Pagtudlo ug Pagkat-on
Pagpangita og mga Tema diha sa mga Kasulatan

“Pagpangita og mga Tema diha sa mga Kasulatan,” Mga Kahanas sa Pagtuon sa Kasulatan (2024)

Pagpangita og mga Tema diha sa mga Kasulatan

Ipatin-aw

Mahimo nimong ipakigbahin ang mosunod nga pahayag ni Elder David A. Bednar sa Korum sa Napulog Duha ka Apostoles:

Elder David A. Bednar

Ang mga tema labing importante, nagbalikbalik, naghiusa sa tanang mga kinaiya o mga ideya, sama sa importating mga hunahuna nga gibutang diha sa tibuok basahon. Sa kinatibuk-an, ang eskriptuhanong mga tema mas lapad ug mas malukpanon kaysa mga sundanan o mga koneksiyon. Sa tinuod, ang mga tema naghatag sa kaagi ug kinatibuk-ang kahulogan alang sa pagsabot sa mga koneksiyon ug mga sundanan. Ang proseso sa pagsiksik ug pag-ila sa eskriptuhanong mga tema naggiya kanato ngadto sa importanting mga doktrina ug mga baroganan sa kaluwasan. (David A. Bednar, “A Reservoir of Living Water” [fireside sa Church Educational System alang sa mga young adult, Feb. 4, 2007], 5, broadcasts.ChurchofJesusChrist.org)

Mubo nga Sulat: Kini mahimong makatabang sa pagkompleto “Pagpangita og mga Koneksiyon diha sa mga Kasulatan” ug “Pagpangita og mga Sundanan diha sa mga Kasulatan” sa dili pa buhaton kining pagbansay sa kahanas.

Modelo

Ipakita ang mosunod nga mga tudling, o ihatag kanila nga usa ka handout. Pagbasa og dungan sa mga tudling, ug pangitaa giunsa nga si Jesukristo mao ang tema diha sa Basahon ni Mormon. Kon atong masabtan nga ang labing importanting tema sa Basahon ni Mormon mao ang pagpatubo sa atong hugot nga pagtuo diha ni Jesukristo, niana kita makabasa sa matag pahina nga mangita alang Kaniya. (Mubo nga Sulat: Mga italic gidugang sa pagpatataw niini nga tema.)

Ulohang Pahina sa Basahon ni Mormon—Moroni

  • “[Ang Basahon ni Mormon naggiya ngadto] sa pagpamatuod diha sa Judeo ug sa Hentil nga si Jesus mao ang Kristo, ang Dios sa Kahangtoran, nagpaila sa iyang kaugalingon ngadto sa tanan nga mga nasod.”

1 Nephi 6:4—Nephi

  • “Kay ang kahingpitan sa akong tuyo mao nga ako unta makakabig sa mga tawo sa pagpaduol ngadto sa Dios ni Abraham, ug sa Dios ni Isaac, ug sa Dios ni Jacob, ug maluwas.”

Omni 1:26—Amaleki

  • “Ug karon, akong hinigugma nga mga kaigsoonan, ako manghinaot nga kamo kinahanglan moduol ngadto kang Kristo, kinsa mao ang Usa nga Balaan sa Israel, ug moambit sa iyang kaluwasan, ug sa gahom sa iyang katubsanan. Oo, duol ngadto kaniya, ug ihalad ang inyong tibuok nga mga kalag ingon nga usa ka paghalad ngadto kaniya, ug pagpadayon diha sa pagpuasa ug pag-ampo, ug paglahutay hangtod sa kataposan; ug ingon nga ang Ginoo buhi kamo maluwas.”

Mosiah 3:17—Hari Benjamin

  • “Ug dugang pa niini, ako moingon nganha kaninyo, nga walay lain nga ngalan nga gihatag, ni lain nga mga agianan ni mga paagi diin ang kaluwasan modangat ngadto sa mga katawhan, lamang diha ug pinaagi sa ngalan ni Kristo, ang Ginoong Makagagahom.”

Helaman 5:9—Nephi, anak nga lalaki ni Helaman

  • “O hinumdomi, hinumdomi, akong anak nga mga lalaki, ang mga pulong nga gipamulong ni Hari Benjamin ngadto sa iyang mga katawhan; oo, hinumdomi nga walay lain nga paagi ni mga pamaagi diin ang tawo maluwas, lamang pinaagi sa matubsanon nga dugo ni Jesukristo, kinsa moanhi; oo, hinumdomi nga siya moabot aron sa pagtubos sa kalibotan.”

3 Nephi 11:10–11—Jesukristo

  • “Tan-awa, Ako mao si Jesukristo, kinsa gipamatud-an sa mga propeta nga moanhi sa kalibotan.

  • “Ug tan-awa, Ako ang kahayag ug ang kinabuhi sa kalibotan; ug Ako nakainom gikan sa pait nga kopa nga gihatag sa Amahan ngari kanako, ug gihimaya ang Amahan sa akong pagpas-an sa mga sala sa kalibotan, diin pinaagi niini Ako mituman sa kabubut-on sa Amahan sa tanan nga mga butang gikan sa sinugdanan.”

Moroni 10:32—Moroni

  • “Oo, duol ngadto kang Kristo, ug paghingpit diha kaniya, ug ilimod ang inyong mga kaugalingon sa tanan nga dili diosnon; ug kon kamo molimod sa inyong mga kaugalingon sa tanan nga dili diosnon, ug mohigugma sa Dios uban sa tibuok ninyo nga gahom, hunahuna ug kusog, niana ang iyang grasya igo alang kaninyo, nga pinaagi sa iyang grasya kamo mahimo nga hingpit diha kang Kristo; ug kon pinaagi sa grasya sa Dios kamo mahingpit diha ni Kristo, kamo dili makahimo sa paglimod sa gahom sa Dios.”

Pagpraktis

Pagpili og mga tudling gikan sa basahon sa kasulatan nga imong gitun-an nga nagtataw sa usa ka tema. O ikaw makahangyo og usa ka estudyante sa pagtuon sa usa sa mosunod nga grupo sa mga tudling sa kasulatan. Dapita ang mga estudyante sa pagtuon sa mga tudling, mangita alang sa mga tema. Dayon dapita sila sa pagpakigbahin sa tema nga ilang nadiskobrehan ug ang ilang mga panghunahuna ug mga panabot mahitungod sa tema.

Dugang nga mga tudling alang sa pagpraktis:

Pagdapit ug Pag-follow Up

Awhaga ang mga estudyante sa pagpangita alang sa mga tema diha sa mga kasulatan atol sa ilang personal nga pagtuon. Pag-follow up sa mga estudyante pinaagi sa pagdapit kanila sa pagpakigbahin sa mga tema nga ilang nadiskobrehan diha sa ilang personal nga pagtuon sa mga kasulatan. Mahimo nimo silang pangutan-on kong sa unsang paagi ang pagpangita sa mga tema nagpauswag sa ilang pagtuon ug pagsabot sa mga kasulatan. Pangita alang sa mga oportunidad atol sa klase sa pagrebyo ug sa pagpadayon sa pagpraktis niini nga kahanas.