Pagpangita alang sa Hinungdan ug Epekto nga mga Relasyon diha sa mga Kasulatan

Ipatin-aw

Ikaw mahimong mopakita sa mga pulong hinungdan ug epekto. Ipasabot nga diha sa mga kasulatan kita makakita og daghang hinungdan ug epekto nga mga relasyon. Ang usa ka hinungdan mahimong bisan unsa nga lihok o hitabo nga naghatag og epekto—isip resulta o sangpotanan. Ang pagpangita alang sa hinungdan ug epekto nga mga relasyon diha sa mga kasulatan makatabang kanato sa pag-ila sa mga baroganan sa ebanghelyo. Ang pagsiksik alang sa hinungdan-ug-sa epekto nga mga relasyon makatabang usab kanato sa pag-ila sa mga saad sa Ginoo, mga panalangin, mga pahimangno, ug mga rason alang sa Iyang mga silot.

Ipakigbahin ang mosunod nga mga giya alang sa pag-ila sa hinungdan ug sa epekto nga mga relasyon diha sa mga kasulatan:

• Ilha ang mga pagpili, mga kinaiya, ug mga lihok (mga hinungdan) ug ang mga resulta o mga sangpotanan (mga epekto) nga nagsunod.

• Pangita alang sa mga pulong ug hugpong sa mga pulong nga nagtudlo ngadto sa hinungdan ug epekto nga mga relasyon sama sa og ingon, sa ingon atong makita, tungod kay, busa, ug kon … dayon.

Modelo

Gamita ang usa sa mosunod nga mga ehemplo o usa nga imong kaugalingon sa pagmodelo niini nga kahanas.

• Basaha ang Mateo 14:14 isip usa ka klase. Ilha ang hinungdan nga migiya sa Manluluwas sa pagpang-ayo sa masakiton:

  Si Jesus “nakakita og dakong pundok sa mga tawo, ug siya nalooy kanila” (hinungdan), “ug iyang giayo ang ilang mga masakiton” (epekto).

  Ang pag-ila niini nga hinungdan ug epekto nga relasyon makatabang kanato sa pagsabot nga ang Manluluwas nagpanalangin kanato uban sa Iyang gahom sa pagpang-ayo tungod sa Iyang kalooy ngari kanato.

• Basaha ang 2 Nephi 1:9 isip usa ka klase. Mahimo nimong itudlo ang pulong og ingon ug ipasabot nga kini nga pulong makapaila og hinungdan-ug-epekto nga relasyon. Dayon ilha ang mga lihok (mga hinungdan) nga moresulta sa pagdawat sa gisaad nga mga panalangin sa Ginoo (mga epekto):

  “Og ingon kadto kinsa pagadad-on sa Ginoong Dios gikan sa yuta sa Jerusalem kinahanglan maghupot sa Iyang mga sugo” (hinungdan), “sila mouswag diha sa ibabaw niini nga yuta” (epekto).

  Ang pag-ila niini nga hinungdan-ug-epekto nga relasyon makatabang kanato sa pagkakita nga samtang kita nagsunod sa mga sugo sa Ginoo, siya mopauswag kanato ug mopanalangin kanato.

Pagpraktis

Pagpili og tudling gikan sa pagbasa sa kasulatan niini nga semana, o pagpili gikan sa mga tudling sa ubos. Dapita ang mga estudyante sa pagtuon sa tudling, mangita alang sa hinungdan g epekto nga mga relasyon. Human sa igo nga panahon, hangyoa ang mga estudyante sa pagpakigbahin sa mosunod nga magpares o diha sa gagmay nga mga grupo: (1) usa ka hinungdan ug epekto nga relasyon nga ilang nadiskobrehan ug (2) unsa nga panabot ang ilang naangkon o baroganan nga ilang makat-onan gikan niini.

Dugang nga mga tudling alang sa pagpraktis:

• Isaias 58:13–14

• Lucas 5:18–25

• Alma 5:11–12

• Doktrina ug mga Pakigsaad 76:15–20

Pagdapit ug Pag-follow Up

Awhaga ang mga estudyante sa pagpraktis og pangita alang sa hinungdan ug epekto nga mga relasyon diha sa mga kasulatan atol sa ilang personal nga pagtuon. Hinumdomi ang pag-follow up ug pagtugot og panahon alang sa mga estudyante sa pagpakigbahin unsa ang ilang nadiskobrehan ug unsaon niini nga kahanas pagtabang kanila nga mas maayo ang pagsabot sa mga kasulatan. Pangita og mga oportunidad sa pagpadayon sa pagpraktis niini nga kahanas diha sa klase.