Pagpangutana nga Nagdapit og Makugihon nga Pagkat-on

Ipatin-aw

Mahimong imong ipakigbahin ang mosunod nga pamahayag ni Presidente Henry B. Eyring:

Ang pagpangutana ug ang pagtubag sa mga pangutana anaa sa taliwala sa tanang pagkat-on. (Henry B. Eyring, “The Lord Will Multiply the Harvest” [pamulong ngadto sa Church Educational System religious educators, Feb.6, 1998], ChurchofJesusChrist.org)

Ipasabot nga ang pagpangutana samtang kita nagtuon sa mga kasulatan naggiya ngadto sa mas lawom nga pagsabot sa pulong sa Dios ug nagdapit og personal nga inspirasyon. Paghunahuna sa mga kasulatan ingon og nagdapit kanimo sa pagsulod ngadto sa usa ka panagsultihanay uban kanila. Unsa nga mga pangutana ang inyong ikapangutana sa pagsabot kanila og mas maayo? Unsa nga mga pangutana ang ilang ipangutana nga makatabang kanimo nga mahimong mas maayo? Ang mosunod nga mga matang sa pangutana makatabang kanimo sa pagdapit og makugihong pagkat-on:

• Mga pangutana nga mag-aghat kanato sa pagsiksik sa mga kasulatan alang sa impormasyon mahitungod sa kinatibuk-ang kahulogan o sulod

• Mga pangutana nga nagkinahanglan kanato sa pagtuki sa mga kasulatan alang sa pagsabot

• Mga pangutana nga nagdapit kanato sa pagpamalandong ug paggamit kon unsay atong nakat-onan diha sa mga kasulatan

Modelo

Sa pagmodelo niini nga kahanas, hunahunaa ang paggamit sa mosunod nga ideya o sa usa nga imong kaugalingon.

Isip usa ka klase, basaha ang Mateo 7:1–5. Hunahunaa ang pagpakita og mga pangutana nga mahimo nimong ipangutana sa imong kaugalingon samtang ikaw nagtuon niini nga tudling. Sama pananglit:

• Mga Pangutana nga Nag-aghat og usa ka Pagsiksik alang sa Impormasyon: Kinsa ang nagsulti, ngadto kang kinsa, ug ngano? Unsa ang puling ug troso? Unsa ang tigpakaaron-ingnon?

• Mga Pangutana nga Nagpalawom sa Pagsabot: Unsa ang gitudlo sa Ginoo mahitungod sa paghukom pinaagi sa paggamit og larawan sa mga mota ug mga troso? Unsa ang kalainan tali sa dili matarong ug matarong nga paghukom? (Tan-awa sa Hubad ni Joseph Smith, Mateo 7:1–2, sa Mateo 7:1, footnote a.)

• Mga Pangutana nga Nag-awhag sa Pagpamalandong ug Paggamit: Aduna bay troso sa akong kaugalingon nga mata nga nag-apekto kon giunsa ko pagtan-aw ang uban? Unsay akong mabuhat sa paglikay og dili matarong nga mga paghukom?

Mahimo kang makigbahin kon sa unsang paagi ang pagtubag sa pipila niini nga mga pangutana makatabang kanimo og mas maayong pagsabot sa mga pagtulon-an sa Manluluwas ug magdapit og personal nga inspirasyon ug paggamit.

Pagpraktis

Pagpili og tudling gikan sa pagbasa sa kasulatan niini nga semana, o ikaw makapili og usa gikan sa mga ehemplo nga gihatag sa ubos. I-display o isulat ang mosunod nga mga ulohan diha sa pisara:

• Mga Pangutana nga Nag-aghat og Pagsiksik alang sa Impormasyon

• Mga Pangutana nga Nagpalawom sa Pagsabot

• Mga Pangutana nga Nag-awhag og Pagpamalandong ug Paggamit

Dapita ang mga estudyante sa pagbasa sa tudling sa kasulatan ug sa pagrekord sa dili mominos og usa ka pangutana alang sa matag ulohan. Dapita ang mga estudyante sa pagpakigbahin sa mosunod nga impormasyon uban sa usa ka pares: (1) ang mga pangutana nga ilang gisulat ug (2) giunsa sa pagtubag o pagpamalandong niadto nga mga pangutana makapalawom sa pagsabot ug pagdapit og personal nga inspirasyon ug paggamit.

Dugang nga mga tudling alang sa pagpraktis niini nga kahanas:

• Isaias 53:4–5

• 1 Mga Taga-Corinto 13:1–3

• Helaman 5:12

• Doktrina ug mga Pakigsaad 58:27–29

Pagdapit ug Pag-follow Up

Dapita ang mga estudyante sa paggamit niini nga kahanas sa pagpangutana nga nagdapit og makugihon nga pagkat-on sa pagdugang sa ilang personal nga pagtuon sa kasulatan. Hinumdomi ang pag-follow up ug paghatag og panahon nga kamo magkita pag-usab alang sa pagpakigbahin sa mga estudyante og mga pangutana nga ilang napangutana samtang nagtuon sa mga kasulatan. Mahimo ka usab nga modapit kanila sa pagpakigbahin kon sa unsang paagi ang pagpangutana modugang sa ilang abilidad sa pagsabot ug pagkalingaw sa pagtuon sa kasulatan.