« Pene 7 : Ha’api’i i tō ’oe reo misiōni », ’Ia poro haere i tā’u nei ’Evanelia : E arata’i nō te fa’a’ite i te ’evanelia a Iesu Mesia (2023)
« Pene 7 », ’Ia poro haere i tā’u nei ’Evanelia
Hōho’a
’ōpenu fenua ’e te reva
Pene 7
Ha’api’i i tō ’oe reo misiōni
’A feruri na
Nāhea vau i te ha’apūai i tō’u fa’aro’o i te Fatu, nō te tauturu iā’u ’ia ha’api’i i te hō’ē reo ’āpī ?
Nō te aha e ti’a iā’u e tāmau noa i te fa’ananea i tō’u mau ’aravihi nō te reo ?
Nāhea vau i te fa’ananea i tō’u ’ite ’ia paraparau ’e ’ia ha’api’i atu nā roto i tō’u reo misiōni ?
Nāhea vau ’ia fa’ari’i i te hōro’a o te mau reo ?
Fa’aineine ia ’oe iho i te pae vārua
’Ua parau te Fatu, « e fa’aro’o te ta’ata ato’a i te ’īra’a nō te ’evanelia i roto i tōna iho reo, ’e i tōna iho parau, nā roto ia rātou o tei fa’atōro’ahia i teie nei mana » (Te Ha’api’ira’a Tumu ’e te mau Fafaura’a 90:11).
E ’ite mai ’oe i raro nei i te mau rāve’a nō te ha’apūai i tō ’oe fa’aro’o, e tauturu mai te Fatu ia ’oe ’ia ha’api’i ’e ’ia fa’a’ite pāpū nā roto i tō ’oe reo misiōni :
’A ti’aturi ē, ’ua pi’ihia ’oe e te Atua nā roto mai i te hō’ē peropheta.
E ani i te tauturu a te Atua nā roto i te pure ha’eha’a.
’A rohi itoito noa ma te tītau i te ’ite, te ravera’a, ’e te fa’a’ohipara’a i tō ’oe reo misiōni i te mau mahana ato’a.
’Ia vai ti’a-mā noa nō te fa’ari’i i te auhoara’a o te Vārua Maita’i ma te ha’apa’ora’a i te mau fa’auera’a ’e te orara’a i te ture misiōnare.
’A tāmā i tō ’oe mau haerera’a i mua ma te herera’a i te Atua ’e i te herera’a i tāna mau tamari’i ’e te hina’arora’a ’ia ha’amaita’i ia rātou.
’A hōro’a ia ’oe iho ’e ’ia vai itoito noa
E tītau te ’apora’a mai nō te ha’api’i ma te maita’i roa nā roto i te reo o tā ’oe misiōni, i te tauto’ora’a itoito ’e te mau hōro’a a te Vārua. ’Eiaha e māere mai te peu e au ra ia ’oe e mea fifi te ’ohipa. Tītau te reira i te taime. ’Ia fa’a’oroma’i ia ’oe iho. Ma te tītaura’a ia ’oe ’ia ha’api’i i te reo, e fa’ari’i ’oe i te mau ’aravihi e hina’arohia nō te fa’aoti i tā ’oe fā ’ei misiōnare.
E ’ere o ’oe ana’e tē ha’api’i ra i tō ’oe reo misiōni. E tauturu mai tō tātou Metua i te ao ra ʼe Iesu Mesia ia ’oe, ʼa ani ai ’oe i tā rāua tauturu. ’A ’imi ’e ’ia vai matara noa i te tauturu a tō ’oe hoa misiōnare, a te mau melo, a te feiā e ha’api’i ra ia ’oe, a te tahi atu mau misiōnare ’e te tahi atu mau ta’ata.
’A fa’aro’o maita’i ’e ’a parau i te reo i te mau taime ato’a e ti’a ai. ’Eiaha e taiā ’ia hapehape ana’e. E hapehape ihoā te ta’ata ’ia ha’api’i ana’e i te hō’ē reo ’āpī. E ta’a i te ta’ata ’e e fa’afa’ahiahia rātou i tā ’oe mau tauto’ora’a nō te ha’api’i i tō rātou reo.
’A tāmau noa i te fa’ananea i tō ’oe ’aravihi nō te reo, ē tae noa atu i te hope’a o tā ’oe misiōni. ’A tupu rahi noa ai tō ’oe ’aravihi ’ia paraparau i te reo, e fa’aro’o rahi a’e te ta’ata i te mea tā ’oe parau ra i te huru ’o tā ’oe e parau ra i te reira. E iti mai tō ’oe ha’ape’ape’ara’a i ni’a i te huru nō te ’āparaura’a ’e e maita’i mai a’e nō te pāhono atu i te hina’aro o vetahi ’ē.
Hōho’a
Elder Jeffrey R. Holland
« Tē hina’aro nei mātou […] e ti’aturi ē, te mau misiōnare ato’a e ha’api’i i te hō’ē reo […] ’āpī e rahi atu ā te ’aravihi nā roto i te mau huru ravera’a ato’a e ti’a ai […] ’E ’a nā reira ai, e maita’i rahi atu ā tō ’outou ’aravihi [nō te ha’api’i atu] ’e nō te fa’a’ite pāpū atu. E fa’ari’i-maita’i-hia ’outou e [te feiā tā ’outou e ha’api’i atu] ’e te hi’ora’a fa’ahiahia roa i te pae vārua […]
« ’Eiaha ’outou e māuruuru noa i te mea tā mātou e pi’i nei te pu’eparau misiōnare. ’A fa’ananea ia ’outou i roto i te reo ’e e roa’a ia ’outou te tomora’a rahi i te ’ā’au o te ta’ata » (Jeffrey R. Holland, missionary satellite broadcast, Aug. 1998).
’A tāmau noa i te fa’a’ohipa i te reo o tā ’oe misiōni i muri a’e i tō ’oe ho’ira’a i te fare. ’Ua pūpū rahi te Fatu i ni’a ia ’oe ’e e nehenehe ’oia e fa’a’ohipa i tō ’oe ’aravihi i te pae o te reo i muri nei i roto i tō ’oe orara’a.
Ha’api’i i te reo peretāne
Mai te peu ’aita ’oe e parau i te reo peretāne, e ti’a ia ’oe e tītau i te ’ite i te reira ’ei misiōnare. E ha’amaita’i te reira ia ’oe i roto i tā ’oe misiōni ’e i te roara’a o tō ’oe orara’a. E ha’amaita’i ato’a te ha’api’ira’a i te reo peretāne i tō ’oe ’utuāfare.
’A ha’amau i te mau ’ōpuara’a nō te fa’ananea i tō ’aravihi nō te reo, ’e ’a fa’atanotano pinepine i te reira. ’A hāmani i te hō’ē fa’anahora’a nō te tītau i te ’ite i te reo. ’A fa’a’ohipa i te reo i te mau taime ato’a e ti’a ai.
’A fa’ariro i tā ’oe tītaura’a i te ’ite ’ei mea ’ana’anatae.
’A fa’a’ohipa i te mea tā ’oe e tītau ra i te ’ite i te mau tupura’a mau ’e i roto i tā ’oe mau ’ohipara’a tāmahana. ’A fa’atumu ia ’oe i ni’a i te reo ’o tē tauturu ia ’oe ’ia parau i te mea tā ’oe e ti’a e parau.
’Imi ’ia tāu’aparau
’A parau i te reo ’e tō ’oe hoa misiōnare i te mau taime ato’a e ti’a ai. ’A rave i te mau rāve’a ato’a nō te ’apo mai ’e nō te fa’a’ohipa. ’Ei hi’ora’a, e nehenehe ’oe e ani i te hō’ē melo tei ho’i mai ’aore rā i te hō’ē ta’ata tā ’oe e ha’api’i ra, e tauturu ia ’oe i roto i te reo. ’Aita e rāve’a maita’i a’e maoti rā, tē paraparaura’a e te mau ta’ata tumu o te reo.
’Eiaha e fa’aau
’Eiaha e fa’aau tō ’oe ’aravihi nō te reo ’e tō tō ’oe hoa misiōnare ’aore rā i tō te tahi atu mau misiōnare. E arata’i atu te fa’aaura’a i te te’ote’o ’aore rā i te mana’o tarapape.
’A ’apo mai i te mau rāve’a ’āpī hōhonu
’A hi’o fa’ahou tāmau noa i te mea tā ’oe e tītau i te ’ite ’e ’a fa’a’ohipa i te reira i roto i te mau tupura’a ’ohipa ’āpī. E tauturu te reira ia ’oe ’ia ha’amana’o noa ’e ’ia fa’a’ohipa i te mea tā ’oe i ’apo mai.
Hōho’a
taʼata e hiʼo ra i te buka
Hāmani i te hō’ē fa’anahora’a e tītau i te ’ite nō te reo
E tauturu te fa’anahora’a e tītau i te ’ite nō te reo, i te mau misiōnare ’āpī ’e tei ’aravihi, ’ia rōtahi i ni’a i te mea tā rātou e nehenehe e rave i te mau mahana ato’a, nō te ha’amaita’i i tō rātou ’aravihi ’ia parau i tō rātou reo misiōni. Tei roto i tā ’oe fa’anahora’a te mea ’o tā ’oe e rave i te taime o tō ’oe ’apora’a mai i te reo ’e i te roara’a o te mahana.
E fa’a’ite te mau ta’ahira’a i muri nei, e nāhea e hāmani i te hō’ē fa’anahora’a e tītau i te ’ite nō te reo, mā te fa’a’ohipara’a i te rāve’a ha’amaura’a-fā i te pene 8. ’A faʼatano i teie rāve’a mai te mea e hinaʼarohia.
’A ha’amau i te mau fā ’e ’a fa’anaho i te mau ’ōpuara’a. ’A ha’amau i te mau fā tāhepetoma ’e i te mau mahana ato’a nō te fa’ananea i tō ’oe ’aravihi tā’āto’a nō te tāu’aparau ’e nō te ha’api’i i te ’evanelia. ’A tu’u atu i te mau mea tā ’oe e hina’aro e ha’amana’o noa, mai te mau ta’o, te mau pereota, te mau pāpā’ira’a mo’a ’e te mau fa’ahitira’a.
Pāpa’i ’e fa’anaho E fa’aoti e aha te mau mauiha’a nō te reo e tauturu ia ’oe ’ia tāpae i tā ’oe mau fā. Te mau mauiha’a nō te reo, tē vai ra te mau pāpa’ira’a mo’a, te buka fa’atoro parau, te mau buka arata’ireo, te fa’aaura’a rorouira TALL Embark, ’e tē vai atu ra. E fa’ata’a i te mau taime e tītau ai ’oe i te ’ite ’e e fa’a’ohipa i te reo. ’Ei hi’ora’a, e nehenehe ’oe e fa’anaho i te tai’ora’a ma te reo pūai i te Buka a Moromona 15 minuti i te mahana tāta’itahi, i te hora tāmā’ara’a i te avatea.
Rave i tā ’oe mau ’ōpuara’a. Mea au roa nā te Fatu te tauto’ora’a, nō reira ’a rohi tāmau noa nō te tāpae i tā ’oe mau fā. A pāruru i tā ’oe taime tītaura’a i te ’ite nō te reo ’e ’a fa’anaho fa’ahou i te reira, mai te peu e tae mai te fifi.
Hi’o fa’ahou ’e ’a pe’e. ’A hi’o pinepine fa’ahou i tā ’oe ’ōpuara’a e tītau i te ’ite nō te hi’opo’a i tōna tere-maita’i-ra’a. E ani i tō ’oe hoa misiōnare, te feiā fa’atere misiōni, te mau melo, ’e te tahi atu mau ta’ata nō tō ’oe ārea fenua, ’ia hōro’a mai i te mau rāve’a nō te ha’amaita’i ia ’oe i te pae o te reo. E ’āmui atu i roto i te mau hi’opo’ara’a nō te reo tei fa’anaho-pinepine-hia nō te hi’o i tō ’oe haerera’a i mua ’e nō te ’ite mai i te mau rāve’a nō te ha’amaita’i ia ’oe.
E fa’a’aifāito i tā ’oe tītaura’a i te ’ite nō te reo i rotopū i te mau fā tau maoro nō te ha’amaura’a i te hō’ē niu nō te reo ’e te mau fā tau poto nō te mau ’ātivite ta’a ’ē ’e te mau ta’ata ’o tā ’oe e ha’api’i ra.
I roto i tā ’oe taime tītaura’a tāmau i te ’ite nō te reo, ’a fa’a’aifāito i tā ’oe mau fā ’e mau fa’anahora’a i roto i te ’ohipa nō te reo tumu i fa’a’itehia i raro nei. ’A fa’aoti e aha tā ’oe e ’apo mai i te roara’a o te mahana.
te ’aravihi nō te fa’aro’ora’a tari’a
te ’aravihi nō te tai’ora’a
te arata’ireo
te ’aravihi nō te paraparau
te ’aravihi nō te pāpa’ira’a
te pu’e ta’o
Ha’api’ira’a ta’ata hō’ē ’e ha’api’ira’a ’e te hoa misiōnare
’A rave i te taime i te hepetoma ato’a nō te hi’opo’a i tā ’oe tītaura’a i te ’ite nō te reo ma te uira’a i te mau uira’a i muri nei :
’Ua tītau ānei au i te ’ite i tō’u reo misiōni i te mau mahana ato’a i teie hepetoma ? E aha tā’u e nehenehe e rave nō te ha’amaita’i i te reo o tā’u misiōni ?
Tē tauturu ra ānei tā’u fa’anahora’a ’ia ’imi, ’ia ha’api’i atu ’e ’ia rohi maita’i nā muri i te mau melo ? E aha te mau fa’atanora’a e ti’a iā’u ’ia rave i ni’a i tā’u fa’anahora’a ?
E aha tā’u e fa’ahiahia roa i roto i tā’u tītaura’a i te ’ite i te reo ? E aha tā’u e rave nō te fa’afāna’o rahi atu ā i te reira ?
E hia rahira’a taime e ti’a iā’u ’ia rave nō te ha’api’ipi’i iā’u ’ia fa’aro’o tari’a, ’ia tai’o, ’ia pāpa’i, ’e ’ia paraparau ? Nāhea vau e nehenehe ai e ha’api’i maita’i i te pu’e ta’o, te arata’ireo ’e te fa’ahitira’a ?
E aha te mau ’ohipara’a ’e te mau mātēria tā’u e fa’a’ohipa nei nō te tītau i te ’ite nō te reo ? ’O tei hea ’o tē tauturu maita’i a’e iā’u ? E aha te tahi atu mau mātēria ’aore rā mau ’ohipara’a e nehenehe e riro ’ei tauturu ?
E aha te hina’arohia i te ararara’a rahi a’e ?
I muri a’e i te pāhonora’a i teie mau uira’a, e fa’atano i tā ’oe fa’anahora’a nō te tītau i te ’ite ’e ’a hi’o e ha’amaita’i ānei te reira i tā ’oe mau hope’ara’a. E arata’i te Vārua ia ’oe i roto i tā ’oe mā’imira’a tāmau nō te ha’amaita’i i tā ’oe tītaura’a i te reo.
’A ha’api’i mai ’e tō ’oe mau hoa misiōnare.
E tauturu i tō ’oe mau hoa misiōnare ’ia manuia ’e ’ia roa’a i te ti’aturira’a i roto i te tītaura’a i te ’ite i te reo o te misiōni ’aore rā te tītaura’a i te ’ite i te reo peretāne. ’A ha’apoupou ma te ’ā’au tae ’e te pinepine i tō ’oe mau hoa misiōnare ’e te tahi atu mau misiōnare i roto i tā rātou nu’ura’a i mua.
’A hōro’a atu i te mau mana’o ’ōhie ’e te au maita’i ma te ’ā’au aroha. ’A hōro’a ia rātou e rave rahi rāve’a nō te ha’api’i atu ’e nō te fa’a’ite pāpū ma te manuia. ’A hi’o e nāhea te hō’ē misiōnare ’aravihi maita’i i te tauturura’a i tōna hoa i roto i te ’ā’amu mau i muri nei.
Nō tae noa atu ra vau i roto i te piti o tā’u vāhi ’ohipa misiōnare, ’a parau mai ai tō’u hoa misiōnare iā’u ē, nā’u e hōro’a i te mana’o fa’aitoito i te hō’ē fārereira’a nō te tāmā’ara’a i te reira pō. E ’oa’oa noa tō’u hoa misiōnare mātāmua ’ia hōro’a i te ha’api’ira’a ’e ’ua mātau vau i te hōro’a i tō’u mana’o ri’i nō te ha’api’ira’a ’e i muri iho e fa’aro’o noa atu ai.
’Ua tāmata vau i te tāparu i tō’u hoa misiōnare ’ia hōro’a ’oia i te mana’o fa’aitoitora’a, terā rā ’ua fa’aitoito mai ’oia iā’u ’ia fa’ari’i te reira anira’a. ’Ua rave au ma te tauturuhia e āna.
I te taera’a te taime, ’ua ’īriti au i te pāpa’ira’a mo’a ’e ’ua tai’o atu te 3 Nephi 5 ’e 7. ’Ua tāfifi ri’i au, ’ua ti’a rā iā’u ’ia fa’ata’a atu nō te aha ’ua mana’o vau e mea faufa’a teie mau ’īrava ’o tā’u i mā’iti mai, ’e ’ua māmā roa vau i te fa’aotira’a. I te uira’ahia mai te hō’ē uira’a, ’ua hi’a atu vau i tō’u hoa nō te pāhono atu, ’aita rā ’oia i hāmama a’e i tōna vaha. I te reira taime tō’u maerera’a i te ’itera’ahia mai iā’u i te pāhonora’a nā roto i te hō’ē reo farāni pāpū maita’i. ’Ua maere rahi roa atu ā vau ē, e au ra ’aita te melo i mana’o ē e ’aita vau i pāpū maita’i i tō’u mau ’aravihi nō te tāu’aparau. ’Ua roa’a iā’u te ti’aturira’a iā’u iho ’e ’ua ’ite au ē e mea maita’i roa tā’u reo farāni i tā’u iho i mana’o na.
’Ua ma’iri te mau hepetoma, ’e ’ua tāmau noa tō’u hoa i te vaiiho iā’u ’ia ha’api’i––noa atu ’aita vau i ti’aturi e nehenehe au e nā reira ’e ’oia ato’a penei a’e tē uiui ra tōna mana’o ē, e’ita e ti’a iā’u e rave i te reira. ’Ua tae mai te mana’o ’iā’u ē, ’ua riro vau ’ei mauha’a nā tō tātou Metua i te ao ra ’eiaha rā ’ei hoa vai mū noa.
Ha’api’ira’a ta’ata hō’ē ’e ha’api’ira’a ’e te hoa misiōnare
’A ’ohipa ’e te tahi atu mau misiōnare nō te tauturu ia ’oe ’ia ha’api’i i te reo o tā ’oe misiōni.
Mai te peu tē ’ohipa nei ’oe ’e te hō’ē misiōnare ’āpī, nāhea ’oe i te tauturu maita’i a’e iāna ’ia ha’api’i i te reo ’aore rā i te reo peretāne ?
Mai te peu e misiōnare ’āpī ’oe, e aha te huru tauturura’a tā ’oe e nehenehe e ani i tō ’oe hoa ?
Hōho’a
mau misionare e ha’api’i rā i te hō’ē vahine
Te hīro’a tumu ’e te ha’api’ira’a i te reo
E tū’ati piri roa te hīro’a tumu ’e ha’api’ira’a i te reo. E tauturu te hāro’aro’ara’a i te hīro’a tumu o te ta’ata ’ia fa’ata’a i te huru nō te fa’a’ohipara’a i te reo. E tauturu ato’a teie hāro’aro’ara’a ia ’oe ’ia tāu’aparau i te mau huru hō’ē roa o te poro’i nō te Fa’aho’i-fa’ahou-ra’a-mai ma te rāve’a e māramaramahia e te ta’ata.
Hō’ē o te mau mea maita’i a’e ’o tā ’oe e ti’a e rave ’ia roa’a mai te ti’aturira’a ’e te here o te ta’ata, ’o te fa’aturara’a ïa ’e te tauahira’a ïa i tō rātou hīro’a tumu ma te rāve’a au. ’Ua nā reira e rave rahi misiōnare ’aravihi (hi’o 1 Korinetia 9:20-23).
Ha’api’ira’a ta’ata hō’ē ’e ha’api’ira’a ’e te hoa misiōnare
Fa’a’ohipa te mana’o i raro nei nō te tauturu ia ’oe ’ia fa’aineine nō ha’api’i atu i te hō’ē ta’ata e hīro’a tumu ’aore rā e peu tumu ta’a ’ē tōna.
’A feruri i te mau peu tumu ’e te mau ha’apa’ora’a fa’aro’o o te mau ta’ata tā ’outou e ha’api’i nei. ’A ’ite mai i te hō’ē huru o tō rātou orara’a i ma’iri ’o te nenehene e ha’afifi i te hāro’aro’ara’a i te hō’ē parau tumu o te ’evanelia. E fa’anaho i te mau rāve’a nō te ha’api’i ma te māramarama i teie parau tumu.
Te hōro’a o te mau reo
E parau mau te mau hōro’a o te Vārua. E rave rahi fa’a’itera’a tō te hōro’a o te mau reo ’e te ’auvaha-parau-ra’a i te reo. Vetahi o te reira tei roto te paraura’a, te hāro’aro’ara’a ’e te ’auvaha-parau-ra’a i te mau reo. I teie mahana e tae mai te hōro’a o te mau reo, e mea pinepine nā roto i te ha’api’ira’a ’e te tītaura’a i te ’ite e ha’amaita’ihia e te Vārua, nō te tauturu i te mau misiōnare ’ia ha’api’i mai i te reo i roto i tā rātou misiōni.
E fa’a’ite mai te Vārua Maita’i i te parau mau o tō ’oe ’itera’a pāpū, noa atu tē vai ra te mau ’ōti’a o te reo i rotopū ia ’oe ’e te mau ta’ata tā ’oe e ha’api’i ra. ’Oia ato’a, e fa’aha’amana’o mai te Vārua Maita’i ia ’oe i te mau ta’o ’e te mau fa’ahitira’a parau ’e e tauturu ’ia ’oe ’ia māramarama i te mea tā te ta’ata i parau mai ra ma tō rātou ’ā’au.
Nō te rahira’a, e’ita e roa’a ia ’oe i teie mau hōro’a ma te tauto’ora’a ’ore. E ti’a ia ’oe ’ia mā’imi i te reira ma te itoito nō te riro ’ei ha’amaita’ira’a nō vetahi ’ē (hi’o Te Ha’api’ira’a Tumu ’e te mau Fafaura’a 46:8-9, 26). Hō’ē tuha’a o te mā’imira’a i te hōro’a ’oia ho’i te rohira’a ïa ’e te ravera’a mai tā ’oe e nehenehe nō te ha’api’i mai i te reo. ’A fa’a’oroma’i ’a tītau ai ’oe nā roto i te pure i te ’ite ’e i te fa’a’ohipa i te reo. ’A ti’aturi ē, e tauturu mai te Vārua ia ’oe i roto i tā ’oe mau tauto’ora’a itoito. ’Ia roa’a te fa’aro’o ē, e tauturu te hōro’a o te reo ia ’oe, ’oe ’e te feiā tā ’oe e ha’api’i ra.
’Ia fifi ana’e ’oe ’ia parau ma te māramarama maita’i mai tā ’oe e hina’aro ra, ’a ha’amana’o e ti’a roa i te Vārua ’ia paraparau i te ’ā’au o te mau tamari’i a te Atua. ’Ua ha’api’i te peresideni Thomas S. Monson :
« Tē vai nei hō’ē reo tumu […] i te mau misiōnare tāta’itahi ato’a––te reo ïa o te Vārua. ’Aita te reira e ha’api’ihia i roto mai i te mau buka tei pāpa’ihia e te mau ’aivana’a, ’aita ato’a e roa’a nā roto i te tai’ora’a ’e te tāmau-’ā’au-ra’a. E tae mai te reo o te Vārua i te ta’ata e ’imi ma te tōna ’ā’au ato’a ’ia ’ite mau i te Atua ’e ’ia ha’apa’o i i tāna mau fa’auera’a hanahana. E fa’ati’a te pāpū-maita’i-ra’a i te reo ’ia tomo atu nā roto i te mau pārurura’a, ’ia fa’a’oroma’i i te mau tāmatara’a, ’e ’ia ha’aputapū i te ’ā’au o te ta’ata nei » (« The Spirit Giveth Life [E hōro’a te Vārua i te ora », Ensign, Tiunu 1997, 2).
Ha’api’ira’a ta’ata hō’ē ’e ha’api’ira’a ’e te hoa misiōnare
Fa’a’ohipa i te mau fa’ahitira’a parau i muri nei nō te hi’opo’a i tā ’oe mau tauto’ora’a nō te mā’imi i te hōro’a o te mau reo. Pāpa’i i te mau mana’o e tae mai ’e te mau fā nō te tauturu ia ’oe ’ia ha’amaita’i i tā ’oe ha’api’ira’a i te reo.
E tūtava vau ’ia ora ti’amā noa i te Vārua Maita’i ma te ha’apa’ora’a i te mau fa’auera’a, te orara’a i te mau ture misiōni ’e te tātarahapara’a i te mau mahana ato’a. (Te Ha’api’ira’a Tumu ’e te mau Fafaura’a 46:9, 33)
E tītau vau i te ’ite, e rave ’e e fa’a’ohipa o te reo misiōni e ti’a ai i te mau mahana ato’a. (1 Korinetia 12:31)
Mana’o nō te ha’api’i ’e nō te rave
Ha’api’ira’a ta’ata hō’ē
’A hi’o fa’ahou i te mau tauturu nō te reo i ni’a Missionary Portal. ’A ’ite mai i te hō’ē ’ohipa ’o tā ’oe i ’ore i tāmata ’e ’a ha’amau ’ei fā nō te tāmata i te mau mahana i muri nei.
I te ’āpo’ora’a matā’eina’a i muri nei, ’a ani atu i te hō’ē misiōnare tei pāpū maita’i i te reo, ’ia fa’a’ite mai e aha tāna i rave nō te ha’api’i mai i te reo.
Ha’api’ira’a ’e te hoa misiōnare, ’e tāuiuira’a hoa
’A ha’api’ipi’i i te ha’api’i i te tahi ’e te tahi i te ha’api’ira’a misiōnare nā roto i tō ’oe reo misiōni. I te ha’amatara’a, e ha’api’i ’ōhie noa te mau misiōnare ’āpī, te fa’a’itera’a i te ’itera’a pāpū ’e te fa’ahitira’a i te mau pāpa’ira’a mo’a i tāmau-’ā’au-hia. ’A mara’a noa mai ai tō rātou pāpūra’a ’e te ’aravihi, e nehenehe rātou e ’āmui pāpū maita’i mai i roto i te ha’api’ira’a.
’A hi’o fa’ahou i te mau mana’o i roto i teie pene ’e te mau tauturu nō te reo i ni’a Missionary Portal. ’A ’āparau i te mau mana’o ’o tā ’oe e nehenehe e fa’a’ohipa i roto i te ha’api’ira’a ’e te hoa misiōnare i te hepetome i muri nei.
’A ani i tō ’oe hoa misiōnare ’ia fa’aro’o mai i tā ’oe fa’ahitira’a parau ’e ’ia tauturu mai ia ’oe i te ha’amaita’i i te reira. ’A ani iāna ’ia pāpa’i i te mau tupura’a ’ohipa ’aita ’oe i ta’a-maita’i-hia. ’A hāmani i te hō’ē tāpura nō te mau ta’o, mau pereota, ’aore rā mau arata’ireo ’o te nehenehe e tauturu ia ’oe. ’A fa’ata’a ’e ’a ha’api’ipi’i ia ’oe ’ia fa’a’ohipa i te mau mea e vai ra i ni’a i te tāpura i roto i te mau ’ātivite i muri nei.
’A ha’api’ipi’i i te fa’aro’o itoito noa. ’A fa’ata’a i te tahi taime i roto i te mahana, nō te fa’aro’o itoito noa, nō te ’ite mai i te pu’eparau ’e te mau hōho’a tā ’oe i ’apo mai. ’Ia fa’aro’o ana’e ’oe i te hō’ē pereota tei fa’ahiti-ta’a-’ē-hia i tei fa’ahitihia e ’oe, ’a pāpa’i i te reira ’e ’a ha’api’ipi’i.
’A tāpura i te mau mea tā te ta’ata e parau mai i te reira mahana. ’A fa’anaho ’e ’a ha’api’ipi’i i te mau rāve’a tā ’oe e nehenehe e pāhono atu.
’Āpo’ora’a mata’eina’a, ’āmuira’a ārea misiōnare ’e ’āpo’ora’a feiā fa’atere misiōni
E ani i te mau ta’ata tumu o te reo ’ia haere mai i te hō’ē o teie mau ’āpo’ora’a. E ani i te mau misiōnare e ha’api’i ia rātou nā roto i te mau pupu na’ina’i. E ani i te mau ta’ata tumu ’ia tāpa’opa’o ’e ’ia hōro’a mai i tō rātou mana’o nō ni’a i te ’aravihi o te reo o te mau misiōnare.
’A tītau nā mua a’e i te hō’ē ’aore rā e piti misiōnare ’ia fa’a’ite mai i te manuiara’a tā rātou i fa’ari’i i roto i te tītaura’a i te ’ite i te reo.
’A ani i te hō’ē misiōnare pāpū maita’i ’ia vauvau poto mai hō’ē tuha’a o te reo, e fifi rahi mau nō te mau misiōnare. E ani iāna ’ia vauvau mai i te mau hi’ora’a nō te fa’a’ohipa-maita’i-ra’a i te reo, ’e e ani i te mau misiōnare ’ia ha’api’ipi’i i te reira.
E ani i te mau misiōnare o te fenua iho ’ia fa’a’ite mai i tō rātou mau mana’o.
Feiā fa’atere misiōni ’e nā tauturu misiōni
’A fa’aitoito pūai i ni’a i te faufa’a rahi nō te ha’api’ira’a mai i te reo i te mahana tāta’itahi.
E fa’aitoito i te mau misiōnare ’ia fa’a’ohipa i te reo o te misiōni i te mau taime ato’a e ti’a ai.
E hōro’a i te mau tuha’a nō te hō’ē fa’anahora’a tītaura’a i te ’ite i te reo o te misiōni, i roto i te hō’ē tārena tītaura’a i te ’ite maita’i. ’A hi’o fa’ahou i te reira i roto i te mau rurura’a ’āpo’ora’a mata’eina’a.
’A ’imi i te mau rāve’a nō te paraparau ’e te mau misiōnare nā roto i te reo ’o tā rātou e ha’api’i ra. ’A uiui pinepine ia rātou nā roto i te reira reo.
’A ani atu i te feiā fa’atere o te fenua iho ’e i te mau melo i te mau mana’o, e nāhea i te tauturu i te mau misiōnare ’ia fa’ananea atu ā i tō rātou ’aravihi i te reo.
’A hōro’a i te arata’ira’a i roto i te ’āmuira’a ārea misiōnare ’aore rā te ’āpo’ora’a feiā fa’atere misiōni, nō te mau hapehape tāmau e rave-pinepine-hia nei e te mau misiōnare e ha’api’i nei i te reo o te misiōni.
’A ha’api’i i te mau misiōnare nō ni’a i te mau hōro’a pae vārua.
’A hi’o maita’i i te mau misiōnare ’ia ha’api’i ana’e rātou nā roto i te reo o te misiōni.