Pagpangita sa Kahulogan sa mga Pulong ug mga Hugpong sa mga Pulong

Ipatin-aw

Ikaw makapakita og pipila ka pulong o hugpong sa mga pulong gikan sa mga tudling sa kasulatan nga mahimong malisod alang sa inyong mga estudyante sa pagsabot. Ipasabot nga ang pagpangita sa kahulogan sa mga pulong ug mga hugpong sa mga pulong makatabang kanato nga mas masabtan og maayo ang mga kasulatan ug ang mga kamatuoran nga gitudlo niini kanato.

Ipakita ang mosunod nga lista sa mga kapanguhaan nga ang mga estudyante makagamit sa pagpangita sa kahulogan sa mga pulong ug mga hugpong sa mga pulong sa kasulatan. Kon gikinahanglan, ipakita sa mga estudyante kon unsaon sa paggamit niini nga mga kapanguhaan.

• Mga Diksyonaryo

• Ipatin-aw ang sinulat diha sa Librarya sa Ebanghelyo nga app

• Mga Footnote

• Giya ngadto sa mga Kasulatan

• Bible Dictionary

• Ang Hubad ni Joseph Smith

Modelo

Ikaw makagamit og usa o daghan pa sa mosunod nga mga kapanguhaan o usa sa inyong kaugalingon sa pagmodelo niini nga kahanas.

Diksyonaryo o Pagpatin-aw sa Sinulat diha sa Librarya sa Ebanghelyo nga app

Basaha ang Isaias 7:14, ug pangitaa ang pulong “Immanuel.” Pangitaa ang “Immanuel” sa usa ka diksyonaryo o diha sa imong cell phone, ug basaha ang pagpatin-aw. Dayon ipakita kon unsaon paggamit ang Ipatin-aw nga sinulat diha sa Librarya sa Ebanghelyo nga app pinaagi sa pagpatataw sa pulong nga “Immanuel” diha sa Isaias 7:14. Kon ang mga toolbar magpakita, tuploka diha sa Ipatin-aw nga icon sa pagsiksik og online nga diksyonaryo.

Mga Footnote

Kon naggamit sa Santos sa Ulahing mga Adlaw nga edisyon sa King James nga Bersyon sa Biblia, ikaw makatudlo sa mga estudyante ngadto sa Isaias 7:14, footnote e, nga naghatag sa kahulogang Hebrew “uban kanato ang Dios.”

Giya ngadto sa mga Kasulatan

Ipakita sa mga estudyante kon unsaon sa pagsiksik sa “Immanuel” diha sa Giya ngadto sa mga Kasulatan, diin nagpatin-aw sa pulong sama sa ang “Dios nag-uban kanato.”

Ipakigbahin sa mga estudyante kon unsa ang gitudlo sa kahulogan sa Immanuel kaninyo mahitungod ni Jesukristo.

Pagpraktis

Pagpili og tudling gikan sa pagbasa sa kasulatan niini nga semana, o pagpili gikan sa mga tudling nga gilista sa ubos. Dapita ang mga estudyante sa pagtuon sa tudling ug sa pagpraktis og pagpangita sa kahulogan sa mga pulong ug mga hugpong sa mga pulong nga dili nila masabtan. Dapita ang mga estudyante sa pagpakigbahin sa mosunod nga magpares o diha sa ginagmay nga mga grupo:

• Ang kahulogan nga ilang nakaplagan alang sa usa ka pulong o hugpong sa mga pulong ug giunsa nila pagkaplag niini

• Sa unsang paagi nga ang pagkahibalo niini nga kahulogan nagtabang kanila nga mas masabtan og maayo ang tudling sa kasulatan o ang usa ka kamatuoran nga gitudlo niini

Dugang nga mga tudling alang sa pagpraktis:

Moises 1:11	Pulong: nahimaya ang panagway
Mateo 16:24	Hugpong sa mga Pulong: magpas-an sa iyang krus. Kon ang mga estudyante nagkinahanglan og tabang, itudlo sila ngadto sa Hubad ni Joseph Smith, Mateo 16:26.
1 Nephi 13:6	Hugpong sa mga Pulong: gamhanan ug salawayon nga simbahan
Doktrina ug mga Pakigsaad 76:7	Pulong: mga misteryo

Pagdapit ug Pag-follow Up

Awhaga ang mga estudyante sa paggahin og oras atol sa ilang pagtuon sa kasulatan sa pagpangita sa mga kahulogan sa mga pulong ug hugpong sa mga pulong nga dili nila masabtan. Dapita ang mga estudyante sa pag-anha sa sunod klase nga andam sa pagpakigbahin kon sa unsa nga paagi nga ang paggamit niini nga kahanas mi-impluwensiya sa ilang personal nga pagtuon sa kasulatan. Hatagi sila og panahon sa pagpakigbahin sa mga kahulogan sa mga pulong ug mga hugpong sa mga pulong nga ilang nakaplagan ug sa unsang paagi ang pagsabot niini nga mga kahulogan mitabang kanila nga mas masabtan ang mga kasulatan. Pangita og mga oportunidad sa pagpadayon sa pagpraktis niini nga kahanas diha sa klase.