Pene 8 : Rave manuia i te ’ohipa nā roto i te mau fā ’e te mau ’ōpuara’a
« Pene 8 : Rave manuia i te ’ohipa nā roto i te mau fā ’e te mau ’ōpuara’a », ’Ia poro haere i tā’u nei ’Evanelia : E arata’i nō te fa’a’ite i te ’evanelia a Iesu Mesia (2023)
« Pene 8 », ’Ia poro haere i tā’u nei ’Evanelia
Hōho’a
Go Ye Therefore (Go Ye Therefore, and Teach All Nations) [E haere ’outou (E haere ’outou, e ha’api’i i te mau fenua ato’a)], nā Harry Anderson
Pene 8
Rave manuia i te ’ohipa nā roto i te mau fā ’e te mau ’ōpuara’a
’A feruri na
Nō te aha e ti’a iā’u e ha’amau i te mau fā ?
Nāhea te mau tāpa’o fa’a’ite niu nō te fa’afāriura’a i te tauturu iā’u ’ia rōtahi i ni’a i te nu’ura’a pae vārua o te ta’ata ?
Nāhea vau i te ha’amau i te mau fā, i te rave i te mau ’ōpuara’a nō te rave manuia i te reira ’e ’ia fa’atupu i tā’u mau ’ōpuara’a ?
Nāhea vau i te arata’i i te ’āpo’ora’a o te fa’anahora’atāhepetoma ’e tāmahana ?
Nāhea vau i te fa’a’ohipa i te fa’aaura’a rorouira ’Ia poro haere i tā’u nei ’Evanelia nō te rave manuia i tā’u ’ohipa ?
E aha te parau tumu nō te ti’a’aura’a ? Nāhea te reira i te ha’amaita’i i tā’u mau tauto’ora’a ?
’Ua fa’ata’ahia ’oe nō te tauturu i te ’ohipa a te Atua i roto i te hō’ē tuha’a fenua ta’a ’ē. Tē hina’aro nei ’oia ’ia ha’amaita’i ’oe i te ta’ata tāta’itahi ma tōna here ’e tāna parau mau. Tē hina’aro nei ’oia ’ia ani manihini ’oe ’e ’ia tauturu ia rātou ’ia haere mai iāna ra.
Tē hia’ai nei te Fatu ia ’oe « ’ia rave ’ana’anatae i [teie] ’ohipa maita’i ». Tē ani nei ’oia ia ’oe « ’ia rave ho’i i te mau ’ohipa e rave rahi nā roto i tō [’oe] iho hina’aro, ’e ’ia fa’atupu fa’arahi ho’i i te parauti’a » (Te Ha’api’ira’a Tumu ’e te mau Fafaura’a 58:27–29 ; hi’o ’īrava 26–29). ’A rave i te mau mea ato’a tā ’oe e nehenehe nō te vaiiho mai i te pāroita ’aore rā i te ’āma’a tāta’itahi i reira ’oe i te tāvinira’a ’ia pūai a’e i te taime ’a tāpae ai ’oe i reira.
E tauturu teie pene ia ’oe ’ia ha’api’i mai nāhea ’ia ha’amau i te mau fā, e rave i te mau ’ōpuara’a nō te rave manuia ’e ’ia fa’atupu i te ’oe mau ’ōpuara’a ma te itoito. Tē fa’ata’a nei te reira i te mau tāpa’o fa’a’ite niu nō te fa’afāriura’a, ’o tē arata’i atu i tā ’oe mau tauto’ora’a, nō te tauturu te mau tamari’i a te Atua ’ia nu’u i mua i te pae vārua. I muri iho e vauvau mai te reira i te hō’ē ravera’a ’ōhie nō te ha’amaura’a i te fā, ’o tā ’oe e nehenehe e fa’a’ohipa i roto i te mau tuha’a ato’a o te ’ohipa misiōnare, ’oia ato’a tā ’oe mau fā ’e terā tā tō ’oe pupu hoa misiōnare. Tē fa’a’ite ato’a nei te reira nāhea ’ia arata’i i te mau ’āpo’ora’a o te fa’anahora’a tāhepetoma ’e tāmahana ’e tō ’oe hoa misiōnare.
E nehenehe te ha’api’ira’a mai i te ha’amau i te mau fā ’e ’te fa’anaho i te mau ’ōpuara’a e ha’amaita’i ia ’oe i te roara’a o tō ’oe orara’a. E tauturu te reira ia ’oe ’ia rave ’e ’ia ha’apa’o i te mau fafaura’a ’e te Atua, ’ia tāvini ma te ha’apa’o i roto i te ’Ēkālesia, ’ia rave fa’aoti i te ha’api’ira’a, ’ia nu’u i mua i roto i tā ’oe ’ohipa ’e ’ia patu i te hō’ē ’utuāfare pāutuutu maita’i.
’Imira’a pāpa’ira’a mo’a
E aha tā ’oe e ha’api’i mai nā roto mai i te mau pāpa’ira’a mo’a i muri nei, nō ni’a i te fa’anahora’a nō te tauturu i rave manuia i te ’ohipa a te Atua ?
He Healed Many of Diverse Diseases [’Ua fa’aora ’oia e rave rahi ma’i], nā J. Kirk Richards
Tauturu ia vetahi ’ē ’ia fa’afāriuhia i te Fa’aora
Rōtahi i ni’a i tā ’oe fā misiōnare
Pēnei a’e ’ua uiui ’oe ia ’oe iho tei hea i roto i tā ’oe mau tītaura’a misiōnare e mea faufa’a roa a’e. E uira’a maita’i teie e feruri ’a ha’amau ai ’oe i te mau fā ’e e fa’anaho i te hepetoma ’e te mahana tāta’itahi. Nō te tauturu i te pāhono i te reira, ’a feruri i te ’oe fā ’ei misiōnare :
« Ani-manihini-ra’a ia vetahi ’ē ’ia haere mai i te Mesia ra ma te tauturura’a ’ia rātou ’ia fa’ari’i i te ’evanelia tei fa’aho’i-fa’ahou-hia mai, nā roto i te fa’aro’o ia Iesu Mesia ’e i tāna Tāra’ehara, te tātarahapara’a, te bāpetizora’a, ’e te fa’ari’ira’a i te hōro’a o te Vārua Maita’i, ’e i te tāpe’ara’a e tae noa atu i te hope’a ra ».
Vaiiho i tā ’oe fā misiōnare e arata’i i te ’oe mau fā ’e mau ’ōpuara’a. ’A rōtahi i ni’a i te rāve’a e nāhea ’oe ’ia tauturu i te ta’ata ’ia fa’a’ohipa i tō rātou ti’amāra’a ’ia fa’afāriuhia i te Fa’aora ’e ’ia fa’ari’i i tāna ’evanelia.
’A ’imi i te arata’ira’a a te Vārua ’e ’a ’āparau e tō ’oe hoa misiōnare ’a ha’amau ai ’oe i te mau fā ’e ’a fa’anaho i te mau te mau ’ōpuara’a. I muri iho, ’a pe’e i tā ’oe ’ōpuara’a ’e ’a fa’a’ohipa maita’i i tō ’oe taime.
Hōho’a
Peresideni Dallin H. Oaks
« ’Aita tātou e poro nei ’e e ha’api’i nei nō te ‘’āfa’i mai i te ta’ata i roto i te ’Ēkālesia’ ’aore rā, nō te fa’amara’a i te rahira’a melo o te ’Ēkālesia. ’Aita tātou e poro nei ’e e ha’api’i nei nō te ’ume mai i te ta’ata ’ia ora i te hō’ē orara’a maita’i a’e […] E ani manihini tātou i te mau ta’ata ato’a ’ia haere mai i te Mesia ra nā roto i te tātarahapara’a ’e te bāpetizora’a ’e te ha’amaura’a ’ia nehenehe ’ia matara te mau ’ūputa o te bāsileia tīrētiēra i te mau tamaiti ’e te mau tamāhine a te Atua. ’Aita e ta’ata ’ē atu e nehenehe e rave i te reira » (Dallin H. Oaks, « The Purpose of Missionary Work », missionary satellite broadcast, Apr. 1995).
’Imira’a pāpa’ira’a mo’a
Nāhea teie mau misiōnare ’e te mau peropheta i te rave manuia i tā rātou ’ōpuara’a ma te te tauturu a te Fatu ?
’A ’āna’i atu ’e te fa’a’itera’a niu nō te fa’afāriura’a
’Ua ’itehia mai e te feiā fa’atere o te ’Ēkālesia e ono fa’a’itera’a niu nō te fa’afāriura’a. E tauturu te mau fa’a’itera’a niu nō te fa’afāriura’a ia ’outou ’ia rōtahi i ni’a i te nu’ura’a i mua i te pae vārua o te mau tamari’i a te Atua. ’Ua fa’ata’ahia te reira nō te tauturu ia ’oe ’ia ’āna’i i tā ’oe mau tauto’ora’a i ni’a i tā ’oe fā misōnare.
’Ua vauvauhia mai te mau fa’a’itera’a niu nō te fa’afāriura’a mai teie i raro nei.
Hōho’a
mau misiōnare e aroha rima nei i hō’ē ta’ata
E ha’api’ihia te mau ta’ata ’āpī. Te ta’ata tāta’itahi (tei ’ore i bāpetizohia) tei fa’ari’i i te hō’ē ha’api’ira’a i roto i te hō’ē hepetoma (’aita rā i ha’api’ihia i nā toru ’āva’e i ma’iri a’e nei) ’e ’ua fa’ari’i i te hō’ē fārereira’a ta’a ’ē. Hō’ē ha’api’ira’a tē vai ra iho ā te pure (mai te peu e tano), te ha’api’ira’a nō te hō’ē a’e parau tumu o te ’evanelia, ’e te fa’ataera’a i te hō’ē anira’a manihini.
Hōho’a
mau misiōnare e ha’api’i nei
Ha’api’ira’a ’e te hō’ē melo e ’āmui mai. Te rahira’a ha’api’ira’a i roto hō’ē hepetoma e hōro’ahia i reira te hō’ē ta’ata (’aita i bāpetizohia) e ha’api’ihia ai ’e te hō’ē melo e ’āmui mai.
Hōho’a
’utuāfare i te fare purera’a
E ta’ata tei ha’api’ihia tei haere mai i te purera’a ’ōro’a. Te ta’ata tāta’itahi (’aita i bāpetizohia) ’o tā ’outou i ha’api’i ’e ’o tei ’āmui mai i te purera’a ’ōro’a i roto hō’ē hepetoma.
Hōho’a
’utuāfare e pure ra
E ta’ata e tai’o mahana bāpetizora’a tāna. Te ta’ata tāta’itahi tei fa’ari’i ’ia bāpetizohia ’e ’ia ha’amauhia e tai’o mahana pāpū maita’i tāna.
Hōho’a
bāpetizora’a
Te ta’ata tei bāpetizohia ’e tei ha’amauhia. Te melo ’āpī tāta’itahi tei fa’ari’i i te mau ’ōro’a o te bāpetizora’a ’e te ha’amaura’a ’e tei hāponohia te ’api parau nā roto i te rēni rorouira, i roto i te hepetoma i hōro’ahia. (Hi’o pene 12 nō te aura’a o te hō’ē bāpetizora’a fa’afāriu ’e nō te mau ha’amāramaramara’a nō te hāmani i te mau parau fa’a’ite).
Hōho’a
mau vāhine i te fare purera’a
Te mau melo ’āpī e haere mai nei i te purera’a ’ōro’a. Te melo tāta’itahi tē vai ra te parau fa’a’ite nō te bāpetizora’a ’e te ha’amaura’a tei hāponohia i roto nā 12 ’āva’e hope’a ’e ’o tē haere mai nei i te purera’a ’ōro’a i roto i te hepetoma i hōro’ahia.
’Ei pū’ohura’a, ’a hōro’a nā mua roa i te tauturura’a i te mau ta’ata ’ia mā’iti ’ia ’āmui mai i roto i teie mau tupura’a ’ohipa. ’A rōtahi i tā ’outou mau tauto’ora’a i ni’a i te mau ’ātivite i muri nei :
I te feiā o te tauturu nei ia ’outou ’ia ’ite mai i te mau ta’ata ’āpī nō te ha’api’i
I te feiā e tauturu nei i te mau ta’ata ’ia haere i mua i te fa’aotira’a ’e i te ha’apa’ora’a i te mau fafaura’a
I te feiā e tauturu nei i te mau ta’ata tei bāpetizohia ’e tei ha’amauhia i roto i te matahiti i mā’iri
Mai te peu ’aita ’oe e ’ite rā e nāhea tā ’oe mau tauto’ora’a e nehenehe e tauturu i te hō’ē ta’ata ’ia haere i mua ma te rāve’a ’o te fā mai i roto i tā ’oe fa’a’itera’a niu, ’a hi’opo’a e tauturu ānei te ’ātivite i te fa’a’ohipara’a maita’i o tō ’oe taime.
Nō te mau ta’ata tā ’oe e iti nei i te rave i te taime, e tāmau noa i te fa’a’amu i tō rātou ’ana’anatae nō te ’evanelia. E nehenehe ’oe e ani manihini i te mau melo ’ia fa’atoro atu i te rima ia rātou. E nehenehe ato’a ’oe e fa’a’ohipa i te ihi anoa ha’a nō te fa’aitoito ia rātou ’e ’ia tāmau noa i te aupuru ia rātou. Hi’o « Fa’a’ohipa te ihi anoa ha’a » i roto te pene 9 nō te tahi atu mau mana’o.
Hōho’a
Elder Quentin L. Cook
« Te fā mātāmua o te fa’anahora’a ’e te ha’amaura’a i te mau fā ’o te fa’arirora’a ’ei pipi––’oia ho’i, te roa’ara’a mai te mau melo fa’afāriu i ha’amo’ahia tei rave ’e tei ha’apa’o i te mau fafaura’a mo’a, ma te ha’amatara’a nā te fafaura’a o te bāpetizora’a e arata’i atu i te fafaura’a o te hiero » (Quentin L. Cook, « Purpose and Planning », seminaire nā te feiā fa’atere misiōni, 25 nō Tiunu 2019).
Ha’amau i te mau fā fa’a’itera’a niu ’e e fa’aineine i te mau ’ōpuara’a
I roto i te hepetoma o te fa’anahora’a, e ha’amau ’oe ’e tō ’oe hoa i te mau fā nō te mau fa’a’itera’a niu ato’a. E ti’a i tā ’oe fā o te fa’a’itera’a niu e fa’a’ite mai i te hina’aro e tauturu hau atu i te ta’ata ’ia fana’o i te mau ha’amaita’ira’a o te fa’afāriura’a.
’A ha’amau i te mau fā ’e ’a fa’aineine i te mau ’ōpuara’a nō te rave i te mau mea i raro a’e i tā ’oe fa’aterera’a ’o te nehenehe e fa’auru mai i te mau fa’ahope’ara’a o te mau fa’a’itera’a niu. ’Ei hi’ora’a :
E nehenehe ’oe e fa’ata’a i te hō’ē fā o te fa’a’itera’a niu nō te ha’amata i te ha’api’i i te hō’ē rahira’a ta’ata ’āpī i roto i te hepetoma. Nō te tāpae ’oe i te reira fā tei te huru ïa o te ti’amāra’a o te tahi mau ta’ata. ’A rave rā i te mea tei raro a’e i tā ’oe fa’aterera’a nō te rave manuia i te reira. Hō’ē rāve’a ’oia ho’i te ha’amaura’a ïa ’ei fā ’ia paraparau atu i te hō’ē rahira’a ta’ata ’āpī i te mahana tāta’itahi. I muri iho, ’a fa’anaho e nāhea ’oe i te rave. Hi’o atu i te mau mana’o i roto te Parau hi’u 2 o teie pene ’e i roto te pene 9.
E nehenehe ’oe e fa’ata’a i te mau fā o te fa’a’itera’a niu ’ia ti’a i te hō’ē rahira’a ta’ata ’āpī ta’a ’ē ’e te mau ta’ata tā ’oe e ha’api’i nei, ’ia haere mai i te purera’a ’ōro’a. ’Ia haere mai rātou ’aore rā ’aita, tei te huru ïa o tō rātou ti’amāra’a. ’A rave rā i te mea tei raro a’e i tā ’oe fa’aterera’a nō te fa’ataui i te mau hope’ara’a o teie fa’a’itera’a niu. Fa’anaho i te taime nō te ani manihini ia rātou ’e nāhea ’ia ’āpe’e atu.
E nehenehe ’oe e ha’amau i te hō’ē fā nō te fa’a’itera’a niu, ’ia ti’a i te mau melo e ’āmui mai i te hō’ē rahira’a ta’ata pāpū o te ha’api’ira’a i roto i te hepetoma. Nō te tāpae ’oe i te reira fā tei te huru ïa o te melo ’e te mau ta’ata ’o tā ’oe e ha’api’i nei. ’A rave rā i te mea tā ’oe e nehenehe nō te fa’ataui i te hope’ara’a o teie fa’a’itera’a niu. ’A ha’amau ’ei fā nō te ’ohipa ’e te feiā fa’atere o te pāroita, ’ia tae tino mai te mau melo. E fa’anaho i muri iho, e nāhea ’oe e fa’aau ai i tō rātou taera’a mai.
’Ei pupu hoa misiōnare, e fa’ata’a ’outou i te mau fā o te fa’a’itera’a niu nō tō ’outou iho tuha’a fenua. ’A fa’atumu i te reira i ni’a (1) te nu’ura’a i mua o te feiā tā ’outou e ha’api’i nei ’e (2) te tītaura’a ’ia ’itehia mai te mau ta’ata ’āpī nō te ha’api’i. Te ’itera’a mai i te ta’ata nō te ha’api’i e tītaura’a tāmau ïa.
Te mau fā o te fa’a’itera’a niu i te fāito o te misiōni, ’ua fa’atumuhia ïa i ni’a i te mau fā tei ha’amauhia e te pupu hoa misiōnare tāta’itahi.
E tauturu te fa’aaura’a rorouira ’Ia poro haere i tā’u nei ’Evanelia ia ’outou ’ia vai rōtahi noa i ni’a i ta’ata, ’ia fa’ata’a ana’e ’outou i te mau fā o te fa’a’itera’a niu. E tauturu ato’a teie fa’aaura’a rorouira ia ’outou ’ia ’apo mai nō te mau fā i mā’iri a’e nei, ’e ’ia fa’a’ite i tō ’outou nu’ura’a i mua i te mau fā i teienei.
E fa’a’ite ’oi’oi roa te fa’aaura’a rorouira ’Ia poro haere i tā’u nei ’Evanelia i te mau fā o te fa’a’itera’a niu ’e te mau hope’ara’a i tō ’outou feiā fa’atere misiōni ’e i te mau fa’atere misiōnare ’āpī.
E ha’apa’o maita’i ’eiaha e fa’atumu noa i ni’a i te hō’ē fa’a’itera’a niu i ni’a rā i te tahi atu. E tauturu te rōtahira’a tāmau i ni’a i te mau fa’a’itera’a niu ato’a ia ’outou ’ia ani manihini tāmau noa ia vetahi ’ē ’ia haere mai i te Mesia ra ’e ’ia rave i te mau fafaura’a.
Hōho’a
Peresideni Thomas S. Monson
« ’Ia fāito-ana’e-hia te manuiara’a, e maita’i atu ā te manuiara’a. ’Ia fāito-ana’e-hia te manuiara’a ’e e fa’a’itehia, e mara’a vitiviti roa te fāito ha’amaita’ira’a » (fa’ahitira’a nā Thomas S. Monson, « Thou Art a Teacher Come from God », Improvement Era, Tītema 1970, 101).
’A ’ohipa itoito
Tē hina’aro nei te Fatu ia ’oe ’ia « rave […] ma te itoito » i tā ’oe tāvinira’a misiōnare (Te Ha’api’ira’a Tumu ’e te mau Fafaura’a 107:99). Te itoito ’o te tauto’ora’a tāmau ïa, te tu’utu’u ’ore.
’A ’ohipa itoito i ni’a i tā ’oe mau fā o te fa’a’itera’a niu. E ani i te mau ta’ata ’ia rave i te mau tītaura’a ’o te arata’i i te fa’afāriura’a. E fa’auru tā ’oe mau tauto’ora’a itoito ia rātou ’ia rave i te mau ’ohipa ’o tē tauturu ia rātou ’ia haere mai i te Mesia ra (hi’o 2 Nephi 2:14–16).
’A ha’api’i i te ’evanelia ma te huru e pāhono i te mau hina’aro o te ta’ata. ’Ia māramarama-ana’e-hia te ha’api’ira’a tumu nā roto i te Vārua, ’aita atu e ’ohipa e ti’a i te fa’auru ia rātou ’ia rave.
I te reira iho ā taime, ’a ’ite mai ē te mau fā o te fa’a’itera’a niu tei te huru ïa o te ti’amāra’a o vetahi ’ē. ’A fa’atura tāmau noa i te ti’amāra’a o te ta’ata.
E ha’amana’o ē, ’aita te mau fa’a’itera’a niu i te hope’ara’a o te fā. E fa’a’itera’a ra te reira i te nu’ura’a i mua o te fāito pūai pae vārua o te ta’ata i te bāpetizora’a, te ha’amaura’a, ’e i te fa’afāriura’a tāmau. Te nu’ura’a i mua mau o te ta’ata tei te huru ïa o tā rātou mau mā’itira’a. E turu ’oe i tō rātou nu’ura’a i mua ma te fa’a’ohipa i te fa’aro’o i te Mesia nā ni’a ia rātou, ’a ha’amau ai ’oe i te mau fā, ’a fa’ata’a ai, ’a ’ohipa ai ma te itoito ’e ’a aupuru ai ia rātou ma te rāve’a fa’auru.
Nāhea i te ha’amau i te mau fā ’e te fa’anahora’a i te mau ’ōpuara’a nō te rave manuia i te reira
Te ha’amaura’a i te mau fā ’e te fa’anahora’a e mau ’ohipa ïa nō te fa’aro’o. E fa’a’ite mai te mau fā i te mau hina’aro o tō ’oe ’ā’au ’e tā ’oe hi’ora’a nō te tauturu ia ’oe iho ’e ’ia vetahi ’ē ’ia haere mai i te Fa’aora ra.
E hōro’a mai te mau fā ’e te mau ’ōpuara’a tei tuatāpapa-maita’i-hia ia ’oe te arata’ira’a māramarama. E nehenehe te reira e tauturu ia ’oe ’ia ’ite rahi mai i te mau ta’ata nō te ha’api’i. E nehenehe te reira e arata’i ia ’oe i roto i te tauturura’a i te feiā tā ’oe e ha’api’i ra, ’ia ha’apūai i tō rātou fa’aro’o ’e ’ia nu’u i mua i te fa’afāriura’a.
’A fa’ariro i te ha’amaura’a i tā ’oe fā ’e te fa’anahora’a ’ei tupura’a ’ohipa fa’auruhia. ’A pure ma te ’ā’au tae, ’a fa’a’ohipa i te fa’aro’o, ’a tau’aparau ’e tō ’oe hoa misiōnare, ’e ’a pe’e i te fa’aurura’a a te vārua. ’A fa’anaho ai ’oe mai te reira huru, e putapū ’oe, tē ’ohipa ra te Fatu nā roto ia ’oe nō te ha’amaita’i ia vetahi ’ē.
Hōho’a
Peresideni M. Russell Ballard
« Hō’ē fā ’o te hō’ē ïa tāpaera’a ’aore rā te hō’ē hope’ara’a, ’āre’a ra te hō’ē ’ōpuara’a ’o te ’ē’a ïa nō te haere atu i reira […] E ha’amata te ha’amaura’a i te fā nā mua roa ma te hope’ara’a i roto i te ferurira’a. ’E te fa’anahora’a ’o te ’itera’a mai ïa i te hō’ē rāve’a nō te tāpae i taua hope’a ra » (M. Russell Ballard, « ’Ia ho’i ’e ’ia fa’ari’i », Liahona, Mē 2017, 62– 63).
Te parau tumu nō te ha’amaura’a ’e te rave manuiara’a i te mau fā
E tauturu teie ravera’a i muri nei ia ’oe ’ia ha’amau ’e ’ia rave manuia i te mau fā.
Hōho’a
tāpura ha’amaura’a-fā
’A ha’amau i te mau fā nā roto i te pure ’e ’a fa’anaho i te mau ’ōpuara’a. ’A ha’amau i te mau fā e fa’aotihia ’o tē tu’u rā ia ’oe i roto i te tāmatara’a pa’ari ’e ’o te tītau i te fa’aro’o. ’Eiaha ’oe e ha’amau i te mau fā teitei roa ’ino ’aore rā ha’eha’a roa. ’A fa’anaho e nāhea ’oe i te rave manuia i te reira.
’A pāpa’i ’e ’a tāpura ’A pāpa’i i tā ’oe mau fā ’e mau ’ōpuara’a i roto i te hō’ē tāpura fa’ata’ata’a maita’i.
Rave i tā ’oe mau ’ōpuara’a. ’A ’ohipa itoito nō te rave manuia i tā ’oe mau fā. ’A fa’a’oihpa i te fa’aro’o i te Fatu nō te tauturu ia ’oe.
Hi’o fa’ahou ’e ’a pe’e atu ’A hi’opo’a i te nu’ura’a i mua ’e ’a pāpa’i i tā ’oe mau tauto’ora’a tāmau. ’A fa’aoti e aha te mea e rave ta’a ’ē ’e e nāhea i te ha’amaita’i. ’A fa’atanotano i te mau ’ōpuara’a ’ia hina’arohia.
’A fa’a’ohipa ai ’oe i te rāve’a ha’amaura’a-fā, e fa’arahi te Fatu i tā ’oe mau tauto’ora’a. E tupu ’oe i te rahi i roto i tō ’oe ’aravihi ’ei mauiha’a i roto i tōna nā rima. E hōpoi mai ’oe e rave rahi maita’i ma te ha’amaita’ira’a i te mau tamari’i a te Metua i te ao ra.
Ha’amau i te mau fā ’e ’a rave i te mau ’ōpuara’a i roto i te mau tuha’a ato’a o te ’ohipa
’A ’imi nā roto i te pure i te arata’ira’a a te Vārua ’a fa’a’ohipa ai ’oe i te rāve’a ha’amaura’a-fā i roto i te mau tuha’a ato’a o te ’ohipa misiōnare. Teie te tahi o te reira i roto :
Te tauturura’a i te mau ta’ata tā ’oe e ha’api’i ra ’ia nu’u i mua (hi’o Parau hi’u 1 i roto i teie pene).
Te ’itera’a mai i te mau ta’ata ’āpī nō te ha’api’i (hi’o Parau hi’u 2 i roto i teie pene).
Te ’ohipara’a ’e te mau melo ’e te tāvinira’a i te mau ta’ata i roto i te ’oire ’e te pāroita (hi’o pene 9 ’e 13).
Te ’ohipara’a ma te tāhō’ē ’e tō ’oe hoa misiōnare (hi’o mātēria 6 i roto « Tuha’a fa’anahora’a tāhepetoma »).
Te ha’apūaira’a i tō ’oe fa’aro’o ia Iesu Mesia.
Te ha’amaita’ira’a i tō ’oe ’ite ’e tō ’oe ’aravihi, ’oia ato’a te ha’api’ira’a mai i te reo (hi’o pene 7).
’A ha’amau i te mau fā e tano
’Eiaha e ha’amau i te mau fā fa’a’itera’a niu nō te tahi atu mau misiōnare. Teie rā, e nehenehe ’oe e arata’i ia rātou ’e e fa’aitoito ia rātou i te fa’a’ohipara’a i te parau tumu nō te ha’amaura’a i te fā ’a ha’amau ai rātou i tā rātou iho mau fā.
E ara maita’i ’eiaha e fa’aau ’e tā te tahi.
’Eiaha e fa’a’ohipa i te fa’aotira’a o te fā mai te hō’ē fāito hope’a, nō te ha’amāuruurura’a a te ta’ata, ’aore rā nō te fa’atītī’aifaro ’aore rā, nō te tauahira’a te hō’ē ta’ata i mua te nahoa ta’ata.
Hōho’a
Peresideni Spencer W. Kimball
« Tē ti’aturi nei tātou i roto i te ha’amaura’a i te mau fā. Tē ora nei tātou e te mau fā […] [Hō’ē] fā faufa’a roa ’oia ho’i te ’āfa’ira’a te ’evanelia i te mau ta’ata ato’a… Tā tātou fā ’o te taera’a ïa i te ora mure ’ore. O te fā rahi roa a’e ïa i te ao nei » (Spencer W. Kimball, séminaire nā te mau ti’a fa’atere ārea, 3 nō ’Ēperēra 1975, 6).
Fa’atupu i te mau rurura’a nō te fa’anahora’a tāhepetoma ’e tāmahana
E tauturu te fa’anahora’a tāhepetoma ia ’oe ’ia hi’o i te tā’āto’ara’a o te hōho’a ’e ’ia rōtahi i ni’a i te ta’ata. E tauturu ato’a te reira ia ’oe ’ia rōtahi i ni’a i te mau ’ātivite faufa’a roa a’e. E tauturu te fa’anahora’a tāmahana ia ’oe ’ia fa’atano ’e ’ia fa’aineine nō te rave i te mau ’ohipa ta’a ’ē i te mau mahana ato’a. Tē hina’aro nei ’oe ’ia fa’ahotu rahi, ’eiaha noa ’ia rahi-roa-hia i te ’ohipa.
I roto i te rurura’a fa’anahora’a, ’a ui ia ’oe iho i te mau uira’a tumu i ni’a, i tō ’oe mana’o e aha tā te Fatu e hina’aro ’ia rave ’oe. ’A ’imi i te fa’aurura’a nō te pāhono i teie mau uira’a ma te rāve’a tano, i te tupura’a tāta’itahi ’e te ta’ata. E ti’a ïa i te pāhonora’a e rave i te hāmanira’a i roto i tā ’oe mau ’ōpuara’a.
Tufa’a fa’anahora’a tāhepetoma
’A fa’atupu i te hō’ē rurura’a fa’anahora’a tāhepetoma ’e tō ’oe hoa misiōnare, hō’ē mahana ’e hō’ē hora tei ha’amauhia e te peresideni misiōni. ’A pe’e i te mau ta’ahira’a i raro nei.
’A pure ’e ’a ’imi i te fa’aurura’a. ’A ani i te Metua i te ao ra ’ia arata’i ia ’oe i roto i te ravera’a i te mau ’ōpuara’a ’o tē tauturu ia ’oe ’ia rave manuia i tāna mau fā. ’A ani iāna ’ia ha’amaita’i i tā ’oe mau tauto’ora’a nō te tauturu i te ta’ata ’ia nu’u i mua ’e ’ia haere mai i te Mesia ra.
’A ha’amau i te mau fā ’e ’a rave i te mau ’ōpuara’a nō te mau fa’a’itera’a niu ato’a ma te fa’a’ohipara’a i te fa’aaura’a rorouira ’Ia poro haere i tā’u nei ’Evanelia. E fa’a’ohipa i te rāve’a ha’amaura’a-fā i fa’ata’ahia i ni’a mai i roto i teie pene. ’A ha’amata ’e :
Te mau ta’ata i bāpetizohia ’e i ha’amauhia i te roara’a o te matahiti i mā’iri a’e nei.
Te mau ta’ata e tai’o mahana bāpetizora’a tā rātou.
Te mau ta’ata ’o tā ’oe e ha’api’i nei ’e ’o tē haere mai nei i te purera’a ’ōro’a.
Te mau ta’ata ’āpī e ha’api’ihia nei.
Te mau melo tei ho’i mai, te mau ’utuāfare e melo te tahi pae, ’e te mau taea’e e tano ’ei peresibutero.
Te mau ta’ata tei ha’api’ihia nā mua a’e nei.
Hi’o Parau hi’u 1 i roto i teie pene nō te mau mana’o nō ni’a i te fa’a’ohipara’a i te rāve’a ha’amaura’a-fā i roto te ’ohipara’a ’e te mau ta’ata tā ’oe e ha’api’i nei.
Fa’a’ohipa i te rāve’a ha’amaura’a-fā tau maoro nō te ’imi i te ta’ata e ha’api’i (hi’o Parau hi’u 2 i roto i teie pene ’e te pene 9 nō te tauturura’a ’ia ’imi).
Fa’a’ohipa i te rāve’a ha’amaura’a-fā nō te patu i te mau aura’a ’e te feiā fa’atere o te pāroita ’e te mau melo. Ha’amau i te mau fā ’e te ravera’a i te mau ’ōpuara’a, e nāhea ’oe i te turu ia rātou i roto i tā rātou mau tauto’ora’a nō te fa’a’ite i te ’evanelia (hi’o te mau mana’o i roto te pene 9 ’e 13). Fa’aineine nō te ’āpo’ora’a fa’aaura’a tāhepetoma a te pāroita (hi’o pene 13).
Hi’o fa’ahou i tā ’oe mau ’ōpuara’a ’e te mau fā i roto i te fa’aaura’a rorouira ’Ia poro haere i tā’u nei ’Evanelia. ’A ha’apāpū i tā ’oe mau fārereira’a ’e te mau ’āpo’ora’a.
’A fa’atupu i te hō’ē ’āpo’ora’a pupu hoa misiōnare. Tei roto i te reira te mau tuha’a rarahi i muri nei :
Mai te peu e hina’arohia, ’a fa’a’ite i tā ’oe iho mau fā e tano ’e e ani atu i tō ’oe hoa misiōnare i te tauturu i roto i te rave manuiara’a i te reira.
E tāu’aparau i te pūai o tō ’oe auhoara’a. E tāu’aparau i te mau fifi e tū’ati i te ha’apa’ora’a ’aore rā i te tāhō’ēra’a i roto i te ’ohipa. ’A fa’atītī’aifaro i te mau pe’ape’a ato’a ma te (1) fa’ati’ara’a i te ta’ata tāta’itahi ’ia fa’a’ite tōna mau mana’o, (2) te māramaramara’a ’e te fa’ari’ira’a i tō te tahi ’e te tahi mau ha’ape’ape’ara’a, ’e (3) te fa’aoti-’āmui-ra’a i te hō’ē rāve’a ’o te pāhono i te mau ha’ape’ape’ara’a faufa’a roa a’e.
’A fa’a’ite i tō ’oe hoa e aha tō ’oe mana’o nō ni’a i tōna mau pae pūai. ’A ani atu i te mau mana’o nō ni’a e nāhea ’oe i te ha’amaita’i atu ā.
Ha’amau i te mau fā ’o tē ha’amaita’i i tō ’oe mau aura’a.
E tauturu te ’āpo’ora’a pupu hoa misiōnare ia ’oe ’ia fa’ananea i te mau ’aravihi faufa’a roa ’o tā ’oe e nehenehe e fa’a’ohipa i roto i tō ’oe iho orara’a ’e te ora’ara’a ’utuāfare, i roto i te ’oe tāvinira’a i roto i te ’ēkālesia, i roto i tā ’oe ’ohipa ’e te tahi atu mau tā’atira’a.
E fa’aoti nā roto i te pure.
Tuha’a nō te fa’anahora’a tāmahana
’A ha’amau i te mau fā ’e e fa’anaho ’e tō ’oe hoa misiōnare e 30 a’e minuti i te mau po’ipo’i ato’a. ’A pe’e i te mau ta’ahira’a i raro nei.
’A pure ’e ’a ’imi i te fa’aurura’a.
’A hi’o fa’ahou i te nu’ura’a i mua i tā ’oe mau fā fa’a’itera’a niu tāhepetoma.
’A hi’o fa’ahou i tā ’oe mau ’ōpuara’a nō te tauturu i te mau ta’ata tā ’oe e ha’api’i ra. E tu’u nā mua roa i tā ’oe mau tauto’ora’a nō te tauturu i te feiā e nu’u rahi nei i mua. Fa’atano i te mau fā ’e te mau ’ōpuara’a ’ia hina’arohia.
’A rohi i roto i te mau ’ohipa ’o tā ’oe e rave atu i te reira mahana, nō te ’ite mai i te mau ta’ata ’āpī nō te ha’api’i ’e nō te tauturu i te mau ta’ata o tā ’oe e ha’api’i nei.
’A fa’anaho e nāhea ’oe ’ia ’ohipa ’e te feiā fa’atere ’e te mau melo o te fenua.
’A fa’aoti nā roto i te pure.
Ha’api’ira’a ’e te hoa misiōnare
Hi’o fa’ahou te Parau hi’u 1 ’e te Parau hi’u 2 i te pae hope’a o teie pene nō te tahi mau mana’o nō ni’a e nāhea i te fa’a’ohipara’a i te rāve’a ha’amaura’a fā i roto i te ha’api’ira’a ’e te ’itera’a mai. ’A hi’o mai nāhea ’oe e nehenehe ai e fa’a’ohipa i te tahi ’o teie mau mana’o.
E fa’a’ohipa i te fa’aaura’a rorouira ’Ia poro haere i tā’u nei ’Evanelia
Nō ni’a te feiā tei bāpetizohia i tōna ’anotau, ’ua parau Moroni, « ’ua pāpa’ihia tō rātou mau i’oa, ’ia ha’amana’ohia ’e ’ia fa’a’amuhia rātou i te parau maita’i a te Atua, nō te tāpe’a ia rātou i ni’a i te ’ē’a ti’a » (Moroni 6:4). Te tāpe’ara’a i te mau parau fa’a’ite ’o te hō’ē ïa rāve’a nō te fa’a’ohipa i teie tumu parau.
Pāpa’i i tā ’oe mau tauto’ora’a
Te tāpe’ara’a i te mau parau fa’a’ite e tuha’a ïa nō te ara-maita’i-ra’a itoito o tō ’oe pae fenua ma te here ’e te māna’ona’ora’a. ’A tāpe’a i tā ’oe mau parau fa’a’ite ma te pāpū maita’i ’e te fa’a’āpī māite. E tauturu te reira ia ’oe ’ia ha’amana’o i te mea tā ’oe e ti’a e rave nō te tauturu i te ta’ata.
E fa’ati’a te fa’aaura’a rorouira ’Ia poro haere i tā’u nei ’Evanelia ia ’oe ’ia fa’aau ’e ’ia fa’a’ite atu i te mau ha’amāramaramara’a faufa’a roa, i te feiā fa’atere ’e te mau melo o te fenua nō ni’a i te nu’ura’a o te ta’ata ’e te ’ohipa.
’A pe’e i te mau arata’ira’a o te putu’ite ’e te ’ōmo’era’a
’A pe’e i te mau arata’ira’a nō te fa’ahereherera’a te putu’ite ’e te ’ōmo’era’a, ’ia pāpa’i ana’e ’oe i tā ’oe mau fā ’e te mau ’ōpuara’a i roto i te fa’aaura’a rorouira ’Ia poro haere i tā’u nei ’Evanelia ’e i roto i te mau māteria i nene’ihia. Nō te mau ha’amāramaramara’a, hi’o Te mau fa’aturera’a misiōnare nō te mau pipi a Iesu Mesia, 7.5.
’A ui ia ’oe iho i te mau uira’a i muri nei hou ’oe ’a pāpa’i ai ’aore rā ’a fa’a’ite ai i te mau ha’amāramaramara’a i roto i te fa’aaura’a rorouira ’Ia poro haere i tā’u nei ’Evanelia, te rata uira, te mau rāve’a ha’apararera’a tōtiare, te mau nota, ’aore rā te tahi atu mau tureiara’a :
E aha tā teie ta’ata e mana’o nō ni’a i te ’ohipa tā’u e pāpa’i nei ?
E aha tā’u e putapū mai te peu e fa’a’ite te hō’ē ta’ata i teie huru ha’amāramaramara’a nō ni’a iā’u ia vetahi ’ē ?
Tē pe’e rā ānei au i mau fa’aturera’a a te ’Ēkālesia ’e te mau ture nō ni’a i te ’ōmo’era’a o te putu’ite o tō’u pae fenua, mai te peu e pāpa’i ’aore rā e fa’a’ite au i teie ha’amāramaramara’a ?
Hōho’a
mau misiōnare e pure ra
Hōpoi’a, ti’a’ura’a
Te tumu parau o te hōpoi’a e mea faufa’a ïa i roto i te ’ōpuara’a mure ’ore a te Atua (hi’o Alama 5:15–19 ; Te Ha’api’ira’a Tumu ’e te mau Fafaura’a 104:13 ; 137:9). E fa’auru teie tumu parau e nāhea tā ’oe e feruri ra ’e e putapū ra i te hōpoi’a mo’a ’o tā te Fatu e hōro’a ia ’oe. E fa’auru ato’a te hōpoi’a e nāhea ’oe ’ia rave i tā ’oe ’ohipa.
I roto i tāna tāvinira’a i te fenua nei, ’ua hōro’a te Fa’aora i te mau ’ohipa i tāna mau pipi, nō te tauturu ia rātou ’ia tupu i te rahi, ’ia fa’anane’a ia rātou ’e ’ia rave manuia i tāna ’ohipa. ’Ua hōro’a ato’a ’oia ia rātou i te rāve’a ’ia ’āfa’i mai i te parau fa’a’ite nō te ’ohipa ’o tei fa’auehia ia rātou e rave (hi’o Luke 9:10 ; 3 Nephi 23:6–13). ’Ei misiōnare, e ’āfa’i ato’a mai ’oe i te parau fa’a’ite nō te ’ohipa tā te Fatu i fa’aue ia ’oe e rave.
E fa’a’ite mai i tā ’oe ha’amaura’a fā ’e te fa’anahora’a ma te mana’o e ’āfa’i ’oe i te parau fa’a’ite i te Fatu nā roto i te pure i te mau mahana ato’a. ’Ia ti’a’au ato’a ’oe ia ’oe iho ’e tō ’oe feiā fa’atere misiōni.
E ti’a i te ’āfa’ira’a i te parau fa’a’ite ’ia riro ’ei tupura’a ’ohipa here ’e te au maita’i, i reira tā ’oe mau tauto’ora’a e ’itehia ai ’e e ’ite mai ’oe i te mau rāve’a nō te ha’amaita’i ia ’oe.
’A feruri i te pereota i muri nei nō roto mai i tā ’oe rata pi’ira’a : « ’A hōro’a ai ’oe i tō ’oe taime ’e tō ’oe ara maita’i nō te tāvinira’a i te Fatu, ma te vaiiho i muri ia ’oe i te tahi atu mau ’ohipa ato’a tā ’oe, e ha’amaita’i te Fatu ia ’oe ma te hōro’a ia ’oe i te hō’ē ’ite ’e te ’itera’a pāpū rahi nō Iesu Mesia ’e nō tāna ’evanelia i fa’aho’ihia mai ». ’A ui ia ’oe iho i te mau uira’a i muri nei ’e ’a pāpa’i i tō ’oe mau nino’a mana’o.
Mea nāhea e roa’a ai iā’u i te hōro’a i tō’u taime ’e tō’u ara maita’i nō te tāvinira’a i te Fatu ?
E aha te mau ha’amaita’ira’a ’o tā’u i hi’o mai ?
Mea nāhea tō’u ’itera’a pāpū i te ha’apūaira’ahia ?
Nāhea vau e nehenehe ai e ha’amaita’i atu ā ?
’A rave i te tahi taime nō te feruri i tō ’oe mahana hope’a i roto i te misiōni. ’Ia tae ana’e mai taua mahana ra :
Mai aha tō ’oe aura’a ’e te Metua i te ao ra ’e Iesu Mesia, e hina’aro ai ’oe ’ia riro mai ?
E aha tā ’oe e hina’aro nei ’ia riro mai ?
I roto i tā ’oe buka tāmahana, ’a pāpa’i i te hō’ē pāhonora’a i teie mau uira’a tāta’itahi ? ’A fa’a’ohipa i te rāve’a ha’amaura’a-fā nō te fa’anaho i te mea tā ’oe e nehenehe e rave i teienei, nō te tāpae i te reira mau fā. Pāpa’i i tā ’oe mau ’ōpuara’a.
Ha’api’ira’a ’e te hoa misiōnare ’e tāuiuira’a hoa
Ma te fa’a’ohipara’a i te fa’aaura’a rorouira ’Ia poro haere i tā’u nei ’Evanelia, ’a pāhono i te mau uira’a i raro nei :
’Ua fa’atanohia ānei ’e e mea pāpū ānei te mau pāpa’ira’a ato’a ?
Te hō’ē misiōnare ’āpī i roto i te vaefenua, e fana’o ānei ’oia i tā ’oe mau tauto’ora’a nō te ’ite mai i te mau ta’ata ’āpī nō te ha’api’i ?
Mai te peu e hi’o fa’ahou ā ’oe i tā ’oe fa’aaura’a rorouira i teienei, e tauturu ānei te reira ia ’oe ’ia ’ite i hea e ’itehia mai ai te mau ta’ata ? E tauturu ānei te reira ia ’oe ’ia ’ite mai i tō rātou nu’ura’a i mua ?
’Āpo’ora’a mata’eina’a, ’āmuira’a ārea misiōnare ’e ’āpo’ora’a feiā fa’atere misiōni
E ani i te mau misiōnare ’ia fa’a’ite mai i te mau ’ohipa i tupu, ma te mau fā tā rātou i ha’amau ’e te mau ’ōpuara’a tā rātou i rave, nō te tauturu i te ta’ata ’ia nu’u i mua. Te mau hi’ora’a, tē vai ra i roto te mau fā ’e te mau ’ōpuara’a nō te tauturu i te ta’ata :
Fa’ananea i te fa’aro’o rahi a’e i te Fa’aora.
Tātarahapa ’e e rave i te mau tauira’a nō te ha’afātata atu i te Atua.
’Ia bāpetizohia ’e ’ia ha’amauhia.
Ho’i fa’ahou mai i te ’Ēkālesia ’e e fa’a’āpī i tā rātou fafaura’a nō te bāpetizora’a.
Tai’o hō’ē o te mau tupura’a i muri nei i te mau misiōnare. E vāhi i te mau misiōnare nā roto i te mau pupu na’ina’i. E fa’a’ohipa te pupu tāta’itahi i te mau ta’ahira’a 1 ’e 2 i roto i te rāve’a ha’amaura’a-fā, nō te tauturu i te mau ta’ata i roto i teie mau hi’ora’a nō te nu’ura’a i mua i te bāpetizora’a ’e te ha’amaura’a. E fa’a’ite mai te pupu tāta’itahi i tō rātou mau mana’o.
’Ua fa’ari’i te hō’ē ta’ata tā ’outou e ha’api’i ra i te hō’ē anira’a ’ia haere i te purera’a i teie hepetoma.
’Ua fa’ari’i te hō’ē ta’ata i te anira’a nō te bāpetizora’a ’e ’ua ha’amau ’ei fā ’ia bāpetizohia ’oia.
’Ua fa’ari’i te hō’ē ta’ata i tā ’outou anira’a e tai’o i te Buka a Moromona ’e ’ua ha’apāpū mai e tai’o te 1 Nephi 1.
’Ani manihini i te mau misiōnare ’ia fa’a’ohipa i te fa’aaura’a rorouira ’Ia poro haere i tā’u nei ’Evanelia nō te tauturu ia rātou ’ia ha’amau i te mau fā e tupu ’e mea tūtava rā ma te :
Hi’o-fa’ahou-ra’a i te fa’a’itera’a niu ’e te nu’ura’a i mua i ma’iri.
Ha’amaura’a i te mau fā tāmahana, tāhepetoma ’e tā’āva’e.
’Āmuira’a mai i te mau ta’ata i te mau fā o te fa’a’itera’a niu.
’A tāu’aparau e nāhea teie mau ta’ahira’a e tauturu ai i te mau misiōnare ’ia fa’anaho ’aravihi a’e, ’a tauturu ai rātou i te ta’ata ’ia nu’u i mua. E ani i te mau misiōnare ’ia feruri i te mau mea i muri nei :
Nāhea ’outou i te fa’a’ohipa i te fa’aaura’a rorouira ’Ia poro haere i tā’u nei ’Evanelia i muri nei, ’a fa’anaho ai ’outou ?
E aha te tahi atu rāve’a tei ’itehia mai ia ’outou nō te fa’a’ohipa ma te ’aravihi a’e i te fa’aaura’a rorouira ?
Feiā fa’atere misiōni ’e nā tauturu misiōni
Hi’o pinepine fa’ahou i te fa’aaura’a rorouira ’Ia poro haere i tā’u nei ’Evanelia a te mau misiōnare. E ani ia rātou ’ia fa’a’ite mai mea nāhea rātou i te fa’a’ohipa i te reira, nō te pe’e i tā rātou mau fā ’e mau ’ōpuara’a ’e nō te tauturu i te ta’ata ’ia nu’u i mua.
’A hi’o i te tahi taime i te mau tuha’a fa’anahora’a tāhepetoma ’aore rā tāmahana a te mau misiōnare.
Parau hi’u 1
Fa’a’ohipa te rāve’a ha’amaura’a-fā ma te ’ohipara’a ’e te mau ta’ata tā ’outou e ha’api’i nei
E hōro’a mai teie tuha’a i te mau hi’ora’a e mea nāhea ’outou i te fa’a’ohipa te rāve’a ha’amaura’a-fā nō te tauturu i te mau ta’ata tā ’outou e ha’api’i nei.
1. Ha’amau i te mau fā ’e e rave i te mau ’ōpuara’a
Nā roto i te pure ’a feruri i te mau hina’aro pae vārua o te mau ta’ata tā ’outou e ha’api’i nei. Ha’amau i te mau fā ’e e rave i te mau ’ōpuara’a nō te tauturu ia rātou ’ia pāhono i teie mau hina’aro. Fa’a’ohipa i te fa’aaura’a rorouira ’Ia poro haere i tā’u nei ’Evanelia nō te hi’o fa’ahou i te nu’ura’a i mua o te ta’ata tāta’itahi. Fa’a’ohipa i te mau fa’a’itera’a niu nō te fa’afāriura’a nō te ’ite mai i te mau ’ohipa ’o tē tauturu i te ta’ata tāta’itahi ’ia tāhiti i te ta’ahira’a nō muri iho nō te haere i te Mesia ra.
’A ha’amau ai ’outou i te mau fā ’e e rave i te mau ’ōpuara’a, e ui ia ’outou iho i te mau uira’a mai teie te huru :
E aha te mau mā’itira’a tā te ta’ata e rave nei e fa’a’ite ra i te mara’ara’a i te fa’aro’o ia Iesu Mesia ?
E aha te mau ’ohipa i tupu tā te ta’ata e ora nei ma te Vārua ?
E aha te mau tāmatara’a tāna e fa’aruru nei ?
E aha te ti’a ia tātou ’ia ha’api’i rahi mai nō teie ta’ata nō te tauturu iāna ?
E aha tei tītauhia nō te tauturu i teie ta’ata ’ia fa’ananea i tōna fa’aro’o ia Iesu Mesia, ’ia putapū ’e ’ia ’ite i te Vārua, ’ia tātarahapa, ’e ’ia bāpetizohia ?
Nāhea tātou i te fa’aineine nō te ’āpo’ora’a fa’aaura’a tāhepetoma a te pāroita, nō te fa’aō mai i te feiā fa’atere ’e te mau melo o te pāroita i roto i te tauturura’a i teie ta’ata ? (Hi’o pene 13).
E aha te mau fā nō te fa’a’itera’a niu e ti’a ia tātou e ha’amau nō te fa’a’ite i tō tātou fa’aro’o i te Fatu ?
2. Tāpa’o ’e e tāpura i tā ’oe mau ’ōpuara’a
Fa’a’ohipa i te fa’aaura’a rorouira ’Ia poro haere i tā’u nei ’Evanelia nō te pāpa’i ’e nō te tāpura i tā ’outou mau fā ’e mau ’ōpuara’a ma te fa’ata’ata’a maita’i. E tauturu te reira ia ’outou ’ia fa’anaho i te ’ohipa ’e e ’ite mau i te mau ’ohipa e rave i te mahana tāta’itahi. ’A pe’e i te mau ture putu’ite o te ’ōmo’era’a nō tō ’outou vaefenua.
’A tāpa’o ai ’oe ’e ’a tāpura ai i tā ’oe mau ’ōpuara’a, ’a ui ia ’oe iho i te mau uira’a mai teie te huru :
E aha te mau mea ta’a ’ē tā tātou e nehenehe e rave i teie mahana ’e teie hepetoma, nō te turu i te nu’ura’a i mua o teie ta’ata ?
E aha te ha’api’ira’a tumu (’aore rā ha’api’ira’a) e tauturu i teie ta’ata ’ia fa’ananea i te fa’aro’o pūai i te Mesia ’e ’ia ora i te ’evanelia ? Nāhea tātou i te ha’api’i i teie ha’api’ira’a tumu ’ia nehenehe iāna ’ia hāro’aro’a i te reira ’e ’ia fa’ateiteihia e te Vārua Maita’i ?
Nāhea ’e e aha te taime tātou e ha’apāpū ai i te mau fārereira’a ?
E aha te mau anira’a manihini e ti’a ia tātou e fa’atae atu ’aore rā e pe’e i te nu’ura’a ? Nāhea ’e e aha te taime tātou e pe’e ai i te nu’ura’a ?
Nāhea ’e e aha te taime tātou e tauturu ai i te ta’ata ’ia haere mai i te purera’a, ’ia tai’o i te pāpa’ira’a mo’a, ’ia pure, ’e ’ia ha’apa’o i te mau tītaura’a ’o te arata’i atu i te ravera’a i te mau fafaura’a ’e te Atua ?
Nāhea te mau melo e nehenehe ai e ’āmui mai ?
E aha te mau arata’ira’a ha’api’ira’a tā tātou e nehenehe e fa’a’ite atu i te ta’ata ?
E aha te ’ōpuara’a piti tā tātou e nehenehe e rave, mai te peu ’aita te mau mea e tupu mai tā tātou i fa’anaho ?
3. Rave i tā ’oe mau ’ōpuara’a
’Ia vai te pure i roto i tō ’oe ’ā’au i te roara’a o te mahana, ’a ’rave ai ’oe i tā ’oe mau ’ōpuara’a. E tauturu te Vārua ia ’outou ’ia ’ite i hea e haere ai, e aha te mea e rave, e aha te mea e parau, ’e e aha te mau fa’atanora’a e rave.
I te roara’a o te mahana, ’a ui ia ’outou iho i te mau uira’a mai teie te huru :
Nāhea tātou e nehenehe ai e ’ohipa ma te fa’aro’o, te ti’aturira’a i te Fatu nō te tauturu ia tātou ’e e fa’arahi i tā tātou mau tauto’ora’a nō te tāvini i tāna mau tamari’i ?
Nāhea tātou ’ia riro ’ei ta’ata hāmani ’e te itoito ’ia ’ohipa ana’e tātou i tā tātou mau ’ōpuara’a ?
Nāhea tātou i te fa’aa’u i tā tātou mau ’ōpuara’a mai te au i te mau hina’aro o te ta’ata ’e o te mau tupura’a ?
’Aita te mau ’ōpuara’a e tere noa mai tā tātou e tīa’i ra. ’Ia vai apuapu noa ’e ’a fa’a’ohipa i te mau ’ōpuara’a piti ’ia hina’aro-ana’e-hia.
4. Hi’o fa’ahou i te nu’ura’a i mua ’e te pe’era’a i te nu’ura’a
Ma tō ’oe hoa misiōnare, ’a hi’o fa’ahou i te nu’ura’a i mua e tae atu i te mau fā ’o tā ’oe i ha’amau nō te ha’api’i i te ta’ata ’e te tauturura’a ia rātou ’ia nu’u i mua. Fa’anaho i te mau rāve’a nō te pe’e i te nu’ura’a. Fa’atano i tā ’oe mau ’ōpuara’a mai te peu e hina’arohia ’a tūtava ai ’oe i te tāpae i tā ’oe mau fā.
’A ui ia ’oe iho i te mau uira’a mai teie te huru :
Te mau ta’ata tā ’oe e ha’api’i nei tē rave ra ānei rātou i te mau fafaura’a ’e te Atua ?
E aha te mau tāmatara’a tā rātou e fa’aruru nei ? E aha tō rātou mau ha’ape’ape’ara’a ?
E aha tā ’oe e nehenehe e rave i teie mahana nō te tauturu ’e nō te fa’a’itoito ia rātou ’ia ’ohipa—’ei ta’ata hō’ē ’aore rā nā roto i te ihi anoa ha’a ?
E mau ’itera’a ānei tō rātou ma te putapūra’a i te Vārua ?
’Ua tū’ati ānei rātou i te feiā fa’atere ’e i te mau melo o te ’Ēkālesia ’e tē nāti rā ānei rātou i te auhoara’a ? ’O vai te nehenehe e ’āmui mai i muri nei i roto i tā māua ha’api’ira’a ?
E aha tā māua i ’apo mai nā roto mai i te manuia-’ore-ra’a ?
E aha te fāito maita’i i ravehia e māua nō te tāpae i tā māua mau fā ? Tē vai ra ānei te tahi ’ohipa e ti’a ia māua e fa’atano ’aore rā e rave ta’a ’ē atu ?
E taime tano ānei nō te fa’aiti mai i te fārereira’a ?
Hi’o Pene 1 nō te tahi atu ā mau parau tumu ’e te mau mana’o nō ni’a i te pe’era’a ’e te tauturura’a i te ta’ata ’ia nu’u i mua.
Parau hi’u 2
Fa’a’ohipa i te rāve’a ha’amaura’a-fā i roto i te ’itera’a mai i te ta’ata nō te ha’api’i
Tē hōro’a nei teie tuha’a i te mau hi’ora’a e nāhea ’oe i te fa’a’ohipa i te rāve’a ha’amaura’a-fā i roto i te ’itera’a mai te mau ta’ata nō te ha’api’i. Fa’a’ohipa i teie rāve’a i roto i tā ’oe fa’anahora’a tāhepetoma ’e tāmahana.
1. Ha’amau i te mau fā ’e e rave i te mau ’ōpuara’a
Ma tō ’oe hoa misiōnare, ’a feruri nā roto i te pure e aha tā te Metua i te ao ra e hina’aro ’ia rave ’oe nō te ’ite rahi mai i te mau ta’ata nō te ha’api’i. ’A rave te reira i te mau hepetoma ’e te mau mahana ato’a. ’Ia vai te fa’aro’o ē, e fa’aineine ’oia i te mau ta’ata nō ’oe (hi’o Te Ha’api’ira’a Tumu ’e te mau Fafaura’a 100: 3–8).
Ha’amau i te mau fā nō te mā’imira’a i te mahana tāta’itahi. ’A rave i te mau ’ōpuara’a nō te rohi i raro a’e i tā ’oe fa’aterera’a ’o te fa’auru i te mau fa’ahope’ara’a o te fa’a’itera’a niu. Te mau hi’ora’a tei roto :
E hia rahira’a ta’ata ’āpī tā ’oe e paraparau nei i te ’Evanelia i te mahana tāta’itahi ?
E hia rahira’a taime e ani ’oe i te mau melo, i te mau ta’ata tā ’oe e ha’api’i nei, ’e i te mau ta’ata tā ’oe e fārerei nei ē, ’ua mātau ānei rātou i te hō’ē ta’ata ’o tē ’ana’anatae nei i tā ’oe parau poro’i.
E aha te vitivitira’a e pāhono ai ’oe i te mau i’oa tei fa’ataehia mai ’aore rā i te mau mana’o nō ni’a i te mau rāve’a ha’apararera’a tōtiare.
’A hi’o fa’ahou ā i te fa’aaura’a rorouira ’Ia poro haere i tā’u nei ’Evanelia ’e ’a ui ia ’oe iho i te mau uira’a mai teie :
E aha tā te Metua i te ao ra e hina’aro ’ia rave māua i teie mahana ’e i teie hepetoma nō te ’ite mai i te mau ta’ata nō te ha’api’i ?
E aha te mau fā nō te fa’a’itera’a niu tāmahana ’e tāhepetoma e ti’a ia māua e ha’amau nō te ’ite mai i te mau ta’ata nō te ha’api’i ?
E aha te ’ātivite maita’i a’e nō te mā’imira’a nō teie taime o te mahana ’e te vāhi ?
Nāhea māua i te fa’auru ’e i te turu i te mau melo o te pāroita i roto i tā rātou tauto’ora’a nō te fa’a’ite i te ’evanelia, maoti te mau parau tumu o te here, te fa’a’itera’a ’e te ani-manihini-ra’a ?
’O vai te mau melo ’āpī tā māua e nehenehe e fārerei atu nō te tauturu ia rātou ’ia haere mai i te purera’a ’ōro’a ? E mau hoa ānei tō rātou nō te ani manihini atu ?
Nāhea māua i te ’ohipa atu e te ’āpo’ora’a pāroita ’aore rā te feiā e haere mai nei i te ’āpo’ora’a fa’aura’a tāhepetoma a te pāroita nō te ’imi i te mau ’utuāfare ’āfa melo, mau melo e ho’i mai nei ’e te mau taea’e e tano ’ei peresibutero nō fārerei atu ?
’O vai te mau ta’ata e ha’api’ihia ra, ’o vai te mau ta’ata tei ha’api’i-a’ena-hia, ’e te feiā i hōro’ahia mai nō te fārerei atu ? Nāhea māua i te fārerei ia rātou ? (’Ei ta’ata, nā roto i te ihi anoa ha’a, te niuniu paraparau, ’aore rā te tahi atu mau rāve’a)
E aha te tahi mau rāve’a ’āpī e nehenehe ai tātou e ’ite mai i te ta’ata ?
E aha te mau tārēni ’e te mau pūai tā māua e nehenehe e fa’a’ohipa ?
Nāhea māua i te ha’amaita’i i tō māua ’aravihi nō te ’ite mai i te ta’ata nō te ha’api’i ?
Nāhea māua i te tauturu i te feiā tā māua i fārerei atu ’ia putapū i te fa’aurura’a a te Vārua Maita’i ?
Nō te mau hi’ora’a ’ei ’ātivite nō te mā’imira’a, ’a hi’o pene 9, 10, ’e 13.
Fa’a’ohipa i te fa’aaura’a rorouira ’Ia poro haere i tā’u nei ’Evanelia, nō te tauturu ia ’outou ’ia ’ite mai i te mau ’ātivite tei manuia maita’i nā mua a’enei. ’Ei hi’ora’a, e nehenehe ’oe e hi’o mea nāhea te mau melo fa’afāriu-’āpī-hia i te ’itera’ahia mai.
’A ’imi i te fa’aurura’a ’e ’ia vai matara noa nō te mau fa’auru’a’ī ’e te mau mana’o ’āpī. ’Eiaha e fa’aea noa i roto i te hō’ē ’ohipa mātarohia. Te mau misiōnare e ’ite tāmau nei i te mau ta’ata ’āpī nō te ha’api’i, pinepine rātou i te fa’aohipa i te mau rāve’a rau i te mau hepetoma ato’a. E ’ohipa tāmau noa rātou.
2. Tāpa’o ’e e tāpura i tā ’oe mau ’ōpuara’a
Ma tō ’oe hoa misiōnare, e fa’a’ohipa i te fa’aaura’a rorouira ’Ia poro haere i tā’u nei ’Evanelia nō te pāpa’i ’e nō te tāpura i tā ’oe mau fā ’e te mau ’ōpuara’a. E tauturu te pāpa’ira’a ’e te tāpurara’a i tā ’oe mau ’ōpuara’a ia ’oe ’ia ’ite e aha te mau ’ohipa e rave ’e te taime nō te rave i te reira.
’A ui ia ’oe iho i te mau uira’a mai teie te huru :
’Āhea ’e nāhea māua ’ia fārerei atu i te mau ta’ata ? E aha te mau rāve’a maita’i a’e ? Tei hea te mau vāhi maita’i a’e ? E aha te mau taime maita’i a’e o te mahana nō te mau rāve’a ta’a ’ē nō te ’ite mai te ta’ata ?
Nāhea māua e fa’ari’i ai i te ’āparaura’a faufa’a e te mau ta’ata tā māua e fārerei nei ?
Nāhea ’e ’āhea māua e ’ite mai ai nā ni’a i te mau rāve’a ha’apararera’a tōtiare ’e te tahi atu ihi anoa ha’a ?
E aha te taime māua e fārerei ai i te mau ta’ata tei hōro’ahia mai ?
E aha te ’ōpuara’a piti tā tātou tā māua e rave ’ia manuia ’ore ana’e te tahi atu mau ’ōpuara’a ?
3. Rave i tā ’oe mau ’ōpuara’a
’A tūtava ma te itoito ’ia rave fa’aoti i tā ’oe mau fā nō te ’ite mai te mau ta’ata nō te ha’api’i. ’Ia vai te hō’ē pure i roto i te ’ā’au i te roara’a o te mahana. ’Ia vai matara nō te aroha ’e nō te paraparau i te ta’ata tā ’oe e fārerei atu. E tauturu mai te Vārua ia ’oe ’ia ’ite i hea e haere ai, e aha te mea e rave, e aha te mea e parau, ’e e aha te fa’a’āfarora’a e rave.
I te roara’a o te mahana, ’a ui ia ’oe iho i te mau uira’a mai teie te huru :
Nāhea māua e nehenehe ai e ’ohipa ma te fa’aro’o, te ti’aturira’a i te Fatu ’ia tauturu mai ia māua ’e e fa’arahi i tā māua tauto’ora’a ’ia tāvini i tāna mau tamari’i ?
Nāhea māua ’ia riro ’ei ta’ata hāmani ’e itoito ’ia rohi ana’e māua i tā māua mau ’ōpuara’a ?
Nāhea māua i te fa’aau i tā māua mau ’ōpuara’a mai te au i te mau hina’aro o te ta’ata ’e te mau tupura’a ?
Nāhea māua i te tauturu i te mau ta’ata ’ia putapū i te fa’aurura’a a te Vārua Maita’i ?
’Aita te mau ’ōpuara’a e tupu ra mai tā ’oe i mana’o. ’Ia vai apuapu noa ’e ’a fa’a’ohipa i te ’ōpuara’a piti ’ia hina’aro-ana’e-hia.
4. Hi’o fa’ahou ’e e pe’e i te nu’ura’a i mua
I te roara’a o te mahana ’e te hepetoma, nō roto i te pure ’a hi’o fa’ahou i te nu’ura’a i mua tei fa’aotihia i roto i te fa’atupura’a i te mau fā nō te ’itera’a mai i te ta’ata nō te ha’api’i. ’A ui ia ’oe iho i te mau uira’a mai teie te huru :
E aha te fāito tei ha’amanuia ia māua i te tāpaera’a tā māua mau fā ’e te pe’era’a i tā māua mau ’ōpuara’a ?
E aha te mau fa’atanora’a tā māua e rave nō te tāpae i tā māua mau fā nō te ’ite mai i te ta’ata ?
Nāhea māua ’ia ’ape ’ia ’ore māua ’ia topa i roto i te ’ohipa mātaro-noa-hia, e ’ere i te ’ohipa manuia nō te ’itera’a mai i te ta’ata nō te ha’api’i ?
E aha te tahi mau mea ’āpī tā māua e nehenehe e tāmata i teie taime o te mahana ?
E aha te mau mana’o e ti’a ia māua e ’āparau i roto i te ’āpo’ora’a fa’aaura’a tāhepetoma a te pāroita, nō te tauturu ia māua ’ia ’ite mai i te ta’ata nō te ha’api’i ? (Hi’o pene 13).
’Ei hoa misiōnare, fa’a’ohipa i te tāpura « Tauto’ora’a nō te ’imi » i roto i te pene 9, nō te fa’atano tā ’oe mau tauto’ora’a ’ia mā’imi tāhepetoma ’e tāmahana. ’A ’ite mai i te mau mea tā ’oe i rave maita’i, ’e ’a feruri nāhea ’ia ha’amaita’i atu i te reira.
I te roara’a o te mahana, ’a fa’aea ma’a taime rii nō te ’ite mai i te rima o te Atua i roto i tā ’oe ’ohipa.