Pagmemorya sa mga Tudling sa Kasulatan

Ipatin-aw

Ang pagmemorya nagpasabot sa pagkat-on og usa ka butang sa kinasingkasing o sa pagsiguro nga kini mahinumdoman. Gitudlo ni Elder Richard G. Scott ang mahitungod sa gahom nga maana gikan sa pagmemorya sa mga tudling sa kasulatan. Ipakita ang mosunod nga kinutlo ug ipabasa kini og dungan:

Dakong gahom moabot gikan sa pagmemorya og mga kasulatan. Ang pagmemorya og kasulatan mao ang paghulma og bag-ong pakighigala. Sama kini sa pagdiskobre og bag-ong tawo kinsa makatabang sa panahon sa panginahanglan, makahatag og inspirasyon ug kahopay, ug mahimong tinubdan sa kadasig sa gikinahanglan nga kausaban. (Richard G. Scott, “Ang Gahom sa Kasulatan,” Liahona, Nob. 2011, 6)

Ang pagmemorya sa mga tudling sa kasulatan makatabang kanato nga mas mapaduol ngadto sa Manluluwas. Ang pagmemorya makapanalangin usab kanato pinaagi sa:

1. Pagtabang kanato sa pagsabot og mas maayo sa tudling.

2. Paghatag kanato og tabang, inspirasyon, kahupay, ug kadasig.

3. Pagdugang og gahom ngadto sa mga pulong nga atong gigamit sa pagtudlo sa uban (tan-awa sa Jared R. Moon, “Why Memorize Scriptures?,” New Era, Sept. 2014, 17).

Modelo

Gamit og usa ka tudling sa kasulatan gikan sa leksiyon nga imo karong gitun-an o Doktrina ug mga Pakigsaad 6:36 sa pagpakita og pipila sa pamaagi sa pagmemorya sa ubos:

• Basaha ang mga pulong sa makadaghang higayon nga walay hunong, ug dayon tago-i ang mga pulong ug balika kini pagsulti nga walay pagtan-aw.

• Isulat ang mga pulong og labaw sa makausa samtang nagbasa sa bersikulo, ug dayon isulat ang tudling nga walay pagtan-aw diha sa bersikulo.

• Isulat ang unang mga titik sa matag pulong diha sa bersikulo––sama sa L u m i e t; d n, f n––ug dayon gamita kadtong mga titik sa paggiya kanimo samtang imong isulti ang bersikulo.

• Pagmugna og yano nga mga hulagway sa pagtabang kanimo sa pagmemorya sa tudling. Sama pananglit, mahimo kang mosulat:

  Kamo mao ang sa .

Hunahunaa ang ubang mamugnaong mga paagi, sama sa pagrepresentar sa usa ka kasulatan naggamit lamang sa mga emoji nga anaa sa elektronik nga himan.

Pagpraktis

Gamit og tudling sa kasulatan gikan sa bag-ong leksiyon o usa nga gipili sa estudyante (o ikaw makagamit og usa sa mga bersikulo sa kasulatan nga gilista sa ubos). Dapita ang mga estudyante sa pagpraktis sa pagmemorya niini sa ilang kaugalingon, o diha sa gagmay nga mga grupo. Dapita sila sa pagsulay sa dili mokubos sa usa ka pares nga mga pamaagi sa pagmemorya.

Dugang nga mga tudling alang sa pagpraktis:

• 1 Samuel 2:2

• Mga Taga-Roma 15:4

• Mosiah 4:9

• Doktrina ug mga Pakigsaad 1:38

• Moises 5:8

Human sa igo nga panahon, makadapit ka sa mga estudyante sa pagpakigbahin uban sa klase sa mga tudling sa kasulatan nga ilang gipili (kon mipili sila og lain) ug ang pamaagi sa pagmemorya nga ilang gisulayan. Makahisgot sila kon unsa nga paagi ilang nakaplagan nga makatabang.

Pagdapit ug Pag-follow Up

Awhaga ang mga estudyante sa pagmemorya og makahuloganong mga tudling sa kasulatan atol sa ilang personal nga pagtuon niini nga semana. Kini nga mga tudling mahimong usa ka bersikulo o lainlaing mga bersikulo. Makapili sila og usa ka tudling nga ilang gusto nga memoryahon ug pagbutang og kopya niini sa bongbong sa lawak katulganan, salamin sa banyo, hinimo nga likoran, o susama nga dapit. Hangyoa ang mga estudyante sa pag-anha sa klase nga andam sa pagpakigbahin sa mga pamaagi sa pagmemorya nga ilang nagustohan ug mga panghunahuna ug mga panabot nga sila aduna mahitungod sa pagmemorya og kasulatan. Pagmugna og mga oportunidad sa tibuok semana sa pag-follow up sa mga estudyante.