Pagpahisama sa mga Kasulatan

Ipatin-aw

Mahimo ninyong basahon ang 1 Nephi 19:23 og dungan ug ilha sa unsang paagi si Nephi “mipahisama sa tanang mga kasulatan” ngadto sa iyang mga katawhan alang sa ilang “kaayohan ug pagkat-on.” Ipasabot nga ang pagpahisama sa mga kasulatan mao ang pagtandi niini diha sa atong kaugalingon nga kinabuhi o mga kahimtang. Ang pagpahisama sa mga kasulatan makahimo niini nga mas may personal nga kalabotan, nagtugot sa mga pulong sa pagsulti og direkta ngari kanato. Ikaw makahimo sa pagpakita sa mosunod nga mga paagi sa pagpahisama sa mga kasulatan:

• Itandi ang mga tawo sa kasulatan ug mga hitabo ngadto sa imong kaugalingon nga mga kasinatian sa kinabuhi. Mahimo kang mangutana sa imong kaugalingon og sama niini: Unsa nga mga sitwasyon sa akong kinabuhi nga mga sama sa sitwasyon nga gihulagway dinhi niini nga tudling sa kasulatan? Aduna bay usa ka butang dinhi niini nga mga bersikulo nga makatabang kanako sa akong mga pangutana, mga panginahanglan, mga hagit, o mga kabalaka?

• Isukip ang imong kaugalingon nga ngalan ilis sa usa ka tawo nga ginganlan diha sa mga kasulatan o unahan sa usa ka bersikulo sa pagtambag o sugo. Mahimong mangutana ka sa imong kaugalingon: Sa unsa nga paagi nga ang pagsukip sa akong ngalan nagtabang sa pag-personal sa mensahe nga gitudlo sa Ginoo kanako niini nga bersikulo?

Modelo

Ikaw makahimo sa paggamit sa usa sa mosunod nga mga ehemplo o usa sa imong kaugalingon sa pagmodelo niini nga kahanas.

• Basaha o i-summarize ang istorya diha sa Exodo 16:4–5, 19–22 kabahin sa pagpanguha sa Israel og manna diha sa kamingawan.

• Si Nephi mihatag usab og makatabang nga modelo alang sa pagpahisama sa mga kasulatan. Ikaw makahatag og pipila ka kinatibuk-ang pagsabot alang sa 1 Nephi 4:1–3 ug unya basaha kini uban sa mga estudyante. Dapita ang mga estudyante sa pagpangita kon giunsa ni Nephi sa pagtandi ang istorya gikan sa mga kasulatan ngadto sa mga kahimtang nga siya ug ang iyang igsoong mga lalaki nabutang. Itudlo nga si Nephi migamit niini nga pagtandi sa pagtabang sa iyang igsoong mga lalaki sa pagbaton og hugot nga pagtuo diha sa gahom sa Ginoo sa pagluwas.

Pagpraktis

Pagpili og tudling gikan sa pagbasa sa kasulatan niini nga semana, o pagpili gikan sa mga tudling nga gilista sa ubos. Dapita ang mga estudyante sa pagtuon sa tudling ug sa pagpraktis sa pagpahisama sa mga kasulatan ngadto sa ilang mga kaugalingon. Ang mga estudyante mahimong makigbahin nga magpares o diha sa gagmay nga mga grupo kon unsay ilang nadiskobrehan pinaagi sa pagpahisama sa mga tawo, mga hitabo, ug mga pagtulon-an ngadto sa ilang kaugalingong mga kinabuhi.

Dugang nga mga tudling alang sa pagpraktis:

• Daniel 3:12–18. Sadrach, Mesach, ug Abed-nego midumili sa pagsimba sa bulawan nga imahe.

• Mateo 14:25–32. Nagluwas si Jesus ni Pedro sa dihang siya nagsugod sa pagtidlom ngadto sa tubig.

• Enos 1:2–8. Gibati ni Enos ang gibug-aton sa iyang mga sala ug nangayo og kapasayloan.

• Doktrina ug mga Pakigsaad 25:10, 13, 15. Ang Ginoo nagpahayag sa Iyang kabubut-on alang ni Emma Smith.

• Joseph Smith—Kasaysayan 1:10–11, 13–14. Si Joseph Smith nangita alang sa kamatuoran.

Pagdapit ug Pag-follow Up

Awhaga ang mga estudyante sa pagpraktis sa pagpahisama sa mga kasulatan ngadto sa ilang mga kinabuhi. Hinumdomi ang pag-follow up ug ang pagtugot og panahon alang kanila sa pagpakigbahin kon unsay ilang nadiskobrehan diha sa ilang personal nga pagtuon pinaagi sa paggamit niini nga kahanas. Makadapit ka usab sa mga estudyante sa pagpakigbahin kon sa unsang paagi ang pagpahisama sa mga kasulatan nagtabang kanila nga mas makasabot og maayo sa mga kasulatan. Pangita og mga oportunidad sa pagpadayon sa pagpraktis niini nga kahanas diha sa klase.