mogawas niini nga building, sama nga kamo misulod ngadto sa kangingit.¹⁷

Kanang inyong gihuptan karon nga pagpamatuod dili mainyo pagkaugma gawas kon kamo magbuhat sa butang mahitungod niini. Ang inyong pagpamatuod mahimong madugangan o mahimong makuhaan, nag-agad kaninyo. Nan, hinumduman ba ninyo ang inyong responsibilidad? Ang Ginoo miingon, “Kon tuyoon ni bisan kinsa ang pagbuhat sa kabubut-on sa Dios, nan, iyang mahibaloan kon ang akong gitudlo gikan ba sa Dios o nagsulti ba lamang ako sa kinaugalingon kong kabubut-on” (Juan 7:17).¹⁸

Ang dili tinuod nga nakabig nga Santos sa Ulahing mga Adlaw mahimong imoral. Walay tinuod nga nakabig nga Santos sa Ulahing mga Adlaw nga mahimong dili matinuoron, ni mamakak, ni mangawat. Kana nagpasabut nga ang usa makabaton og pagpamatuod sa karon, apan kon siya mopaminos sa iyang kaugalingon sa pagbuhat sa mga butang nga sukwahi sa mga balaod sa Dios, kini tungod kay nawala ang iyang pagpamatuod ug siya kinahanglang makigbisog sa pag-angkon niini pag-usab. Ang pagpamatuod dili butang nga anaa kaninyo karon ug anaa kaninyo kanunay. Ang pagpamatuod mahimong motubo ug motubo hangtud ngadto sa kahayag sa kasiguroan, o kini magkagamay hangtud mawala, nagagad unsay atong gibuhat mahitungod niini. Ako moingon, ang pagpamatuod nga atong kuhaon balik matag adlaw mao ang butang nga makaluwas kanato gikan sa mga lit-ag sa kaaway.¹⁹

Sa unsa nga paagi nga ang pagpamatuod usa ka angkla sa kalag?

Dihay usa ka higayon sa panahon sa pangalagad ni [Kristo] sa dihang ang Iyang labaw nga apostol, nga si Pedro, mainitong mipahayag sa iyang hugot nga pagtuo ug pagpamatuod sa pagkabalaan sa misyon sa Magtutudlo: “Ikaw mao ang Kristo, ang Anak sa Dios nga buhi.” Ang Ginoo mitubag ngadto ni Pedro pinaagi sa pagpahayag, “… kay wala kini ipadayag kanimog tawo, kondili gipadayag kini kanimo sa akong Amahan nga anaa sa langit” ug sa ibabaw “niining bato”—o sa laing mga pulong, ang gipadayag nga pagpamatuod sa Espiritu Santo, ang pagpadayag nga si Jesus mao ang Kristo—ang Iyang simbahan natukod, ug “ang gahum sa kamatayon dili makabuntog niini.” (Mateo 16:16–18.)²⁰

Ang panahon nagsingabut ug nag-atubang kaninyo karon … gawas kon kamo aduna niana nga pagpamatuod sa kasiguroan nga kini nga mga butang [ang ebanghelyo, ang Simbahan, ug uban pa] tinuod kamo dili makahimo sa pagpugong sa mga unos nga mohampak kaninyo ug maningkamot sa paglaglag kaninyo gikan sa inyong dapit sa seguridad karon. Apan kon kamo nasayud uban sa inyong tibuok kalag nga kini nga mga butang mga tinuod…, kamo makaila kinsa si Jesus nga inyong Manluluwas ug kinsa ang Dios nga inyong Amahan; kamo masayud kon unsa ang impluwensya sa Espiritu Santo. Kon kamo masayud niadto nga mga butang kamo makabarug isip usa ka angkla batok sa tanang mga unos nga mohampak sa inyong balay, sumala sa gihulagway sa sambingay sa Magtutudlo. Kana nga tawo kinsa maminaw sa Iyang mga pulong ug mosunod sa Iyang mga sugo mahisama sa balay nga gitukod diha sa dakong bato, ug kon ang mga unos moabut ug ang mga baha mohampak sa balay ug ang hangin mohuros, kini dili matumba, tungod kay kini natukod diha sa ibabaw sa usa ka dakong bato. “Busa, bisan kinsa nga magapatalinghug niining akong mga pulong ug wala magatuman niini, mahisama siya sa usa ka tawong buang nga nagatukod sa iyang balay diha sa balas: Ug unya mibundak ang ulan, ug mibulog ang mga baha, ug mihuros ang mga hangin ug mihapak niadtong balaya, ug kini mapukan: ug dako gayud ang iyang pagkapukan” (Mateo 7:26–27).

Ang Magtutudlo miingon, ug ako mosulti kaninyo karon, nga ang mga ulan sa katalagman, ang mga ulan sa kalisud, ang mga baha ug mga hangin sa mapait nga mga pagsulay mohampak sa inyong tanang mga balay. Adunay mga tintasyon sa pagpakasala, kamo adunay mga kalisud, kamo adunay kalisud sa pag-atubang sa inyong kinabuhi. Ang mga tawo lamang nga dili mapukan kon moabut kana nga mga pagsulay mao kadtong mitukod sa ilang mga balay sa ibabaw sa dakong bato sa pagpamatuod. Kamo masayud bisan unsa pay moabut; kamo dili makabarug sa hinulaman nga kahayag. Makabarug lamang kamo sa kahayag nga kamo aduna pinaagi sa saksi sa Espiritu nga kamo adunay katungod sa pagdawat.²¹

Dili igo alang kanato isip mga Santos sa Ulahing mga Adlaw sa pagsunod sa atong mga lider ug sa pagdawat sa ilang tambag, apan kita adunay mas dako nga obligasyon sa pag-angkon alang sa atong mga kaugalingon sa dili matarug nga pagpamatuod sa balaan nga pagkatudlo niini nga mga tawo ug sa saksi nga unsay ilang gisulti kanato mao ang kabubut-on sa atong Langitnong Amahan.²²

Ako mianhi kaninyo karon isip usa ka linain nga saksi nga gitugyanan, labaw sa tanan, sa responsibilidad sa paghatag niana nga saksi. Dihay inato nga mga higayon sa dihang ako nakahibalo uban ang kasiguroan. Sa dihang ako nagtinguha alang sa Espiritu aron sa paghatag og pakigpulong mahitungod sa tema sa Pasko sa Pagkabanhaw, ang Pagkabanhaw sa Ginoo, misulod ako sa kwarto nga nag-inusara, mibasa sa upat ka ebanghelyo, ilabi na ngadto sa Pagkalansang, sa pagkabanhaw, ug dihay nahitabo kanako. Samtang ako nagbasa, ingon nga ako mitagamtan og balik, hapit sa mao nga hitabo, dili lamang ang istorya. Ug dayon akong gihatag ang akong mensahe ug nagpamatuod nga karon, ingon nga usa sa labing gamay sa akong mga kaigsoonan, ako, usab, adunay personal nga saksi sa kamatayon ug sa pagkabanhaw sa atong Ginoo ug Magtutudlo. Ngano? Tungod kay adunay usa ka butang midasig sa akong kalag nga ako makapamulong uban sa kasiguroan nga walay pagduhaduha. Mao usab kamo. Ug ang labing makatagbaw nga butang sa tibuok kalibutan, ang labing importante nga angkla sa inyong kalag, sa panahon sa kasamok, sa panahon sa tintasyon, sa panahon sa kasakit, sa mga panahon sa kalibug, sa mga panahon sa inyong mga pakigbisog ug trabaho, [mao nga] kamo masayud uban sa usa kasiguroan nga mosalikway sa tanang mga pagduha-duha nga ang Dios buhi.²³

Mga Sugyot alang sa Pagtuon ug Panaghisgutan

Ngano nga ang pagpadayag gikan sa Balaan nga Espiritu “ang labing gamhanan nga saksi nga inyong maangkon” nga ang Manluluwas buhi?
Unsa nga tambag ang gihatag ni Presidente Lee mahitungod sa unsaon pagdawat og pagpamatuod sa ebanghelyo? Unsay nakatabang kaninyo sa pagdawat sa inyong pagpamatuod?
Sa unsa nga paagi kita makaila sa Langitnong Amahan ug kang Jesukristo?
Unsa sa inyong hunahuna ang gipasabut ni Presidente Lee sa dihang siya miingon nga “Ang pagpamatuod dakpon sama sa kahayag sa bulan; … kinahanglan nga inyo kining kuhaon pag-usab matag buntag sa inyong kinabuhi”?
Unsa kahay hinungdan nga mawala o mamatay ang atong mga pagpamatuod? Unsay atong buhaton aron nga ang kahayag sa atong mga pagpamatuod “motubo ngadto sa kahayag sa kasiguroan”?
Kon makaangkon na kita sa pagpamatuod, unsaon nato sa pagtabang ang uban nga makapalig-on sa ilang mga pagpamatuod?
Sa unsa nga paagi nga ang kahibalo nga ang Dios buhi usa ka angkla sa atong mga kalag sa mga panahon sa kasamok? Kanusa ang inyong pagpamatuod sa Manluluwas nahimong tinubdan sa kalig-on nganha kaninyo?