Pagsabot sa Simbolismo diha sa mga Kasulatan

Ipatin-aw

Ipasabot nga ang Ginoo kasagaran naggamit og mga simbolo sa pagtudlo kanato mahitungod sa Iyang Kaugalingon Mismo ug sa Iyang ebanghelyo. Ang usa ka simbolo nagrepresentar o nagbarog alang sa usa ka laing butang; kini kasagaran usa ka materyal nga butang nga nagrepresentar og usa ka butang nga dili makita. Sama pananglitan, ang gunitanan nga puthaw sa damgo ni Lehi nagrepresentar sa pulong sa Dios (tan-awa sa 1 Nephi 15:23–24). Ang Ginoo usahay naggamit og mga simbolo sa pagsulti ngari kanato sa usa ka mas lawom nga kahulogan. Ang pag-ila ug pagsabot sa simbolismo sa mga kasulatan mokaon og panahon ug paningkamot, apan kini adunay dako nga mga kaayohan.

Ikaw makahimo sa pagpakita ug pagpakigbahin sa mosunod nga mga giya alang sa pagsabot sa simbolismo sa kasulatan:

1. Ilha ang mga simbolo pinaagi sa pagpangita alang sa mga pagtandi.

2. Pagsiksik alang sa mga timaan mahitungod sa mga kahulogan sa mga simbolo diha sa teksto sa mga kasulatan ug diha sa mga footnote, mga ulohan sa kapitulo, sa Giya ngadto sa mga Kasulatan, ug ubang mga tinubdan.

3. Paghunahuna mahitungod sa simbolismo. Mahimo nimong pangutan-on ang imong kaugalingon: Sa unsang paagi kining duha ka butang parehas? O sa unsa kini nga butang, tawo o hitabo sama ?

Modelo

Ikaw makamodelo niini nga kahanas gamit ang mosunod nga ehemplo o usa nga imong kaugalingon:

1. Ilha ang mga simbolo pinaagi sa pagpangita alang sa mga pagtandi. Basaha ang Salmo 23:1, ug ipasabot nga si David mitandi sa Ginoo ngadto sa usa ka magbalantay sa karnero.

2. Pagsiksik alang sa mga timaan. Itudlo ang mga hugpong sa mga pulong “siya nagtultol kanako sa daplin sa mga tubig nga malinaw” ug “ginamandoan niya ako sa mga dalan sa pagkamatarong” diha sa Salmo 23:2–3. Ipasabot kon giunsa niini nga mga hugpong sa mga pulong paghatag og panabot ngadto sa pagtandi.

   Tan-awa ang “Magbalantay sa Karnero” ug “Maayong Magbalantay sa Karnero” diha sa Giya ngadto sa mga Kasulatan. Pakigbahin og ubang mga tudling sa kasulatan nga naghatag og mga pasabot ug mga timaan mahitungod niini nga simbolismo, sama sa Juan 10:14–15 ug 1 Nephi 22:25.

3. Paghunahuna mahitungod sa simbolismo. Pangutana sa imong kaugalingon: Unsay akong nahibaloan mahitungod sa mga magbalantay sa karnero ug unsa ang ilang buhaton alang sa ilang mga karnero? Sa unsang paagi si Jesukristo sama sa usa ka magbalantay sa mga karnero ngari kanato?

   Ipasabot nga sama sa usa ka magbalantay sa karnero, si Jesukristo naghigugma, nag-atiman, nagpanalipod, naggiya, ug nag-amuma kanato. Siya nakaila sa matag usa kanato. Andam siya nga mihatag sa Iyang kinabuhi alang kanato.

Pagpraktis

Pagpili og usa ka tudling gikan sa pagbasa sa kasulatan niini nga semana nga naglakip og simbolismo. O ikaw makapili gikan sa mga ehemplo nga gihatag sa ubos. Hatagi ang mga estudyante og panahon sa pagbasa sa tudling ug sa paggamit sa mga giya nga makaplagan diha sa “Ipatin-aw” nga seksiyon sa pagsabot sa simbolismo. Dapita ang mga estudyante, isip usa ka klase o sa gagmay nga grupo, sa pagpakigbahin sa mga simbolo nga ilang makaplagan ug ang mga panabot nga ilang naangkon samtang sila naninguha sa pagsabot sa simbolismo.

Dugang nga mga tudling alang sa pagpraktis niini nga kahanas:

• Levitico 1:3–9; Numeros 21:6–9

• Mateo 5:13; Juan 6:48–51

• 1 Nephi 8:26–27

• Doktrina ug mga Pakigsaad 29:1–2

Pagdapit ug Pag-follow Up

Dapita ang mga estudyante sa pagpangita alang sa simbolismo diha sa mga kasulatan sa pagpauswag sa ilang personal nga pagtuon sa kasulatan. Hinumdomi ang pagtugot og panahon kon kamo magkita og balik alang sa mga estudyante sa pagpakigbahin og bisan unsa nga mga simbolo nga ilang nakaplagan ug sa unsang paagi ang paghunahuna mahitungod sa kahulogan niini nga mga simbolo mitabang kanila sa pagsabot ug sa paggamit sa kasulatan. Makadapit ka usab sa mga estudyante sa pagpakigbahin kon unsaon niini nga kahanas pagtabang kanila nga malingaw pa sa pagtuon sa kasulatan. Padayon sa pagpraktis niini nga kahanas diha sa klase.