Pagmarka sa mga Kasulatan

Ipatin-aw

Ipasabot nga ang pagmarka sa mga kasulatan sa makahuloganong mga paagi makapauswag sa pagtuon ug pagsabot sa ebanghelyo. Ang pagmarka nagtabang sa paghatag og gibug-aton sa unsay atong nakita nga labing importante ug makatabang kanato kon magtudlo sa uban. Ang mga tawo kinsa nagpili sa pagmarka sa ilang mga kasulatan makahimo sa mao sa lainlaing mga paagi, sama sa pagpatataw, paglinya, paglingin, o pagdugang og mga simbolo sa pag-ila sa mga pulong, hugpong sa mga pulong, o mga tudling.

Modelo

Sa lakbit pagmodelo sa pagmarka og mga kasulatan pinaagi sa pagbuhat og usa o dugang pa sa mosunod:

• Pagpakita sa mga estudyante og pipila ka lainlaing mga paagi nga sila makamarka og tudling sa kasulatan––sama sa paglinya, pagpatataw, o paggamit og ubang mga marka o mga simbolo.

• Paghangyo og pipila ka estudyante sa pagpakigbahin og daklit kon sa unsa nga paagi sila gusto nga momarka sa ilang mga kasulatan.

• Pagdapit og mga estudyante kinsa nahibalo kon unsaon pagmarka ang digital nga mga kasulatan diha sa Librarya sa Ebanghelyo sa pagpakita kon unsaon sa pagbuhat niini ngadto sa ilang mga kauban sa klase sa gagmay nga mga grupo.

Pahinumdom: Ikaw makakaplag og dugang nga mga kapanguhaan, mga kasayoran, ug mga bidyo diha sa “Tabang” nga seksiyon sa Librarya sa Ebanghelyo nga app, lakip sa “Giya sa Tiggamit sa Librarya sa Ebanghelyo (iOS)” ug sa “Giya sa Tiggamit sa Librarya sa Ebanghelyo (Android).”

Pagpraktis

Pagpili og tudling gikan sa pagtuon sa kasulatan niini nga semana o gamit sa usa sa mga ehemplo nga gihatag sa ubos, ug dapita ang mga estudyante sa pagpraktis og marka sa mga kasulatan. Ang mga estudyante makahimo sa pagmarka sa mga pulong, mga hugpong sa mga pulong, o mga kamatuoran nga importante kanila. Sila dayon makahimo sa pagpakigbahin nga magpares o sa ginagmay nga mga grupo kon unsay ilang gimarkahan ug nganong ilang gimarkahan kini.

Dugang nga mga tudling alang sa pagpraktis:

• Salmo 23. Ang mga estudyante makamarka og paborito nga mga hugpong sa mga pulong ug mga tudling nga nagtudlo kanila mahitungod sa Ginoo.

• Mateo 5:38–48. Ang mga estudyante makamarka sa mga pagtulon-an sa Manluluwas nga importante ngadto kanila.

• Mosiah 18:8–10. Ang mga estudyante makamarka og mga hugpong sa mga pulong nga nagpakita og mga pasalig nga atong gihimo sa bunyag.

• Doktrina ug mga Pakigsaad 38:1–9. Ang mga estudyante makamarka og mga pulong o hugpong sa mga pulong nga nagtudlo mahitungod ni Jesukristo.

Pagdapit ug Pag-follow Up

Awhaga ang mga estudyante sa pagmarka sa ilang mga kasulatan atol sa ilang personal nga pagtuon sa kasulatan ug atol sa klase. Pag-follow up atol sa sunod nga klase pinaagi sa pagdapit sa mga estudyante sa pagpakigbahin og usa ka butang nga makahuloganon nga ilang gimarkahan atol sa ilang personal nga pagtuon ug ngano nga ilang gimarkahan kini. Mahimo nga ikaw mangutana kon sa unsang paagi ang pagmarka sa mga kasulatan nagtabang kanila sa ilang pagtuon sa kasulatan. Pangita og mga paagi sa pagpadayon sa pagrebyo ug sa pagpraktis niini nga kahanas diha sa klase.