Pagpangita og mga Koneksiyon diha sa mga Kasulatan

Ipatin-aw

Ipakigbahin ang mosunod nga pagpasabot ni Elder David A.Bednar sa Korum sa Napulog Duha ka Apostoles:

Ang koneksiyon usa ka relasyon o sumpay tali sa mga ideya, mga tawo, o mga hitabo, ug ang mga kasulatan puno sa mga koneksiyon. (David A. Bednar, “A Reservoir of Living Water” [fireside sa Church Educational System alang sa mga young adult, Feb. 4, 2007], 3, broadcasts.ChurchofJesusChrist.org)

Itudlo nga kon kita moila og mga koneksiyon, kita makaangkon og dugang nga panabot pinaagi sa pagmatikod og pagkaparehas ug pagkalahi sa mga ideya, mga tawo, mga butang, o mga hitabo. (Mubo nga Sulat: Kini mahimong mapuslanon sa pakiglabot niini nga pagbansay ngadto sa “Pagpangita og mga Sundanan diha sa mga Kasulatan.“)

Modelo

Gamit sa mosunod nga ehemplo o sa usa nga imong kaugalingon sa pagmodelo niini nga kahanas:

Ipakita ang mosunod nga tudling, ug itudlo ang koneksiyon tali sa pagbaton og limpyo nga mga kamot ug usa ka putli nga kasingkasing. (Mubo nga Sulat: Ang mga italic gikadugang ngadto sa teksto sa ubos sa pagpatataw sa koneksiyon.)

Salmo 24:3–4

“Kinsa ang mosaka ngadto sa bungtod sa Ginoo? o kinsa ba ang motindog sa iyang dapit nga balaan?

“Siya nga malinis og mga kamot, ug may usa ka putli nga kasingkasing; siya nga wala magbayaw sa iyang kalag ngadto sa kabakakan, ug wala makapanumpa sa malimbungon.”

Makahimo ka sa pagpakigbahin sa mosunod nga pahayag ni Elder Bednar sa pagtabang sa mga estudyante sa pagsabot sa mga koneksiyon tali sa pagbaton og malinis nga mga kamot ug usa ka putli nga kasingkasing:

Kini posible alang kanato sa pagbaton og malinis nga mga kamot apan wala magbaton og usa ka putli nga kasingkasing. Palihog tan-awa nga parehong limpyo nga mga kamot ug putli nga kasingkasing ang gikinahanglan aron mosaka sa bungtod sa Ginoo ug mobarog sa Iyang balaang dapit.

Tugoti ako sa pagsugyot nga ang mga kamot malimpyohan pinaagi sa proseso sa pagsalikway sa kinaiyanhong pagkatawo ug pinaagi sa pagbuntog sa sala ug sa dautan nga mga impluwensiya sa atong mga kinabuhi pinaagi sa Pag-ula sa Manluluwas. Ang mga kasingkasing maputli samtang atong dawaton ang Iyang makapalig-ong gahom sa pagbuhat og maayo ug pagkahimong mas maayo. (David A. Bednar, “Limpyo nga mga Kamot ug Putli nga Kasingkasing,” Liahona, Nob. 2007, 82)

Pagpraktis

Dapita ang mga estudyante sa pagpangita alang sa usa ka koneksiyon samtang sila nagtuon og usa ka tudling gikan sa pagbasa sa kasulatan niini nga semana. O ikaw makapili og usa sa mosunod nga mga tudling sa ubos nga patun-an nila. Ang mga estudyante dayon makarekord og panabot nga ilang naangkon pinaagi sa paghunahuna mahitungod sa usa ka koneksiyon nga ilang nakaplagan diha sa tudling sa kasulatan. Dapita ang mga estudyante sa pagpakigbahin nga magpares, diha sa gagmay nga mga grupo, o uban sa klase sa mga koneksiyon nga ilang nakaplagan ug mga panabot nga ilang naangkon.

Dugang nga mga tudling alang sa pagpraktis:

• Moises 5:4–9; Juan 1:29; 1 Pedro 1:19 (Jesukristo ug usa ka karnero)

• Juan 5:19; 14:6 (Ang Amahan ug ang Anak)

• Alma 42:9–10, 14–15 (Ang Pagkapukan ug ang Pag-ula ni Jesukristo; hustisya ug kalooy)

• Moroni 7:40–44 (Hugot nga pagtuo, paglaom, ug gugmang putli)

• Doktrina ug mga Pakigsaad 130:18–21 (Salabotan ug pagkamasulondon)

Pagdapit ug Pag-follow Up

Awhaga ang mga estudyante sa pagpangita alang sa mga koneksiyon diha sa mga kasulatan atol sa ilang personal nga pagtuon. Hangyoa sila sa pag-anha sa klase sa sunod nga higayon nga andam sa pagpakigbahin og bisan unsa nga mga koneksiyon nga ilang nakaplagan. Hinumdomi ang pag-follow up ug paghatag og panahon sa mga estudyante kon magkita kamo pag-usab sa pagpakigbahin sa unsay ilang nadiskobrehan. Mahimong gusto kang makighisgot uban sa mga estudyante kon sa unsang paagi ang paggamit niini nga kahanas mipauswag sa ilang pagtuon sa kasulatan.