« Pene 6 : Tītau i te huru mai tō te Mesia », ’Ia poro haere i tā’u nei ’Evanelia : E arata’i nō te fa’a’ite i te ’evanelia a Iesu Mesia (2023)
Pene 6 », ’Ia poro haere i tā’u nei ’Evanelia
Hōho’a
Te pi’ira’a i te feiā rava’āi (Te pi’ira’a te Mesia ia Petero ’e ia Anederea), nā Harry Anderson
Pene 6
Tītau i te huru mai tō te Mesia
’A feruri i teie
Nāhea te tītaura’a i te huru mai tō te Mesia i te tauturu iā’u ’ia fa’aoti i tā’u fā ’ei misiōnare ?
Nāhea vau i te rave nā mea e piti te tītau ’e te fa’ari’i te mau huru mai tō te Mesia ?
E aha te huru ’aore rā te mau huru mai tō te Mesia e ti’a iā’u e rōtahi atu i teienei ?
Parau ’ōmuara’a
I te ha’amatara’a o tāna misiōni i te tahuti nei, tē haere ra nā te pae tāhata’i o te miti nō Galilea ’e ’ua pi’i atu ra i nā ta’ata rava’āi e piti, ’o Petero ’e ’o Anederea. « ʼA peʼe mai iā’u », ’ua parau ’oia, « e faʼariro vau ia ʼōrua ʼei ravaʼāi taʼata » (Mataio 4:19 ; hi’o ato’a Mareko 1:17).
’Ua pi’i ato’a te Fatu ia ’oe nō tāna ’ohipa, ’e tē ani manihini nei ’oia ia ’oa ’ia pe’e iāna. « E aha tō ’outou huru e au ai ? » Tāna ïa uira’a. « ’Āmene, e parau atu vau ia ’outou, mai tō’u nei ïa » (3 Nephi 27:27).
Te tahi mau pene i roto i te ’Ia poro haere i tā’u nei ’Evanelia e rōtahi nei i ni’a i te mea tā ’oe e ti’a ’ia rave ’ei misiōnare, nāhea ’ia tuatāpapa, nāhea ’ia ha’api’i ’e nāhea ’ia ha’amau i te mau fā. ’O vai ’outou ’e ’o vai tā ’outou e riro mai ’ua riro ’ei mea faufa’a ato’a i te mea tā ’oe e rave nei. ’O teie te rōtahira’a o teie nei pene.
Tē fa’a’ite nei te mau pāpa’ira’a mo’a i te mau huru mai tō te Mesia ’o tā ’oe e tītau ’ei misiōnare ’e i te roara’a o tō ’oe orara’a. Te huru mai tō te Mesia ’o te hō’ē ïa maita’i ’aore rā hō’ē huru nātura ’e te ti’ara’a o te Fa’aora. Tē fa’ata’a nei tei pene i te tahi o teie mau huru. ’A tuatāpapa i te reira ’oia ato’a te mau pāpa’ira’a mo’a e tū’ati i te reira. ’A ’imi mai i te tahi atu mau huru mai tō te Mesia ’a tuatāpapara’a ai ’oe i te tahi atu mau ’īrava o te pāpa’ira’a mo’a.
Ha’api’ira’a ta’ata hō’ē
Tai’o Te Ha’api’ira’a Tumu ’e te mau Fafaura’a 4. E aha te mau huru tā te Fatu i fa’ata’a e riro ’ei mea faufa’a roa nō te mau misiōnare. Nāhea te ’imira’a i teie mau huru i te tauturu ia ’oe ’ia tāpae i tā ’oe fā ’ei misiōnare ?
« ’Imi i teie Iesu »
’Ua a’o mai te peropheta Moroni, « tē fa’aue atu nei au ia ’outou ’ia ’imi i teie nei Iesu ’o tā tē mau peropheta ’e te mau ’āpōsetolo i pāpa’i ra ».Etera 12:41). Hō’ē rāve’a faufa’a roa nō te ’imi ia Iesu ’o te tauto’ora’a ïa ma te itoito, nō te ’apo rahi mai nō ni’a iāna ’e ’ia riro hau atu mai iāna te huru. Tā ’oe misiōni ’o te taime tano mau nō te rōtahi ia ’oe i ni’a i te reira.
’A tūtava ai ’oe ’ia riro hau atu mai te Mesia, e rave fa’aoti maita’i a’e ’oe i tā ’oe fā ’ei misiōnare. E fa’ari’i ’oe i te ’oa’oa, te hau, ’e te tupura’a rahi i te pae vārua, ’a riro mai ai teie mau huru ’ei tuha’a rahi nō tō ’oe ti’ara’a. E patu ato’a ’oe i te hō’ē niu nō te pe’e tāmaura’a iāna i roto i tō ’oe orara’a.
Mau hōro’a nō ’ō mai i te Atua ra
Te mau huru mai tō te Mesia e mau hōro’a ïa nō ’ō mai i te Atua ra. Mai te mau mea maita’i ato’a, e tae mai teie mau hōro’a nā roto mai i « te maita’i o te Atua Metua, ’e tō te Fatu ra ’o Iesu Mesia, ’e tō te Vārua Maita’i » (Etera 12:41).
’A fa’atōtonu i ni’a i te Mesia ’a ’imi ai ’oe i te fa’ananea i tōna mau huru (hi’o Te Ha’api’ira’a Tumu ’e te mau Fafaura’a 6:36). ’Aita teie mau huru i te mau ’ohipa nō ni’a i te hō’ē tāpura fa’aterera’a. E ’ere i te mau rāve’a ’o tā ’oe e fa’ananea i roto i te hō’ē fa’anahora’a ha’amaita’ira’a ia ’oe iho. ’Aita te reira e roa’a mai nā roto noa i te tītaura’a a te ta’ata iho. Maoti rā, e nehenehe ’oe e fa’ari’i i te reira ma te tūtavara’a ’ia riro ’ei hō’ē pipi ha’apa’o maita’i a Iesu Mesia.
’A pure ’ia ha’amaita’i mai te Atua ia ’oe ma teie mau huru. ’Ia ’ite ma te ha’eha’a i tō ’oe paruparu ’e tō ’oe hina’aro i tōna mana i roto i tō ’oe orara’a. ’A nā reira ai ’oe, « e fa’ariro [’oia] i te mau mea paruparu ’ei mea pūai nō [’oe] » (Etera 12:27).
E fa’anahora’a tāmau
E fa’anahora’a tāmau te riro hau atu ā mai te Fa’aora te huru nō te orara’a tā’āto’a. Ma te hina’aro ’ia auhia e te Atua, ’a ha’amaita’i i te hō’ē fa’aotira’a i te hō’ē ā taime.
’Ia fa’a’oroma’i ia ’oe iho. ’Ua ’ite te Atua ē, e tītauhia te taime nō te taui ’e nō te tupu i te rahi. E māuruuru ’oia nō te ’oe hina’aro mau ’e e ha’amaita’i mai ia ’oe nō te tauto’ora’a tāta’itahi tā ’oe e rave.
’A ’imi noa ai ’oe ’ia riro hau atu mai te Mesia te huru, e taui tō ’oe mau hīa’ai, tō ’oe mau mana’o, ’e tā ’oe mau ravera’a. Nā roto i te Tāra’ehara a Iesu Mesia ’e te mana o te Vārua Maita’i, e maita’i mai tō ’oe nātura (hi’o Mosia 3:19).
Hōho’a
Parley P. Pratt
E fa’ananea te Vārua Maita’i ’e e fa’arahi i tō tātou mau ’aravihi. « E fa’auru [’oia] i te vi’ivi’i ’ore, te hāmani maita’i, te maita’i, te here, te marū ’e te aroha.… Ha’apoto noa, e au ra mai te puo i roto i te mau ivi, te ’oa’oa i te ’ā’au, te māramarama i te mata, te pehe i te tari’a ’e te ora i te ta’ata nei » (Parley P. Pratt, Key to the Science of Theology [1855], 98–99).
’Imira’a pāpa’ira’a mo’a
E aha tā teie mau pāpa’ira’a mo’a e ha’api’i nei nō ni’a i te pe’era’a i te hi’ora’a ’o Iesu Mesia ?
Arise and Walk [’A ti’a ’e ’a haere], nā Simon Dewey
Fa’aro’o ia Iesu Mesia
Nō te arata’i te fa’aro’o i te fa’aorara’a, e ti’a ia ’oe e fa’atumu i te reira i ni’a ia Iesu Mesia (hi’o Te ’Ohipa 4:10–12 ; Mosia 3:17 ; Moroni 7:24–26). ’Ia roa’a ana’e tō ’oe fa’aro’o i te Mesia, e ti’aturi ’oe iāna ’ei Tamaiti Fānau Tahi nā te Atua. ’Ua pāpū ia ’oe ē ’a tātarahapa ai ’oe e fa’a’orehia tā ’oe mau hara maoti tāna tūsia tāra’ehara ’e e ha’amo’ahia ’oe te Vārua Maita’i (hi’o 3 Nephi 27:16, 20).
E ’ere te fa’aro’o i te ’ite pāpū mau. ’Ua riro rā ’ei ha’apāpūra’a nō ’ō mai i te Vārua ra, nō te mau mea ’aore i ’ite-mata-hia e ’oe e parau mau rā. (Hi’o Alama 32:27)
E fa’a’ite ’oe i tō ’ore fa’aro’o nā roto i te ’ohipa. Teie mau ’ohipa tei roto te pe’era’a i te mau ha’api’ira’a ’e te hi’ora’a o te Fa’aora. Tei roto ato’a te tāvinira’a ia vetahi ’ē ’e te tauturura’a ia rātou ’ia pe’e i te Mesia. E fa’a’ite ato’a ’oe i tō ’oe fa’aro’o ma te itoito, te tātarahapa ’e te here.
E parau tumu nō te mana te fa’aro’o. ’A fa’a’ohipa ai ’oe i te fa’aro’o ia Iesu Mesia, e ha’amaita’ihia ’oe e tōna mana e tano i tō ’oe huru orara’a. E nehenehe ’oe e ora i te mau temeio ’ia au i te hina’aro o te Fatu. (Hi’o Iakoba 4:4–7 ; Moroni 7:33 ; 10:7.)
E tupu tō ’oe fa’aro’o ia Iesu Mesia i te rahi ’a mātau ri’i noa ai ’oe iāna ’e tāna mau ha’api’ira’a. E tupu rahi mai te reira ’a tuatāpapa ai ’oe i te mau pāpa’ira’a mo’a, ’a pure ai ma te ’ā’au tae, ’e ’a ha’apa’o ai i te mau fa’auera’a. E vāvahi te fē’a’a ’e te hara i te fa’aro’o.
Hōho’a
Elder Neil L. Andersen
« E ’ere te fa’aro’o i te hō’ē noa mana’o, e fa’aotira’a rā. Ma te pure, te tuatāpapara’a, te ha’apa’o ’e te mau fafaura’a, e patu tātou ’e e ha’apūai i tō tātou fa’aro’o. E riro tō tātou fa’aro’o i te Fa’aora ’e i tāna ’ohipa o te mau mahana hope’a nei ’ei ’ōpuara’a pūai nō roto i te reira tātou e ha’avā ai i te mau mea ato’a. ’E ’ia topa tātou i roto i te fifi rahi o te orara’a,…e roa’a ia tātou te pūai ’ia pe’e i te ’ē’a mau » (Neil L. Andersen, « E parau mau, e ’ere ānei ? Nō reira e aha atu ā ïa ? » Liahona, Mē 2007, 74).
Risen Hope [Te tīa’ira’a i ti’a fa’ahou mai], nā Joseph Brickey
Tīa’ira’a
E ’ere te tīa’ira’a i te hō’ē noa tītaura’a mo’a. ’Ua riro māori rā ’ei ti’aturira’a tāmau, tei fa’atumuhia i ni’a i tō ’oe fa’aro’o i te Mesia, ē e tāpe’a te Atua i te mau parau fafau tāna i rave (hi’o Moroni 7:42). E tīa’ira’a te reira « nō te mau mea maitata’i a muri nei » i te Mesia (Hebera 9:11).
Tō ’oe tumu o te tīa’ira’a o Iesu Mesia ïa. ’Ua ui te peropheta Moromona ē : « ’E aha tā ’oe e tīa’i nei ? » I reira pāhono a’era ’oia, « ’ia vai tō ’outou ti’aturira’a i te tāra’ehara a te Mesia ’e i te mana nō tōna ti’afa’ahoura’a, ’ia fa’ati’ahia nō te fa’ari’i i te ora mure ’ore, ’e te tumu nō te reira nō tō ’outou ïa fa’aro’o iāna mai te au i tei parauhia mai ra » (Moroni 7:41 ; hi’o ’īrava 40–43).
’A fa’atumu ai ’oe i tō ’oe tīa’ira’a i te Mesia, e roa’a ia ’oe te ha’apāpūra’a ē, e maita’i te mau mea ato’a nō ’oe (hi’o Te Ha’api’ira’a Tumu ’e te mau Fafaura’a 90:24). E tauturu teie ha’apāpūra’a ia ’oe ’ia tāpe’a noa ma te fa’aro’o ’ia fa’aruru ana’e ’oe i te mau tāmatara’a. E nehenehe ato’a te reira e tauturu ia ’oe ’ia mātara mai i te mau tāmatara’a ’e ’ia fa’ananea i tō ’oe ’āteura’a ’e tō ’oe pūai pae vārua. E hōro’a mai te tīa’ira’a i te tūtau nō tō ’oe vaerua (hi’o Etera 12:4).
Hō’ē rāve’a nō te fa’arahi i te tīa’ira’a ’o te tātarahapara’a ïa. E fa’atupu ’e e fa’aora te rirora’a ’ei mea mā ’e te fa’a’orera’a i te hara nā roto i te tūsia tāra’ehara a Iesu Mesia, i te tīa’ira’a (hi’o Alama 22:16).
’Ua a’o Nephi, « ’ia haere māite ’outou i mua i te ti’a-māite-ra’a i te Mesia, ma te ti’aturi pāpū roa, ’e te here i te Atua ’e te ta’ata ato’a » (2 Nephi 31:20). ’A ora ai ’oe i te ’evanelia, e tupu ’oe i te rahi i roto i tō ’oe ’aravihi nō te « noa’a te ti’aturira’a » (Roma 15:13).
Hōho’a
Peresideni Dieter F. Uchtdorf
« I te mau taime pe’ape’a, e nehenehe tā tātou e tāpe’a pa’ari i ni’a i te tīa’ira’a ē, ‘e ’ohipa ’āmui mai te mau mea ato’a ’ei maita’i nō [tātou]’ ’a pe’e ai tātou i te a’o a te mau peropheta a te Atua. Teie huru tīa’ira’a i roto i te Atua, tōna maita’i ’e tōna mana, nā te reira e hōro’a fa’ahou ia tātou i te itoito i roto i te mau tītaura’a fifi, ’e ’ia hōro’a i te pūai i te feiā e mana’o rā ē, tei rotopū rātou i te mau papa’i o te mata’u, o te mana’o tapitapi, ’e o te ahoaho » (Dieter F. Uchtdorf, « Te mana fāito ’ore o te tīa’ira’a », Liahona, Novema 2008, 23).
’Imira’a pāpa’ira’a mo’a
E aha te tīa’ira’a ’e e aha tā tātou e tīa’i nei ?
Christ and the Children [Te Mesia ’e te mau tamari’i], nā Minerva Teichert
Te aroha ’e te here
I te hō’ē taime ’ua ui te hō’ē ta’ata ia Iesu, « e Rabi, tei hea te parau rahi i roto i te ture ? » ’Ua parau atu ra Iesu : « Hina’aro ’oe i tō Atua ia Iehova ma tō ’ā’au ato’a, ’e ma tō vārua ato’a, ’e ma tō mana’o ato’a. ’O te ture mātāmua teie ’e te hau i te rahi. ’E mai te reira ato’a te piti, e aroha atu ’oe i tō ta’ata tupu, mai tō aroha ia ’oe iho na » (Mataio 22:36–39).
Te aroha ’o « te here ateate ïa o te Mesia » (Moroni 7:47). Tei roto i te reira te here mure ’ore o te Atua nō tāna mau tamari’i ato’a.
’Ua ha’api’i te peropheta Moroni, « ’a pure atu i te Metua ma te pūai hope roa o te ’ā’au ’ia ’ī ’outou i teie nei here » (Moroni 7:48). ’A pure ai ’oe nō te fa’a’ī te aroha i tō ’oe ’ā’au, e tāmata ’oe i te here o te Atua. E rahi atu tō ’oe here nō te ta’ata ’e e putapū ’oe i te mana’ona’ora’a mau nō tō rātou ’oa’oa mure ’ore. E hi’o ’oe ia rātou mai te mau tamari’i nā te Atua, ma te fāito pūai nō te riro mai mai iāna te huru, ’e e ’ohipa ’oe nō rātou.
’A pure ai ’oe nō te hōro’a o te aroha, e iti mai tō ’oe mana’o ’ia fa’ataere i ni’a i te mau ’āehuehu au ’ore, mai te ’iriā ’aore rā te fe’i’i. E iti mai tō ’oe mana’o e ha’avā ’aore rā e fa’ahapa ia vetahi ’ē. E hina’aro rahi ’oe e tāmata i te hāro’aro’a ia rātou ’e tō rātou mau mana’o. E fa’a’oroma’i atu ā ’oe ’e e tāmata i te tauturu i te ta’ata tei roto a’e rātou i te fifi ’aore rā te tarapape. (Hi’o Moroni 7:45.)
E arataʼi te aroha mai te faʼaroʼo i te ravera’a. E ha’apāutuutu ’oe i te reira ma te tāvinira’a ia vetahi ’ē ’e ma te hōro’ara’a ia ’oe iho.
E fa’ataui te aroha. E hōro’a te Metua i te ao ra i te reira « i te mau ta’ata ato’a ’o tei pe’e mau i tāna Tamaiti ia Iesu Mesia […] ’ia fā mai ’oia ra, e riro ïa tātou mai iāna ra te huru […] ’ia tāmāhia ho’i tātou ato’a mai iāna i mā ra » (Moroni 7:48).
Tē parau nei te Hīro’a Fa’aro’o ē, « Tē ti’aturi nei mātou […] ’ia ora […] ma te vi’ivi’i ’ore » (1:13). Te vi’ivi’i ’ore e hōho’a ïa o te ferurira’a ’e te huru i fa’atumuhia i ni’a i te mau ture morare teitei. ’O te ha’apa’ora’a maita’i ïa i te Atua ’e ia vetahi ’ē. Hō’ē tuha’a faufa’a roa o te vi’ivi’i ’ore ’oia ho’i te tūtavara’a ’ia vai mā ’e ’ia vai ateate i te pae vārua ’e i te pae tino.
E hotu mai te vi’ivi’i ’ore nā roto mai i tō ’oe ferurira’a ’e tō ’oe mau hīa’ai. « ’Ia fa’a’una’una noa te parautia i tō ’oe ferurira’a i te mau taime ato’a », ’ua parau te Fatu (Te Ha’api’ira’a Tumu ʼe te mau Fafaura’a 121:45). ’A rōtahi i ni’a i te mau ferurira’a parauti’a ’e te fa’ateitei. ’A fa’a’ore i te mau ferurira’a tano ’ore i tō ’oe vaerua ’eiaha ra e fa’atūtonu noa i ni’a i te reira.
’Ua riro tō ’oe ferurira’a mai te hō’ē teata ta’ata ora. Mai te peu e fa’ati’a ’oe i te mau ferurira’a tano ’ore ’ia fa’atūtonu i ni’a i te tahua teata o tō ’oe ferurira’a, e ’oi’oi atu ā ’oe i te rave i te hara. Mai te peu e fa’a’ī itoito ’oe i tō ’oe ferurira’a i te mau mea ateate, e ’oi’oi atu ā ’oe i te rave tāmau i te mau mea vi’ivi’i ’ore ’e e ’ape i te mea ’ino. ’A ara maita’i i te mea tā ’oe e fa’ati’a ’ia tomo ’e ’ia fa’aea i ni’a i te tahua teata o tō ’oe ferurira’a.
’A tūtava ai ’oe ’ia ora i te hō’ē orara’a vi’ivi’i ’ore, « ’ei reira tō ’oe ti’aturira’a e pūai roa ai i mua i te aro o te Atua ; ’e […] e riro te Vārua Maita’i ’ei ’āpiti nō ’oe i te mau taime ato’a » (Te Ha’api’ira’a Tumu ’e te mau Fafaura’a 121:45–46).
Arata’i nō te mau pāpa’ira’a mo’a : « Vi’ivi’i ’ore »
Hapa ’ore
Te hapa ’ore nō roto mai ïa i te ture rahi mātāmua ’ia here i te Atua (hi’o Mataio 22:37). Nō tō ’oe here i te Atua, ’ua vai hapa ’ore noa ’oe iāna i te mau taime ato’a. Mai te mau tamaiti a Helamana, e « haere [’oe] ma te parauti’a i mua iāna » (Alama 53:21).
’Ia vai hapa ’ore ana’e ’oe, e ta’a ia ’oe ē tē vai ra te maita’i ’e te ’ino ’e tē vai ra te hō’ē parau mau pāpū––te parau mau a te Atua. E fa’a’ohipa ’oe i tō ’oe ti’amāra’a nō te mā’iti mai te au i te parau mau a te Atua, ’e e tātarahapa ’oi’oi noa ’oe ’ia ’ore ana’e ’oe e nā reira. Te mea tā ’oe e mā’iti i te feruri––’e te mea tā ’oe e rave ’ia mana’o ana’e ’oe ē ’aita e ta’ata e hi’o mai ra––e fāito pūai ïa nō tō ’oe hapa ’ore.
Hōho’a
Daniela i roto i te ’āpo’o o te mau liona, nā Clark Kelley Price.
Te aura’a o te hapa ’ore, e’ita ’oe e tu’u i te hiti tā ’oe mau fa’aturera’a ’aore rā tō ’oe huru nō te ha’afa’ahiahia ’aore rā ’ia fa’ari’ihia mai e vetahi ’ē. E rave ’oe i te mea tano, noa atu e fa’a’ō’o’ohia ’oe e vetahi ’ē nō tō ’oe hina’aro ’ia vai ha’apa’o noa i te Atua (hi’o 1 Nephi 8:24–28). E ora ’oe ma te tura i roto i te mau vāhi ato’a, ’oia ato’a i te huru ’a fa’a’ite ai ’oe ia ’oe iho i ni’a i te natirara.
’Ia vai hapa ’ore ana’e ’oe, e ha’apa’o ’oe i tā ’oe mau fafaura’a ’e te Atua ’oia ato’a i tā ’oe mau tītaura’a tano ’e vetahi ’ē.
Tei roto te hapa ’ore te vai ha’avare-’ore-ra’a i te Atua, ia ’oe iho, i tō ’oe feiā fa’atere, ’e ia vetahi ’ē. ’Aita ’oe e ha’avare, e ’eiā, e tāviri, ’aore rā e fa’ahema. ’Ia rave ana’e ’oe i te hō’ē ’ohipa hape, e fa’ari’i ’oe i te hōpoi’a ’e e tātarahapa ’oe ’eiaha rā e tāmata i te fa’ati’a ’aore rā i te hāmani i te mana’o.
’A ora ai ’oe ma te hapa ’ore, e ’ite ’oe i te hau ’o roto ’e te fa’atura ia ’oe iho. E ti’aturihia ’oe e te Atua ’e e vetahi ’ē.
’Imira’a pāpa’ira’a mo’a
Nāhea Iesu i te fa’a’itera’a i te hapa ’ore e tae noa atu i roto i tōna mau taime fifi rahi mau ?
Add to Faith, Virtue [’A ’āmui te fa’aro’o, te vi’ivi’i ’ore], nā Walter Rane
’Ite
’Ua a’o mai te Fatu, « ’a ’imi ho’i i te ’ite, ’oia ïa nā roto i te ha’api’i ’e nā roto ato’a i te fa’aro’o » (Te Ha’api’ira’a Tumu ’e te mau Fafaura’a 88:118). I roto i tā ’oe misiōni ’e i te roara’a o tō ’oe orara’a, ’a ’imi i te ’ite, te ’ite pae vārua iho ā rā.
’A tuatāpapa i te mau pāpa’iraa mo’a i te mau mahana ato’a, ’oia ato’a te mau parau a te mau peropheta ora. Nā roto i te tuatāpapara’a ’e te pure, ’a ’imi i te tauturu nō te mau uira’a, te mau tāmatara’a ’e i te mau rāve’a ta’a ’ē. ’A ’imi i te mau ’īrava o te pāpa’ira’a mo’a ’o tā ’oe e nehenehe e fa’a’ohipa nō te ha’api’ira’a ’e nō te pāhonora’a i te mau uira’a nō ni’a i te ’evanelia.
’A tuatāpapa itoito ai ’oe ’e nā roto i te pure, e ha’amāramarama mai te Vārua Maita’i i tō ’oe ferurira’a. E ha’api’i ’oia ia ’oe ’e e hōro’a ia ’oe te hāro’aro’ara’a. E tauturu ’oia ia ’oe ’ia fa’a’ohipa i te mau ha’api’ira’a o te mau pāpa’ira’a mo’a ’e a te mau peropheta o te mau mahana hope’a nei i roto i tō ’oe orara’a. Mai ia Nephi, e nehenehe ’oe e parau :
« Nō te mea tē ’oa’oa nei tō’u vārua i te mau pāpa’ira’a mo’a, ’e tē feruri hōhonu nei tō’u ’ā’au i te reira… Inaha, tē ’oa’oa nei tō’u vārua i te mau mea a te Fatu ; ’e tē feruri tāmau noa nei ā tō’u ’ā’au i te mau mea tā’u i hi’o ’e tā’u i fa’aro’o » (2 Nephi 4:15–16).
’Imira’a pāpa’ira’a mo’a
Nāhea te ’ite e nehenehe ai e tauturu ia ’oe i roto i te ’ohipa a te Fatu ?
Te fa’a’oroma’i ’o te ’aravihi ïa ’ia ti’aturi i te Atua i mua i te fa’ataimera’a, te pāto’ira’a, ’aore rā te māuiui. Nā roto i tō ’oe fa’aro’o, e ti’aturi ’oe i te tārena a te Atua ’ia tupu te mau ha’amaita’ira’a i fafauhia.
’Ia roa’a ana’e ia ’oe te fa’a’oroma’i, e hi’o ’oe i te orara’a ma te hi’ora’a ātea mure ’ore. ’Aita ’oe e tīa’i i te mau ha’amaita’ira’a ’aore rā i te mau fa’ahope’ara’a vitiviti. E tupu tō ’oe mau hina’aro parauti’a « i te a’o nā ni’a iho i te a’o […] te tahi vāhi iti i’ō nei ’e te tahi vāhi iti i’ō atu » (2 Nephi 28:30). E nehenehe vetahi mau hina’aro parauti’a e ’ore e tupu e tae roa i muri a’e i teie orara’a.
E ’ere te fa’a’oroma’i i te fa’atau ’aore rā i te fa’ari’i-noa-ra’a. ’O te « rave ’ana’anatae [’oe] i te mau mea ato’a i roto i tō [’oe] mana », ’a tāvini ai ’oe i te Atua (Te Ha’api’ira’a Tumu ’e te mau Fafaura’a 123:17). E tanu ’oe, e pīpī i te pape, ’e e fa’atāmā’a i te hūero, ’e e hōro’a mai te Atua i te tupura’a « te tahi vāhi iti » (Alama 32:42 ; hi’o ato’a 1 Korinetia 3:6–8). E ’ohipa ’oe ma te ’āpitihia ’e te Atua, ma te ti’aturi ē, ’ia rave ana’e ’oe i tā ’oe tuha’a, e fa’atupu ’oia i tāna ’ohipa mau te au i tōna taime ’e mai te au i te ti’amāra’a ’ia mā’iti o te ta’ata tāta’itahi.
Te aura’a ato’a o te fa’a’oroma’i ’oia ho’i ’ia ’ore ana’e te hō’ē ’ohipa e ti’a ’ia tauihia, e fa’ari’i ’oe te reira ma te itoito, te aroha ’e te fa’aro’o.
’A fa’ananea i te fa’a’oroma’i ’e vetahi ’ē, ’oia ato’a tō ’oe hoa misiōnare ’e te feiā ’o tā ’oe e tāvini nei. ’Ia fa’a’oroma’i ato’a ia ’oe iho. ’A tūtava ’ia roa’a mai tō ’oe maita’i roa a’e ma te ’itera’a ē, e tupu ’oe i te rahi te tahi vāhi iti ’e te tahi vāhi iti.
Mai te tahi atu mau huru mai tō te Mesia, te tupura’a i te rahi ma te fa’a’oroma’i e fa’anahora’a ïa nō te roara’a o te orara’a. E nehenehe te fa’a’ohipara’a i te fa’a’oroma’i e riro ’ei fa’aurura’a fa’aora i ni’a i tō ’oe vaerua ’e i ni’a i te feiā e ha’aati ra ia ’oe.
Hōho’a
Peresideni Dieter F. Uchtdorf
« Te fa’a’oroma’i ’o te tīa’i-itoito-ra’a ïa ’e te tāpe’a-noa-ra’a ïa. Te aura’a [o te amora’a ïa i te ’ohipa ma te ’imi i te mau rāve’a ato’a e mara’a ai ia tātou—nā roto i te ravera’a i te ’ohipa, te tīa’ira’a i te mea maita’i ’e te fa’a’ohipara’a i te fa’aro’o ; te fa’arurura’a i te mau ’ati ma te ’ā’au itoito, noa atu ’aita te mau hia’ai o tō tātou ’ā’au e tupu i te reira taime. Te fa’a’oroma’i e ’ere ïa i te tāpe’ara’a ē tae noa atu i te hope’a ; ’o te tāpe’a-māite-ra’a rā ē tae noa atu i te hope’a ». (Dieter F. Uchtdorf, « Tāmau noa i te fa’a’oroma’i », Liahona,, Mē 2010, 57).
In Favour with God (Jesus Praying with His Mother) [Nō te aroha o te Atua (Iesu e pure ra ’e tōna metua vahine)], nā Simon Dewey
Ha’eha’a
Te ha’eha’a ’o te hina’aro mau ïa ’ia auraro i te hina’aro o te Fatu. ’O te hina’aro mau ’ia fa’ahanahana iāna nō te ’ohipa ato’a tei fa’aotihia. ’O te ha’api’ira’a ïa iāna iho (hi’o Te Ha’api’ira’a Tumu ’e te mau Fafaura’a 136:32). Tei roto i te ha’eha’a te ’ā’au mēhara nō te mau ha’amaita’ira’a a te Atua ’e te māuruuru rahi nō tō ’oe hina’aro tāmau i tāna tauturu. E tauturu ’oia i te feiā tei ha’eha’a.
E tāpaʼo te ha’eha’a nō te pūai pae vārua, ’eiaha rā nō te paruparu. E tao’a ha’apūai faufa’a roa te ha’eha’a nō te tupura’a pae vārua (hi’o Etera 12:27).
’Ia ti’aturi ha’eha’a ana’e ’oe i te Atua, e nehenehe ’oe e pāpū ē, ’ua riro tāna mau fa’auera’a ’ei maita’i nō ’oe. E pāpū ia ’oe ē, e nehenehe ’oe e rave i te mau mea ato’a tāna e tītau ia ’oe, mai te peu e tūru’i ’oe i ni’a iāna. ’Ua ineine ato’a ’oe nō te ti’aturi i tāna mau tāvini ’e ’ia pe’e i tā rātou mau a’o. E tauturu te ha’eha’a ia ’oe ’ia ha’apa’o, ’ia ’ohipa pūai ’e ’ia tāvini.
Te parau pāto’i o te ha’eha’a ’o te te’ote’o ïa. Te aura’a o te te’ote’o ’o te ti’aturira’a ïa iāna iho ’eiaha rā i te Atua. Te aura’a ato’a o te reira ’o te tu’ura’a ïa i te mau mea o te ao nei i ni’a a’e i te mau mea a te Atua. E vārua tata’u tō te te’ote’o ; e ’imi te feiā te’ote’o ’ia roa’a hau a’e tā rātou ’e e fa’ahua ē e mea maita’i a’e rātou ia vetahi ’ē. E ’ōfa’i turorira’a te te’ote’o.
Paulo, te ’āpōsetolo, e ha’api’i ra i te naho’a ta’ata
Itoito
Te itoito e tauto’ora’a tāmau ’e te pāpū. I roto i te ’ohipa misiōnare, e fa’a’itera’a te itoito nō te ’oe here i te Fatu. ’Ia fa’a’ite ana’e ’oe i te itoito, e ’ite mai ’oe i te ’oa’oa ’e te ha’amāuruuru i roto i te ’ohipa a te Fatu (hi’o Alama 26:16).
Te itoito ’o te ravera’a ïa e rave rahi ’ohipa ma tō ’oe hina’aro mau, ’eiaha rā e tīa’i i te feiā fa’atere ’ia parau mai ia ’oe i te mea e rave (hi’o Te Ha’api’ira’a Tumu ’e te mau Fafaura’a 58:27–29).
’A tāmau noa i te rave i te maita’i noa atu e mea fifi ’aore rā ’ua rohirohi roa ’oe. Terā rā, ’a ha’amana’o i te faufa’a o te au maita’i ’e ’o te fa’aeara’a ’ia ’ore ’oe « ’ia horo ’oi’oi atu i tei au i [tō ’oe] ra pūai » (Mosia 4:27).
’A rōtahi i tō ’oe māfatu ’e tō ’oe ’ana’anatae i ni’a i te Fatu ’e tāna ’ohipa. ’A ’ape i te mau mea ’o te fa’a’ōnevaneva ia ’oe i tā ’oe mau tītaura’a mātāmua. ’A fa’atumu i tō ’oe taime ’e tā ’oe mau tauto’ora’a i ni’a i te mau ’ātivite ’o te riro mai ’ei mea faufa’a roa a’e i roto i tō ’oe tuha’a fenua ’e ’o te hina’arohia e te mau ta’ata tā ’oe e ha’api’i nei.
Hōho’a
Peresideni Henry B. Eyring
« ’O te ’Ēkālesia teie a te Fatu. ’Ua pi’i ’e ’ua ti’aturi ’oia ia tātou noa atu ’ua ’ite ’oia i tō tātou mau paruparu. ’Ua ’ite ’oia i te mau tāmatara’a tā tātou e fa’aruru nei. Nā te tāvinira’a ha’apa’o maita’i ’e maoti tāna tāra’ehara, e nehenehe tātou e hina’aro i te mea tāna e hina’aro ’e ’ia riro mai te ti’a ia tātou ’ia riro mai, nō te ha’amaita’i i te feiā tā tātou e tāvini nei nōna. ’A tāvini maoro ai tātou iāna ’e ma te itoito, e tauihia tātou. E nehenehe tātou e riro hau atu ā mai iāna te huru » (Henry B. Eyring, « ’Ohipa ma te itoito », Liahona, Mē 2010, 62–63).
Two Thousand Young Warriors (Two Thousand Stripling Warriors) [Piti tauatini fa’ehau feiā ’āpī (Piti tauatini taure’a fa’ehau)], nā Arnold Friberg
Ha’apa’o
Tā ’oe tāvinira’a ’ei misiōnare e fa’arahira’a ïa i te mau fafaura’a tā ’oe i rave ’e te Atua, i te bāpetizora’a ’e i te hiero. ’Ia fa’ari’i ana’e ’oe i te mau ’ōro’a o te bāpetizora’a ’e te ’ōro’a hiero, ’ua fafau ’oe e ha’apa’o i tāna mau fa’auera’a.
’Ua ha’api’i te ari’i Beniamina ē : « ’Ua hina’aro ho’i au ’ia ha’amana’o ’outou i te huru ha’amaita’ihia ’e te ’oa’oa o te feiā e ha’apa’o i te mau fa’auera’a a te Atua. Inaha ho’i, ’ua ha’amaita’ihia rātou i roto i te mau mea ato’a, i te pae tino ’e te pae vārua ato’a ho’i ; ’e mai te mea e ha’apa’o maita’i noa rātou ē tae noa atu i te hōpe’a ra, e fa’ari’ihia ïa rātou i te ao ra, ’e e pārahi rātou i pīha’i iho i te Atua i roto i te ’oa’oa hope ’ore ra ». (Mosia 2:41).
Te ha’apa’ora’a i te mau fa’auera’a ’o te hō’ē ïa fa’a’itera’a o te here nō te Metua i te ao ra ’e nō Iesu Mesia (hi’o Ioane 14:15). ’Ua parau Iesu, « i ha’apa’o ’outou i tā’u ra parau, e vai herehia atu ā ’outou e au ; mai iā’u i ha’apa’o i te parau a tā’u Metua ra, ’e te vai herehia nei ā vau e ana » (Ioane 15:10).
Pe’e i te mau arata’ira’a i roto Règles missionnaires pour les disciples de Jésus-Christ [Te mau ture misiōnare nō te mau pipi a Iesu Mesia]. E pe’e ato’a i te parau a’o a tō ’oe peresideni misiōni ’e a tāna vahine fa’aipoipo, ’a a’o ai rāua ia ’oe ma te parauti’a.
Hōho’a
Elder Dale G. Renlund
« Te ha’apa’ora’a ’o tā tātou ïa mā’itira’a. ’Ua parau pāpū maita’i te Fa’aora i te reira. Mai tei fa’ahitihia i roto i te ’īritira’a a Iosepha Semita o te Luka 14:28, ’ua fa’aue Iesu, ‘E tenā na, e ha’amau i te reira i roto i tō ’outou ’ā’au, ’ia rave ’outou i te mau mea tā’u e ha’api’i ’e tā’u e fa’aue’. E mea ’ōhie roa te reira. … ’A rave ai tātou i te reira, e ha’amaita’i-rahi-hia tō tātou vai-pāpū-ra’a i te pae vārua. E ’ape tātou i te ha’amāu’a i te mau rāve’a tauturu tei hōro’ahia mai e te Atua ’e te ravera’a i te fa’a’atira’a faufa’a ’ore ’e ’o te vāvāhi i tō tātou orara’a » (Dale G. Renlund, « Constructing Spiritual Stability » [Brigham Young University devotional, Sept. 16, 2014], 2, speeches.byu.edu).
’Imira’a pāpa’ira’a mo’a
E aha tā ’oe i ha’api’i mai nō ni’a i te ha’apa’ora’a nā roto mai i te mau pāpa’ira’a mo’a i muri nei ?
Christ and the Fishermen (Lovest Thou Me More Than These) [Te Mesia ’e te feiā rava’āi (Tē rahi na tō ’oe hina’aro iā’u i teie)], nā J. Kirk Richards
E hōho’a nō te riro hau atu ā mai te Mesia te huru
E nehenehe te hōho’a i muri nei e tauturu ia ’oe ’ia fa’ananea ’e ’ia fa’ari’i i te mau huru tei fa’ata’ahia i roto i teie pene ’e te tahi atu mau huru tei fa’ata’ahia i roto i te mau pāpa’ira’a mo’a :
’Ite mai i te huru ’o tā ’oe e hina’aro ra e ’imi.
Pāpa’i i te fa’ata’ara’a o te huru.
’A tāpura ’e ’a tuatāpapa i te mau ’īrava o te pāpa’ira’a mo’a ’o te fa’a’ite nei i te mau hi’ora’a o te huru ’aore rā o te ha’api’i nei nō te reira.
Pāpa’i i tō ’oe mau ’āehuehura’a ’e tō ’oe mau mana’o.
’A ha’amau i te mau fā ’e ’a fa’anaho i te mau ’ōpuara’a ’ia tāpae i teie huru.
’A pure i te Atua ’ia tauturu mai ia ’oe ’ia fa’ananea ’e ’ia fa’ari’i i teie huru.
’A hi’opo’a pinepine i tō ’oe nu’ura’a i mua.
Hōho’a
Elder Jeffrey R. Holland
« E ha’amaita’i te Fatu i te ta’ata tei hina’aro i te ha’amaita’i iāna, ’o te fa’ari’i i te tītaura’a nō te mau fa’auera’a ’e ’o te tāmata i te ha’apa’o i te reira, ’o te poihere i te mau huru vi’ivi’i ’ore o te Mesia ’e ’o te tūtava ma tō rātou ’aravihi mau ’ia roa’a mai te reira. Mai te peu e manuia ’ore ’outou i roto i teie tītaura’a, e nā reira te mau ta’ata ato’a ; tei reira te Fa’aora nō te tauturu ia ’outou ’ia tāmau ā… ’Aita e maoro roa, e manuia ’outou i te mea tā ’outou e ’imi ra » (Jeffrey R. Holland, « Ananahi ho’i Iehova e rave ai i te mea ta’a ’ē i roto ia ’outou na », Liahona, Mē 2016, 126).
Ha’api’ira’a ta’ata hō’ē
’A ’ite mai i te hō’ē huru o teie pene ’aore rā ’o te mau pāpa’ira’a mo’a. ’A pe’e i te hōho’a ’o tei fa’ata’ahia ’ia māramarama ’e ’ia mā’imi i te huru.
’A hi’o i tō ’oe tāreta i’oa misiōnare. E aha te mea e ta’a ’ē ai te reira i terā e ’ō’omohia nei e te mau rave ’ohipa o te hō’ē tai’ete ? ’A hi’o maita’i ē nā tuha’a e piti faufa’a roa a’e ’o tō ’oe ïa i’oa ’e tō te Fa’aora.
Nāhea ’oe e nehenehe ai i te mono maita’i a’e i te Fa’aora ’ei hō’ē o tāna mau pipi ?
Nō te aha e mea faufa’a roa ’ia ’āpiti te ta’ata i tō ’oe i’oa i tō te Fa’aora ma te rāve’a maita’i ?
Pāpa’i i tō ’oe mau mana’o i roto i tā ’oe buka tāmahana.
’Imira’a pāpa’ira’a mo’a
’A hi’o fa’ahou i te mau huru i tāpurahia i roto i te mau pāpa’ira’a mo’a i muri nei. Pāpa’i i tō ’oe mau putapūra’a i roto i tā ’oe buka tāmahana.
E fa’a’ī tāmau noa te « ’Ātivite o te huru » i te pae hope’a o teie pene.
’A ’imi mai i te hō’ē huru i roto i teie pene. ’A ui ia ’oe iho :
Nāhea vau e nehenehe ai e ’ite rahi mai ā nō ni’a i teie huru ?
Nāhea te ’imira’a i teie huru i te tauturu iā’u ’ia riro mai ’ei fa’atere maita’i a’e nō te ’evanelia a Iesu Mesia ?
’A ’ite mai i te mau hi’ora’a nō te huru mai tō te Mesia i roto i te orara’a o te mau tāne ’e te mau vāhine i roto i te mau pāpa’ira’a mo’a. Pāpa’i i tō ’oe mau putapūra’a i roto i tā ’oe buka tāmahana.
’A ’ite mai i te mau hi’ora’a nō te huru mai tō te Mesia i roto i te mau pehe mo’a a te ’Ēkālesia. ’A ’imi ai ’oe i te hō’ē huru, ’a tāmau ’ā’au i te mau paraparau o te mau hīmene purera’a ’aore rā te mau hīmene nō te hōro’a mai te pūai ’e te mana. E tāpiti noa ’aore rā ’a hīmene i te mau paraparau nō te fa’auru ia ’oe ’e nō te ani manihini i te fa’aurura’a a te Vārua.
Ha’api’ira’a ’e te hoa misiōnare, ’e tāuiuira’a hoa
’A tuatāpapa i te mau fa’ahorora’a nō te mau huru mai tō te Mesia i roto i te vaira’a buka ’evanelia ’aore rā i roto i te tahi atu mau rāve’a tauturu i ha’amanahia. E ’āparau e nāhea ’ia fa’a’ohipa i te mea tā ’oe i ha’api’i mai. E nehenehe ato’a ’oe e ’āparau i te mea tā ’oe i ’apo mai i roto i tā ’oe mau tauto’ora’a tāta’itahi, nō te riro mai te Mesia te huru.
’Āpo’ora’a mata’eina’a, ’āmuira’a ārea misiōnare ’e ’āpo’ora’a feiā fa’atere misiōni
E rave rahi mahana hou te ’āpo’ora’a ’aore rā ’āmuira’a, ’a ani i te mau misiōnare tāta’itahi ’ia fa’aineine mai i te hō’ē a’ora’a e pae minuti nō ni’a i te hō’ē huru mai tō te Mesia. ’A fa’ata’a i te taime i roto i te ’āpo’ora’a ’ia nehenehe i te mau misiōnare ’ia a’o mai i tā rātou a’ora’a.
E vāhi i te mau misiōnare nā roto e maha pupu ’e e hōro’a ia tātou te mau tītaura’a i muri nei :
Pupu 1 : Tai’o 1 Nephi 17:7–16 ’e e pāhono i te mau uira’a i muri nei :
Nāhea tō Nephi fa’a’ohipara’a i tōna fa’aro’o ?
E aha tā Nephi i rave tei riro ’ei huru mai tō te Mesia ?
E aha te mau parau fafau tā te Fatu i rave ’e ’o Nephi ?
Nāhea teie parau pāpa’i e tano ai i te ’ohipa misiōnare ?
Pupu 2 : Tai’o Mareko 5:24-34 ’e e pāhono i te mau uira’a i muri nei :
Nāhea teie vahine i te fa’a’ohipara’a i tōna faʼaroʼo ia Iesu Mesia ?
Nō te aha ’oia i fa’aorahia ai ?
Nāhea tātou i te pe’e i tōna hi’ora’a i roto i tā tātou mau tauto’ora’a misiōnare ?
Pupu 3 : Tai’o Iakoba 7:1–15 ’e e pāhono i te mau uira’a i muri nei :
Nō te aha te fa’aro’o o Iakoba i nava’i ai te pūai nō te pāto’i i te mau ’arora’a a Serema ?
Nāhea Iakoba i te fa’a’ohipara’a i te fa’aro’o ’a paraparau ai ’oia e o Serema ?
Mea nāhea te mau ’ohipa a Iakoba i riro ai mai terā tō te Mesia te huru ?
E mea nāhea tō Iosepha Semita fa’a’ohipara’a i tōna fa’aro’o ia Iesu Mesia ?
Mea nāhea tōna fa’aro’o i tāmatara’ahia ?
E aha tāna i rave tei riro mai tō te Mesia te huru ?
Nāhea tātou i te pe’e i te hi’ora’a o Iosepha Semita ?
’Ia fa’aoti ana’e te mau pupu, ’a ha’aputuputu mai i te mau misiōnare ’e e ani ia rātou ’ia fa’a’ite mai i mea tā rātou i tāu’aparau.
Feiā fa’atere misiōni ’e nā tauturu misiōni
E ani i te mau misiōnare ’ia tai’o i te hō’ē o nā ’evanelia e maha nō te Faufa’a ’Āpī ’aore rā te 3 Nephi 11–28. E ani ia rātou ’ia rēni i te ’ohipa tā te Fa’aora i rave ’e ’o tā rātou ato’a e nehenehe e rave.
’A fa’a’ohipa i te ha’amaura’a i te mau fā ’e te fa’anahora’a nō te ha’api’i i te mau misiōnare nō ni’a i te itoito. E fa’a’ite e mea nāhea te itoito nō te rōtahira’a i ni’a i te ta’ata, ’ua riro ’ei fa’a’itera’a nō te here.
I roto i te mau uiuira’a ’aore rā te mau ’āparaura’a, e ani i te mau misiōnare ’ia paraparau mai nō ni’a i te hō’ē huru mai tō te Mesia tā rātou e ’imi ra.
’Ātivite nō te huru
Tē fā o teie ’ātivite ’o tē tauturura’a ïa ia ’oe ’ia ’ite mai i te mau rāve’a nō te tupu rahi i te pae vārua. Tai’o i te mātēria tāta’itahi i raro nei. ’A fa’aoti e aha te fāito e parau mau teie ha’apāpūra’a nō ni’a ia ’oe, ’e ’a mā’iti i te pāhonora’a e tano. Pāpa’i i tā ’oe mau pāhonora’a i roto i tā ’oe buka tāmahana.
’Aita e ta’ata e pāhono « i te mau taime ato’a » i te mau ha’apāpūra’a tāta’itahi. E fa’anahora’a te tupura’a i te pae vārua nō te oraraʼa tāʼātoʼa. ’O te reira te hō’ē tumu i riro ai te reira ’ei mea ’ana’anatae ’e te ho’ona––nō te mea e rave rahi rāve’a nō te tupu i te rahi ’e nō te ora i te mau ha’amaita’ira’a o te tupura’a.
’Ia vai te au maita’i ’a ha’amata i te vāhi i reira ’oe. ’A tūtava ia ’oe iho ’ia rave i te ’ohipa pae vārua e ti’a ai nō te tupu i te rahi. ’A ’imi i te tauturu a te Atua. ’Ia tae ana’e mai te mau ha’ataupupura’a, ’a ti’aturi ē e tauturu mai ’oia ia ’oe. ’A pure ai ’oe, ’a ’imi i te arata’ira’a nō ni’a i te mau huru tā ’oe fa’atumu ra i te mau taime ta’a ’ē o tā ’oe misiōni.
Rāve’a nō te pāhono
1 = ’Aita roa atu
2 = I te tahi taime
3 = Mea pinepine
4 = Fa’atata i te mau taime ato’a
5 = I te mau taime ato’a
Faʼaroʼo
Tē ti’aturi nei au ia Iesu Mesia ’e ’ua fa’ari’i iāna ’ei Fa’aora nō’u. (2 Nephi 25:29)
’Ua pāpū iā’u ē, ’ua here te Atua iā’u. (1 Nephi 11:17)
’Ua rava’i tō’u ti’aturira’a i te Fa’aora nō te fa’ari’i i tōna hina’aro ’e ’ia rave i te mea tāna e ani mai. (1 Nephi 3:7)
Tē ti’aturi nei au ē, nā roto i te Tāra’ehara o Iesu Mesia ’e te mana o te Vārua Maita’i, e fa’a’orehia tā’u mau hara ’e e ha’amo’ahia vau ’a tātarahapa ai au. (Enosa 1:2–8)
E fa’aro’o tō’u ē, tē fa’aro’o nei te Atua ’e tē pāhono nei i tā’u mau pure. (Mosia 27:14)
E fa’aro’o tō’u ē, e hōpoi mai te Atua i te mau mea maita’i i roto i tō’u orara’a ’e te orara’a o vetahi ’ē ’a pūpū ai tātou ia tātou iho iāna ’e i tāna Tamaiti. (Etera 12:12)
’Ua ’ite au nā roto i te mana o te Vārua Maita’i ē e parau mau te Buka a Moromona. (Moroni 10:3–5)
E fa’aro’o tō’u nō te rave fa’aoti i te mea tā te Mesia e hina’aro nei iā’u ’ia rave. (Moroni 7:33)
Tīa’ira’a
Hō’ē o tō’u mau hinaʼaro rahi roa a’e ’o te fāna’ora’a i te ora mure ’ore i roto i te bāsileia tīrētiēra. (Moroni 7:41)
Tē ti’aturi nei au ē, i te hō’ē mahana e noho vau i pīha’i iho i te Atua ’e e riro mai mai iāna te huru. (Etera 12:4)
Aroha ’e te here
Tē putapū nei au i te hō’ē hina’aro mau nō te au maita’i ’e te ’oa’oa mure ’ore o vetahi ’ē. (Mosia 28:3)
’Ia pure ana’e au, e ani au nō te aroha mau––te here ateate ’o te Mesia. (Moroni 7:47–48)
E tāmata vau i te hāro’aro’a i te nino’a mana’o o vetahi ’ē ’e e hi’o i tō rātou ferurira’a. (Iuda 1:22)
E fa’a’ore au ia vetahi ’ē tei fa’a’ino’ino mai iā’u ’aore rā tei rave ’ino mai iā’u. (Ephesia 4:32)
E toro vau i te rima ma te here nō te tauturu i te feiā ’ōtahi, tei ha’afifihia, ’aore rā tei tarapape. (Mosia 18:9)
’Ia tano ana’e, e fa’a’ite au i tō’u here ’e te ha’ape’ape’a nō vetahi ’ē ma i te aupurura’a ia rātou nā roto i te parau ’aore rā te ’ohipa. (Luka 7:12–15)
E ’imi au i te mau rāve’a nō te tāvini ia vetahi ’ē. (Mosia 2:17)
E vai parauti’a noa vau i te Atua i te mau taime ato’a. (Mosia 18:9)
E’ita vau e tu’u i te hiti tā’u mau fa’aturera’a ’aore rā tō’u mau huru nō te ha’afa’ahiahia ’aore rā ’ia fa’ari’ihia vau e vetahi ’ē. (1 Nephi 8:24–28)