Paghanduraw sa mga Kasulatan

Ipatin-aw

Ipasabot nga kon kita maghanduraw sa mga kasulatan, kita nagmugna og mental nga larawan sa unsay atong gibasa. Kini nga kahanas makatabang kanato og mas maayo nga pagpakiglabot ngadto sa mga hitabo, mga istorya, ug mga tawo nga atong nabasa diha sa mga kasulatan. Ang mosunod nga mga ideya ug mga kalihokan makatabang kanato sa paghanduraw sa mga kasulatan:

• Pangita og makahulagway nga mga pulong ug mga hugpong sa mga pulong nga makatabang kanimo sa paghulagway og tinagsatagsa sa mga hitabo.

• Gamit og tinagsatagsa nga mga pulong nga imong makaplagan sa paghanduraw kon unsa ang gihunahuna o gibati sa mga tawo diha sa mga kasulatan.

• Hunahunaa ang imong kaugalingon diha sa istorya sa kasulatan, ug hunahunaa kon unsa nga mga pagbati ug mga panghunahuna nga ikaw mahimong aduna kon ikaw misinati sa mga hitabo nga gihulagway.

• Pagsiksik alang sa mga hulagway ug mga bidyo diha sa Media Library, nga makaplagan diha sa ChurchofJesuschrist.org, nga makatabang kanimo sa paghanduraw og usa ka istorya sa kasulatan.

Modelo

Sa pagmodelo sa kahanas sa paghanduraw, hunahunaa ang paggamit og usa sa mosunod nga mga ideya o pagmugna og usa nga imong kaugalingon.

• Paghatag og lakbit nga kinatibuk-ang kahulogan sa istorya ni Daniel ug ang langob sa mga leon (tan-awa sa Daniel 6:1–15). Dayon basaha ang Daniel 6:16–23, ug itudlo ang makahulagway nga tinagsatagsa nga mga pulong nga makatabang sa mga estudyante sa paghanduraw sa istorya. Makahimo ka sa pagpakita sa nag-uban nga hulagway ug makadapit sa mga estudyante sa paghanduraw kon unsa kaha kini sama alang ni Daniel sa pagsulod ug langob nga napuno sa mga leon.

  Mahimo nimong ipakigbahin kon sa unsang paagi ang paghanduraw sa kasinatian ni Daniel (o kasinatian ni Hari Dario) maghimo sa hitabo diha sa istorya nga mas tinuod ug personal nganha kanimo. Makahimo ka usab sa pagpakigbahin kon unsaon niini pagtabang kanimo sa pagdayeg sa hugot nga pagtuo ni Daniel (ug Dario) ingon man usab sa gahom sa Ginoo.

• Lain nga kapilian alang sa pagmodelo niini nga kahanas mao ang pagbasa sa Doktrina ug mga Pakigsaad 45:44–45 ug dayon pagpakita og bahin sa pakigpulong ni Elder Neil L. Andersen “Kita Maghisgot Kang Kristo” (Liahona, Nob. 2020, 91) gikan sa time code 12:28 ngadto sa 13:48. Nagtabang kanato si Elder Andersen sa paghanduraw sa Ikaduhang Pag-anhi ni Jesukristo. Mahimo ka nga makigbahin kon giunsa sa paghanduraw sa Ikaduhang Pag-anhi sa Manluluwas pag-impluwensiya sa imong hugot nga pagtuo diha Kaniya ug sa imong mga paglaom alang niang adlawa.

Pagpraktis

Pagpili og usa ka tudling sa kasulatan gikan sa pagbasa niini nga semana sa pagpraktis niini nga kahanas sa paghanduraw sa mga kasulatan. O ikaw makapili og tudling gikan sa mga ehemplo nga gihatag sa ubos. Dapita ang mga estudyante sa pagtuon sa tudling ug sa pagpraktis sa paghanduraw sa mga kasulatan pinaagi sa paggamit sa mga ideya diha sa “Ipatin-aw” nga seksiyon. Ikaw makahimo sa pagpakita niini nga mga ideya. Human sa pagpraktis sa mga estudyante, dapita sila sa pagpakigbahin sa ilang kasinatian uban sa usa ka pares o sa gagmay nga mga grupo. Makahimo sila sa pagpakigbahin og usa o daghan pa sa mosunod:

• Mga pulong ug hugpong sa mga pulong gikan sa mga kasulatan nga mitabang kanila sa pagmugna og usa ka mental nga hulagway

• Usa ka personal nga panabot nga ilang naangkon gikan sa pagbuhat sa paghanduraw

• Ang ilang mga panghunahuna mahitungod kon unsaon sa usa ka imahe o usa ka bidyo pagtabang kanila nga mas mobati nga nakonektar ngadto sa mga kasulatan

Mubo nga Sulat: Mahimo nimong pahinumdoman ang mga estudyante nga ang usa ka hulagway o bidyo maoy usa ka interpretasyon sa mga kasulatan ug dili usa ka eksakto nga paghulagway sa unsay nahitabo.

Dugang nga mga tudling alang sa pagpraktis:

• Exodo 14:10, 21–22. Uban sa gahom sa Ginoo, nabahin ni Moises ang Pulang Dagat.

• Mateo 14:24–32. Nagdapit si Jesus ni Pedro sa paglakaw diha sa tubig.

• 3 Nephi 11:13–15. Naghikap ang mga Nephite sa mga samad sa Manluluwas.

• Doktrina ug mga Pakigsaad 110:2–4. Si Jesukristo nagpakita ngadto nila ni Joseph Smith ug Oliver Cowdery didto sa Kirtland Temple.

Pagdapit ug Pag-follow Up

Awhaga ang mga estudyante sa paghanduraw sa mga kasulatan samtang sila nagtuon. Hangyoa sila sa pag-anha sa sunod klase nga andam sa pagpakigbahin kon unsay ilang nakat-onan gikan sa pagbuhat sa mao. Hinumdomi ang pag-follow up atol sa sunod nga klase ug sa pagtugot og panahon alang sa mga estudyante sa pagpakigbahin ug paghisgot kon unsaon niini nga kahanas pag-impluwensiya sa ilang pagkat-on diha sa mga kasulatan.