Mwakoro 3: Reirei 4

Te Riki bwa Ana Reirei Iesu Kristo ni Maiura

Te Tiibu ae Bua, iroun Del Parson

Reirei Te Reirei Aei

Te bwabetito bon te otenanti ae kakukurei n te kantaninga. Ngkana ti bwabetioaki, ti kaotia n ara mwakuri bwa ti iriira te Atua ao n rinnako inanon te kawai are e kariira nakon te maeu are akea tokina. Ti kaota naba kabaeakira bwa ti na riki bwa ana reirei Iesu Kristo ni maiura.

Te reirei aei e barongaaki ni kaineti ma berita aika tabu ake ti karaoi ngke ti babetito. Iai mwakoro oin mwakorona aikai, n tatabeua nako ao boni iai mwakorokorona aika uarereke:

• Ara Berita ae Tabu are Ti Tauraoi ni Katoka Iaora Aran Iesu Kristo

• Ara Berita ae tabu ibukin Kawakinan Ana Tua te Atua

• Ara Berita ae tabu ni beku ibukin te Atua ao ibukiia tabeman

• Ara Berita ae Tabu n teimatoa ni karokoa te toki

Buokiia aomata bwa ana oota bwa te tua are ko reireiniia bon mwakoron te berita ae tabu are ana karaoia n te bwabetito. Kaotia nakoia bwa e na kanga ni buokiia mwakoron te reirei aei n tatabeua nako bwa ana “nakon Kristo kam na karekea ana kamaiu” (Ominaai 1:26; taraa naba 1 Nibwaai 15:14).

Kona bon bae n tangira reiakinan te reirei aei inanon am kakawari aika a mwaiti. E na karako te kakawari n reirei ae raka iaon 30 te miniti. E na rangi n tamaroa riki ngkana a uarereke, e na okioki am kakawari ni karini mwakoron te boki n angareirei aika uarereke.

Baireia bwa tera ae kona reiakinna, ningai ae kona anga reirei iai, ao mannra am tai. Iangoa kainanoia aomata are ko reireiniia, ao ukora ana kairiiri te Tamnei. Ena iai iroum te iraorao n am angareirei ni kaineti ma bwaai aika ana nakoraoi ibukin buokaia aomata ni katauraoiai ibukin te bwabetito ao te kamatoaaki.

Tabeua mwakoron te reirei aei e bon airi naba ma te kakao ae e onoti. Ukora te kaungaaki ni baireia bwa ena kangaa ao ningai are ena kanakoaki te kakao. Iangoa raoi ana titiraki te aomata ni mwaitin otana. Buokia bwa e na maiuakina te euangkerio teutana imwiin teutana.

te aine ngke e anaa te toa

Ara Berita ae Tabu are Ti Tauraoi ni Katoka Iaora Aran Iesu Kristo

Ngkana ti bwabetitoaki, ti berita bwa ti na iriira Iesu Kristo “ma nanora ni kabane ibukina.” Ti kakoaua naba bwa ti “tauraoi raoi n nanora ni katokaa [iaora] aran Kristo” (2 Nibwaai 31:13; taraa naba Reirei ao Berita aika Tabu 20:37).

Katokaan aran Iesu Kristo iaora titebo nanona ma ti na Ururingnga ao nanomatoa ni maeka n aron ana reirei ni maiura. Ti na kariaia otana bwa e na oota rinanora nakoia tabeman. Ti noriira bwa bon Ana bwai ao ni karimoa Ngaia inanon maiura.

Te mwakoro ae inano e kabwarabwara uoua kawai are ti ururinga ao ni iriira Iesu Kristo.

Tataro n Taainako

Te tataro bon te marooro ae e beebete ma Tamam are i Karawa are e nako mai inanom. Inanon te tataro, ti marooro ma ngaia n te aro are ti rangi ni kinaa ao ni kokoaua. Ti kaota tangirana ao ni kakaitaua ibukin ara kakabwaia. Ti bubuti naba ibukin te buoka, kamanoaki, ao te kairiiri. Ngkai ti a kaina ara tataro, ti na riai n anaa te tai n aki kakarongoa ao n ongoraa.

E reirei Iesu, “Kona riai n tataro n tainako nakon te Tama inanon arau” (3 Nibwaai 18:19, e kairaki katuruturuana; taraa naba Mote 5:8). Ngke ti tataro n aran Iesu Kristo, ti uringnga ma te Tama are i Karawa.

E katea te banna ni katooto Iesu ibukira bwa ti na iria ngkana ti tataro. Ti kona n reiakina riki te tataro man kamatebwaian ana tataro te Tia Kamaiu i nanon booki aika tabu (taraa Mataio 6:9–13; Ioane 17).

A kona ara tataro n rinnako iai tabeua mwakoro aikai:

• Moanna man atongan Tamau are i Karawa.

• Kaota te namakin mai inanom, n ai aron te kakaitau ibukin te kakabwaia are ti a tia ni karekea.

• Titirakin titiraki, ukora te kairiiri, ao bubutii ibukin te kakabwaia.

• Motikia n atonga, “N aran Iesu Kristo, amen.”

Ti kauringaki ni booki aika a tabu bwa ti na tataro n te moaningabong ao n te tairiki. E ngae n anne, ti kona n tataro n te tai are ti bon taku n taabo nako. Ibukin ara tataro bon ibukira ao ibukiia ara utu, e na rangi n raoiroi riki ngkana ti katorobubua man tataro. Ti na bon kona naba n iai ara tataro bon inanora n tainako. (Taraa Aramwa 34:27; 37:36–37; 3 Nibwaai 17:13; 19:16.)

Ara tataro a riai n iangoaki raoi ao n nako mai inanora. Ngkana ti tataro, ti riai n totokoi taekinan baika a okioki n te aro ae titebo.

Ti tataro ma te onimaki, nanora raoi, nanora ni koaua, ao ni mwakurii kaekaia are ti karekei. Ngkai ti karaoa aei, te Atua e na buokiira ni karaoan ara babaire aika tamaroa. Ti na namakina kaaniiara riki nako Ina. E na anganiira te oota ao te koaua. E na kakabwaiara ma namakinan te raunnano, te rau, ao te korakora.

Kamatebwaian koroboki aika tabu

• 2 Nibwaai 32:8–9

• Enoti 1:1–12

• Aramwa 6:6; 13:28; 34:17–28; 37:36–37

• 3 Nibwaai 18:20

• Moronaai 10:3–5

• Reirei ao Berita aika Tabu 6:22–23; 8:2–3; 9:7–9; 10:5; 19:28; 42:14

Reiakina Riki taekan te Tua aei

• Bwai ni Kairi nakon Koroboki aika a tabu, “Prayer”

• Rikitionare n te Baibara: “Tataro

• Atuun Rongorongo n te Euangkerio: “Tataro”

Te Kakao

Ko kona n tataro ni katoabong nakon te Tama are i Katawa?

Kamatebwai n Booki aika Tabu

E reirei Nibwaai “Kanuaingkami n ana taeka Kristo; bwa [a] kona tuangko bwaai ni kabane aika ko riai ni karaoi” (2 Nibwaai 32:3; taraa naba 31:20).

Kamatebwaian booki aika tabu bon te kawai ae e rangi ni bongana n uringa ao n iira Iesu Kristo. Ni booki aika tabu ti reiakina maiuna, ana mwakuri ni mitinare ao ana reirei. Ti reiakini naba ana berita nako. Ngkana ti wareki booki aika tabu, ti namakina Ana tangira. A rikirake tamneira, e rikirake ara onimaki irouna, ao ara iango a kaotaaki. A moanna ni matoatoa ara kakoaua n ana mwakuri aika tabu.

Ti uringa ao n iriira Iesu ngkai ti kabonganai ana taeka inanon maiura. Ti riai ni kamatebwai booki aika a tabu ni katoabong, riki ana Boki Moomon.

Booki aika a Tabu ibukin ana Ekaretia Iesu Kristo ibukiia aika Itiaki ni Boong aika Kaitira bon te Baibara, ana Boki Momoon, Reirei ao Berita aika Tabu ao Bwaeao ae Bati Boona. E aranaki naba bwa te “mwakuri ae bwainaki.”

Kamatebwaian koroboki aika tabu

• 1 Nibwaai 19:22–23

• 2 Nibwaai 9:50–51; 25:26; 29:1–13; 31:19–20; 32:3

• Aramwa 32:28–30

• Reirei ao Berita aika Tabu 1:37–38; 18:34–36

• Ioane 20:31

• 2 Timoteo 3:14–17

• 2 Betero 1:20–21

Reiakina Riki taekan te Tua aei

• Kairi nakon Koroboki aika a tabu, “Koroboki aika tabu

• Atuun Rongorongon te Euangkerio: “Koroboki aika a Tabu”

Te Kakao

Ko konaa ni warekii booki aika tabu ni katoabong? (Iangoa kaoaia aomata bwa ana wareki mwakoro aika onoti.)

Iesu Kristo e reireiniia aomata aika uanao

Ara Berita ae tabu ibukin Kawakinan Ana Tua te Atua

Rongorongona: A mwaiti kawai n reirei tuua ae kuneaki n te reirei aei. Te katooto, ko kona n reireiniia inanon kakawari tabeua. Ke ko konaa n reiakiniia tabeua mwakoron te moan reirei are teniua. Ngkana ko reirei te tua, kakoaua raoi bwa kona reitiia ma te berita are n te babetito ao te babaire ni kamaiu.

Ngkana ti bwabetitoaki, ti karaoa te berita ae tabu ma te Atua bwa ti na konaa ni “kawakin ana tua” (Motiaea 18:10; Aramwa 7:15).

E a tia n anganiira tuua te Atua ibukina bwa e tangiriira. E tangira ae e tamaroa ibukira, n te tai aei ao n te tai are akea tokina. Ngkana Tamara are i Karawa, E atai bwaai aika ti kainanoi n tamneira ao n rabwatara. E ataia naba bwa baikara bwaai aika a kona n uota te kukurei ae moan te korakora nakoira. Te tua teuana ma teuana bon te bwain tangira ae tabu, are ti anganaki bwa e na kaira ana babaire, kawakiniira ao ni buokiira n rikirake.

Teuana bukina ngkai ti karuoaki nakon te aonaaba bwa ti na rikirake iai rinanon kabonganaan inaomatara n rinerine ma te wanawana (taraa Aberaam 3:25). Rineakin te ongotaeka nakon ana tua te Atua—ao n rairannano ngkana ti bwaka—e buokiira ni borauakina te mwananga n te kawai ae kangaanga aei.

Ana tua te Atua bon boton te korakora ao te kakabwaia (taraa Reirei ao Berita aika Tabu 82:8–9). Man kawakinan tuua, ti reiakinna bwa aki rangi n rawawata tuua ake ana totokoa inaomatara. Te inaomata ni koaua e reke man te ongeaba nakon taian tua. Te ongotaeka bon boton te korakora are e uotia nakoira te oota ao te rabakau rinanon te Tamnei ae Raoiroi. E anganiira naba te kukurei ae korakora ao ni buokiira n anganiira te kinaaki ae tabu ngkai ngaira natin te Atua.

E berita te Atua bwa e na kakabwaiaira ngkana ti kawakin Ana tua. Tabeua kakabwaia a onoti nakon tuua tabeua. Kabanean korakoran te kakabwaia bon te rau n te maiu aei ao te maiu are akea tokina n te aonaaba are e na roko. (Taraa Motiaea 2:41; Aramwa 7:16; Reirei ao Berita aika Tabu 14:7; 59:23; 93:28; 130:20–21.)

Ana kakabwaia te Atua aika ibukin te tamnei ao te rabwata. Ni katoa tai, ti kainanoia bwa ti na taotaona nanora n tataningaia. kakoaua bwa ana bon roko ni kaineti ma nanona ao ana tai (taraa Motiaea 7:33; Reirei ao Berita aika Tabu 88:68). Ni kunea raoi tabeua kakabwaia,ti kainnanoia bwa tina iriiri ao n taratara raoi n tamneira. Aio bon te kakabwaia ae koaua riki are e roko n te aro ae e rangi ni beebete ao n teina mai moana.

Tabeua kakabwaia a tii konaa n roko inanon uringakiia. Tabeua aki kona n roko ni karokoa imwiin te maeu aei. N aki tabe ma tain ana kakabwaia te Atua, ti kona ni kakoaua bwa ana bon roko ngkana ti keiaki ni maiuakina ana euangkerio Iesu Kristo (taraa Reirei ao Berita aika Tabu 82:10).

E tangiriia Natina Ni Kabane te Atua n ae e rangi n tamaroa. E taotaona nanona ma kabwakara, ao e kabwarai ara bure ngkana ti rairananora.

Tuua aika Uoua aika Moan te Korakora

Ngke e titirakinaki Iesu, “Tera te tua ae te kabanea ni korakora?” E kaeka, “Ko na tangira Iehova ae Atuam n nanom ni kabane, ao n tamneim ni kabanea, ao ni wanawanam ni kabanea.”

Ao ea manga taku Iesu bwa te kauoua ni korakora n tua bon aekan are te moan: “Ko na tangira raom n ai aron tangiram i bon i roum” (Mataio 22:36–39). “Akea riki te tua teuana ae korakora riki nakon aikai” (Mareko 12:31).

Ngkai natin te Atua n tamnei, iai ara konabwai ibukin te tangira. Bon mwakoron aron rikira ni maiura n tamnei. Maiukinan tuua aika uoua aika a korakora aikai—n tangira te Atua moa ao n tangiriia raom—bon kabwarabwaraan baika a riai n reke irouia ana reirei Iesu Kristo.

Ana Tangira te Atua

A mwaiti kawai aika ti konaa ni kaota iai tangiran te Atua. Ti konaa ni kawakin ana tua (taraa Ioane 14:15, 21). Ti na karimoa moa Ngaia inanon maiura, katukui ana kantaninga Nakoina. Ti kona ni kabotoa ara kantaninga, iango, ao nanora iaona (taraa Aramwa 37:36). Ti kona ni maeka ma te kakaitau ibukin taian kakabwaia are E a tia n anganiira—ao ni katituaraoi n tibwauai kakabwaia aikai (taraa Motiaea 2:21–24; 4:16–21). Rinanon te tataro ao mwakuri ni ibuobuoki nakoia tabeman, ti konaa ni kabwarabwara ao ni karabaaba tangirana.

N aekakin riki tuua ake tabeua, te tua n tangira te Atua bon ibukin kabwaiara. Tera are ti tangiria e bon kaotia bwa tera ae ti ukoukoria. Tera are ti ukoukoria e bon kaotia bwa tera ae ti iangoia ao ni karaoia. Ao baikara aika ti iangoi ao ni karaoi e bon kaotia bwa antai ngaira—ao antai ae ti na riki n ai arona.

Aia tangira tabeman

Tangiraia tabeman bon kaotan ara tangira ibukin te Atua. E tia n reireinnia kawai aika mwaiti te Tia Kamaiu n tangiriia tabeman (taraa, te katooto, Ruka 10:25–37 ao Mataio 25:31–46). Ti kawariia ao ni buitmwaeia nakon nanora ao maiura. Ti tangiriia n ara mwakuri ni ibuobuoki—rinanon ae ti anga ngaira ni kawai aika uarereke. Ti tangiriia tabeman man kabongaan te bwai n tangira are e a tia n anganiira te Atua bwa ti na kakabwaiaiia iai.

Tangirakiia tabeman e reita te taotaona n nano, akoi, ao te kokoaua. E nanonaki naba te ikabwara bure ae akea boona. E nanonaki naba n are anganakiia aomata ni kabane te karinerine.

Ngkana ti tangira temanna, ngaira ao te aomata anne ti na bon kakabwaiaaki. A rikirake nanora, e rikiraki ni manena raoi maiura, ao e rikirake naba kukureira.

Kakabwaia

Uoua tuua aika korakora—n tangira te Atua ao kaain rarikira—bon ngaia ana moan tua te Atua (taraa Mataio 22:40). Ngkana ti tangira moa te Atua, ao n tangiriia naba tabeman, bwaai ni kabane inanon maiura ana mwaing nakon nneia raoi. Te tangira aei e na roota ara waaki, kabonganaan ara tai, te bwai ae mamate nanora ae ti uaiakinna, ao karinanakin bwaai aika a kakawaki iroura.

Kamatebwaian Koroboki aika Tabu

• 2 Nibwaai 31:20

• Motiaea 2–5

• Moronaai 7:45–48; 10:32

• Mataio 22:36–40; 25:31–46

• Mareko 12:28-33

• Ruka 10:25–37

• Ioane 13:34–35; 14:15, 21

• 1 Ioane 4:7–8, 20–21; 5:3

• Iotua 22:5

Reiakina Riki taekan te Tua Aio

• Bwai ni Kairi nakon Koroboki aika Tabu: “Tangira ae Kororaoi,” “Tangira”

• Atuun rongorongon te Euangkerio: “Tangira ae Kororaoi,” “Tangira”

Iriira te Burabeti

E weteia Burabeti te Atua bwa a na tei Ibukina iaon te aba. Rinanoia Ana burabeti, E kaota te koaua ao e kairiia ao n tuangiia.

Te Atua e wetea Iotebwa Timiti bwa ena riki bwa te moan burabeti ibukin boong aika kaitira (taraa reirei 1). Naake a onea mwiin Ioteba Timiti a bon weteaki naba iroun te Atua bwa ana kaira Ana Ekaretia, n reitaki ma te burabeti are e kairia naba n te bong aei. Ti riai ni karekea koauan te wewete ae tabu nakoia burabeti aika maiu ao ni ira ana reirei.

Aia reirei burabeti aika a maiu ao abotoro a katauraoa te angkaa ni koaua aika akea tokiia n te aonaaba ae bibitaki koaua iai. Ngkai ti iira ana burabeti te Atua, te aki koaua raoi ao kangangan te aonnaba ena bon aki taoniira nako. Tina kona ni kunea te kukurei ae korakora n te maiu aei ao ni karekea te kairiiri ibukin mwakoron kawaira ae akea tokina.

Kamatebwaian koroboki aika tabu

• Motiaea 15:11–12

• 3 Nibwaai 12:1–2

• Reirei ao Berita aika Tabu 1:4, 37–38; 21:1–7; 136:37–38

• Makuri 10:34–43

• I-Ebeto 2:19–20; 4:11–14

• Amota 3:7

Reiakina Riki taekan te Tua Aio

• Te Kairi nakon taian koroboki aika tabu: “Burabeti,” “Prophetess,” “Prophecy, Prophesy”

• Atuun Rongorongon te Euangkerio, “Burabeti,,” “Prophecy”

Te Kakao

Ko konaa ni iriira ana reirei ara burabeti ae maiu?

Titiraki ibukin te Intawiu n te Bwabetito Ake a Katauaki

Ko kakoaua bwa [te Beretitenti n te Ekaretia ngkai] bon ana burabeti te Atua? Tera nanon aio iroum?

Kawakin Tuua Ake Tebwina

E kaoti Tuua ake Tebwina te Atua nakon te burabeti are Mote ibukin kairakiia Ana aomata. Tuua aikai a rangi kabonganaaki riki n ara bong. A reiakinira bwa ti na taromauria ao ni kaota ara karinerine ibukin te Atua. A reireiniira arora ae ti na karaoia nakoia raora nako.

• “Ko na tai Atuana te Atua temanna i rarikiu” (Te Otinako 20:3). “Atua” tabeman bon kaubwai, ake ti bwaibwai iai, te korakora, ke te kinaaki ae taabangaki.

• “Ko na tai karaoa am bwai te boua ae karaki (Te Otinako 20:4).

• “Ko na tai atonga aran Iehova ae Atuam ni bakanrereia” (Te Otinako 20:7).

• “Ko na uringa te bong ae te Tabati, n tabuia” (Te Otinako 20:8).

• “Ko na karinea tamam ma tinam” (Te Otinako 20:12).

• “Ko na tai kamateia aomata” (Te Otinako 20:13).

• “Ko na tai wene ni bure” (Te Otinako 20:14).

• “Ko na tai ira” (Te Otinako 20:15).

• “Ko na tai kaota aron raom n te aro ni kewe” (Te Otinako 20:16).

• “Ko na tai mataai.” (Te Otinako 20:17).

Nonori Inanon te Anga Reirei: Akea riki te Atua irarikiu

Aomata ni katei aika a mwaiti a karaoa aia karinerine nakon bwaai are a kauringa iai te mwakuri n Atua ke aia bakatibu. N taai tabetai bwaai aikai, n aron bouannanti, kanikina inanon te aro, ke bangota aika a uarereke, a kona n kabotoa aia nebonebo i aoia. Buokiia naake ko reireiniia bwa ana katikui aia onimaki ao nebonebo nakon Tamaia are i Karawa ma Iesu Kristo.

Kamatebwaian Koroboki aika Tabu

• Motiaea 13:11–24

• Reirei ao Berita aika Tabu 35:24; 59:5–6

• Te Otinako 20:1–17

• Te Tua-Kaua 5:6–21

Reiakina Riki taekan te Tua Aio

• Te Bwai ni Kairi nakon Koroboki aika Tabu, “Tuua, tebwina”

• Atuun rongorongon te Euangkerio: “Tuua ake tebwina”

Te Kakao

Ko kona ni kawakin Tuua Ake Tebwina?

te mwaane e uota te aine

Maiuakina Tuan te Itiaki

Tuan te itiaki bon te mwakoro ae kakawaki n ana babaire te Atua ibukin te mwakuri ni kamaiu ao te karietataki. Te wenene n taanga imarenan te buu te mwaane ao te buu te aine, bon ana tua te Atua ibukin karikaia ataei ao ibukin kaotan te tangira inanon te mare. Te maiu n taanga aei ao te mwaaka ni karika maiun te aomata e rangi n tamaroa ao n tabu.

Ana tua te Atua ibukin tuan te itiaki e bon bongana naba ibukin te wene nibure i tinanikun te mare ae e kinaaki n te tua imarenan temanna te mwanne ao temanna te aine. Te tua aei titebo nanona ma are ngkana iai te onimakinaki ae e tabwanin raoi nakon buun temanna te aomata imwiin te mare.

Ni buokiira ni kawakina tuan te itiaki, burabeti a kantaingaira bwa ti na riai ni itiaki n ara iango ao ara taetae. Ti riai ni totokoi tamnei aika a tangako n aroia nako. Ni kawakina tuan te itiaki, ti riai ni kamangoriira n anuara ao n arora ni kabane.

Naake a tauraoi nakon te bwabetito a na maiuakina tuan te itiaki.

Te Rairannano ao te Kabwarabure

Imatan te Atua ao naake a urua tuan te itiaki e rangi n rawawata te bure iai (taraa Te Otinako 20:14; I-Ebeto 5:3). A aki kabongana raoi te mwaaka ae tabu are e a tia n anga te Atua ibukin karikan te maiu. Ma e bon reitinako naba n tangriira e ngae ngke tia tia ni urua ana tua. E kaoira bwa ti na raira nanora ao ni kaitiakaki rinanon ana kamaiu ao n nanoanga Iesu Kristo. Te bwarannano n te bure e kona n oneaki mwiina ma ana rau te Atua ni kabwarai buure (taraa Reirei ao Berita aika Tabu 58: 42– 43).

Kakabwaia

E anganiira tuan te itiaki te Atua bwa ena kakabwaiaira ma naati n tamnei ake e kanakoia nako aon te aba. Te ongotaeka nakon te tua aei e rangi ni bongana ibukin karekean te rau bon iroum ao ni karekea te tangira, te onimaki, ao te inanoi n arora n ara utu.

Ngkana ti maiuakina tuan te itiaki, ti na bon kawakinaki man uruakan tamneira are roko man te wenenibure itinanikun te mare. Ti na bon kona naba n totokoi kangaanga n ara namakin ao n rabwatara are e bon airiiri ma waaki aikai. Ti na bon rikirake inanon ara namakin ae matoa raoi imatan te Atua (taraa Reirei ao Berita aika Tabu 121:45). Ti na rangi ni waaki raoi ma ana mwakuri te Tamnei ae Raoiroi. Ti na rangi n tauraoi riki ni karaoi berita aika tabu n te tembora are ena reitiia ara utu ibukin te maiu are akea tokina.

Te Mwaane ao te Aine ae Kaai ni Maeka

A bon aki konaa ni bwabetitoaki taanga aika maeka itinanikun te mare ae e kinaaki n te tua imarenan te mwaane ao te aine ni karoko a maiuakina moa tuan te itiaki. E nanonaki ikai bwa a riai n aki tiku ni kaai ni maeka—te taanga n aron te aine ma te aine ke te mwaane ma te mwaane—ke, te mwaane ao te aine, e nanonaki ikai are a riai ni mare. E raonaki aei ma kamwakuran te onimaki nakon te rairannano n aron ae kabwarabwaraaki inanon Reirei ao Berita aika Tabu 20:37. Te mare imarenan te mwaane ao te aine e kakawaki ni mwakoron Ana babaire te Atua.

Te kakao nakon maiuakinan tuan te itiaki e kona n anga te kangaanga ae matoatoa nakoia aomata tabeman ake ko reiakiniia. Bwaina te tataromwaaka ao waekoa namakina aia kangaanga n tatabemaniia. Iira te wirikiriki mairoun te Tamnei ngkana ko anga reirei. Bwaina te taratara raoi ao tai maroroakini rongorongon bwaai aika a onoti. N aron are e kainanoaki, ukora ana reirei am beretitenti n te mition ibukin aekaki aikanne.

Kamatebwaian Koroboki aika Tabu

• 3 Nibwaai 12:27–30

• Reirei ao Berita aika Tabu 42:22; 59:6; 63:16

• Mataio 5:27–28

• I-Ebeto 5:3–5

Reiakina Riki taekan te Tua Aio

• Kairi nakon Koroboki aika a tabu: “Chastity”

• Atuun Rongorongo n te Euangkerio: “Chastity”

Kakao

Ko kekeiaki ibukin kaitiakan am iango ao anuam? Ko kukurei ni maiuakina tuan te itiaki?

Titiraki ibukin te Intawiu n te Bwabetito Ake a Katauaki

• Tera otam n tuan te itiaki, are katabua te wenenibure itinanikun te kabaebae n te mare ae e kinaaki iaan te tua imarenan te mwaane ao te aine? Ko kukurei n ongeaaba nakon te tua aio imwain ao mwiin bwabetitoam?

• Ko a tia n irekereke ma kabwakaan te teei? [Te kabwarabwara: Te aomata are e kaeka eng nakon titiraki aikai e riai ni intawiunaki iroun te beretitenti n te mition imwain ae e kariaiakaki te bwabetito.]

Kawakinan Tuan te Kabwianibwai

Teuana te kakabwaia ae rangi ni korakora ni kainakin n te Ekaretia bon reken te tai ni kabwakaan te kabwianibwai. Ngkana ti kabwakaa ara kabwianibwai, ti buoka iai ana mwakuri te Atua ao ni kakabwaiaia natina.

E moanaki tuan te kabwianibwai man ana tai te O Tetamenti. Te katooto, te burabeti are Aberaam e kabwakaa ana kabwianibwai man ana bwai ni kabane (taraa Aramwa 13:15; Karikan Bwaai 14:18–20).

Te taeka ae kabwianibwai e nanonaki iai teuana te katebwina ni mwakoro. Ngkana ti kabwakaa ara kabwianibwai, ti anganano n teuana te katebwina ni mwakoro man ara karekemwane nakon te Ekaretia (taraa Reirei ao Berita aika Tabu 119:3–4; te raka e ataaki n nanona ae te karekemwane). Bwaai ake a reke iroura bon bwaai n tituaraoi mairoun te Atua. Ngkana ti kabwakaa ara kabwianibwai, ti kaotia bwa ti kakaitaua man kaokan baike ea tia n anganiira.

Kabwakaan te kabwianibwai bon kaotan te onimaki. Bon te tai naba ni karinea te Atua. E reirei Iesu bwa ti na riai n “ukora … moa Uean te Atua” (Mataio 6:33), ao te kabwianibwai bon te kawai nakon karaoan anne. .

Widow’s Mite, iroun Sandra Rast

Kamanenaan Mwanen te Kabwianibwai

Mwanen te kabwianibwai a bon tabu. Ti anga ara kabwianibwai nakon te membwa n te Bitiobiriki, ke n taabo tabeua ti kabwakaa iaon te rain. Ngke e reke irouia kaain te bitiobiriki te kabwianibwai. a kanakoa nakon ana Etekuata te Ekaretia.

Te kauntira e kaainaki iroun te Moan Beretitentii, te kooram n te Tengaun ma Uoman, ao te Bitiobiriki ae Tararua a karekei kawai aika a onoti ni kabonganaan mwanen te kabwianibwai ae tabu (taraa Reirei ao Berita aika Tabu 120:1). E kabonganaaki n aron aikai:

• Katean ao kateimatoaan tamaroan tembora ao taabo n taromauri.

• Rairan ao kaotinakoan koroboki aika tabu.

• Boutokaan waaki ni kakukurei ao ana waaki ni bootaki n taromauri n te tabo.

• Boutokaan te mwakuri ni mitinare ni kabuta te aonaaba.

• Boutokaan rongorongon te mwakuri n te utu.

• Mwanenakin reirei ao waaki n reirei.

Te kabwianibwai e aki kabonganaaki ni kabooia taan kairiiri n te Ekaretia n taabo. A mwakuri ma te anganano n akea booia.

Kakabwaia

Ngkana ti kabwakai ara kabwianibwai, e beritani kakabwaia te Atua aika a rangi ni korakora riki nakon are ti anga. E na “kaukii … wintoon karawa ao ni kabwaroi … kakabwaia aika aki kona n reke nneia” (Maraki 3:10; taraa kiibu 7–12). Kakabwaia aikai aika bwain te tamnei ao bwain te rabwata.

Kamatebwaian Koroboki aika Tabu

• Reirei ao Berita aika Tabu 119; 120

• Mataio 6:33

• Ebera 7:1–2

• Karikani Bwai 14:18–20

• Nakoaia Ibonga 27:30–33

• Maraki 3:7–12

Reiakina Riki taekan te Tua Aio

• Bwai ni Kairi nakon Koroboki aika Tabu: “Tithes, Kabwianibwai”

• Atuun rongorongon te Euangkerio: “Kabwianibwai”

Te Kakao

Ko kona n ongeaaba nakon tuan te kabwianibwai ngkana koa tia ni bwabetitoaki?

Titiraki ibukin te Intawiu n te Bwabetito Ake a Katauaki

Tera ootam n taekan Tuan te Kabwianibwai? Ko kona n ongeaaba nakon te tua aio?

Kabwianibwai ao Anganano ake Tabeua

Kaotia nakoia membwa ake a boou bwa kona kangaa ni kabwakaa am kabwianibwai ao anganao nakoia kaain te bitobiriki (ni kabonganaa te booma ibukin te angano) ke are iaon te rain (taraa donations.ChurchofJesusChrist.org).

Kabwarabwara ae kaain te bitiobiriki ao te kiraaka a kawakina raoi, tauan mwiin kabwianibwai ao anganano ake tabeua. A kawakinaki ni kabane rongorongon te mwane bwa ana kainaki n aki kaotinakoaki.

A na roko n rinanoan te kabwianibwai membwa ma te bitiobi imwaain tokin te ririki koraki. N te marooro ae onoti aei, membwa ana anganaki mwiin aia kakaonimak ni kabwaka aia kabwianibwai ao ana karekea te ribooti n aia anganano.

Ongeaba nakon Tuan te Mauri

Ana tua te Uea iaon te Mauri bon

Rabwatara bon bwaintangira aika tabu mairoun te Atua. Ngaira n tatabemaniira ti kainnanoa te rabwata bwa ti na riki n ai Arona. Rabwatara aikai a rangi ni kakawaki ao ni koroboki aika tabu a kabotauaki ma taian tembora (taraa 1 I-Korinto 6:19–20).

E tangiriira te Uea bwa ti na tararuai raoi rabwatara ma te karinerine. Ni buokara ni karaoan aei, e kaota tuan te marurung are e aranaki bwa Tuan te Mauri. Te kaotioti aei e reireiniira ibukin kanakin amwarake aika kamarurung ao n aki kabonganai bwaai aika ana urua rabwatara—riki te arekoro, te bakee, ao mooi aika kabuebue (e nanonaki ikai te ii ao te kobee).

N Tuan te Mauri ao burabeti n taai aikai a kauring ni kaineti ma kabonganaakin bwaai aika a urubwai, a tabu roroko iaan te tua, ke aika a karereke tangirakiia. A kauring naba burabeti ni kaineti a kabonganaakin taian drugs n ae e aki riai. (Am beretitenti n te mition e na kaekai titiraki ibukin bwaai riki tabeua n am aono are ko mena iai bwa engaa aika ana riai n aki kabonganaaki.)

Kakabwaia

Te Atua e katauraoa Tuan te Mauri ibukin maiuraoin rabwatara ao tamneira. E beritani kakabwaia aika korakora ngkana ti kawakin te tua aei. Kakabwaia aikai bon te marurung, te wanawana, te kaubwai n te rabakau, ao te kamanoaki (taraa Reirei ao Berita aika Tabu 89:18–21).

Te ongetaeka nakon Tuan te Mauri e na buokiira riki ni kaeka nakon te wirikiriki mairoun te Tamnei are Raoiroi. E ngae ngke ti kaitara ma kakaewenako ni marurungira, te ongeaba nakon te tua aei e na buokiira bwa tina marurung n rabwatara, ara iango, ao n tamneira.

Naake ana bwabetitoaki ana riai n ongeaba nakon Tuan te Mauri.

Ibukin kairakim nakon buokaia aomata ake a rangi ni kainano ni kaitaraa te kangaanga aei, taraa mwakoro 10.

Kamatebwaian Koroboki aika Tabu

• Reirei ao Berita aika Tabu 59:15–20; 88:124; 89

• 1 I-Korinto 6:19–20

Reiakina Riki taekan te Tua Aio

• Te Bwai ni Kairi nakon Koroboki aika Tabu : “Tuan te Mauri”

• Atuun rongoronon te Euangkerio: “Te Marurung,” “Tuan te Mauri”

• Bwaai n ibuobuoki ni Buokan te Maiu: “Addiction”

Te Kakao

Ko kona ni kawakina Tuan te Mauri?

Titiraki ibukin te Intawiu n te Bwabetito Ake a Katauaki

Tera ootam n taekan Tuan te Mauri? Ko kona n ongeaaba n kawakinan te tua aio imwain ao mwiin bwabetitoam?

Kawakina te Bong ae te Tabati n Tabuia

Te Bong ni Motirawa ao n Nebonebo

Te Tabati bon te bong ae tabu are ea tia ni katannakoa te Atua ibukira ni katoa wiiki bwa ti na motirawa iai man ara mwakuri nako ni katoabong ao n Neboia. Teuana maibuakon tuua ake tebwina are e anganaki Mote bon “uringakin te bong ae te Tabati bwa ti na tabuia” (Te Otinako 20:8; taraa naba kiibu 9–11).

N te kaotioti ni boong aikai, e kamatoaa te Uea bwa te Tabati “bon te bong ae I a tia n rineia ibukim bwa ko na motirawa man am mwakuri nako, ao ko na anga am nebo nakon are Moan te Rietaata” (Reirei ao Berita aika Tabu 59:10). E taekinna naba bwa ti na riai ni kukurei, tataro, ao n kakaitau n te bong ae te Tabati (taraa kiibu 14–15).

Mwakoron ara nebonebo n te Tabati, ti ira te taromauri n toa ni katoa wiiki. N te bootaki n taromauri aei, ti neboa te Atua ao n anaa te toa n kauringa Iesu Kristo ma Ana Babaire ni Kamaiu. Tauakin te toa e kariaiaira bwa ti na kabooua ara berita aika tabu ma te Atua ao ni kaotia bwa ti tauraoi n rairi nanora man ara bure ao ara kaairua. Te otenanti n toa bon mwakoron tabuan te Bong ae te Tabati.

N te taromauri ti irii naba taian kiraati ike ti reiakina riki iai ana euangkerio Iesu Kristo. E rikirake ara onimaki ngkai ti kamatebwaia koroboki aika tabu ni ikotaki. E rikirake naba ara tangira ngkai ti beku ao ni kakorakoraira n tatabemanira.

N raonaki ma are te motirawa man ara mwakuri n te Tabati, ti riai naba n totokoira man te bobwai ao waaki tabeua are ena konaa n riki iai te Tabati bwa kanga aiaron boong nako. Ti katikua irarikira ana waaki ni kakukurei te aonaaba ao ni kabotoa ara iango ma ara mwakuri iaon te tamnei.

Te bong ibukin karaoan ae e raoiroi

Karaoan ae e raoiroi n te bong ae te Tabati e uarereke kakawakina nakon are ti na totokoira man karaoan bwaai are ena urua tabuna. Ti reiakina te euangkerio, kakorakorai onimaki, karekea te reitaki, anga te mwakuri ni ibuobuoki, ao n iiri waaki ni aika ana tabekiarake utu ao raoraora.

taanga a wareware ni koroboki aika tabu

Kakabwaia

Kawakinan te bong ae te Tabati bwa te bong ae tabu ni kaota ara tangira ao ara karinerine nakon Tamara are i Karawa ao Iesu Kristo. Ngkai ti karaoi mwakuri ae katauaki n te Tabati aika bootau ma nanon ao Tamnein te Uea, tina namakina te kimwareirei ao te rau. E na nuai ao ni manga boou tamneira. Ti na namakina riki te kaan ma te Atua ao ni kakorakora reitakira ma ara Tia Kamaiu. Ti na konaa ni kawakiniira riki ma te itiaki man te aonaaba” (Reirei ao Berita aika Tabu 59:9). Te Tabati ena riki ni kakukurei” (Itaia 58:13; taraa naba vte kibu 14).

Kamatebwaian Koroboki aika Tabu

• 3 Nibwaai 18:1‒12

• Reirei ao Berita aika Tabu 59:9–19

• Mote 3:1–3

• Mataio 12:10-13

• Te Otinako 20:8–11; 31:12–13, 16–17

• Itaia 58:13–14

Reiakina Riki taekan teTua Aio

• Atuun rongorongon te Euangkerio: “Te Bong ae te Tabati”

• Te Bwai ni Kairi nakon Koroboki aika Tabu: “Te bong ae Te Tabati”

Kakao

• Ko kona ni kawakina te Tabati bwa te bong ae tabu ao n iiri ana bootaki te Ekaretia ni katoa wiiki?

• Ko kona n ongeaaba nakon tuan te kabwianibwai ngkana imwiin bwabetitoam?

• Ko kona n airi ma ngaira ni kaitibo ma te Bitiobi (ke te beretitenti n te mwaanga) n ara tabo n taromauri?

Titiraki ibukin te Intawiu n te Bwabetito Ake a Katauaki

Tera ootam ni kawakinan tabun te bong ae te Tabati, ni ikotaki ma kanakin te toa ni katoa wiki ao n ibubuoki nakoia tabeman? Ko kukurei n ongeaba nakon waaki aikai imwain ao mwiin bwabetitoam?

Te mwakuri n te Tabati

Membwa n te Ekaretia a konaa ni kantaningaaki bwa ana mwakuri n te Tabati irouia aia tia kamwakuri ke ni karekea kainanoia ao kainanoia aia komuniti. N te aro aei, membwa a kateimatoa tamnein te Tabati n te aro ae e mwaiti. Membwa a kona ni marooro ma aia taan kairiiri ibukin te waaki aei.

Ongeaaba ao Karinea te Tua

Aika a Itiaki ni boong aika Kaitira a kakoaua te ongeaba nakon Tuua aikai ao ni karikiia bwa ngaiia kaain te tabo aika a raoiroi (taraa Reirei ao Berita aika Tabu 134; Taekan te Onimaki 1:12). A kaungaaki kaain te Ekaretia bwa ana anga aia mwakuri n ibuobuoki ni katamaroai aia komuniti ao abaia. A kaungaaki naba bwa ana riki bwa taan kakaea te bitaki ibukin anua aika tamaroa inanon aia tabo ao aia tautaeka.

A kaoaki membwa n te Ekaretia bwa a na iri waaki n tautaeka ao ni kairiiri ni kaineti ma te tua. Membwa ake a taui nakoa n te tautaeka a mwakuri nakon are a kantaningaaki iai bwa kaain te aba ma tiaki taan tei ibukin te Ekaretia.

Kamatebwaian Koroboki aika Tabu

• Reirei ao Berita aikaTabu 58:21; 134

• Taekan te Onimaki 1:12

Reiakina Riki taekan te Tua Aio

• “Political and Civic Activity” inanon te mwakoro 38.8 n te Aeniboki ni Kabuta

• Atuun rongorongon te euangkerio: “Citizenship”

Te Kakao

Ko kona n ongeaba nakon tuan te aba n te tabo are ko maeka iai?

Titiraki ibukin te Intawiu n te Bwabetito Ake a Katauaki

Ko a tia ni karaoa te bure ae kakaiaki? Ngkana ngaia, ko mena ngkai iaon te tarataraaki ke te kabureaki? [Te Kabwarabwara: Te aomata are e kakea ma eng nakon te titiraki aei e na riai ni intawiunaki iroun te beretitenti n te mition ke temanna are e rineaki imwain are e kariaiakaki te bwabetito.]

Te Kabanea ni Kakannato n te Abanuea, iroun J. Kirk Richards

Ara Berita ae tabu ni beku ibukin te Atua ao ibukiia tabeman

Mwakuri n Ibuobuoki

Ngkana ti bwabetitoaki, ti berita bwa ti na beku ibukin te Atua ao ni beku ibukiia tabeman. Te beku ibukiia tabeman bon oin te kawai ni beku ibukin te Atua (taraa Motiaea 2:17). Te burabeti Aramwa e reireiniia naake iai nanoia ni kan bwabetitoaki bwa a na riai n anga nanoia ni uota rawawatan temanna, … n tang ma ake a tang …, ao ni karau nanoia ake a kainnanoa karauan nanoia” (Motiaea 18:8–9).

Aki maan imwin te bwabetito, membwa ake a boou a karekea te wewete ni ibuobuoki n te Ekaretia. Wewete aikai a anganano ao akea booia. Ngkana ti kariaia ao ni beku ma te wanawana, ti na karikirakea te onimaki, karikirakei tarena, ao ni kakabwaiaia tabeman.

Teuana mwakoron ara mwakuri ni ibuobuoki n te Ekaretia bon te riki bwa te “tari n ibuobuoki” ke te “titita n ibuoubuoki.” N tabera aei, ti beku ibukiia aomata n tatabemaniia ao utu.

Ibukina bwa ngaira ni kabane ana reirei Iesu Kristo, ti tarai aanga ake ti na karaoa te mwakuri ni ibuobuoki ni katoabong. N ai arona, ti nako “ibukin karaoan ae raoiroi” (Makuri 10:38). Ti beku ibukiia kaain rarikira ao tabeman n ara komuniti. Ti kona ni iri aanga ni ibuobuoki rinanon JustServe n te tabo are e tauraoi iai. Ti kona ni boutoka ana mwakuri ni ibuobuoki te Ekaretia nakon te aonnaba ao ni iiri kaeka nakon kabuanibwai.

Kamatebwaian Koroboki aika Tabu

• Motiaea 2:17; 4:15–16, 26; 18:8–10; 23:18

• Reirei ao Berita aika Tabu 42:38

• Mataio 25:31–46

• Ruka 10:25–37

• Iakobo 1:27; 2:17

Reiakina Riki taekan te Tua Aio

• Kairi nakon Koroboki aika a tabu, “Mwakuri ni ibuobuoki”

• Atuun rongorongon te euangkerio: “Mwakuri ni ibuobuoki”

Te Kakao

Ko tauraoi ni butimwaea te wewete ke te katabeaki ngkana ko anganaki (ni ikotaki ma te katabeaki bwa te tari ni ibuobuoki te mwaane ke te aine)?

aomata aika a taetaenikawai

Tibwauaan te Euangkerio

Ngkai aio mwakoron te berita ae tabu n te bwabetito, ti berita n “tei bwa taan kakoaua ibukin te Atua” (Motiaea 18:9). Teuana te kawai ae ti na tei n riki bwa taan kakoaua bon man tibwauaakin ana euangkerio Iesu Kristo. Buokiia tabeman ni karekea te euangkerio bon teuana maibuakon te kabanea ni kakukurei ni waaki ni mwakuri ni ibuobuoki ae ti kona n anga (taraa Reirei ao Berita aika Tabu 18:15-16). Bon te kabwarabwara ae e mwaaka n ara tangira.

Ngkana ti namakina te kakabwaia man maeuakinan te euangkerio, ti tangiria ni kan tibwauaa te kakabwaia. Kaain te utu, raoraora, ao irekerekera e korakora nanoia ngkai ti katea te katooto ae onimakinaki ao a nooria bwa e kangaa te euangkerio ni kakabwaia maiura. Ko kona n tibwaua te euangkerio n arona ae riai ao ae ti taneiai iai (taraa Aeniboki ni Kabuta, mwakoro 23).

Ti kaoiia tabeman bwa ana iri ma ngaira inanon te mwakuri ni ibuobuoki, n te komuniti, waaki ni kakukurei, ao n ana waaki te Ekaretia. Ti kona ni kaoia nakon bootakin te Ekaretia ke nakon te taromauri ni bwabetito. Ti kona ni kaoia bwa ana mataku n te witeo iaon te rain are e kabwarabwara ana euangkerio Iesu Kristo, ni wareka ana Boki Momoon, ke ni kawara ana auti te tembora ae e uki nakoia aomata ni kabane. Bubua kawai ni kakao ae ti kona ni kanakoa. N angiin te tai, te kakao e bon nanonaki n raonaki ma ara utu, raraora, ao kaain rarikira inanon te bwai are ti a bon tia ni kakaraoia.

Ngkana ti bubutia, te Atua e na buokiira ni kinai aanga n tibwauaa te euangkerio ao n tuangiia tabeman bwa e kangaa ni kakabwaiai maiura.

Ibukin rongorongona riki tabeua ibukin kabonganaakin te tua ibukin te tangira, tibwatibwa, ao kakao, taraa “Unite with Members” inanon mwakoro 9.

Kamatebwaian Koroboki aika Tabu

• Reirei ao Berita aika Tabu 88:81

• Mataio 28:19–20

Reiakina Riki taekan te Tua Aio

• Bwai ni Kairi nakon Koroboki aika Tabu: “Te Mwakuri ni Mitinare”

• Atuun Rongorongo n te Euangkerio: “Te Mwakuri ni Mitinare”

Kakao

• Ko kona n tataro ibukiia mitinare ao tibukin tibwangaia n tibwaua te euangkerio?

• Ko kona ni ukora kamwakuran tuan te tangira, tibwatibwa, ao kaoia raoraom, am koraki ao tabeman riki?

Aki Mamatam ao Angabwai n aki Mamatam

E a tia te Uea ni katea tuan te aki mamatam bwa te kawai ibukira ni karikirakea korakoran tamneira ao ni buokiia ake a kainnanoia.

Nanon te aki mamatam bon akean te amwarake ao te mooi n te tai ae katauaki. Te Ekaretia e katoa tai ni karaoa te moan Tabati n te namwakaina koraki bwa te bong ibukin te aki mamatam. Te bong n aki mamatam bon akea te amwarake ao te mooi ibukin 24 te aoa ngkana akea ara kangaanga n rabwatara. Mwakoron te Tabati n aki mamatam aika a rangi ni kakawaki bon te tataro ao kaotan te koaua. Ti kaungaaki naba bwa ti na aki mamatam n taai tabeua n ara tai are ti namakinna iai bwa ti kainnanoia.

Karikirakean Korakoran te Tamnei

Te aki mamatam e buokiira bwa ti na nanorinano, kaan riki ma te Atua, ao n namakina te kabouaki n tamneira. Imwaain moanakin ana mwakuri ni mitinare, Iesu Kristo e aki mamatam (taraa Mataio 4: 1– 2). Ni koroboki aika tabu ao e mwaiti te taua ni mwii inanona ibukin aia aki mamatam burabeti ao tabeman riki bwa aonga ni karikirakea korakoran tamneia ao ni ukora te kakabwaia ae e onoti ibukiia ke ibukiia tabeman.

“Te aki mamatam ao te tataro a irekereke. Ngkana ti aki mamatam ao n tataro ma te onimaki, a uki nanora ni butimwaea te kaotioti i bon ibukira. Ti na taraa riki ni kona ni kaonaki ni kinakin te koaua ao n oota n ana kantaninga te Atua.

Buokiia naake a kainnano

Ngkana ti aki mamatam, ti anga te mwane nakon te Ekaretia ni buokia aomata ake a kainanoia. Aio e aranaki bwa te angabwai n aki mamatam. Ti kaoaki bwa ti na anga te angabwai are e na ti tebo ma mwaitin boon te amwarake are tiaki kanna. Ti kaungaaki bwa ti na rangi n tituaraoi n anga riki iaon mwaitin boon amwarake aikai ngkana ti kona. Kanakoan te angabwai n aki mamatam bon te kawai teuana are ti kona iai ni buokiia tabeman.

Angabwai n aki mamatam a bon kabonganaaki ni katauraoi amwarake ao bwaai riki tabeua ake a kainnanoia aomata ake a kainano bon i abara ikai ao n te aonaaba ae tabangaki. Ibukin rongorongona bwa kona kanga ni kanakoa am angabwai n aki mamatam, taraa “Donating Tithes and Other Offerings” n te reirei aei.

Kamatebwaian koroboki aika tabu

Aki mamatam

• Aramwa 5:45–46; 6:6; 17:2–3

• Moronaai 6:5

• Reirei ao Berita aika Tabu 59:12-16; 88:76

• Itaia 58:6–11

Tabeakinaia Naake a Kainnano

• Motiaea 4:16–27

• Aramwa 4:12–13

• Mataio 25:31–46

Reiakina Riki taekan te Tua Aio

• Kairi nakon Booki aika Tabu: “Fast, Fasting”

• Aeniboki ni Kabuta: 22.2,2

• Atuun rongorongon te euangkerio: “Aki Mamatam ao Mwane n anganano ibukin te Aki Mamatam”

Kakao

• Ko kona n aki mamatam ao n tataro n te Tabati n aki mamatam ibukin te kainano ae onoti?

• Ko kona n anga am angabwai n aki mamatam (imwiin bwabetitoakim)?

te utu i tinanikun te tembora

Ara Berita ae Tabu n teimatoa ni karokoa te toki

Ngkana ti bwabetitoaki, ti karaoa ara berita ae tabu ma te Atua n teimatoa ni karokoa te toki inanon maiuakinan ana euangkerio Iesu Kristo (2 Nibwaai 31:20; taraa naba Motiaea 18:13). Ti kekeiaki mwaaka bwa ti na riki bwa taan iriira Iesu Kristo inanon maiura.

Te burabeti n ana Boki Moomon ae Nibwaai e kabwarabwara te bwabetito bwa te mataroa n rin nakon ana euangkerio Iesu Kristo (taraa 2 Nibwaai 31:17). Imwiin te bwabetito, ti teimatoa ni “waaki nako man teimatoa inanon Kristo” (2 Nibwaaii 31:20).

Ngke ti waaki nako inanon kawain ana reirei, ti katauraoira n nako nakon tembora. Ikekei ao ti karaoi berita aika tabu ma te Atua ngkai ti karekei otenanti man te tembora. Inanon te tembora, ti kona n anganaki te mwaaka ao ni kona ni kabaeaki ma ara utu ibukin te maiu are akea tokina. Kawakinan ara berita ma tamara are i Karawa are ti karaoia n te tembora e na kauka te mataroa nakon angaraoi ao kakabwaia n tamnei are e taua te Atua ibukira.

Ngkai ti reitinako ma te kakaonimaki inanon kawain te euangkerio, ti na bon karekea ana bwai n tangira te Atua ae korakora—te bwai n tangira are te maiu are akea tokina (taraa 2 Nibwaai 31:20; Reirei ao Berita aika Tabu 14:7).

Mwakoro aika imwiina a kabwarabwara tabeua bwaai aika ea tia ni katauraoi te Atua ni buokiira bwa tina teimatoa ni karokoa te toki ni mwanangara n te maiu aei—ao ni kunea te kukurei iai.

Te nakoanibonga ao bootaki n te Ekaretia

Te nakoanibonga bon te kariaia ao mwaakan te Atua. Rinanon te nakoanibonga, Tamara are i Karawa e katiaa Ana mwakuri “n uota te aki mamate ao te maiu ae akea tokina nakoia natina” (Mote 1:39). Te Atua e anga te kariaia ao te mwaaka nakoia Natina mwaane ao aine i aon te aba n ibuobuoki ni karaoa ana mwakuri.

Te nakoanibonga e kakabwaiaira ni kabane. Otenanti n aron te bwabetito ao te toa a karekeaki rinanoia naake a mena n aobitin te nakoanibonga. Ti kona naba ni karekei kakabwaia ni katoki aoraki, karaunano, ao ni kairi.

Te nakoanibonga ao kairiiri ma wewete n te Ekaretia

Te Ekaretia e kairaki iroun Iesu Kristo rinanoia burabeti ao abotoro. Taan kairiri aikai a weteaki mairoun te Atua, katabuaki ao n anganaki te kariaiakaki n te nakoanibonga ni mwakuri inanon aran te Tia Kamaiu.

N taai ake ngkoa, Iesu e anganiia ana reirei te kariaia n te nakoanibonga n aekakin aei, ni kariaiakiia bwa ana kaira ana Ekaretia imwiin are E waerake nako karawa. E bua te kariaiakaki n tokin te tai ngke a rawa aomata ni butimwaea te euangkerio ao ni mateia Abotoro.

Te tia uarongorongo mai karawa e kaoka te nakoanibonga inanon 1829 rinanon te Burabeti Iotebwa Timiti, ao te Uea ea manga katea riki ana Ekaretia ma abotoro ao burabeti. (Taraa reirei 1.)

Taan kairiiri n aroia bitiobi ao beretitenti n te titeiki iai irouia te kariaiakaki n te nakoanibonga ni kairiia kaain aia Ekaretia.

N te tai are mwaane ao aine a weteaki bwa ana beku ibukin te Ekaretia, a anganaki te kariaiakaki mairoun te Atua bwa a na mwakuri ni weteaia anne. Te kariaiakaki aei a anganaki mitinare, taan kairiri, taan reirei, ao tabeman riki ni karokoa te tai are a kainaomataaki man weteaia. A kamwakuraki iaan aia kairiiri naake iai irouia kiingin te nakoanibonga.

Te kariaiakaki aei e tii kona ni kabonganaaki i nanon te raoiroi (taraa Reirei ao Berita aika Tabu 121:34–46). Te Kariaiakaki aei bon te mwakuri ae tabu ao ni kariaiakaki n tei ibukin te Atua ao n mwakuri n Arana. E bon kananonaaki are e na kakabwaiaia ao ni ibuobuoki nakoia tabeman.

kairaje ni mwaane n te reirei n tabati

Nakoanibonga ae te Aaaron ao Nakoanibonga ao te Merekitereka

N te Ekaretia, te Nakoanibonga bon te Nakoanibonga ae te Aaron ao te Nakoanibonga ae te Merekitereka. Iaan aia kairiiri naake iai irouia kiingin te nakoanibonga, te Nakoanibonga ae te Aaron ao te Nakoanibonga ae te Merekitereka a anganaki kaain te Ekaretia aika mwaane ake a tau. Imwiin anganakin temanna te nakoanibonga, te aomata anne e a kamatoaaki nakon te nakoa n te nakoanibonga, n aron te rikan ke te unimwaane. E na kamatoaaki iroun temanna ae iai irouna te kariakaki are kantaningaaki.

Ngke te mwaane ke te kairake n ataeinimwaane e karekea te nakoanibonga, e karaoa ana berita ae tabu ma te Atua ni kakoroa nanon tibwangana aika tabu, buokiia tabeman, ao ni buoka katean te Ekaretia.

Kairake n ataeinimwaane ana karekea te Nakoanibonga ae te Aaron ao ni katabuaki bwa rikan ni moa man Tianuare n te ririki are e koro iai 12 aia rirki. A kona ni katabuaki bwa taan reirei ngkana e koro 14 aia ririki ao taian priests n te ririki are e koro iai 16 aia ririki. Mwaane aika a tibwa rairaki ake a tia n koro aia ririki a karekea te Nakoanibonga ae te Aaron n aki maan imwiin te tai are a bwabetitoaki ao ni kamatoaaki iai. Naake iai irouia te Nakoanibonga ae te Aaron a kona ni kairi otenanti n aekakin te botaki n toa ao te babetito.

Imwiin banen ana tai ni mwakuri bwa te tia kairiiri n te nakoanibonga inanon te Nakoanibonga ae te Aaron, te mwaane ae e tau are ea koro 18 ana ririki ena riai ni karekea te Nakoanibonga ae te Merikitereka ao ni katabuaki bwa te unimwane. Mwaane ake iai irouia te Nakoanibonga ae te Merekitereka a kona ni karaoi otenanti n te nakoanibonga n aiaron te anga te kakabwaia ibukin te katoki aoraki ao te raunnano.

Taraa Aeniboki ni Kabuta, 38.2.9.1, ibukin rongorongon anganakiia te nakoanibong membwa aika boou.

Kooram ao Bootaki n te Ekaretia

Kooram n te nakoanibonga. Te kooram bon te kurubu ae barongaaki are kaainaki irouia aomata aika iai irouia te nakoanibonga. Iai te kooram n unimwaane n uoote nako ibukiia mwaane aika a ikawai. Kooram n riikan, taan reirei, ao taan kairiiri n te nakoanibong bon ibukiia kairake n ataeinmwane.

Bootaki n Aine. Te Bootaki n Aine e bon kainaki irouia aine ake 18 ao are iaona riki. Kaain te Bootaki n Aine a kakorakoraia utu, aomata n tatabemania, ao te komuniti.

Ataeinnaine. Ataenimwaane a kaaina te bootaki n ataeinnaine ni moan Tianuare n te ririki are e koro iai 12 aia ririki.

te aine e angareirei n te kiraati

Moanrinan. Ni kabane ataei man te ririki 3 nakon 11 bon kaain te Bootaki n te Moanrinan.

Reirei n Tabati. Ni kabane ikawai ao kairake a ira te reirei n Tabati, ike a kainnanoia kamatebwaian koroboki aika tabu ni ikotaki.

Ibukin riki rongorongon te nakoanibonga, taraa Aeniboki ni Kabuta, mwakoro 3.

Ibukin rongorongon riki te Reekooti ibukin te Bwabetito ao Kamatoa, taraa Aeniboki ni Kabuta, mwakoro 8–13.

Kamatebwaia koroboki aika tabu

• Motiaea 18:17

• Aramwa 13:1–19

• Reirei ao Berita aika Tabu 20:38-65; 84:19–20; 107; 121:34–46

• Taekan te Onimaki 1:5

• Ruka 9:1-6

• Ioane 15:16

• Iakobo 5:14–15

Reiakina Riki taekan te Tua Aio

• Aeniboki ni Kabuta, mwakoro 3: “Tuua ibukin te Nakoanibonga”

• Atuun rongorongon te euangkerio: “Nakoanibong ae te Aaron,” “Nakoanibong ae te Merekitereka,” “Nakoanibonga”

Kakao

• Ko kona n tauraoi n karekea te Nakoanibonga ae te Aaron? (Ibukiia nwaane are aia ririki 11 ao iaona)

• Ko kona n tauraoi n karekea te Nakoanibonga ae te Merekitereka? (Ibukiia mwaane ake a ikawai)

• Ko kona n ira buakon te waaki n te bootaki nako n te Ekaretia are e a tia ni katauaki?

Te Mare ao te Utu

Te Mare

Te mare imarenan te mwaane ao te aine e katabuaki iroun te Atua. E rangi ni kakawaki n Ana babaire ibukin rikirakeia natina n akea tokiia.

Reitakin te buu te mwane ao te buu te aine inanon te mare e riai ni kamoamoaaki n te reitaki iaon te aba. Iai tibwangaia ae tabu bwa ana kokoua nakoia n tatabemania ao ni kakaonimaki nakon aia berita ae tabu n te mare.

Te buu te mwaane ao te buu te aine a booraoi i matan te Atua. Akea ae e na riai n taonanakoa are temanna. Aia babaire a riai ni karaoaki inanon te inanoi ao te tangira, ma te ibuokaniiango irouia ni kauoman.

Ngkai te buu te mwaane ao te buu te aine a tangiriia ao ni uaia ni mwakuri, aia mare e konaa n riki bwa boton kukureia ae e korakora. A kona ni buokiia i bon irouia ma natiia bwa a na rikirake ni kaea te maiu are akea tokina.

Te Utu

N ai aron te mare, te utu e katabuaki iroun te Atua ao e kakawaki nakon Ana babaire ibukin kukureira are akea tokina. Te kukurei n te maiu n utu e na kona n reke ngkana ti maiuakina ana reirei Iesu Kristo. Kaaro a reireiniia natiia ana euangkerio Iesu Kristo ao ni katea te katooto ni maiuakinana. Utu nako a katauraoi aanga ibukira bwa ti na tangira ao ni ibuobuoki nakoia tabeman.

Kaaro a na riai ni moanibwaia moa aia utu. Bon te tibwanga ao te tabe ae tabu ibukiia kaaro bwa a na riai n tabeakiniia natiia.

Ni kabane utu iai kakaewenako ibukiia ni kabane. Ngkai ti ukora ana boutoka te Atua ao ni kawakin ana tua nako, kakaewenako n ara utu a kona ni buokiia n reiakin ao n rikirake. N tabetai ao kakaewenako aikai a buokiira n reiakina te rairannano ao te kabwarabure.

te karo e reireiniia ana utu

Taan kairiiri n te Ekaretia a kaungaia membwa bwa a na kakaraoa aia kainutu ni katoa wiiki n te tairki. Kaaro a kabongana te tai aei n reireiniia natiia te euangkerio, kakorakora reitakiia n te utu, ao ni karekea te kakukurei ni ikotaki. Taan kairiiri n te Ekaretia a katanoata te reirei, koaua aika kakawaki ibukin te utu (taraa “Te Utu: Te Katanoata nakon te Aonaaba,” ChurchofJesusChrist.org).

Iai riki kawai tabeua ibukin kakorakorakin te utu n aron te tataro n te utu, kamatebwaian koroboki aika tabu, ao te taromauri ni ikotaki. Ti kona ni karaoa ara kakae iaon rongorongon te utu, ikoikota karakin te utu, ao ni buokia tabeman.

A mwaiti aomata ae a karako aia tai ibukin te mare ke ni karekea te reitaki n tangira n te utu. A mwaiti aika a tia ni kaitara ma te raure ao kangaanga riki tabeua aika a rangi ni korakora n te utu. E ngae n anne, te euangkerio e kakabwaiaira n tatabemaniira n aki taraa aron ara utu. Ao ngkana ti kakaonimaki, ao te Atua e bon anganiira naba te kawai are ti na konaa iai ni karekei kakabwaia n tangira ara utu n te maiu aei ao nakon te maiu ae e na roko.

Kamatebwaian koroboki aika tabu

Te Mare

• Reirei ao Berita aika Tabu 42:22; 49:15

• I-Ebeto 5:25

• Karikani Bwaai 2:18, 24

Te Utu

• Motiaea 4:14–15

• Aramwa 56:47; 57: 21

• 3 Nibwaai 18:21

• Reirei ao Berita aika Tabu 68:25–28

• I-Ebeto 6:4

• Taeka n Rabakau 22:6

• “Te Utu: Te Katanoata nakon te Aonaaba”

Reiakina Riki taekan te Tua Aio

• Bwai ni Kairi nakon Koroboki aika tabu, “Te Utu,” “Te Mare, Mare”

• Aeniboki ni Kabuta, mwakoro 2: “Boutokaia Aomata n tatabemaniia ao Utu n te Mwakuri ibukin te Kamaiu ao te Karietataaki

• Atuun Rongorongon te euangkerio: “Te Mare,” “Te Utu,” “Tararuakiia Naati”

Kakao

Kaotako raoi ni kakao aikai ni kaineti nakon aron te aomata temanna ma temanna.

• Ko kona ni karaoa te bootaki n utu n te tairiki ni katoa wiiki, tataro n te utu ni katoa bong, kamatebwaian koroboki aika tabu n te utu?

• Ko kona n taromauri n te Tabati ma am utu?

Karaoan te mwakuri n te tembora ao kakaean rongorongoia ara utu ibukiia ara bakatibu ake a tia ni mate

Tamara are i Karawa e tangiriia Natina ni kabane ao mwakuri korakora ibukin kamaiuakiia ao karietataakiia. E birion mwaitiia aomata ake a tia ni mate ao a aki ongo ana euangkerio Iesu Kristo ke ni karekea kamaiuakin taian otenanti n te euangkerio. Otenanti aikai n aron te bwabetito, te kamatoa, te katabu ibukin te Nakoanibonga ibukiia mwaane, te entaunmen te n te tembora, ao te mare are akea tokina.

Rinanon ana akoi ao ana nanoanga, e katauraoa te kawai teuana te Uea ibukia aomata bwa ana karekea te euangkerio ao taian otenanti. N te aonaaba n tamnei, e kabwarabwaraaki te euangkerio nakoia naake a tia ni mate ao n aki karekea irouia (taraa Reirei ao Berita aika Tabu 138). Ti kona ni karaoa te otenanti ni kamaiu ibukiia ara bakatibu ake a tia ni mate ao tabeman riki inanon te tembora. Aomata ake a tia ni mate n te aonaaba n tamnei, a kona ni butimwaea ke n totokoa te euangkerio ao te otenanti ake a karaoaki ibukiia.

kamatebwai ni koroboki aika tabu n te utu

Imwaain karaoan otenanti aikai, ti kainanoia bwa ti na kakaea raoi bwa antai maibuakoia ara bakatibu ake a tuai karekei aikai. KaKaeaia kaain ara utu bwa ana karekei otenanti aikai e bon rangi ni kakawaki n ara mwakuri ibukin rongorongon ara utu. Ngke tia kunei rongorongo ibukiia, ti ikotia nakon ana tabo n tauanimwii te Ekaretia n FamilySearch.org. Ngkanne ti kona (ke tabeman) ni karaoi otenanti n tei ibukiia inanon te tembora.

Ngkai ti kakaeia ara bakatibu ao ni karaoi otenanti ibukiia, ara utu ea kona n ikotaki n akea tokina.

Mwakuri n Rongorongon te Utu ao Kawaran te Tembora

Kabwarabwaraia membwa aika boou ao naake ko reireiniia nakon te tia kairiiri n te tembora ao te mwakuri ibukin rongorongon te utu n te uoote (ke nakon te membwa temanna are e taneiai ma te tembora ao te mwakuri n rongorongon te utu). Te tia kairiiri aei e kona naba ni buokia aomata ni kinai aia koraki ake a tia ni mate ake a kainnanoa te otenanti n te tembora. Kabonganaa te tai ni marooro n te wiiki are e kairaki raoi ni baireia bwa kona kangaa ni buokiia membwa aika boou ni moana mwakurian rongorongon aia utu ao n te tembora.

Te bitiobi e na intawiu ma membwa aika boou n te roro ake a tau ibukin te beba ni kariaia nakon te tembora ni karaoi mwakuri ni bonomwi ibukin te bwabetito ao te kamatoaaki ibukiia aia utu ao tabeman riki ake a tia ni mate. Te membwa e kona n reke irouna te kariaia aei ni moanaki i nanon Tianuare n te ririki are koro iai 12 aia ririki. Mwaane a kainanoia naba bwa e na reke irouia te nakoanibonga ae te Aaron ibukin karekean te kariaia aei. Kaungaiia membwa aika a boou bwa ana karekea irouia te kariaia aei n angaraoina mairouia.

Ngkana e kaan te tembora, kawaria ma membwa aika a boou ngkana e riai. Waaki nako ma ngaia ni karaoi otenanti n te tembora.

Kamatebwaian Koroboki aika Tabu

• Reirei ao Berita aika Tabu 128; 138

• 1 I-Korinto 15:29

• 1 Betero 3:18–21; 4:6

Reiakina Riki taekan te Tua Aio

• Aeniboki ni Kabuta, mwakoro 28: “Otenanti n te Tembora ibukiia Maate”

• Atuun Reirei n te Euangkerio, “Bwabetito ibukiia Maate,” “”Rongorongon te Utu”

Kakao

• Ko kona n katauraoiko ni karekei otenanti n te tembora ibukiia ara bakatibu ake a tia ni mate?

• Ko tauraoi nakon mwakurian rongorongon te utu ao ni kanakoi araia bakatibu aika a tia ni mate ni karekei otenati n te tembora?

Taian tembora, te entaumenti, te mare are akea tokina, ao te utu are akea tokina

Tembora

Te tembora bon Ana auti te Uea. Bon te tabo ae e tabu are ko konaa ni karaoa iai te berita ae e tabu ma te Atua ngkana ti karekei ana otenanti aika tabu. Ngkana ti kawakin berita aika tabu, e kona ni iai iroura “mwaakan te aro n atua” inanon maiura (taraa Reirei ao Berita aika Tabu 84:19–22; 109:22–23).

Te Entaumente

Teuana maibuakoia otenanti aika a mwaiti are ti karekea n te tembora bon te entaumente. Te taeka entaumente nanona te “bwaintangira.” Te bwaintangira n te rabakau ao te mwaaka e bon roko mairoun te Atua. Inanon te entaumente, ti karaoa te berita ae e tabu ma te Atua are e reitira ma ngaia and natina, Iesu Kristo (taraa mwakoro 1).

Ikawai a tau nakon karekean aia entaumente n te tembora imwiin teuana aia ririki n tia ni kaaina te Ekaretia. Ibukin rongorongon te entaumente, taraa Aeniboki ni Kabuta, 27.2.

Te Mare ae akea tokina ao Te Utu ae akea tokina

Ana babaire te Atua ibukin te kukurei e karekea te konaa n reitiia utu n teimatoa imwiin te mate. N te tembora ti kona ni mareaki ibukin ngkai ao n are akea toki. Aio are e kangaraoa te utu bwa ana ikotaki n akea tokina.

Imwiin karekean aia entaumente taanga ake a mareaki n te tembora, a kona ni kabaeaki ke ni mareaki n akea tokina. A kona ni kabaeaki naba ma natiia.

Te buu te mwaane ao te buu te aine ake a tia ni kabaeaki n te tembora a riai ni kawakina te berita ae tabu are a tia ni karaoia ni karekei kakabwaian te mare are akea tokina.

taanga a uaia n nakonako n te kawai

Bwaai aika ana rootaki iaii naake ko reireiniia ibukin te mare are akea tokina

Tabeman aomata ana iai aia kangaanga n aia utu nako are e na kona ni karika te aki konaa ni ikotaki n akea tokina. Tabeman akea buuia ao natiia n te maiu aei.

Kauringiia naake ko reireiniia bwa iai ana babaire te Atua are te babaire ni kakukurei. Buokiia bwa ana noora maiuakinan te Euangkerio ngkai ena konaa ni katauraoia ibukin te utu ae akea tokina n te tai ae e na roko, e aoria ngke e na roko aei imwiin te maiu aei.

N aki taraa aron temanna n ana utu ke ana mare, ikawai a riai ni katauraoia nakon karekean aia entaumente n te tembora. Karekean aia entaumente bon karekean te kakorakoraaki ae matoatoa nakoiia. Buokiia naba bwa ana noora te bwai ae a kona ni karaoia n ikotiia aia bakatibu ake a tia ni mate rinanon te mwakuri n te tembora.

Kamatebwaian Koroboki aika Tabu

• Reirei ao Berita aika tabu 43:16; 95:8–9; 97:10–16; 109; 131:1–4

Reiakina Riki taekan te Tua Aio

• Aeniboki ni Kabuta, mwakoro 27: “Otenanti n te Tembora ibukiia aika Maiu”

• Atuun rongorongon te euangkerio, “Tembora,” “Entaumente,” “Te Mare”

• temples.Churchofjesuschrist.org

Te Kakao

Ko kona n katauraoiko n nakon te tembora ao ni karekea te otenanti n te tembora?