Pag-ila sa mga Kamatuoran sa Ebanghelyo diha sa mga Kasulatan

Ipatin-aw

Ipasabot nga ang mga kasulatan mga tipiganan sa mahangturong kamatuoran. Usahay atong tawgon kining mahangturon nga mga kamatuoran og doktrina o mga baroganan sa ebanghelyo. Ang doktrina ug mga baroganan sa Ginoo adunay gahom sa pag-usab sa atong mga kinabuhi (tan-awa sa Alma 31:5).

Ang pipila sa kamatuoran mas sayon sa pag-ila tungod kay kini gipahayag diha sa mga kasulatan. Kining gipahayag nga mga kamatuoran usahay gipasiunahan uban sa mga pulong o mga hugpong sa mga pulong nga nagsenyas nga usa ka kamatuoran itudlo, sama sa “sa ingon atong makita,” “hinumdomi,” “busa,” “tungod niana,” o “tan-awa.”

Ang ubang mga kamatuoran wala idirekta sa pagpahayag apan gipasumbingay o gihulagway diha sa mga asoy, mga hitabo, ug sa mga sambingay sa kasulatan. Ikaw makaila sa gipasumbingay o gihulagway nga mga kamatuoran pinaagi sa pagpangutana sa imong kaugalingon sama sa mosunod:

• Unsa ang moral o punto niini nga istorya? Nganong giapil kini sa tagsulat?

• Unsa ang akong makat-onan gikan sa mga tawo niini nga istorya?

• Makakita ba ako og usa ka hinungdan ug epekto nga relasyon diha sa asoy nga maggamit sa mga tawo karon?

Modelo

Ehemplo 1: Gipahayag nga mga Kamatuoran

Basaha ang Helaman 5:9 og dungan, ug pag-ila og usa ka kamatuoran sama sa mosunod: Ang mao lamang nga paagi nga kita maluwas mao ang pinaagi sa maulaong dugo ni Jesukristo. Ipasabot usab nga ang pulong hinumdomi niini nga bersikulo nagsenyas nga usa ka kamatuoran hapit na itudlo.

Ehemplo 2: Gipasumbingay o Gihulagway nga mga Kamatuoran

I-summarize ang Mateo 20:1–15, ug ipakigbahin ang mosunod nga mga kamatuoran nga mahimong mailhan gikan sa sambingay sa mga mamumuo sa parasan: Ang tanan makadawat sa mga panalangin sa kinabuhing dayon sa walay pagtagad kon kanus-a nila nadawat ang ebanghelyo. Ang Langitnong Amahan ug si Jesukristo mga maloloy-on, manggihatagon, ug patas sa tanan Nilang mga anak. Kinahanglan kitang maglipay alang sa maayong swerte sa uban kay sa magmasinahon.

Pagpraktis

Dapita ang mga estudyante sa pagpraktis og pag-ila sa mga kamatuoran sa ebanghelyo sa usa ka tudling sa kasulatan nga inyong gitun-an sa klase. O kamo makapili gikan sa mga tudling sa kasulatan nga gilista sa ubos. Dapita ang mga estudyante sa pagpakigbahin og doktrina ug mga baroganan nga ilang nakaplagan.

Dugang nga mga tudling alang sa pagpraktis:

• Genesis 39:7–9

• Mateo 18:23–35

• Alma 41:10

• Doktrina ug mga Pakigsaad 58:26–27

Pagdapit ug Pag-follow Up

Awhaga ang mga estudyante sa paggamit niini nga kahanas sa pag-ila og mga kamatuoran sa ebanghelyo diha sa mga kasulatan atol sa ilang personal nga pagtuon. Alang sa sunod nga daghang semana, hunahunaa ang pagsugod sa klase pinaagi sa pagdapit sa mga estudyante sa pagpakigbahin og mga kamatuoran nga ilang nailhan atol sa ilang personal nga pagtuon.

Samtang ikaw magpadayon sa pag-follow up ug sa pagpraktis niini nga kahanas, hunahunaa ang pagtudlo sa mga estudyante og dugang nga mga kahanas nga mahimong magtabang kanila sa pag-ila og mga kamatuoran. Usa sa mao nga kahanas mao ang pagpangita og mga kamatuoran nga nailhan sa mga propeta ug apostoles karong panahona gikan sa usa ka tudling sa kasulatan.

Ang uban nga mga pagbansay og kahanas nga gilakip dinhi niini nga materyal makatabang usab sa mga estudyante sa pag-ila sa mga kamatuoran sama sa “Pagpangita alang sa Hinungdan ug Epekto nga mga Relasyon diha sa mga Kasulatan” ug “Pagsabot sa mga Kasulatan sa Kinatibuk-ang Kahulogan.”