Pene 2 : Mā’imi i roto i te mau pāpa’ira’a mo’a ’e ’ahu i te ha’ana tama’i a te Atua
« Pene 2 : Mā’imi i roto i te mau pāpa’ira’a mo’a ’e ’ahu i te ha’ana tama’i a te Atua », ’Ia poro haere i tā’u nei ’Evanelia : E arata’i nō te fa’a’ite i te ’evanelia a Iesu Mesia (2023)
« Mā’imi i roto i te mau pāpa’ira’a mo’a ’e ’ahu i te ha’ana tama’i a te Atua », ’Ia poro haere i tā’u nei ’Evanelia
Hōho’a
Joseph Smith Seeks Wisdom in the Bible [Tē ’imi nei ’o Iosepha Semita i te pa’ari i roto i te Bibilia], nā Dale Kilbourn
Pene 2
Mā’imi i roto i te mau pāpa’ira’a mo’a ’e ’ahu i te ha’ana tama’i a te Atua
’A feruri na
Nō te aha e mea faufa’a roa i te ha’api’i tāmau noa i te parau a te Atua i roto i te mau pāpa’ira’a mo’a ?
Nāhea au e haʼafaufaʼa atu ā ai i tā’u heheura’a pāpaʼiraʼa moʼa ?
Nāhea au e fa’a’ohipa ai i te ihi anoha’a ma te parauti’a nō te tauturu iā’u ’ia fa’atupu i tā’u fā ?
E aha te aura’a ’ia ’ahu i te ha’ana tama’i o te Atua ?
Mā’imi i roto i te mau pāpa’ira’a mo’a
’O Iesu Mesia « te ora ’e te māramarama o te ao nei. Inaha, ’o ’oia te parau mau ’e te parauti’a » (Alama 38:9 ; hi’o ato’a Ioane 1). Te ha’api’ira’a i te parau a te Atua i roto i te mau pāpa’ira’a mo’a, e fa’atupu ïa te reira i te ’auhune i roto i tō ’oe orara’a (hi’o Ioane 10:10). E fa’a’ī tāna mau parau ia ’oe—’e i te feiā tā ’outou e ha’api’i ra—i te māramarama ’e te parau mau. E tauturu te reira ia ’oe—’e te feiā tā ’outou e ha’api’i ra—’ia ora parauti’a ’e ’ia fa’ari’i i te pārurura’a ’e te pūai hanahana. E tauturu te reira ia ’oe ’ia ’ite iāna ’e ’ia tāmata i tōna aroha, tei hau a’e te monamona i te mau mea monamona ato’a. E fa’a’ī tāna mau parau i tō ’oe vārua i te ’oa’oa (1 Nephi 8:11–12 ; hi’o te mau ’īrava 1–34).
Te mau pāpa’ira’a mo’a, e horo’a ïa nō te ra’i mai. Te hō’ē o te mau ha’amaita’ira’a rahi o tā ’oe misiōni ’o te fa’ata’ara’a ïa i te taime nō te tai’o māite i te reira i te mau mahana ato’a.
’Ua riro te ha’api’ira’a i te ’evanelia ’ei ’ohipa pae vārua ho’ona roa a’e tā ’oe e nehenehe e rave. E ’ohipa fa’aitoito te reira i te pae ferurira’a ’e i te pae vārua. Mai tā Alama i ha’api’i, mai te mea e « tanu » ’oe i te parau a te Atua i roto i tō ’oe ’ā’au, « e ha’amāramarama ’oia i tō [’oe] ’ite »’e e riro te reira ’ei mea minamina roa nō ’oe (Alama 32:28 ; hi’o ato’a Enosa 1:3–4). Mai te mea e tāmau noa ’oe i te ha’api’i ’e i te fa’a’ohipa i te parau a te Atua, « e a’ahia ïa te reira, ’e […] e riro te reira ’ei tumu rā’au ’o tē tupu noa i ni’a ē tae atu ai i te ora mure ’ore » (Alama 32:41 ; hi’o ato’a te mau ’īrava 42–43). E tupu ïa tō ’oe ’ite ’e tō ’oe ’itera’a pāpū i te rahi. Tō ’oe hina’aro ’e tō ’oe ’aravihi ’ia fa’a’ite i te ’evanelia e tupu ïa i te rahi.
Mea faufa’a roa ’ia ’apo i te ha’api’ira’a mai roto mai i te hō’ē ’orometua maita’i, terā rā e mea faufa’a ato’a nō ’oe ’ia ’apo i te mau ’itera’a au nā roto i tā ’oe iho tai’ora’a pāpa’ira’a mo’a. E parau mau ato’a nō te feiā tā ’oe e ha’api’i.
E mea fifi paha ’ia māramarama i te mau pāpa’ira’a mo’a i te ha’amatara’a. Teie rā, mai te peu e tāmau noa ’oe ma te fa’a’oroma’i i te ha’api’i i te parau a te Atua, e rahi atu ā tō ’oe māramaramara’a. E riro ’oe i te poihere i tō ’oe taime i roto i te mau pāpa’ira’a mo’a. E tīa’i rū ’oe i te mea te mau mea ā ’oe e ’apo mai ’e e ’ite.
E nehenehe te ’itera’a ’e te herera’a i te mau pāpa’ira’a mo’a e riro ’ei ha’amaita’ira’a rahi nō tā ’oe tāvinira’a misiōnare, i te roara’a o tō ’oe orara’a. Mai te mea e ’ite ’oe i te mau ha’amaita’ira’a nō te heheura’a pāpa’ira’a mo’a i roto i tā ’oe misiōni, e hina’aro ïa ’oe e tāmau noa i te reira ē hope noa atu tō ’oe orara’a.
Hōho’a
Elder D. Todd Christofferson
« Te tumu rahi o te pāpa’ira’a mo’a ’o te fa’a’īra’a ïa i tō tātou vairua i te fa’aro’o i te Atua te Metua ’e i tāna Tamaiti, Iesu Mesia—te fa’aro’o ē tē vai mau nei rāua ; te fa’aro’o i roto i te fa’anahora’a a te Metua nō tō tātou tāhuti ’ore ’e tē ora mure ’ore ; te fa’aro’o i roto i te tāra’ehara ’e te ti’afa’ahoura’a o Iesu Mesia, tei riro ’ei tumu nō teie fa’anahora’a nō te ’oa’oa ; te fa’aro’o nō te fa’ariro i te ’evanelia a Iesu Mesia ’ei arata’i nō tō tātou orara’a ; ’e te fa’aro’o nō te ’ite i te Atua mau ra, ’e ia Iesu Mesia, i [tāna] i tono mai’ (Ioane 17:3) » (D. Todd Christofferson, « Te Ha’amaita’ira’a o te Pāpa’ira’a mo’a », Liahona, Mē 2010, 34).
Ha’api’ira’a ta’ata hō’ē
’A hi’o i te hōho’a o Iosepha Semita i te ha’amatara’a o teie pene. ’A tai’o i te Iosepha Semita—’Ā’amu 1:11–13. ’A pāhono i te mau uira’a i muri nei i roto i tā ’oe buka tuatāpapara’a ha’api’ira’a.
Nāhea te tai’ora’a ’e te ferurira’a a Iosepha Semita i te Iakobo 1:5 i te arata’ira’a iāna ’ia fa’ari’i i te heheura’a ?
E aha te hope’a o tāna ’imira’a i ni’a i te mau u’i nō muri mai ?
E aha te hope’a o tāna fa’aotira’a e tai’o ’e e ’imi i ni’a i tō ’oe orara’a ?
Nāhea tā ’oe ha’api’ira’a i te ’evanelia i te fa’aurura’a i tō ’oe orara’a ’e i te orara’a o vetahi ’ē ?
Heheura’a pāpa’ira’a mo’a
E aha te ha’api’ira’a tā ’oe e nehenehe e ’apo mai i roto i te mau pāpa’ira’a mo’a i muri nei, nō ni’a i te huru e rave i te ha’api’ira’a ’evanelia ?
’Ua hau atu te ha’api’ira’a i te ’evanelia i te fa’ari’i-noa-ra’a i te ha’amāramaramara’a. E fa’anahora’a pae vārua ato’a te reira nō te fa’a’ohipa i te parau mau mure ’ore i raro a’e i te arata’ira’a a te Vārua Maita’i (hi’o Iakoba 4:8 ; Te Ha’api’ira’a Tumu ’e te mau Fafaura’a 50:19–25). ’A ’imi ’e ’a ti’aturi i te Vārua nō te ha’api’i ia ’oe ’a tuatāpapa ai ’oe i te mau pāpa’ira’a mo’a. E tupu te reira i te fāito ’oe e fa’aau ai i te mau ’īrava ia ’oe iho ma te mana’o pāpū e rave mai te au i tā ’oe e ’apo mai (hi’o 1 Nephi 19:23 ; Moroni 10:4 ; Iosepha Semita—’Ā’amu 1:18).
E ’īriti te tai’ora’a i te mau pāpa’ira’a mo’a ma te pure, i te ha’amāramarama nō te heheura’a, ’ia ti’a i te Vārua ’ia paraparau mai i tō ’oe ferurira’a ’e i tō ’oe ’ā’au. E ha’amaita’i ’oia ia ’oe ma te arata’ira’a, te fa’aurura’a, ’e te pāhonora’a i tā ’oe mau uira’a. Nā roto i te tai’ora’a i te mau pāpa’ira’a mo’a, e ha’apūai ’e e tāmāhanahana te Vārua Maita’i ia ’oe. E hōro’a mai ’oia i te ’ite ’e te mana’o pāpū ’o tē ha’amaita’i i tō ’oe orara’a ’e ’o tē fa’ati’a ia ’oe ’ia ha’amaita’i ia vetahi ’ē ē a muri noa atu.
Heheura’a pāpa’ira’a mo’a
E aha te ’ohipa a te Vārua Maita’i i roto i te tauturura’a i te hō’ē ta’ata ’ia ha’api’i mai i te ’evanelia ?
’Ei misiōnare, e fa’aro’o ’oe e rave rahi uira’a. Tē vai ato’a ra tā ʼoe iho mau uira’a. E rāve’a pūai nō te ha’api’ira’a te mā’imira’a i roto i te mau pāpa’ira’a mo’a ’e te tahi atu mau mātēria ha’amanahia i te mau pāhonora’a i teie mau uira’a. ’A pāpa’i i te mau uira’a ’e i te mau mea tā ’oe i ’apo mai ’e i putapū i roto i tā ’oe buka tuatāpapara’a ha’api’ira’a.
’A fa’a’ohipa i te mau rāve’a tano ’e te ti’a i roto i tā ’oe ’imira’a—nā mua roa te mau pāpa’ira’a mo’a, te mau parau a te mau peropheta ora, ’e te ’Ia poro haere i tā’u nei ’Evanelia. ’A fa’a’ohipa i te mau mātēria tauturu i roto i te Vaira’a buka ’evanelia, mai te Arata’i nō te mau pāpa’ira’a mo’a, te Bible Dictionary, te index to the triple combination, te Gospel Topics, ’e te Gospel Topics essays. ’A hi’o e aha te mau mātēria e vai ra i roto i te reo o te feiā tā ’oe e ha’api’i.
Hōho’a
Peresideni M. Russell Ballard
« Te tahi mea tā’u i tāmau maita’i i roto i te orara’a nei ’o te pinepinera’a ïa te Fatu i te pāhono i tā tātou mau uira’a ’e i te hōro’a mai i te a’o nā roto i te mau pāpa’ira’a mo’a […] ’Ei reira tātou e haere ai i te Fatu ra nā roto i te pure, ma te tāparu i te tauturu ’e ’aore rā, i te mau pāhonora’a ; ’e e tae mai terā mau pāhonora’a ’ia ’īriti tātou i te mau pāpa’ira’a mo’a ’e ’ia ha’amata i te tai’o māite i te reira. I te tahi mau taime, mai te huru ra ē, e parau e rave rahi hānere ’e ’aore rā tauatini matahiti te maoro tei fa’ata’a-ta’a-’ē-hia nō te pāhono i tā tātou uira’a » (M. Russell Ballard, « Be Strong in the Lord, and in the Power of His Might » [Brigham Young University fireside, 3 nō Māti 2002], 5, speeches.byu.edu).
Ora i tā ’oe i ’apo mai
’A putapū ai ’oe i te ’oa’oa nō te tupura’a i te rahi tō ’oe māramaramara’a i te ’evanelia, e hina’aro ’oe e fa’a’ohipa i te mea tā ’oe i ’apo mai. ’A tūtava i te ora ’ia au i tā ’oe i ’apo mai. ’Ia nā reira ’oe, e pūai ïa tō ’oe fa’aro’o, tō ’oe ’ite, ’e tō ’oe ’itera’a pāpū. I te fa’a’ohipara’a ’oe i te mea tā ’oe i ’apo mai, e hau atu ïa te māramaramara’a ’o tē vai maoro. (Hi’o Ioane 7:17.)
Hōho’a
Peresideni Boyd K. Packer
« ’Ia māramarama-maita’i-hia te ha’api’ira’a tumu mau, e taui roa te huru ’e te ravera’a. E ’oi’oi’ a’e te ha’amaita’ira’a i te haere’a nā roto i te ’imira’a i te [ha’api’ira’a tumu] o te ’evanelia i te ’imira’a nō ni’a i te haere’a » (Boyd K. Packer, « Little Children », Ensign, Novema. 1986, 17).
Ha’api’ira’a ta’ata hō’ē
E aha tā te mau pāpa’ira’a mo’a i muri nei e ha’api’i nō ni’a i te ha’api’ira’a i te ’evanelia ?
’Ua riro te Vaira’a buka ’evanelia ’ei mātēria tauturu i ni’a i te natirara ’o tē nehenehe e ha’amaita’i rahi roa i tā ’oe tītaura’a i te ’ite ’e te ha’api’ira’a i te ta’ata. ’A ha’amātau i te mau rāve’a e rave rahi o te reira. ’Ua tāpurahia i raro nei te tahi o te mau maita’i nō te fa’a’ohipara’a i te Vaira’a buka ’evanelia ’ei tuha’a nō tā ’oe tītaura’a ’ite ’e te ha’api’ira’a i te ta’ata.
I te reira e roa’a mai te mau pāpa’ira’a mo’a, te mau parau a te mau peropheta ora, ’e te tahi atu mau tumu parau a te ’Ēkālesia i roto i te mau reo e rave rahi, te mau parau pāpa’i, te rāve’a fa’aro’o ’e te video.
Mai te mea e pāpa’i ’oe i roto i te Vaira’a buka ’evanelia i te mau mea tā ’oe i ’apo mai ’e te mau mana’o e tae mai, e noa’a noa mai te reira ’e e tāmau noa ’oe i te ha’apūaihia i muri a’e i tā ’oe misiōni.
E mea ’ōhie nō ’oe ’ia fa’a’ite i te mau pāpa’ira’a mo’a, te mau fa’ahitira’a parau a te mau peropheta ora, ’e te mau video i te feiā tā ’oe e ha’api’i.
Te rahira’a o te ta’ata tā ’oe e ha’api’i ’e e bāpetizo, e fa’a’ohipa rātou i te Vaira’a buka ’evanelia nō te fāna’o i te mau mātēria tauturu a te ’Ēkālesia. ’A ha’amātau ia ’oe iho i te mau rāve’a a te Vaira’a buka ’evanelia, ’ia ti’a ia ’oe ’ia tauturu ia rātou ’ia ’ite e nāhea i te fa’a’ohipa i te reira.
Ha’api’ira’a ta’ata hō’ē
’A hi’o i te « Arata’i nō te Vaira’a buka ’evanelia a te ta’ata. » ’A mā’iti i te tahi ’ohipa i roto i te Vaira’a buka ’evanelia nō te tāmata i roto i tā ’oe ha’api’ira’a ta’ata hō’ē i mua nei ’e te ha’api’ira’a ’e te hoa misiōnare. Nāhea teie rāve’a i te tauturura’a ia ’oe i roto i tā ’oe tai’ora’a ? E aha tā ’oe e tāmata i muri iho ? ’A ha’api’i i te tahi atu mau misiōnare i te mea tā ’oe i ’apo mai.
Fa’a’ohipa i te mau ihi anoha’a ma te parauti’a
’Ua hōro’a mai te Fatu ’e tāna mau peropheta ia ’oe i te ihi anoha’a nō te tauturu i te rave i tāna ’ohipa. E nehenehe te ihi anoha’a e ha’amaita’i i tā ’oe tai’ora’a i te pāpa’ira’a mo’a ’e te ’Ia poro haere i tā’u nei ’Evanelia. E nehenehe ato’a te mau rāve’a nūmeri e tauturu ia ’oe ’ia fa’anaho i te mau mea. E nehenehe te reira e tauturu i te ha’api’ira’a i te ta’ata, ’e i tā ’oe mau tauto’ora’a nō te ’imi i te ta’ata ’ia ha’api’i.
E nehenehe te fa’a’ohipara’a i te ihi anoha’a, ma te pa’ari ’e te parauti’a, e tauturu ia ’oe ’ia fa’aoti i tā ’oe fā misiōnare ’e ’ia fa’a’ohipa maita’i i tō ’oe taime. E nehenehe ato’a te reira e tauturu ia ’oe ’ia ’ape i te mau mātēria tano ’ore.
’A pe’e i te Vārua nō te ’ite ahea ’e nāhea i te fa’a’ohipa i te ihi anoha’a nō te ha’apūai i tō ’oe fa’aro’o ia Iesu Mesia, ’e i te fa’aro’o o te feiā tā ’oe e tāvini ’e e ha’api’i.
Pe’e i te mau pārurura’a nō te fa’a’ohipara’a i te ihi anoha’a
E tauturu nā pārurura’a e maha i raro nei ’ia fa’a’ohipa tano i te ihi anoha’a. Te pe’era’a i teie mau pārurura’a ’o te hō’ē ïa rāve’a faufa’a roa nō te « ’ahu i te ha’ana tama’i ato’a a te Atua, ’ia ti’a ia ’oe ’ia pāto’i atu i te mau rāve’a pa’ari a te diabolo ra » (Ephesia 6:11).
’Ei vai ara noa i te mau muhumuhu o te Vārua
’Ua parau fafau mai ’o Nephi : « Mai te mea e tomo mai ’oe nā te ’ē’a, ’e e fa’ari’i ho’i i te Vārua Maita’i, nā te reira e fa’a’ite ia ’oe i te mau mea ato’a tā ’oe e rave » (2 Nephi 32:5). ’Ua hōro’a mai tō ’oe Metua i te ao ra e piti hōro’a mana rahi ’o tē tauturu ia ’oe : te ti’amāra’a mōrare ’e te hōro’a nō te Vārua Maita’i. E mana tō ’oe ’ia mā’iti ’ia pe’e i te arata’ira’a a te Vārua Maita’i. E mea faufa’a roa tāna arata’ira’a nō te tauturu ia ’oe ’ia rave i te maita’i ’a fa’a’ohipa ai i te ihi anoha’a. E pāruru ato’a te reira ia ’oe i te ’enemi.
’Ei rōtahi i ni’a i tā ’oe fā misiōnare
’Ua parau te Fatu ē : « ’E mai te mea ’ua rōtahi tō ’outou mata i tō’u nei hanahana, e fa’a’īhia ïa tō ’outou tino tā’āto’a i te māramarama, ’e e ’ore roa ho’i te pōuri i roto ia ’outou na ; ’e taua tino ra ’o tei fa’a’īhia i te māramarama ra, e ’ite ïa i te mau mea ato’a ».(Te Ha’api’ira’a Tumu ’e te mau Fafaura’a 88:67). Te aura’a ’ia rōtahi tō ’oe mata i ni’a i te hanahana o te Atua ’oia ho’i te ha’atumu-pā’āto’a-ra’a ïa i ni’a i te fā a te Atua, ’o tā ’oe ato’a ïa fā ’ei misiōnare.
’Ia ha’atumuhia tā ’oe fa’a’ohipara’a i te ihi anoha’a i ni’a i tā ’oe fā. ’A tū’ama i tā ’oe mātini i te taime noa ’ua ’ite ia ’oe te fā misiōnare ’o tā ’oe e fa’a’ohipa atu i te reira. ’E ’a tūpohe i te reira ’ia hope ana’e taua fā ra.
E riro ē, e ’ite ’oe i te mau mea tano ’ore i ni’a i te natirara ’ia haere ’oe i ni’a i te reira ma te tumu ’ore i te ferurira’a.
Hōho’a
mau misiōnare e hi’o ra i te niuniu
’Ei ha’apa’o māite
’Ua pāpa’i ’o Moromona : « E pipi au nā Iesu Mesia, te Tamaiti a te Atua. ’Ua pi’ihia vau e āna ’ia a’o atu i tāna parau i rotopū i tōna mau ta’ata, ’ia ti’a ia rātou ’ia fa’ari’i i te ora mure ’ore » (3 Nephi 5:13). Mai ia Moromona, e pipi ’oe nā te Mesia. ’Ua riro te tāvinira’a ’ei misiōnare rave tāmau ’ei rāve’a ta’a ’ē nō te fa’ahōhonu i tō ’oe ti’ara’a pipi.
Nō roto mai te mau ta’o pipi ’e ture pupu i te hō’ē ā ta’o tumu ’oia ho’i « ta’ata ha’api’i » ’e ’aore rā « pīahi. » Te aura’a o te parau pipi nā te Mesia, ’oia ho’i, e ’imi ’oe i te pe’e iāna ’e ’ia ha’apa’o i tāna mau fa’auera’a. Te aura’a ra, e tāmau noa ’oe i te ’apo ’e i te ha’api’i nō ni’a i te Mesia.
’A ha’apa’o māite ’e ’a rave i te mau mā’itira’a tano i roto i tā ’oe fa’a’ohipara’a i te ihi anoha’a. ’A mā’iti i te pe’e i te mau pārurura’a. ’Ia paraparau ’oe i te ta’ata mata i te mata, ’eiaha e hi’o i te mau poro’i ’e ’aore rā, ’eiaha e pāhono i te mau niuniu. ’A hi’opo’a i te huru o tā ’oe fa’a’ohipara’a i teie mau mātini. ’Eiaha e vaiiho i te reira ’ia fa’atere ia ’oe.
’Ua parau te Fatu : « ’O ’oia ’o tē fa’ari’i i tā’u nei ture ma te ha’apa’o ho’i i te reira, ’o ’oia ïa tā’u nei pipi ; ’e ’o ’oia ’o tē parau noa mai ē tē fa’ari’i nei ’oia i te reira ma te ’ore ho’i e ha’apa’o i te reira, e ’ere ho’i ïa ’oia i tā’u nei pipi (Te Ha’api’ira’a Tumu ’e te mau Fafaura’a 41:5). Noa atu ’aita e ta’ata fāito maita’i roa, tē tītau nei te Fatu i te tauto’ora’a tāmau ’e te tu’utu’u ’ore nō te pe’e iāna.
Te nehenehe o te ’evanelia, ’o te mea ïa ē, e fa’a’orehia tā tātou hapa nā roto i te tātarahapa—’e tē hina’aro nei te Fatu ’ia tātarahapa tātou ma te tīa’i ’ore (hi’o Te Ha’api’ira’a Tumu ’e te mau Fafaura’a 109:21). Mai te mea e hape ’oe, mai te fa’a’ohipa-tano-’ore-ra’a i te ihi anoha’a, ’a tātarahapa i taua taime ra ’e ’a tāmau noa i te tāmata i te ora i tāna ture. E tuha’a te reira nō te vaira’a ’ei pipi nā te Mesia.
’Ei hō’ē
’Ua parau te Fatu : « ’Ia tāhō’ē ; ’e mai te mea ’aita ’outou e riro ’ei hō’ē ra, e ’ere ïa ’outou nā’u nei » (Te Ha’api’ira’a Tumu ’e te mau Fafaura’a 38:27). ’A tauturu i tā ’oe misiōni ’ia fa’atupu i te peu nō te tāhō’ē, nō te ti’aturi, nō te hōpoi’a, ’e nō te aumihi, ’ia nehenehe ia ’outou ’ia ha’apūai ’e ’ia pāturu te tahi i te tahi.
E mea ti’a i te mau misiōnare ato’a ’ia taiā ’ore i te ani i te tauturu ’ia hina’arohia. E nehenehe te hō’ē misiōnare pūai i roto i te Vārua e tauturu i te tahi tei paruparu (hi’o Te Ha’api’ira’a Tumu ’e te mau Fafaura’a 84:106). Mai te mea tē ’ite ra ’oe i te fa’ahemara’a, ’a ani i te tauturu i tō ’oe hoa misiōnare ’e ’aore rā i te fa’atere o te misiōni.
Fātata te mau fifi ato’a e au i te natirara ’e ’aore rā i te hōho’a faufau, tē tupu nei ïa i te vāhi mo’emo’e. ’A fa’a’ohipa i te mau mātini i te taime noa e ’ite ’oe i tō te tahi ’e tō te tahi paruai. ’A fa’aitoito ’e ’a ti’a’au i te tahi ’e te tahi.
Tē ti’aturi nei te Fatu i te mau misiōnare ato’a tāna i pi’i, mai ia ’oe ato’a. ’Ua hōro’a mai ’oia i te mau hoa ’e te feiā fa’atere nō te tauturu i te pāruru ’e i te pāturu ia ’oe. Mai ia Alama i pāturu i tōna hoa ia Amuleka, ’a ’imi i te rāve’a nō te ha’apūai te tahi i te tahi (hi’o Alama 15:18).
E aha tē rave mai te peu tē ’ite ra ’oe ’aita tō ’oe pāruru ’e e mea paruparu ?
Te ha’api’ira’a ’ia pe’e i teie nā pārurura’a e maha, e tītauhia ïa te tūtavara’a, te ha’apa’o ’e te fa’a’ohipara’a. Noa atu ā ’ua riro mai te mau pārurura’a ’ei tuha’a nō tā ’oe huru ferurira’a ’e te ’ohipara’a, e tupu mai iho ā te mau taime mana’o pāruru ’ore ’e te paruparu. Pēnei a’e e mau peu fa’ahiahia ’ore tā ’oe nā mua a’e i tā ’oe misiōni e mea fifi roa ’ia fa’a’ore. ’Ua fifi te tahi mau misiōnare i te hōho’a faufau hou i tō rātou pi’ira’a, ’e pēnei a’e e fa’ahemahia rātou ’ia topa fa’ahou i roto i te mau peu tahito.
E tauturu teie mau parau tumu i muri nei ia ’oe ’ia ora mai te au i te mau pārurura’a ’e ’ia ha’apūai ia ’oe i mua i te fa’ahemara’a :
’A vai ara i tō ’oe mau mana’o, tō ’oe mau ferurira’a ’e tā ’oe mau peu. ’A māramarama e nāhea te reira e fa’arahi ai i tō ’oe pāruru ’ore i mua i te fa’a’ohipa-hape-ra’a i te ihi anoha’a mau rāve’a ’āpī.
’A mā’iti i te rave i te hō’ē mea. ’A pāhono ma te ti’a ’e te rāve’a ho’ona i te mau mana’o e ne’e mai.
’A ’apo i te ha’api’ira’a, ’a tātarahapa ’e ’a ha’amaita’i ia ’oe. ’A fa’a’ohipa i te mau ’ohipa e tupu nō te tāmau noa i te ’apo mai ’e i te ha’amaita’i ia ’oe.
’Aita e tītauhia ia ’oe ’ia upo’oti’a i ni’a i te mau fifi ’o ’oe ana’e. ’A turu’i i ni’a i te pūai e tae mai nā roto i te tāra’ehara a te Fa’aora ’e te mau fafaura’a tā ’oe i rave i mua iāna. ’Ua ’ite te Fatu i te mau fifi tā ’oe e fa’aruru nei ’e e tauturu ’oia ia ’oe i roto i teie ’ohipa rahi.
E nehenehe te ha’amana’o-noa-ra’a i te Fa’aora e tauturu ia ’oe ’ia fa’a’ohipa i te mau rāve’a ’āpī ma te parauti’a. ’A ha’apa’o maita’i i te ti’aturira’a tāna i tu’u i ni’a ia ’oe. ’A fa’aoti ’ia « haere ma te parauti’a i mua iāna » (Alama 53:21 ; hi’o ato’a ’īrava 20). E tauturu atu te fa’a’itera’a i tō ’oe māuruuru nō te mau mea ato’a tāna ’e tā te Metua i rave nō ’oe, ’ia rave i te mau mā’itira’a maita’i nō ni’a i te huru e fa’a’ohipa i te mau mātēria nūmeri.
E rāve’a rahi tā ’oe misiōni nō te ha’api’i e nāhea i te fa’a’ohipa i te rāve’a ’āpī ma te pa’ari. Te parau fafau ’e te mau peu maitata’i tā ’oe e fa’atupu i roto i tā ’oe misiōni, e riro te reira ’ei maita’i nō ’oe nō te toe’a o tō ’oe orara’a.
’A ’ahu i te ha’ana tama’i a te Atua
E tupu tō ’oe ’aravihi nō te pāto’i i te fa’ahemara’a ’ia tai’o māite ’oe ’e ’ia fa’a’ohipa ho’i i te mau pāpa’ira’a mo’a, te mau parau a te mau peropheta ora, te ’Ia poro haere i tā’u nei ’Evanelia, Te mau ture misiōnare nō te mau pipi a Iesu Mesia, ’e te mau pārurura’a i fa’a’itehia i roto i teie pene.
Hōho’a
mau misiōnare e aroha ra i te hō’ē ta’ata
Nā roto i te ’ahura’a i « te ha’ana tama’i ato’a a te Atua ra » e nehenehe ïa ’oe e hāro’aro’a i te parau mau ’e te hape. E fa’atāma’ahia tō ’oe ’āvae i te « ’evanelia o te hau. » E pāruru te ’ahura’a i te « pāruru ’ōuma nō te parauti’a »ia ’oe. I te « pāruru tama’i nō te fa’aro’o », e nehenehe ’oe e tūpohe i te mau ihe auahi a te ’enemi. E rave ’oe i te « ’o’e o [tōna] Vārua » nō te ha’api’i i te parau mau ma te mana ’e te ha’amanara’a. E ha’apūaihia ’oe i mua i te mau mana o teie ao ’o tē nehenehe ho’i e arata’i ia ’oe ’ia pāinu, ’ia mo’emo’e, ’e ’ia ātea ’ē ato’a. (Hi’o Ephesia 6:10–18 ; hi’o ato’a 1 Nephi 8:20, 30 ; 15:24–25 ; Helamana 3:29–30 ; Te Ha’api’ira’a Tumu ’e te mau Fafaura’a 27:15–18 ; Iosepha Semita—Mataio 1:37 ; 2 Timoteo 3:15–17.)
Ha’api’ira’a ta’ata hō’ē
Nā roto i te pure, ’a mā’iti i te hō’ē pārurura’a e ha’atumu i ni’a iho i roto i teie hepetoma. ’A ’imi i te tauturu a te Fatu. ’A pāpa’i i tō ’oe mana’o ’e te mea tā ’oe e ’apo mai nei.
Mana’o nō te ha’api’i ’e nō te rave
Ha’api’ira’a ta’ata hō’ē
’A tāmata i te tahi o te mau mana’o i muri nei nō te ha’amaita’i i tā ’oe tai’ora’a :
’A tai’o i te mau pāpa’ira’a mo’a ma te mau uira’a ’e te mau māna’ona’ora’a i te ferurira’a.
’A fa’a’ite i te mea tā ’oe i ’apo mai i te tahi atu mau misiōnare ’e i te feiā tā ’oe e ha’api’i. Te tātarara’a i te hō’ē ha’api’ira’a tumu ’e ’aore rā te hō’ē parau tumu, e tauturu ïa te reira ia ’oe ’ia ha’amana’o i te reira ’e ’ia fa’ari’i i te māramarama.
’A tai’o nā ni’a i te tumu parau. ’A rōtahi i ni’a i te mau tumu parau ’o tē tauturu ia ’oe ’e te mau ta’ata tā ’oe e ha’api’i.
’A ui ia ’oe iho : « E aha tā te ta’ata pāpa’i e parau ra ? E aha te poro’i rahi ? Nāhea te reira e au ai iā’u nei ? Nāhea te reira e tauturu ai i te hō’ē ta’ata tā māua e ha’api’i ra ? »
’A fa’ahōho’a ’e ’aore rā ’a pāpa’i hōho’a i te mea tā ’oe e tai’o ra. ’Ei hi’ora’a, ’a feruri i te huru o Amona i te ti’ara’a atu i mua i te aro o te ari’i ’āti Lamana.
’A pāpa’i i te mana’o rahi o te hō’ē pu’e ’īrava i roto i te hō’ē pereota ’e ’aore rā te hō’ē paratarāfa poto.
’A tāmau ’ā’au i te mau ’īrava pāpa’ira’a mo’a e fa’ata’a ’e e pāturu i te mau parau tumu o tā ’oe e ha’api’i i te ta’ata.
’A hi’opo’a ia ’oe iho mai te au i te mau parau i muri nei (1 = ’aita roa atu, 3 = i te tahi taime, ’e 5 = fātata i te mau taime ato’a).
Tē tupu ra vau i te rahi i roto i tō’u fa’aro’o ’e tē ’ite maita’i ra vau ’o vai te Metua i te ao ra ’e ’o vai Iesu Mesia.
E feruri au i te mau ta’ata tā’u e ha’api’i ’ia tai’o vau i te mau buka.
I te roara’a o te mahana, e feruri au i te mea tā’u i ha’api’i i te po’ipo’i ra.
’A tai’o ai au, e tae mai te mau mana’o tei ’ore roa i tupu a’enei i roto iā’u, i nā mua atu.
E pāpa’i au i te mau mana’o e tae mai ’e te mau mana’o i roto i tō’u ferurira’a i te hō’ē vāhi tano.
’Aita vau e pohe ta’oto i roto i tā’u tai’ora’a.
Tē tīa’i ’ana’anatae nei au i te ha’api’ira’a ta’ata hō’ē.
Tē tīa’i ’ana’anatae nei au i te ha’api’ira’a ’e te hoa misiōnare.
’A hi’o i tā ’oe mau pāhonora’a. E aha te mea tā ’oe e rave maita’i nei ? Nāhea ’oe e ha’amaita’i ai ia ’oe ? ’A ha’amau hō’ē ’e ’aore rā e piti fā nō te ha’amaita’i i tā ’oe tai’ora’a.
Ha’api’ira’a ’e te hoa misiōnare, ’e tāuiuira’a hoa
’A tai’o ’āmui i te tahi mau pāpa’ira’a e rave rahi i muri nei. ’A ’āparau i te mau ha’amaita’ira’a e tae mai nā roto i te ha’api’ira’a i te parau a te Atua. E aha te mau pāpa’ira’a ’o tē tauturu maita’i a’e i te feiā tā ’oe e ha’api’i ?
’Āpo’ora’a mata’eina’a, ’āmuira’a ārea misiōnare ’e ’āpo’ora’a feiā fa’atere misiōni
’A ani i te mau misiōnare ’ia pāpa’i hō’ē ’e ’aore rā e piti uira’a nō ni’a i te ’evanelia, mai roto mai i te hō’ē ha’api’ira’a o te pene 3. E nehenehe teie mau uira’a e mau uira’a nō te ta’ata iho ’e ’aore rā nō roto mai i te ta’ata tā rātou e ha’api’i. ’A ani i te mau misiōnare ’ia tai’o i tā rātou mau uira’a i te pupu. Nō te uira’a tāta’itahi, ’a ’āparau i teie i muri nei :
Nāhea te pāhonora’a i teie uira’a e ha’amaita’i ai i te orara’a o te misiōnare ?
Nāhea te reira e ha’amaita’i ai i te orara’a o te feiā tāna e ha’api’i nei ?
Nāhea te hō’ē misiōnare e nehenehe ai e ’ite i te pāhonora’a ?
’A vāhi i te mau misiōnare ’ei pupu, ’e ’a ani i te pupu tāta’itahi ’ia tai’o māite i te hō’ē o nā pārurura’a e maha ’e te mau pāpa’ira’a mo’a nō te reira. ’A ani i te mau misiōnare ’ia fa’a’ite i te mea tā rātou i ha’api’i, ’e ’ua nāhea teie mau pārurura’a i te tauturura’a ia rātou.
Feiā fa’atere misiōni ’e nā tauturu nō te misiōni
I te tahi mau taime, e ’āmui atu i roto i tā te mau misiōnare ha’api’ira’a ’e te hoa misiōnare.
I roto i te mau uiuira’a ’e ’aore rā te mau ’āparaura’a, ’a ui i te tahi o te mau uira’a i muri nei :
E aha te mau mana’o i tae mai i roto i tā ’oe heheura’a pāpa’ira’a mo’a i rave a’enei ?
E aha te pene ’e ’aore rā te tuha’a o te ’Ia poro haere i tā’u nei ’Evanelia tei tauturu rahi ia ’oe i nā hepetoma e piti i ma’iri a’enei ? Nāhea te reira i te tauturura’a ia ’oe ?
E aha tā ’oe e rave nei i roto i tā ’oe ha’api’ira’a ta’ata hō’ē ’o tē tauturu ia ’oe i te ’apo mai i te ha’api’ira’a ?
I roto i te mau uiuira’a, e nehenehe e hi’o i te mau pārurura’a nō te fa’a’ohipara’a i te mau ihi anoha’a ’e e ani i te mau misiōnare e aha tā rātou i ha’api’i nā roto i te fa’a’ohipara’a i te reira.
’A fa’a’ite i te mea tā ’oe i ’apo mai i roto i tā ’oe ha’api’ira’a ta’ata hō’ē. ’A fa’a’ite i te tahi mea i pāpa’ihia i roto i tā ’oe buka tuatāpapara’a ha’api’ira’a ’e tō ’oe ’itera’a pāpū nō te faufa’a rahi o te ha’api’ira’a ’evanelia.