Pagpangita og mga Sundanan diha sa mga Kasulatan

Ipatin-aw

Ipakigbahin ang mosunod nga pamahayag ni Elder David A. Bednar sa Korum sa Napulog Duha ka mga Apostoles:

Ang usa ka sundanan mao ang usa ka plano, modelo, o sumbanan nga mahimong gamiton isip usa ka giya alang sa balik-balik nga pagbuhat o sa pagbuhat sa usa ka butang. (David A. Bednar, “A Reservoir of Living Water” [fireside sa Church Educational System alang sa mga young adult, Feb. 4, 2007], 4, broadcasts.ChurchofJesusChrist.org; tan-awa usab ang Giya ngadto sa mga Kasulatan, “Sundanan [Sumbanan],” scriptures.ChurchofJesusChrist.org)

Itudlo nga kita kasagaran makadiskobre og mga sundanan diha sa kasulatan pinaagi sa paghatag og atensiyon ngadto sa gibalik-balik nga mga pulong, mga hugpong sa mga pulong, o mga ideya. Pinaagi sa pag-ila ug paggamit sa mga sundanan, kita mas makasabot og maayo kon sa unsang paagi ang Ginoo naglihok ug unsaon sa pagsunod Kaniya.

Mubo nga Sulat: Kini mahimong makatabang sa paghisgot niini nga kahanas nga kauban sa kahanas sa “Pagpangita og mga Koneksiyon diha sa mga Kasulatan.”

Modelo

Ipakita ang mosunod nga mga tudling, ug itudlo ang mga pulong nga gi-italicize sa pagpakita og usa ka sundanan kon giunsa sa Ginoo pagtubag ang mga pangutana sa usa ka grupo sa mga misyonaryo mahitungod sa mga detalye sa ilang panaw. Mahimo usab nimong ipakigbahin ang panabot sa ubos gikan ni Elder Bednar sa pagtabang sa mga estudyante sa pagsabot kon sa unsang paagi ang mga sundanan makatabang kanato sa pag-ila og importanting mga kamatuoran diha sa kasulatan.

(Mubo nga Sulat: Ang sundanan nga gi-modelo dinhi nagrepresentar og usa lamang ka paagi nga ang Ginoo nagtubag sa mga pangutana mahitungod sa mga detalye sa pagpauswag sa Iyang buhat ngadto sa unahan. Sa ubang mga higayon, Siya naghatag og klaro kaayo ug piho nga direksiyon [tan-awa sa Doktrina ug mga Pakigsaad 95:13–16; 136:10–18]).

Doktrina ug mga Pakigsaad 60:5

• “Apan, sa pagkatinuod, Ako mamulong nganha kaninyo mahitungod sa inyong panaw ngadto sa yuta nga inyong gigikanan. Himoa nga adunay sakyanan nga mabuhat, o mapalit, ingon sa makapaayo kaninyo, kini walay bali kanako, ug mosugod sa inyong panaw sa labing madali ngadto sa dapit nga gitawag og St. Louis.”

Doktrina ug mga Pakigsaad 61:22

• “Ug kini dili igsapayan ngari kanako, nga sa dili madugay, kon kini mao nga sila motuman sa ilang misyon, kon sila moadto ba pinaagi sa tubig o pinaagi sa yuta; himoa kini ingon sa gipahibalo ngadto kanila sumala sa ilang mga paghukom human niini.”

Doktrina ug mga Pakigsaad 62:5

• “Ug unya kamo mobalik aron sa pagpamatuod, oo, gani ang tanan, o magtinagurha, ingon sa makaayo kaninyo, kini dili igsapayan ngari kanako; lamang pagmatinud-anon, ug pagpahayag sa maayo nga mga balita ngadto sa lumulupyo sa yuta, o taliwala sa katiguman sa mga dautan.”

Doktrina ug mga Pakigsaad 63:40

• “Ug himoa nga ang tanan nga mga salapi matigom, kini dili igsapayan ngari kanako bisan kini diyutay o daghan, ipadala ngadto sa yuta sa Zion, ngadto kanila kinsa Ako mitudlo sa pagdawat.”

Gipakigbahin ni Elder Bednar ang mosunod nga panabot mahitungod niini nga sundanan sa Doktrina ug mga Pakigsaad 60–63:

Ang pahayag sa Ginoo nga ang mao nga mga butang “walay bali ngari kanako” sa sinugdanan ingon og katingalahan. Sa tataw, wala magsulti ang Manluluwas ngadto niini nga mga misyonaryo nga wala Siya magtagad mahitungod sa unsay ilang gibuhat. Hinoon, Siya naghatag og importansya sa pagbutang og una sa importante nga mga butang ug sa pagtutok diha sa matarong nga mga butang. … Sila gikinahanglan nga magbansay og hugot nga pagtuo, maggamit og maayo nga paghukom, [ug] molihok pinasubay sa direksiyon sa Espiritu. … Ang mahinungdanon nga butang mao ang buhat nga sila gitawag sa paghimo; giunsa nila pag-abot didto mahinungdanon apan dili kinahanglanon. (David A. Bednar, “A Reservoir of Living Water”[fireside sa Church Educational System alang sa mga young adult, Feb. 4, 2007], 4, broadcasts.ChurchofJesusChrist.org)

Pagpraktis

Dapita ang mga estudyante sa pagtuon og usa ka tudling gikan sa pagbasa sa kasulatan niini nga semana, mangita og mga sundanan. O ikaw makapili gikan sa mosunod nga mga tudling. Ang mga estudyante maka-rekord og panabot nga ilang maangkon pinaagi sa paghunahuna mahitungod sa usa ka sundanan nga ilang nadiskobrehan diha sa mga kasulatan. Mahimo nimong dapiton ang pipila ka mga estudyante sa pagpakigbahin sa klase og usa ka sundanan nga ilang nakaplagan ug usa ka panabot nga ilang naangkon.

Dugang nga mga tudling alang sa pagpraktis:

• 2 Mga Hari 2:1–6 (Ang gibalik-balik nga hugpong sa mga pulong “ako dili mobulag” naghatag og sundanan alang sa pagsunod sa mga propeta sa Ginoo.)

• Mateo 4:4, 7, 10 (Ang gibalik-balik sa Manluluwas nga pakisayran ngadto sa kasulatan uban sa hugpong sa mga pulong “Nahisulat kini” naghatag og sundanan alang sa pagsagubang og tintasyon pinaagi sa pagsalig diha sa mga kasulatan.)

• Alma 32:27–43 (Si Alma naghatag og usa ka sundanan alang sa pag-amuma sa hugot nga pagtuo.)

• Doktrina ug mga Pakigsaad 50:13–29 (Ang Ginoo naghatag og usa ka sundanan sa paglikay og panlimbong.)

Pagdapit ug Pag-follow Up

Awhaga ang mga estudyante sa pagpangita alang sa mga sundanan diha sa mga kasulatan atol sa ilang personal nga pagtuon. Hangyoa sila sa pag-anha sa klase sa sunod nga higayon nga andam sa pagpakigbahin og mga sundanan nga ilang nakaplagan diha sa kasulatan. Hinumdomi ang pag-follow up ug paghatag og panahon sa mga estudyante kon magkita kamo pag-usab sa pagpakigbahin sa unsay ilang nadiskobrehan. Mahimo kang makighisgot uban kanila kon sa unsang paagi ang paggamit niini nga kahanas nagpauswag sa ilang pagtuon sa kasulatan. Pangita alang sa mga oportunidad atol sa klase sa pagrebyo ug sa pagpadayon sa pagpraktis niini nga kahanas.