Paghimo og Makahuloganong Mubo nga mga Sulat

Ipatin-aw

Makahimo ka sa pagpakigbahin sa mosunod nga pahayag ni Elder David A. Bedan, kinsa miingon:

Ang pagsulat sa unsay atong nakat-onan, gihunahuna, ug gibati samtang nagtuon kita sa mga kasulatan maoy laing matang sa pagpamalandong ug usa ka gamhanan nga pagdapit sa Espiritu Santo alang sa padayon nga pagtudlo. (David A. Bednar, “Tungod kay Kita Nakakita Kanila,” Liahona, Abr. 2006, 16; tan-awa usab sa Moises 6:5)

Ipasabot nga ang pagkuha og makahuloganong mubo nga mga sulat makalakip sa pagrekord og personal nga mga panghunahuna, mga impresyon, pagpamatuod, mga pangutana, mga kamatuoran, ug mga paagi sa paggamit sa mga pagtulon-an sa ebanghelyo. Kita makarekord og mubo nga mga sulat diha sa usa ka papel o sa usa ka digital nga notebook. Makasulat usab kita niini diha sa mga daplin sa mga kasulatan nga papel o dugang nga mubo nga mga sulat ngadto sa digital nga mga kasulatan (tan-awa sa pagbansay sa kahanas “Pagdugang og Mubo nga mga Sulat ngadto sa mga Kasulatan”). Ang paghimo og makahuloganong mubo nga mga sulat makatabang kanato sa pagtutok samtang kita nagtuon. Kini makapatunhay ug makatabang kanato sa paghinumdom kon unsay atong makat-onan, ug kini makagiya og dugang nga pagpadayag.

Modelo

Hunahunaa ang pagpakigbahin og mubo nga mga sulat nga imong gihimo samtang ikaw nangandam sa pagtudlo niini nga semana. O ikaw makadapit og pipila ka estudyante sa pagpakigbahin og mubo nga mga sulat nga ilang gihimo sa usa ka kwaderno o diha sa ilang mga kasulatan. Dapita sila sa pagpakigbahin kon sa unsang paagi ang paghimo og mubo nga sulat nakapauswag sa ilang pagtuon sa ebanghelyo.

Ikaw mahimong sa daklit mo-modelo kon unsaon sa paggamit ang sinulat sa mga Notebook diha sa Librarya sa Ebanghelyo. O ikaw makadapit sa mga estudyante kinsa naggamit niana nga sinulat sa pagpakita diha sa gagmay nga mga grupo kon unsaon sa paggamit sa mga notebook ug sa paghimo og bag-ong notebook.

Mubo nga Sulat: Ikaw makakaplag og dugang nga mga kapanguhaan ug mga giya diha sa “Tabang” nga seksiyon sa Librarya sa Ebanghelyo nga app, lakip ang “Giya sa Tiggamit sa Librarya sa Ebanghelyo (iOS)” ug “Giya sa Tiggamit sa LIbrarya sa Ebanghelyo (Android).”

Pagpraktis

Hatagi ang mga estudyante og panahon sa pagtuon og tudling gikan sa pagbasa sa kasulatan niini nga semana o gikan sa lista sa dugang nga mga tudling nga gisugyot sa ubos. Awhaga ang mga estudyante sa:

• Paghunong usahay sa makadiyot.

• Pag-ampo nga ang Espiritu motabang kanila sa pagsabot ug sa paggamit sa mga kamatuoran nga ilang gikat-onan.

• Pagrekord og mubo nga mga sulat sa mga butang nga sila nagkat-on, naghunahuna, ug nagbati (diha sa usa ka journal nga papel o kwaderno, sa ilang mga kasulatan, o Librarya sa Ebanghelyo).

Human sa igo nga panahon, dapita ang pipila ka estudyante kinsa mibati og kaharuhay sa pagpakigbahin sa ilang kasinatian.

Dugang nga mga tudling alang sa pagpraktis:

• Mga Salmo 146:1–2, 5–8. Ang mga estudyante makarekord og mga rason nga sila gikinahanglan nga modayeg sa Langitnong Amahan ug ni Jesukristo. Sila makarekord usab og personal nga mga pagdayeg ngadto (o ilang pagdayeg alang) Kanila.

• Lucas 22:39–44 ug Doktrina ug mga Pakigsaad 19:16–19. Ang mga estudyante makahimo sa pagrekord sa ilang mga panghunahuna ug mga pagbati mahitungod ni Jesukristo ug sa Iyang maulaong sakripisyo.

• 1 Nephi 2:18–20. Ang mga estudyante makarekord og mga paagi nga sila o kadtong ilang kaila nakasinati sa malumo nga mga kalooy sa Ginoo.

• Doktrina ug mga Pakigsaad 50:17–22. Ang mga estudyante makarekord kon unsa ang kahulogan ngadto kanila sa pagkat-on pinaagi sa Espiritu. Sila makarekord usab og mga paagi nga sila makadapit sa Espiritu sa pagtudlo kanila sa kamatuoran.

Pagdapit ug Pag-follow Up

Awhaga ang mga estudyante sa paghimo og makahuloganong mubo nga mga sulat samtang sila nagtuon sa ebanghelyo. Hinumdomi ang pag-follow up ug ang pagtugot og panahon kon kamo magkita pag-usab nga ang mga estudyante makigbahin sa ilang mga kasinatian sa paghimo og mubo nga sulat. Pangita og mga paagi sa pagdapit sa mga estudyante sa pagrekord kon unsay ilang nakat-onan, gihunahuna, ug gibati samtang sila nagtuon sa mga kasulatan uban kanimo sa klase.