Pagbutang og Timaan sa mga Kasulatan ug Ubang mga Pagtulon-an sa Ebanghelyo

Ipatin-aw

Ipasabot nga ang pagbutang og timaan usa ka mapuslanong paagi sa pag-organisar og paborito nga mga tudling sa kasulatan, mga pagtulon-an gikan sa mga lider sa Simbahan, ug ubang sulod [content] sa Simbahan. Ang pagbutang og timaan nagtugot kanato sa pagmugna og usa ka personal, hinimo sumala sa gusto nga librarya sa hilisgotan sa ebanghelyo aron kita sayon nga makapangita sa paborito nga mga tudling sa kasulatan ug mga pagtulon-an kon kita nagkinahanglan niini. Ang pagsiksik sa atong mga timaan makatabang kanato kon magtuon o makigbahin sa ebanghelyo ug kon mag-andam og usa ka pakigpulong o leksiyon.

Modelo

Sa lakbit pagmodelo kon unsaon sa pagbutang og timaan sa mga kasulatan pinaagi sa pagdapit sa mga estudyante kinsa nahibalo kon unsaon sa pagbutang og timaan sa mga kasulatan diha sa Librarya sa Ebanghelyo aron sa pagpakita niini nga kahanas ngadto sa ilang kauban sa klase sa gagmay nga mga grupo.

Pahinumdom: Ikaw makakaplag og dugang nga mga kapanguhaan, mga kasayoran, ug mga bidyo diha sa “Tabang” nga seksiyon sa Librarya sa Ebanghelyo nga app, lakip sa “Giya sa Tiggamit sa Librarya sa Ebanghelyo (iOS)” ug sa “Giya sa Tiggamit sa Librarya sa Ebanghelyo (Android).”

Pangutana sa mga estudyante kon unsaon sa usa ka tawo kinsa naggamit sa giimprinta nga mga kasulatan makabutang og timaan sa mga tudling sa kasulatan sumala sa hilisgotan. Ang pipila sa ideya nga ilang ipakigbahin mahimong mag-apil sa mosunod:

• Pagsulat sa hilisgotan sunod sa mga bersikulo

• Pagpatataw o pagsulat sa mga pakisayran diha sa Topical Guide

• Paggamit og usa ka notebook (o blangko nga mga pahina diha sa ilang mga kasulatan) sa pagkategoriya sa mga kasulatan ug mga kinutlo

• Pagbutang og gagmay nga kinolorang mopilit nga mga papel o mga sticker (sa pagrepresentar og pipila ka mga hilisgotan) diha sa daplin sa ilang mga pahina

Pagpraktis

Pagpili og usa ka tudling gikan sa pagtuon sa kasulatan niini nga semana o gamit sa usa sa mosunod nga mga ideya sa pagdapit sa mga estudyante sa pagpraktis niini nga kahanas. Ang mga estudyante makamarka og mga pulong, mga hugpong sa mga pulong, o mga kamatuoran nga importante kanila ug dayon magmugna og usa ka timaan alang sa tudling sa kasulatan o idugang ang tudling ngadto sa anaa na nga timaan. Ang mga estudyante makapakigbahin nga magpares kon unsa ang ilang gibutangan og timan-an ug giunsa nila sa pagbutang og timaan niini.

Dugang nga mga ideya alang sa pagpraktis niini nga kahanas:

• Dapita ang mga estudyante sa paghanduraw nga sila gihangyo sa paghatag og pakigpulong kabahin sa paghinulsol. Hangyoa sila sa pagmugna og usa ka timaan nga gitawag og “Paghinulsol” ug dugangi og dili mominos sa duha ka mga kasulatan ug usa ka pahayag sa usa ka lider sa Simbahan. Ang mga estudyante makasiksik sa “paghinulsol” diha sa Topical Guide, indeks sa tulo ka katinguban, ang Giya ngadto sa mga Kasulatan, o Librarya sa Ebanghelyo.

• Dapita ang mga estudyante sa pagmugna og usa ka timaan nga gitawag og “Mga Ngalan ug Mga Titulo alang ni Kristo.” Hatagi sila og lista sa mga tudling sa kasulatan nga naglangkob og pipila sa mga ngalan ug mga titulo alang ni Jesukristo (sama pananglit, Job 19:25; Isaias 7:14; Juan 15:1; 1 Timoteo 4:10; Mga Hebreohanon 9:15; Pinadayag 1:8; Mosiah 3:8; ug Doktrina ug mga Pakigsaad 93:8–9). Hangyoa ang mga estudyante sa pagpili og upat o lima ka tudling nga basahon, ug dapita sila sa pagbutang og timaan sa ilang paborito nga mga ngalan ug mga titulo ni Jesus. Sila dayon makigbahin og usa sa mga ngalan o mga titulo nga ilang gibutangan og timaan ug makapasabot kon unsay ikatudlo niana nga ngalan o titulo kanato mahitungod Kaniya.

• Hangyoa ang mga estudyante sa pag-adto sa labing bag-o nga sesyon sa kinatibuk-ang komperensiya sa Librarya sa Ebanghelyo. Dapita sila sa pagpili og usa ka pakigpulong nga nagpa-interes kanila ug sa pagbasa og usa ka bahin niini. Awhaga sila sa pagtimaan sa bisan hain nga mga pahayag nga ilang makaplagan nga ilabi ka makahuloganon. Sila makahimo sa pagpakigbahin ngadto sa usa ka tawo diha sa klase kon unsay ilang gitiman-an ug ngano.

Pagdapit ug Pag-follow Up

Awhaga ang mga estudyante sa pagmugna og mga timaan atol sa ilang personal nga pagtuon sa kasulatan ug atol sa panaghisgotan sa klase. Hinumdomi ang pag-follow up sa nagsunod nga mga klase pinaagi sa pagdapit sa mga estudyante sa pagpakigbahin sa mga tudling sa kasulatan ug mga pagtulon-an gikan sa mga lider sa Simbahan nga ilang nabutangan og timaan. Mahimo usab nimong hangyoon ang mga estudyante sa pagpakigbahin og mga paagi nga ilang nagamit sa pagbutang og timaan diha sa ilang personal nga pagtuon ug sa pagpakigbahin o pagtudlo sa ebanghelyo. Pangita og mga paagi sa pagpadayon sa pagrebyo ug sa pagpraktis niini nga kahanas diha sa klase.