Pagpangita sa mga Kalainan diha sa mga Kasulatan

Ipatin-aw

Ipasabot nga ang usa ka kalainan mao ang usa ka pagtandi sa mga kalahi sa usa ka butang o sa usa ka tawo. Ang mga kasulatan kasagaran nagpalahi sa mga ideya, mga hitabo, ug mga tawo. Kita makapangita alang sa mga kalainan sa tinagsa nga mga bersikulo, sa usa ka kapitulo, o sa tibuok nagkalainlaing mga kapitulo ug mga basahon. Naghunahuna mahitungod niini nga mga kalainan makatabang kanato nga mas masabtan ang mga eskriptuhanon nga mga pagtulon-an ug madiskobrehan ang mga baroganan sa ebanghelyo alang sa atong kaugalingong mga kinabuhi.

Modelo

Sa pagmodelo niini nga kahanas, hunahunaa ang paggamit sa usa sa mosunod nga mga ehemplo o usa nga imong kaugalingon. Ikaw makadapit usab og usa ka estudyante sa pagmodelo niini nga kahanas. Kon ikaw mobuhat, siguroha ang paghatag sa estudyante og pasiuna nga pahibalo ug panahon sa pag-andam.

Basaha ang Moises 4:1–2 og dungan isip usa ka klase, ug ipakiglahi ang kinaiya ni Lucifer ngadto niana sa Manluluwas. Mahimo nimong itudlo ang pagbalik-balik og gamit ni Lucifer sa pulong nga “ako” sa bersikulo 1 ug ang iyang tinguha alang sa dungog ug himaya. Ipakiglahi kini ngadto sa mapainubsanon ug dili hinakog nga mga pulong sa Manluluwas nga “ang imong pagbuot mao ang matuman, ug ang himaya imo sa kahangtoran” (Moises 4:2).

Laing paagi sa pagmodelo niini nga kahanas mao ang pagtandi sa mga lihok ni Laman, Lemuel, ug Nephi. Hunahunaa ang ilang mga reaksiyon sa dihang ang Ginoo misugo kanila sa pagbiya sa ilang panimalay sa Jerusalem ug moadto sa kamingawan (tan-awa sa 1 Nephi 2:1–4). Ipakiglahi ang kinaiya ug mga lihok ni Laman ug ni Lemuel diha sa 1 Nephi 2:11–13 uban niana nga kang Lehi diha sa 1 Nephi 2:16. O imbis basahon ang mga bersikulo ikaw makapakita sa video “Nephi Prays for Laman and Lemuel––1 Nephi 2:8–24” gikan sa time code 0:00 hangtod sa 2:52. Ikaw makahimo sa pagpakigbahin kon unsay imong nakat-onan gikan sa pakiglahi sa mga kinaiya ug mga aksiyon ni Laman ug ni Lemuel uban niana nga kang Nephi.

Pagpraktis

Pagpili og tudling gikan sa pagbasa sa kasulatan niini nga semana, o pagpili gikan sa mga tudling nga gilista sa ubos. Dapita ang mga estudyante sa pagtuon sa mga tudling ug sa pagpraktis sa pagpangita og mga kalainan diha sa mga ideya, mga hitabo, ug mga tawo. Ang mga estudyante mahimo dayon sa pagpakigbahin sa kalainan nga ilang nadiskobrehan ug unsa ang ilang nakat-onan gikan niini.

Dugang nga mga tudling alang sa pagpraktis:

• Ezequiel 34:2–6, 10–16. Ipakiglahi ang mga magbalantay sa karnero (mga lider) sa Israel ngadto ni Jesukristo isip Magbalantay sa Iyang katawhan.

• Lucas 18:9–14. Ipakiglahi ang mga pag-ampo ug mga kinaiya sa Fariseo ug publikano.

• Alma 36:12–14, 18–21. Ipakiglahi ang mga pagbati ni Alma sa wala pa ug sa human na siya gitawag diha sa ngalan sa Ginoo ug mihinulsol sa iyang mga sala.

• Doktrina ug mga Pakigsaad 76:50–54, 71–74, 79, 81–85, 101. Itandi ang mga tubag ngadto sa ebanghelyo ug pagpamatuod ni Jesukristo niadtong kinsa manununod sa celestial (tan-awa sa mga bersikulo 50–54), terrestrial (tan-awa sa mga bersikulo 71–74, 79), ug telestial (tan-awa sa mga bersikulo 81–85, 101) nga mga gingharian.

Pagdapit ug Pag-follow Up

Awhaga ang mga estudyante sa pagpraktis sa pagpangita alang sa mga pagtandi ug sa pagpakiglahi diha sa mga kasulatan atol sa ilang personal nga pagtuon. Pag-follow up ug pagtugot og panahon sa sunod nga mga klase alang sa mga estudyante sa pagpakigbahin kon unsay ilang nadiskobrehan pinaagi sa paggamit niini nga kahanas. Makahimo ka usab sa pagdapit sa mga estudyante sa pagpakigbahin kon sa unsang paagi kini nga kahanas nagtabang kanila nga mas makasabot og maayo sa mga kasulatan. Padayon sa pagpraktis niini nga kahanas diha sa klase.