Pi’ira’a misiōni
Pene 3 : Ha’api’ira’a 4––Riro mai ’ei pipi nā Iesu Mesia nō te orara’a tā’āto’a

« Pene 3 : Ha’api’ira’a 4––Riro mai ’ei pipi nā Iesu Mesia nō te orara’a tā’āto’a », ’Ia poro haere i tā’u nei ’Evanelia : E arata’i nō te fa’a’ite i te ’evanelia a Iesu Mesia (2023)

« Pene 3 : Ha’api’ira’a 4 », ’Ia poro haere i tā’u nei ’Evanelia

Pene 3 : Ha’api’ira’a 4

Riro mai ’ei pipi nā Iesu Mesia nō te orara’a tā’āto’a

Hōho’a
The Lost Lamb [Te fanau’a māmoe mo’e] nā Del Parson

Hōro’a i teie ha’api’ira’a

E ’ōro’a ’oa’oa nō te ti’aturi te bāpetizora’a. ’Ia bāpetizo-ana’e-hia tātou, e fa’a’ite tātou i tō tātou hina’aro e pe’e i te Atua ’e ’ia haere nā te ’ē’a e arata’i atu i te ora mure ’ore. E fa’a’ite ato’a tātou i tō tātou ’euhe ’ia riro ’ei pipi nā Iesu Mesia nō te orara’a tā’āto’a.

’Ua fa’anahohia teie ha’api’ira’a ’ia au i te mau fafaura’a tā tātou e rave i te taime bāpetizora’a. Tei roto ato’a te mau tuha’a tumu i muri nei, te mau tātūha’ara’a tāta’itahi o te reira :

’A tauturu i te mau ta’ata ’ia hāro’aro’a ē, te mau parau tumu ’e te mau fa’auera’a tā ’outou e ha’api’i nei, e tuha’a ïa nō te fafaura’a tā rātou e rave i te bāpetizora’a. ’A fa’a’ite ia rātou nāhea te tuha’a tāta’itahi o teie ha’api’ira’a i te tauturu ia rātou « ’ia haere mai… i te Mesia… ’e ’ia fa’ari’i i tāna fa’aorara’a » (Omoni 1 :26; hi’o ato’a 1 Nephi 15:14).

E hina’aro ’outou e ha’api’i i teie ha’api’ira’a e rave rahi taime. Mea varavara roa e hau atu i te 30 minuti te taime ha’api’ira’a. Te rahira’a taime e mea maita’i a’e e ha’apoto ’e ’ia pinepine te taime ha’api’ira’a, ’o tē tāpo’i i te mau tuha’a iti o te mātēria.

E fa’anaho i te mea tā ’outou e ha’api’i, te taime ’outou e ha’api’i ai i te reira, ’e te roara’a. ’A feruri i te mau hina’aro o te feiā tā ’outou e ha’api’i atu, ’e ’a ’imi i te arata’ira’a a te Vārua. Tei ia ’outou te rāve’a nō te ha’api’i mai te au i te mea e tauturu maita’i a’e i te ta’ata, ’ia fa’aineine ia rātou nō te bāpetizora’a ’e te ha’amaura’a.

Te tahi mau tuha’a i roto i teie ha’api’ira’a tei roto te mau anira’a manihini ta’a ’ē. ’A ’imi i te fa’aurura’a nō te fa’aoti e nāhea ’e te taime nō te fa’aroa te tītau manihinira’a. ’A feruri i te fāito hāro’aro’ara’a o te ta’ata tāta’itahi. ’A tauturu iāna ’ia ora i te ’evanelia hō’ē ta’ahira’a i te taime hō’ē.

Hōho’a
vahine e rave ra i te ’ōro’a mo’a

Tā tātou fafaura’a ’ia ineine i te rave i ni’a ia tātou i te i’oa o Iesu Mesia

ʼIa bāpetizo-anaʼe-hia tātou, e fafau tātou e pe’e ia Iesu Mesia « ma te ’ā’au tae mau ». E fa’a’ite pāpū ato’a tātou ē, « ’ua ti’a ia [tātou] ’ia rave i ni’a iho ia [tātou] i te i’oa o Iesu Mesia »(2 Nephi 31:13 ; hi’o ato’a Te Ha’api’ira’a Tumu ’e te mau Fafaura’a 20:37).

Te aura’a te ravera’a i ni’a ia tātou i te i’oa o Iesu Mesia ’o tē ha’amana’ora’a ïa tātou iāna ’e tē tūtavara’a ’ia ora mai tāna mau pipi nō te orara’a tā’āto’a. E vaiiho tātou i tōna māramarama ’ia ’ana’ana nā roto mai ia tātou ia vetahi ’ē ra. E fa’ariro tātou ia tātou iho nōna ’e e tu’u iāna nā mua roa i roto i tō tātou orara’a.

Tē fa’ata’a nei te mau tuha’a i muri nei e piti rāve’a ’ia ha’amana’o ’e ’ia pe’e tātou ia Iesu Mesia.

’A pure pinepine

E nehenehe te pure e riro ’ei hō’ē ’āparaura’a ’ōhie ’e te Metua i te ao ra nō roto roa mai i te māfatu. I roto i te pure, e paraparau tātou iāna ma te mahora ’e ma te ha’avare ’ore. E fa’a’ite tātou iāna i tō tātou here ’e i tō tātou māuruuru nō tō tātou mau ha’amaita’ira’a. E ani ato’a tātou i te tauturu, te pārurura’a, ’e te arata’ira’a. ’A ’ōpani ai tātou i tā tātou pure, e mea ti’a ia tātou e fa’aea ma’a taime ri’i ’e e fa’aro’o.

’Ua ha’api’i Iesu, « ’ia pure tāmau noa ’outou i te Metua nā roto i tō’u ra i’oa » (3 Nephi 18:19, tu’uhia te ha’apāpūra’a ; hi’o ato’a Mose 5:8). ’A pure ai tātou nā roto i te i’oa o Iesu Mesia, e ha’amana’o tātou iāna ’e i te Metua i te ao ra.

’Ua hōro’a mai Iesu ia tātou i te hi’ora’a ’ia pe’e atu, ’a pure noa ai tātou. E nehenehe tātou e ’apo rahi mai nō ni’a i te parau nō te pure nā roto i te tuatāpapara’a i te mau pure a te Fa’aora iho (hi’o Mataio 6:9–13; Ioane 17).

’Ia vai i roto i tā tātou mau pure te mau tuha’a i muri nei :

  • Ha’amata ma te ti’aorora’a i te Metua i te ao ra.

  • ’A fa’a’ite atu i te mau mana’o o tō tātou ’ā’au, mai te ha’amāuruurura’a nō te mau ha’amaita’ira’a tā tātou i fa’ari’i.

  • ’A ui i te mau uira’a, ’a ’imi i te arata’ira’a, ’e ’a ani i te mau ha’amaita’ira’a.

  • ’A fa’aoti ma te parau, « Nā roto i te i’oa o Iesu Mesia ra, ’āmene ».

Tē tītau nei te mau pāpa’ira’a mo’a ia tātou ’ia pure i te po’ipo’i ’e i te ru’i. Teie rā, e nehenehe tātou e pure i te mau taime ato’a ’e i te mau vāhi ato’a. Nō tō tātou iho mau pure ’e tō te ’utuāfare, e ti’a paha ia tātou e tūturi ’ia pure ana’e tātou. E ti’a ’ia vai tāmau noa te hō’ē pure i roto i tō tātou māfatu. (Hi’o Alama 34:27 ; 37:36–37 ; 3 Nephi 17:13 ; 19:16.)

E ti’a i tā tātou mau pure ’ia feruri-maita’i-hia ’e nō roto roa mai i te māfatu. ’Ia pure ana’e tātou, e ti’a ia tātou e ’ape i te fa’ahiti noa i te hō’ē ā mau ’ohipa nā roto i te hō’ē ā huru.

’Ia pure tātou ma te fa’aro’o, te mana’o tae, ’e te hina’aro mau ’ia rave mai te mau pāhonora’a ’o tā tātou e fa’ari’i mai. ’Ia nā reira ana’e tātou, e arata’i te Atua ia tātou ’e e tauturu ia tātou ’ia rave i te mau fa’aotira’a maita’i. E tae mai te mana’o, ’ua piri roa atu tātou iāna. E hōro’a mai ’oia ia tātou te hāro’aro’ara’a ’e te parau mau. E hōro’a mai ’oia ia tātou te tāmahanahanara’a, te hau, ’e te pūai.

’Imira’a pāpa’ira’a mo’a

Ha’api’i rahi atu ā nō ni’a i teie parau tumu

  • Arata’i nō te mau pāpa’ira’a mo’a : « Pure »

Tītau i te ’ite i te mau pāpa’ira’a mo’a.

’Ua ha’api’i Nephi, « ’a rave i te fa’a’amu’a i te mau parau a te Mesia ; inaha ho’i, e fa’a’ite te mau parau a te Mesia ia ’outou i te mau mea tā ’outou e ti’a ’ia rave » (2 Nephi 32:3 ; hi’o ato’a 31:20).

Te tītaura’a i te ’ite i te mau pāpa’ira’a mo’a ’o te hō’ē ïa rāve’a faufa’a roa nō te ha’amana’o ia Iesu Mesia ’e ’ia pe’e iāna. I roto i te mau pāpa’ira’a mo’a e ha’api’i mai tātou i tōna orara’a, tāna tāvinira’a, ’e tāna mau ha’api’ira’a. E ha’api’i ato’a mai tātou i tāna mau fafaura’a. ’A tai’o ai tātou i te mau pāpa’ira’a mo’a, e tāmata mai tātou i tōna here. E ’ā’ano atu ā tō vaerua, e rahi atu ā tō fa’aro’o iāna, ’e e ha’amāramaramahia tō tātou ferurira’a. E pūai atu ā tō tātou ’itera’a pāpū nō tāna misiōni hanahana.

E ha’amana’o ’e e pe’e tātou ia Iesu, ’a fa’a’ohipa ai tātou i tāna mau parau i roto i tō tātou orara’a. E ti’a ia tātou ’ia tītau i te ’ite i te mau pāpa’ira’a mo’a i te mau mahana ato’a, te Buka a Moromona iho ā ra.

Te mau pāpa’ira’a mo’a a Te ’Ēkālēsia a Iesu Mesia i te Feiā Mo’a i te mau Mahana Hope’a nei ’oia ho’i, te Bibilia Mo’a, te Buka a Moromona, te Ha’api’ira’a Tumu ’e te mau Fafaura’a, ’e te Poe Tao’a Rahi. E pi’i-ato’a-hia te reira te « mau buka tumu a te ’Ēkālēsia ».

’Imira’a pāpa’ira’a mo’a

Ha’api’i rahi atu ā nō ni’a i teie parau tumu

Hōho’a
Iesu Mesia e ha’api’i ra i te naho’a ta’ata

Tā tātou fafaura’a ’ia ha’apa’o i te mau fa’auera’a a te Atua

Fa’ata’ara’a : E rave rahi rāve’a nō te ha’api’i i te mau fa’auera’a i roto i teie tuha’a. ’Ei hi’ora’a, e nehenehe ’outou e ha’api’i ia rātou mā te tātūha’a i te reira. ’Aore rā, e nehenehe ’outou e ha’api’i i te tahi o rātou ’ei tuha’a nō nā ha’api’ira’a mātāmua e toru. ’Ia ha’api’i-ana’e-hia te mau fa’auera’a, ’ia ha’apāpū e fa’atū’ati atu ia rātou i te fafaura’a o te bāpetizora’a ’e i te fa’anahora’a nō te fa’aorara’a.

’Ia bāpetizo-ana’e-hia tātou, e fafau tātou i te Atua « e ha’apa’o ho’i i tāna ra mau fa’auera’a » (Mosia 18:10 ; Alama 7:15).

’Ua hōro’a mai te Atua ia tātou i te mau fa’auera’a nō te mea ’ua here ’oia ia tātou. Tē hina’aro nei ’oia i te maita’i a’e nō tātou, i teienei ’e i te ao mure ’ore. ’Ei Metua i te ao ra nō tātou, ’ua ’ite ’oia i te mea tā tātou e hina’aro nō tō tātou ora maita’i i te pae vārua ’e i te pae tino. ’Ua ’ite ato’a ’oia i te mea e hōpoi mai ia tātou te ’oa’oa rahi a’e. E hōro’a hanahana te mau fa’auera’a tāta’itahi, tei hōro’ahia mai nō te arata’i i tā tātou mau fa’aotira’a, nō te pāruru ia tātou, ’e nō te tauturu ia tātou ’ia tupu i te rahi.

Hō’ē tumu nō reira tātou i haere mai ai i te fenua nei, nō te ha’api’i ’e nō te tupu i te rahi ma te fa’a’ohipa-pa’ari-ra’a i tō tātou ti’amāra’a ’ia mā’iti (hi’o Aberahama 3:25). Te mā’itira’a ’ia ha’apa’o i te mau fa’auera’a a te Atua––’e te tātarahapara’a ’ia hapa ana’e tātou––e tauturu ia tātou ’ia rātere nā roto i teie tere pohe e mea pinepine te fifi rahi.

’Ua riro te mau fa’auera’a a te Atua ’ei puna nō te pūai ’e te mau ha’amaita’ira’a (hi’o Te Ha’api’ira’a Tumu ’e te mau Fafaura’a 82:8–9). Nā roto i te ha’apa’ora’a i te mau fa’auera’a, e ha’api’i mai tātou ē, e ’ere i te mau ture teimaha ’o te fa’a’iti mai i tō tātou ti’amāra’a ’ia mā’iti. Te ti’amāra’a ’ia mā’iti mau e tae mai ïa nā roto i te ha’apa’ora’a i te mau fa’auera’a. Te ha’apa’ora’a ’o te hō’ē ïa puna nō te pūai ’o tē hōpoi mai i te māramarama ’e te ’ite nā roto mai i te Vārua Maita’i. E hōpoi mai te reira ia tātou te ’oa’oa rahi a’e ’e e tauturu ia tātou ’ia tāpae i tō tātou fāito hanahana ’ei tamari’i nā te Atua.

E fafau mai te Atua e ha’amaita’i ia tātou mai te peu e ha’apa’o tātou i tāna mau fa’auera’a. Vetahi mau ha’amaita’ira’a e mea ta’a ’ē nō te tahi mau fa’auera’a. Tāna mau ha’amaita’ira’a rahi roa a’e ’o te hau ïa i roto i teie orara’a ’e te orara’a mure ’ore i te ao i muri nei. (Hi’o Mosia 2:41 ; Alama 7:16 ; Te Ha’api’ira’a Tumu ’e te mau Fafaura’a 14:7 ; 59:23 ; 93:28 ; 130:20–21.)

Nō te pae vārua ’e te pae tino te mau ha’amaita’ira’a a te Atua. I te tahi taime, e ti’a ia tātou ’ia fa’a’oroma’i ’a tīa’i noa ai tātou i te reira, ma te ti’aturi e tae mai te reira mai te au i tōna hina’aro ’e tōna taime (hi’o Mosia 7:33 ; Te Ha’api’ira’a Tumu ’e te mau Fafaura’a 88:68). Nō te ’ite i te tahi mau ha’amaita’ira’a, tītauhia ia tātou ’ia vai ara noa ’e ’ia hi’o haere ma te pae vārua. E parau mau ta’a ’ē roa te reira nō te mau ha’amaita’ira’a ’o tē tae mai ma te rāve’a ’ōhie ’e te mātaro-noa-hia.

E riro te tahi mau ha’amaita’ira’a e mea pāpū roa ’ia hi’o-maita’i-hia. Te tahi e nehenehe e tae mai i muri a’e i teie orara’a. Ta’a ’ē atu i te taime ’aore rā i te huru o te mau ha’amaita’ira’a a te Atua, e ti’a ’ia pāpū maita’i ia tātou ē, e tae mai iho ā te reira mai te peu e tūtava tātou ’ia ora i te ’evanelia a Iesu Mesia (hi’o Te Ha’api’ira’a Tumu ’e te mau Fafaura’a 82:10).

’Ua here te Atua i tāna mau tamari’i mai te maita’i roa. E ta’ata fa’a’oroma’i ’oia i tō tātou mau paruparu, ’e e fa’a’ore ’oia i tā tātou mau hapa ’ia tātarahapa ana’e tātou.

Nā ture e piti tei hau i te rahi

I te uira’ahia ia Iesu, « tei hea te parau rahi i roto i te ture ? » Pāhono atu ra ’oia, « hina’aro ’oe i tō Atua ia Iehova ma tō ’ā’au ato’a, ’e ma tō vārua ato’a, ’e ma tō mana’o ato’a ».

I muri iho, parau atu ra Iesu ē, mai te reira ato’a te piti : « e aroha atu ’oe i tō ta’ata tupu, mai tō aroha ia ’oe iho » (Mataio 22:36–39). « ’Aita atu ā parau e hau i te reira » (Mareko 12:31).

’Ei tamari’i vārua nā te Atua, e aravihi rahi tō tātou nō te here. Tei roto te reira i tō tātou faufa’a tupuna pae vārua. Tē orara’a i nā ture rahi e piti—e here i te Atua na mua ’e e here i tō tātou ta’ata tupu—’o te huru mau ïa o te mau pipi a Iesu Mesia.

Here o te Atua

Tē vai ra e rave rahi rāve’a nō te fa’a’ite i tō tātou here i te Atua. ’Ia ha’apa’o ana’e tātou i tāna mau fa’auera’a (hi’o Ioane 14:15, 21). ’Ia tu’u ana’e tātou iāna nā mua roa i roto i tō tātou orara’a, te aurarora’a i tō tātou hina’aro i tōna. E nehenehe tātou e fa’atumu i tō tātou mau hina’aro, mau mana’o, ’e mau ’ā’au iāna (hi’o Alama 37:36). E nehenehe tātou e ora ma te ’ā’au māuruuru nō te mau ha’amaita’ira’a ’o tāna i hōro’a mai––’e ’ia riro ’ei ta’ata ’ā’au hōro’a ma te ’ōperera’a i teie mau ha’amaita’ira’a (hi’o Mosia 2:21–24 ; 4:16–21). Nā roto i te pure ’e te tāvinira’a ia vetahi ’ē, e nehenehe tātou e fa’a’ite ’e e fa’ahōhonu atu ā i tō tātou here iāna.

Mai te tahi atu mau fa’auera’a, te fa’auera’a ’ia here i te Atua nō tō tātou ïa maita’i. Te mea tā tātou e here nei e fa’a’itera’a ïa i te mea tā tātou e ’imi nei. Te mea tā tātou e ’imi nei e fa’a’itera’a ïa i te mea tā tātou e feruri nei ’e e rave nei. ’E te mea tā tātou e feruri nei ’e e rave nei e fa’a’itera’a ïa ’o vai tātou––’e ’o vai te ta’ata tā tātou e riro mai.

Here ia vetahi ’ē

Te herera’a ia vetahi ’ē e fa’atorora’a ïa nō tō tātou here i te Atua. ’Ua ha’api’i te Fa’aora ia tātou nā roto e rave rahi rāve’a ’ia here ia vetahi ’ē (hi’o, ’ei hi’ora’a, Luka 10:25–37 ’e Mataio 25:31–46). Tē fa’atoro nei tātou i te rima ’e te fa’ari’i manihini nei ia rātou i roto i tō tātou māfatu ’e tō tātou orara’a. Tē here nei tātou nā roto i te tāvinira’a––ma te hōro’ara’a ia tātou iho noa atu e mau rāve’a na’ina’i. Tē here nei tātou ia vetahi ’ē ma te fa’a’ohipa i te mau ō tā te Atua i hōro’a mai ia tātou, nō te ha’amaita’i ia rātou.

Te herera’a ia vetahi ’ē tei roto te fa’a’oroma’i, te aroha, ’e te ha’avare ’ore. Tei roto i te reira te fa’a’orera’a hapa fa’ahepo ’ore. Tōna aura’a, ’ia fa’aturahia te mau ta’ata ato’a.

’Ia here ana’e tātou i te hō’ē ta’ata, e ha’amaita’ihia tātou ’e taua ta’ata ra. E tupu rahi tō tātou ’ā’au, e faufa’ahia tō tātou orara’a ’e e mara’a atu ā tō tātou ’oa’oa.

Ha’amaita’ira’a

Nā ture rahi e piti—here i te Atua ’e here i tō ta’ata tupu—’o te niu ïa o te mau fa’auera’a ato’a a te Atua (hi’o Mataio 22:40). ’Ia here ana’e tātou i te Atua nā mua roa, ’e ’ia here ato’a ana’e ia vetahi ’ē, e rave te mau mea ato’a i roto i tō tātou orara’a i tō rātou iho vaira’a mau. E taui teie here i tō tātou hi’ora’a ātea, tā tātou fa’a’ohipara’a i tō tātou taime, te mau hina’aro o tā tātou e rave nei ’e te ’āna’ira’a o tā tātou ’ohipa mātāmua e rave.

’Imira’a pāpa’ira’a mo’a

Ha’api’i rahi atu ā nō ni’a i teie parau tumu

  • Arata’i nō te mau pāpa’ira’a mo’a : « Aroha », « Here »

Pe’e i te peropheta

E pi’i te Atua i te mau peropheta ’ia riro ’ei ti’a nōna i ni’a i te fenua nei. Nā roto i tāna mau peropheta, e heheu ’oia i te parau mau ’e e hōro’a i te arata’ira’a ’e te mau fa’aarara’a.

’Ua pi’i te Atua ia Iosepha Semita ’ia riro ’oia ’ei peropheta mātāmua i te mau mahana hope’a nei (hi’o Ha’api’ira’a 1). Te mau mono o Iosepha Semita, ’ua pi’i-ato’a-hia rātou e te Atua nō te arata’i i tāna ’Ēkālēsia, ’oia ato’a te peropheta e arata’i nei i teie mahana. E ti’a ’ia roa’a ia tātou te ha’apāpūra’a o te pi’ira’a hanahana o te peropheta ora ’e ’ia pe’e i tāna mau ha’api’ira’a.

E hōro’a mai te mau ha’api’ira’a a te mau peropheta ora ’e a te mau ’āpōsetolo i te hō’ē tūtau o te parau mau mure ’ore i roto i te hō’ē ao faufa’a tumu tāuiui. ’A pe’e ai tātou i te mau peropheta a te Atua, e’ita te ta’a ’ore ’e te mau ’aimārōra’a e fa’atūrorirori ia tātou. E ’ite mai tātou i te ’oa’oa rahi a’e i roto i teie orara’a ’e e fa’ari’i i te arata’ira’a nō teie tuha’a o tō tātou tere mure ’ore.

’Imira’a pāpa’ira’a mo’a

Ha’api’i rahi atu ā nō ni’a i teie parau tumu

Ha’apa’o i nā ture hō’ē ’ahuru

’Ua heheu mai te Atua i nā ture hō’ē ’ahuru i te hō’ē peropheta tahito ’o Mose te i’oa, nō te arata’i i tōna mau ta’ata. Tē fa’a’ohipa-noa-hia ra teie mau ture hau atu i tō tātou nei tau. Tē ha’api’i nei te reira ia tātou ’ia ha’amori ’e ’ia fa’atura i te Atua. Tē ha’api’i ato’a nei te reira ia rātou nāhea ’ia hāmani maita’i i te tahi ’e te tahi.

  • « ’Eiaha roa tō ’oe ’ei Atua ’ē atu iā’u nei » (Exodo 20:3). Te tahi atu « mau atua » tei roto e rave rahi mea, mai te mau faufa’a, te mana, ’aore rā te ti’ara’a teitei.

  • « ’Eiaha roa ’oe e hāmani i te idolo tarai nō ’oe » (Exodo 20:4).

  • « ’Eiaha ’oe e fa’ahiti faufa’a ’ore noa i te i’oa o tō Atua ra o Iehova » (Exodo 20:7).

  • « E ha’amana’o i te mahana sābati ’ia ha’amo’ahia ïa » (Exodo 20:8).

  • « E fa’atura atu i tō metua tāne ’e tō metua vahine » (Exodo 20:12).

  • « ’Eiaha roa ’oe e taparahi i te ta’ata » (Exodo 20:13).

  • « ’Eiaha roa ’oe e fa’aturi » (Exodo 20:14).

  • « ’Eiaha roa ’oe e ’eiā » (Exodo 20:15).

  • « ’Eiaha roa ’oe e ha’avare ia vetahi ’ē » (Exodo 20:16).

  • « ’Eiaha roa ’oe e nounou » (Exodo 20:17).

’Imira’a pāpa’ira’a mo’a

Ha’api’i rahi atu ā nō ni’a i teie parau tumu

Hōho’a
tāne e amo ra i te vahine

Ora i te ture nō te vi’ivi’i ’ore

Te ture nō te vi’vi’ ’ore e tuha’a faufa’a rahi mau nō te fa’anahora’a a te Atua, nō tō tātou fa’aorara’a ’e te fa’ateiteira’a. ’Ua ha’amauhia te parau nō te hereherera’a i rotopū i te tāne ’e te vahine fa’aipoipo e te Atua, nō te hāmanira’a i te mau tamari’i ’e nō te fa’a’itera’a i te here i roto i te fa’aipoipora’a. ’Ua ’ōpuahia teie hereherera’a ’e te mana nō te hāmani i te ora ta’ata ’ei ’ohipa nehenehe ’e te mo’a.

Te ture nō te vi’ivi’i ’ore a te Atua ’o tē ’orera’a ïa e ta’oto i te ta’ata i rāpae’au i te fa’aipoipora’a i ha’amanahia i rotopū i te hō’ē tāne ’e te hō’ē vahine. Te aura’a ato’a o teie ture, ’ia vai ha’apa’o noa ’e ’ia vai parauti’a noa nā ta’ata fa’aipoipo i muri a’e i te fa’aipoipora’a.

Nō te tauturu ia tātou ’ia ha’apa’o i te ture nō te vi’ivi’i ’ore, ’ua a’o mai te mau peropheta ia tātou ’ia vai mā noa tō tātou mau ferurira’a ’e tā tātou mau parau. E ti’a ia tātou ’ia ’ape i te hōho’a faufau noa atu te huru o te reira. Mai te au i te ture nō te vi’ivi’i ’ore, e ti’a ia tātou ’ia vai haeha’a noa i roto i tō tātou huru ’e tō tātou fa’anehenehera’a.

E ti’a i te mau tino tītau i te bāpetizora’a ’ia ora i te ture nō te vi’vi’i ’ore.

Tātarahapara’a ’e fa’a’orera’a hara

I te hi’ora’a a te Atua, te ’ōfatira’a i te ture nō te vi’ivi’i ’ore e ’ohipa ’ino roa ïa (hi’o Exodo 20:14 ; Ephesia 5:3). E fa’a’ino te reira i te mana mo’a ’o tāna i hōro’a nō te hāmani i te ora. Terā rā, tē tāmau noa nei ’oia i te here ia tātou noa atu ’ua ’ōfati tātou i teie ture. Tē ani manihini nei ’oia ia tātou ’ia tātarahapa ’e ’ia riro mai ’ei mea mā, maoti te tusia tāra’ehara a Iesu Mesia. E nehenehe te tapineva o te hara e monohia e te hau tāmarū o te fa’a’orera’a hara a te Atua (hi’o Te Ha’api’ira’a Tumu ’e te mau Fafaura’a 58:42–43).

Ha’amaita’ira’a

’Ua hōro’a mai te Atua i te ture nō te vi’ivi’i ’ore, nō te ha’amaita’i ia tātou ’oia ato’a te mau tamari’i vārua ’o tāna e ’āfa’i mai i te fenua nei. Te ha’apa’ora’a i teie ture e mea faufa’a roa ïa nō te hau o te ta’ata iho ’e nō te here, nō te ti’aturi ’e nō te hō’ēra’a i roto i te mau autā’atira’a ’utuāfare.

’A ora ai tātou i te ture nō te vi’ivi’i-’ore, e pāruruhia tātou i te māuiui pae vārua ’o tē tae mai nā roto i te hereherera’a i rāpae’au i te fa’aipoipora’a. E ’ape ato’a tātou i te mau fifi pae manava ’e pae tino ’o tē ’āpe’e pinepine nei i taua mau aura’a ra. E tupu tātou i te rahi i roto i tō tātou ti’aturi i mua i te Atua (hi’o Te Ha’api’ira’a Tumu ’e te mau Fafaura’a 121:45). E vai matara hau atu ā tātou i te mana fa’auru o te Vārua Maita’i. E ineine maita’i a’e tātou nō te rave i te mau fafaura’a mo’a i roto i te hiero ’o tē tāhō’ē nei i tō tātou ’utuāfare nō te tau mure ’ore.

’Imira’a pāpa’ira’a mo’a

Ha’api’i rahi atu ā nō ni’a i teie parau tumu

Ha’apa’o i te ture nō te Tuha’a ’Ahuru

Hō’ē ha’amaita’ira’a rahi nō te riro ’ei melo nō te ’Ēkālesia ’o te rāve’a ïa nō te ’aufaura’a i te tuha’a ’ahuru. ’A aufau ai tātou i te tuha’a ’ahuru, tē tauturu ra ïa tātou ’ia nu’u te ’ohipa a te Atua i mua ’e nō te ha’amaita’i i tāna mau tamari’i.

Nō te tau o te Faufa’a Tahito mai te ture nō te tuha’a ’ahuru. ’Ei hi’ora’a, ’ua ’aufau te peropheta Aberahama i te tuha’a ’ahuru nō te tā’āto’ara’a o tāna mau tao’a (hi’o Alama 13:15 ; Genese 14:18–20).

Te ta’o tuha’a ’ahuru te aura’a ’ia ’īritihia, hō’ē ïa i ni’a i te ’ahuru. ’Ia ’aufau tātou i te tuha’a ’ahuru, e hōro’a tātou hō’ē i ni’a i te ’ahuru nō tā tātou moni ’āpī i te ’Ēkālesia (hi’o Te Ha’api’ira’a Tumu ’e te mau Fafaura’a 119:3–4 ; te ’āpī tōna aura’a ’o te moni ïa e ō mai). Te mau mea ato’a tā tātou e vai nei e ō ïa nā te Atua. ’Ia ’aufau ana’e tātou i te tuha’a ’ahuru, tē fa’a’ite ra ïa tātou i tō tātou māuruuru iāna nā roto i te fa’aho’ira’a hō’ē tuha’a nō te mau mea tāna i hōro’a mai nā tātou.

Te ’aufaura’a i te tuha’a ’ahuru e fa’a’itera’a ïa i tō tātou fa’aro’o. ’O te hō’ē ato’a rāve’a nō te fa’ahanahana i te Atua. ’Ua ha’api’i Iesu ē, « e mata na ra [tātou] i te ’imi i te bāsileia o te Atua » (Mataio 6:33), ’e ’o te tuha’a ’ahuru ïa te rāve’a nō te rave i te reira.

Hōho’a
Widow’s Mite [Te lepeta a te vahine ’ivi], nā Sandra Rast

Te fa’a’ohipara’a i te moni tuha’a ’ahuru

E mea mo’a te moni o te tuha’a ’ahuru. E hōro’a tātou i te tuha’a ’ahuru i te hō’ē melo o te ’episekōpora’a ’aore rā i roto e rave rahi ravera’a, e nehenehe tātou e ’aufau nā ni’a i te natirara. ’Ia fa’ari’i ana’e te ’episekōpo i te tuha’a ’ahuru, e hāponohia te reira i te pū fa’atere a te ’Ēkālesia.

Nā te hō’ē ’āpo’ora’a, tei roto te Peresidenira’a Mātāmua, te pupu nō te Tino ’Ahuru ma Piti ’āpōsetolo ’e te ’Episekōpora’a fa’atere rahi, e fa’ata’a nāhea i te fa’a’ohipa i te moni o te tuha’a ’ahuru i roto i te ’ohipa a te Atua (hi’o Te Ha’api’ira’a Tumu ’e te mau Fafaura’a 120:1). Tei roto teie mau fa’a’ohipara’a :

  • Pātura’a ’e te ’atu’atura’a i te mau hiero ’e te mau fare purera’a.

  • ’Īritira’a ’e nene’ira’a i te mau pāpa’ira’a mo’a

  • Turura’a i te mau ’ātivite ’e te mau ’ohipa a te mau ’āmuira’a o te ’Ēkālesia o te fenua iho.

  • Turura’a i te ’ohipa misiōnare nā te ao ato’a nei.

  • Turura’a i te ’ohipa ’ā’amu ’utuāfare.

  • ’Aufaura’a i te mau fare ha’api’ira’a ’e te ha’api’ira’a.

’Aita te tuha’a ’ahuru e fa’a’ohipahia nō te ’aufau i te feiā fa’atere o te ’Ēkālesia o te fenua iho. E tāvini rātou ma te fa’ahepo-’ore-hia ’e te ’aufau-’ore-hia.

Ha’amaita’ira’a

’Ia ’aufau ana’e tātou i te tuha’a ’ahuru, e fafau mai te Atua i te mau ha’amaita’ira’a faufa’a rahi roa a’e i te mea tā tātou i hōro’a atu. « E ’īriti… [’oia] i te mau ha’amāramarama o te ra’i ra, ’a nīni’i atu ai i te tao’a rahi roa ’ei maita’i nō ’outou » (Malaki 3:10 ; hi’o ’īrava 7–12). E riro teie mau ha’amaita’ira’a ’ei maita’i nō te pae vārua ’e te pae tino ato’a.

’Imira’a pāpa’ira’a mo’a

Ha’api’i rahi atu ā nō ni’a i teie parau tumu

Ha’apa’o i te parau pa’ari

Te ture nō te ora maita’i a te Fatu

E hōro’a mo’a tō tātou tino nā te Atua. E tītau tātou tāta’itahia i te hō’ē tino tāhuti nō te riro hau mai mai iāna te huru. Nō te faufa’a rahi o tō tātou tino, ’ua fa’ahōho’a te pāpa’ira’a mo’a i te reira i te mau hiero (hi’o 1 Korinetia 6:19–20).

Tē hina’aro nei te Fatu ’ia rave tātou i tō tātou tino ma te fa’atura. Nō te tauturu ia tātou ’ia nā reira, ’ua heheu mai ’oia i te ture nō te ora maita’i tei pi’ihia te ture nō te parau pa’ari. Tē ha’api’i nei teie heheura’a ia tātou nō ni’a i te ’amura’a i te mā’a maita’i ’e ’eiaha e fa’a’ohipa i te mau mea e fa’a’ino roa i tō tātou tino––mai te ’ava iho ā rā, te ’ava’ava, ’e te mau inu ve’ave’a (’oia ho’i te tī ’e te taofe).

I roto i te vārua nō te parau pa’ari, ’ua fa’aara mai te mau peropheta nō teie tau nō ni’a i te fa’a’ohipara’a i te tahi atu mau mea ’ino roa atu, tei ’ōpanihia e te ture ’aore rā ’o te fa’atītī ia tātou. ’Ua fa’aara ato’a mai te mau peropheta nō ni’a i te rave-rahi-noa-ra’a i te mau rā’au a te taote. (E pāhono tō ’outou peresideni misiōni i te mau uira’a nō ni’a i te tahi atu mau mea e ’ōpanihia i te rave i roto i tō ’outou fenua).

Ha’amaita’ira’a

’Ua hōro’a mai te Fatu i te ture nō te parau pa’ari nō tō tātou ora maita’i i te pae tino ’e te pae vārua. E fafau mai ’oia i te mau ha’amaita’ira’a rahi mai te peu e ha’apa’o tātou i teie fa’auera’a. Tei roto i teie mau ha’amaita’ira’a te ea maita’i, te pa’ari, te mau tao’a o te ’ite ’e te pārurura’a (hi’o Te Ha’api’ira’a Tumu ’e te mau Fafaura’a 89:18–21).

E tauturu te ha’apa’ora’a i te parau pa’ari ia tātou ’ia vai matara noa i te muhumuhura’a a te Vārua Maita’i. Noa atu e fa’aruru tātou pā’āto’a i te mau ha’atāfifira’a i te pae ea, e tauturu te ha’apa’ora’a i teie ture ia tātou ’ia maita’i a’e te ea i te pae tino, te pae ferurira’a ’e te pae vārua.

E ti’a i te mau ta’ata e tītau i te bāpetizora’a ’ia ha’apa’o i te parau pa’ari.

Nō te arata’ira’a i ni’a i te tauturura’a i te feiā e hepohepo nei i te ma’i fa’atītī, hi’o te pene 10.

’Imira’a pāpa’ira’a mo’a

Ha’api’i rahi atu ā nō ni’a i teie parau tumu

Ha’amo’a i te mahana sābati

E mahana fa’afa’eara’a ’e te ha’amorira’a.

Te sābati e mahana mo’a ïa tā te Atua i fa’ata’a nō tātou i te hepetoma ato’a, ’ia fa’aea tātou i te mau ’ohipa ato’a tā tātou i rave ’e ’ia ha’amori iāna. Hō’ē o nā hō’ē ’ahuru fa’auera’a tei hōro’ahia ia Mose ’oia ho’i, ’ia « ha’amana’o i te mahana sābati ’ia ha’amo’ahia ïa » (Exodo 20:8 ; hi’o ato’a ’īrava 9–11).

I roto i te hō’ē heheura’a ’āpī, ’ua ha’apāpū fa’ahou mai te Fatu ē, te sābati « e mahana teie i faʼataʼahia nā ʼoe ’ia faʼaea i tā ʼoe mau ʼohipa, ʼe ’ia haʼamori atu i tei Teitei Roa ra » (Te Ha’pi’ira’a Tumu ’e te mau Fafaura’a 59:10). ’Ua parau ato’a ’oia ē, ’ia riro te sābati ’ei mahana nō te ’oa’oa, te pure ’e te mana’o māuruuru (hi’o ’īrava 14–15).

’Ei tuha’a nō tā tātou ha’amorira’a o te sābati, e haere tātou i te mau hepetoma ato’a i te purera’a ’ōro’a. I roto i te reira purera’a, e ha’amori tātou i te Atua ’e e rave tātou i te ’ōro’a mo’a nō te ha’amana’o ia Iesu Mesia ’e i tāna tāra’ehara. ’Ia rave ana’e tātou i te ’ōro’a mo’a, e fa’a’āpī tātou i tā tātou mau fafaura’a e te Atua ’e e fa’a’ite tātou ē, e hina’aro tātou e tātarahapa i tā tātou mau hara. Te ’ōro’a o te ’ōro’a mo’a ’o te pū mau ïa o tā tātou ha’apa’ora’a i te mahana sābati.

I te fare purera’a, e ’āmui ato’a atu tātou i roto i te piha ha’api’ira’a i reira tātou e ’apo rahi mai ai nō ni’a i te ’evanelia a Iesu Mesia. E tupu tō tātou fa’aro’o i te rahi ’a tuatāpapa ’āmui ai tātou i te mau pāpa’ira’a mo’a. E tupu tō tātou here i te rahi ’a tāvini ’āmui ai ’e ’a ha’apūai ’āmui ai tātou te tahi ’e te tahi.

Hau atu i te fa’aeara’a i tā tātou mau ’ohipa i te sābati, e ti’a ia tātou e ha’apae i te haere i te fare toa ’e te tahi atu mau ’ōhipara’a mai te huru ra ē e mahana mai te mau mahana ato’a. ’Ia tu’u tātoui te hiti te mau ’ātivite o te ao nei ’e e rōtahi i tō tātou mau mana’o ’e tā tātou ’ohipa i ni’a i te mau mea pae vārua.

Hō’ē mahana nō te rave i te maita’i

Te ravera’a i te maita’i i te mahana sābati e mea faufa’a a’e i te mea tā tātou e vaiiho i te rave nō te ha’amo’ara’a i te reira. E ha’api’i mai tātou i te ’evanelia, e ha’apūai i te fa’aro’o, e patu i te mau aura’a, e tāvini ’e e ’āmui atu i roto i te tahi mau ’ohipara’a e fa’ateitei nā muri i te ’utuāfare ’e te mau hoa.

Hōho’a
nā ta’ata fa’aipoipo e tai’o ra te pāpa’ira’a mo’a

Ha’amaita’ira’a

Te ha’amo’ara’a i te mahana sābati e fa’a’itera’a ïa i tō tātou pūpūra’a ia tātou iho i te Metua i te ao ra ’e ia Iesu Mesia. ’A fa’ariro ai tātou i tā tātou mau ’ohipara’a e tano ’e te mau hina’aro o te Atua nō tera mahana, e fa’ari’i tātou te ’oa’oa ’e te hau. E fa’a’amuhia tātou i te pae vārua ’e i te au maita’i i te pae tino. E ha’afātata ato’a atu ā tātou i te Atua ’e e fa’arahia tō tātou aura’a ’e tō tātou Fa’aora. E tāpe’a maita’i a’e tātou ia tātou iho « ’ia ’ore… ’ia vi’ivi’i i te mau mea nō teie nei ao » (Te Ha’api’ira’a Tumu ’e te mau Fafaura’a 59:9). E riro mai te sābati « ’ei mahana hina’arohia » (Isaia 58:13 ; hi’o ato’a ’īrava 14).

’Imira’a pāpa’ira’a mo’a

Ha’api’i rahi atu ā nō ni’a i teie parau tumu

  • Arata’i nō te mau pāpa’ira’a mo’a : « Mahana sābati »

Ha’apa’o ’e fa’atura i te ture

Tē ti’aturi nei te feiā mo’a i te mahana hope’a nei e ti’a ’ia ha’apa’ohia te ture ’e ’ia riro ’ei tino huira’atira maita’i (hi’o Te Ha’api’ira’a Tumu ’e te mau Fafaura’a 134 ; Te Hīro’a Fa’aro’o 1:12). Tē fa’aitoitohia nei te mau melo ’ia tāvini nō te ha’amaita’i i tō rātou ’oire ’e tō rātou nuna’a. E fa’aitoito-ato’a-hia rātou ’ia riro ’ei umera’a maita’i nō te mau faufa’a mōrare i roto i te tōtaiete ’e te fa’aterera’a hau.

E tītau manihinihia te mau melo o te ’Ēkālesia ’ia ’āmui atu i roto i te fa’aterera’a hau ’e i te poritita mai te au i te ture. Nō te mau melo e mau nei i te mau ti’ara’a i roto i te fa’aterera’a hau e ’ohipa rātou ’ei tino huira’atira e ti’a ai, ’eiaha rā ’ei ti’a nō te ’Ēkālesia.

’Imira’a pāpa’ira’a mo’a

Ha’api’i rahi atu ā nō ni’a i teie parau tumu

Hōho’a
Greatest in the Kingdom [Te rahi a’e i te bāsileia nei] nā J. Kirk Richards

Tā tātou fafaura’a ’ia tāvini i te Atua ’e ia vētahi ’ē

Tāvinira’a

ʼIa bāpetizo-anaʼe-hia tātou, e fafau tātou e tāvini i te Atua ʼe ʼia vetahi ʼē. Te tāvinira’a ia vetahi ’ē ’o te hō’ē ïa o te mau rāve’a mātāmua tātou e tāvini ai i te Atua (hi’o Mosia 2:17). ’Ua ha’api’i te peropheta Alama i te feiā e hina’aro nei ’ia bāpetizohia rātou ē, e ti’a ia rātou « ’ia amo te tahi i tā te tahi mau hōpoi’a…’ia ’oto ’a ’oto ai te feiā ’oto ra… ’ia tāmāhanahana ia rātou ’o tē au ’ia tāmāhanahanahia » (Mosia 18:8–9).

’Aita e maoro roa i muri a’e i te bāpetizora’a, i tei mātauhia e fa’ari’i te mau melo ’āpī i te hō’ē pi’ira’a ’ia tāvini i roto i te ’Ēkālesia. E mau pi’ira’a fa’ahepo-’ore-hia te reira ’e te ’aufau-’ore-hia. Te fa’ari’ira’a i te reira ’e te tāvinira’a ma te itoito, e tupu tō tātou fa’aro’o i te rahi, e nanea atu ā tō tātou mau tārēni, ’e e ha’amaita’i tātou ia vetahi ’ē.

Te tahi atu tuha’a o tā tātou tāvinira’a i roto i te ’Ēkālesia ’o te rirora’a ïa ’ei « taea’e aupuru » ’aore rā ’ei « tuahine aupuru ». I roto i te reira hōpoi’a, e tāvini tātou i te mau ta’ata ’e te mau ’utuāfare i fa’ata’ahia mai.

’Ei pipi nā Iesu Mesia, e mā’imi tātou i te mau rāve’a nō te tāvini i te mahana tāta’itahi. Mai iāna te huru, e « hāmani maita’i haere » tātou (Te ’Ohipa 10:38). E tāvini tātou i tō tātou ta’ata tupu ’e vetahi ’ē i roto i tō tātou ’oire. E nehenehe tātou e ’āmui atu i roto i te mau rāve’a tāvinira’a a te JustServe i te vāhi e vai ra. E nehenehe tātou e turu i te tauto’ora’a tauturu nā te ao nei a te ’Ēkālesia ’e ’ia ’āmui atu nō te pāhono i te mau ’ati rahi.

’Imira’a pāpa’ira’a mo’a

Ha’api’i rahi atu ā nō ni’a i teie parau tumu

  • Arata’i nō te mau pāpa’ira’a mo’a : « Tāvinira’a »

Hōho’a
mau ta’ata e paraparau ra

Fa’a’itera’a i te ’evanelia

’Ei tuha’a nō tā tātou fafaura’a o te bāpetizora’a, e fafau tātou ’ia « ti’a ’ei ’ite nō te Atua » (Mosia 18:9). Hō’ē o te mau rāve’a nō te ti’a ’ei ’ite ’o te fa’a’itera’a atu ïa i te ’evanelia a Iesu Mesia. Te tauturura’a ia vetahi ’ē ’ia fa’ari’i i te ’evanelia ’o te hō’ē ïa o te mau huru tāvinira’a ’oa’oa roa a’e ’o tā tātou e nehenehe e hōro’a (hi’o Te Ha’api’ira’a Tumu ’e te mau Fafaura’a 18:15–16). E fa’a’itera’a pūai mau nō tō tātou here.

’Ia ora ana’e tātou i te mau ha’amaita’ira’a o te ’evanelia, e tae mai ia tātou te hina’aro e fa’a’ite atu i te reira mau ha’amaita’ira’a. Pinepine te mau feti’i, te mau hoa ’e tei mātauhia i te ’ana’anatae mai ’ia fa’a’ite ana’e tātou i te hi’ora’a ha’apa’o maita’i, ’e ’ia hi’o mai e mea nāhea te ’evanelia i riro ai ’ei ha’amaita’ira’a nō tātou. E nehenehe tātou e fa’a’ite i te ’evanelia ma te ’ōhie ’e te au māite (hi’o Buka arata’i rahi, pene 23).

E ani tātou ia vetahi ’ē ’ia ’āmui mai ia tātou i te mau ’ohipa tāvinira’a, tā te ’oire, te mau fa’a’ana’anataera’a, ’e te mau ’ātivite a te ’Ēkālesia. E nehenehe e ani ia rātou e haere mai i te purera’a a te ’Ēkālesia ’aore rā, i te hō’ē ’ōro’a bāpetizora’a. E nehenehe e ani ia rātou e haere mai e māta’ita’i i te hō’ē video i ni’a i te itenati ’o te fa’ata’a nei i te ’evanelia a Iesu Mesia, e tai’o i te Buka a Moromona, ’aore rā e haere e māta’ita’i hō’ē mahana o te ’ōpani ’īriti i te hiero. E hānere atu ā anira’a manihini tā tātou e nehenehe e fa’atae atu. Pinepine, te ani-manihini-ra’a te aura’a ’ōhie roa te fa’aōra’a mai i tō tātou ’utuāfare, tō tātou mau hoa ’e tō tātou ta’ata tupu i roto i te ’ohipa tā tātou i rave a’ena.

Mai te peu e ani tātou iāna, e tauturu mai te Atua ia tātou ’ia ’ite i te mau rāve’a nō te fa’a’ite i te ’evanelia ’e ’ia parau ia vetahi ’ē nāhea te reira i te rirora’a ’ei ha’amaita’ira’a nō tō tātou orara’a.

Nō te tahi atu mau ha’amaramaramara’a nō ni’a i te fa’a’ohipara’a i te mau parau tumu o te herera’a, te fa’a’itera’a, ’e te ani-manihini-ra’a, hi’o « Tāhō’ē e te mau melo » i te pene 9.

’Imira’a pāpa’ira’a mo’a

Ha’api’i rahi atu ā nō ni’a i teie parau tumu

Ha’apaera’a mā’a ’e te mau ō o te ha’apaera’a mā’a

’Ua ha’amau te Fatu i te ture nō te ha’apaera’a mā’a mai te hō’ē rāve’a nō tātou, nō te fa’ananea atu ā i te pūai pae vārua ’e nō te tauturu i te feiā i roto i te fifi.

Te aura’a o te ha’apaera’a mā’a ’o te ’orera’a ïa e ’amu i te mā’a ’e te inu nō te tahi ma’a taime. ’Ua fa’ata’a te ’Ēkālesia i te sābati mātāmua o te ’āva’e ’ei mahana ha’apaera’a mā’a. I roto i te hō’ē mahana ha’apaera’a mā’a, ’aita ïa e tāmā’a ’e e inu nō te hō’ē pu’e tau e 24 hora, mai te mea e nehenehe te tino e nā reira. Te tahi atu mau tuha’a faufa’a roa o te sābati ha’apaera’a mā’a ’oia ho’i te pure ’e te ’itera’a pāpū. E fa’aitoito-ato’a-hia tātou e ha’apae i te mā’a i te tahi atu taime, ’ia hina’aro ana’e tātou.

Fa’ananeara’a i te pūai pae vārua

E nehenehe te ha’apaera’a mā’a e tauturu ia tātou ’ia riro ’ei ta’ata haeha’a, ’ia ha’afātata atu ā i te Atua ’e ’ia ’ite tātou iho i te fa’a’āpīra’a pae vārua. Hou te ha’amatara’a i tāna tāvinira’a, ’ua ha’apae Iesu Mesia i te mā’a (hi’o Mataio 4:1–2). Tē fa’a’ite nei te mau pāpa’ira’a mo’a e rave rahi ’ā’amu o te mau peropheta ’e te tahi atu feiā tei ha’apa’e i te mā’a, ’ia ti’a ia rātou ’ia ha’apūai i tō rātou pūai pae vārua ’e ’ia mā’imi i te mau ha’amaita’ira’a ta’a ’ē nō rātou iho ’aore rā nō vētahi ’ē.

E haere ’āpipiti noa te ha’apaera’a mā’a ’e te pure. ’Ia ha’apae ana’e tātou i te mā’a ’e ’ia pure ma te fa’aro’o, mea pāpū e fa’ari’i tātou i te heheura’a o te ta’ata iho. E māramarama rahi ato’a atu tātou nō te ’ite i te parau mau ’e ’ia hāro’aro’a i te hina’aro o te Atua.

Tauturura’a i te feiā i roto i te fifi

’Ia ha’apae ana’e tātou i te mā’a, e hōro’a tātou i te moni i te ’Ēkālesia nō te tauturu i te aupurura’a i te feiā i roto i te fifi. E parauhia te reira te ō ha’apaera’a mā’a. E anihia ia tātou e hōro’a i te ō e ’aifāito a’e i te fāito ho’o o te mā’a ’aita i ’amuhia. Tē fa’aitoitohia nei ia tātou ’ia riro ’ei feiā ’ā’au hōro’a ’e ’ia hōro’a hau atu i te ho’o o nā tāma’ara’a e piti, mai te mea e mara’a ia rātou. Tē hōro’ara’a i te ō ha’apaera’a mā’a ’o te hō’ē ïa rāve’a nō te tāvini ia vetahi ’ē.

E fa’a’ohipahia te mau ō ha’apaera’a mā’a, nō te hōro’a i te mā’a ’e te tahi atu mau tauiha’a e hina’aro-mātāmua-hia e te feiā i roto te fifi, i te fenua iho ’aore rā nā te ao nei. Nō te mau ha’amāramaramara’a nō ni’a i te hōro’ara’a i te mau ō ha’apaera’a mā’a, hi’o « Te ō o te tuha’a ’ahuru ’e te tahi atu mau ō » i roto i teie ha’api’ira’a.

’Imira’a pāpa’ira’a mo’a

Te ha’apaera’a mā’a

Ha’apa’ora’a i te feiā i roto i te fifi

Ha’api’i rahi atu ā nō ni’a i teie parau tumu

  • Arata’i nō te mau pāpa’ira’a mo’a : « Ha’apaera’a »

  • Buka arata’i rahi : 22.2.2

Hōho’a
’utuāfare i rāpae’au i te hiero

Tā tātou fafaura’a ’ia fa’aitoito ē tae noa atu i te hope’a

’Ia bāpetizo-ana’e-hia tātou, e fafau tātou ’e te Atua ’ia « fa’aitoito ē tae noa atu i te hope’a » ma te orara’a i te ’evanelia a Iesu Mesia (2 Nephi 31:20 ; hi’o ato’a Mosia 18:13). E tūtava tātou ’ia riro ’ei pipi nō te orara’a tā’āto’a nā Iesu Mesia.

’Ua fa’ata’a te peropheta Nephi nō te Buka a Moromona i te bāpetizora’a mai te ’ūputa e nā reira tātou e tomo ai i ni’a i te ’ē’a o te ’evanelia (hi’o 2 Nephi 31:17). I muri iho i te bāpetizora’a, e tāmau noa tātou i te « haere māite […] i mua ma te rave i te fa’a’amu’a i te parau a te Mesia » (2 Nephi 31:20).

’A « haere māite [ai tātou] i mua » i ni’a i te ’ē’a o ti’ara’a pipi, tē fa’aineine ra tātou i te haere i te hiero. I reira, e rave tātou i te mau fafaura’a ’e te Atua ’ia fa’ari’i ana’e tātou i te mau ’ōro’a o te hiero. I roto i te hiero, e hōro’ahia ia tātou te mana ’e e nehenehe tātou e tā’atihia ’ei ’utuāfare nō te ora mure ’ore. Ma te ha’apa’ora’a i te mau fafaura’a tā tātou i rave i roto i te hiero, e matara te mau ’ūputa o te mau ti’ara’a mana pae vārua ato’a ’e te ha’amaita’ira’a tā te Atua i fa’aherehere nō tātou.

’A tāmau māite noa ai tātou i ni’a i te ’ē’a o te ’evanelia, i te hope’a e fa’ari’i tātou i te ō rahi roa a’e a te Atua––te ō nō te ora mure ’ore (hi’o 2 Nephi 31:20 ; Te Ha’api’ira’a Tumu ’e te mau Fafaura’a 14:7).

Tē fa’ata’a nei te mau tuha’a i muri nei i te tahi mau huru tauturu tā te Atua i mana’o nō te tauturu ia tātou ’ia fa’aitoito ē tae noa atu i te hope’a o teie tere tāhuti nei––’e ’ia fa’ari’i i te ’oa’oa nō te reira.

Autahu’ara’a ’e te fa’anahora’a a te ’Ēkālesia

Te autahu’ara’a ’o te ha’amanara’a ïa ’e te mana o te Atua. Nā roto i te autahu’ara’a, e rave fa’aoti te Metua i te ao ra i tāna ’ohipa « e fa’atupu i te tāhuti ’ore ’e te ora mure ’ore o te ta’ata nei » (Mose 1:39). E hōro’a te Atua i te ha’amanara’a ’e te mana i tāna mau tamaiti ’e i tāna mau tamāhine i ni’a i te fenua nei, nō te tauturu i te fa’atupura’a i tāna ’ohipa.

E ha’amaita’i te autahu’ara’a ia tātou pā’āto’a. E fa’ari’ihia te mau ’ōro’a mai te bāpetozira’a ’e te ’ōro’a mo’a e te feiā tei mau i te mau ti’ara’a o te autahu’ara’a. E fa’ari’i ato’a tātou i te mau ha’amaita’ira’a o te fa’aorara’a, te tāmāhanahanara’a ’e te arata’ira’a.

Te autahu’ara’a ’e te fa’aterera’a ’e te mau pi’ira’a o te ’Ēkālesia

Tē arata’ihia nei te ’Ēkālesia e Iesu Mesia nā roto mai i te mau peropheta ’e te mau ’āpōsetolo. ’Ua pi’ihia teie mau ta’ata fa’atere e te Atua, fa’atoro’ahia ’e ’ua hōro’ahia te ha’amanara’a o te autahu’ara’a nō te ’ohipa nā roto i te i’oa o te Fa’aora.

I muta’a iho ra, ’ua hōro’a te Mesia i tāna mau ’āpōsetolo teie ā ha’amanara’a o te autahu’ara’a, ’ia ti’a ia rātou ’ia arata’i i tāna ’Ēkālesia i muri a’e i tōna ma’uera’a i te ra’i. I te hope’a, ’ua mo’e teie ha’amanara’a ’a pāto’i ai te nūna’a i te ’evanelia ’e te pohera’a te mau ’āpōsetolo.

’Ua fa’aho’i-fa’ahou-hia mai te autahu’ara’a i te matahiti 1829 e te mau ve’a nō te ra’i, nā roto mai ia Iosepha Semita, te peropheta, ’e ’ua ha’amau fa’ahou te Fatu i tāna ’Ēkālesia ma te mau ’āpōsetolo ’e te mau peropheta. (Hi’o ha’api’ira’a 1).

I te fāito o te fenua iho, e ha’amanara’a nō te autahu’ara’a tō te mau ’episekōpo ’e te mau peresideni titi ’ia fa’atere i te mau ’āmuira’a o te ’Ēkālesia.

’Ia pi’i-ana’e-hia ’e ’ia fa’ata’a-ana’e-hia te mau tāne ’e te mau vahine ’ia tāvini i roto i te ’Ēkālesia, e hōro’a te Atua ia rātou te ha’amanara’a ’ia ’ohipa i roto i taua pi’ira’a ra. ’Ua hōro’ahia teie ha’amanara’a i te mau misiōnare, te feiā fa’atere, te feiā e ha’api’i ’e te tahi atu e tae roa i te taime e ha’amāuruuruhia ai rātou i tō rātou pi’ira’a. E hōro’ahia te reira i raro a’e i te arata’ira’a a te feiā e mau nei i te mau tāviri o te autahu’ara’a.

E fa’a’ohipahia teie ha’amanara’a o te autahu’ara’a i roto noa i te parauti’a (hi’o Te Ha’api’ira’a Tumu ’e te mau Fafaura’a 121:34–46). E hōpoi’a mo’a teie ha’amanara’a nō te mono i te Fa’aora ’e te ravera’a nā roto i tōna i’oa. ’Ua fa’ata’a-tāmau-hia te reira nō te ha’amaita’i ’e nō te tāvini ia vetahi ’ē.

Hōho’a
feiā ’āpī tamaroa i roto i te ha’api’ira’a sābati

Autahu’ara’a a Aarona ’e autahu’ara’a a Melehizedeka

I roto i te ’Ēkālesia, tē vai nei te autahu’ara’a a Aarona ’e te autahu’ara’a a Melehizedeka. I raro a’e i te fa’aterera’a a te feiā e mau nei i te mau tāviri o te autahu’ara’a, e hōro’ahia te autahu’ara’a a Aarona ’e a Melehizedeka i te mau tāne melo ti’a-mā o te ’Ēkālesia. ’Ia oti te autahu’ara’a tano i te hōro’ahia, e fa’atōro’ahia te ta’ata i te hō’ē tōro’a i roto i te reira autahu’ara’a, mai te diakono ’aore rā, te peresibutero. E ti’a ’ia fa’atōro’ahia ’oia e te hō’ē ta’ata tei mau i te ha’amanara’a i tītauhia.

’Ia fa’ari’i ana’e te hō’ē tāne ’aore rā hō’ē taure’are’a tamāroa i te autahu’ara’a, e fafau ’oia ’e te Atua ’ia rave fa’aoti i te mau hopoi’a mo’a, e tāvini ia vetahi ’ē, ’e e tauturu ’ia patu i te ’Ēkālesia.

E nehenehe te taure’are’a tamāroa e fa’ari’i i te autahu’ara’a a Aarona ’e ’ia fa’atōro’ahia ’ei diakono i te ha’amatara’a nō Tēnuare nō te matahiti o tōna 12ra’a matahiti. E nehenehe rātou e fa’atōro’ahia ’ei ha’api’i i te matahiti nō te 14ra’a o tō rātou matahiti ’e ’ei tahu’a i matahiti nō te 16ra’a o tō rātou matahiti. E nehenehe te tāne fa’afāriuhia tei ti’a te matahiti e fa’ari’i i te autahu’ara’a a Aarona i muri noa mai i te bāpetizora’a ’e te ha’amaura’a. E fa’atere te mau taea’e tei mau i te autahu’ara’a a Aarona i te mau ’ōro’a, mai te ’ōro’a mo’a ’e te bāpetizora’a.

I muri a’e i te tāvinira’a i te tahi taime ’ei tahu’a i roto i te autahu’ara’a a Aarona, e fa’ari’i te hō’ē tāne ti’a-mā e 18 a’e matahiti, i te autahu’ara’a a Melehizedeka ’e e fa’atōro’ahia ’ei peresibutero. Te mau tāne e fa’ari’i i te autahu’ara’a a Melehizedeka, e nehenehe rātou e rave i te mau ’ōro’a, mai te hōro’ara’a i te mau ha’amaita’ira’a nō te fa’aorara’a ’e te tāmāhanahanara’a i tō rātou feti’i ’e ia vetahi ’ē.

Hi’o Buka arata’i rahi, 38.2.9.1, nō te ha’amāramaramara’a nō ni’a i te mau melo ’āpī e fa’ari’i ra i te autahu’ara’a.

Pupu autahu’ara’a ’e te mau pupu tauturu a te ’Ēkālesia

Pupu autahu’ara’a. Hō’ē pupu autahu’ara’a ’o te hō’ē ïa pupu fa’anahohia nō te mau taea’e tei mau i te autahu’ara’a. Tē vai ra i roto i te pāroita tāta’itahi hō’ē pupu peresibutero nō te mau tāne pa’ari. Te mau pupu diakono, ha’api’i ’e mau tahu’a, nō te feiā ’āpī tamaroa ïa.

Sōtaiete Tauturu. Te Sōtaiete Tauturu tei roto te mau vāhine mai te 18 matahiti ’e hau atu. E ha’apūai te mau melo nō te Sōtaiete Tauturu i te mau ’utuāfare, te mau ta’ata, ’e te ’oire.

Feiā ’Āpī Tamāhine. E tomo atu te feiā ’āpī tamāhine i roto i te pupu tauturu a te Feiā ’Āpī Tamāhine i te ha’amatara’a nō Tēnuare o te matahiti e ti’a ai tō rātou e 12 matahiti.

Hōho’a
vahine e ha’api’i ra i te piha ha’api’ira’a

Paraimere. Te mau tamari’i mai te fāito 3 matahiti ē tae atu e 11 matahiti, tei roto rātou i te pupu tauturu o te Paraimere.

Ha’api’ira’a Sābati E haere atu te mau ta’ata pa’ari ato’a ’e te feiā ’āpī i roto i te Ha’api’ira’a Sābati, i reira e ruru ai nō tuatāpapa ’āmui i te mau pāpa’ira’a mo’a.

Nō te tahi atu ha’amāramaramara’a nō ni’a i te autahu’ara’a, hi’o Buka arata’i rahi, pene 3.

Nō te tahi atu ha’amāramaramara’a nō ni’a te pupu autahu’ara’a ’e te mau pupu tauturu a te ’Ēkālesia, hi’o Buka arata’i rahi, pene 8–13.

’Imira’a pāpa’ira’a mo’a

Ha’api’i rahi atu ā nō ni’a i teie parau tumu

Te fa’aipoipora’a ’e te mau ’utuāfare

Te fa’aipoipora’a

’Ua ha’apa’ohia e te Atua te fa’aipoipora’a i rotopū i te tāne ’e te vahine. Tei te pū te reira i tāna ’ōpuara’a nō te nu’ura’a i mua mure ’ore o tāna mau tamari’i.

E ti’a ’ia riro te tāhō’ēra’a i te tāne ’e te vāhine i roto i te fa’aipoipora’a ’ei aura’a faufa’a mau nō rāua i te fenua nei. E hōpoi’a mo’a nā rāua ’ia vai ha’avare ’ore te tahi i te tahi ’e ’ia ha’apa’o maita’i i tā rāua fafaura’a nō te fa’aipoipora’a.

’Ua ’aifāito te tāne ’e te vāhine fa’aipoipo i mua i te ’aro o te Atua. ’Eiaha te hō’ē e ha’avī i te tahi. E ti’a i tā rāua mau fa’aotira’a ’ia ravehia i roto i te hō’ēra’a ’e te here, ma te rave ’āmui hope rāua to’opiti.

’A here ai te tāne ’e te vāhine ia rāua iho ’e ’ia ’ohipa ’āmui, e nehenehe tō rāua fa’aipoipora’a e riro ’ei puna nō tō rāua ’oa’oa rahi roa a’e. E ti’a ia rāua e tauturu te tahi i te tahi ’e e tauturu i tā rāua mau tamari’i ’ia nu’u i mua i te ora mure ’ore.

Te ’utuāfare

Mai te fa’aipoipora’a, ’ua ha’apa’ohia te ’utuāfare e te Atua ’e tei te pū nō tāna ’ōpuara’a nō tō tātou ’oa’oa mure ’ore. E mea pāpū roa e ’oa’oa a’e tō tātou ’utuāfare ’ia ora ana’e tātou mai te au i te mau ha’api’ira’a a Iesu Mesia. E ha’api’i te mau metua i tā rātou mau tamari’i i te ’evanelia a Iesu Mesia ’e e fa’a’ite i te hi’ora’a maita’i ma te orara’a i te reira. E hōro’a mai te mau ’utuāfare i te mau rāve’a ’ia here tātou ’e ’ia tāvini i te tahi ’e te tahi.

E ti’a i te mau metua ’ia fa’ariro i tō rātou ’utuāfare ’ei ’ohipa mātāmua roa. E ha’amaita’ira’a ’e e hōpoi’a mo’a nā te mau metua ’ia ’atu’atu i te mau tamari’i ’o tē ti’a ia rāua ’ia fānau ’aore rā, ’ia fa’a’amu.

E fa’aruru te mau ’utuāfāre ato’a i te mau tāmatara’a. ’A ’imi ai tātou i te pāturura’a a te Atua ’e e ha’apa’o i tāna mau fa’auera’a, e nehenehe te mau tāmatara’a o te ’utuāfare e tauturu ia tātou ’ia ha’api’i mai ’e ’ia tupu i te rahi. I te tahi mau taime e tauturu teie mau tāmatara’a ia tātou ’ia ha’api’i mai ’ia tātarahapa tātou ’e ’ia fa’a’ore i te hapa.

Hōho’a
tāne e ha’api’i ra i te ’utuāfare

’Ua fa’aitoito te feiā fa’atere o te ’Ēkālesia i te mau melo ’ia fa’atupu i te purera’a pō ’utuāfare hō’ē taime i te hepetoma. E rave te mau metua i te reira taime nō te ha’api’i i tā rātou mau tamari’i i te ’evanelia, nō te ha’apūai i tō rātou aura’a ’utuāfare ’e ’ia ’ārearea ’āmui. ’Ua ha’aparare ato’a te feiā fa’atere o te ’Ēkālesia i te hō’ē poro’i ’o tē ha’api’i nei i te mau parau mau faufa’a roa nō ni’a i te ’utuāfare (hi’o « Te ’Utuāfare : E Poro’i i tō te Ao nei », ChurchofJesusChrist.org).

Te tahi atu rāve’a nō te ha’apūai i te ’utuāfare tē vai ra te pure ’utuāfare, te tuatāpapara’a i te mau pāpa’ira’a mo’a, ’e te ha’amori-’āmui-ra’a i te fare purera’a. E nehenehe ato’a tātou e mā’imi i te mau ’ā’amu o te ’utuāfare, e ha’aputu i te mau ’ā’amu o te ’utuāfare ’e e tāvini ia vetahi ’ē.

E rave rahi ta’ata e mea iti roa tā rātou rāve’a nō te fa’aipoipo ’aore rā nō te ha’amaita’i i te mau aura’a ’utuāfare here. E rave rahi tei fa’aruru i te fa’ata’ara’a te tāne ’e te vahine ’e te tahi atu mau tupura’a fifi ’utuāfare. Nō reira, e ha’amaita’i te ’evanelia ia tātou te ta’ata tāta’itahi, noa atu te huru o tō tātou orara’a ’utuāfare. ’E mai te peu e vai ha’apa’o noa tātou, e fa’ati’a te Atua ’ia fāna’o tātou i te mau ha’amaita’ira’a o te hō’ē ’utuāfare here, i roto ānei i teie orara’a ’aore rā i te orara’a a muri a’e.

’Imira’a pāpa’ira’a mo’a

Fa’aipoipora’a

’Utuāfare

Ha’api’i rahi atu ā nō ni’a i teie parau tumu

Te ’ohipa hiero ’e te ’ā’amu ’utuāfare nō te mau tupuna

Tē here nei te Metua i te ao ra i tāna mau tamari’i ato’a ’e tē hina’aro nei i tō rātou fa’aorara’a ’e tō rātou fa’ateiteira’a. Nō te mea ho’i ē, e rave rahi miria ta’ata tei pohe ma te ’ore i fa’aro’o noa a’e i te ’evanelia a Iesu Mesia ’aore rā i fa’ari’i i te mau ’ōro’a fa’aorara’a o te ’evanelia. Teie mau ’ōro’a tē vau ra te bāpetizoraʼa, te haʼamauraʼa, te faʼatōroʼaraʼa i te autahuaraʼa nō te mau tāne, te ʼōroʼa hiero ʼe te faʼaipoiporaʼa mure ’ore.

Nā roto i tōna maita’i ’e tōna aroha, ’ua hōro’a mai te Fatu i teie mau ta’ata i te hō’ē rāve’a nō te fa’ari’i i te ’evanelia ’e te mau ’ōro’a. I roto i te ao vārua, e porohia te ’evanelia i te feiā tei pohe ma te ’ore i fa’ari’i i te reira (hi’o Te Ha’api’ira’a Tumu ’e te mau Fafaura’a 138). I roto i te mau hiero, e nehenehe tātou e rave i te mau ’ōro’a nā ni’a i te i’oa o tā tātou mau tupuna i pohe ’e te tahi atu mau ta’ata. I roto i te ao vārua e nehenehe teie mau ta’ata i pohe e mā’iti e fa’ari’i ānei ’aore rā e pāto’i i te ’evanelia ’e te mau ’ōro’a tei ravehia nō rātou.

Hōho’a
e ’utuāfare e tuatāpapa ra i te mau pāpa’ira’a mo’a

Hou tātou ’a rave ai i te reira mau ’ōro’a, tītauhia ia tātou ’ia ’imi i tō tātou mau tupuna tei ’ore i fa’ari’i i te reira. Te ’imira’a i te mau melo nō tō tātou ’utuāfare ’ia nehenehe ia rātou ’ia fa’ari’i i te mau ’ōro’a ’o te ’ōpuara’a tumu ïa o te ’ohipa ’ā’amu ’utuāfare. ’Ia ’itehia mai ia tātou te ha’amāramaramara’a nō ni’a ia rātou, e tu’uhia te reira i roto i te pu’e ’itepiri a te ’Ēkālesia i ni’a FamilySearch.org I muri iho tātou (’aore rā vetahi ē) e nehenehe ai e rave i te mau ’ōro’a mono nō rātou i roto i te hiero.

’A ’imi ai tātou i tō tātou mau tupuna ’e ’a rave ai i te mau ’ōro’a nō rātou, e nehenehe tō tātou ’utuāfare e tāhō’ēhia nō te tau mure ’ore.

’Imira’a pāpa’ira’a mo’a

Ha’api’i rahi atu ā nō ni’a i teie parau tumu

  • Buka arata’i rahi, pene 28: « Te mau ’ōro’a hiero nō tei pohe »

Te mau hiero, te ’ōro’a hiero, te fa’aipoipora’a mure ’ore ’e te ’utuafare mure ’ore

Hiero

Te hiero ’o te fare ïa o te Fatu. E vāhi mo’a teie i reira tātou e rave ai i te mau fafaura’a ’e te Atua, ’a fa’ari’i ai tātou i tāna mau ’ōro’a mo’a. ’A ha’apa’o ai tātou i teie mau fafaura’a, e roa’a ia tātou te mana nō te huru Atua i roto i tō tātou orara’a (hi’o Te Ha’api’ira’a Tumu ’e te mau Fafaura’a 84:19–22 ; 109:22–23).

Te ’ōro’a hiero

Hō’ē o te mau ’ōro’a tā tātou e fa’ari’i i roto i te hiero e pi’ihia te ’ōro’a hiero [dotation]. Te aura’a o te parau ’ōro’a hiero [dotation] « hō’ē hōro’a » ïa. Teie hōro’a nō te ’itera’a ’e te mana nō ’ō mai i te Atua. I roto i te ’ōro’a hiero, e rave tātou i te mau fafaura’a e te Atua ’o te tā’amu ia tātou iāna ’e i tāna Tamaiti, ’ia Iesu Mesia (hi’o pene 1).

E nehenehe te mau ta’ata pa’ari e au ’ia mā’itihia e fa’ari’i i tō rātou iho ’ōro’a hiero i muri a’e hō’ē matahiti i roto i te ’Ēkālesia. Nō te tahi atu ha’amāramaramara’a nō te ’ōro’a hiero, hi’o Buka arata’i rahi, 27,2.

Fa’aipoipora’a mure ’ore ’e te mau ’utuāfare mure ’ore

E fa’ati’a te fa’anahora’a nō te ’oa’oa a te Atua i te mau aura’a ’utuāfare ’ia vai tāmau noa i muri a’e i te pohe. I roto i te hiero, e nehenehe tātou e fa’aipoipohia nō teie nei tau ’e nō te tau mure ’ore. E fa’ati’a te reira i te mau ’utuāfare ’ia tāhō’ēhia e a muri noa atu.

I muri a’e i tō te nā ta’ata fa’aipoipo fa’ari’ira’a i tō rāua ’ōro’a hiero, e nehenehe rāua e tā’atihia ’aore rā e fa’aipoipohia nō te tau mure ’ore. E nehenehe tā rāua mau tamari’i e tā’atihia ia rāua.

Nō te tāne ’e te vahine tei tā’atihia i roto i te hiero, e ti’a ia rāua ’ia ha’apa’o i te mau fafaura’a i ravehia e rāua nō te fa’ari’i i te mau ha’amaita’ira’a o te fa’aipoipora’a mure ’ore.

Hōho’a
nā ta’ata fa’aipoipo e haere ra nā te āroa

’Imira’a pāpa’ira’a mo’a

Ha’api’i rahi atu ā nō ni’a i teie parau tumu