« Pene 11 : Tauturu i te ta’ata ’ia rave ’e ’ia ha’apa’o i te mau tītaura’a », ’Ia poro haere i tā’u nei ’Evanelia : E arata’i nō te fa’a’ite i te ’evanelia a Iesu Mesia (2023)

« Pene 11 », ’Ia poro haere i tā’u nei ’Evanelia

Hōho’a

I Shall Not Want [E’ita vau e hina’aro] nā Yongsung Kim

Pene 11

Tauturu i te ta’ata ’ia rave ’e ’ia ha’apa’o i te mau tītaura’a

’A feruri i teie

E aha te tū’atira’a i rotopū i te ha’apa’ora’a i te mau tītaura’a ’e te fa’afāriura’a ?
E aha te tū’atira’a i rotopū i te ha’apa’ora’a i te mau tītaura’a ’e te ha’apa’ora’a i te mau fafaura’a ?
Nāhea vau i te fa’atae atu i te anira’a manihini nō te tauturu i te mau ta’ata ’ia tupu i te rahi i te pae vārua, ’e ’ia ha’apūai i tō rātou fa’aro’o ia Iesu Mesia ?
Nō te aha e mea faufa’a ’ia fa’a’ite atu i te hō’ē ’itera’a pāpū ha’avare ’ore ?
E aha te mau ha’amaita’ira’a tā’u e nehenehe e fafau atu ?
Nāhea vau i te tauturu i te ta’ata ’ia ha’apa’o i te mau tītaura’a ?

Tātarahapa, tītaura’a, ’e fa’afāriura’a

’Ei misiōnare ’e ’ei pipi nā Iesu Mesia, e hina’aro ’oe i te fa’aorara’a o te mau vaerua ta’ata (hi’o Mosia 28:3). « E mea pūai [te Fa’aora] nō te fa’aora » i te feiā e ha’apa’o i te mau fafaura’a tā rātou i rave i te fa’ari’ira’a i te mau ’ōro’a e tītauhia o te autahu’ara’a, ma te ha’amata nā roto i te bāpetizora’a (hi’o 2 Nephi 31:19). Ma te fa’ataera’a atu i te mau anira’a manihini ’e te tauturura’a i te mau ta’ata ’ia ha’apa’o i tā rātou mau tītaura’a, e fa’aineine te reira ia rātou nō te bāpetizora’a.

E fa’aorahia te mau ta’ata mai te peu e tātarahapa rātou (hi’o Helamana 5:11). Te tātarahapara’a ’o te fāriura’a hope ’e te ha’avare ’ore ïa ia Iesu Mesia. Te tītaura’a e tuha’a faufa’a roa ïa o te tātarahapara’a. ’Ia ani manihini ’oe i te mau ta’ata ’ia rave i te mau tītaura’a ’ei tuha’a nō tā ’oe ha’api’ira’a, tē ani manihini ra ïa ’oe ia rātou ’ia tātarahapa.

Te aura’a o te tītaura’a ’o te mā’itira’a ïa i te hō’ē fa’anahora’a e rave ’e te pe’era’a mai te au i te reira mā’itira’a. E arata’i atu te ’ohipa-tāmau-ra’a mai te au i te mau parau mau o te ’evanelia i te fa’afāriura’a.

Te fa’afāriura’a ’o te hō’ē ïa tauira’a i roto i te mau ti’aturira’a, te ’ā’au ’e te orara’a o te hō’ē ta’ata, nō te fa’ari’i ’e nō te pe’e i te hina’aro o te Atua. E fa’a’otira’a ferurira’a pāpū nō te riro mai ’ei pipi nā te Mesia. E tupu te fa’afāriura’a ’ia fa’a’ohipa ana’e te mau ta’ata i tō rātou fa’aro’o i te Mesia, ’ia tātarahapa i tā rātou mau hara, ’ia bāpetizohia, ’ia fa’ari’i i te hōro’a o te Vārua Maita’i ’e ’ia tāpe’a maite e tae noa atu i te hope’a. Tē fa’ata’a nei te Fatu ’e tāna mau peropheta i teie tauira’a mai te hō’ē fānaura’a ’āpī i te pae vārua (hi’o Ioane 3:3-5 ; Mosia 27:25-26).

E hōro’a mai te tara’ehara a te Fa’aora i te fa’afāriura’a mau ’e e fa’atupu te Vārua Maita’i i teie pūai o te tauira’a o te ’ā’au (hi’o Mosia 5:2 ; Alama 5:12–14).

Te fa’afāriura’a e ’ohipa nō te orara’a tā’āto’a, e ’ere i te hō’ē tupura’a ’ohipa. Te tauturura’a i te ta’ata ’ia fa’afāriuhia ia Iesu Mesia ’o te pū mau ïa nō tā ’oe ’ōpuara’a misiōnare. Ma te arata’ihia e te Vārua, e ani manihini ’oe i te ta’ata ’ia rave i te mau tītaura’a ’o tē tauturu ia rātou ’ia tupu i te pae vārua ’e ’ia ’ite i te fa’aurura’a a te Vārua Maita’i i roto i tō rātou orara’a. I muri iho, e tauturu ’oe i te ta’ata ’ia ha’apa’o i te mau tītaura’a tā rātou i rave. E tauturu ’oe ia rātou ’ia ’ohipa ma te fa’aro’o e tae atu i te hō’ē tauira’a tāmau (hi’o Mosia 6:3).

Te feiā e ha’apa’o i tā rātou mau tītaura’a hou te bāpetizora’a, mea pāpū e rave rātou ’e e ha’apa’o rātou i te mau fafaura’a mo’a a muri a’e. ’Ia ha’api’i ana’e ’oe i te ta’ata ’ia ha’apa’o i tā rātou mau tītaura’a, tē ha’api’i ra ïa ’oe ia rātou ’ia ha’apa’o i tā rātou mau fafaura’a. Te ravera’a ’e te ha’apa’ora’a i te mau fafaura’a e tuha’a faufa’a roa nō te ’evanelia a Iesu Mesia ’e nō te fa’anahora’a a te Atua nō tāna mau tamari’i.

Tei roto i teie pene te mau arata’ira’a nō te fa’atae atu i te mau anira’a manihini, nō te fafau atu i te mau ha’amaita’ira’a, nō te fa’a’ite atu i tō ’oe ’itera’a pāpū, ’e nō te tauturu i te ta’ata ’ia ha’apa’o i tā rātou mau tītaura’a ’ia ti’a ia rātou ’ia haere i te Fa’aora ra ’e ’ia fa’aorahia.

Hōho’a

mau misiōnare e ha’api’i ra i te hō’ē vahine

Fa’atae i te mau anira’a manihini

’Ei mono nō Iesu Mesia, e ani manihini ’oe i te ta’ata ’ia pe’e iāna ’e ’ia fa’ari’i i te ’oa’oa o tāna ’evanelia. E fa’atae ’oe i te mau anira’a manihini ta’a ’ē ia rātou nō te rave i te mau mea ’o te ha’apūai i tō rātou fa’aro’o i te Mesia. I muri iho, e pāturu ’oe ia rātou i roto i te ha’apa’ora’a i tā rātou mau tītaura’a.

E mea faufa’a roa te mau anira’a manihini ’e te mau tītaura’a nō te mau tumu i muri nei :

E tauturu te reira i te ta’ata ’ia ora i te mau parau tumu ’o tā rātou i ha’api’i mai, ’ia ti’a ia rātou ’ia putāpū i te fa’a’itera’a pāpū a te Vārua.
Te ha’apa’ora’a i te mau tītaura’a ’o te hō’ē ïa rāve’a nō te ta’ata ’ia fa’a’ite i tā rātou tātarahapara’a (hi’o Te Ha’api’ira’a Tumu ’e te mau Fafaura’a 20:37).
E tauturu te tātarahapara’a i te ta’ata ’ia ’ite mai i te hau ’e te ’oa’oa o te fa’aorera’a hara a te Atua. E fāna’o ato’a rātou i te tauturu mara’ara’a rahi a te Atua nō tō rātou mau tāmatara’a.
E fa’aineine te ha’apa’ora’a i tā rātou mau tītaura’a i te ta’ata ’ia rave ’e ’ia ha’apa’o i te mau fafaura’a mo’a.
E nehenehe ’oe e fa’a’ite i tō ’oe here nō te ta’ata ’e tō ’oe fa’aro’o i roto i te mau fafaura’a a te Atua, ma te tauturura’a i te ta’ata ’ia ha’apa’o i tā rātou mau tītaura’a.

Ani manihini ma te arata’ihia e te Vārua

’A ’imi i te arata’ira’a a te Vārua nō ni’a i te fa’ataera’a i te mau anira’a manihini ’e te taime nō te fa’atae atu i te reira. ’A feruri i te hea ha’api’ira’a ’aore rā ha’api’ira’a tumu, tei māramarama-maita’i-hia, e tauturu i te hō’ē ta’ata ’ia fa’ari’i i tā ’oe anira’a manihini. E nehenehe te anira’a manihini tano i te tāime ti’a e fa’a’ana’anatae i te ta’ata ’ia rave i te mau mea ’o te ha’apūai i tō rātou fa’aro’o. E nehenehe teie mau ravera’a e arata’i atu i te hō’ē tauira’a rahi o te ’ā’au (hi’o Mosia 5:2 ; Alama 5:12–14).

E nehenehe tā ’oe mau anira’a manihini e riro ’ei mea ha’eha’a, mai te tai’ora’a i te hō’ē pene o te mau pāpa’ira’a mo’a ’aore rā tē haerera’a mai i te purera’a ’ōro’a. E ’aore rā e nehenehe te reira e riro ato’a ’ei mea faufa’a i te bāpetizora’a. E ti’a ’ia fa’atanohia te mau anira’a manihini i te vāhi i reira te ta’ata e ’ite ai i tōna nu’ura’a pae vārua.

E turu te mau anira’a manihini fa’auruhia a te Vārua i te tahi ’e te tahi, nō te tauturu i te hō’ē ta’ata ’ia nu’u i mua i te pae vārua (hi’o 2 Nephi 28:30 ; Te Ha’api’ira’a Tumu ’e te mau Fafaura’a 93:12–13). ’A ui ia ’oe iho, « E aha te mau tītaura’a tā te ta’ata e ha’apa’o nei ? E aha te ti’a iāna ’ia rave i muri iho nō te nu’u i mua ?

’A fa’aro’o i te feiā ’o tā ’oe e paraparau ra ’e e ha’api’i ra. ’Ia au i tā ’oe i fa’aro’o ’aore rā i putapū, ’a ’imi i te arata’ira’a a te Vārua nō te ’ite e aha te mau anira’a manihini, e tauturu i te ta’ata tāta’itahi ’ia nu’u i mua i te ravera’a i te mau fafaura’a mo’a.

Te mau parau tumu nō te fa’ataera’a i te anira’a manihini

Nō te fa’ataera’a i te anira’a manihini e tītauhia te fa’aro’o ia Iesu Mesia. ’Ia roa’a te fa’aro’o ē, e ha’amaita’i ’oia i te ta’ata ’ia fa’ari’i ana’e rātou ’e ’ia pāhono ana’e mai i tā ’oe mau anira’a manihini.

E rahi a’e te mau ta’ata i te taui ’ia ani manihini ana’e ’oe ia rātou ’ia ’ohipa mai te au i te hō’ē parau mau o te ’evanelia, ’e ’ia tauturu ana’e ’oe ia rātou ’ia hi’o e nāhea te tauira’a i te ha’amaita’i ia rātou. E taui rātou i te fāito e putapū ai rātou i te Vārua ’e e ’ite ai i te ’oa’oa ’ia ora i te ’evanelia a Iesu Mesia.

I te mau taime ato’a ’a tāu’aparau ai ’oe i te ta’ata, ’oe iho ’aore rā nā ni’a i te natirara, ’a feruri e aha te anira’a manihini e nehenehe e tauturu ia rātou ’ia ha’apūai i tō rātou fa’aro’o i te Mesia ’e ’ia putapū i te Vārua. I te tahi taime e riro te reira ’ei mea ’ōhie i te fārerei-fa’ahou-ra’a ’e rātou ’aore rā ’ia haere atu i te hō’ē ’ohipara’a a te ’Ēkālesia.

’A fa’aineine ai ’oe nō te ha’api’i i te hō’ē ha’api’ira’a, ’a feruri i te mau hina’aro ’e te nu’ura’a i mua o te ta’ata tāta’itahi. ’Ia pāpū maita’i ē, tē vai ra i roto i tā ’oe fa’anahora’a ha’api’ira’a hō’ē ’aore rā hau atu mau anira’a manihini ’o tē tauturu i te ta’ata ’ia haere i mua.

’A ha’apa’o maita’i, ’eiaha e fa’atae rahi roa i te mau anira’a manihini i te hō’ē ā taime. E hina’aro te ta’ata i te taime nō te ’ohipa, nō te tupu i te rahi ’e i te ’apo mai nō te anira’a manihini tāta’itahi.

Ma te taiā ’ore, ’eiaha rā e fa’ahepo ’ia ani manihini ’oe i te ta’ata ’ia rave i te mau tītaura’a (hi’a Alama 38:12 ’A fa’atura i te ti’amāra’a ’ia mā’iti o te ta’ata.

’Imira’a pāpa’ira’a mo’a.

Nō te aha e mea faufa’a te mau tītaura’a ?

Ani manihini ma te parau marū ’e te māramarama

Pinepine te ani-manihini-ra’a i te anihia ma te hō’ē uira’a « e hina’aro ānei ’oe », ’o te hōro’ahia mai te pāhonora’a e ’ē ’aore rā e ’aita. ’Ia ani manihini ’oe ma te marū, te pāpū maita’i ’e te māramarama. E ti’a i te reira ’ia ani ’aore rā ’ia tītau i te ta’ata ’ia ’ohipa ma te fa’aro’o ia Iesu Mesia.

Noa atu e anira’a manihini ’ōtahi tā ’oe nō te ta’ata tāta’itahi, ’a feruri i te mau hi’ora’a i muri nei :

E hōro’a mai te haerera’a i te purera’a ia ’oe i te hō’ē taime ’e te hō’ē vāhi nō te ha’amori i te Atua ’e ’ia putapū i tōna Vārua. E tauturu ato’a te reira ia ’oe ’ia riro ’ei melo nō te hō’ē ’āmuira’a ta’ata tāhō’ē, ’a hōpoi mai ai ’oe i te mau tauira’a nō te ha’afātata atu i te Fa’aora. E haere mai ānei ’oe i te purera’a ’ōro’a nā muri ia māua i teie mahana sābati ?
I teienei ’a paraparau ai tātou nō te faufa’a rahi o te tuatāpapa-hōhonu-ra’a i te mau pāpa’ira’a mo’a, e tai’o ānei ’oe [i te hō’ē tuha’a ta’a ’ē o te pāpa’ira’a mo’a] ? E pāpa’i ānei ’oe i tō ’oe mau mana’o ’aore rā i tā ’oe mau uira’a ? E nehenehe tātou e ’āparau i ni’a i tō ’oe mau mana’o ’ia fārerei fa’ahou ana’e tātou.
’Ua tāu’aparau tātou i te orara’a o te Fa’aora ’e i tāna mau fa’auera’a. E pe’e ānei ’oe i tōna hi’ora’a ma te bāpetizora’a ia ’oe i roto i tāna ’Ēkālesia ’e ’ia rave i te mau fafaura’a ’e ’ōna ? (Hi’o « Te anira’a manihini ’ia bāpetizohia ’e ’ia ha’amauhia » i roto i te pene 3.)
’Ua fa’a’ite ’oe i te hina’aro ’ia tū’ati rahi atu ā ’e te Atua i roto i tō ’oe orara’a. E pure ānei ’oe ma te fa’aro’o i te roara’a o te mau mahana i muri nei, ’ia nehenehe ia ’oe ’ia ’ora i te mau ha’amaita’ira’a o te pure ?
E video tā māua e vai ra ē tē mana’o nei māua e tauturu te reira ia ’oe. E nehenehe ānei māua e fa’a’ite atu i te reira ia ’oe ’aore rā e ’āfa’i atu i te hō’ē hono ? E hi’o ānei ’oe i te reira ? E nehenehe ānei māua e ho’i mai ananahi nō te hi’o e aha ra tō ’oe mana’o ?

’A ’imi i te arata’ira’a a te Vārua Maita’i, ’a feruri ai ’outou i te mau rāve’a e au nō te fa’atae i te anira’a manihini marū, te ta’a ’ē ’e te māramarama.

Ha’api’ira’a ta’ata hō’ē ’e ha’api’ira’a ’e te hoa misiōnare

I roto i tā ’oe buka tāpa’ora’a ha’api’ira’a, pāpa’i i te hō’ē anira’a manihini ’ōhie, ’āfaro ’e te māramarama nō te tītaura’a tāta’itahi o te hō’ē ha’api’ira’a. Mai te peu ’ua rave a’enā ’oe i teie ’ohipara’a, ’a nā ni’a fa’ahou ’e ’a fa’aau i tā ’oe mau anira’a manihini ’āpī ’e tera mea tahito.

’A tai’o fa’ahou i te mau anira’a manihini tā ’oe i pāpa’i ’e tō ’oe hoa misiōnare. ’A ’āparau i muri iho i teie mau uira’a i muri nei :

Nāhea tāua i te tauturu i te mau ta’ata ’ia māramarama i te mau ha’amaita’ira’a i fafauhia e te Fatu e ’āpiti atu i teie anira’a manihini.
Nō te aha e mea faufa’a teie anira’a manihini nō’u iho ?
Nāhea vau i te tauturu i te mau ta’ata ’ia putapū i te here o te Atua nō rātou, ’ia fa’atae ana’e au i te mau anira’a manihini ?
Nāhea vau i te ha’amaita’i ma te tauturura’a ia vetahi ’ē ’ia pāhono i te mau anira’a manihini ’o tā’u e fa’atae atu ?

’A feruri i te hō’ē ta’ata tā ’oe e ha’api’i ra. ’A ha’api’ipi’i ia ’oe i te fa’ataera’a i teie mau anira’a manihini, mai tē huru ra tē fa’atae ra ’oe i te reira i taua ta’ata ra. ’A hi’o fa’ahou i tā ’oe mau anira’a manihini mai te mea e hina’arohia.

Fafau i te mau ta’ata i te mau ha’amaita’ira’a.

E fafau te Atua e ha’amaita’i ’oia ia tātou mai te peu e ha’apa’o tātou i tāna mau fa’auera’a (hi’o Te Ha’api’ira’a Tumu ’e te mau Fafaura’a 130:20-21). Te feiā e ha’apa’o i te mau fa’auera’a ’e e vai ha’apa’o noa e « ha’amaita’ihia rātou i roto i te mau mea ato’a » ’e e pārahi rātou « ’e te Atua ato’a i roto i te ’oa’oa hope ’ore ra » (Mosia 2:41).

’Ia ani manihini ana’e ’oe i te mau ta’ata ’ia rave i te mau tītaura’a, ’a fafau atu ia rātou i te mau ha’amaita’ira’a nō te ha’apa’ora’a i tā rātou mau tītaura’a. E nehenehe ’oe e ’ite mai e rave rahi o teie mau ha’amaita’ira’a ma te ’imira’a i te mau pāpa’ira’a mo’a, te mau ha’api’ira’a a te mau peropheta nō te mau mahana hope’a nei, ’e te mau ha’api’ira’a i roto i te pene 3. ’A feruri ato’a i te mau ha’amaita’ira’a i roto i tō ’oe iho orara’a. ’A fa’a’oti i roto i te pure e aha te mau ha’amaita’ira’a e fafau atu i te ta’ata tāta’itahi, ’a fa’atae atu ai ’oe i te mau anira’a manihini.

’Ia ani manihini ana’e i te hō’ē ta’ata ’ia ora i te hō’ē fa’auera’a, ’a ha’api’i atu i te mea i muri nei :

E fa’a’ite te ha’apa’ora’a i te mau fa’auera’a i tō tātou here i te Metua i te ao ra ’e i tāna Tamaiti, ia Iesu Mesia (hi’o Ioane 14:15).
E fa’a’ite te ha’apa’ora’a i te mau fa’auera’a i te Atua ē, tē ti’aturi nei tātou iāna (hi’o Maseli 3:5–6).
Te mau ha’amaita’ira’a a te Atua nō pae vārua ïa ’e nō pae tino ato’a (hi’o Mosia 2:41).
Te ha’amaita’ira’a rahi roa a’e a te Atua ’o te ora mure ’ore ïa (hi’o Te Ha’api’ira’a Tumu ’e te mau Fafaura’a 14:7).
Mai te peu e pure tātou ma te hina’aro mau ’e ’ia ’ohipa ma te fa’aro’o, e tauturu mai te Atua ia tātou ’ia rave manuia i te mau mea tāna i fa’aue mai ia tātou ’ia rave (hi’o 1 Nephi 3:7).
E tāpe’a te Atua i tāna mau fafaura’a ’ia ha’amaita’i ia tātou mai tei au i tāna rāve’a ’e i tāna tārena (hi’o Te Ha’api’ira’a Tumu ’e te mau Fafaura’a 88:68-21).

E fārerei pinepine te mau ta’ata i te mau pāto’ira’a nō te ha’apa’ora’a i te mau fa’auera’a. ’A turu i te feiā tā ’oe e ha’api’i ra ’e e ha’apāpū ia rātou ē, e ha’amaita’i mai te Atua ia rātou i roto tā rātou tauto’ora’a nō te rave i tōna hina’aro. ’A tauturu ia rātou ’ia māramarama ē, e rāve’a te pāto’ira’a nō te tupu i te rahi ma te mā’itira’a i te pe’e i te Mesia, noa atu ē mea fifi te reira (hi’o 2 Nephi 2:11, 13–16).

Mai tā Elder Jeffrey R. Holland i ha’api’i : « E tae ’oi’oi mai te tahi mau ha’amaita’ira’a, e taere ri’i mai te tahi ’e tē vai ra e’ita e tae mai ē tae noa atu i te ra’i ra ; ’āre’a rā, nō rātou e ha’apa’o i te ’evanelia a Iesu Mesia, e tae mai iho ā te reira » (« An High Priest of Good Things to Come », Ensign,, Nov. 1999,38).

’Imira’a pāpa’ira’a mo’a.

E aha tā te mau pāpa’ira’a mo’a i muri nei e ha’api’i nei nō ni’a i te hina’aro o te Fatu nō te ha’amaita’i ia tātou ?

Ha’api’ira’a ta’ata hō’ē

Tai’o Te Ha’api’ira’a Tumu ’e te mau Fafaura’a 82:10 ’e 130:20–21. I muri mai ’a tuatāpapa hōhonu i te mau pāpa’ira’a mo’a i muri nei. ’A pāpa’i e piti ’āna’ira’a i roto i tā ’oe buka tāmahana. Hō’ē pae, e pāpa’i i te fa’auera’a tā ’oe e ’ite mai i roto i te tuha’a tāta’itahi. I te tahi atu pae, e pāpa’i te fafaura’a nō te ha’apa’ora’a i te fa’auera’a.

Fa’a’ite i tō ’oe ’itera’a pāpū

’A fa’a’ite i tō ’oe ’itera’a pāpū i te mau taime ato’a e fa’atae ai ’oe i te anira’a manihini ’e ’a fafau atu i te mau ha’amaita’ira’a. ’A parau mai te aha ’oe i te ha’amaita’ira’ahia ’a ora ai ’oe i te parau tumu tā ’oe e ha’api’i ra. ’A fa’a’ite i tō ’oe ’itera’a pāpū ē, e ha’amaita’i te parau tumu i te orara’a o te ta’ata ’ia ’ora ana’e ’oia i te reira.

E tauturu tō ’oe ’itera’a pāpū ha’avare ’ore i te fa’atupu i te hō’ē vāhi i reira te ta’ata e putapū ai i te Vārua Maita’i e ha’apāpū ra i te parau mau. E fa’aitoito te reira ia rātou ’ia fa’ari’i i te mau anira’a manihini tā ’oe e fa’atae atu.

Nā te ha’amāramaramara’a hau atu, hi’o « Fa’a’ite i tō ’oe ’itera’a pāpū » i roto i te pene 10.

Hōho’a

pupu ta’ata e pure ra

Tauturu i te ta’ata ’ia ha’apa’o i tā rātou mau tītaura’a

’Ia fa’ari’i ana’e te mau ta’ata i tā ’oe mau anira’a manihini nō te rave i te hō’ē ’ohipa, ’a pe’e atu nō te tauturu ia rātou ’ia ha’apa’o i tā rātou tītaura’a. E tauturu ’oe i te mau ta’ata ’ia fa’ananea te fa’aro’o i te Mesia. Tō ’oe ti’ara’a ’o tē tauturura’a ïa ia rātou ’ia ha’apūai i tō rātou fa’aro’o ’e tō rātou hina’aro ’ia haere i mua ē tae roa atu i te fa’afāriura’a hope roa. ’Eiaha e ani manihini noa i te ta’ata ’ia tāui ; ’a turu atu ia rātou ’ia nā reira.

E fa’ari’i te mau ta’ata i te ’ite pāpū a te Vārua, mai te peu e fa’a’ohipa rātou i te fa’aro’o e arata’i atu i te tātarahapara’a ma te ha’apa’ora’a i te mau tītaura’a. E’ita teie ’ite pāpū e tae mai « ē tae noa atu i te hope’ara’a nō te tāmatara’a o tō [rātou] fa’aro’o » (Etera 12:6). ’Eiaha e maere ’ia tae ana’e mai te pāto’ira’a. ’A fa’anaho e nāhea ’oe i te tauturu ia rātou ’ia fa’aruru i te reira tāmatara’a ’ia ti’a ia rātou e fa’ari’i i te ’ite pāpū a te Vārua. E nehenehe te tahi mau melo nō te ’Ēkālesia e turu ato’a mai.

Pinepine te mau ta’ata i te putapū i te fa’aurura’a o te Vārua, ’ia ti’a ana’e ’oe i pīha’i ’iho ia rātou. ’A ha’apāpū nō te faufa’a rahi o te pure, te tai’ora’a i te mau pāpa’ira’a mo’a, ’e te pe’era’a i tā ’oe mau anira’a manihini, ’ia ti’a ia rātou ’ia fa’ari’i i teie mau putapūra’a ’ia vai ’ōtahi ana’e rātou.

E fa’aineine te ha’apa’ora’a i te mau tītaura’a i te ta’ata nō te mau ’ōro’a ’e te mau fafaura’a, i ni’a i te roara’a o te ’ē’a o te fa’afāriura’a o tō rātou orara’a tā’āto’a. E nehenehe tā ’oe mau tauto’ora’a e tauturu ia rātou « ’ia fa’a’ite pāpū roa mai nā roto i tā rātou ’ohipa » i tō rātou hina’aro ’ia pe’e ia Iesu Mesia (Te Ha’api’ira’a Tumu ’e te mau Fafaura’a 20:37).

Hōho’a

mau vahine e tauahi ra

Fa’anaho i te fārereira’a poto tāmahana

Te tauturura’a i te ta’ata ’ia ha’apa’o i tā rātou mau tītaura’a e ha’amata ïa i te taime o tā ’oe fārereira’a mātāmua ’e te ha’api’ira’a ia rātou. E ani ia rātou ’ia pāpa’i i tā rātou mau tītaura’a i ni’a i tā rātou niuniu paraparau, te tārena, ’aore rā te hō’ē ’ohipa tā ’oe e vaiho atu ia rātou.

E ani e nehenehe ānei ’oe ’aore rā te hō’ē melo tei ’āmui mai na, e fa’anaho i te hō’ē farereira’a poto tāmahana, nā roto haere i te mau fārereira’a nō te ha’api’ira’a ’A fa’ata’a atu te tumu nō teie mau fārereira’a, nō te turu ïa ia rātou ’e ’a fa’a’ite atu i te tahi mau rāve’a nā te rave i te reira. Teie mau fārereira’a e hō’ē ïa rāve’a nō te fa’a’ohipa i te parau tumu i fa’ahitihia i roto i Te Ha’api’ira’a Tumu ’e te mau Fafaura’a 84:106.

’A fa’ata’a i te rāve’a fārereira’a e tano maita’i, mai te hō’ē fārereira’a poto, te pi’ira’a nā te niuniu paraparau, parau poto tāireuira ’aore rā hō’ē poro’i nā roto i te rāve’a tūreiara’a tōtiare. Tē hōro’a nei te ihi anoa ha’a e rave rahi rāve’a nō te ha’amana’o ’e te tauturura’a hau atu.

E fa’aitoito ’e e tauturu i te ta’ata i roto i tā ’oe fārereira’a tāmahana.

Nō te anira’a manihini tāta’itahi tā ’oe e fa’atae atu, ’a pāpa’i i te mau parau i roto i te fa’aaura’a rorouira o te ’Ia poro haere i tā’u nei ’Evanelia, nō te ’ohipa e pe’e i te mahana nō muri iho. ’A fa’anaho ai ’oe nō te mahana i muri mai, ’a ’imi i te arata’ira’a a te Vārua ’ia paraparau ana’e ’oe, e nāhea ’ia tauturu i te ta’ata ’ia ha’apa’o i tā rātou mau tītaura’a.

’A fa’ariro i tā ’oe mau fārereira’a tāmahana i te ta’ata ’ei mea maita’i ’e te itoito pāpū. ’A pure nō rātou. ’A fa’a’ite i te here ’e te hāro’aro’ara’a ma te tauturu ia rātou ’ia ha’apa’o i tā rātou mau tītaura’a. ’A pāhono atu i te mau uira’a ’e e tauturu ia rātou ’ia fa’a’oroma’i i te mau tāmatara’a. Mai te peu e taime, ’a tai’o ’āmui i te Buka a Moromona. ’A fa’a’ite atu i te mau mauiha’a natirara tano a te ’Ēkālesia, ’oia ato’a te pehe tei hāmanihia e te ’Ēkālesia, ’o tē nehenehe e fa’aitoito ia rātou. ’A fa’atura i tō rātou taime ’e tō rātou mau hina’aro.

’A vauvau atu ia rātou i te tahi atu mau melo nō te ’Ēkālesia. ’Ia ti’a ana’e, e ani atu i te mau melo ’ia tauturu i te mau ta’ata ’ia ha’apa’o i tā ratou mau tītaura’a (hi’o pene 10).

E ha’apōpou i te ta’ata e ha’a nei nō te ha’apa’o i tā rātou mau tītaura’a. Tauturu ia rātou ’ia hi’o i tō te Fatu māuruuru rahi nō tā rātou mau tauto’ora’a. E taui teie mau ta’ata i tō rātou orara’a, ’o tē tītau e rave rahi ’ohipa ’e te fa’a’oroma’i. Tauturu ia rātou ’ia ’ite i te mau ha’amaita’ira’a ’o tā rātou e fa’ari’i nei. ’A fa’a’ite atu i tō ’oe ti’aturira’a ē, nehenehe rātou e manuia.

’A fa’a’ite ato’a i te here mai te mea ’aita te ta’ata e ha’apa’o i tā rātou mau tītaura’a. ’A pupu atu ia rātou i te mana’o turu ia rātou i roto i tā ’oe fārereira’a tāmahana. ’Ei hi’ora’a, mai te peu ’ua fa’ari’i te hō’ē ta’ata i te anira’a manihini e tai’o i te hō’ē pene o te Buka a Moromona, ’aita rā i rave atu ra, ’a ani atu iāna e tai’o ’āmui ’outou. ’A tauturu i te ta’ata ’ia ’ite ma te orara’a, e mea nāhea te ha’apa’ora’a i te mau tītaura’a e riro ai ’ei ha’amaita’ira’a nō tōna orara’a.

Penei a’e e tītauhia e rave rahi tauto’ora’a ’ia nehenehe i te ta’ata e tāpe’a i tā rātou tītaura’a, ’e e ti’a ato’a paha ia ’oe e fārerei pinepine atu ia rātou, nō te tauturu atu. E ’āparau e nāhea rātou ’ia upo’oti’a i te mau tāmatara’a nō te ha’apa’o i te mau tītaura’a. ’A fa’a’oroma’i ’e ’a turu noa, ma te fa’ahapa ’ore ’e te ha’avā ’ore.

’Ia vai te fa’aurura’a o te Vārua Maita’i i roto i tā ’oe mau fārereira’a tāmahana.

’Ia ’āpe’e ana’e ’oe i te mau ta’ata, ’a ani ia rātou ’ia fa’a’ite mai i te mea i orahia e rātou nō te ha’apa’ora’a i te mau tītaura’a. E ani atu e aha tā rātou i ’apo mai ’e i putapū. E tauturu te reira ia rātou ’ia ’ite i te fa’aurura’a a te Vārua i roto i tō rātou orara’a ’e ’ia ’ite mai nō te tuha’a i muri iho.

’A fārerei ai ’oe i te ta’ata i te mau mahana ato’a, te tuha’a faufa’a roa nō tā ’oe ’ōpuara’a ’o te ani-manihini-ra’a ïa i te fa’aurura’a a te Vārua Maita’i i roto i tō rātou orara’a. E tauturu ia rātou ’ia ’ite e mea nāhea ’ia putapūhia e te Vārua ’ia ’ore ana’e ’oe i reira. E ti’a i tā ’oe fārereira’a tāmahana e ha’apūai i te mau mana’o pae vārua, tā rātou e putapū ’ia ha’api’i ana’e ’oe ia rātou. E fa’afāriuhia mai rātou ’a putapū ai rātou i te mana ’e te fa’aurura’a o te Vārua Maita’i.

Fa’a’ite i te here.

Te fa’anahora’a o te fa’afāriura’a, ’ua niuhia ïa i ni’a i te here o te Mesia (hi’o 4 Nephi 1:15). ’A ’imi i te hōro’a o te aroha. E nehenehe te fa’a’itera’a i te here mau e tauturu i te ta’ata ’ia putapū i te Vārua i roto i tō rātou orara’a. E nehenehe ato’a tā ’oe fa’a’itera’a i te here e tauturu ia rātou ’ia fa’ari’i i te mau anira’a manihini ’e ’ia ha’apa’o i te mau tītaura’a e arata’i atu i te fa’afāriura’a.

’A here ai ’e ’a ha’api’i ai ’oe ia vetahi ’ē, e hōhonu atu ā tō ’ōru’a iho fa’afāriura’a i te Fa’aora.

Te tauturura’a i te fa’afāriura’a o te hō’ē ta’ata ’ē e ’ohipa mo’a ïa. E ’ite mai ’oe i te ’oaoa tau roa ’a rave itoito ai ’oe i teie ’ohipa ’e te tāvinira’a ia vetahi ’ē (hi’o Mataio 10:39 ; Mosia 2:17 ; Alama 27:17–18 ; Te Ha’api’ira’a Tumu ’e te mau Fafaura’a 18:10–16).

Ha’api’ira’a ta’ata hō’ē ’e ha’api’ira’a ’e te hoa misiōnare

’A pāpa’i i roto i te fa’aaura’a rorouira o te ’Ia poro haere i tā’u nei ’Evanelia, i tā ’oe fa’anahora’a nō te fārereira’a tāmahana ’e te ta’ata tāta’itahi ’o tā ’oe e ha’api’i ra. ’A fa’anaho e rave rahi mahana nā mua a’e, e aha tā ’oe e rave nō te ha’apāpū i te pe’era’a o te ta’ata tāta’itahi.

’A mā’ite i te hō’ē anira’a manihinihi ’o tā ’oe e fa’atae atu, ’a ha’api’i ai ’oe i te ta’ata tāta’itahi. ’A ’ite mai i te mau ha’atāfifira’a ta’a ’ē ’o te nehenehe e ha’afifi i te hō’ē ta’ata ’ia fa’ari’i ’aore rā ’ia ha’apa’o i te reira tītaura’a. E tāu’aparau ’e e fa’a’ohipa i te rāve’a maita’i a’e nō te tauturu i te mau ta’ata ’a tauto’o ai rātou i te tātara i tō rātou fifi.

Tē hina’aro nei te Fatu i te ta’ata ’ia haere mai ’e ’ia fa’aea mai

E fa’atupu te ’ohipa misiōnare i tōna hope’a rahi roa a’e, ’ia rave ana’e ’e ’ia ha’apa’o ana’e te mau ta’ata i te tītaura’a ’ia ora i te ’evanelia ’e ’ia fa’aea itoito noa i roto i te ’Ēkālesia i te roara’a o tā rātou orara’a. ’Aita e nava’i ’ia tomo noa mai rātou i roto i te ’Ēkālesia. Te hina’aro nei te Fatu ’ia haere mai rātou e fa’aea (hi’o Ioane 15:16). ’A arata’i atu i tā ’oe ha’api’ira’a ’e mau anira’a manihini i te reira hope’a. Nō te fa’ari’i i te mau ha’amaita’ira’a ato’a ’o tā te Metua i te ao ra e mau ra nō rātou, e ti’a i te mau melo ’ia tāmau noa i te ora i te ’evanelia, ma te ha’apa’ora’a i te mau fa’auera’a ’e te mau fafaura’a ’o tā rātou i rave, ma te fa’aea itoito noa i roto i te ’Ēkālesia.

’Ua ha’api’i Nephi : « e ui atu vau ia ’outou na, ’ia tae ’outou i taua ’ē’a piriha’o ra ’e te oaoa, ’o te hope’a ānei ïa ? Inaha, tē parau atu nei au ia ’outou na, ’Aita roa[…] ’ia haere māite ’outou i mua i te ti’a-māite-ra’a i te Mesia […] ’e ma te fa’aitoito ē tae noa atu i te hope’a ra, inaha, tē nā ’ō mai ra te Metua : E fa’ari’i ’outou i te ora mure ’ore » (2 Nephi 31: 19–20).

’A hōro’a i tā ’oe tauto’ora’a maita’i roa a’e nō te tauturu i te mau ta’ata ’ia fa’ati’ahia nō « te ora mure ore, ’o te hōro’a hau a’e ïa i te mau hōro’a ato’a a te Atua » (Te Ha’api’ira’a Tumu ’e te mau Fafaura’a 14:7).

Mana’o nō te ha’api’i ’e nō te rave

Ha’api’ira’a ta’ata hō’ē

’Ite mai i te hō’ē fa’auera’a nō roto mai i te ha’api’ira’a 4. ’A ’ite mai ’e ’a tāpa’o i te mau fa’ahorora’a pāpa’ira’a mo’a ’e te mau fa’ahitira’a parau a te mau peropheta o te mau mahana hope’a nei, ’o tē fa’ata’a nei i te mau ha’amaita’ira’a i fafauhia e tū’ati atu i teie fa’auera’a. ’A feruri i te mau ha’amaita’ira’a ’o tā ’oe i fa’ari’i ma te ha’apa’ora’a i teie fa’auera’a, ’e ’a pāpa’i atu i te reira i roto i tā ’oe buka ’ā’amu.
’Ia paraparau ana’e ’oe ’e tō ’oe ’utuāfare ’aore rā i te tahi atu mau ta’ata, ’a ani atu ia rātou mea nāhea tō rātou i te ha’amaita’ira’ahia i te ha’apa’ora’a i te hō’ē fa’auera’a ta’a ’ē mau (’ei hi’ora’a, te ha’amo’ara’a i te mahana sābati, te ha’apa’ora’a i te ture nō te tuha’a ’ahuru, ’aore rā te ha’apa’ora’a i te hō’ē fa’auera’a fifi nō te hō’ē ta’ata tā ’oe e ha’api’i ra).
’A pāhono i te mau uira’a i muri nei nō te tauturu ia ’oe ’ia ’ite mai i te mau tupura’a ’ohipa ’o tā ’oe e nehenehe e ha’amaita’i, nō te fa’ataera’a i te anira’a manihini. ’A hāmani i te fa’anahora’a nō te ha’amaita’i.
- ’Ua ’ite ānei te ta’ata ē, ’ua here au ia rātou ?
- ’Ua pāpū ānei iā’u ē, e ha’amaita’ihia rātou ’a pāhono ai rātou i tā māua anira’a manihini ?
- Tē hōro’a rā ānei au i te taime ’e te ’ara maita’i e tano nō te mau fārereira’a tāmahana ’e te mau ta’ata, nō te tauturu ia rātou ’ia ha’apa’o i tā rātou mau tītaura’a ?
- Tē vai ra ānei i roto tā māua fa’anahora’a ha’api’ira’a te mau anira’a manihini ta’a ’ē nō te rave ?

Ha’api’ira’a ’e te hoa misiōnare, ’e tāuiuira’a hoa

A hi’o fa’ahou i te mau anira’a manihini i roto i te hō’ē ’o te mau ha’api’ira’a misiōnare. Nō te anira’a manihini tāta’itahi, ’a pāhono i te mau uira’a i muri nei :
- E aha te mau ha’amaita’ira’a tā te Fatu i fafau mai i te feiā e ha’apa’o i teie tītaura’a ?
- Nāhea te ha’apa’ora’a i teie parau tumu e tauturu ai i te mau ta’ata ’ia fa’arahi i tō rātou fa’aro’o ’e tō rātou ’itera’a pāpū ?
- Nāhea teie tītaura’a e tauturu ai i te mau ta’ata ’ia tātarahapa ’e ’ia ’ite atu ā i te Vārua ?
Nā roto i tā ’oe mau mauiha’a nō te fa’anahora’a, ’a hāmani i te tāpura o te mau ta’ata tā ’oe i fārerei atu i nā mahana e piti i ma’iri. ’A tu’u ato’a i te feiā tā ’oe e ha’api’i nei ’e te mau melo.
- Nō te ta’ata tāta’itahi, e pāpa’i i te mau anira’a manihini tā ’oe i fa’atae atu ’e te mau tītaura’a tā rātou i rave.
- ’A feruri i te tahi atu mau anira’a manihini ’o tā ’oe e nehenehe atu e fa’atae.
- ’A fa’ata’a nō te aha ’ua roa’a mai ia ’oe te mau tītaura’a a te tahi o teie mau ta’ata, e ’aita rā tā te tahi pae.
- E aha tā ’oe e rave nō te ’āpe’e atu i teie mau anira’a manihini ?

’Āpo’ora’a mata’eina’a, ’āmuira’a ārea misiōnare ’e ’āpo’ora’a feiā fa’atere misiōni

E tāu’aparau i te mau mana’o maita’i a’e ’e te ha’arau nō te fārereira’a tāmahana ’e te mau ta’ata ’o tā ’oe e ha’api’i nei. Mea nāhea te mau misiōnare i te ha’ara’a ma te maita’i a’e ’e te mau melo ? E aha te mau mātēria pia ’aore rā nūmeri e fa’a’ohipahia ? E aha tā ’oe e nehenehe e rave ’aita ana’e e ta’ata i te fare ’aore rā e mea ’ohipa roa rātou nō te fārerei ia ’oe ?
E ’āparau te mau rāve’a ’o tā te mau misiōnare i ha’api’i maita’i a’e i te mau fa’auera’a i roto i te ha’api’ira’a 4.

Feiā fa’atere misiōni ’e nā tauturu nō te misiōni

Mai te mea e nehenehe, ’a haere atu nā muri i te mau misiōnare ’a ha’api’i ai rāua. Tauturu ia rāua ’ia tūtonu i ni’a i te tauturura’a i te mau ta’ata nō te rave ’e nō te ha’apa’o i te mau tītaura’a.
’A fa’aitoito i te feiā fa’atere o te autahu’ara’a o te pāroita, te feiā fa’atere o te mau pupu tauturu ’e te mau melo, ’ia rave i te fārereira’a tāmahana ’e te mau ta’ata ’o tā te mau misiōnare e ha’api’i ra—mai te peu ’ua fa’ari’i teie mau ta’ata i teie fārereira’a.