Pagtakdo sa mga Kasulatan

Ipatin-aw

Ipasabot nga ang pagtakdo mao ang pagkonektar sa usa ka tudling sa kasulatan ngadto sa usa ka kalabot nga kasulatan, kinutlo gikan sa usa ka lider sa Simbahan, o uban nga sulod [content] sa Simbahan. Ang pagtakdo o cross referencing sa mga kasulatan makapalawom sa atong pagsabot sa pulong sa Dios ug makatabang kanato samtang kita nagtudlo ug nakigbahin sa ebanghelyo ngadto sa uban.

Itudlo nga ang mga footnote sa pipila ka bersyon sa mga kasulatan naglangkob na og makatabang nga mga pagtakdo o mga cross reference ngadto sa ubang mga tudling sa kasulatan ug mga kapanguhaan sa pagtuon.

Modelo

Sa daklit pagmodelo niini nga kahanas pinaagi sa paggamit sa mosunod nga ehemplo, o paggamit og usa nga imong kaugalingon:

Basaha ang Isaias 53:3–5. Itudlo nga ang bersikulo 4 nagtudlo nga “gipas-an ang atong kasakitan, ug gipas-an ang atong kasub-anan,” sa Manluluwas.” Itudlo nga si Alma mitudlo og susama nga kamatuoran nga may dugang nga pagtino mahitungod sa Pag-ula sa Manluluwas. Basaha ang Alma 7:11–12. Ipakita sa mga estudyante kon unsaon nila nga makasulat sa Alma 7:11–12 tupad ngadto sa Isaias 53:4 diha sa mga daplin sa ilang mga kasulatan. O ipakita kanila kon unsaon sa pagkonektar niini nga mga tudling sa kasulatan naggamit sa Pagtakdo nga sinulat diha sa Librarya sa Ebanghelyo.

Ikaw makadapit sa mga estudyante kinsa nahibalo kon unsaon sa pagmugna og mga pagtakdo diha sa Librarya sa Ebanghelyo sa pagpakita niini ngadto sa ilang mga kauban sa klase.

Pahinumdom: Ikaw makakaplag og dugang nga mga kapanguhaan, mga kasayoran, ug mga bidyo diha sa “Tabang” nga seksiyon sa Librarya sa Ebanghelyo nga app, lakip sa “Giya sa Tiggamit sa Librarya sa Ebanghelyo (iOS)” ug sa “Giya sa Tiggamit sa Librarya sa Ebanghelyo (Android).”

Pagpraktis

Pagpili og tudling gikan sa pagtuon sa kasulatan niini nga semana. Hatagi ang mga estudyante og kalabot nga tudling sa kasulatan, usa ka pagtulun-an gikan sa lider sa Simbahan, o uban nga sulod [content] gikan sa Librarya sa Ebanghelyo sa pagtakdo ngadto niini. O ikaw makagamit og usa sa mosunod nga mga ehemplo sa pagdapit sa mga estudyante sa pagpraktis niini nga kahanas:

• Basaha ang Job 19:25 isip usa ka klase. Dapita ang mga estudyante sa pagsiksik sa “Manunubos” diha sa Giya ngadto sa mga Kasulatan ug sa pagpangita og usa ka tudling sa kasulatan nga nagtudlo mahitungod sa tahas ni Jesukristo isip atong Manunubos. Ang mga estudyante makadugang og usa ka tudling nga ilang makaplagan ngadto sa daplin sa ilang giimprinta nga mga kasulatan tupad sa Job 19:25 o sa pagmugna og usa ka pagtakdo diha sa ilang digital nga mga kasulatan sa pagkonektar sa duha ka tudling.

• Dapita ang mga estudyante sa pagbasa sa Mateo 5:48 o 3 Nephi 12:48 ug ipatataw ang pulong nga “hingpit.” Dayon ipatan-aw nila ang pakigpulong ni Presidente Russell M. Nelson “Perfection Pending” (Ensign, Nov. 1995) ug ipabasa ang seksiyon “Eternal Perfection.” Dapita ang mga estudyante sa pagpili sa parapo o mga parapo nga ilang nakaplagan nga labing mapuslanon ug pagmugna sa pagtakdo.

• Dapita ang mga estudyante sa pagrebyo sa Lucas 24:1–12 ug dayon ipatataw ang hugpong sa mga pulong “Wala Siya dinhi, kon dili nabanhaw” diha sa bersikulo 6. Dayon patan-awa sila sa Easter Videos sa Librarya sa Ebanghelyo ug itakdo ang usa sa mga bidyo mahitungod sa Pagkabanhaw Lucas 24:6.

Pagdapit ug Pag-follow Up

Awhaga ang mga estudyante sa pagmugna og mga pagtakdo samtang sila nagtuon sa mga kasulatan. Pag-follow up atol sa sunod nga klase pinaagi sa pagdapit sa mga estudyante sa pagpakigbahin kon giunsa nila paggamit kini nga kahanas atol sa ilang personal nga pagtuon. Makahimo sila sa pagpakigbahin mahitungod sa usa ka pagtakdo nga ilang gidugang ngadto sa ilang mga kasulatan ug sa pagpasabot kon nganong ilang gidugang kini. Pangita og mga paagi sa pagpadayon sa pagrebyo ug sa pagpraktis niini nga kahanas diha sa klase.